Chapter 367

śrīnārāyaṇa uvāca |
śṛṇu lakṣmi yamaproktamanādṛtyā'tibhāvataḥ |
yatpapraccha tu sāvitrī kathayāmi nibodha me || 1 ||
[Analyze grammar]

śubhaṃ kiṃ cā'śubhaṃ karma kiṃ bījaṃ kaḥ phalapradaḥ |
kena kīdṛgbhavetkarma ko hetustatra sarvathā || 2 ||
[Analyze grammar]

ko vā karmaphalaṃ bhuṃkte ko vā nirliṃpta ityapi |
karma nirmūlayantyeva kathaṃ vai sādhavo janāḥ || 3 ||
[Analyze grammar]

karmakārakaḥ kaḥ proktaḥ ko deho dehavāṃśca kaḥ |
kiṃ vijñānaṃ manaḥ kiṃ ca buddhiḥ kā prāṇa eva kaḥ || 4 ||
[Analyze grammar]

kimindriyaṃ devatāśca bhoktā bhojayitā ca kaḥ |
ko bhogo niṣkṛtiḥ kā ca ka ātmā kaḥ paraḥ prabhuḥ || 5 ||
[Analyze grammar]

etatsarvaṃ yamadeva cejjānāsi vadātra me |
yamaḥ śrutvā'tisaṃhṛṣṭaḥ sāvitrīṃ prāha tattvataḥ || 6 ||
[Analyze grammar]

abhyudayapradaṃ śāntipradaṃ vedādidarśitam |
karma śubhaṃ maṃgalakṛd viparītaṃ na vai śubham || 7 ||
[Analyze grammar]

vāsanā bhāvanā vāpi karmabījamudīryate |
phalapradaḥ kṛṣṇanārāyaṇaḥ sarvāntarasthitaḥ || 8 ||
[Analyze grammar]

śubhecchayā śubhaṃ karmā'śubhayā'śubhameva tat |
karmaheturbhaved yatnastaddheturvāñcchanā matā || 9 ||
[Analyze grammar]

vāñcchāhetustu vijñānaṃ jīve vastusamāśrayam |
jñānahetustu saṃkalpaḥ pārameśvara āsthitaḥ || 10 ||
[Analyze grammar]

vibhvī śaktistatra yuktā kriyāṃ janiṃ dadāti vai |
hareḥ saṃkalpaśaktibhyāṃ jīve jñānakriye mate || 11 ||
[Analyze grammar]

tābhyāṃ paramparājanyaṃ karma sarvaṃ prajāyate |
antataḥ sarvathā hetuḥ kṛṣṇanārāyaṇo mataḥ || 12 ||
[Analyze grammar]

jīvaḥ karmaphalaṃ bhuṃkte tadātmā nahi lipyate |
antaryāmī kṛṣṇanārāyaṇo nirlipta eva ha || 13 ||
[Analyze grammar]

sādhavaḥ sarvathā karmaphalābhisandhivarjitāḥ |
viṣṇusevātmakaṃ kāryaṃ kurvantyaharniśaṃ śubham || 14 ||
[Analyze grammar]

ahaitukaṃ ca saṃkalpavarjitaṃ harituṣṭaye |
tatsarvaṃ bhaktirūpaṃ vai karmanirmūlanakṣamam || 15 ||
[Analyze grammar]

harerbhaktaḥ sadā mukto muktistasya dvidhā matā |
jīvanmuktirbrahmamuktirnirvāṇapadadāyinī || 16 ||
[Analyze grammar]

jīvanmuktiṃ bhaktirūpāṃ sadā vāñchanti vaiṣṇavāḥ |
brāhmīṃ muktiṃ parāṃ sevāṃ dhāmni vāñcchanti sādhavaḥ || 17 ||
[Analyze grammar]

karmaprayojikā śaktiḥ sā tu kṛṣṇe vyavasthitā |
antaryāmisvarūpasthā kriyāṃ janayati dhruvā || 18 ||
[Analyze grammar]

pañcabhūtātmako dehaḥ sthūla ityabhidhīyate |
tadvān jīvaḥ sadā jñātā cetano jñānavānmataḥ || 19 ||
[Analyze grammar]

caturviṃśatitattvānāṃ jīvātmaparamātmanoḥ |
svarūpairguṇakāryaiścā'vagamo jñānamucyate || 20 ||
[Analyze grammar]

sarvavyavahṛtibījaṃ vijñānaṃ tvātmani sthitam |
mūlamāyā sattvarajastamomayī jaḍā sadā || 21 ||
[Analyze grammar]

buddhirūpā manorūpā prāṇarūpā prajāyate |
manaḥ saṃkalpakaṃ proktaṃ buddhiradhyavasāyinī || 22 ||
[Analyze grammar]

śvāsaḥ prāṇo jīvanaṃ ca vṛttistattvaiḥ saha sthitiḥ |
indraśaktisamāpannamindriyaṃ tat prakīrtitam || 23 ||
[Analyze grammar]

indra ātmā sadā prokta indriyāṇi bahūni vai |
śrotratvaccakṣūrasanāghrāṇāni jñānadāni hi || 24 ||
[Analyze grammar]

vākpāṇipādapāyūpasthāni karmendriyāṇi hi |
digvātārkapraceto'śvivahnīndropendramitrakāḥ || 25 ||
[Analyze grammar]

devatāśca prakāśārthaṃ nirmitāḥ śaktidāstu tāḥ |
bhoktā dehī bhojayitā tvantarātmā hariḥ svayam || 26 ||
[Analyze grammar]

bhogaḥ sukhasya duḥkhasya sākṣātkāraḥ samucyate |
niṣkṛtiḥ śāntirityuktā nivṛttiḥ karmaṇāṃ tathā || 27 ||
[Analyze grammar]

karmanāśāya karmāṇi niṣkṛtyātmāni vai viduḥ |
prāyaścittāni karmāṇi pūrveṣāṃ śodhakāni vai || 28 ||
[Analyze grammar]

sūkṣmadehādvivikto yo vāsanābalakarṣitaḥ |
jīvatāṃ saṃvidan svasya jīvātmā sukhasaccitaḥ || 29 ||
[Analyze grammar]

antarniyāmakastasyā'kṣaradhāmni ca yaḥ sthitaḥ |
kṛṣṇanārāyaṇaḥ so'yaṃ paraprabhuḥ prakīrtitaḥ || 30 ||
[Analyze grammar]

pṛthivī vāyurākāśo jalaṃ tejastvimāni vai |
pañcabhūtāni cāśritya jīvo bhuṃkte phalaṃ bahu || 31 ||
[Analyze grammar]

yadā bhajati kṛṣṇaṃ sa vāsanāvarjito bhavet |
janmamṛtyujarāvyādhiśokādivarjito bhavet || 32 ||
[Analyze grammar]

bhaktisamaṃ na balavatsādhanaṃ tvanyadasti hi |
sarvaduḥkhapraśamanaṃ sarvasampatpradaṃ param || 33 ||
[Analyze grammar]

svargamokṣapradaṃ śreṣṭhaṃ sarvasmṛddhiprapūrṇakam |
paramātmā paraṃbrahma kṛṣṇanārāyaṇo hariḥ || 34 ||
[Analyze grammar]

kāraṇaṃ kāraṇānāṃ sa rādhālakṣmīprabhāpatiḥ |
pārvatīmāṇikīnātho ramāvṛndāpatiḥ prabhuḥ || 35 ||
[Analyze grammar]

śrīkṛṣṇaḥ sa paraṃbrahma svayaṃ śrīpuruṣottamaḥ |
tasya bhaktiḥ prakartavyā tena mokṣo bhaved dhruvaḥ || 36 ||
[Analyze grammar]

śravaṇaṃ kīrtanaṃ smṛtiḥ kṛṣṇāsyā'ṅgaprasevanam |
pūjanaṃ stavanaṃ bhṛtyaṃ maitryaṃ sarvasamarpaṇam || 37 ||
[Analyze grammar]

evaṃ tu navadhā yogo bhaktirūpaḥ sumuktidaḥ |
dharmaḥ kāṣṭhauṣadhikvātho vairāgyaṃ tu virecanam || 38 ||
[Analyze grammar]

bodho ramyo'valehaśca bhaktistatra rasāyanam |
sandhāninyauṣadhirdharmo viveko vṛṇahāriṇī || 39 ||
[Analyze grammar]

viśalyakaraṇī bhaktirjīvāturviratistathā |
harau snehānubandho yo bhūrisatkārapūrvakaḥ || 40 ||
[Analyze grammar]

bhaktirbodhyā mokṣadā sā kartavyā sarvadā janaiḥ |
cikkaṇatvayutasvāntaḥsāndrānandapariplutaḥ || 41 ||
[Analyze grammar]

bhāvaḥ snehaḥ sa vijñeyo harau kāryo hi sarvadā |
svāntarvṛttiravicchinnā harau snehānubandhinī || 42 ||
[Analyze grammar]

bhaktiḥ prema ratiḥ sevā harau kāryā hi muktidā |
vaidhī vidhivacojanyā śravaṇādinavātmikā || 43 ||
[Analyze grammar]

māhātmyajñānasaṃyukto dṛḍhīyān sarvato'dhikaḥ |
rāgaḥ sneho harau bhaktirmokṣadā sarvathā matā || 44 ||
[Analyze grammar]

bhaktavātsalyamarcāyā daṃbhatyāgo'numodanam |
śuddhacittena tatpūjā tatkathāśravaṇādaraḥ || 45 ||
[Analyze grammar]

aṃgakriyā tadarthaṃ ca smṛtistannāmakīrtanam |
ete'ṣṭāvapi bhaktau syurabhinnāḥ phaladāḥ sadā || 46 ||
[Analyze grammar]

gurupādāśrayo dīkṣāsvīkāraḥ sevanaṃ guroḥ |
viśvāsātsatpathe vṛttiḥ saddharmapṛcchanaṃ tathā || 47 ||
[Analyze grammar]

bhogatyāgaśca haryarthaṃ vāsastīrthādibhūmiṣu |
yathāpekṣaṃ vyavahāro vrataṃ haridine tathā || 48 ||
[Analyze grammar]

daivivṛkṣādisatkāro daśaite bhaktivardhanāḥ |
putraśiṣyādyarāgaśca kusaṃgisaṃgavarjanam || 49 ||
[Analyze grammar]

mahāraṃbhādyanudyogo durvivādādivarjanam |
haryarthaṃ dravyadānaṃ ca śokamohādivarjanam || 50 ||
[Analyze grammar]

anyā'nudvegakāritvaṃ devagurvādyanindanam |
surā'parādhā'kartṛtvaṃ suranindā'sahiṣṇutā || 51 ||
[Analyze grammar]

daśaite sādhanīyāḥ syurbhaktairbhaktivivṛddhaye |
atha kṛṣṇacihnadhṛtiḥ kṛṣṇanāmasmṛtirhṛdi || 52 ||
[Analyze grammar]

puṣpamālādisaṃdhṛtirnṛtyaṃ ca daṇḍavannatiḥ |
abhyutthānaṃ hareragre gamane cā'pyanuvrajiḥ || 53 ||
[Analyze grammar]

pradakṣiṇaṃ tathā stotraṃ sevanaṃ kīrtanaṃ japaḥ |
vijñānaṃ stotrapāṭhaśca svādo naivedyapajjale || 54 ||
[Analyze grammar]

prasādasaurabhagrāhaḥ sparśanaṃ cekṣaṇe hareḥ |
nīrājanaṃ harerutsavāvalokanamityapi || 55 ||
[Analyze grammar]

dayāpratīkṣaṇaṃ dhyānaṃ smaraṇaṃ dāsyamuttamam |
sakhitvaṃ cātmadānaṃ ca haryarthaṃ ceṣṭitaṃ tathā || 56 ||
[Analyze grammar]

preṣṭhārpaṇaṃ bhaktasevā śaraṇe patanaṃ sadā |
tulasīśāstrasattīrthavaiṣṇavādiprapūjanam || 57 ||
[Analyze grammar]

yathādhanaṃ tathāsevā vārtādi sādhubhiḥ saha |
ārtasevā janmamaho hareścaraṇasevanam || 58 ||
[Analyze grammar]

śraddhayā bhūyasīprītiḥ śāstrārthāsvādanaṃ param |
satsu saṃgaḥ kīrtanaṃ me sadbhiḥ satsu sadā sthitiḥ || 59 ||
[Analyze grammar]

ātmaniṣṭheti ca catuścatvāriṃśadime guṇāḥ |
bhaktyātmakā bhaktipuṣṭikarāḥ snehavivardhanāḥ || 60 ||
[Analyze grammar]

satāṃ saṃsevanaṃ kāryaṃ kṛpā prāpyā satāṃ sadā |
saddharmeṣu parā śraddhā harerguṇaśrutistathā || 61 ||
[Analyze grammar]

premāṃkurodbhavaścāpi śrīharyāśraya uttamaḥ |
harau rāgābhivṛddhiśca haryarcāsphuraṇaṃ sadā || 62 ||
[Analyze grammar]

bhakte kṛṣṇaguṇā''vāsaḥ sthitirdharme hareḥ sadā |
ete daśaguṇāḥ siddhāstataḥ premātivardhate || 63 ||
[Analyze grammar]

sāttvikādiprabhedaiśca mṛdumadhyā'dhibhedataḥ |
aneke vai bhaktibhedāḥ sūkṣmā bhavanti muktidāḥ || 64 ||
[Analyze grammar]

atha premaparākāṣṭhā vidhiryatra na vidyate |
sā tu sarvapramūrdhanyā bhaktirbhavati śāśvatī || 65 ||
[Analyze grammar]

yāvacchākhaṃ prematattvaṃ yādṛksvabhāvapoṣitam |
dehināṃ prākṛtabhāvaṃ tāvacchākhamanantakam || 66 ||
[Analyze grammar]

prematattvaṃ bhidyate vai yatsaṃkhyā nahi pāryate |
tasmādbhaktirasaṃkhyātabhedā bhavati puṣpitā || 67 ||
[Analyze grammar]

tasyā bhaktimahādevyā bhuktimuktyādisiddhayaḥ |
rājñyāḥ sadā'nuvartante ceṭikā iva tatparāḥ || 68 ||
[Analyze grammar]

parārdhaguṇito brahmānando bhaktyaṇusadṛśaḥ |
bhaktyānandāmṛtāmbhodhau brāhmāṇyapi sukhāni vai || 69 ||
[Analyze grammar]

magnasya goṣpadāyante premā''nandā''plutasya hi |
yeṣāṃ dṛḍhā bhaved bhaktiḥ premarūpā sadā harau || 70 ||
[Analyze grammar]

te svapne'pi na paśyanti kīnāśaṃ yamarādgṛham |
koṭijanmakṛtaiḥ puṇyairāpyāṃ bhaktiṃ samācaran || 71 ||
[Analyze grammar]

mahāpāpā'tipāpāṃśca punātyeva yathā hariḥ |
śatravo naiva bādhante grahā yāmyāśca rākṣasāḥ || 72 ||
[Analyze grammar]

bhūtapretapiśācādyā bhaktimantaṃ harerjanam |
bhaja taṃ devapravaraṃ bhagavantaṃ sanātanam || 73 ||
[Analyze grammar]

tvatpṛṣṭaṃ kathitaṃ sarvaṃ gaccha vatse yathāsukham |
ityuktvā ca yamo natvā virarāma hi padmaje || 74 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye sāvitrīkṛtaśubhā'śubhakarmāditatsambandhipraśnānāṃ yamarājakṛtottarāṇi bhagavadbhaktiprakāratanmāhātmyādi cetyādinirūpaṇanāmā saptaṣaṣṭyadhikatriśatatamo'dhyāyaḥ || 367 ||
[Analyze grammar]