Chapter 363

śrīnārāyaṇa uvāca |
nāciketā pātivratyadharmaṃ śrutvā yamānanāt |
yamaṃ papraccha kuśalaṃ sarvalokahitāvaham || 1 ||
[Analyze grammar]

śṛṇu vacmi yathā pṛṣṭaṃ lakṣmi vai nāciketasā |
dharmarāja mahābāho kathayasva mahātapāḥ || 2 ||
[Analyze grammar]

kāṃkṣante sarvajanatā sukhaṃ tapovratādibhiḥ |
evaṃ kṛcchrāśritānāṃ dhīḥ kathaṃ pāpe prajāyate || 3 ||
[Analyze grammar]

nānāvrataśatopāyāḥ śreyodharmā hi mānavāḥ |
kasyaitacceṣṭitaṃ pāpaṃ kartā kārayitā tu kaḥ || 4 ||
[Analyze grammar]

kathaṃ dveṣe matiryadvā kathaṃ rāge prajāyate |
kaḥ karṣati jagattveko bhūtagrāmaṃ caturvidham || 5 ||
[Analyze grammar]

śrutvā prāha yamo devo brahmarṣe śrūyatāṃ tu tat |
mānavā brahmaṇā sṛṣṭāḥ śreyorthaṃ tveva kevalam || 6 ||
[Analyze grammar]

anyayonigatā duḥkhāḥ sukhinaḥ khalu mānave |
dharmajñānaparā bhūtvā bhaktyā śreyaḥparāyaṇāḥ || 7 ||
[Analyze grammar]

tapasā vratadānaiśca svargaṃ mokṣaṃ prayāntviti |
aindriyikaṃ sukhaṃ tatra rāgiṇāṃ sukhalabdhaye || 8 ||
[Analyze grammar]

pradattaṃ dhanadārādi sparśādi sārvakālikam |
santuṣṭāśca sadā tṛptā ātmasmaraṇakārakāḥ || 9 ||
[Analyze grammar]

nākṛṣyante'ti tadvege nirvartante yataḥ sukhāḥ |
upabhogena tṛṣṇā syād balaṃ tasyāḥ prajāyate || 10 ||
[Analyze grammar]

nyāyamārgaṃ parityajya tayā pāpe pravartate |
tṛṣṇayā svārthabuddhyā ca kāmakrodhādimiśrayā || 11 ||
[Analyze grammar]

mṛgatṛṣṇārūpayā ca svāpnārthahāditulyayā |
prāyo niṣphalayā bandhaphalayā''vriyate'vaśaḥ || 12 ||
[Analyze grammar]

nānyasya ceṣṭitaṃ pāpaṃ satṛṣṇasyaiva ceṣṭitam |
kartā kārayitā nānyaḥ svatṛṣṇāmantarā bhavet || 13 ||
[Analyze grammar]

iṣṭā'lābhe bhaved dveṣṭā lābhe rāgī prajāyate |
tṛṣṇayā tatra saṃkṛṣṭo'vivekyagre pravartate || 14 ||
[Analyze grammar]

karoti kāryaṃ cākāryaṃ tat sañcitaṃ prajāyate |
ātmānaṃ pātayatyātmā bhuṃkte karma kṛtaṃ svayam || 15 ||
[Analyze grammar]

āgataṃ bhajate pūrvaṃ sukṛtaṃ vā'tha duṣkṛtam |
ātmā śatruśca bandhuśca svasya bhavati bhūsura || 16 ||
[Analyze grammar]

svasya bhogyaṃ parikleśaṃ nirmitaṃ pūrvakarmabhiḥ |
jagatyāmupabhuṃkte vai jīvo yoniśataṃ gataḥ || 17 ||
[Analyze grammar]

antarātmā hṛdayastho jagatsarvaṃ prapaśyati |
saṃkalpena tathā śaktyā jīvakarmānusārataḥ || 18 ||
[Analyze grammar]

prakāśate yathākālaṃ śubhaṃ vā'pyathavā'śubham |
jñānaṃ kriyāṃ hi jīvānāṃ tābhyāṃ kurvanti karma ca || 19 ||
[Analyze grammar]

jñānakriye tu jīvasthe jīvāyatte hi pakṣiṇī |
pakṣābhyāṃ viṣaye deśe dhāvatyagre hi tṛṣṇayā || 20 ||
[Analyze grammar]

sādhukārī bhavatyeva sādhuḥ svargādipuṇyabhāk |
asādhukārī bhavatyasādhurnirayapāpabhāk || 21 ||
[Analyze grammar]

māyayā varṣmaṇopādānatvaṃ tu brahmaṇo bhavet |
kālena tu mahāśaktyā sahakāritvamucyate || 22 ||
[Analyze grammar]

saṃkalpena harestatra nimittamātratā'sti vai |
yathā sṛṣṭau bhagavatastathā jīvasya karmaṇi || 23 ||
[Analyze grammar]

putrotpāde hyupādānatvaṃ jīvasya śarīriṇaḥ |
ṛtukāle samāgṛhya sahakāritvamityapi || 24 ||
[Analyze grammar]

kāmanāyuktajīvasya nimittamātratāpi ca |
evaṃ sarvatra jīvānāṃ hetutā phalabhāgitā || 25 ||
[Analyze grammar]

tasmācchāstrādibhirjñātvā śreyaḥ karma samācaret |
aśreyaḥ sarvathā jñānayatnābhyāṃ vai parityajet || 26 ||
[Analyze grammar]

yathā yathā kṣayaṃ yāti hyaśubhaṃ tu janasya vai |
tathā tathā śubhā buddhirvardhate ca pravartate || 27 ||
[Analyze grammar]

kleśakṣayaṃ pāpaharaṃ śubhaṃ karma karoti ca |
arjite vimale puṇye hyamareṣu mahīyate || 28 ||
[Analyze grammar]

phalaprakāśanaprāptiścāntaryāmikṛtā'sti vai |
svargaḥ śubhaphalaprāptirnirayaḥ pāpasaṃbhavaḥ || 29 ||
[Analyze grammar]

nāciketaḥ śṛṇu tatra svakṛte śubhavartmani |
manasā karmaṇā vācā tapasā caritena vā || 30 ||
[Analyze grammar]

śubhamevā'valambena pāpebhyaḥ sa pramucyate |
yaḥ samaḥ sarvabhūteṣu jitātmā śāntamānasaḥ || 31 ||
[Analyze grammar]

paropakārakartā ca paraduḥkhānnivartate |
pareṣāṃ sukhado nityaṃ sa pāpebhyo vimucyate || 32 ||
[Analyze grammar]

tattvārthaṃ vetti yaḥ samyag jaḍa cetanaṃ tadguṇān |
mohaśūnyo'napekṣaśca padaṃ prāpnoti śāśvatam || 33 ||
[Analyze grammar]

guṇā'guṇaparijñātā kṣayā'kṣayavivekavān |
ātmadhyānaparo jñātā sa pāpebhyaḥ pramucyate || 34 ||
[Analyze grammar]

svadehe paradehe ca svārthaparārthasadṛśaḥ |
ahiṃsāvratavān vijñaḥ sa mucyetainasā dhruvam || 35 ||
[Analyze grammar]

anudvegakaro yastu tṛṣṇākrodhādivarjitaḥ |
nyāyamārgānusārī yaḥ sa pāpebhyaḥ pramucyate || 36 ||
[Analyze grammar]

prāṇāyāmaparo nityaṃ dhāraṇādhyānavāṃśca yaḥ |
vinirvṛttamanā yaśca sa pāpebhyaḥ pramucyate || 37 ||
[Analyze grammar]

yasya kutrāpi nā''śā'sti lolupo neṣṭavastuṣu |
nityatṛptastyajed dehaṃ sa yāti paramaṃ padam || 38 ||
[Analyze grammar]

śraddhāvān surapūjādau pitṛsevāparāyaṇaḥ |
paradravyā'nabhilāṣī sa pāpebhyaḥ pramucyate || 39 ||
[Analyze grammar]

guruśuśrūṣaṇaparo'nasūyo'matsaro'ghṛṇī |
udāracarito'kṣudraśīlo mucyeta bandhanāt || 40 ||
[Analyze grammar]

praśastānāṃ tu yaḥ kartā'nṛśaṃsaparihāravān |
maṃgalotsavakartā yaḥ sa pāpebhyaḥ pramucyate || 41 ||
[Analyze grammar]

tīrthaṃ gacchati yo nityaṃ śuddhaṃ brahma smaran sadā |
apāpāṃ vartayan vṛttiṃ sa pāpebhyaḥ pramucyate || 42 ||
[Analyze grammar]

utthāya pitaraṃ devaṃ mātaraṃ ca guruṃ dvijam |
santaṃ sādhvīṃ namaskuryāt sa pāpebhyaḥ pramucyate || 43 ||
[Analyze grammar]

dātā nā''pnoti duḥkhaṃ vai prahartā sukhavānna vai |
bhakto nāpnoti saṃsāraṃ viṣayī mokṣavānna vai || 44 ||
[Analyze grammar]

etacchreyo hitaṃ caiva sarveṣāṃ samudāhṛtam |
athāpi vakṣye pāpānāṃ nāśāya sādhanaṃ drutam || 45 ||
[Analyze grammar]

saralaṃ kṣaṇasādhyaṃ ca nā''yāso yatra vidyate |
saṃsāratārakā ye ca guravaḥ sādhavo janāḥ || 46 ||
[Analyze grammar]

harerbhaktāśca devāśca munayaśca maharṣayaḥ |
satya sādhvyo brahmacaryaśīlā bhāgavatāśca ye || 47 ||
[Analyze grammar]

teṣāṃ tu pādayordhāryaṃ śiro'rpyaṃ hṛdaye manaḥ |
tadājñāyāṃ vartanīyaṃ bhāvyaṃ sevāpareṇa ca || 48 ||
[Analyze grammar]

santo yathā yathā yena kenāpi karmaṇā muhuḥ |
prasannāḥ syustathā vṛtyaṃ sa pāpebhyaḥ pramucyate || 49 ||
[Analyze grammar]

somaṃ sūryaṃ ca gāyatrījapena smartureva ca |
darśanaṃ brahmabhāvena kartuḥ pāpaṃ praṇaśyati || 50 ||
[Analyze grammar]

guru pradakṣiṇaṃ kuryād dhyāyet taṃ samprapūjayet |
guruṃ hariṃ praseveta sa pāpebhyaḥ pramucyate || 51 ||
[Analyze grammar]

prāṇāyāmaśataṃ kṛtvā sarvapāpaiḥ pramucyate |
sūryaṃ candraṃ cakṣuṣorvai dhyāyedatha hṛdi sthitam || 52 ||
[Analyze grammar]

sampūrṇau vimalau samyag bhrājamānau prapaśyati |
tasya svalpaṃ ca vā vārdhisamaṃ pāpaṃ praṇaśyati || 53 ||
[Analyze grammar]

vāmanaṃ brāhmaṇaṃ dṛṣṭvā vārāhaṃ ca jalotthitam |
siṃhaṃ ca siṃhikārūḍhaṃ namasyato'ghanāśanam || 54 ||
[Analyze grammar]

gāvaḥ pavitrā māṃgalyā devānāmapi devatāḥ |
yastāḥ śuśrūṣate bhaktyā sa pāpebhyaḥ pramucyate || 55 ||
[Analyze grammar]

saumye muhūrte saṃyukte pañcagavyaṃ tu yaḥ pibet |
yāvajjīvakṛtātpāpāt tatkṣaṇādeva mucyate || 56 ||
[Analyze grammar]

lāṅgūlenoddhṛtaṃ toyaṃ mūrdhnā gṛhṇāti yo janaḥ |
sarvatīrthaphalaṃ prāpya sa pāpebhyaḥ pramucyate || 57 ||
[Analyze grammar]

gomūtreṇa tu yaḥ snāyād rohiṇyā mūtradhārayā |
sarvapāpakṛtā doṣā dahyante drāṅ na saṃśayaḥ || 58 ||
[Analyze grammar]

dhenustanād viniṣkāntāṃ dhārāṃ dugdhasya mastake |
dhārayed yaḥ pibeccāpi sa pāpebhyaḥ pramucyate || 59 ||
[Analyze grammar]

gāṃ sūryaṃ brāhmaṇaṃ santaṃ satīṃ prātarnamaścaret |
daded dadhyakṣatavāri sa pāpebhyaḥ pramucyate || 60 ||
[Analyze grammar]

daded dadhyakṣatavāri somāya pūrṇimātithau |
arundhatīṃ grahānnatvā sarvapāpaiḥ pramucyate || 61 ||
[Analyze grammar]

dvijaṃ śuśrūṣate śūdrastasya pāpaṃ praṇaśyati |
viṣuveṣu ca yogeṣu saṃkrāntyādiṣu sarvadā || 62 ||
[Analyze grammar]

vratāheṣu ca sarveṣu samutsavagṛheṣu ca |
śūdraḥ payo dadhiṃ datvā sarvapāpaiḥ pramucyate || 63 ||
[Analyze grammar]

prācīnāgrān kuśān kṛtvā sthāpayitvā vṛṣaṃ tathā |
dvijaiḥ saha namaskṛtya sarvapāpaiḥ pramucyate || 64 ||
[Analyze grammar]

dakṣiṇe tu taṭe nadyāṃ snātvā prāgabhivāhinīm |
ācāmet saṃnamasyet sa mucyate sarvapātakaiḥ || 65 ||
[Analyze grammar]

dakṣiṇāvartaśaṃkhena gṛhītvā vāri mastake |
janmakṛtāni pāpāni śamayatyeva mānavaḥ || 66 ||
[Analyze grammar]

prāksrotasaṃ jalaṃ gatvā nābhimātrajaleḥ sthitaḥ |
snātvā kṛṣṇatilairmiśrā dadyāt saptāñjalīnnaraḥ || 67 ||
[Analyze grammar]

prāṇāyāmatrayaṃ kṛtvā kṛṣṇanārāyaṇaṃ smaret |
yāvajjīvakṛtaṃ pāpaṃ tatkṣaṇādeva naśyati || 68 ||
[Analyze grammar]

acchidrapadmapatreṇa sarvaratnodakena ca |
trivāraṃ yo naraḥ snāyāt sarvapāpaiḥ pramucyate || 69 ||
[Analyze grammar]

ekādaśīnāṃ vratakṛd dvādaśīnāṃ prapālakaḥ |
nārāyaṇaprabhakto yastasyā'ghaṃ spṛśate nahi || 70 ||
[Analyze grammar]

brahmasvaharaṇe raktāstathā brāhmaṇaghātakāḥ |
gurudroharatā devamitradroharatāstathā || 71 ||
[Analyze grammar]

svāmidroharatā ye ca paradārābhimarṣakāḥ |
paradravyaharā ye cā'bhakṣyabhakṣaṇakāriṇaḥ || 72 ||
[Analyze grammar]

dāṃbhikā bhinnamaryādā vedabrāhmaṇanindakāḥ |
asatpratigrahe saktā hyagamyāgamane ratāḥ || 73 ||
[Analyze grammar]

hiṃsakāḥ pāśakāścāpi mārakā hārakāśca ye |
dhūrtāḥ śaṭhāḥ kāpaṭāśca tathā sukṛtavarjitāḥ || 74 ||
[Analyze grammar]

ekādaśīṃ dvādaśīṃ ca śraddhayā pālayanti cet |
tāmupoṣyā'dyaśūnyāśca bhūtvā yānti paraṃ padam || 75 ||
[Analyze grammar]

upāyo'taḥ paro nānyo vidyate pāpanāśakaḥ |
śuklā bhaktipradā bodhyā kṛṣṇā muktiṃ prayacchati || 76 ||
[Analyze grammar]

manasā vacasā caiva karmaṇā samupārjitam |
pāpaṃ māsakṛtaṃ puṃsāṃ dahatyekādaśī kṛtā || 77 ||
[Analyze grammar]

na bhoktavyaṃ na bhoktavyaṃ samprāpte harivāsare |
ekādaśīṃ tu yaḥ pūrṇāmasamartha upoṣitum || 78 ||
[Analyze grammar]

tena naktaṃ prakartavyaṃ tathā'yācitamityatha |
ekabhaktena dānena kartavyaṃ dvādaśīvratam || 79 ||
[Analyze grammar]

upavāsāsamarthaistu dvādaśī ca prabodhinī |
ekopoṣyā tu sā sarvaṃ pāpaṃ dahati janmakṛt || 80 ||
[Analyze grammar]

tasyāmārādhya śrīkṛṣṇanārāyaṇaṃ parameśvaram |
prāpnoti sakalaṃ caitad dvādaśadvādaśīphalam || 81 ||
[Analyze grammar]

pūrvābhādrapadāyuktadvādaśyāṃ kṛtamakṣayam |
uttarābhādrayuktāyāṃ tataḥ koṭiguṇaṃ phalam || 82 ||
[Analyze grammar]

prabodhanyāṃ kṛtaṃ sarvamanantaphaladaṃ bhavet |
śayane bodhane caiva harestu parivartane || 83 ||
[Analyze grammar]

upoṣyaiva vidhānena vratī nirmalatāṃ vrajet |
ekādaśī somayutā kārtike dhavale dale || 84 ||
[Analyze grammar]

uttarābhādrasaṃyuktā tvanantaphaladā matā |
ekādaśī bhaumayuktā dvādaśadvādaśīphalā || 85 ||
[Analyze grammar]

tasmāt sarvaprayatnena dvādaśīṃ samupoṣayet |
te dhanyāste kṛtārthāśca taireva sukṛtaṃ kṛtam || 86 ||
[Analyze grammar]

janmāntarasahasreṣu samārādhya pareśvaram |
vaiṣṇavatvaṃ labhedvipra sarvapāpakṣaye sati || 87 ||
[Analyze grammar]

vaiṣṇavā hi mahābhāgāḥ punanti sakalaṃ jagat |
māmārādhya tathā yāti tadviṣṇoḥ paramaṃ padam || 88 ||
[Analyze grammar]

saṃsmṛtaḥ kīrtito vāpi dṛṣṭaḥ spṛṣṭo'pi vā dvija |
punāti bhagavadbhaktaścāṇḍālo'pi harīcchayā || 89 ||
[Analyze grammar]

ye vaiṣṇavā mahātmāno viṣṇupūjanatatparāḥ |
taranti tārayantyanyān strīśūdrān pāpino janān || 90 ||
[Analyze grammar]

nāciketaḥ śṛṇu gopyaṃ rahasyaṃ pāvanaṃ param |
mahāpāpātipāpānāṃ drāgeva nāśakaṃ mahat || 91 ||
[Analyze grammar]

atyaśuddhajanānāṃ ca bhraṣṭānāṃ karmiṇāṃ tathā |
cāṇḍālānāṃ hiṃsakānāṃ madyacauryakṛtāṃ tathā || 92 ||
[Analyze grammar]

vyavāyināṃ varṇaprasāṃkaryakṛtāṃ viśodhanam |
pāpānāṃ vajralepānāṃ kṣālanaṃ pravadāmi te || 93 ||
[Analyze grammar]

vaiṣṇavānāṃ hi sādhūnāṃ pādaprakṣālitaṃ jalam |
snātaṃ cāpi jalaṃ taistu pītaṃ cāpi jalaṃ tu yat || 94 ||
[Analyze grammar]

spṛṣṭaṃ cāpi jalaṃ yadvai tatpātavyaṃ hi pāpinā |
pīte tad bindumātre vai pāpāni prajvalanti hi || 95 ||
[Analyze grammar]

pāne snāne prokṣaṇe ca śiraḥkṣepe'ṅgalepane |
netrasparśe ca tadvāri nighnantyaghāni janmanām || 96 ||
[Analyze grammar]

yāni kāni ca pāpāni pāpajātīyakānyapi |
dahyanti jalapānena satāṃ prāsādikena vai || 97 ||
[Analyze grammar]

satāṃ dṛṣṭyā striyaḥ śūdrāḥ śuddhyanti śvapacā api |
satāṃ sparśena pāpāśca bhavanti pāvanāḥ kṣayāt || 18 ||
[Analyze grammar]

satāṃ sevāparo deho divyo bhavatyabhautikaḥ |
satāṃ sevāparo lakṣmīrdivyā bhavati mokṣadā || 99 ||
[Analyze grammar]

satāṃ caraṇarajasā snātāste muktibhāginaḥ |
satāṃ snehasya pātraṃ yat tatpātraṃ śrīhareḥ smṛtam || 100 ||
[Analyze grammar]

nāciketaḥ satāṃ yogo hareryogo na saṃśayaḥ |
me dūtāstatra na yatra viṣṇordūtā hi sādhavaḥ || 101 ||
[Analyze grammar]

yamadūtairdharṣitā ye nāryo narā napuṃsakāḥ |
āśliṣyanti tadā sādhūn mucyante te drutaṃ yamāt || 102 ||
[Analyze grammar]

sarvaindriyaiḥ satāṃ yogo muktido brahmabhāvadaḥ |
sādhusaṃyojanaṃ divyaṃ nā'smācchreṣṭhaṃ tathetarat || 103 ||
[Analyze grammar]

hareryogātsādhavo vai nirguṇā brahmamūrtayaḥ |
sādhuyogātpāpijīvā bhavanti brahmamūrtayaḥ || 104 ||
[Analyze grammar]

sadbhirmuktaṃ vastumātraṃ divyaṃ bhavati nirguṇam |
guptaṃ prakāśaṃ tatsarvaṃ brahmabhūyāya kalpate || 105 ||
[Analyze grammar]

iti te kathitaṃ vipra samuddhārasya sādhanam |
gacchātmajñānasahitaścānyad dattamavāpya ca || 106 ||
[Analyze grammar]

ityuktvā yamarājaḥ sa samutthāyā''sanāt svakāt |
kṛtvā pūjāṃ ca me yuktāṃ priyamuktvā ca bhūsuraḥ || 107 ||
[Analyze grammar]

visarjayāmāsa vibhuḥ suprītenā''ntarātmanā |
etadvaḥ kathitaṃ viprāstasya rājñaḥ purottame || 108 ||
[Analyze grammar]

yathādṛṣṭaṃ śrutaṃ cāpi yathā cehā''mato'smyaham |
hati lakṣmi nāciketovacaḥ śrutvā tu bhūsurāḥ || 109 ||
[Analyze grammar]

sarvamūrdhanyamūrdhanyaṃ satāṃ prāsādikaṃ jalam |
jñātvā harṣa samāpannāḥ sādhavo dīnavatsalāḥ || 110 ||
[Analyze grammar]

kecid vaikhānasāstatra kecidāsannirāsanāḥ |
yāyāvarāstathā cānye vānaprasthāstathā'pare || 111 ||
[Analyze grammar]

śālīnāśca tathā kecit kāpotīṃ vṛttimāsthitāḥ |
śiloñchāścābhavannanye pākino'pākapācinaḥ || 112 ||
[Analyze grammar]

nānāyajñakarāḥ kecijjitātmānastu kecana |
sthānamaunadharāstvanye jalavāsāstathā'pare || 113 ||
[Analyze grammar]

tathordhvaśāyikāvṛkṣe tathānye mṛgacāriṇaḥ |
paṃcāgnayastathā cānye kecit parṇaphalāśinaḥ || 114 ||
[Analyze grammar]

abbhakṣā vāyubhakṣāśca tathā'nye śākabhakṣiṇaḥ |
tāpasā vividhāstvete śāśvatīṃ dhiyamāśritāḥ || 115 ||
[Analyze grammar]

śrutvā caivaṃ kathāmetāmṛṣayo divyavarcasaḥ |
vismitā jalamāhātmyaṃ śrutvā sādhusamāśrayam || 116 ||
[Analyze grammar]

yayurbadryāśramaṃ sādhornaranārāyāgasya vai |
caraṇayorjalaṃ pātumicchavo bhaktitatparāḥ || 117 ||
[Analyze grammar]

naciketo'pi dharmātmā putraṃ dṛṣṭvā yamā'rcitam |
tapodhanaṃ punaḥprāptaṃ dharmamevā'nvacintayat || 118 ||
[Analyze grammar]

nāciketā api śiṣyān ātmajñānamaśikṣayat |
sādhudharmaṃ pāvanaṃ ca pālayāmāsa nirbharam || 119 ||
[Analyze grammar]

iti te kathitaṃ lakṣmi yāmyacakre mahābalam |
taduddhārakaraṃ vāri satāṃ prāsādikaṃ mahat || 120 ||
[Analyze grammar]

yamunāyāśca gaṃgāyā gomatyāścāpi sarvathā |
godāvaryāḥ sarayvāśca revāyāścāpi sarvathā || 121 ||
[Analyze grammar]

gaṇḍakyāḥ svarṇarekhāyāstapatyāścāpi sarvathā |
kāveryāstāmraparṇāyāḥ samudrāṇāṃ ca sarvathā || 122 ||
[Analyze grammar]

tīrthānāṃ yāni vārīṇi tebhyaḥ sarvebhya eva yat |
divyaṃ śreṣṭhaṃ pāvanaṃ ca sādhupādajalaṃ sadā || 123 ||
[Analyze grammar]

sarvakāmapradaṃ mokṣapradaṃ lakṣmīpradaṃ mahat |
śravaṇātpaṭhanādasya phalaṃ sarvapradaṃ bhavet || 124 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne yamarājoktaṃ śubhāśubhapravṛttikāraṇaṃ pāpamocanopāyaḥ dhenusevaikādaśīprabhativratasādhucaraṇāmṛtapānasevanādibhiḥ paramaśreyaityādiśrutamuktvā nāciketā virarāma ṛṣayo badrīnārāyaṇaṃ jagmurityādinirūpaṇanāmā triṣaṣṭyadhikatriśatatamo'dhyāyaḥ || 363 ||
[Analyze grammar]