Chapter 350

śrīnārāyaṇa uvāca |
gokarṇeśvaramāhātmyaṃ mathurāyāṃ yamītaṭe |
kathayāmi śṛṇu lakṣmi putrasvargapramokṣadam || 1 ||
[Analyze grammar]

āsīd vipraḥ subhadrākhyaḥ pāribhadrasya putrakaḥ |
vaiśyavṛttisamāyuktaḥ krayavikrayajīvanaḥ || 2 ||
[Analyze grammar]

saurāṣṭre viṣaye śatrujitānadītaṭe vasan |
kṛṣiṃ cāpi karotyatra gavādīn pālayatyapi || 3 ||
[Analyze grammar]

tasya bhāryā sadguṇāḍhyā jīvantī nāmataḥ smṛtā |
bhartuḥ priyakarī sādhvī na prasūtā vayo'dhikā || 4 ||
[Analyze grammar]

śokaṃ karoti nityaṃ sā striyo dṛṣṭvā prajāvatīḥ |
sā yātā kuṃkumavāpyāṃ pitṛgṛhaṃ samutsave || 5 ||
[Analyze grammar]

nāmnā kraturmahāyogī viprastasyāḥ pitā'pi tām |
saśokāṃ paridṛṣṭvaiva papraccha śokakāraṇam || 6 ||
[Analyze grammar]

sāpi prāha pitaraṃ cā'napatyatvaṃ tu kāraṇam |
kratvarṣiśca kṣaṇaṃ dhyātvā prāha jīvantikāṃ sutām || 7 ||
[Analyze grammar]

āgaccha putri kṛṣṇāgre kurvastadvinivedanam |
ghnanti niścitya tau patnīvratakṛṣṇasya mandiram || 8 ||
[Analyze grammar]

gatau natvā ca taṃ devaṃ cā'nivedayatāṃ vṛtam |
asyā nāsti kṛṣṇamune durbhagāyāḥ prajāsukham || 9 ||
[Analyze grammar]

kṛṣṇanārāyaṇaḥ śrutvā prāha tāṃ putragarddhinīm |
kambharāyā mahālakṣmyāḥ prasādena suputrakaḥ || 10 ||
[Analyze grammar]

bhaviṣyatyeva te nūnaṃ kuru yātrāṃ suputradām |
mathurāyāṃ yamunāyāstīre gokarṇavakeśvaram || 11 ||
[Analyze grammar]

tīrthaṃ ramyaṃ putralābhaphalaṃ bhavati suvrate |
tamārādhaya śīghraṃ vai saha patyā'bhigamya ca || 12 ||
[Analyze grammar]

snānadīpopahāreṇa stotrairnānāvidhaistathā |
prasādayā'nutiṣṭhaitajjīvanti sasutā bhava || 13 ||
[Analyze grammar]

ityuktā sā yadā yātā gṛhaṃ natvā patiṃ tadā |
sarvaṃ nivedayāmāsa yaduktaṃ hariṇā tu tat || 14 ||
[Analyze grammar]

sa tadvacanamākarṇya suprītaḥ prāha tāṃ priyām |
mamā'pyetanmataṃ patni yaduktaṃ hariṇā tataḥ || 15 ||
[Analyze grammar]

gatau vyomnā suyānena mathurāṃ daśamīdine |
caitre sāyaṃ yamunāyāṃ snātvā natvā ca śaṃkaram || 16 ||
[Analyze grammar]

gokarṇeśvaramevaitau nidrāṃ jagrahaturbhuvi |
prātarutthāya ca snānaṃ pūjāṃ cakraturādarāt || 17 ||
[Analyze grammar]

tataḥ prasanno bhagavānumāpatiruvāca tau |
bhaviṣyati yuvāṃ putro guṇarūpadhanānvitaḥ || 18 ||
[Analyze grammar]

ityuktau tau tu devena snānaṃ kṛtvā sarasvatīm |
yamīṃ natvā saṃgame ca kṣaṇe sthitvā dvijātaye || 19 ||
[Analyze grammar]

dravyaṃ bhojyaṃ dadatuśca vastrādyaṃ bahudakṣiṇam |
ekādaśyāṃ māthure maṇḍale yātrāṃ vidhāya ca || 20 ||
[Analyze grammar]

vaihāyasā suyānenā''jagmatustau nijagṛham |
vipraḥ patnyāṃ tu jīvantyāṃ garbhādhānamavindata || 21 ||
[Analyze grammar]

suṣuve daśame māsi sā putraṃ candramaḥprabham |
gosahasraṃ tadā datvā sasuvarṇaṃ suvastrakam || 22 ||
[Analyze grammar]

bahuśaḥ sarvavarṇebhyaḥ putrajanmamahotsave |
jātakarma tathā śrāddhaṃ nāmakarma cakāra saḥ || 23 ||
[Analyze grammar]

gokarṇeśvaradatto'yaṃ gokarṇo nāmato'stu vai |
sa tu ṣoḍaśasaṃskāraiḥ saṃskṛtastaruṇo'bhavat || 24 ||
[Analyze grammar]

ta sa vivāhayāmāsa bhāryāṇāṃ tu catuṣṭayam |
aprajā eva tāḥ sarvā ekāpi nahi putriṇī || 25 ||
[Analyze grammar]

ato dharmaḥ samārabdho bhāryāyu्tena tena vai |
vāpikūpataḍāgāni devatāyatanāni ca || 26 ||
[Analyze grammar]

prapāmālāśca satrānnaṃ devasevā''rttisevanam |
śatrujitātaṭe tatra gokarṇeśvaraśaṃkaram || 27 ||
[Analyze grammar]

gokṣurapattanāt pūrvaṃ sthāpayāmāsa yāmunam |
prāsādaṃ kārayāmāsa paṃcāyatanakaṃ hareḥ || 28 ||
[Analyze grammar]

ārāmastatra vistīrṇaḥ puṣpajātyastathaiva ca |
phalajātyastathā śākapatrakandaprajātikaḥ || 29 ||
[Analyze grammar]

prākāraṃ kārayāmāsa parikhāmaṇḍalīyakam |
ghaṭīyantrāṇi kūpeṣu yaiḥ prasiñcettu vāṭikāḥ || 30 ||
[Analyze grammar]

puṣpāṇi ca vicinvanti sarvāstasya suyoṣitaḥ |
snānaṃ pūjādikaṃ bhūmimārjanaṃ dīpakarma ca || 31 ||
[Analyze grammar]

kurvanti devatāgāre tasya patnyastu sarvadā |
mālākāraḥ svayaṃ nityaṃ viṭapān saṃprasiñcati || 32 ||
[Analyze grammar]

jātāḥ supuṣpavantaśca drumāḥ phalasamṛddhayaḥ |
dīyate bhujyate sarvaiḥ phalādyaṃ nityamutsavāt || 33 ||
[Analyze grammar]

pūjyate śaṃkarastena sarvadā bhāvapūrvakam |
vyāpāraṃ saḥ kṛṣiṃ cāpi karoti kārayatyapi || 34 ||
[Analyze grammar]

ekadā manasā kṛtvā vaṇigbhāvaṃ hṛdi sthiram |
kṛtvā sārthamupāgamya yayau paścimamaṇḍalam || 35 ||
[Analyze grammar]

tatra krītvā supaṇyāni vāmanasthalapattanāt |
maṇiratnānyaśvaratnāni krītvā raivatācale || 36 ||
[Analyze grammar]

svarṇarekhānadītīre cakre nivāsamuttamam |
tatra niveśya bhāṇḍāni śailaṃ samāruroha saḥ || 37 ||
[Analyze grammar]

bahudevādhivasatiṃ siddhagandharvasevitam |
divyapuṣpaphalopetaṃ bahukandaraśobhitam || 38 ||
[Analyze grammar]

tato madhye bhuvyupatyakāyāṃ śṛṇoti gahvare |
svāgataṃ tatra gatvā'sau śukaṃ paśyati pañjare || 39 ||
[Analyze grammar]

tenoktaṃ bho ihā''gaccha svātithyaṃ karavāṇi te |
phalānīmāni svādūni śītamiṣṭajalāni ca || 40 ||
[Analyze grammar]

gṛhṇantu bho mahābhāgāḥ sārthaviprāḥ śubhaṃ bhavet |
atitherāgatasyeha pūjāyā vimukho bhavet || 41 ||
[Analyze grammar]

tadgṛhasthasya pitaro vasanti narake dhruvam |
pūjite pūjitāḥ svarge modante kālamakṣayam || 42 ||
[Analyze grammar]

atithiryasya bhagnāśo gṛhānnivartate yadi |
ātmano duṣkṛtaṃ tasmai datvā tatsukṛtaṃ haret || 43 ||
[Analyze grammar]

tasmāt sarvaprayatnena pūjyo vai gṛhamedhinā |
kāle prāptastvakāle vā yathā kṛṣṇastathaiva saḥ || 44 ||
[Analyze grammar]

evaṃvidhāḥ śubhā vācaḥ śrutvā gokarṇako'bravīt |
ṛṣiḥ kastvaṃ sudharmajñaḥ kiṃ vā devo'tha guhyakaḥ || 45 ||
[Analyze grammar]

siddho vā raivatavāsī mānavo vad ko'tra bhoḥ |
tava prasannarūpasya yasyeyaṃ vāgamānuṣī || 46 ||
[Analyze grammar]

ityuktaḥ sa śukaḥ sarvaṃ śaśaṃsātmapurākṛtam |
ahamāsaṃ vāmadevaśiṣyo nāmnā śukodaraḥ || 47 ||
[Analyze grammar]

gurorvākyaṃ buddhiyuktaṃ śrutvā'pyahaṃ tadagrataḥ |
ūhā'pohakaraṃ praśnaṃ vāraṃ vāraṃ tu pṛṣṭavān || 48 ||
[Analyze grammar]

tena muhurniṣiddho'pi na kṛtaṃ tadvaco mayā |
tadā tenātikopād vai śāpitastvaṃ śuko bhava || 49 ||
[Analyze grammar]

śukatvaṃ tatkṣaṇātprāpto vasāmyatra hi raivate |
jātismaro bhavāmyatra karomi bhajanaṃ hareḥ || 50 ||
[Analyze grammar]

prāptastvatra gṛhāvāsimuninā brahmasūriṇā |
pañjare rakṣitastena jīvāmi sukhato gṛhe || 51 ||
[Analyze grammar]

vāmadevo'tidīnaṃ māmuvāca kṛpayā'rthitaḥ |
mathurāyāṃ mṛteḥ paścād brahmalokaṃ gamiṣyasi || 52 ||
[Analyze grammar]

tasmānnityaṃ tu mathurāmathureti vadāmi ca |
śukasya vacanaṃ śrutvā gokarṇaḥ prāha pakṣiṇam || 53 ||
[Analyze grammar]

raivatādrisamaṃ tīrthaṃ na bhūto na bhaviṣyati |
bhuktimuktipradaṃ caitanmokṣagolokadhāmadam || 54 ||
[Analyze grammar]

etatsthānaṃ parityajya kathaṃ māthuramaṇḍalam |
muktyarthaṃ te kṛtaṃ pakṣin cejjānāsi vadātra me || 55 ||
[Analyze grammar]

śrutvā śukastu taṃ prāha rekhā me tādṛśī yataḥ |
tatraiva maraṇānmuktirnātra me mṛtinirṇayaḥ || 56 ||
[Analyze grammar]

tasmād vipra tvayā kāryā mamopakṛtireva sā |
naya māṃ mathurāṃ śreṣṭhin yadi kvaciddhi gacchasi || 57 ||
[Analyze grammar]

evaṃ tayoḥ kathayatorbrahmasūriḥ samitkaraḥ |
samāyāto vanāttatra so'pyatithīn vilokya ca || 58 ||
[Analyze grammar]

prasannastvabhavat kṛtvā phalādyairātitheyakam |
kaḥ kutaḥ saṃvidaṃ kṛtvā vada kiṃ karavāṇi te || 59 ||
[Analyze grammar]

ityuktaḥ sa tu gokarṇo natvā munimayācata |
śuko'yaṃ pañjarasthastu putrārthaṃ me pradīyatām || 60 ||
[Analyze grammar]

mathurāyāṃ gamiṣyāmi tasya mokṣārthameva yat |
ṛṣiṇā tu prasannena śukastasmai samarpitaḥ || 61 ||
[Analyze grammar]

natvā ṛṣiṃ sa gokarṇo yayau gokṣurapattanam |
sarvaratnasamupetaḥ sarvasārthasamanvitaḥ || 62 ||
[Analyze grammar]

śukaḥ śatruṃjitānadyāstaṭe viprasya vāṭikām |
phalapuṣpādisaṃyuktāṃ dṛṣṭvā sthātuṃ mano'karot || 63 ||
[Analyze grammar]

gokarṇenāpi vāṭyāṃ sa phalapuṣpādibhojanaḥ |
rakṣitastvekadā patnīścatasraḥ prāha mātaraḥ || 64 ||
[Analyze grammar]

kathaṃ putrā na dṛśyante putryaścāpi na vo'tra kim |
jalasecanakartryastā ūcustaṃ kovidaṃ śukam || 65 ||
[Analyze grammar]

pakṣin vandhyāścatasraḥ smo vada syustu sutā yathā |
śukaḥ prāha kathayiṣye yāvatā tiṣṭhatā mayā || 66 ||
[Analyze grammar]

evaṃ kāle gate varṣe punarvyāpāravāñchayā |
gokarṇaḥ saśuko yātaḥ kacchaṃ prati mudānvitaḥ || 67 ||
[Analyze grammar]

patnyaścāpi yayuḥ kacchaṃ svāminā sahasevikāḥ |
nāvā samudramuttīrya nārāyaṇasaro yayuḥ || 68 ||
[Analyze grammar]

tatra dṛṣṭā divyadevyo rūpānurūpabhāsurāḥ |
sahasraśaḥ saromadhye jalavāsā'tisaurabhāḥ || 69 ||
[Analyze grammar]

kintu śokaparimlānāḥ papracchustāḥ śukaṃ prati |
kutastvāgamyate kiṃ te kāryaṃ sad vidyate vad || 70 ||
[Analyze grammar]

śukaḥ prāha mama svāmī ratnārthaṃ samupāgataḥ |
bhavatīnāṃ bhavet kāryaṃ jñāpayantu hi māṃ tadā || 71 ||
[Analyze grammar]

śrutvā tāśca tadā prāhuḥ śukaṃ paramakovidam |
duḥkhaṃ tasya samākhyeyaṃ yo vināśayate rujam || 72 ||
[Analyze grammar]

āste kuṃkumavāpīti nṛṇāṃ muktipradāyinī |
aśvapaṭṭasaro yatra rājate surasevitam || 73 ||
[Analyze grammar]

gaurjarādhipatirvīraścaturaṃgabalānvitaḥ |
rājā dharmavīranāmā kārtike raivatasya saḥ || 74 ||
[Analyze grammar]

pradakṣiṇādiyātrārthaṃ yayau gacchan śanaiḥ śanaiḥ |
mārge kuṃkumavāpyāśca cakre yātrāṃ sarovare || 75 ||
[Analyze grammar]

sasnau sa śrāddhakāryāṇi cakāra brahmabhojanam |
cakre suvarṇaratnaiḥ kaṃbharāgopālapūjanam || 76 ||
[Analyze grammar]

kṛṣṇanārāyaṇaviṣṇordarśanaṃ havanaṃ tathā |
mandirasya mahodyāne saptabhūmyatiśobhinaḥ || 77 ||
[Analyze grammar]

ārāmavāṭikāḥ śubhrā nimnaprākāraveṣṭitāḥ |
kūpaghaṭyāvartayuktāḥ puṣpajātisuvāsitāḥ || 78 ||
[Analyze grammar]

phalavanto drumāstatra sarvartusumanoharāḥ |
tadabhyāśe sa rājarṣiścakārāvāsamuttamam || 79 ||
[Analyze grammar]

sevakairnāśitaḥ sarvaṃ ārāmaḥ saphaladrumaḥ |
vayaṃ sarvāstu tā vṛkṣavallyaḥ smo devadevatāḥ || 80 ||
[Analyze grammar]

ityuktvā ruruduḥ svārttijalpiṇyo hā'tikṛcchrataḥ |
sarvāsāṃ rudatīnāṃ tu kurarīṇāmiva svanāḥ || 81 ||
[Analyze grammar]

śrūyante duḥkhadāḥ tāśca sāntvayāmāsa vai śukaḥ |
tāstu prāha punastatra ratnānyādāya sarvathā || 82 ||
[Analyze grammar]

gamiṣyati mama svāmī kariṣyati sajīvanāḥ |
ityuktamātre vacane tāḥ sarvā labdhacetanāḥ || 83 ||
[Analyze grammar]

śukasya svāminaṃ tadvai vaktuṃ taṃ vedituṃ tathā |
aikyabhāvena tāḥ sarvāḥ papracchurvaṇijaṃ prati || 84 ||
[Analyze grammar]

asmākaṃ jīvadātā tvaṃ kaḥ kutastviha saṃgataḥ |
gokarṇaḥ prāha tā devīḥ bhavatyaścārulocanāḥ || 85 ||
[Analyze grammar]

sucārvāsyāḥ sucārvaṃgyaḥ kathaṃ śokapariplutāḥ |
tadā jyeṣṭhā tamāhātha puṣpajātyā svalaṃkṛtā || 86 ||
[Analyze grammar]

vayamārāmasaṃsthānāḥ khādyasalilabhojanāḥ |
hṛdyāśca svāminā guptāḥ puṣpavṛddhiratāḥ sadā || 87 ||
[Analyze grammar]

rājalokaiḥ pīḍitāḥ sma chedanonmūlanādibhiḥ |
kūrcitā bhṛśamudvignāstena śokapariplutāḥ || 88 ||
[Analyze grammar]

phalapuṣpavihīnāśca mūlāskandhāvaśeṣitāḥ |
evaṃvidhā hi saṃbhūtā naṣṭasaṃjñāḥ sthitā vayam || 89 ||
[Analyze grammar]

aśvapaṭṭasaro divyaṃ sākṣi tatrāsti bhūsuraḥ |
kṛṣṇanārāyaṇo devaḥ sākṣī tvasmākamityapi || 90 ||
[Analyze grammar]

puṇyaṃ salilapūrṇaṃ cotphullakamalaśobhitam |
kalahaṃsasamāyuktaṃ vṛkṣāṇāṃ parisecakam || 91 ||
[Analyze grammar]

sarastat taddrumāṇāṃ tu vināśānno vināśitā |
virūpatā'sti tatra tvaṃ gatvā no jīvitān kuru || 92 ||
[Analyze grammar]

iṣṭāpūrttaṃ dvijātīnāṃ prathamaṃ dharmasādhanam |
iṣṭena labhate svargaṃ pūrtena mokṣameti ca || 93 ||
[Analyze grammar]

vāpīkūpataḍāgāni devatāyatanāni ca |
patitānyuddhared yastu sa pūrtaphalamaśnute || 94 ||
[Analyze grammar]

bhūmidānena ye lokā godānena ca kīrtitāḥ |
te lokāḥ samavāpyante pādapānāṃ prarohaṇe || 95 ||
[Analyze grammar]

pippalaṃ ca vaṭaṃ nimbaṃ tulasīṃ cāpyudumbaram |
āmalakaṃ tathā bilvaṃ khadiraṃ caikameva yaḥ || 96 ||
[Analyze grammar]

puṣpajātīrdaśa dve dve dāḍime cāmrapañcakam |
tintiḍīmekalāṃ vātra yastu vardhayati dvija || 97 ||
[Analyze grammar]

puṣpaphaladrumaropī na yāti narakaṃ kvacit |
vardhitāśca drumāḥ putrā ivoddharanti poṣakam || 98 ||
[Analyze grammar]

indhanaiśchāyayā śrāntyā pathikānāṃ sukhāvahāḥ |
pakṣiṇāṃ nilayenaiva sukhadā vṛkṣavallikāḥ || 99 ||
[Analyze grammar]

patramūlatvagādyairauṣadhaiḥ sukhāstu dehinām |
kāṣṭhairgṛhāṇi jāyante kṣudrajantugṛhāṇi ca || 100 ||
[Analyze grammar]

evaṃ paropakārāste sevante dehinaḥ sadā |
phalapatradalaśākhāstambamūlairhi jīvadāḥ || 101 ||
[Analyze grammar]

svargadā mokṣadāścāpi devapūjopayojitāḥ |
tasmād gokarṇaratnāni gṛhāṇeṣṭāni naḥ sthalāt || 102 ||
[Analyze grammar]

vaihāyasaṃ vimānaṃ ca samāruhya tathā ca naḥ |
saha nītvā yāhi tatra yatrodyānaṃ tu naḥ sthitam || 103 ||
[Analyze grammar]

asmākaṃ jīvadānena syuḥ putriṇyastu te priyāḥ |
bhaviṣyanti susantānāḥ śuka nītvā prayāhi vai || 104 ||
[Analyze grammar]

bayaṃ gopāśca gopyaśca golokasthā api kṣitau |
kṛṣṇasevāṃ prakurmo'tra vṛkṣavalītṛṇātmikāḥ || 105 ||
[Analyze grammar]

vayaṃ dāsyaḥ pārṣadāśca vaikuṇṭhasthā api kṣitau |
kurmo nārāyaṇasevāṃ kuṃkumavāpikāsthitāḥ || 106 ||
[Analyze grammar]

pārṣadānyaḥ pārṣadāśca muktāḥ sāketadhāmagāḥ |
sāketāyāṃ vṛkṣavallyaḥ smaḥ śrīrāmārcane ratāḥ || 107 ||
[Analyze grammar]

vayaṃ dūtāśca dūtyaśca kailāsasthā api kṣitau |
kāśīkṣetrādisaṃsthānā vallīvṛkṣasvarūpikāḥ || 108 ||
[Analyze grammar]

iti hārdaṃ kathitaṃ te'smākaṃ viprā'tra bhautikam |
śrīkṛṣṇamaṇḍalaṃ kṛṣṇadāsadāsīmayaṃ smṛtam || 101 ||
[Analyze grammar]

ityuktaḥ sa tu gokarṇo ratnānyādāya koṭiśaḥ |
devīḥ sarvāstathā patnīḥ śuka cādāya saṃyayau || 110 ||
[Analyze grammar]

udyānaṃ kṛtavān puṣṭaṃ bījaiḥ khādyairjalādibhiḥ |
vṛkṣā vallyaśca devyaśca puṣṭā jātā hi sevayā || 111 ||
[Analyze grammar]

dhanaṃ ratnādikaṃ tatra sevāyāṃ yojitaṃ bahu |
mandiraṃ poṣitaṃ cāpi vṛkṣāścāpi prapoṣitāḥ || 112 ||
[Analyze grammar]

tena puṇyena ca tasya patnyo garbhadharā api |
tāśca devyo divyarūpāḥ praśaśaṃsuḥ punaḥ punaḥ || 113 ||
[Analyze grammar]

varaṃ datvā yathākāmaṃ svastītyuktvā tiro'bhavan |
tatra sthitvā yathānyāyaṃ gokarṇaḥ sarvamaṃgalam || 114 ||
[Analyze grammar]

śukaṃ ca mātāpitarau sādhvībhāryācatuṣṭayam |
samānaṃ sevayāmāsa yathāvibhavaśaktitaḥ || 115 ||
[Analyze grammar]

svayaṃ tu kṛtavāṃstatra vaiṣṇavākhyaṃ mahāmakham |
bhakṣyabhojye brāhmaṇebhyo dadau dānāni nityaśaḥ || 116 ||
[Analyze grammar]

kuṃkumavāpyāṃ kṛṣṇasyā''layaṃ jīrṇaṃ navottamam |
kārayitvā tu tadvāpīṃ navīnāmiva vai punaḥ || 117 ||
[Analyze grammar]

aśvapaṭṭasaraścāpi tvābadhya setunā punaḥ |
taṭe pratiṣṭhāṃ svanāmnā gokarṇeśvarasaṃjñayā || 118 ||
[Analyze grammar]

mahādevasya nirvartya brāhmaṇairvedapāragaiḥ |
yayau gokṣurasaṃjñaṃ vai pattanaṃ svanivāsakam || 119 ||
[Analyze grammar]

ya idṃ śṛṇuyāccāpi paṭhedvā bhāvatastathā |
tīrthayātrāṃ prakuryācca putravān dhanavān bhavet || 120 ||
[Analyze grammar]

iti lakṣmīnārāyaṇīyasaṃhitāyāṃ prathame kṛtayugasantāne |
māthurakṣetramāhātmye saurāṣṭradeśīyasubhadranāmakaviprasya mathurāyāṃ gokarṇeśvaradarśanādinā putraprāptiḥ tannāma gokarṇaṃ iti tena śatrujitānadītaṭe gokarṇeśvaraḥ sthāpitaḥ gokarṇasya dhanārthaṃ vāmanapananaṃ gatasya raivatācale śukaprāptiḥ punargṛhamāgatya dhanārthaṃ kacchaṃ gatasya nārāyaṇasarasi vanadevatānāṃ darśanaṃ |
gaurjararājñā bhagnasyodyānasya kuṃkumavāpyāṃ navīkaraṇam tīrthasthā vṛkṣavallikā dhāmapārṣadapārṣadānya evetimahimakathanaṃ cetyādinirūpaṇanāmā pañcāśadadhikatriśatatamo'dhyāyaḥ || 350 ||
[Analyze grammar]