Chapter 370

śrīnārāyaṇa uvāca |
harerbhaktermahimānaṃ śrutvā satī yamaṃ punaḥ |
papraccha kena vidhinā bhajanīyo hariḥ svayam || 1 ||
[Analyze grammar]

yamaḥ śrutvā tu sāvitrīṃ prāha rītiṃ sumokṣadām |
śṛṇu lakṣmi kathayāmi yathā prāha satīṃ yamaḥ || 2 ||
[Analyze grammar]

prātarutthāya tu kṛṣṇanārāyaṇaṃ hṛdi smaret |
mūrtiṃ dhyāyet saumyarūpāṃ cintayettu punaḥ punaḥ || 3 ||
[Analyze grammar]

snāne śauce kriyāyāṃ ca bāhye cāntarakarmaṇi |
bhojye vihāre śayane gṛhakārye hariṃ smaret || 4 ||
[Analyze grammar]

śraddhayā parayā tatra harau sarvendriyāṇi vai |
tathā'ntaḥkaraṇānyevaṃ yojayecchrīharau mudā || 5 ||
[Analyze grammar]

pāne niṣadane svapne nidrāyāṃ jāgrati krame |
śubhe'śubhe tathā kārye smaraṇīyo hariḥ sadā || 6 ||
[Analyze grammar]

jihvā tatkīrtanaṃ kuryātkarṇastacchravaṇaṃ caret |
netraṃ taddarśanaṃ kuryād ghrāṇaṃ tadgandhamāpnuyāt || 7 ||
[Analyze grammar]

carma tatsparśanaṃ kuryātkarastatpādasevanam |
pādastanmandiraṃ gacched vāṇī tadbhajanaṃ caret || 8 ||
[Analyze grammar]

malamūtrendriyaṃ vighnanāśārthaṃ guṇatāṃ vrajet |
ānandaṃ śrīharerlabdhvā śrīharermananaṃ caret || 9 ||
[Analyze grammar]

nirṇayaṃ mānanaṃ cāpi cintanaṃ śrīhareśca tu |
evaṃ sarvaṃ harereva kuryānnānyasya kasyacit || 10 ||
[Analyze grammar]

na svārthaṃ na parārthaṃ ca kuryāddharyarthameva vai |
tathā kṛtvā nacireṇa harerdhāmagatirbhavet || 11 ||
[Analyze grammar]

ityuktā sā tu sāvitrī yamaṃ bhaktavaraṃ param |
jñātvā yamāṣṭakaṃ prāha śṛṇu lakṣmi vadāmi te || 12 ||
[Analyze grammar]

sūryaṃnārāyaṇastīrthe puṣkare tapasā purā |
dharmāśaṃ yaṃ sutaṃ prāpa dharmarājaṃ namāmyaham || 13 ||
[Analyze grammar]

sarveṣāṃ prāṇināṃ karmabhogāntaṃ saṃvidhāya yaḥ |
śāntiṃ karoti yo devaḥ śamanāya tu te namaḥ || 14 ||
[Analyze grammar]

kṛtānāṃ karmaṇāṃ tvantaṃ nyāyarītyā karoti yaḥ |
sarveṣāṃ dehināṃ so'yaṃ taṃ kṛtāntaṃ namāmyaham || 15 ||
[Analyze grammar]

pāpināṃ daṇḍakartā yo daṇḍaṃ bibharti śuddhidam |
śāstre tasmai nītiyuje daṇḍine te namo namaḥ || 16 ||
[Analyze grammar]

sarveṣāṃ vastukāryāṇāṃ paricchedaṃ karoti yaḥ |
sarvāyuḥkalanaṃ devaṃ kālarūpaṃ namāmyaham || 17 ||
[Analyze grammar]

jīvān daṇḍapradānairyo yamayatyeva sarvathā |
karmānurūpaphaladastaṃ yamaṃ praṇamāmi vai || 18 ||
[Analyze grammar]

yathā karma tathā dātā na rāgānna ca roṣataḥ |
tasmācchuddhikaraṃ mitraṃ sarvamitraṃ namāmi ca || 19 ||
[Analyze grammar]

kṛṣṇanārāyaṇamūrteḥ samutpannastu yaḥ purā |
brahmaṇoṃśastato jātastaṃ brāhmaṃ praṇamāmi ca || 20 ||
[Analyze grammar]

ityuktvā taṃ praṇanāma yamastuṣṭo babhūva ha |
yamāṣṭakaṃ paṭhatastu bhavennaiva yamādbhayam || 21 ||
[Analyze grammar]

kāyavyūhena ca śuddhiḥ karmaṇāṃ tasya jāyate |
mucyate yamapāśācca satīṃ prāheti dharmarāṭ || 22 ||
[Analyze grammar]

yamastasyai kṛṣṇanārāyaṇamantra pradāya ca |
oṃ śrīkṛṣṇanārāyaṇaṃ praṇamāmi trivārakam || 23 ||
[Analyze grammar]

karmā'śubhavipākaṃ ca tāmuvāca yamaḥ svayam |
kukarmaṇā jano yāti narakān bahudāruṇān || 24 ||
[Analyze grammar]

narakāṇāṃ tu kuṇḍāni santi nānāvidhāni ca |
vistṛtāni gabhīrāṇi bhayakleśakarāṇi hi || 25 ||
[Analyze grammar]

ṣaḍaśītiśca kuṇḍāni ghorāṇi kutsitāni ca |
saṃyamanyāṃ pravidyante tāni nibodha nāmataḥ || 26 ||
[Analyze grammar]

vahnikuṇḍaṃ taptakuṇḍaṃ kṣayakuṇḍaṃ bhayānakam |
viṭkuṇḍaṃ mūtrakuṇḍaṃ ca śleṣmakuṇḍaṃ tu duḥsaham || 27 ||
[Analyze grammar]

garakuṇḍaṃ dāhakuṇḍaṃ vasākuṇḍaṃ tathā mahat |
śukrakuṇḍamasṛkkuṇḍamaśrukuṇḍaṃ ca kutsitam || 28 ||
[Analyze grammar]

malakuṇḍaṃ vīryakuṇḍaṃ rajaḥkuṇḍaṃ vigandhakṛt |
karṇaviṭkuṇḍamugraṃ ca nakhakuṇḍaṃ ca duḥkharam || 203 ||
[Analyze grammar]

majjākuṇḍaṃ māṃsakuṇḍamasthikuṇḍaṃ ca duḥkhadam |
lomakuṇḍaṃ kleśakuṇḍaṃ tāmralohaprakuṇḍakam || 30 ||
[Analyze grammar]

tīkṣṇakaṇṭakakuṇḍaṃ ca viṣakuṇḍaṃ ca dāhakam |
gharmakuṇḍaṃ taptasurākuṇḍaṃ vṛścikakuṇḍakam || 31 ||
[Analyze grammar]

taptatailaprakuṇḍaṃ ca dantakuṇḍaṃ ca vighnadam |
kṛmikuṇḍaṃ pūyakuṇḍaṃ sarpakuṇḍaṃ bhayāvaham || 32 ||
[Analyze grammar]

daṃśamaśakakuṇḍaṃ ca vajradaṃṣṭrāprakuṇḍakam |
śarakuṇḍaṃ śūlakuṇḍaṃ khaḍgakuṇḍaṃ tu vaiśasam || 33 ||
[Analyze grammar]

godhākuṇḍaṃ nakrakuṇḍaṃ kākakuṇḍaṃ mahābhayam |
ghṛṣṭikuṇḍaṃ cūrṇakuṇḍaṃ bandhakuṇḍaṃ nirāśrayam || 34 ||
[Analyze grammar]

taptapāṣāṇakuṇḍaṃ ca tīkṣṇagrāvāgrakuṇḍakam |
lālākuṇḍamasikuṇḍaṃ cūrṇakuṇḍaṃ ca mardanam || 35 ||
[Analyze grammar]

cakrakuṇḍaṃ vajrakuṇḍaṃ kūrmakuṇḍaṃ maholbaṇam |
jvālākuṇḍaṃ bhasmakuṇḍaṃ pūtikuṇḍaṃ bhayāvaham || 36 ||
[Analyze grammar]

taptasūrmīmasipatraṃ kṣuradhāraṃ sucīmukham |
kṛkalāsaprakuṇḍaṃ ca jagadaṃśaṃ cipīṭakam || 37 ||
[Analyze grammar]

kuṃbhīpākaṃ kālasūtramadhaḥkandharamugrakam |
pāṃśubhojyaṃ pāśakaṇṭhaṃ śūlaprotaṃ sukīlakam || 38 ||
[Analyze grammar]

ulkāmukhaṃ tvandhakūpaṃ vedhanaṃ daṇḍatāḍanam |
jālabandhaṃ dehacūrṇaṃ dalanaṃ śoṣaṇaṃkaram || 39 ||
[Analyze grammar]

sarpajvālāmayaṃ kṣveḍadhūmrāndhaṃ nāgapāśanam |
dvaidhībhāvaprakuṇḍaṃ ca lāvaṇaṃ kuṇḍamityapi || 40 ||
[Analyze grammar]

bhaguprapātanaṃ cāpi vaitaraṇīprapātanam |
carmotkartanakuṇḍaṃ ca bhrāṣṭrakaṭāhamityapi || 41 ||
[Analyze grammar]

kuṇḍānyetāni sāvitri pāpānāṃ śodhakāni vai |
pāpināṃ duḥkhadānyeva rakṣitāni yamānugaiḥ || 42 ||
[Analyze grammar]

daṇḍahastaiḥ śūlapāśaśaktitomarahastakaiḥ |
madonmattaistāmasaiśca nirdayaistāmrapiṃgalaiḥ || 43 ||
[Analyze grammar]

nānārūpadharaiḥ sarvā'dhṛṣyairdṛśyaistu pāpinām |
puṇyakṛtāmadṛśyaiśca dhārmikāṇāṃ ca yoginām || 44 ||
[Analyze grammar]

śṛṇu keṣāṃ kutra vāso daṇḍarūpo'sti kuṇḍake |
kaṭuvāṇyā khalatvena dagdhān karoti bāndhavān || 45 ||
[Analyze grammar]

gātralomapramāṇābdaṃ vahnikuṇḍaṃ prayāti saḥ |
dagdhvā vahnau pātakāni labhejjanmatrayaṃ paśoḥ || 46 ||
[Analyze grammar]

gṛhā''gatātithiṃ yo na bhojayet svāśritaṃ tathā |
lomamānasamāstaptakuṇḍe sthitvā tataḥ sa vai || 47 ||
[Analyze grammar]

uṣṇabhūmau marau deśe pakṣī syātsaptajanmasu |
ravivārā'rkasaṃkrāntyāmamāyāṃ śrāddhavāsare || 48 ||
[Analyze grammar]

vrate kṣāreṇa vastrasthakīṭānāṃ nāśakastu yaḥ |
kṣārakuṇḍaṃ sa vai yāti sūtramānābdameva ha || 49 ||
[Analyze grammar]

vrajecca rājakīṃ yoniṃ saptajanmasu sundari |
svadattāṃ paradattāṃ ca jīvikāṃ tu hareddhi yaḥ || 50 ||
[Analyze grammar]

ṣaṣṭivarṣasahasrāṇi viṭkuṇḍaṃ tu prayāti saḥ |
ṣaṣṭivarṣasahasrāṇi viḍbhojī viṭkṛmistataḥ || 51 ||
[Analyze grammar]

taḍāgaṃ nāśayed yastu mūtrakuṇḍaṃ prayāti saḥ |
tadreṇumānavarṣaṃ ca mūtrapāyī tato bhuvi || 52 ||
[Analyze grammar]

saptajanmasu godhā syād bhittivāsakarī gṛhe |
ekākī miṣṭabhug yāti śleṣmakuṇḍaṃ samāśatam || 53 ||
[Analyze grammar]

śleṣmābhojī bhavet preto mūtrapūyādipānakṛt |
pitaraṃ mātaraṃ patnīṃ guruṃ putrīṃ sutaṃ sakhīn || 54 ||
[Analyze grammar]

anāthaṃ ca na puṣṇāti kṣveṇakuṇḍaṃ prayāti saḥ |
abdasahasraṃ tadbhojī tataḥ pretaḥ śataṃ samāḥ || 55 ||
[Analyze grammar]

atithiṃ krūrabhāvena draṣṭurjalaṃ ca piṇḍakān |
pitṛdevā na gṛhṇanti kulanāśastato bhavet || 56 ||
[Analyze grammar]

teṣāṃ tu ghātakānāṃ ca malakuṇḍe prapātanam |
śataṃ samā malabhojī tataḥ sa saptajanmasu || 57 ||
[Analyze grammar]

daridro jāyate duḥkhī patitaśca pade pade |
datvā dānaṃ tu caikasmai tvanyasmai dīyate tu tat || 58 ||
[Analyze grammar]

vasākuṇḍaṃ prayātyeva śatavarṣaṃ vasādanaḥ |
janmatrayaṃ sa cāṇḍālaḥ kṛkalāsaśca saptakṛt || 59 ||
[Analyze grammar]

daridraśca bhavedalpajīvī ca pāpakṛttataḥ |
naro nārī svakaṃ śukraṃ rajo vāpi parasparam || 60 ||
[Analyze grammar]

pāyayatyeva kāmādvā śukrakuṇḍaṃ prayāti saḥ |
śatavarṣaṃ ca tadbhojī yonikīṭaḥ śataṃ samāḥ || 61 ||
[Analyze grammar]

atha pūjyaṃ tāḍayitvā guruṃ ca pitarau tathā |
raktaṃ pravāhayed yaḥ sa yātyasṛkakuṇḍamulbaṇam || 62 ||
[Analyze grammar]

śatavarṣaṃ raktabhojī tato vyādhaḥ prajāyate |
saptajanmasu pāpāni kṛtvā punastathā vrajet || 63 ||
[Analyze grammar]

aśru sravantaṃ gāyantaṃ nṛtyantaṃ bhaktameva yaḥ |
kṛṣṇāgre tu hasan cāśrukuṇḍaṃ prayāti narmakṛt || 64 ||
[Analyze grammar]

śatavarṣaṃ tvaśrubhojī cāṇḍālaḥ syāt trijanmasu |
khalo yāti gātramalakuṇḍaṃ daśābdakaṃ tataḥ || 65 ||
[Analyze grammar]

trijanmasu kharo jambūkastrijanmasu kaṣṭavān |
badhiraṃ yo hasatyeva nindatyapi ca narmakṛt || 66 ||
[Analyze grammar]

sa yāti karṇaviṭkuṇḍe tadbhojī śatavatsarān |
tato badhiraḥ saptajanmasvaṃgahīnaśca saptasu || 67 ||
[Analyze grammar]

jīvikādaṃ tu yo hanti majjākuṇḍe sa gacchati |
lakṣavarṣāṇi tadbhojī śaśakaḥ saptajanmasu || 68 ||
[Analyze grammar]

mīnā eṇāḥ sapta sapta tataḥ śuddhaḥ prajāyate |
kanyāvikrayiṇo yānti māṃsakuṇḍe'tidāruṇe || 69 ||
[Analyze grammar]

kanyālomapramāṇābdaṃ māṃsādanā hatā yamaiḥ |
svamāṃsaṃ rudhiraṃ mūrdhnaste khādanti kṣudhārditāḥ || 70 ||
[Analyze grammar]

ṣaṣṭivarṣasahasrāṇi kanyāviṭsu kṛmistataḥ |
saptajanmasu vyādhaḥ sa varāhaḥ kukkurastataḥ || 71 ||
[Analyze grammar]

saptajanmasu maṇḍūko jalaukāḥ kāka ityapi |
kṣauraṃ yatra vidhinā''ptaṃ na kārayettu yo janaḥ || 72 ||
[Analyze grammar]

nakhakuṇḍaṃ prayātyeva nakhabhojī nakhābdakam |
romakuṇḍe tathā yāti romabhojī pratāḍitaḥ || 73 ||
[Analyze grammar]

sakeśaṃ pārthivaṃ liṃgaṃ pūjayed yo janastu saḥ |
keśakuṇḍe prayātyeva mṛdreṇumānavarṣakam || 74 ||
[Analyze grammar]

tato vai yavano varṣaśataṃ prajāyate bhuvi |
pitṛpiṇḍā'pradātā'sthikuṇḍe patati colbaṇe || 75 ||
[Analyze grammar]

tataḥ khañjaḥ saptajanmasvatinirdhana eva ca |
yaḥ sevate pūrṇamāsāṃ garbhiṇīṃ prasavonmukhām || 76 ||
[Analyze grammar]

prataptatāmrakuṇḍe sa śatavarṣāṇi tiṣṭhati |
rajasvalānnaṃ yo bhuṃkte śatābdaṃ lauhakuṇḍake || 77 ||
[Analyze grammar]

patitvā rājakīṃ yoniṃ carmakārī ca saptasu |
mahāvraṇī daridraśca jāyate tatparaṃ śuciḥ || 78 ||
[Analyze grammar]

yaśca gharmasvedahastaṃ devadravye suyojayet |
śatavarṣapramāṇaṃ sa gharmakuṇḍe hi tiṣṭhati || 79 ||
[Analyze grammar]

surāpaśca surākuṇḍe coṣṇaṃ yāti śataṃ samāḥ |
tataḥ śūdraḥ saptajanmasvatinirdhana eva ca || 80 ||
[Analyze grammar]

kaṭuvāṇyā patiṃ vakti sā kuṇḍe tīkṣṇakaṇṭake |
patitā tāḍyate dūtaiścaturyugaṃ ca tiṣṭhati || 81 ||
[Analyze grammar]

aśvinī jāyate paścāt pṛthivyāṃ saptajanmasu |
viṣadātā viṣakuṇḍe sahasrābdaṃ hi tiṣṭhati || 82 ||
[Analyze grammar]

viṣabhojī nṛghātī ca vṛṇī syāt saptajanmasu |
saptajanmasu kuṣṭhī ca tataḥ śuddhaḥ prajāyate || 83 ||
[Analyze grammar]

vṛṣaṃ bhṛtyaṃ tāḍayed yo daṇḍena tanniyāmakaḥ |
prataptatailakuṇḍe sa tiṣṭhatyeva caturyugam || 84 ||
[Analyze grammar]

tato goromamānābdaṃ vṛṣo bhavati bhūtale |
baḍiśena ca kuntena dantena kīlakena ca || 85 ||
[Analyze grammar]

lauhena hanti vṛṣabhaṃ dehinaṃ prāṇinaṃ ca vā |
kuntakuṇḍe vasetso'pi varṣāṇāmayutaṃ khalu || 86 ||
[Analyze grammar]

tato jalodararogī tvekajanmani jāyate |
abhakṣyabhakṣī manujo kṛmikuṇḍaṃ prayāti vai || 87 ||
[Analyze grammar]

svalomamānavarṣānte bhuvi mlecchastrijanmasu |
pāpānnabhojī vrajati pūyakuṇḍaṃ śata samāḥ || 88 ||
[Analyze grammar]

tataḥ śūdraḥ saptajanmasvatiśūladharo bhavet |
sarpahā sarpakuṇḍaṃ tu yāti sarpeṇa bhakṣitaḥ || 89 ||
[Analyze grammar]

sarpaviḍbhakṣaṇaḥ paścātsarpo vai jāyate bhuvi |
tataḥ svalpā''yurevā'yaṃ dadrurogī bhavettathā || 90 ||
[Analyze grammar]

sarpeṇa tasya mṛtyuśca sarpeṇa bhakṣaṇaṃ matam |
jīvān hanti sa daṃśākhye kuṇḍe patati pāpakṛt || 91 ||
[Analyze grammar]

āyurdinābdakaṃ sthitvā kṣudrajantusahasrake |
jāyate ca muhuḥ paścādaṃgahīno bhaved dhruvam || 92 ||
[Analyze grammar]

madhuhā makṣikāghātī sagare kuṇḍake patet |
svāyurdinātmakaṃ sthitvā makṣikāyonimāpnuyāt || 93 ||
[Analyze grammar]

adaṇḍyadaṇḍakṛt kuṇḍe vajrakīṭe pateddhruvam |
tallomamānavarṣaṃ ca sthitvā kīṭo bhaved bhuvi || 94 ||
[Analyze grammar]

anyāyadhanalo rājā vṛścike kuṇḍake patet |
romābdaṃ duḥkhamāsādya vṛścikaḥ saptajanmasu || 95 ||
[Analyze grammar]

tato'ṅgavikalo vyādhigrasto bhuvi bhavejjanaḥ |
vipro dharmavihīno vai śarakuṇḍe patatyatha || 96 ||
[Analyze grammar]

śaraviddhaḥ svalomābdaṃ sthitvā śuddho bhavettataḥ |
kārāgāre bandhayati jīvānnirdoṣakān janaḥ || 97 ||
[Analyze grammar]

taptatoye golakuṇḍe patati romavatsarān |
kīṭairviddhastato nīcabhṛtyo vai jāyate bhuvi || 98 ||
[Analyze grammar]

nakramīnaprahantā ca nakrakuṇḍe patatyatha |
nakrakaṇṭakamānābdaṃ sthitvā nakrastato jale || 99 ||
[Analyze grammar]

anyacchidrānveṣakastu kākakuṇḍe patatyatha |
kākaprakṣuṇṇanetraśca romābdaṃ tatra vartate || 100 ||
[Analyze grammar]

saptajanmadaridraḥ sa trijanmā'ndhaśca jāyate |
svarṇatāmralauhacauro vajrakuṇḍaṃ prayāti vai || 101 ||
[Analyze grammar]

devadravyaprahartā'pi romābdaṃ vajrakuṇḍagaḥ |
vajrairhato bhavettatra vajrabhug dehadāvavān || 102 ||
[Analyze grammar]

gavāṃ śukānāṃ mūrtīnāṃ caurastaptopalābhidhe |
kuṇḍe patati svalomābdaṃ tato bakastrijanmasu || 103 ||
[Analyze grammar]

haṃsastataḥ śaṃkhacillastato raktādirogavān |
saptajanmasu cālpāyuḥ kūpyacauro'pi tādṛśaḥ || 104 ||
[Analyze grammar]

rītikāṃsyādicauraśca tīkṣṇagrāvāgrakuṇḍake |
svalomābdaṃ vasetpaścādaśvaḥ syāt saptajanmasu || 105 ||
[Analyze grammar]

tato'dhikāṃgakaḥ kubjaḥ pāde rugṇaśca jāyate |
puṃścalyannādatajjīvī lālākuṇḍe pated dhruvam || 106 ||
[Analyze grammar]

tallomābdaṃ lālabhojī cakṣūrogī ca śūlavān |
mlecchasevī maṣīsevī maṣīkuṇḍe'titaptake || 107 ||
[Analyze grammar]

svalomābdaṃ vaset paścāt kṛṣṇapaśustrijanmasu |
chāgaḥ sarpastālavṛkṣastriṣu triṣu ca janmasu || 108 ||
[Analyze grammar]

dhānyatāmbūlatalpā'rghyā''sanasasyādicaurakaḥ |
śatābdaṃ cūrṇakuṇḍe vai tato meṣaśca kukkuṭaḥ || 109 ||
[Analyze grammar]

trijanmasu tataḥ kāsavyādhigrastaśca mānavaḥ |
vaṃśahīno daridraścāpyalpāyurduḥkhavān bhavet || 110 ||
[Analyze grammar]

cakraśastrādikartā tu śatābdaṃ cakrakuṇḍake |
trijanmasu tailakāro rogī vaṃśahīnastataḥ || 111 ||
[Analyze grammar]

pratispardhī matsarī ca vajrakuṇḍe yugaṃ patet |
saptajanmasu vakrāṃgo bhāryāvaṃśavihīnakaḥ || 112 ||
[Analyze grammar]

kūrmādimāṃsabhuk kūrmakuṇḍe patecchataṃ samāḥ |
sa trijanmasu kūrmaśca sūkaro'pi mayūrakaḥ || 113 ||
[Analyze grammar]

mārjāraścāpi pratyekaṃ trijanmasu jāyate |
ghṛtatailādicaurastu jvālākuṇḍe ca bhasmani || 114 ||
[Analyze grammar]

kuṇḍe śatābdaṃ patati tailapaḥ saptajanmasu |
matsyaśca mūṣakaḥ saptajanmasvatha tataḥ śuciḥ || 115 ||
[Analyze grammar]

sugandhitailadhātryādidravyacaurastu kuṇḍake |
durgandhe lomamānābdaṃ durgandhī jāyate tataḥ || 116 ||
[Analyze grammar]

durgandhikaḥ saptajanau mṛganābhistrijanmasu |
saptajanmasugandhaśca tataḥ śuddho hi mānavaḥ || 117 ||
[Analyze grammar]

bhūmihartā taptaśūle taptataile patet tataḥ |
saptamanvantaraṃ paścād viṭkṛmirayutaṃ tu ṣaṭ || 118 ||
[Analyze grammar]

bhūmihīno daridraśca tato vai śuddha eva saḥ |
naraghātī cāsipatre vasetkalpaṃ tataḥ punaḥ || 119 ||
[Analyze grammar]

brahmahā cecchatamanvantaraṃ khaḍgavane vaset |
chinnāṃgaḥ khaṅgadhāraiśca cāṇḍālaḥ śatajanmasu || 120 ||
[Analyze grammar]

sūkaraḥ kukkuro gomāyūśca vyāghro vṛkastataḥ |
gaṇḍī mahiṣaḥ pratyekaṃ saptajanmasu jāyate || 121 ||
[Analyze grammar]

grāmādidāhakaḥ kṣuradhāre yugatrayaṃ patet |
tataḥ preto vahnimukho'medhyabhojī tataḥ punaḥ || 122 ||
[Analyze grammar]

khadyotaśca saptajanau mahāśūlī ca tāvatā |
saptajanmagalatkuṣṭhī tataḥ śuddhyati vahnidaḥ || 123 ||
[Analyze grammar]

kalaṃkado nindakaśca sūcimukhe yugatrayam |
tato bhaved vṛścikaśca sarpaśca saptajanmasu || 124 ||
[Analyze grammar]

vajrakīṭaḥ saptajano bhasmakīṭastato naraḥ |
gṛhabhedī stenakartā gogodhāmeṣachāgakān || 125 ||
[Analyze grammar]

pratyekaṃ saptajanmāni tato rogī naro'dhuraḥ |
dravyacauro nakramukho yugaṃ paścācca rogavān || 126 ||
[Analyze grammar]

gogajāśvanarahantā gajadaṃśe yugatrayam |
tatastattajjātijanmatrayaṃ mlecchastato bhavet || 127 ||
[Analyze grammar]

gojātiduḥkhado yāti gomukhe narake dhruvam |
kṛmitaptodake manvantaraṃ sthitvā ca govṛṣaḥ || 128 ||
[Analyze grammar]

saptajanau tato rogī daridro'ntyajajātikaḥ |
gobrahmasādhuhatyākṛt strīmitrabhrūṇahā tathā || 129 ||
[Analyze grammar]

kuṃbhīpāke patet kalpaṃ cūrṇyate yamadūtakaiḥ |
vahnau kṣaṇaṃ kuṇḍake ca tapte taile jale tathā || 130 ||
[Analyze grammar]

pāṣāṇe taptalauhe ca duḥkhāni paśyati dhruvam |
gṛdhrakoṭisahasrāṇi śatajanmāni sūkaraḥ || 131 ||
[Analyze grammar]

kākaśca saptajanmāni sarpaḥ syātsaptajanmasu |
viṭkṛmiśca vṛṣalaśca galatkuṣṭhī tato bhavet || 132 ||
[Analyze grammar]

yakṣmagrasto vaṃśahīno bhāryāhīnastataḥ śuciḥ |
śrīharau ca śrīkṛṣṇe ca nārāyaṇe ca bhūmani || 133 ||
[Analyze grammar]

vāsudeve śive viṣṇau brahmaṇi bhedabuddhikṛt |
brahmahatyākaro bodhyo bhedo hatyāsamo mataḥ || 134 ||
[Analyze grammar]

akṣare rādhikāyāṃ ca lakṣmyāṃ śriyāṃ ramātanau |
pārvatyāṃ ca prabhāyāṃ ca māṇikyāyāṃ ca bhedakṛt || 135 ||
[Analyze grammar]

brahmahatyāsamadoṣī lalitājayayorapi |
bhedakṛt sve gurau sveṣṭadeve pitari mātari || 136 ||
[Analyze grammar]

haryarcāyāṃ bhedabuddhirbrahmahatyāmadūṣaṇam |
viṣṇornaivedyasalilavarjito'pi tathā mataḥ || 137 ||
[Analyze grammar]

pitṛdevagurupūjānindako'pi tathā mataḥ |
śivaṃ viṣṇuṃ śivāṃ lakṣmīṃ nindanti brahmaghātinaḥ || 138 ||
[Analyze grammar]

harerjanmatithīn śaivīṃ tithiṃ caikādaśīṃ tathā |
vratāhāni ca nindanti brahmahatyākarā hi te || 139 ||
[Analyze grammar]

guruṃ ca mātaraṃ tātaṃ sādhvīṃ bhāryāṃ sutaṃ sutām |
āśritān yo na puṣṇāti brahmahatyākaro hi saḥ || 140 ||
[Analyze grammar]

apūjakaśca devānāṃ govṛṣādeśca tāḍakaḥ |
gocarādiprahartā ca brahmahatyākaro hi saḥ || 141 ||
[Analyze grammar]

gavāṃ duḥkhakaraḥ pāpaṃ gohatyājaṃ labhettathā |
gavāṃ vṛttiharo gāśca padā saṃtāḍayettu yaḥ || 142 ||
[Analyze grammar]

yonijīvī trisandhyādivihīno dharmanāśakaḥ |
devapitratithisevāhīno goghātako mataḥ || 143 ||
[Analyze grammar]

svabhartari ca kṛṣṇe ca bhedabuddhikarī tu yā |
kaṭūktyā tāḍayet kāntaṃ sā gohatyākarī matā || 144 ||
[Analyze grammar]

gavāṃ vṛttiṃ jīvikāṃ ca jalaṃ gṛhaṃ tathā''śrayam |
hanyād yaḥ sa bhaveccāpi gohatyāpātakī dhruvam || 145 ||
[Analyze grammar]

devapūjākṛte yāni jalānnakusumāni tu |
tāni yo laṃghayetpādairgohatyāpāpakṛddhi saḥ || 146 ||
[Analyze grammar]

mithyāvādī gurudveṣī devadveṣī ca pitṛdviṭ |
gohatyāpāpavān sopi vijñeyo nātra saṃśayaḥ || 147 ||
[Analyze grammar]

pituḥ śataguṇā mātā mātuḥ śataguṇo guruḥ |
vidyāmantrapradātā ca guruḥ pūjyaḥ sadā mataḥ || 148 ||
[Analyze grammar]

guruto gurupatnī ca gaurave ca garīyasī |
yatheṣṭadevapatnī ca pūjyā cābhīṣṭadevatā || 149 ||
[Analyze grammar]

brāhmaṇastu surāpāṇī viḍbhojī vṛṣalīpatiḥ |
harivāsarabhojī ca kubhīpākaṃ vrajet sati || 150 ||
[Analyze grammar]

gurupatnīṃ rājapatnīṃ sapatnīmātaraṃ prasūm |
sutāṃ putravadhūṃ śvaśrūṃ sagarbhāṃ bhaginīṃ priyām || 151 ||
[Analyze grammar]

sodarabhrātṛjāyāṃ ca mātulānīṃ pitṛprasūm |
mātuḥ prasūṃ tatsvasāraṃ bhaginīṃ bhrātṛkanyakām || 152 ||
[Analyze grammar]

śiṣyāṃ ca śiṣyapatnīṃ ca bhāgineyasya kāminīm |
bhrātuḥ putrapriyāṃ caivā'pyagamyāmāha padmajaḥ || 153 ||
[Analyze grammar]

etāsu gamakaḥ kāmī brahmahatyāśataṃ labhet |
sa yāti kuṃbhīpākaṃ tu mahāpāpī sudustaram || 154 ||
[Analyze grammar]

hareḥ sevāṃ vinā sādhvi na labhet karmakhaṇḍanam |
sarvānnabhogī saṃyāti kālasūtraṃ śataṃ samāḥ || 155 ||
[Analyze grammar]

tataḥ śūdro'tirugṇaḥ syād daridro nirdhanastathā |
prakopavadanā kopāt svāminaṃ yā tu paśyati || 156 ||
[Analyze grammar]

kaṭūktiṃ taṃ ca vadati yāti colkāmukhaṃ hi sā |
ulkāṃ dadāti vaktre ca satataṃ yamakiṃkaraḥ || 157 ||
[Analyze grammar]

daṇḍena tāḍayenmūrdhni tallomābdapramāṇakam |
tato bhavenmānavī ca vidhavā saptajanmasu || 158 ||
[Analyze grammar]

yā brāhmaṇī sarvabhogyā sā'ndhakūpaṃ prayāti vai |
taptaśaucodake taptvā kalpamānaṃ tataḥ param || 159 ||
[Analyze grammar]

kākī sūkarī kukkuṭī śṛgālī ca pārāvatī |
vānarī saptajanmāni cāṇḍālī ca tato bhavet || 160 ||
[Analyze grammar]

rajakī tailakārī ca tataḥ śuddhyati sā sati |
veśyā vased vedhakuṇḍe gaṇikā daṇḍatāḍane || 161 ||
[Analyze grammar]

jālabandhe puṃścalī ca kulaṭā dehacūrṇake |
svairiṇī dalane kuṇḍe yāvanmanvantaraṃ vaset || 162 ||
[Analyze grammar]

kare dhṛtvā tu tulasīṃ pratijñāṃ yo na pālayet |
mithyā vā śapathaṃ kuryāt sa tu jvālāmukhe patet || 163 ||
[Analyze grammar]

datvā tu dakṣiṇaṃ hastaṃ pratijñāṃ yo na pālayet |
spṛṣṭvā gāṃ brāhmaṇaṃ devaṃ vahniṃ sādhuṃ satīṃ jalam || 164 ||
[Analyze grammar]

na pālayetpratijñāṃ tu sa vai jvālāmukhe patet |
mitradrohī kṛtaghnaśca tathā viśvāsaghātakaḥ || 165 ||
[Analyze grammar]

mithyāsākṣyapradaścāpi sa vai jvālāmukhaṃ vrajet |
kalpe vaset tato mūko badhiraśca trijanmasu || 166 ||
[Analyze grammar]

mitradrohī nakulaḥ syāt kṛtaghnaścāpi ṣaṇḍhakaḥ |
viśvāsaghātī vyāghraśca mithyāsākṣī tu bhallukaḥ || 167 ||
[Analyze grammar]

vratopavāsahīnaśca sadvākyaparinindakaḥ |
jihmo vasettu haime vai narake tu śataṃ samāḥ || 168 ||
[Analyze grammar]

jalajantuḥ śatajanmakrameṇa matsyako bhavet |
devādidravyahārī ca dhūmrāndhe patito bhavet || 169 ||
[Analyze grammar]

caturyugaṃ vasettatra mūṣakaḥ saptajanmasu |
paśau patatriṇi kṛmau vṛkṣajātiṣu jāyate || 170 ||
[Analyze grammar]

tato bhāryāvaṃśahīnaḥ śabaro vyādhimān bhavet |
svarṇakāro vaṇig vaidyo vyāpārī rasavikrayī || 171 ||
[Analyze grammar]

kūṭamāno nāgaveṣṭaṃ kuṇḍaṃ yātyeva dāruṇam |
tato gopo bhavecceti tataḥ śuddhyati vai sati || 172 ||
[Analyze grammar]

prasiddhāni tu kuṇḍāni kathitāni pativrate |
anyānyapyaprasiddhāni yathākarma bhavanti ve || 173 ||
[Analyze grammar]

santi pāpaprakartāraḥ kuṇḍeṣu phalabhoginaḥ |
tato bhramanti saṃsāre kiṃcittubhyaṃ niveditam || 174 ||
[Analyze grammar]

sarveṣṭaṃ sārabhūtaṃ tu maṃgalaṃ kṛṣṇasevanam |
janmamṛtyujarārogaśokasantāpatāraṇam || 175 ||
[Analyze grammar]

bhaktivṛkṣāṃkurakaraṃ karmavṛkṣanikṛntanam |
sālokyasārṣṭisārūpyasāmīpyādipradaṃ śubhe || 176 ||
[Analyze grammar]

kuṇḍāni yamadūtaṃ ca yamaṃ ca yamakiṃkarān |
svapne'pi nahi paśyanti sati śrīkṛṣṇasevakāḥ || 177 ||
[Analyze grammar]

harivrataprakartāro gṛhiṇastyāginastriyaḥ |
ye snānti haritīrthe ca nāśnanti harivāsare || 178 ||
[Analyze grammar]

saṃsmaranti kṛṣṇanārāyaṇaṃ saṃpūjayanti ca |
na yānti te mama ghorāṃ duḥkhāṃ saṃyamanīṃ purīm || 179 ||
[Analyze grammar]

āmnāyanyāyamārgasthāstyāgino gṛhiṇaśca te |
śuddhā dharmaparā yānti kṛṣṇamandiramakṣaram || 180 ||
[Analyze grammar]

svadūtānpāśahastāṃśca gacchatastān vadāmyaham |
yāsyatheti tu sarvatra haribhaktāśramaṃ vinā || 181 ||
[Analyze grammar]

harerbhaktāṃścitraguptaḥ puṣpāṃjaliṃ karoti hi |
madhuparkādikaṃ brahmā teṣāṃ tu kurute sadā || 182 ||
[Analyze grammar]

mama lokaṃ satyalokaṃ vilaṃghya gacchatāṃ satām |
sparśamātreṇa pāpāni naśyanti yāmyadehinām || 183 ||
[Analyze grammar]

pāvanāste bhāgavatāḥ pañcabhūtatanuṃ vinā |
sūkṣmeṇaiva śarīreṇa prayānti cordhvaveginaḥ || 184 ||
[Analyze grammar]

brahmadhāmasamīpe tu snātvā brahmahṛde ca te |
sūkṣmaṃ vimucya māyāyāṃ brāhmyā tanvā tu dhāmani || 185 ||
[Analyze grammar]

ātmā''tmikayā modante bahuśaktindriyendrakāḥ |
yamalokaṃ gatā ye tu karmaphalāya dehinaḥ || 186 ||
[Analyze grammar]

bibhrati sūkṣmadehaṃ te nāśo yasya na jāyate |
sa deho na bhaved bhasma jvaladagnau yamālaye || 187 ||
[Analyze grammar]

jale naṣṭobhavennaiva prahāre nāpi naśyati |
śastre śāstre kaṇṭake ca śūle taptadrave tathā || 188 ||
[Analyze grammar]

tapte lohe ca pāṣāṇe pratikṛtau na naśyati |
karmaphalaṃ tathā bhuṃkte sukhamātrā na vidyate || 189 ||
[Analyze grammar]

kṛṣṇanārāyaṇadhāmni duḥkhamātrā na vidyate |
tameva bhaja sāvitri gaccha kāntena mandiram || 190 ||
[Analyze grammar]

ityuktvā sā yamenāpi na yayau mandiraṃ svakam |
satyavantaṃ sūkṣmadehaṃ svāyattīkṛtya sve hṛdi || 191 ||
[Analyze grammar]

jijñāsamānā papraccha kuṇḍamānādikaṃ tadā |
śṛṇu lakṣmi kathayiṣye yamena yattu bhāṣitam || 192 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye sāvitrīkṛtayamāṣṭakastotraṃ ṣaḍaśītinirayakuṇḍāni yathākarma tatpātaḥ brahmahatyāgohatyāprakhyapāpāni bhaktānāṃ yamaparābhavo cetyādinirūpaṇanāmā saptatyadhikatriśatatamo'dhyāyaḥ || 370 ||
[Analyze grammar]