Chapter 364

śrīlakṣmīruvāca |
pūrvaṃ śrutaṃ mayā kṛṣṇa bhavadānanapaṃkajāt |
pativratā tvayā sṛṣṭiprāraṃbhe svāt prakāśitā || 1 ||
[Analyze grammar]

sā tu bhūmau ca pātāle svarge satye tathā''vṛtau |
vairāje cātha vaikuṇṭhe ceśvarāṇāṃ vibhūtiṣu || 2 ||
[Analyze grammar]

jīvasṛṣṭāvīśasṛṣṭau sarvatra saṃsthitā'sti vai |
vyāpinī sā mahāśaktistava sāmarthyarūpiṇī || 3 ||
[Analyze grammar]

ādau sā kaṃbharānāmnī mahālakṣmīrajāyata |
bhavān sākṣātparabrahā gopālaḥ samajāyata || 4 ||
[Analyze grammar]

patnīvratābhidho vipraḥ kṛṣṇanārāyaṇo hariḥ |
svayaṃ jāto mahārājaḥ sarvadharmapravartakaḥ || 5 ||
[Analyze grammar]

tatpatnī kaṃbharālakṣmīryadgṛhe mānasaḥ sutaḥ |
lakṣmīnārāyaṇo jajñe kṛṣṇanārāyaṇaḥ svayam || 6 ||
[Analyze grammar]

sā'ha lakṣmīḥ sa tvaṃ kṛṣṇaḥ kṛpayā te smarāmi tat |
pativratātmako dharmaḥ satīdharmo hi mokṣadaḥ || 7 ||
[Analyze grammar]

sukhadaḥ svargadaścāpi sarvakāmaprapūrakaḥ |
tvadātmako madātmakaḥ kathaṃ na tārayejjanān || 8 ||
[Analyze grammar]

satāṃ sevātmako dharmaḥ sarvopari pravartate |
satyaḥ pativratāḥ sādhvyastaranti sādhusevayā || 9 ||
[Analyze grammar]

sādhurūpo bhavānasti satīrūpo'sti vai bhavān |
satīdharmaḥ sādhudharmaḥ khaḍgadhārā'tidustaraḥ || 10 ||
[Analyze grammar]

satīṃ rūpavatīṃ śrutvā janakasya tu bhāminīm |
satībalaṃ viśeṣeṇa śrotukāmā'smi saṃvṛtā || 11 ||
[Analyze grammar]

nāryo bhogyāḥ kāmadharmāḥ satīsāmarthyasaṃśravāt |
tariṣyanti bhavāmbhodhiṃ śrutvā pativratābalam || 12 ||
[Analyze grammar]

tasmācchrāvaya me viṣṇo kṛṣṇanārāyaṇa prabho |
pativratānāmaiśvaryacamatkārān sukhapradān || 13 ||
[Analyze grammar]

bhūtānmadhyānbhūyamānān śrotumicchāmi keśava |
bhavacchaktisvarūpāṇāṃ satīnāṃ caritāni vai || 14 ||
[Analyze grammar]

śrīnārāyaṇa uvāca |
śrūyatāṃ ca tvayā lakṣmi paraṃ jijñāsitaṃ śubham |
kalyāṇaṃ yoṣitāṃ kartuṃ me vibhāsi dayāvatī || 15 ||
[Analyze grammar]

kathayāmi camatkārān satīnāṃ yoṣitāṃ bahūn |
kumārīṇāṃ lagnitānāṃ naiṣṭhikīnāṃ ca yoṣitām || 16 ||
[Analyze grammar]

sadhavānāmadhavānāṃ tyāginīnāṃ suyoṣitām |
yoginīnāṃ bhāgavatīsthitikānāṃ suraśriyaḥ || 17 ||
[Analyze grammar]

ārṣīṇāṃ devapatnīnāṃ brāhmīṇāṃ kṛṣṇayoṣitām |
kathayiṣye camatkārān śṛṇu madvāṅmanā bhava || 18 ||
[Analyze grammar]

goloke rādhikā yā'sti sāvitrī yā tadaṃśikā |
nirmitā vedhaso'rthaṃ vai kṛṣṇanārāyaṇena sā || 19 ||
[Analyze grammar]

sṛṣṭyāraṃbhe kṛte tvādye śvetadvīpe sthitā'bhavat |
tasminnevā'nvavasare badarikāśrame nṛpaḥ || 20 ||
[Analyze grammar]

priyavratastapastepe tatropeyāttu nāradaḥ |
rājā vyomni ṛṣiṃ vīkṣya samuttasthau suharṣitaḥ || 21 ||
[Analyze grammar]

tasyā''sanaṃ ca pādyaṃ ca datvā papraccha sādaram |
bhagavan kiñcidāścaryametasmin kṛtasaṃjñite || 22 ||
[Analyze grammar]

yuge dṛṣṭaṃ śrutaṃ vāpi tanme kathaya nārada |
nāradastu yathādṛṣṭamekamāścaryamāha tam || 23 ||
[Analyze grammar]

hyastane'hani rājendra śvetadvīpaṃ gatastvaham |
tatra saṃdṛṣṭavān divyaṃ saraḥ paṃkajaśobhitam || 24 ||
[Analyze grammar]

sarasastasya tīre tu kumārīṃ pṛthulocanām |
dṛṣṭvā'haṃ vismayāpannastāṃ kanyāmāyatekṣaṇām || 25 ||
[Analyze grammar]

pṛṣṭavānasmi rājendra tāṃ vai madhurabhāṣiṇīm |
kā'si bhadre kathaṃ vā'si kiṃ vā kāryamiha tvayā || 26 ||
[Analyze grammar]

kartavyaṃ cārusarvāṅgi tanmamā''cakṣva śobhane |
evamuktā mayā sā hi māṃ dṛṣṭvā'nimiṣekṣaṇā || 27 ||
[Analyze grammar]

smṛtvā tūṣṇīṃ sthitā yāvattāvanme jñānamuttamam |
vismṛtaṃ sarvavedāśca saṃhitāśca phalādikam || 28 ||
[Analyze grammar]

sarvaṃ dṛṣṭvaiva me rājan kumāryā'pahṛtaṃ kṣaṇāt |
tato'haṃ vismayāviṣṭaścintāśokajaḍo'bhavam || 29 ||
[Analyze grammar]

tāmeva śaraṇaṃ gatvā yāvatpaśyāmi tāṃ punaḥ |
tāvad divyaḥ pumāṃstasyāḥ śarīre samadṛśyata || 30 ||
[Analyze grammar]

tasyāpi puṃso hṛdye tvaparastasya corasi |
anyo raktekṣaṇaḥ śrīmān dvādaśādityasannibhaḥ || 31 ||
[Analyze grammar]

evaṃ dṛṣṭāḥ pumāṃso'tra trayaḥ kanyāśarīragāḥ |
kṣaṇena te trayo līnāḥ kanyāṃ paśyāmi caikalām || 32 ||
[Analyze grammar]

tataḥ pṛṣṭā mayā devī sā kumārī kathaṃ mama |
vedā naṣṭā mamācakṣva bhadre tannāśakāraṇam || 33 ||
[Analyze grammar]

kanyovāca tu vedānāṃ sāvitrīṃ mātaraṃ tu mām |
naiva jānāsi yena tvaṃ tato vedā hatāstava || 34 ||
[Analyze grammar]

iti śrutvā nāradena pṛṣṭā ke puruṣā iti |
kanyovāca hṛdi me'yaṃ ṛgvedo yo narāyaṇaḥ || 35 ||
[Analyze grammar]

viṣṇurūpo'nalo nāmoccāraṇātpāpadāhakaḥ |
tasya hṛdi dvitīyastu yajurvedaḥ pitāmahaḥ || 36 ||
[Analyze grammar]

tasya hṛdi tṛtīyastu sāmavedo hi śaṃkaraḥ |
etāvādityavatpāpānyāśu dahata āsmṛtau || 37 ||
[Analyze grammar]

ete trayo mahāvedā ṛṣe devāstrayastu te |
gṛhāṇa vipra gāyatrīṃ vaidikīṃ japa vaiṣṇavīm || 38 ||
[Analyze grammar]

tato gṛhāṇa vedāṃśca sarvajñatvaṃ ca nārada |
etasmin vedasarasi snānaṃ kuru ca putraka || 39 ||
[Analyze grammar]

kṛte snāne'nyajanmīyaṃ yena smarasi putraka |
ahaṃ snātvā labdhavāṃstajjñānaṃ varṣasahasrajam || 40 ||
[Analyze grammar]

puṣkarapattanasyā''saṃ purā sārasvato dvijaḥ |
so'haṃ vai vedhasaḥ putro mānaso'smi purastava || 41 ||
[Analyze grammar]

sāvitrī sā mama mātā tirobhāvaṃ gatā tataḥ |
mayā sā divyadṛṣṭyā tu satyaloke vilokitā || 42 ||
[Analyze grammar]

vedhaso dharmapatnīti pratāpāḍhyā pativratā |
brahmā bhūtāni saṃsṛṣṭvā tatyāja svavapurmuhuḥ || 43 ||
[Analyze grammar]

sāvitrī tacchavāt pātivratyapratāpato muhuḥ |
brahmāṇaṃ svakarasparśāt sarjayāmāsa vai tadā || 44 ||
[Analyze grammar]

bahuvāraṃ mṛtaṃ cā'jaṃ bahuvāraṃ sasarja sā |
sṛṣṭiryatheṣṭaṃ saṃjātā nyavartata tadā mṛteḥ || 45 ||
[Analyze grammar]

brahmāṇaṃ taṃ patiṃ prāpya śāśvataṃ sā pativratā |
pātivratyaprabhāveṇa vartiṣyate ca vartate || 46 ||
[Analyze grammar]

mṛtyuṃ tvāmantrya datvā ca brahmāṇaṃ mṛtyave muhuḥ |
patiṃ sā jīvayāmāsa pātivratyaprabhāvataḥ || 47 ||
[Analyze grammar]

vedāṃstripuruṣān hutvā punardattavatī tu sā |
pātivratyaprabhāveṇa sāvitrī jananī mama || 48 ||
[Analyze grammar]

ahaṃ rājan kṛtasnānastvāṃ didṛkṣurihā''gataḥ |
satyaṃ gacchāmi sampūjya naranārāyaṇaṃ prabhum || 49 ||
[Analyze grammar]

ityuktvā ca hariṃ natvā satye yayau tu nāradaḥ |
iti te kathitaṃ lakṣmi pātivratyabalaṃ mahat || 50 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye sāvitryāṃ nāradasya trivedātmakatridevadarśanaṃ vedhasaḥ sāvitrīpātivratyabalena muhuḥ śarīravattvamityādinirūpaṇanāmā catuḥṣaṣṭyadhikatriśatatamo'dhyāyaḥ || 364 ||
[Analyze grammar]