Chapter 362

śrīnārāyaṇa uvāca |
śṛṇu lakṣmi tatastatra yajjātaṃ tad vadāmi te |
nāciketā dvijānāha yad dṛṣṭaṃ tad yathārthataḥ || 1 ||
[Analyze grammar]

śṛṇvantu brāhmaṇāstatra dharmarājena dhīmatā |
dṛṣṭā vimānakaiḥ sūryasamairyānto divaṃ prati || 2 ||
[Analyze grammar]

tāpasāḥ siddhimantaste patnīyutāḥ sabāndhavāḥ |
sānurāgāḥ puṇyapuñjadyotamānānanāśca te || 3 ||
[Analyze grammar]

tato drāgeva sañjāto dharmarājo'tiduḥkhitaḥ |
vivarṇavadano roṣāt prabhātejovivarjitaḥ || 4 ||
[Analyze grammar]

etādṛśaṃ tu taṃ dṛṣṭvā pṛṣṭavānahamaṃjasā |
api tvaṃ bhrājamānastu kathaṃ vaivarṇyamāptavān || 5 ||
[Analyze grammar]

vitapyase kathaṃ rājan hyetadicchāmi veditum |
yamarājastadā prāha vivarṇaśokakāragam || 6 ||
[Analyze grammar]

yāyāvarā uñchavṛttiparāḥ svādhyāyakāriṇaḥ |
ātithyasatkriyāvanto yoginaśca jitendriyāḥ || 7 ||
[Analyze grammar]

brahmacaryaparā ye tu sādhavaśca satīstriyaḥ |
te sarve māmanādṛtya gacchantyupari me dvija || 8 ||
[Analyze grammar]

na te yāmupatiṣṭhanti na hi te vaśagā mama |
mastake mama gacchanti patnīyuktāḥ sahānugāḥ || 9 ||
[Analyze grammar]

divyagandhaviliptāṃgā mālyābharaṇabhūṣitāḥ |
vadantaśca samuddiśya māṃ yathā mlānatā bhavet || 10 ||
[Analyze grammar]

yameśaṃ na gaṇayāmo gacchāmastatparaṃ sthalam |
mṛtyo tiṣṭhasi kasyārthe ko vā mṛtyuryamaśca kaḥ || 11 ||
[Analyze grammar]

asmatkṛte nirartho'yaṃ yamo yameśvaro'pi ca |
doṣānvitān sadā haṃsi pāpiṣṭhāndharmavarjitān || 12 ||
[Analyze grammar]

nā'si roddhuṃ samartho'pi yāsyāmaḥ paramaṃ padam |
iti bruvantaḥ saṃyānti vaimānikāḥ śrutaṃ mayā || 13 ||
[Analyze grammar]

nigrahānugrahau kartuṃ mayā śakyau na yoginām |
samartho'pi śṛṇomyevaṃ tena tapye dvijottama || 14 ||
[Analyze grammar]

aśaktiṃ svāṃ teṣu matvā paritapye bhṛśaṃ dvija |
ityakathayanmāṃ dharmarājastatra kṣaṇāntare || 15 ||
[Analyze grammar]

kācitpativratā sādhvī vimānenā''yayau puraḥ |
mahādyutiḥ sānugā sabhartṛkā saparicchadā || 16 ||
[Analyze grammar]

sotsavā dharmarājānamuvāca sukhakṛddhitam |
dharmarāja mahāpūjya mā yāhi mlānatāṃ prabho || 17 ||
[Analyze grammar]

viprāstapasvinaḥ śāntāḥ santaḥ sādhvyaśca tāpasāḥ |
darśanīyā vandanīyāḥ svabalāt pāragāminaḥ || 18 ||
[Analyze grammar]

eteṣāṃ tapasāṃ dharma māhātmyaṃ balamityapi |
mokṣaprāptipradaṃ ceśalokapradaṃ parātparam || 19 ||
[Analyze grammar]

acintyāḥ sarvabhūtānāṃ sādhavo brāhmaṇāstathā |
brāhmaṇāḥ satataṃ pūjyāḥ sādhavaḥ sarvadevatāḥ || 20 ||
[Analyze grammar]

sattā tatra na yoktavyā mātsaryaṃ varjyameva ca |
rāgo roṣastathā moho na kartavyaḥ sadā satām || 21 ||
[Analyze grammar]

evamuktvā namaskṛtya prayātā sā paraṃ divam |
tato mayā vai saṃpṛṣṭaṃ dharmarājāya kā'bhavat || 22 ||
[Analyze grammar]

dharmarājo jagādā'tha kathāṃ māṃ kṛtsnaśastataḥ |
purā kṛtayuge vipra nimirnāma mahāyaśāḥ || 23 ||
[Analyze grammar]

āsīd rājā dharmatejovīryasatyavratānvitaḥ |
tasya putro mithirnāma mithilā yena nirmitā || 24 ||
[Analyze grammar]

mithilāyā janakatvāt janakaścopanāmakaḥ |
tasya rūpavatī nāma patnī priyapriyaṃkarī || 25 ||
[Analyze grammar]

patibhaktā mahāprītyā bharturvacanakāriṇī |
tayoḥ rājye jarāvyādhimṛtyavaḥ prabhavanti na || 26 ||
[Analyze grammar]

vavarṣa satataṃ devo rujārto na janaḥ kvacit |
uvāca rājñī rājānaṃ vinayāddharmabhṛdvacaḥ || 27 ||
[Analyze grammar]

rājaṃstvayā kṛtā yajñā bhojitāsteṣu bhūsurāḥ |
dattaṃ dāna bahuvidhaṃ nālpaṃ dravyaṃ viśiṣyate || 28 ||
[Analyze grammar]

bhṛtyānāṃ ca dvijātīnāṃ tathā parijanasya ca |
yadabhūt draviṇāṃ kiñcitpṛthivyāṃ yadgṛhe ca te || 29 ||
[Analyze grammar]

viniyuktaṃ tu tatsarvaṃ dānakārye hyaśeṣataḥ |
na tvaṃ rājan vijānāsi kuto bhojanamarthayet || 30 ||
[Analyze grammar]

nāsti gṛhe na cānyatra kapardikāpi vidyate |
patraṃ puṣpaṃ phalaṃ kandaḥ ṛṣibhyo dattameva ha || 31 ||
[Analyze grammar]

kṣetraṃ ca vāṭikā rājyaṃ sarvaṃ brāhmaṇasātkṛtam |
na vā gavādikaṃ kiñcinna ca vastrāṇi karhicit || 32 ||
[Analyze grammar]

na caiva vārṣikaḥ kaścidāyo'sti bhojanasya tu |
kathaṃ hyudaryaśāntyarthaṃ vartanīyaṃ vada prabho || 33 ||
[Analyze grammar]

iti priyāvacaḥ śrutvā janakaḥ prāha bhāminīm |
śṛṇu bravīmi saṃśakyaṃ yadi me manyase hitam || 34 ||
[Analyze grammar]

haviṣye vartamānānāmidaṃ varṣaśataṃ gatam |
kuddālena ca kāṣṭhena kṣetraṃ vai kurvahe priye || 35 ||
[Analyze grammar]

tato'nnapānavastrādiprāptirdharmo bhaviṣyati |
bhakṣyaṃ bhojyaṃ tadanyacca labdhvā tvaṃ sukhamāpsyasi || 36 ||
[Analyze grammar]

evamuktā tu sā rājñī saṃhṛṣṭā nṛpamabravīt |
bhṛtyānāṃ tu sahasrāṇi dāsīnāṃ te niveśane || 37 ||
[Analyze grammar]

aśvānāṃ ca gajānāṃ ca saurabhīnāṃ ca koṭayaḥ |
uṣṭrāṇāṃ ca mahiṣāṇāṃ kharāṇāṃ cāpi koṭayaḥ || 38 ||
[Analyze grammar]

vṛṣabhāṇāṃ ca bhṛtyānāṃ koṭayaḥ santi te gṛhe |
niyukṣva rājan sarvāṃstān kṛṣikārye tavepsite || 39 ||
[Analyze grammar]

rājā prāha mayā rājñi dāne dattāni tāni vai |
balīvardāḥ kharā aśvā gajā uṣṭrāśca mānavāḥ || 40 ||
[Analyze grammar]

sarve niyuktā dāneṣu na me sattā'sti teṣu vai |
āyasaṃ trāpuṣaṃ tāmraṃ rājataṃ kāñcanaṃ ca yat || 41 ||
[Analyze grammar]

draviṇaṃ sarvamevātra dāne yajñe niyojitam |
na vai paśyāmi dharmajñe gṛhe svarṇaṃ tathā''yasam || 42 ||
[Analyze grammar]

yena kuryāmahaṃ devi kuddālaṃ kṛṣikarmaṇe |
evamuktā'tihṛṣṭā sā'bravīd rūpavatī nṛpam || 43 ||
[Analyze grammar]

gacchāvo nṛpa bhadraṃ syādudyogaḥ sampadāṃpradaḥ |
evamukto nimiputro yayau kṣetraṃ sabhāryakaḥ || 44 ||
[Analyze grammar]

idṃ bhadraṃ mama kṣetraṃ vanavṛkṣamayaṃ sadā |
asaṃskṛtaṃ tathā'kṛṣṭaṃ na dattaṃ yannirarthakam || 45 ||
[Analyze grammar]

atrā''sva taṃ svalpagulmān kaṇṭakāṃśca chinadmyaham |
atisvalpatṛṇādīṃśca tvametān śodhaya priye || 46 ||
[Analyze grammar]

evamuktā mahārājñī pātivratyaparāyaṇā |
vṛkṣacchāyāṃ samāśritya tṛṇagulmān nikṛntati || 47 ||
[Analyze grammar]

tāvat tayā pativākyapālinyā puṇyavaibhavāt |
dṛṣṭaḥ pārśve mahān gulmaḥ sauvarṇaṃ kanakapradaḥ || 48 ||
[Analyze grammar]

uvāca madhuraṃ vākyaṃ prasannā sā nṛpāṃganā |
vṛkṣo'tra dṛśyate pārśve sauvarṇo gulma uttamaḥ || 49 ||
[Analyze grammar]

tāvadvṛkṣastayā tvanyo dṛṣṭaḥ phalādiśobhitaḥ |
tāvattatra tṛtīyo drurdṛṣṭo bhojanavastuyuk || 50 ||
[Analyze grammar]

na dṛṣṭantu jalaṃ tatra sānnidhye vanabhūtale |
uvāca hṛṣṭā rājānaṃ prāptaṃ bhojyaṃ na vai jalam || 51 ||
[Analyze grammar]

kathametaccopapannaṃ dṛṣṭvā rājā'pyuvāca tām |
pūrvaṃ dattaṃ jalaṃ cānnaṃ sarvamagre pradhāvati || 52 ||
[Analyze grammar]

kṛtaṃ vai prāpyate sarvaṃ nā'kṛtaṃ tu kathaṃcana |
jalaṃ cāpi pradattaṃ tadavaśyaṃ sammiliṣyati || 53 ||
[Analyze grammar]

ityuktvā śodhayāmāsa kṣetraṃ sabhāryako nṛpaḥ |
viyanmadhye tadograśca savitā tapate hyati || 54 ||
[Analyze grammar]

pravṛddho dāruṇo gharmo rājñī tu tṛṣitā'bhavat |
snigdhau tāmratalau pādau tasyāḥ santāpamāgatau || 55 ||
[Analyze grammar]

pravālaraktau hastau ca śarīraṃ komalaṃ tathā |
vyathitā sūryatāpena bhṛśamuṣṇena pīḍitā || 56 ||
[Analyze grammar]

patitā mūrchayā bhūmau tṛṣāvegena bhāminī |
patantyā tu tayā dṛṣṭaḥ sūryo vihvalayā dṛśā || 57 ||
[Analyze grammar]

yadṛcchayā patantyā tu sūryaḥ kopena vīkṣitaḥ |
tena sūryo'titejasvī santrasto gagane'bhavat || 58 ||
[Analyze grammar]

gatihīno divaṃ muktvā patito dharaṇītale |
nistejaskaḥ śāntavarṇaḥ śītalaśca tadā'bhavat || 59 ||
[Analyze grammar]

pativratāyāḥ sānnidhye sūryatejo layaṃ gatam |
rājā sa janakaḥ prāha rakṣa svabhāvaśūnyakam || 60 ||
[Analyze grammar]

kimarthamiha tejastvaṃ tyaktvā pṛthvyāṃ samāgataḥ |
kiṃ karomi hi pūjārthe namaskaromi bhāskara || 61 ||
[Analyze grammar]

evaṃ bruvantaṃ rājānaṃ sūryaḥ savinayo'bravīt |
pativratā te gṛhiṇī mamaiṣā ruṣitā manāk || 62 ||
[Analyze grammar]

tasyā roṣaprabhāveṇa patito'haṃ vimūrchitaḥ |
anayā sadṛśī nārī trailokye naiva vidyate || 63 ||
[Analyze grammar]

aho'syāḥ paramā sevā aho'syāḥ paramaṃ tapaḥ |
aho dhairyamaho śaktistavevā'syāḥ śubhā guṇāḥ || 64 ||
[Analyze grammar]

anurūpā viśuddhā ca tava cittānusāriṇī |
pativratyena tapasā sādhvī tava hite ratā || 65 ||
[Analyze grammar]

kalpavṛkṣasamā ceyaṃ sadṛśī te surārcane |
pātraṃ pātravatā prāptaṃ sukṛtasya mahatphalam || 66 ||
[Analyze grammar]

anurūpo virūpo vā tvayā kāmastu yaḥ kṛtaḥ |
vitatho vā bhavedasyāḥ pātivratyaprabhāvataḥ || 67 ||
[Analyze grammar]

kuruṣva svepsitaṃ kṣetraṃ yathā manasi dhāritam |
ahaṃ dadāmi vai vāri daivamamṛtasadṛśam || 68 ||
[Analyze grammar]

bhojanaṃ saṃdadāmyetadupānahau sudivyakau |
chatraṃ śayyāṃ tathā divyāṃ kāmadhenuṃ maṇiṃ śubham || 69 ||
[Analyze grammar]

pātraṃ tvakṣayyamevāpi nityaṃ bhojyādipūrakam |
evamuktvā svayaṃ sūryaḥ sasarja jalabhājanam || 70 ||
[Analyze grammar]

upānahīौ maṇiṃ chatraṃ śayyāṃ sthālīṃ ca gāṃ tathā |
dadau tasmai maithilāya savitā snehasaṃplutaḥ || 71 ||
[Analyze grammar]

uvāca sa punarbhūpaṃ dehi rājñyai sukhāṃ kuru |
kṣetraṃ yaśasyaṃ phaladaṃ bhaviṣyatyapi kāmadam || 72 ||
[Analyze grammar]

rājñā sā''pyāyitā devī toyena tu tadā hi sā |
labdhasaṃjñā luptabhayā rājānamidamabravīt || 73 ||
[Analyze grammar]

kena dattaṃ śītatoyaṃ divyaṃ chatramupānahau |
śayyā dhenurmaṇiḥ pātraṃ bhojyaṃ ceti vadātra me || 74 ||
[Analyze grammar]

rājā prāha svayaṃ sūryo devi tavā'nukampayā |
etatsarvapradānāya muktvā''kāśamihā''gataḥ || 75 ||
[Analyze grammar]

ityuktvā pūjitaḥ sūryo dvābhyāṃ sūryeṇa satkṛtau |
arthayāmāsatuḥ sūryaṃ kiṃ kurvo bhagavaṃstava || 76 ||
[Analyze grammar]

evamukto vivasvān sa jagād svā'vanā'rthakam |
abhayaṃ me sadātvastu pativratābhya eva ha || 77 ||
[Analyze grammar]

pativratābhyaḥ saṃkleśaḥ strībhyo me mā bhavet kvacit |
sūryasya vacanaṃ śrutvā rājñī prāha tathāstviti || 78 ||
[Analyze grammar]

abhayaṃ te sarvanetra yathā tvaṃ vṛtavānasi |
ityuktaḥ sa yayau svasya maṇḍalaṃ divi bhāskaraḥ || 79 ||
[Analyze grammar]

saiṣā pativratā rūpavatī janakabhāminī |
pātivratyaprabhāveṇa sarvamāptavatī vane || 80 ||
[Analyze grammar]

mayā'pi pūjyate svāmivratā sūryasya sūnunā |
na tasyā niyamo vipra svatantraṃ nahi vai tapaḥ || 81 ||
[Analyze grammar]

upavāso na dānaṃ vā na devo vā patimṛte |
prasupte yā prasvapiti jāgarti vibudhe sati || 82 ||
[Analyze grammar]

bhuṃkte tu bhojite patyau sā mṛtyuṃ jayati dhruvam |
maune maunā sthite sthitimatī mṛtyuṃ jayatyapi || 82 ||
[Analyze grammar]

ekadṛṣṭirekamanā bharturvacanakāriṇī |
tasyā bibhīmahe sarve devā daityāśca dānavāḥ || 84 ||
[Analyze grammar]

devānāmapi pūjyā sā sādhvī santoṣasadvratā |
bhartrā cābhihitā yā na tatpratyākhyāyinī bhavet || 85 ||
[Analyze grammar]

sevāyāṃ vartamānā sā pratyākhyātā priyeṇa tu |
na daivataṃ saṃprayāti patyuranyaṃ kadācana || 86 ||
[Analyze grammar]

sā na mṛtyumukhaṃ yāti tvevaṃ yā strī pativratā |
evaṃ yā tu bhavennityaṃ bhartuḥ priyahite ratā || 86 ||
[Analyze grammar]

sā tu nityaṃ svabhartāraṃ chāyeva tvanugacchati |
sā tu mṛtyumukhadvāraṃ na vai gacchet kadācana || 88 ||
[Analyze grammar]

eṣa mātā pitā bandhureṣa me daivataṃ param |
patiṃ śuśrūṣave caivaṃ sā māṃ vijayate sadā || 89 ||
[Analyze grammar]

bhartāramanudhyāyantī bhartāramanugacchatī |
bhartāramanuśocantī mṛtyudvāraṃ na paśyati || 90 ||
[Analyze grammar]

gītavāditranṛtyāni naikapradarśanānyapi |
na śṛṇoti na paśyed yā mṛtyudvāraṃ na paśyati || 91 ||
[Analyze grammar]

snāntī vā tiṣṭhatī vāpi kurvantī vā prasādhanam |
pratyāhūtā copatiṣṭhenmṛtyudvāraṃ na paśyati || 92 ||
[Analyze grammar]

devatā arcayantaṃ vā bhujyamānaṃ patiṃ tu yā |
cittānnaṃ tyajate kvāpi mṛtyudvāraṃ na paśyati || 93 ||
[Analyze grammar]

nānyaṃ yā manasā paśyenmṛtyudvāraṃ na paśyati |
bhānau tvanudite nityaṃ gṛhaṃ mārjayate tu yā || 94 ||
[Analyze grammar]

bharturmukhaṃ prapaśyed yā bhartuścittānukāriṇī |
vartate tu hite bharturmṛtyudvāraṃ na paśyati || 95 ||
[Analyze grammar]

cakṣurdehaśca bhāvaśca yasyā nityaṃ susaṃvṛtam |
śaucācārasamāyuktā sā tu mṛtyuṃ na paśyati || 96 ||
[Analyze grammar]

etāḥ kīrtimatāṃ loke dṛśyante divi devatāḥ |
mānuṣāṇāmapi bhāryā dṛśyante divi devatāḥ || 97 ||
[Analyze grammar]

ādityena mama pitrā pūjitāstāḥ pativratāḥ |
mayā tasmāttu pūjyante sarvadaiva pativratāḥ || 98 ||
[Analyze grammar]

evaṃ pativratā nityaṃ mārgeṇā'nena yānti vai |
bahūnuddhārya satataṃ pūjyante tā mayā sadā || 99 ||
[Analyze grammar]

ruddhyante na mayā tāstu nā'haṃ śakto'smi rodhane |
janakasya tu sā bhāryā kṣaṇārdhaṃ jalakāmyayā || 100 ||
[Analyze grammar]

atrā''gatā'bhavattāvatsūryastasyai jalaṃ dadau |
gṛhītvā matkṛtāṃ pūjāṃ yayau drāk svāminaṃ svakam || 101 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne yāmyacakre pativratāmāhātmye mithināmajanakapatnyā rūpavatyāḥ pātivratyaprabhāveṇa vane'pi sūryadvārā phalānnajalasvarṇādisarvasmṛddhiprāptiḥ pativratādharmakathanaṃ cetyādinirūpaṇanāmā dvāṣaṣṭyadhikatriśatatamo'dhyāyaḥ || 362 ||
[Analyze grammar]