Chapter 361

śrīnārāyaṇa uvāca |
śrūyatāṃ ca tvayā lakṣmi citraguptanideśanam |
yattvadhikaṃ punaścoktaṃ nāciketā jagād tān || 1 ||
[Analyze grammar]

dūtā gṛhṇantu taṃ śīghraṃ yathā kālo na vai kramet |
kā kṛpā kriyate tatra gṛhṇantu ghnantu mā ciram || 2 ||
[Analyze grammar]

mā'tra vrīḍā prakartavyā mā tiṣṭhantu parāṅmukhāḥ |
kiṃ na gacchatha vegena vā mā sta dīrghasūtriṇaḥ || 3 ||
[Analyze grammar]

śīghraṃ gacchata tatraiva samānayata satvaram |
nā'śaktirdarśayitavyā gaṇanīyā na satkriyā || 4 ||
[Analyze grammar]

na vivāho na vai tāpasatvaṃ naiṣṭhikatā tathā |
na navastrīramaṇaṃ vā pātivratyaṃ satītvakam || 5 ||
[Analyze grammar]

sādhvītvaṃ bālakatvaṃ vā dānasthatvaṃ ratisthitiḥ |
rājyakāryaṃ sabhāsthānaṃ vyomayānaṃ prapūjanam || 6 ||
[Analyze grammar]

mā gaṇanīyaṃ kimapi yathā kālo'natikramet |
śīghramatrā''nayadhvaṃ vai yathākarma praśāsanam || 7 ||
[Analyze grammar]

śīghraṃ tvaṃ bhava sarpaśca bhava tvaṃ vyāghra ityapi |
sarīsṛpo jalagrāho bhava tvaṃ kṛmiralpakaḥ || 8 ||
[Analyze grammar]

bhava tvaṃ vyādhirūpaśca bhavātisāra ityapi |
chardiḥ punarbhava tvaṃ ca karṇarogo viṣūcikā || 9 ||
[Analyze grammar]

jvaro bhavā'nilavyādhistvaṃ ca bhava jalodaraḥ |
apasmārastvamunmādo viṣṭaṃbho vibhramo bhava || 10 ||
[Analyze grammar]

drutaṃ dravata vegena sarve gacchata mā ciram |
yathānyāyaṃ yathākarma yathākālaṃ ca dehinaḥ || 11 ||
[Analyze grammar]

dharṣayantu karṣayantu samānayantu mā ciram |
āyuṣyānte mārayantu yathā kālo na sampatet || 12 ||
[Analyze grammar]

jāgrataṃ vā nidritaṃ vā mūrchitaṃ vā suṣuptakam |
yathāvācyaṃ prakuruta yathākālo na gacchati || 13 ||
[Analyze grammar]

yathā''jñāpayati rudro yathā saṃkarṣaṇaḥ prabhuḥ |
yathā brahmā dharmarājaścitraguptastathā prabhuḥ || 14 ||
[Analyze grammar]

ityājñāpayati citraguptastathā prayānti ca |
yamadūtā ānayanti dehinastatra sannidhau || 15 ||
[Analyze grammar]

teṣāṃ karmāṇi cālokya daṇḍaṃ diśati tatra vai |
yamaśca citraguptaśca vadāmi yacchrutaṃ mayā || 16 ||
[Analyze grammar]

ayaṃ tu puṇyavān dātā yātu svargaṃ mahīkṣitām |
ayaṃ bhavatu vṛkṣo vai tīryagayaṃ prajāyatām || 17 ||
[Analyze grammar]

ayaṃ nāgo bhavatveva yātvayaṃ paramāṃ gatim |
svapūrvajā'vamantā'yaṃ yātu narakaṃ dāruṇam || 18 ||
[Analyze grammar]

dāratyāgakaraṃ tvenaṃ kṣapayantu hi raurave |
mucyantāṃ ta ime cānye mucyantāṃ pāpavarjitāḥ || 19 ||
[Analyze grammar]

svargaṃ prayāntu dharmiṣṭhā uṣitvā bahukalpakān |
sarvasmṛddhimaye bhūmau mānuṣe yāntu sajjanum || 20 ||
[Analyze grammar]

brāhmaṇārthe gavārthe vā rāṣṭrārthe nidhanaṃ gatam |
śakrasya tvamarāvatyāṃ preṣayantu ca mā ciram || 21 ||
[Analyze grammar]

kalpamekaṃ tatra vāso bhavatvasya sukhāvahaḥ |
bahudānarataṃ cainaṃ sarvajīvānukampakam || 22 ||
[Analyze grammar]

gandhamālyaiḥ pūjayantu samarpayantu copadāḥ |
vijyatāṃ cāmeraireṣo yānamasmai pradīyatām || 23 ||
[Analyze grammar]

vaihāyasena yānena yātvayaṃ tvindrapattanam |
śaṃkhatūryā'bhighoṣeṇa satkṛto labhatāṃ sukham || 24 ||
[Analyze grammar]

ayaṃ gacchatu sallokaṃ kīrtimatāṃ śubhāspadam |
guṇaiḥ sevādibhirindrāyuṣyo'stu vai triviṣṭape || 25 ||
[Analyze grammar]

ratnasvarṇapradātā'yamaśvinorlokametu vai |
bahvannadānakartā'yaṃ śivalokaṃ prayātu vai || 26 ||
[Analyze grammar]

miṣṭānnasya ca dugdhasya dogdhā gordānakāryayam |
hemavastrasya sandātā tisraḥ koṭyastriviṣṭape || 27 ||
[Analyze grammar]

tiṣṭhatu cyuta evātra ṛṣivaryo bhavet kṣitau |
pitṛtarpayitā cāyaṃ satyalokaṃ prayātu vai || 28 ||
[Analyze grammar]

sarvakāmapradaścāyaṃ sarvabhūtahite rataḥ |
kṣiterdātāṃ prayātveva bahukālaṃ triviṣṭapam || 29 ||
[Analyze grammar]

evaṃ puṇyakṛto yāntu svargānyatheṣṭabhogadān |
pāpakṛto hyadho yāntu nirayān kleśasaṃcayān || 30 ||
[Analyze grammar]

evaṃ śrutaṃ mayā viprāḥ śrutaścāpi phalodayaḥ |
kathayāmi ca tatsarvaṃ śṛṇudhvaṃ vai samāhitāḥ || 31 ||
[Analyze grammar]

ayaṃ cātithyasatkartā sarvabhūtānukampanaḥ |
samānnadānakartā ca śeṣabhojanabhāgayam || 32 ||
[Analyze grammar]

vairājasya padaṃ yātu sarvabhāgyasukhānvitaḥ |
enaṃ gāsyanti gandharvā gamane'psarasastathā || 33 ||
[Analyze grammar]

dīyatāmāsanaṃ divyaṃ dīyatāṃ vyomavāhanam |
yānyānkāmānkāmayate dīyatāṃ mama śāsanāt || 34 ||
[Analyze grammar]

svargakāmānpitṛkāmānsatyakāmānvirājagān |
samarpayantu vai tvasmai dāsadāsīparicchadān || 35 ||
[Analyze grammar]

dattānyanena dānāni ratnasvarṇagavādayaḥ |
mahiṣīgajaturagāḥ kṣetraṃ codyānavāṭikāḥ || 36 ||
[Analyze grammar]

kanyādānāni bahūni cānnadānānyapīha yat |
prekṣyatāṃ sa mahābhāgo bhoktuṃ divi sahānugaḥ || 37 ||
[Analyze grammar]

yāvat svargād vimānāni samāgacchanti kṛtsnaśaḥ |
tataḥ sa pravarairyānaiḥ sānugaḥ saparicchadaḥ || 38 ||
[Analyze grammar]

devānāṃ bhavanaṃ yātu devatābhiḥ supūjitaḥ |
tatraiva ramatāṃ puṇyo yāvatsvargaṃ hi tiṣṭhati || 39 ||
[Analyze grammar]

athainaṃ yajñakartāraṃ naikakanyāpradāyakam |
pūjayantu sarvakāmaiḥ padaṃ yātu sa vaiṣṇavam || 40 ||
[Analyze grammar]

tatraiṣa ramatāṃ puṇyaḥ sahasramayutaṃ samāḥ |
bhūtānukampako hyeṣa kriyatāmasya pūjanam || 41 ||
[Analyze grammar]

varṣāṇāmayutaṃ divyaṃ tiṣṭhatu diviṃ devavat |
athā'nena pradattāni chatraṃ pātraṃ tathā'mbaram || 42 ||
[Analyze grammar]

upānahau ca bhojyāni tasmai pūjāṃ prayacchatha |
hastapadmacamatkāro vidyādharo bhavatvayam || 43 ||
[Analyze grammar]

mahāpadmāni catvāri svarge tiṣṭhatu sarvadā |
anenā'nāthadīneṣu dattaṃ kṣīraṃ dadhiṃ ghṛtam || 44 ||
[Analyze grammar]

nīyatāṃ rasavatsvargaṃ pūjāṃ tvasmai prayacchatha |
gorasasya ca pūrṇāni bhājanāni prayacchatha || 45 ||
[Analyze grammar]

datvā svabāndhavebhyaḥ sa pītvā svajanabāndhavaiḥ |
yātvanasūyake svarge ramatāṃ varṣakoṭayaḥ || 46 ||
[Analyze grammar]

bahusundaranārībhiḥ sevyamāno'maraḥ sadā |
golokeṣu sadā cāyaṃ vasatu bhogyasaṃbhṛtaḥ || 47 ||
[Analyze grammar]

ikṣusārapradātā'yaṃ dugdhasārā'rpako hyayam |
annasārapradātā ca vastrabhūṣā'rpakastathā || 48 ||
[Analyze grammar]

gṛhakṣetrapradātā ca sarvopaskaraṇā'rpakaḥ |
golokeṣu nīyatāṃ ca vṛṣavāhanasaṃyutaḥ || 49 ||
[Analyze grammar]

sarvadevātmikā devyo yatra tiṣṭhanti sevikāḥ |
amṛtaṃ dhārayantyaśca sevante'harniśaṃ śubhāḥ || 50 ||
[Analyze grammar]

dadhi dugdhaṃ ghṛtaṃ puṣṭiḥ pavitraṃ tīrthamamṛtam |
dadhnā tṛpyanti devādyāḥ kṣīreṇa tu maheśvaraḥ || 51 ||
[Analyze grammar]

ghṛtena pāvako nityaṃ pāyasena pitāmahaḥ |
sakṛd dattena prīyante varṣāṇāṃ tu trayodaśa || 52 ||
[Analyze grammar]

pañcagavyena pītena vājimedhaphalaṃ labhet |
gavyaṃ tu paramaṃ medhyaṃ gāvo medhyā hi devatāḥ || 53 ||
[Analyze grammar]

dānteṣu maruto devā jihvāyāṃ tu sarasvatī |
khuramadhye tu gandharvāḥ khurāgreṣu tu pannagāḥ || 54 ||
[Analyze grammar]

sarvasandhiṣu sādhyāśca candrādityau tu locane |
kakude ca nakṣatrāṇi lāṃgūle dharma āsthitaḥ || 55 ||
[Analyze grammar]

apāne sarvatīrthāni lakṣmīstiṣṭhati śakṛti |
prasrāve jāhnavī devī staneṣvasyāstu sāgarāḥ || 56 ||
[Analyze grammar]

ṛṣayo romakūpeṣu vidyādharāstu romasu |
tvaci vaikuṇṭhamevā'sti pārśvayorayanadvayam || 57 ||
[Analyze grammar]

kṣamā dhṛtiśca śāntiśca puṣṭirvṛddhiḥ smṛtirmatiḥ |
medhā lajjā vapuḥkīrtirvidyā śāntiśca santatiḥ || 58 ||
[Analyze grammar]

kriyonnatyādikā dharmapatnyo goṣu vyavasthitāḥ |
yatra gāvastatra devā lakṣmīrdharmaśca rakṣakāḥ || 59 ||
[Analyze grammar]

godātā labhate sarvaṃ prāsādān bhavanāni ca |
strīryuvatīrdāsadāsīḥ śayanāsanapānakam || 60 ||
[Analyze grammar]

bhogyabhogān pānagṛhabhakṣyabhojanasaṃcayān |
vājino vāraṇān yānavāhanāni ca vāṭikāḥ || 61 ||
[Analyze grammar]

dadata gopradātāraṃ citraguptājñayā'nugāḥ |
imaṃ tvāmrapradātāraṃ tathodyānasamarpakam || 62 ||
[Analyze grammar]

dadatā''mravaṇaṃ ramyaṃ divyakanyāṃ parīṃ śubhām |
ityevaṃ bahudhā tatrā''karṇitaṃ dṛṣṭamityapi || 63 ||
[Analyze grammar]

gṛhād gṛhāntaraṃ sthalāt sthalāntaraṃ tu gacchatā |
kaṣṭātkaṣṭataraṃ saumyāt sukhātsukhataraṃ tathā || 64 ||
[Analyze grammar]

karmahāniḥ karmamahodayo''pyālokito mayā |
tato'haṃ bhagavān dharmarājasya saṃsadi tvayam || 65 ||
[Analyze grammar]

tāvattatra samāyāto nārado dyotitaprabhaḥ |
yamarājaḥ pūjayitvā taṃ nyaṣādayadāsane || 66 ||
[Analyze grammar]

prāha pūtā vayaṃ sarve deśaḥ pūtastavā''gamāt |
yatkāryaṃ yena vā kāryaṃ prabrūhi bhagavanniti || 67 ||
[Analyze grammar]

śrutvā tu nāradaḥ prāha saṃśayaṃ chindhi me param |
amaratvaṃ kathaṃ yānti dānena niyamena vā || 68 ||
[Analyze grammar]

vratena tapasā vāpi japenopāsanena vā |
kenā'tulāṃ śriyaṃ yānti kīrtiṃ sthānaṃ ca śāśvatam || 69 ||
[Analyze grammar]

kena gacchanti narakaṃ pāpiṣṭhaṃ lokagarhaṇam |
sarvamākhyāhi tattvena bhaviṣyati hitaṃ param || 70 ||
[Analyze grammar]

yamarājastamuvāca śṛṇvatāṃ tatra vartinām |
dharmeṇa tu janā yānti svargaṃ puṇyasamarjitam || 71 ||
[Analyze grammar]

adharmeṇa tu nirayān bandhāṃśca bahujātikān |
agnicinnarakaṃ naiva yāti kadāpi nārada || 72 ||
[Analyze grammar]

putravān bhūmidaḥ śūro vedaśāstraviśāradaḥ |
jñānavān satyavartmā ca patnīvrataḥ pativratā || 73 ||
[Analyze grammar]

śāṭhyakāpaṭyahīnāśca svāmibhaktāstu dehinaḥ |
ahiṃsakā akṛtaghnā brahmacaryādiniṣṭhitāḥ || 74 ||
[Analyze grammar]

dānino dvijabhaktāśca pitṛbhaktaśca sādhavaḥ |
satā dāsā pāradāryarahitāśca dayālavaḥ || 75 ||
[Analyze grammar]

sarvabhūtātmavettāro na yānti nirayān kvacit |
yātanāpūrṇakānduḥkhānpāpiṣṭhāṃstamasāvṛtān || 76 ||
[Analyze grammar]

ye janā jñānavanto'tra ye ca vidyāṃ parāṃ gatāḥ |
udāsīnā na gacchanti svāmyarthe ca hatā janāḥ || 77 ||
[Analyze grammar]

sarvahite ratāḥ śuśrūṣakā dātāra eva ye |
tilagopṛthivīsvarṇakanyādānakarāstathā || 78 ||
[Analyze grammar]

annadā jaladāścāpi satrasaṃcālakāstathā |
yājinaḥ kṛtinaścāturmāsyavratārthinaśca ye || 79 ||
[Analyze grammar]

kārtikādivratavanto gurvājñāvartanāstu ye |
maunādiguṇavanto'pi nityaṃ svādhyāyakārakāḥ || 80 ||
[Analyze grammar]

dāntāḥ saumyāḥ svātmabhāvāḥ parvendriyajayāstathā |
nivṛttāḥ sarvakāmebhyo nirāśā nirjitendriyāḥ || 81 ||
[Analyze grammar]

na gacchanti nirayāṃste'maratvaṃ prāpnuvanti ca |
bhaktyā'maratvaṃ saṃyānti kṛṣṇanārāyaṇasya vai || 82 ||
[Analyze grammar]

jñānā'bhayapradānena naiṣṭhikaniyamena ca |
brahmavratena jñānātmatapasā oṃ harirjapāt || 83 ||
[Analyze grammar]

kṛṣṇanārāyaṇopāstyā hyamaratvaṃ tu śāśvatam |
kṛṣṇanārāyaṇasevā śriyaṃ lakṣmīṃ dadāti hi || 84 ||
[Analyze grammar]

satāṃ sevā gavāṃ sevā kīrtiṃ sthānaṃ dadāti hi |
lokagarhitakāryeṇa yāti sthānaṃ tu garhitam || 85 ||
[Analyze grammar]

tapasā prāpyate svargaṃ tapasā prāpyate yaśaḥ |
āyuḥprakarṣo bhogāśca tapasaiva bhavanti hi || 86 ||
[Analyze grammar]

jñānaṃ vijñānamārogyaṃ rūpasaubhāgyasampadaḥ |
dhanapatnīsutadāsāḥ tapasā sarvamāpyate || 87 ||
[Analyze grammar]

evaṃ maunena vāksiddhiḥ santoṣātsukhamuttamam |
upabhogāśca dānena brahmacaryeṇa jīvitam || 88 ||
[Analyze grammar]

ahiṃsayā tvanudvego dīkṣayā kulajanma ca |
phalamūlāśino rājyaṃ svargaḥ parṇāśino bhavet || 89 ||
[Analyze grammar]

payobhakṣā divaṃ yānti dravyadā yānti cāḍhyatām |
guruśuśrūṣayā śrāddhadānena śubhasantatim || 90 ||
[Analyze grammar]

rasadānā gavādyāśca bhavanti tṛṇaśāyinām |
svayaṃ triṣavaṇād brahma jalapāteṣṭalokabhāg || 91 ||
[Analyze grammar]

yajñakartā svaḥ prayāti saubhāgyena pramodate |
annadānena ca prāpnotyannaṃ medhāṃ smṛtiṃ divam || 92 ||
[Analyze grammar]

chatradānena sāmrājyaṃ gṛhadānād gṛhādikam |
rathayānapradānena yānavāhanavān bhavet || 93 ||
[Analyze grammar]

vastradātā suśṛṃgārān dhanaputrāṃśca saṃlabhet |
pānīyadātā tṛptiṃ vai śāśvatīṃ labhate divi || 94 ||
[Analyze grammar]

annapānādidānena kāmabhogaiḥ sutṛpyate |
puṣpagandhaphalavṛkṣadātā strīratnavadgṛham || 95 ||
[Analyze grammar]

śayanānyanulepāṃśca gandhakajjaladhūpakān |
srajo dadāti yaḥ śayyāmārāmaṃ phalipādapam || 96 ||
[Analyze grammar]

saḥ strīsmṛddhaṃ gajavājipūrṇaṃ gṛhaṃ prapadyate |
dhūpadīpapradātā ca prāpnoti vasusāmyatām || 97 ||
[Analyze grammar]

gajagovṛṣadānena svargaṃ śāśvatamāpyate |
ghṛtadānena tejasvī sukumāro hi jāyate || 98 ||
[Analyze grammar]

tailadānena vai snigdhaścamatkārakaro bhavet |
madhumiṣṭaśarkarādidātā tṛptagṛho bhavet || 99 ||
[Analyze grammar]

dīpadānād dyutimān syāt pāyasena vapurdṛḍham |
kṛsarānnāt snigdhasaumyabhāvaṃ labhate surūpitām || 100 ||
[Analyze grammar]

phalaistu labhate putraṃ puṣpaiḥ saubhāgyamityapi |
rathairdivyaṃ vimānantu yānaṃ vāhanamityapi || 101 ||
[Analyze grammar]

abhayasya pradānena prāṇadānena cā'pyatha |
sarvakāmapradānena sarvānkāmānavāpnuyāt || 102 ||
[Analyze grammar]

iti te kathitaṃ lakṣmi phalaṃ yamena bhāṣitam |
nāradāya tu tatsarvaṃ viprebhyo nāciketasā || 103 ||
[Analyze grammar]

śrutvā tu nārado natvā yamarājaṃ punaḥ punaḥ |
yayau pūjāṃ gṛhītvā ca satyaloke vihāyasā || 104 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kutayugasantāne yāmyacakre citraguptājñayā pāpināmānayanāya dūtānāṃ pravṛttiḥ dattadānānāṃ phalodayāḥ nāradāya dharbharājoktaḥ phalodayaḥ prāptiścetyādinirūpaṇanāmaikaṣaṣṭayadhikatriśatatamo'dhyāyaḥ || 361 ||
[Analyze grammar]