Chapter 345

śrīnārāyaṇa uvāca |
śṛṇu lakṣmi tathā tīrthaṃ tvaparaṃ kathayāmi te |
nāgatīrthaṃ paraṃ tīrtheṃ nāgo yasmād vivāsitaḥ || 1 ||
[Analyze grammar]

atra snātvā divaṃ yānti ye mṛtāste'punarbhavāḥ |
atha ghaṇṭābharaṇakaṃ tīrthaṃ vai pāvanaṃ param || 2 ||
[Analyze grammar]

tatra snātaḥ sūryalokaṃ prayātyeva na saṃśayaḥ |
athā'nyad brahmatīrthaṃ vai vidyate yamunājale || 3 ||
[Analyze grammar]

tatra snātvā jalaṃ pītvā brahmaloke mahīyate |
athā'nyat somatīrthaṃ vai pavitre yamunāṃbhasi || 4 ||
[Analyze grammar]

candramāstatra māṃ dṛṣṭvā pupūja bhāvatastadā |
tatrābhiṣekaṃ kurvīta somaloke mahīyate || 5 ||
[Analyze grammar]

athānyat paramaṃ tīrthaṃ sarasvatīprapātanam |
tatra snāto naro lakṣmi hyavarṇo'pi yatirbhavet || 6 ||
[Analyze grammar]

māthure maṇḍale yamyāṃ trirātropoṣito janaḥ |
snānamātreṇa vratakṛnmucyate brahmahatyayā || 7 ||
[Analyze grammar]

atha daśāśvamedhākhyaṃ tīrthaṃ yamyāṃ tu pāvanam |
mathurā paścime bhāge tatsthalaṃ cātipāvanam || 8 ||
[Analyze grammar]

tatra ye snānti niyatāsteṣāṃ svargo na durlabhaḥ |
brahmaṇā mānasaṃ tīrthaṃ yamyāṃ vai nirmitaṃ purā || 9 ||
[Analyze grammar]

ṛṣibhiḥ pūjitaṃ tatra snātvā svargaṃ prayānti vai |
atha vighnarājatīrthaṃ puṇyaṃ pāpaharaṃ śubham || 10 ||
[Analyze grammar]

aṣṭamyāṃ ca caturdaśyāṃ caturthyāṃ tu viśeṣataḥ |
tasmiṃstīrthavare snātaṃ na pīḍayati vighnarāṭ || 11 ||
[Analyze grammar]

vidyāraṃbheṣu sarveṣu yajñadānakriyāsu ca |
avighnaṃ kurute tasya satataṃ pārvatīsutaḥ || 12 ||
[Analyze grammar]

athā'nyat koṭitīrthaṃ ca snānāt koṭigavāṃ phalam |
prāṇatyāge somalokaṃ mama lokaṃ ca gacchati || 13 ||
[Analyze grammar]

ataḥ paraṃ śivakṣetramardhakrośaṃ hi vartate |
tatra sthito haro devo rakṣati mathurāṃ sadā || 14 ||
[Analyze grammar]

tatra snātvā jalaṃ pītvā māthuraṃ labhate phalam |
athātra muṃcati prāṇān mama lokaṃ sa gacchati || 15 ||
[Analyze grammar]

athānyat sudhanaṃ tīrthaṃ tīrthānāmuttamaṃ sadā |
nityaṃ vartāmi tatraiva lokānāṃ hitakāmyayā || 16 ||
[Analyze grammar]

māṃ dṛṣṭvā manujāḥ snātvā muktibhājo bhavanti ca |
ayane viṣuve viṣṇupadīṣu grahaṇe raveḥ || 17 ||
[Analyze grammar]

snātvā'nantaphalaṃ labdhvā mucyate sarvapātakaiḥ |
rājasūyā'śvamedhotthaphalamāpnoti mānavaḥ || 18 ||
[Analyze grammar]

sudhane tīrthake snātaḥ prayāgasnānapuṇyabhāk |
atrādye dvāparayuge yadvṛttaṃ tacchṛṇu priye || 19 ||
[Analyze grammar]

nāmnā tu sudhano nāma mama bhaktaḥ sadaiva hi |
dhanadhānyasutadāragogṛhādisamṛddhimān || 20 ||
[Analyze grammar]

śīlasantoṣasatpūjādayādānādilakṣitaḥ |
putradārasametaḥ sa madbhakto vartate sma vai || 21 ||
[Analyze grammar]

gacchanti divasāstasya māsāḥ saṃvatsarāstathā |
mama bhaktyaiva sādhūnāṃ satīnāṃ sevayā sadā || 22 ||
[Analyze grammar]

karoti gṛhakṛtyāni yathālabdhadhanena saḥ |
mānakūṭaṃ tulākūṭaṃ na karoti kadācana || 23 ||
[Analyze grammar]

nityaṃ trikālaṃ kurute mama pūjanamuttamam |
āvāhanena dugdhādipañcāmṛtena vāriṇā || 24 ||
[Analyze grammar]

snāpanena vibhūṣābhirvividhāmbarasaddravaiḥ |
puṣpadīpaistathā dhūpacandanāmṛtasatphalaiḥ || 25 ||
[Analyze grammar]

naivedyairatimiṣṭānnairjalaistāmbūlacūrṇakaiḥ |
evamārātrikairnityaṃ stavanaiḥ kīrtanaistathā || 26 ||
[Analyze grammar]

pradakṣiṇairdaṇḍavadbhiḥ sadā pūjayati sma mām |
ekādaśyāmupavāsaṃ kurute jāgaraṃ tathā || 27 ||
[Analyze grammar]

nityaṃ yamyāṃ triṣavaṇaṃ snānaṃ karoti bhāvataḥ |
kālindyāstīramāsādya mama mūrteḥ samīpataḥ || 28 ||
[Analyze grammar]

rātripāde nṛtyati sma tato yāti nijaṃ gṛham |
evaṃ nityaṃ karotyeva tvekādaśyāṃ viśeṣataḥ || 29 ||
[Analyze grammar]

kārtikaśuklaikādaśyāṃ rātrau snātvā sa mandiram |
prati jāgaraṇārthaṃ sa gato yamyāstaṭaṃ yadā || 30 ||
[Analyze grammar]

tāvatkenā'pyāgatena gṛhīto brahmarakṣasā |
kṛṣṇavarṇamahākāyordhvaromātibhayaṃkṛtā || 31 ||
[Analyze grammar]

uktaśca rākṣaso'smyatra bhakṣyārthaṃ paryaṭāmi ha |
dūrāraṇyanivāso'smi bhakṣayiṣyāmi mā śucaḥ || 32 ||
[Analyze grammar]

bahukālakṣudhito'smi tṛptiṃ yāsyāmi vai ciram |
dṛṣṭvā śrutvā tathā kṛtvā dhairyaṃ prāha vaṇik tadā || 33 ||
[Analyze grammar]

sudhano'haṃ mahābhojyaṃ dāsye te me prasīd yat |
pratīkṣasva kṣaṇaṃ me'dya dāsyāmi tava puṣkalam || 34 ||
[Analyze grammar]

bahumiṣṭānnasaṃmiśraṃ bhakṣayiṣyasi varṣma me |
devakāryaṃ vidhāyaiva dāsye te sarvameva tat || 35 ||
[Analyze grammar]

jāgaraṃ devadevasya karomi harivāsare |
vrataṃ me sārvakālaṃ vai yajjāgarmi hareḥ puraḥ || 36 ||
[Analyze grammar]

tatra jāgaraṇaṃ kṛtvā prabhāte tava sannidhau |
yatra kathaya tatrā'hamāgamaṣyāmi taṃ vaśaḥ || 37 ||
[Analyze grammar]

kṛta jāgaraṇaṃ māṃ tvaṃ khādiṣyasi yathāsukham |
viṣṇutuṣṭyairvrataṃ kāryaṃ tanme kartuṃ pradehi cet || 38 ||
[Analyze grammar]

sarvakāmapradaṃ puṇyaṃ mokṣadaṃ vratamasti yat |
mā kuru vratabhaṃgaṃ me kṛpāṃ kuru śubhaṃ bhavet || 39 ||
[Analyze grammar]

sudhanasya vacaḥ śrutvā kṣudhito brahmarākṣasaḥ |
sudhanaṃ prāha mithyā tvaṃ prabhāṣase vaṇig yataḥ || 40 ||
[Analyze grammar]

nahi mṛtyumukhānmuktaḥ punarmṛtyumupaiti vai |
mama pāśādvimuktastvaṃ punaḥ kathaṃ sameṣyasi || 41 ||
[Analyze grammar]

rākṣasasya vacaḥ śrutvā vaṇig bhaktottamo'bravīt |
jagatsarvaṃ satyamūlaṃ satye sarvaṃ pratiṣṭhitam || 42 ||
[Analyze grammar]

sanmūlāśca prajāḥ sarvāḥ kṣudhā te'sti satī yadi |
tadā'haṃ te satyabhakṣyaḥ kṣullope bhakṣyatā katham || 43 ||
[Analyze grammar]

kṣutpipāse brahmakārye brahmaṇā nirmitaṃ tu sat |
tadarthe cennirmito'smi siddhiste syānna cānyathā || 44 ||
[Analyze grammar]

yadyahaṃ ca vaṇik pūrvaṃ karmaṇā nahi dūṣitaḥ |
antarātmā hṛdaye me vasatyeva yathā tava || 45 ||
[Analyze grammar]

bhakto'smi satyadharmo'smi satyena pravadāmi ca |
śṛṇu matsamayaṃ rakṣo yenā'haṃ punarāgamam || 46 ||
[Analyze grammar]

kṛtvā jāgaraṇaṃ rātrau nṛtyaṃ kṛtvā hareḥ puraḥ |
punareṣyāmyahaṃ rakṣo nā'satyaṃ mayi vartate || 47 ||
[Analyze grammar]

satyenopārjyate brahma dharmaḥ satyena rakṣyate |
satyena dīyate kanyā satyavāco hi bhūsurāḥ || 48 ||
[Analyze grammar]

nṛpāḥ satyena cottīrṇāḥ satyenaṃ dhriyate kṣitiḥ |
svargamokṣau pralabhyete satyavratena rākṣasa || 89 ||
[Analyze grammar]

satyena sūryastapati candraḥ satyena vardhate |
kālaḥ satyena nayati vṛṣṭiḥ satyena jāyate || 50 ||
[Analyze grammar]

ahaṃ satyena jīvāmi nā'satyaṃ kṛtavān kvacit |
tatsatyaṃ mama naśyedvai yadi nāyāmi vai punaḥ || 51 ||
[Analyze grammar]

prasahya kāmavegena nārīṃ bhuṃkte tu yo janaḥ |
tasya pāpena lipye'haṃ yadi nāyāmi te puraḥ || 52 ||
[Analyze grammar]

bhūgodānādi kṛtvā yaścāpaharati tatpunaḥ |
tena pāpena lipye'haṃ nāgaccheyaṃ punaryadi || 53 ||
[Analyze grammar]

nārīṃ naraṃ ca vā svārthamātraṃ bhuktvā tatastyajet |
parārthaṃ na ca kurvīta tatpāpaṃ nā''game mama || 54 ||
[Analyze grammar]

satīṃ pativratāṃ bhāryāṃ tyajennirāgasāṃ tu yaḥ |
tena pāpena lipye'haṃ punastvanāgame mama || 55 ||
[Analyze grammar]

paṃktibhedaṃ tu yaḥ kuryādekapaṃktyaśināṃ puraḥ |
tasya pāpena lipye'haṃ nā''gantā yadi te puraḥ || 56 ||
[Analyze grammar]

vratabhaṃgaprakarturyat tatpāpaṃ nā'game tu me |
parahiṃsakapāpaṃ me nā''gantā yadi te puraḥ || 57 ||
[Analyze grammar]

dvijatyāgisatīsādhudevānāṃ nindakasya yat |
pāpaṃ tanme bhaved rakṣo yadi me nā''gamaḥ punaḥ || 58 ||
[Analyze grammar]

gurumitrasuhṛddrohakṛto yatpāpameva tat |
nāgaccheyaṃ yadi te'gre satyaṃ bravīmi rākṣasa || 59 ||
[Analyze grammar]

tīrthe kṛtāni pāpāni me syuranāgame punaḥ |
brahmaghne ca surāpe ca caure bhagnavrate śaṭhe || 60 ||
[Analyze grammar]

viśvāsaghātake cātatāyini bālaghātake |
yā gatistāṃ prapadyehaṃ yadi me nāgamaḥ punaḥ || 61 ||
[Analyze grammar]

nirāgasāṃ tu prāṇināṃ rodhane māraṇe tathā |
yatpāpaṃ tad bhavenme'tra yadi me nāgamaḥ punaḥ || 62 ||
[Analyze grammar]

etajjanmottaraṃ pāpaṃ rakṣojanma prayāmyaham |
yadyahaṃ satyamutsṛjya nāgaccheyaṃ pratārakaḥ || 63 ||
[Analyze grammar]

itivākyāni vaṇijaḥ śrutvā tuṣṭaḥ sa rākṣasaḥ |
viśvāsayati cāpanno gacchetyāyāhi cāha tam || 64 ||
[Analyze grammar]

vaṇik śīghraṃ gṛhaṃ me tu samāgatya pupūja māma |
mamā'gre nartanaṃ kṛtvā cakre prajāgaraṃ mudā || 65 ||
[Analyze grammar]

prabhāte sa punarnamonārāyaṇāya vai muhuḥ |
vadan kurvan muhurdaṇḍavad yayau yamunātaṭe || 66 ||
[Analyze grammar]

kālindīsnānakṛd bhakto rakṣomārgaṃ prayāti ha |
ahaṃ dayāparo bhūtvā mārgamābadhya saṃsthitaḥ || 67 ||
[Analyze grammar]

divyarūpadharaṃ kṛṣṇanārāyaṇaṃ pumuttamam |
vilokya sudhano bhakto māṃ provāca caturbhujam || 68 ||
[Analyze grammar]

oṃ namaste bhagavate kṛṣṇanārāyaṇāya ca |
bhaktamokṣapradāyā'tra divyadarśanadāya ca || 69 ||
[Analyze grammar]

sa ca pṛṣṭo mayā lakṣmi kva vaṇik prasthito drutam |
pratyuvāca sa sudhano gacchāmi rākṣasāntikam || 70 ||
[Analyze grammar]

mayā nivāritaḥ śrutvā na gantavyaṃ na vai na vai |
jīvatā tvarjyate dharmo mṛte kiṃ mokṣasādhanam || 71 ||
[Analyze grammar]

tathāpi sa na vai śrutvā natvā māṃ rākṣasāntikam |
gatvovāca yatheṣṭaṃ bho rakṣo bhakṣaya mā ciram || 72 ||
[Analyze grammar]

yathānyāyaṃ vidhānena yathā vā tava rocate |
satyaṃ mayā sadā rakṣyaṃ bhuṃkṣva rākṣasa mā ciram || 73 ||
[Analyze grammar]

rākṣasaścaitadāścaryaṃ samākalayya taṃ prati |
tuṣṭo bhūtvo samuvāca vaṇik tvaṃ jītavānasi || 74 ||
[Analyze grammar]

tvayā satyavrato dharmaḥ pālitastena toṣaṇam |
prāpto'smi me kṣudhā naṣṭā tṛptirjātā ca śāśvatī || 75 ||
[Analyze grammar]

aho satyavratasyātra kathaṃ drohaṃ karomyaham |
kintu yāvajjāgarasya mama puṇyaṃ prayaccha vai || 76 ||
[Analyze grammar]

satyapuṇyaprabhāvena yathā'haṃ muktimāpnuyām |
sudhanastadvacaḥ śrutvā tadā provāca rākṣasam || 77 ||
[Analyze grammar]

jānāsi rākṣasa kīdṛk puṇyaṃ syājjāgarasya vai |
ghaṭikājāgrateḥ puṇyaṃ māhendrapadadāyakam || 78 ||
[Analyze grammar]

ghaṭikādvaya jāgratoḥ vedhasaḥ padamuttamam |
ardharātrijāgrato vai vairājapadamuttamam || 79 ||
[Analyze grammar]

ūnarātrijāgrato vai vaikuṇṭhapadameva ha |
āprātarjāgrato muktirbrahmalokapradā bhavet || 80 ||
[Analyze grammar]

ghaṭikārdhaṃ jāgratastu sāmrājyaṃ jāyate khalu |
jāgrati nṛtyatastvasya goloko jāyate dhruvam || 81 ||
[Analyze grammar]

tasmānnahaṃ pradāsyāmi phalaṃ sampūrṇajāgrateḥ |
ardhe dehi tadardhaṃ vā tadardhārdhaṃ pradehi me || 82 ||
[Analyze grammar]

mā lobhaṃ kuru bhaktendra mokṣaṃ kuru mamāpi bhoḥ |
ityarthito'pi sudhano mokṣalobhī dadau na vai || 83 ||
[Analyze grammar]

punaśca prārthayāmāsa sudhanaṃ brahmarākṣasaḥ |
ekanṛtyasya me puṇyaṃ dehi tvaṃ vaṇiguttama || 84 ||
[Analyze grammar]

sudhanastaṃ samapṛcchad vada me tava pūrvajam |
vṛttāntaṃ sakalaṃ paścād dāsye tvekanṛteḥ phalam || 85 ||
[Analyze grammar]

kiṃ tvaṃ māṃ na vijānāsi vaṇijaṃ prāha rākṣasaḥ |
tava gṛhasamīpe'hamagnidattastu bhūsuraḥ || 86 ||
[Analyze grammar]

tava mitraṃ samāsaṃ sa evā'haṃ nijakarmabhiḥ |
brāhmaṇaśchāndasaścāpi rākṣasatvamupāgataḥ || 87 ||
[Analyze grammar]

mayā''rabdhaṃ subhavanaṃ dvibhaumaṃ tava bhaumavat |
tadarthamiṣṭikā rātrau parakīyāḥ sadā'haram || 88 ||
[Analyze grammar]

pāpamakaravaṃ cauryaṃ gṛhaṃ pūrṇaṃ ca nā'bhavat |
jvareṇa pīḍito madhye harmyasya vāsanānvitaḥ || 89 ||
[Analyze grammar]

cauryadoṣeṇa vipro'pi brahmarākṣasatāṃ gataḥ |
so'haṃ mitraṃ vaṇigvarya tavāsmīti vibhāvya vai || 90 ||
[Analyze grammar]

mitre prāpte dayāṃ kṛtvā hyupakāraṃ kuruṣva me |
ekanṛtyasya puṇyaṃ me dehi yena gatirmama || 91 ||
[Analyze grammar]

mokṣamayī bhaved bhakta muhuścābhyarthayāmyaham |
śrutvā kṛpārdrahṛdayo vaṇig rākṣasamāha vai || 92 ||
[Analyze grammar]

sādhu rākṣasa dattaṃ te tvekanṛtyaphalaṃ mayā |
ityuccārya jalaṃ yāvad dadāti rakṣasaḥ kare || 93 ||
[Analyze grammar]

tāvadrakṣaḥśarīraṃ vai patitaṃ bhūtale tadā |
ātmā caturbhujo bhūtvā pārṣadaḥ śrīhareryathā || 94 ||
[Analyze grammar]

tathā bhūtvā dvyaṣṭavarṣo vyarājata vaṇikpuraḥ |
taṃ netumāgato viṣṇurdivyapārṣadaśobhitaḥ || 95 ||
[Analyze grammar]

sudhanastaṃ hariṃ dṛṣṭvā pādayordharaṇiṃ gataḥ |
uvāca svaprabhuṃ tatra bhagavaṃstāritau tvayā || 96 ||
[Analyze grammar]

rākṣasasya nṛtyaleśād muktido'sti bhavān yathā |
mamāpi ca tathā muktipradātā bhava mādhava || 97 ||
[Analyze grammar]

tadovāca madhuraṃ taṃ devadevo janārdanaḥ |
ehi tvamapi bhaktendra viprendro'pi sametu me || 98 ||
[Analyze grammar]

sudhanā''śu kuṭumbaṃ te sametu mama vāhane |
vimānavaramāruhya mama lokaṃ vrajantu vai || 99 ||
[Analyze grammar]

ityuktvā śrīkṛṣṇanārāyaṇaḥ sarvān vimānake |
ārohayitvā suyayau vaikuṇṭhaṃ dhāma śāśvatam || 100 ||
[Analyze grammar]

yatrāścaryamabhūt tvaitat tīrthaṃ sudhanasaṃjñitam |
kārtike dhavale tatra dvādaśyāṃ snānakāriṇaḥ || 101 ||
[Analyze grammar]

rājasūyaphalaṃ syācca dānātsvargaṃ phalaṃ bhavet |
pūrṇimāyāṃ vṛṣotsargakartā kulāni tārayet || 102 ||
[Analyze grammar]

śrāddhakartā pūrvajāṃśca tārayedatra tīrthake |
iti te kathitaṃ lakṣmi sudhanasya pramokṣaṇam || 103 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mathurākṣetramāhātmye nāgatīrthaghaṇṭābharaṇakatīrthasomatīrtha |
sarasvatīdaśāśvamedhatīrtharājavighnarājakoṭiśivakṣetrasudhanatīrthānāṃ sudhanapradattanṛtyapuṇyena brahmarākṣasasya muktiścetyādeśca nirūpaṇanāmā pañcacatvāriṃśa |
dadhikatriśatatamo'dhyāyaḥ || 345 ||
[Analyze grammar]