Chapter 337

śrīnārāyaṇa uvāca |
śaṃkhacūḍastato lakṣmi śaṃkaraṃ prāha naitikam |
sābhimānaṃ yuddhamūlaṃ vināśakṛddhi tāmasam || 1 ||
[Analyze grammar]

tvayā kathitaṃ yannātha sarvaṃ tathyaṃ na cā'nṛtam |
jñātidrohe mahatpāpaṃ yadi bhavati śaṃkara || 2 ||
[Analyze grammar]

kathaṃ gṛhītvā sarvasvaṃ talaṃ prasthāpito baliḥ |
sabhrātṛko hiraṇyākṣaḥ kathaṃ devaiśca hiṃsitaḥ || 3 ||
[Analyze grammar]

kathaṃ samudramathane pīyūṣaṃ bhakṣitaṃ suraiḥ |
kathaṃ tvaṃ dānavān haṃsi na devān na gaṇān svakān || 4 ||
[Analyze grammar]

kathaṃ satīnimitte tatpitā vihiṃsitastadā |
kathaṃ sudarśanaṃ viṣṇorasureṣveva sārthakam || 5 ||
[Analyze grammar]

sambandhinyoḥ kāśyapeyaprajayoryadvirodhanam |
jāyate mahatīrlajjā sparddhā'smābhiḥ kathaṃ hara || 6 ||
[Analyze grammar]

pitṛvaṃśasamunnetā svargaṃ yāti tu mānavaḥ |
paravaṃśānusaṃyātā bhavatyadhogatiṃ gataḥ || 7 ||
[Analyze grammar]

kālena yadbhavet tadvai bhavatvatra mamā''laye |
parājayo jayo vāpi kālakṛnmānya eva me || 8 ||
[Analyze grammar]

adhunā tvaṃ mahākālo mamā'si pārvatīpate |
kālena yadbhavet tatra santuṣṭo'smi raṇaṃ kuru || 9 ||
[Analyze grammar]

mṛto yāsye tu goloke jaye bhokṣye tu vaidhasam |
raṇe hānirna me cāsti na te lābho manāgapi || 10 ||
[Analyze grammar]

iti vicārya bhagavan nivṛtto bhava śaṃkara |
alpena saha mahatāṃ hānireva na vardhanam || 11 ||
[Analyze grammar]

namaskaromi te śaṃbho uttiṣṭhāmi raṇāya ca |
iti kṛtvā yayau yānamāruhya nijavāhinīm || 12 ||
[Analyze grammar]

tatraite ye'surapakṣā daityāśca dānavādayaḥ |
surāṇāṃ pratipakṣā ye te tu yuddhe'surānugāḥ || 13 ||
[Analyze grammar]

ye tu devasamā divapakṣagāste harānugāḥ |
sainyeṣu cāgatāḥ sarve śaṃkhacūḍapinākinoḥ || 14 ||
[Analyze grammar]

koṭyarbudābjayoddhṝṇāṃ sene vārdhisame tadā |
suśobhe te sma lakṣmi drāg raṇavādyā'dhite jite || 15 ||
[Analyze grammar]

nedurdundubhayaḥ svarge puṣpavṛṣṭirbabhūva ha |
skandaḥ senāpatiścātra tatrarāhuśca bhūpatiḥ || 16 ||
[Analyze grammar]

dvayoryuddhamabhūd vyomni śataghnībāṇaśaktibhiḥ |
paraśuparighābhūśuṇḍībhistomaracakrakaiḥ || 17 ||
[Analyze grammar]

bāṇaiḥ śilīmukhaiścāpi dhūṣkṛtairgolakaistathā |
prastaraiśca sahasraghnairyuddhamadbhutamulbaṇam || 18 ||
[Analyze grammar]

dvayośca senayormadhye mahāpralayasannibham |
mardanaṃ kūrcanaṃ nikṛntanaṃ dvaidhīvibhedanam || 19 ||
[Analyze grammar]

chedanaṃ cūrṇanaṃ prāṇikarcanaṃ dalanaṃ hyabhūt |
śaravṛṣṭiścārdhacandraśūlabhallatridhārakaiḥ || 20 ||
[Analyze grammar]

hananaṃ sarvatovyāptamāsīdubhayasainyayoḥ |
hastīnāṃ ca tathā'śvānāṃ khaccarāṇāṃ bhayaṃkaraḥ || 21 ||
[Analyze grammar]

vināśo'bhūd rathināṃ ca pattīnāṃ gaṇanā na vai |
rathā bhagnāśca yānāni cūrṇitāni sahasraśaḥ || 22 ||
[Analyze grammar]

vāhāśchinnā lakṣaśaśca bhaṭeśvarāstu koṭiśaḥ |
naṣṭāśchinnā vyasavaścā'bhavan śaśvadbhūśāyinaḥ || 23 ||
[Analyze grammar]

divāniśaṃ mahāghoraṃ satataṃ pralayātmakam |
yuddhaṃ pravartitaṃ tatra kṣuttṛṣāgaṇanāpi na || 24 ||
[Analyze grammar]

dhanuṣmatāṃ tadā bāṇāḥ śastrāṇi śastriṇāṃ tathā |
kavacāni varmavatāṃ kṣayamāptāni sarvathā || 25 ||
[Analyze grammar]

dānavānāṃ gaṇānāṃ ca layaḥ prākṛtiko yathā |
yadā jātastadā trastā vidudruvū raṇāṃgaṇam || 26 ||
[Analyze grammar]

kārtikaḥ śaravṛṣṭyā vai cakāra kadanaṃ mahat |
rāhuścāpi śaravṛṣṭyā cakāra kartanaṃ param || 27 ||
[Analyze grammar]

parvatānāṃ ca sarpāṇāṃ śilānāṃ śākhināṃ tathā |
śaśvad vṛṣṭiṃ cakratustau durvāhyāṃ ca bhayaṃkarīm || 28 ||
[Analyze grammar]

rāhomārgaṇavṛṣṭyā tu pracchannaḥ śivanandanaḥ |
dhanuḥ skandasya chiccheda rathaṃ ciccheda vājinoḥ || 29 ||
[Analyze grammar]

mayūraṃ jarjarībhūtaṃ divyāstreṇa cakāra saḥ |
śaktiṃ cikṣepa sūryābhāṃ rāhurvakṣovibhedinīm || 30 ||
[Analyze grammar]

gadayā tāṃ pothayitvā dhanurdivyamupādade |
skando vavarṣa śastrāṇi rāhornāśāya sarvathā || 31 ||
[Analyze grammar]

sarpāṃśca parvatāṃścāpi vṛkṣāṃśca prastarāṃstathā |
sarvāṃściccheda kopena divyāstraiḥ śaṃkarātmajaḥ || 32 ||
[Analyze grammar]

āgneyaṃ vāruṇāstreṇa vārayāmāsa vai guhaḥ |
rathaṃ dhanuśca ciccheda saiṃhikeyasya līlayā || 33 ||
[Analyze grammar]

savāhaṃ sārathiṃ caiva hatvā cikṣepa śaktikām |
dānavo vakṣasi hato mūrchāmavāpa vai tadā || 34 ||
[Analyze grammar]

śaṃkhacūḍaḥ samāyāto rathamāruhya satvaram |
cakāra śarajālāni māyayā māyināṃ varaḥ || 35 ||
[Analyze grammar]

gūhaṃ tvācchādya samare śarajālena śaktikām |
jagrāha śatasūryākhyāṃ viṣṇutejo'nvitāṃ tadā || 36 ||
[Analyze grammar]

cikṣepa kārtike lagnā papāta mūrchitastadā |
kālī gṛhītvā taṃ kroḍe nināya śivasannidhau || 37 ||
[Analyze grammar]

śivaḥ svasainyaṃ devāṃśca prerayāmāsa satvaraḥ |
dānavendraiḥ sasainyaiśca punaryuddhaṃ bhayaṃkaram || 38 ||
[Analyze grammar]

samabhūt tatra yuyudhe mahendro vṛṣaparvaṇā |
bhāskaro yuyudhe vipracittinā pralayāgnivat || 39 ||
[Analyze grammar]

daṃbhena saha candraśca kālaḥ kāleśvareṇa ca |
gokarṇena kṛśānuśca kālakeyena yakṣarāṭ || 40 ||
[Analyze grammar]

mayena viśvakarmā ca mṛtyurbhayaṃkareṇa ca |
saṃhāreṇa yamaḥ kalaviṃkena varuṇastathā || 41 ||
[Analyze grammar]

cañcalena pavanaśca ghṛtapṛṣṭhena vai budhaḥ |
raktākṣeṇa śaniścaiva vasavo varcasāṃgaṇaiḥ || 42 ||
[Analyze grammar]

jayanto ratnasāreṇā'śvinau dīptimatā saha |
nalakūbaro dhūmreṇa dharmo dhanurdhareṇa ca || 43 ||
[Analyze grammar]

śobhākareṇaiveśāno maṇḍukākṣeṇa maṃgalaḥ |
manmathaḥ piṭhareṇāpi yuyudhe'straprahetibhiḥ || 44 ||
[Analyze grammar]

ulkāmukhena dhūmreṇa khaṅgenāpi dhvajena ca |
kāñcīmukhena piṇḍena ghanena saha nandinā || 45 ||
[Analyze grammar]

viśvena ca palāśena cādityā yuyudhurbhṛśam |
ekādaśa mahārudrā yuyudhire bhayāhvayaiḥ || 46 ||
[Analyze grammar]

mahāmārī yuyudhe ca progradaṇḍyādibhistadā |
nandīśvarādayaḥ sarve saha daṇḍyādidānavaiḥ || 47 ||
[Analyze grammar]

evaṃ te yuyudhuḥ sainyeśvarāḥ sainyāni sarvaśaḥ |
śaṃkhacūḍo viśaśrāma kṣaṇaṃ tadvacca kārtikaḥ || 48 ||
[Analyze grammar]

dānavāścāsurā daityā yuyudhire samantataḥ |
devāścakampire bhītā dudruvurvai diśo daśa || 49 ||
[Analyze grammar]

cakāra kopaṃ skandaśca devebhyastvabhayaṃ dadau |
yuyudhe'yaṃ dānavānāṃ gaṇaiḥ sārdhaṃ praroṣataḥ || 50 ||
[Analyze grammar]

akṣauhiṇīnāṃ śatakaṃ samare sa jaghāna ha |
kālī raktaṃ papau kruddhā nanarta samare tadā || 51 ||
[Analyze grammar]

daśalakṣaṃ gajendrāṇāṃ śatalakṣaṃ ca vājinām |
samādāya samādāya mukhe cikṣepa līlayā || 52 ||
[Analyze grammar]

skandasya śarajālaiśca dānavādyā vidudruvaḥ |
kālī samaramāsādyā'ṭṭāṭṭahāsāni cākarot || 53 ||
[Analyze grammar]

ugradaṃṣṭrā cogradaṇḍā koṭarā yoginīgaṇāḥ |
ḍākinyaścāsurān khādayāmāsuśca papurmadhu || 54 ||
[Analyze grammar]

dṛṣṭvā kālīṃ śaṃkhacūḍo yuddhārthamādravat tadā |
kālī cikṣepa cāgneyaṃ pralayāgnisamaṃ tataḥ || 55 ||
[Analyze grammar]

śaṃkhacūḍo'harattadvai vāruṇāstreṇa līlayā |
cikṣepa vāruṇaṃ kālī gāndharveṇa tu dānavaḥ || 56 ||
[Analyze grammar]

cicchedātha pracikṣepa kālī māheśvarāstrakam |
jaghāna dānavo vaiṣṇavāstreṇa līlayā tadā || 57 ||
[Analyze grammar]

nārāyaṇāstraṃ cikṣepa kālī tatastu dānavaḥ |
nanāma daṇḍavat bhūmau bhaktyastreṇa śaśāma tat || 58 ||
[Analyze grammar]

brahmāstraṃ sā ca cikṣepa brahmāstreṇā'grasaddhi saḥ |
pāśupataṃ sā cikṣepa pāśupatena so'hanat || 59 ||
[Analyze grammar]

devī cikṣepa śaktiṃ tāṃ so'pi śaktyā'vināśayat |
mahākālī tadā kruddhā mahākālāstrameva sā || 60 ||
[Analyze grammar]

mantrapūrvaṃ nikṣipati tāvadākāśavāgabhūt |
mṛtyurna dānavasyā'sti kaṇṭhe'sya kavacaṃ hareḥ || 61 ||
[Analyze grammar]

tulasyāśca satītvaṃ vai yāvadasti tu tāvatā |
jarāmṛtyū na cā'sya sto vinā satītvanāśanam || 62 ||
[Analyze grammar]

śrutvā kālī vinivṛttā so'karojjayagarjanām |
tāvadvaṭe samāyāto viṣṇurbrāhmaṇarūpadhṛk || 63 ||
[Analyze grammar]

śaṃbho mayā'rpitāṃ śaktiṃ samādāya raṇasthalīm |
yāhi daityavināśāya viṣṇurasmi jagadguruḥ || 64 ||
[Analyze grammar]

gacchāmyahaṃ bhikṣukaḥ sannarthayāmi tu dānavam |
kavacaṃ prati bhūteśa paścād gacchāmi tulasīm || 65 ||
[Analyze grammar]

śaṃkhacūḍasvarūpeṇa vīryādhānārthamīśvara |
tato dānavamṛtyurvai bhaviṣyati na saṃśayaḥ || 66 ||
[Analyze grammar]

ityuktvā bhagavān viṣṇurvṛddhabrāhmaṇarūpadhṛk |
dānavendraṃ prati gatvā bhikṣāṃ dehīti cā'bravīt || 67 ||
[Analyze grammar]

gṛhāṇa kiṃ tavecchāsti provāca dānavastadā |
brāhmaṇa prāha kavacaṃ dehi me dānavad bhava || 68 ||
[Analyze grammar]

tacchrutvā dānavacchreṣṭho dadau kavacamuttamam |
gṛhītvā kavacaṃ kṛṣṇo jagāma tulasīṃ prati || 69 ||
[Analyze grammar]

śaṃkhacūḍasvarūpeṇa jagāma tulasīgṛham |
dundubhiṃ vādayāmāsa cakāra jayasadravam || 70 ||
[Analyze grammar]

tacchrutvā paramānandā samutthāya sasaṃbhramā |
rājamārgagavākṣeṇa dadarśa tulasī patim || 71 ||
[Analyze grammar]

brāhmaṇebhyo vācakebhyo bhikṣubhyaḥ sā dhanaṃ dadau |
maṃgalaṃ vācayāmāsa bandibhyo'pi dhanaṃ dadau || 72 ||
[Analyze grammar]

avaruhya rathāt kṛṣṇastulasyā bhavanaṃ yayau |
kāntamāsādya tulasī kṣālayāmāsa tatpadam || 73 ||
[Analyze grammar]

nanāmā'timudā svarṇāsanasthaṃ jayakāriṇam |
samāśliṣat tadaṃgāni mardayāmāsa śāntaye || 74 ||
[Analyze grammar]

tāmbūlaṃ ca dadau tasmai karpūrādisuvāsitam |
adya me saphalaṃ janma paśyāmi vijayaṃ tava || 75 ||
[Analyze grammar]

kathaṃ viśvasya saṃhartrā sārdhamājau jayo'bhavat |
tanme brūhi prāṇanāyetyuvāca tulasī satī || 76 ||
[Analyze grammar]

viṣṇuruvāca devānāṃ dānavānāṃ mahākṣaye |
brahmā tatra samāgatya kārayāmāsa melanam || 77 ||
[Analyze grammar]

devānāmadhikāreṣu devā bhavantu nirbhayāḥ |
śaṃkhacūḍa tava rājye sapatnīkaḥ sukhī bhava || 78 ||
[Analyze grammar]

iti sandhiḥ kārito vai brahmaṇā cāvayostataḥ |
āgato'haṃ svabhavanaṃ śivalokaṃ śivo gataḥ || 79 ||
[Analyze grammar]

ityuktvā tulasīṃ kṛṣṇaḥ śayanaṃ pracakāra vai |
reme ramāpatistatra tulasyāḥ śayane ratim || 80 ||
[Analyze grammar]

sāpi sukhātirekāccā''karṣaṇādivilakṣaṇam |
apraskhalitabhāvācca tarkayāmāsa cetaram || 81 ||
[Analyze grammar]

kastvaṃ vada mahārājasvarūpo'syatra māyayā |
dūrīkṛtaṃ satītvaṃ me bhuktā'haṃ māyayā tvayā || 82 ||
[Analyze grammar]

śapāmi vada śīghraṃ me śrutveti śāpabhītitaḥ |
dadhāra līlayā svīyamūrti nārāyaṇātmikām || 83 ||
[Analyze grammar]

navīnanīradaśyāmāṃ śaratpaṃkajalocanām |
koṭikandarpalāvaṇyāṃ ratnabhūṣaṇabhūṣitām || 84 ||
[Analyze grammar]

īṣaddhāsyaprasannāsyāṃ śobhitāṃ pītavāsasā |
nārāyaṇaṃ tathā dṛṣṭvā kāminīṃ kāmamūrchitāṃ || 85 ||
[Analyze grammar]

punaśca mohamāpannā śrīkṛṣṇaṃ pariṣasvaje |
tadā tulasyāṃ śrīkṛṣṇo vīryādhānaṃ cakāra ha || 86 ||
[Analyze grammar]

śaṃbhustadā triśūlena śaṃkhacūḍaṃ jaghāna vai |
mṛtasyātmā caturbāhuḥ sudāmā dhāma saṃyayau || 87 ||
[Analyze grammar]

punaśca mohamāpannā punaśca prāpya cetanām |
uvāca kṛṣṇaṃ he nātha pāṣāṇahṛdayo bhavān || 88 ||
[Analyze grammar]

dayā nāsti manāstāśca satībalaprajīvanaḥ |
chalena dharmabhagena mama svāmī tvayā hataḥ || 89 ||
[Analyze grammar]

tasmātpāṣāṇarūpastvaṃ bhuvi devo bhavā'dhunā |
atastvamekajanuṣi jñānahīno bhaviṣyasi || 90 ||
[Analyze grammar]

ityuktvā sā ca tulasī nipatya caraṇe hareḥ |
ruroda vilalāpaināmuvāca bhagavāṃstadā || 91 ||
[Analyze grammar]

śaṃkhacūḍaṃ ca me bhaktaṃ sudāmānaṃ punarmama |
vaikuṇṭhaṃ prāpayituṃ vai mayā tvayi chalaṃ kṛtam || 92 ||
[Analyze grammar]

tannāśāya mayā dattaṃ triśūlaṃ śaṃkarāya vai |
grīṣmamadhyāhnamārtaṇḍaśatakaprabhamujjvalam || 93 ||
[Analyze grammar]

nārāyaṇā'dhiṣṭhitāgraṃ brahmādhiṣṭhitamadhyamam |
śivādhiṣṭhitamūlaṃ ca kālādhiṣṭhitadhārakam || 94 ||
[Analyze grammar]

durnivāryaṃ tathā'vyarthaṃ sarvaśastravighātakam |
śaṃkarakeśavā'nyairdurvahaṃ brahmāṇḍanāśakam || 99 ||
[Analyze grammar]

dhanuḥsahasra dairghyeṇa vistṛtyā śatahastakam |
sajīvaṃ brahmarūpaṃ ca śaṃbhuścikṣepa dānave || 96 ||
[Analyze grammar]

mayā tvayi kṛtaṃ vīryādhānaṃ daityā mamāra yat |
babhūva bhasmasācchaṃkhacūḍo rathayutastadā || 97 ||
[Analyze grammar]

babhūva ca punardivyo dvibhujo muralīdharaḥ |
nānāratnasubhūṣāḍhyagopakoṭibhirāvṛtam || 98 ||
[Analyze grammar]

golokādāgataṃ yānamāruhya tatpuraṃ yayau |
atha śūlaśca vegena prayayau śūlinaḥ karam || 99 ||
[Analyze grammar]

śaṃkarastena śūlena dānavasyā'sthijālakam |
premṇā nyakṣepayacchīghraṃ lavaṇode tu sāgare || 100 ||
[Analyze grammar]

śaṃkhajātirjāyate sā śreṣṭhā pūtā surārcane |
praśastaṃ śaṃkhatoyaṃ ca devānāṃ prītidaṃ bhavet || 101 ||
[Analyze grammar]

yatra śaṃkhastatra lakṣmīstulasī tīrthamatra ca |
śaṃkhatoyaṃ tīrthatoyaṃ yatra śaṃkhastato hariḥ || 102 ||
[Analyze grammar]

śokaṃ tyaja mama padme bhava jātismarā priye |
tapastvayā kṛtaṃ sādhvi madarthe badarīvane || 103 ||
[Analyze grammar]

tvadarthe śaṃkhacūḍaśca cakāra puṣkare tapaḥ |
kṛtvā tvāṃ kāminīṃ kāmī vijahāra ca tatphalāt || 104 ||
[Analyze grammar]

gataḥ sa śaraṇaṃ rādhākṛṣṇayoḥ rāsamaṇḍale |
goloke vartata bhakto mama tvaṃ yāhi sundari || 105 ||
[Analyze grammar]

idaṃ śarīraṃ tyaktveha divyaṃ dehaṃ vidhāya ca |
rāse me ramayā sārdhaṃ tvaṃ ramāsadṛśī bhava || 106 ||
[Analyze grammar]

tava śāpena pāṣāṇaḥ śālagrāmo bhavāmi vai |
tvadviyogā'sahamānaḥ śapāmi tvāṃ nadī bhava || 107 ||
[Analyze grammar]

iyaṃ tanurnadīrūpā gaṇḍakīti ca viśrutā |
pūtā mokṣapradā nṝṇāṃ bhavatu puṇyadā''plavāt || 108 ||
[Analyze grammar]

tava romasamūhāśca puṇyavṛkṣā bhavantu vai |
tulasīromajā vṛkṣāstulasyaḥ prabhavantu vai || 109 ||
[Analyze grammar]

nadyāmahaṃ śālagrāmo vahāmi jalatulasīm |
trilokeṣu ca puṣpāṇāṃ patrāṇāṃ devapūjane || 110 ||
[Analyze grammar]

pradhānarūpā tulasī sadā bhavatu matpriyā |
rādhāśāpakṛtaste madviyogaḥ sāntatāṃ gataḥ || 111 ||
[Analyze grammar]

kṛpayā me bhava padme dhāmni ramā'tra tulasī |
vivāhavidhinā vṛndāvane'haṃ tvāṃ sukanyakām || 112 ||
[Analyze grammar]

grahīṣyāmi gamiṣyāmi nītvā tvāṃ matsahāyinīm |
ityuktvā prayayau viṣṇuryatra śaṃbhurmṛdhe sthitaḥ || 113 ||
[Analyze grammar]

vavandāte śaśaṃsatuḥ parasparaṃ haro hariḥ |
devārutthāpitāḥ sarve śivasenā prajīvitā || 114 ||
[Analyze grammar]

viṣṇunā śaṃkareṇāpi mṛtā ujjīvitāstadā |
śukreṇa dānavasenā sañjīvinyā ca jīvitā || 115 ||
[Analyze grammar]

cakrurmotsavaṃ tatropadārpaṇaṃ kṛtaṃ tataḥ |
sarve yayurhareḥ śālagrāmatā yatra bhāvinī || 116 ||
[Analyze grammar]

gaṇḍakīrūpatā yatra tulasyāścāpi bhāvinī |
tatastadrūpatāṃ prāptau pūjayitvā surādayaḥ || 117 ||
[Analyze grammar]

yayurvṛndrāvanaṃ ramyaṃ bhāvinī yatra tulasī |
yamunāyāṃ kṛtasnānāścakrustatra mahotsavam || 118 ||
[Analyze grammar]

tulasīvṛkṣarūpā ca jātā tatra harīcchayā |
kanyārūpā tathā divyā varārohā'pyabhūttadā || 119 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne tulasīvivāhākhyāne śaṃkaraṃ prati dānavavacanaṃ skaṃdarāhutatsenayoryuddhaṃ kālyāstrakṛtayuddhaṃ viprarūpaviṣṇukṛtadānavakavacabhikṣā śaṃkhacūḍarūpaviṣṇukṛtatulasīvīryādhānaṃ śaṃkhacūḍamaraṇaṃ tulasyāḥ pāṣāṇaśālagrāmo bhaveti viṣṇostugaṇḍakīnadī tulasīvṛkṣikā ca bhaveti śāpau yuddhe mṛtānāmujjīvanaṃ vṛndāvanāgamanaṃ cetyādinirūpaṇanāmā saptatriṃśadadhikatriśatatamo'dhyāyaḥ || 337 ||
[Analyze grammar]