Chapter 332

śrīnārāyaṇa uvāca |
śṛṇu lakṣmi pravakṣyāmi kathāṃ vṛndāsuyoginīm |
tulasī bhagavatpatnī vṛndāvane tu vṛkṣikā || 1 ||
[Analyze grammar]

jātā yathā tathā kālāntare viṣṇuvivāhitā |
yathāvṛttaṃ kathayāmi tava vṛttaṃ nibodha me || 2 ||
[Analyze grammar]

goloke mama dhāmnyevā'bhavad vṛttaṃ nibodha me |
yasya śravaṇamātreṇa sarvapāpāt pramucyate || 3 ||
[Analyze grammar]

lakṣmīḥ sarasvatī gaṃgā tisro bhāryā harerapi |
premṇā samāstāstiṣṭhanti satataṃ harisannidhau || 4 ||
[Analyze grammar]

gaṃgaikadā sakāmā sakaṭākṣā'paśyadacyutam |
punaḥ punastvapaśyatsarasvatyudvejanāya ca || 5 ||
[Analyze grammar]

kṛṣṇo jahāsa bahudhā mudhā gaṃgāṃ nirīkṣya vai |
reme sa gaṃgayā sārdhaṃ na tu sarasvatīṃ hariḥ || 6 ||
[Analyze grammar]

ramayāmāsa kāmena vyāptāṃ cecchāvatīmapi |
lakṣmīḥ kṣamāvatī naiva manute tāpamāntaram || 7 ||
[Analyze grammar]

sarasvatī caṃcalā ca na sehe tāpamāntaram |
lakṣmīstāṃ bodhayāmāsa sāntvayāmāsa duḥkhinīm || 8 ||
[Analyze grammar]

tathāpi krodhamāpannā vāṇī śāntā babhūva na |
kampitā kopavegena gaṃgāṃ sā''ha patiṃ ca vai || 9 ||
[Analyze grammar]

sarvāsu samatābuddhiḥ sadbhartuḥ kāminīḥ prati |
asadbhartustu viṣamā svārthinaśca khalasya ca || 10 ||
[Analyze grammar]

jñātaḥ snehaśca te gaṃgāṃ prati lakṣmīṃ prati dhruvaḥ |
mayi nyūno dṛśyate vai ramaṇe sahavāsane || 11 ||
[Analyze grammar]

niṣphalaṃ jīvanaṃ tasyā yā patyuḥ premavañcitā |
śrutvā tu bhagavān kṛṣṇastūṣṇīṃ gṛhād bahiryayau || 12 ||
[Analyze grammar]

gate nārāyaṇe gaṃgāmuvāca śabdadevatā |
re nirlajje sakāme tvaṃ hariṃ rodhayasi gṛhe || 13 ||
[Analyze grammar]

rūpayauvanagarvāḍhyāṃ tāḍayāmi phalaṃ labha |
kiṃ kariṣyati te kānto mama vai kāntavallabhe || 14 ||
[Analyze grammar]

iti nirbhartsya gaṃgāyā jighṛkṣuṃ keśamudyatām |
madhye gatvā tadā padmā vārayāmāsa vāṅmayīm || 15 ||
[Analyze grammar]

kruddhā padmāṃ praśaśāpa vṛkṣarūpā bhaviṣyasi |
gaṃgāṃ śaśāpa sakruddhā saridrūpā bhaviṣyasi || 16 ||
[Analyze grammar]

śāpaṃ śrutvā tu te devyau vijñāya viṣṇuceṣṭitam |
na śepatustu tāṃ vāṇīṃ gaṃgā padmāmuvāca ha || 17 ||
[Analyze grammar]

padme svabhāvataśceyaṃ caṃcalā vāgvilāsinī |
vācyā'vācye na jānāti śapāmyenāṃ kathaṃ na vai || 18 ||
[Analyze grammar]

saridrūpā tvaṃ ca vāṇī bhava vandhyā ṛtuṃ vinā |
arājasvalyamevā'syai sadā bhavatvakāmadam || 19 ||
[Analyze grammar]

iti śāpaṃ tu sā prāptā tadā sarasvatī priye |
etasminnantare tatra bhagavānājagāma ha || 20 ||
[Analyze grammar]

kalahaṃ sāntvayitvā ca duḥkhitāstā uvāca saḥ |
madicchayaiva saṃjātaṃ śokaṃ mā kuruta priyāḥ || 21 ||
[Analyze grammar]

lakṣmi tvaṃ kalayā yāhi śubhaṃ dharmadhvajagṛham |
ayonisaṃbhavā kanyā bhūtvā paścānmiṣeṇa vai || 22 ||
[Analyze grammar]

saṃbhūya tulasī paścācchaṃkhacūḍasya kāminī |
bhūtvā vivāha vidhinā matpatnī saṃbhaviṣyasi || 23 ||
[Analyze grammar]

kalayā tvaṃ saritpadmāvatīnāmnā bhaviṣyasi |
atha gaṃge saridrūpā pāpaghnī dehināṃ bhava || 24 ||
[Analyze grammar]

sāgarāṇāṃ tu mokṣārthaṃ sāgarasya priyā bhava |
bhava sarasvati brahmasadane brahmakāminī || 25 ||
[Analyze grammar]

sarasvatīnadīrūpā rājasvalyavivarjitā |
bhava mokṣakarī nityabrahmacaryaparā bhava || 26 ||
[Analyze grammar]

ahamante bhavatīnāṃ yogakṣemau yathāyatham |
vahiṣyāmi na mantavyau śokamohau mama priyāḥ || 27 ||
[Analyze grammar]

tisro bhāryāstrayaḥ śālāstrayo bhṛtyāśca bāndhavāḥ |
dhruvaṃ śubhaviruddhāśca na hyete maṃgalapradāḥ || 28 ||
[Analyze grammar]

strīpuṃvacca gṛhe yeṣāṃ gṛhiṇāṃ strīvaśaḥ pumān |
niṣphalaṃ janma vai teṣāmaśubhaṃ ca pade pade || 29 ||
[Analyze grammar]

mukhaduṣṭā yoniduṣṭā yasya bhāryā kalipriyā |
araṇye tena vastavyaṃ na striyā vai kadācana || 30 ||
[Analyze grammar]

varo vyāghrākule vāso na duṣṭapramadāgṛhe |
varā vyādhiviṣajvālā na duṣṭastrīmukhānalaḥ || 31 ||
[Analyze grammar]

puṃsastu strījitasyeha jīvitaṃ niṣphalaṃ bhavet |
bahvīnāṃ tu sapatnīnāṃ naikatra śreyasī sthitiḥ || 32 ||
[Analyze grammar]

ekabhāryaḥ sukhī kvāpi na tvanekavadhūvaraḥ |
jīvanmṛto'śucirduḥkhī bahubhāryāpatiḥ khalu || 33 ||
[Analyze grammar]

gaccha gaṃge śivasthānaṃ brahmasthānaṃ sarasvati |
atra tiṣṭhatu kamalā sarvaṃsahā mama kṛte || 34 ||
[Analyze grammar]

susādhyā yasya patnī ca suśīlā ca pativratā |
iha svargasukhaṃ tasya dharmo mokṣaḥ paratra ca || 35 ||
[Analyze grammar]

ityuktvā virarāmaiva kṛṣṇastā rurudustadā |
ūcuśca kampitāḥ sāśrunetrā viyogaduḥkhitāḥ || 36 ||
[Analyze grammar]

tisṛṣu nātha yad yogyaṃ prāyaścittaṃ pradehi tat |
prasādaṃ kuru tvasmabhyaṃ śāpāntaśca yathā bhavet || 37 ||
[Analyze grammar]

nadīrūpā vayaṃ gatvā drakṣyāmaste padaṃ kadā |
katikālaṃ sthitistatra prāpsyāmastvāṃ kadā punaḥ || 38 ||
[Analyze grammar]

lakṣmyahaṃ tulasīnāmnī dharmadhvajasutā satī |
vṛkṣarūpā tathā bhūtvā kadā prāpsyāmi te padam || 39 ||
[Analyze grammar]

gaṃgā sarasvatīśāpād gaṃgāśāpātsarasvatī |
śāpamukte kadā syātāṃ kadā vā tvāṃ labhiṣyataḥ || 40 ||
[Analyze grammar]

tasmāt kṣamasva he nātha mā preṣaya sthalāntaram |
ityuktvā kamalā kāntapadaṃ dhṛtvā ruroda ha || 41 ||
[Analyze grammar]

uvāca tāṃ prabhāṃ kṛtvā vakṣasi karuṇākaraḥ |
tisro'pi tvanyarūpaistu bhuvaṃ yāntu yathāvacaḥ || 42 ||
[Analyze grammar]

divyarūpāḥ sadā tvatra tiṣṭhantviti kṛpā mama |
yannimittāni kāryāṇi kartavyāni bhavanti vai || 43 ||
[Analyze grammar]

tāni nirvartya ca tato va āniṣye'tra vai svayam |
padmāvatī saridrūpā tulasīvṛkṣarūpiṇī || 44 ||
[Analyze grammar]

sarasvatī saridrūpā gacchantu bhuvanāntaram |
kaleścatuḥsahasre tu gate varṣe saridvarāḥ || 45 ||
[Analyze grammar]

yuge yuge bhūyo bhūyo madgehe tvāgamiṣyatha |
vipattiḥ sampadāṃ heturduḥkhaṃ sukhasya kāraṇam || 46 ||
[Analyze grammar]

vinā vipattermahimā sampadāṃ jāyate nahi |
pūrve vipat prabhoktavyā tena mūlyaṃ hi sampadām || 47 ||
[Analyze grammar]

pāpināṃ pāpanāśārthaṃ mayaitāḥ saritaḥ kṛtāḥ |
madbhaktānāṃ satāṃ snānād yuṣmatpāpavināśanam || 48 ||
[Analyze grammar]

asaṃkhyatīrthapūtatvaṃ madbhaktasparśadarśanāt |
madbhaktāḥ pṛthivīṃ sarvāṃ pāvayanti padakramaiḥ || 49 ||
[Analyze grammar]

madbhaktā yatra tiṣṭhanti kṣālayanti padāmbujam |
tatsthānaṃ tu mahātīrthaṃ tārakaṃ pāpināṃ bhavet || 50 ||
[Analyze grammar]

strīghno goghnaḥ kṛtaghnaśca brahmaghno gurutalpagaḥ |
vrataghno nāstikaḥ pūto bhavenmadbhaktasevanāt || 51 ||
[Analyze grammar]

viśvāsaghno dharmahantā mithyākalaṃkadastathā |
mitraghno nyāsakartā ca pūto madbhaktadarśanāt || 52 ||
[Analyze grammar]

adīkṣito'saṃskṛtaścā'śuciranyavinindakaḥ |
aniveditabhojyatra pūto madbhaktasevanāt || 53 ||
[Analyze grammar]

mātaraṃ pitaraṃ bhāryāṃ bhrātaraṃ tanayaṃ sutām |
guruṃ kulaṃ ca bhaginīṃ svāśritaṃ bāndhavādikam || 54 ||
[Analyze grammar]

śvaśrūṃ śvaśuraṃ vṛddhāṃśca patnīṃ puṣṇāti naiva yaḥ |
sa bhavet pātakī pūto madbhaktasparśadarśanāt || 55 ||
[Analyze grammar]

devaviprādidhanahṛt vikretā duhitustathā |
rasasāṃkaryakartāraḥ pūtā madbhaktasevanāt || 56 ||
[Analyze grammar]

teṣāṃ saṃgena saritaḥ pūtā bhavantu sarvadā |
teṣāṃ tu pādarajasā pūtā pādodakānmahī || 57 ||
[Analyze grammar]

punanti sarvatīrthāni satāṃ snānā'vagāhanāt |
teṣāṃ sandarśanaṃ sparśaṃ devā vāñcchanti sarvathā || 58 ||
[Analyze grammar]

lābhānāṃ paramo lābho vaiṣṇavānāṃ samāgamaḥ |
na tathā jalatīrthāni na tathā pārthivāḥ surāḥ || 59 ||
[Analyze grammar]

na vā taijasayajñādyā na vai prāṇasamādhayaḥ |
te punanti ciraṃ kāle viṣṇubhaktāḥ kṣaṇādaho || 60 ||
[Analyze grammar]

gurorvaktrād viṣṇumantro yasya karṇe viśed varaḥ |
vedavedāṃgaśāstrajño viṣṇubhakto'tisūttamaḥ || 61 ||
[Analyze grammar]

yasya janmani saṃjāte nārakā mokṣaṇaṃ gatāḥ |
bhavanti sa mahān bhakto viṣṇoḥ sarvottamottamaḥ || 62 ||
[Analyze grammar]

tiryagādiṣu janmasaṃgrahaṇenaiva jantavaḥ |
muktā bhavanti yadyogādviṣṇorbhakto mahottamaḥ || 63 ||
[Analyze grammar]

madbhaktiyukto matpūjāniyukto madguṇānvitaḥ |
madguṇaślāghanīyaśca manniviṣṭaśca manmayaḥ || 64 ||
[Analyze grammar]

madguṇaśrutimātreṇa sānanda pulakāñcitaḥ |
sagadgadaḥ sāśrunetraḥ svātmavismṛtireva ca || 65 ||
[Analyze grammar]

na vāñcchati sukhaṃ muktiṃ sālokyādi catuṣṭayam |
matpādasevanaṃ ye tu vāñcchatyeva divāniśam || 66 ||
[Analyze grammar]

etādṛśāśca me bhaktāḥ santaḥ sādhvyo madarthikāḥ |
pāvayiṣyanti sarito mā śokaṃ kuruta priyāḥ || 67 ||
[Analyze grammar]

yāntu sarvāśca tiṣṭhantu jalavṛkṣādirūpataḥ |
sarasvatī tadā divyā svayaṃ tasthau hareḥ pade || 68 ||
[Analyze grammar]

dvitīyena svarūpeṇa brāhmī jātā sarasvatī |
vāgadhiṣṭhātṛdevī sā vedhaḥpriyā'tra kīrtyate || 69 ||
[Analyze grammar]

atha jalasvarūpeṇa brahmaṇā noditā hi sā |
sarasvatī nadī jātā tīrtharūpā'tipāvanī || 70 ||
[Analyze grammar]

atha gaṃgā'ṇḍakṛcale divyarūpā jalātmikā |
brahmakamaṇḍalusthānā vāmanāṃguṣṭhasaṃspṛśā || 71 ||
[Analyze grammar]

bhagīrathasamānītā śarvajaṭordhvasaṃginī |
samājagāma kalayā sarillokasya pāvanī || 72 ||
[Analyze grammar]

divyarūpā tu yuvatī svayaṃ tasthau hareḥ pade |
padmā ca kalayā padmāvatī jātā śubhā''pagā || 73 ||
[Analyze grammar]

dvitīyena svarūpeṇa lakṣmīrdharmadhvajagṛhe |
putrī jātā tulasītināmnī kanyāsvarūpiṇī || 74 ||
[Analyze grammar]

divyarūpā tu tatraiva lakṣmīrvasati nityaśaḥ |
ityevaṃ kathitaṃ lakṣmi prāgbhavaṃ tava ceṣṭitam || 75 ||
[Analyze grammar]

yā vṛndā sā ramā lakṣmīryā lakṣmīḥ sā ramā ca sā |
yā ramā sā vṛndālakṣmīryā lakṣmīḥ sā ca vṛndikā || 76 ||
[Analyze grammar]

vṛndāvane vṛkṣarūpā'bhavad ramaiva saiva sā |
gaṇeśenā'tha saṃśaptā śaṃkhacūḍapriyā'bhavat || 77 ||
[Analyze grammar]

iti śrīlakṣmīnārāyaṇīyasahitāyāṃ prathame kṛtayugasantāne tulasāvivāhākhyāne goloke śrīkṛṣṇapatnīnāṃ ratinimittakaparasparaśāpena dvedhā bhūtvā gaṃgāsarasvatīlakṣmīnāṃ saridrūpatā lakṣmyāstulasīrūpatetyādinirūpaṇanāmā dvātriṃśadadhikadviśatatamo'dhyāyaḥ || 332 ||
[Analyze grammar]