Chapter 343

śrīlakṣmīruvāca |
ānādijñānamārtaṇḍa sarvasākṣin sanātana |
sarvalokavidhātā'si tvameva tīrthakṛtsadā || 1 ||
[Analyze grammar]

tava yogāccetanāni jaḍāni bhūjalāni ca |
dehinastārayantyeva tvamevaṃ tīrthamuttamam || 2 ||
[Analyze grammar]

jīvānāṃ dehalābhe'tra mokṣalābho mahānmataḥ |
vinā mokṣaṃ kṛtalābhāste sarve nidhanā'nvayāḥ || 3 ||
[Analyze grammar]

vṛndāvanaṃ māthuraṃ ca śālagrāmaṃ sanātanam |
tulasīkṣetrapatyādyaṃ tvayā proktaṃ purātanam || 4 ||
[Analyze grammar]

tvayā tatra katiprādurbhāvā labdhā vada prabho |
lapsyante cāpi ca kati kva vā bhūmau vada prabho || 5 ||
[Analyze grammar]

śrīnārāyaṇa uvāca |
are lakṣmi hyasaṃkhyātāḥ prādurbhāvā bhavanti me |
mānaveṣu ca deveṣu tiryakṣu paśupakṣiṣu || 6 ||
[Analyze grammar]

jalajeṣu vanajeṣu munisādhujaneṣu ca |
ṛṣiṣu satsu satīṣu sādhvīṣu santi bhūriśaḥ || 7 ||
[Analyze grammar]

praticaturyugaṃ kṛṣṇo bhavāmi bhuvi padmaje |
vṛndāvaneṣu deśeṣu māthureṣu yamītaṭe || 8 ||
[Analyze grammar]

vicarāmi viharāmi daityānāmantakṛdyathā |
nārāyaṇāḥ śataṃ pañcaśataṃ ca jalaśāyinaḥ || 9 ||
[Analyze grammar]

triṃśatkamaṭharūpāṇi matsyarūpāṇi viṃśatiḥ |
gopālāśca śataṃ cāṣṭaṃ buddhāḥ santi sahasraśaḥ || 10 ||
[Analyze grammar]

triṃśatparaśurāmāśca rāmā ekottaraṃ śatam |
anye'pi kāryavaśagā avatārā mama priye || 11 ||
[Analyze grammar]

ākasmikāstvayā sārdhaṃ kevalā vā bhavanti vai |
brahmāṇḍāni hyanekāni hyanekā daityadānavāḥ || 12 ||
[Analyze grammar]

surāśca tāpasāścāpi hyasaṃkhyāḥ kāmanāyutāḥ |
ārtānāmārtināśāyā'rthināmarthapradāptaye || 13 ||
[Analyze grammar]

sakāmānāṃ kāmapūrtyai saṃbhavāmi sthale sthale |
kvacidaṃśaḥ kvacitpūrṇaḥ kvacit tvāveśarūpataḥ || 14 ||
[Analyze grammar]

kalayā vā kvacit kvāpi kvacid vibhūtirūpataḥ |
sādhurūpastathā rājarūpaḥ sadgururūpataḥ || 15 ||
[Analyze grammar]

vyāsarūpaśca vijñānisvarūpaḥ saṃbhavāmi vai |
viṣṇurūpo'smyahameko muktimaṇḍalamadhyagaḥ || 16 ||
[Analyze grammar]

vṛndāvane mathurāyāṃ bahuvāraṃ janiṃ gataḥ |
tīrthānāṃ tīrthamūrdhanyaṃ mathurākṣetramasti yat || 17 ||
[Analyze grammar]

yuge yuge yamītīre saṃbhavāmi punaḥ punaḥ |
kṛṣṇarūpo dāsadāsīkoṭyabjecchāprapūrakaḥ || 18 ||
[Analyze grammar]

anantasṛṣṭinārīṇāṃ kāmecchābhaktikarṣitaḥ |
rājarūpaḥ koṭikāmagarvahā saṃbhavāmyaham || 19 ||
[Analyze grammar]

vasuḥ pitā ca me mātā devī bhrātā sukarṣaṇaḥ |
anye santu na vā santu hyebhiḥ saha vasāmyaham || 20 ||
[Analyze grammar]

prathame tu dvāpare'haṃ saṃkarṣaṇena saṃyutaḥ |
yugalo vasudevyośca prādurbhūto'bhavaṃ priye || 21 ||
[Analyze grammar]

tadā tatrā'surā hyāsan kālanemipravaṃśajāḥ |
tānahaṃ hatavān sarvān kṛṣṇaḥ pṛthvīsutāpatiḥ || 22 ||
[Analyze grammar]

ratvaṃ tadā''sīḥ kamalākhyā marutputrī mama priyā |
prathame dvāpare cāhaṃ kamalāpatikṛṣṇakaḥ || 23 ||
[Analyze grammar]

kālanaimeyavaṃśyānāṃ nāśako mathurāpure |
tadārabhya mathurāyāḥ kṣetraṃ paramapāvanam || 24 ||
[Analyze grammar]

mama pādatalaiḥ śuddha sarvadā vartate priye |
taduttaraṃ mama prādurbhāvāḥ santi sahasraśaḥ || 25 ||
[Analyze grammar]

tatrā'nyatra ca kamale tadantaṃ gaṇayāmi na |
bhaviṣyantyavatārāśca tān pragāsyanti mānavāḥ || 26 ||
[Analyze grammar]

vyāsāśca tān yathāyogyaṃ varṇayiṣyanti muktaye |
śṛṇu priye pavitraṃ tanmāthuraṃ kṣetramuttamam || 27 ||
[Analyze grammar]

na svarge na ca pātāle tīrthe vai mathurāsamam |
sā ramyā sarvathā divyā janmabhūmiḥ sadā mama || 28 ||
[Analyze grammar]

yatra vāsena manujāstathā'nyaprāṇinaḥ priye |
svarge ca mokṣaṇaṃ yānti golokamiva me sthalam || 29 ||
[Analyze grammar]

prayāge māghapūrṇāyāḥ phalaṃ nityaṃ yamījale |
kāśyāṃ varṣasahasrasya phalaṃ tvatra dinena vai || 30 ||
[Analyze grammar]

puṣkare kārtikīpūrṇāphalaṃ tvatra kṣaṇena vai |
māyāmūḍhā mathurāṃ vihāyā'nyatra bhramānta hi || 31 ||
[Analyze grammar]

mathurāśravaṇāccāpi līyante pāpakāṭayaḥ |
pṛthivyāṃ yāni tīrthāni kṣetrāṇi ca sarāṃsi ca || 32 ||
[Analyze grammar]

nadyo nadāstathā pūryo'raṇyāni ca vanānyapi |
mathurāyāṃ samāyāntyāṣāḍhe supte janārdane || 33 ||
[Analyze grammar]

mathurāmaṇḍale śrāddhāt tṛpyanti pitaro yugam |
mathurāvāsino lokā nidhane yānti matpadam || 34 ||
[Analyze grammar]

kubjāmrake saukarave janmasthāne viśeṣataḥ |
vasatāṃ tu vinā sāṃkhyaṃ yogaṃ mokṣosti niścitaḥ || 35 ||
[Analyze grammar]

annavastrapradātāro narā muktā na saṃśayaḥ |
bhaviṣyāmi varārohe dvāpare yugasaṃsthite || 36 ||
[Analyze grammar]

kṛṣṇo'haṃ ca yayātestu vaṃśe daityaniṣūdanaḥ |
yamunā yatra suvahā vaivasvatasutā priyā || 37 ||
[Analyze grammar]

gaṃgāṃ prāpya prayāge yā triveṇīti pravartate |
sarasvatīṃ ca saṃgṛhya prathitā pāpahāriṇī || 38 ||
[Analyze grammar]

yamī gaṃgāśataguṇā śreṣṭhā māthuramaṇḍale |
tatra tīrthāni cānyāni bhaviṣyanti mama priye || 39 ||
[Analyze grammar]

yeṣu snānājjalapānānmuktireva na saṃśayaḥ |
nidhane māthure kṣetre jāyate sa caturbhujaḥ || 40 ||
[Analyze grammar]

viśrāntisaṃjñakaṃ tīrthaṃ viśrāntighaṭanāpradam |
sarvaśreṣṭhaṃ mahāpuṇyaṃ snānād golokadaṃ nṛṇām || 41 ||
[Analyze grammar]

sarvatīrtheṣu yatsnānaṃ dānaṃ dhyānaṃ hutaṃ tapaḥ |
tatsarvaṃ labhate lakṣmi viśrāntitīrthadarśanāt || 42 ||
[Analyze grammar]

na tu yajñairna tapasā na dhyānena na saṃyamaiḥ |
tatphalaṃ labhate snāto yathā viśrāntighaṭṭake || 43 ||
[Analyze grammar]

kālatrayaṃ darśanācca tathā pradakṣiṇadvayāt |
namaskārapañcakācca viṣṇuloke mahīyate || 44 ||
[Analyze grammar]

mayā tatra yamunāyā ghaṭṭe viśrāntirāsthitā |
śāśvatī śāntiratrāsti yathā golokadhāmani || 45 ||
[Analyze grammar]

athā'nyanme paraṃ tīrthaṃ prayāgaṃ tatra vidyate |
devānāṃ durlabhaṃ guptaṃ sarvasaṃsāramokṣaṇam || 46 ||
[Analyze grammar]

yatra snāto mama lokaṃ yātyagniṣṭomapuṇyabhāg |
sakāmastu mahendraḥ syāttato yāti parāṃ gatim || 47 ||
[Analyze grammar]

athā'nyanye kanakhalaṃ tīrthaṃ snānāddivaḥ pradam |
athānyat tindukaṃ tīrthaṃ mama golokadhāmadam || 48 ||
[Analyze grammar]

pāñcāladeśe kāmpilyaṃ nagaraṃ dhārmikaprajam |
tatra tindukasaṃjño vai sadā vasati nāpitaḥ || 49 ||
[Analyze grammar]

kālena nāpitasyaiva kuṭumbaṃ tu kṣayaṃ gatam |
tataḥ sa mathurāṃ prāpto yamītīre'vasat sadā || 50 ||
[Analyze grammar]

kuṭumboddhāraṇārthaṃ vai śrāddhādi tena kāritam |
sa nityaṃ yamunāsnāyī kālena nidhanaṃ gataḥ || 51 ||
[Analyze grammar]

mathurāyāṃ brāhmaṇasya janma tvāsādya vai tataḥ |
vaiṣṇavaḥ paramo bhūtvā yayau golokadhāma saḥ || 52 ||
[Analyze grammar]

evaṃ tindukasaṃjño'sau jātismarastu bhūsuraḥ |
sarvān vijñāpya tattīrthaṃ khyāpayitvā mṛtiṃ yayau || 53 ||
[Analyze grammar]

athānyat paramaṃ sūryatīrthaṃ pāpavināśanam |
ārādhitā balinā vai dhanarājyasamīhayā || 54 ||
[Analyze grammar]

ūrdhvabāhurnirāhārastatāpā'tra paraṃ tapaḥ |
tasya prasanno bhagavān sūryanārāyaṇaḥ svayam || 55 ||
[Analyze grammar]

samāgatya baliṃ prāha kiṃ te tapasi kāraṇam |
baliḥ prāha trilokasya netraṃ sūryaṃ jagatprabhum || 56 ||
[Analyze grammar]

nirdhano'smi na me rājyaṃ dhanārthaṃ tapa ācaram |
sūryastasmai dadau cintāmaṇiṃ svāt mukuṭāt tataḥ || 57 ||
[Analyze grammar]

cintāmaṇiṃ sa saṃprāpya gataḥ pātālameva ha |
sūryo yamījale snātvā hiraṇyamaṇḍalaṃ yayau || 58 ||
[Analyze grammar]

evaṃ tīrthavaraṃ jātaṃ pāpatāpavināśakam |
snātvā svargaṃ tato mokṣaṃ vindate syāccaturbhujaḥ || 59 ||
[Analyze grammar]

ravivāre ca saṃkrāntau candrasūryagrahe tithau |
sūryatīrthasnānakartā rājasūyaphalaṃ labhet || 60 ||
[Analyze grammar]

athā'tra dhruvatīrthaṃ ca yatra tepe dhruvaḥ purā |
tatra snānena sāmrājyaṃ maraṇena dhruvasthalam || 69 ||
[Analyze grammar]

śrāddhenātra pitaraśca taranti yānti mokṣaṇam |
dhruvasya dakṣiṇe tatra tīrthaṃ vai tīrtharājakam || 62 ||
[Analyze grammar]

tatra snānena vai lakṣmi mama golokamāpnuyāt |
atha taddakṣiṇe lakṣmi ṛṣitīrthaṃ paraṃ matam || 63 ||
[Analyze grammar]

snātvā yāyād ṛṣilokaṃ golokaṃ prāṇavarjanāt |
tato'pi dakṣiṇe tīrthaṃ mokṣatīrthaṃ paraṃ mama || 64 ||
[Analyze grammar]

yatra snānād bhavenmuktirgolokaṃ cāpnuyānmama |
tatraiva koṭitīrthaṃ ca devānāmapi durlabham || 65 ||
[Analyze grammar]

tatra snānāt tathā dānājjapāddhomācca bhojanāt |
tarpaṇādupavāsācca brahmaloke mahīyate || 66 ||
[Analyze grammar]

tāritāḥ pitarastena koṭitīrthaniṣeviṇāt |
tathā sapta ca saptātha sapta vaṃśāśca tāritāḥ || 67 ||
[Analyze grammar]

atha vai vāyutīrthaṃ ca pitṝṇāṃ tārakaṃ param |
pitṝn piṇḍapradātārastārayantyeva sarvathā || 68 ||
[Analyze grammar]

gayāpiṇḍapradānasya phalaṃ tvatra hyavāpyate |
jyeṣṭhamāse viśeṣeṇa śrāddhāttaranti pūrvajāḥ || 69 ||
[Analyze grammar]

uktānyetāni tīrthāni bhuktimuktipradāni vai |
snānaṃ dānaṃ japo homaḥ syuḥ sahasraguṇā hi te || 70 ||
[Analyze grammar]

tīrthānāṃ smaraṇāccāpi vandanād darśanāttathā |
jalasya kaṇikāpānānmuktirbhavati śāśvatī || 71 ||
[Analyze grammar]

athātra tīrthamūrdhanyamavatārasamūhakam |
śrīkṛṣṇasyā'vatārā ye militvā janmanaḥ kṣaṇe || 72 ||
[Analyze grammar]

samāyātāḥ kṣaṇaṃ yatra sthitā yamītaṭe śubhe |
janmabhūmisamīpe tat tīrthaṃ gupta hi vartate || 73 ||
[Analyze grammar]

snānāttatra vāripānāt prokṣaṇādapi sarvathā |
pāpapradhvaṃsakaṃ golokavaikuṇṭhādilokadam || 74 ||
[Analyze grammar]

tatra vai maraṇānmuktirbhavedeva na saṃśayaḥ |
ekāhopoṣaṇādvāpi koṭiyajñaphalaṃ bhavet || 75 ||
[Analyze grammar]

rajaḥkaṇā mathurāyāḥ spṛśanti dehinastu yān |
te'pi muktiṃ prayāsyanti tiryakkīṭādayo'pi cet || 76 ||
[Analyze grammar]

deśāntare'pi tannāmagrahītā bhuktibhāṅ nanu |
yatra sākṣātparabrahma rājate tatra kiṃ na vai || 77 ||
[Analyze grammar]

dhanadhāmadharādāraputraputrīsamṛddhayaḥ |
kṣetrodyānādhikāritvarājyasattājaneśatāḥ || 78 ||
[Analyze grammar]

svarṇarūpyamahālakṣmīśrīsampadbhavanādayaḥ |
bhavantyeva hareryogād bhaktasyātra kṛpākaṇāt || 79 ||
[Analyze grammar]

tārakaṃ dhārakaṃ yadvad rakṣakaṃ pālakaṃ tathā |
svargadaṃ mokṣadaṃ cāpi tīrthaṃ māthuramuttamam || 80 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mathurākṣetramāhātmye bhagavadavatārāṇāmānantyaṃ prathamadvāpare kṛṣṇāvatāraḥ viśrāntitīrthaprayāgakanakhalatindukasūryadhruvatīrtharājaṛṣimokṣakoṭivāyvavatāratīrthādipradarśananāmā tricatvāriṃśadadhikatriśatatamo'dhyāyaḥ || 343 ||
[Analyze grammar]