Chapter 330

śrīnārāyaṇa uvāca |
śṛṇu lakṣmi tato dūto gatvā śīghraṃ jalaṃdharam |
uvāca vṛndājvalanaṃ śrutvā ruroda vārdhijaḥ || 1 ||
[Analyze grammar]

yena yat kriyate karma tathā tenaiva bhujyate |
mayā tu vañcitā gaurī hariṇā vañcitā vadhūḥ || 2 ||
[Analyze grammar]

svasṛpatiṃ gṛhe naiva sthāpayetsarvathā janaḥ |
dhanadārādikaṃ sarvaṃ sa gṛhṇāti śanaiḥ śanaiḥ || 3 ||
[Analyze grammar]

gṛhe sthitasya jāmāturviśvasennaiva buddhimān |
nūnaṃ tasmai pradatvā ca kanyakāṃ visṛjed budhaḥ || 4 ||
[Analyze grammar]

māyāmāśritya me patnī viṣṇunā vañcitā dhruvam |
kiṃ prayāmi hariṃ jetumathavā haramulbaṇam || 5 ||
[Analyze grammar]

yadi yāmi hariṃ jetuṃ haraḥ pṛṣṭhe haniṣyati |
upasthitaṃ parityajyā'nyā'nugo vai vinaśyati || 6 ||
[Analyze grammar]

ubhau me subalau śatrū jayaḥ sandigdhatāṃ gataḥ |
ardhaḥ parājitaścā'haṃ yā patnī bhasmatāṃ gatā || 7 ||
[Analyze grammar]

tasmāt paśupatiṃ jitvā paścād viṣṇuṃ prayāmi vai |
śaṃbhuṃ jitvā bhaviṣyāmi loke sarveśvareśvaraḥ || 8 ||
[Analyze grammar]

athavā śivanārācairmṛto yāsyāmi tatpadam |
iti vicārya tatraiva yayau yoddhuṃ pinākinā || 9 ||
[Analyze grammar]

raṇe jālaṃdharo'paśyat kabandhacayabhīṣaṇam |
śavaruciramāṃsaughamajjamedo'sthidurgamam || 10 ||
[Analyze grammar]

raṇe vilokayāmāsa vṛṣasthaṃ pārvatīpatim |
bāṇāṃstīkṣṇānatisthūlāṃllohastaṃbhāṃstathā bahūn || 11 ||
[Analyze grammar]

mumoca yudhi durdharṣo varṣanmegha ivāgame |
tato rudreṇa raudraiśca śaraughaistāḍito ruṣā || 12 ||
[Analyze grammar]

rudrabāṇaistadā tasya kavacaṃ bhuvi pātitam |
śarīraṃ kīlitaṃ bāṇaiḥ kiṃśukavarṇatāṃ gataḥ || 13 ||
[Analyze grammar]

rudhiraṃ bahu susrāva jālaṃdharaśarīrataḥ |
devāstu sabalā jātā dānavāstu cakampire || 14 ||
[Analyze grammar]

harastīkṣṇaśareṇāśu vivyādha hṛdi sindhujam |
papāta śarabhinnāṃgo mūrchitaḥ sindhujo'bhavat || 15 ||
[Analyze grammar]

tāvad rudreṇa nārācairhatā jālaṃdharī camūḥ |
jalaṃdharastu manasā śukraṃ sasmāra cātyati || 16 ||
[Analyze grammar]

sa tu kṛtyāvaśe cādrigahvare paratantrakaḥ |
āgantuṃ nāśakattatra raṇo yatra pravartate || 17 ||
[Analyze grammar]

jalaṃdharaḥ śanairmūrchāṃ parityajyotthito'bhavat |
śīghraṃ māyāmayīṃ gaurīṃ vidadhe tādṛśīṃ śubhām || 18 ||
[Analyze grammar]

rathopari gatāṃ baddhāṃ sā''krandāṃ pārvatīṃ śivaḥ |
niśuṃbhaśuṃbhadaityaiśca vadhyamānāṃ dadarśa ha || 19 ||
[Analyze grammar]

gaurīṃ tathāvidhāṃ dṛṣṭvā śivo'tyudvignamānasaḥ |
śithilāṃgo viṣaṇṇātmā hyavāṅmukhastadā'bhavat || 20 ||
[Analyze grammar]

tato jaṃladharo vegāt tribhirvivyādha sāyakaiḥ |
āpuṃkhamagnaistaṃ rudraṃ śirasyurasi codare || 21 ||
[Analyze grammar]

tataḥ paramasaṃkruddho rudro raudravapurdharaḥ |
pralayānalavad ghoro babhūva śaṃkarastadā || 22 ||
[Analyze grammar]

tāvacchuṃbho rathāttāṃ tu vyomni māyikapārvatīm |
nītvā mumoca śūlāgre śūlopari papāta sā || 23 ||
[Analyze grammar]

rudatī śaṃkarasyā'gre śūlaviddhā mamāra sā |
māyāgaurīṃ mṛtāṃ dṛṣṭvā śokamohapluto haraḥ || 24 ||
[Analyze grammar]

śaśāpa śuṃbhapramukhān gaurī yuṣmān haniṣyati |
caṇḍī bhūtvā ca tān sarvān jaghāna samarāṃgaṇe || 25 ||
[Analyze grammar]

brahmā tatra samāgatyovāca śrīśaṃkaraṃ tadā |
jālaṃdhareṇa racitā māyeyaṃ pārvatī hara || 26 ||
[Analyze grammar]

satyā tu pārvatī mayā viṣṇunā cāpi rakṣitā |
kamalasyā''ntare kośe tiṣṭhati sūkṣmatāṃ gatā || 27 ||
[Analyze grammar]

yudhyasya vairinivahaṃ jahi māyāṃ tu pārvatīm |
matveti brahmaṇo vākyaṃ mahāvijño maheśvaraḥ || 28 ||
[Analyze grammar]

jñātvā tāṃ dānavīṃ māyāṃ mumoca mahatīṃ śilām |
babhañja kapaṭāṃ mūrtiṃ cūrṇāṃ cakāra tatkṣaṇam || 29 ||
[Analyze grammar]

atha māyāparityaktaṃ śarvamālokya sindhujaḥ |
anyadāviścakārā''śu bhṛśaṃ māyāmahābalam || 30 ||
[Analyze grammar]

jālaṃdharo'yutabhujo babhūvāśmadrumāyudhaḥ |
rurodha samare śaṃbhuṃ kruddho'straśastravān muhuḥ || 31 ||
[Analyze grammar]

uvāca balavadvākyaṃ tiraskurvan haraṃ tadā |
paśya śaṃkara kīdṛṅame balaṃ jānāsi naiva kim || 32 ||
[Analyze grammar]

ko maheśvara madbāṇairabhedyo bhuvanatraye |
bālabhāvena viṣṇustu viṣṇurgṛhe'bhirakṣitaḥ || 33 ||
[Analyze grammar]

tapasā ca svayaṃ brahmā toṣito varadānadaḥ |
indrāgniyamavitteśā vāyuvārīśvarādayaḥ || 34 ||
[Analyze grammar]

madadhīnīkṛtāḥ sarve vāhānyāhṛtavānaham |
parvatā dharṣitāḥ sarve niruddhā līlayā''pagāḥ || 35 ||
[Analyze grammar]

divaukaso vai vijitāḥ subaddhaṃ vaḍavāmukham |
airāvatādayaḥ kṣiptāḥ kṣiptaścendro rathā'nvitaḥ || 36 ||
[Analyze grammar]

garuḍo'pi mayā baddho devyo nītā gṛhaṃ mama |
māṃ na jānāsi rudra tvaṃ trailokyajayakāriṇam || 37 ||
[Analyze grammar]

iti śrutvā vijahāsa mahādevaḥ punaḥ punaḥ |
jalaṃdharo jaghānāśu hasantaṃ viśikhaiḥ śivam || 38 ||
[Analyze grammar]

tataḥ śūlena nihato rudreṇorasi dānavaḥ |
dānavasya mukhāttatra niḥsasāra jvaraḥ paraḥ || 39 ||
[Analyze grammar]

siṃhamukho narākāro jambho'bhyadhāvadīśvaram |
īśo huṃkāramakarot tatra śarabha ābabhau || 40 ||
[Analyze grammar]

śarabheṇa hataḥ siṃho dānavo vṛṣabhaṃ tadā |
balātpucche gṛhītvā ca bhrāmayāmāsa bhūtale || 41 ||
[Analyze grammar]

tatastriśūlamatyugraṃ mumoca girijāpatiḥ |
hastenādāya daityastaṃ samadhāvaddharaṃ prati || 42 ||
[Analyze grammar]

tato'yutabhujo daityo babandha samare śivam |
śivaḥ svasya kṛpāṇena ciccheda karakānanam || 42 ||
[Analyze grammar]

chinnahasto'pi yuyudhe tadā tuṣṭo maheśvaraḥ |
uvāca varadānārthaṃ daityo vavre harāttadā || 44 ||
[Analyze grammar]

śīghraṃ prayaccha me siddhiṃ mahyaṃ dehyātmanaḥ padam |
tathāstviti haraḥ prāha jagrāhānalapūritam || 45 ||
[Analyze grammar]

cakraṃ sudarśanaṃ sūryakoṭitulyaparākramam |
jalaṃdharavināśāya cikṣepa bhagavān haraḥ || 46 ||
[Analyze grammar]

jahāra tacchiro vegānmahadāyatalocanam |
dvidhā papāta taddeho hyaṃjanādririvācalaḥ || 47 ||
[Analyze grammar]

tasya kaṇṭhāt samudbhūtā daityāḥ śatasahasraśaḥ |
te hatāstena cakreṇa jālaṃdharasamā yudhi || 48 ||
[Analyze grammar]

jālaṃdharakabandhaṃ tannanarta rudhirāruṇam |
medasā sindhuputrasya pūritā sakalā mahī || 49 ||
[Analyze grammar]

tasya raudreṇa raktena sampūrṇamabhavajjagat |
śoṇitaṃ yatra śuṣkaṃ tajjātaṃ vai śoṇitaṃ puram || 50 ||
[Analyze grammar]

atha māṃsacayān brāhmī māheśvarī ca vaiṣṇavī |
vārāhī caiva māhendrī kaumārī ceti yāśca yāḥ || 51 ||
[Analyze grammar]

yoginyastā sarvadikṣu nītvā'kurvan vināśitān |
tasya dehādbahiryātaṃ tejo lilye hare tadā || 52 ||
[Analyze grammar]

yoginīnāṃ gaṇā jālaṃdharasyā'danti māṃsakam |
pibantyasṛk tenādyāpi nottiṣṭhati raṇe hataḥ || 53 ||
[Analyze grammar]

jalaṃdharaṃ hataṃ dṛṣṭvā surāḥ prasannatāṃ gatāḥ |
abhūvan sādhuvādāṃśca devasiddhamunīśvarāḥ || 54 ||
[Analyze grammar]

puṣpavṛṣṭiṃ prakurvāṇāḥ śivakīrtiṃ jaguḥ śubhām |
devaśca nanṛtuḥ paryo'psarobhiścābhipūjitāḥ || 55 ||
[Analyze grammar]

praseduśca diśaḥ sarvā vibandhanāḥ surādayaḥ |
sūryacandrajaleśādyā nirmuktāstasya bandhanāt || 56 ||
[Analyze grammar]

viṣṇunā ca hareṇāpi brahmaṇā'dhikṛtāḥ punaḥ |
teṣāṃ ratnāni tebhyaśca pradattāni sureśvaraiḥ || 57 ||
[Analyze grammar]

kṛtyābhiḥ śukra utsṛṣṭo yayau sthānaṃ svakaṃ punaḥ |
devarājyamabhūd daityanāśordhvaṃ ca pratisthalam || 58 ||
[Analyze grammar]

bubhujuryajñabhāgāṃśca devā lokeśatāṃ gatāḥ |
devyaścānye surāścāpi svasvasthānaṃ sukhaṃ sthitāḥ || 59 ||
[Analyze grammar]

droṇācalaṃ samudrāśca bahirānīya jīvanīm |
oṣadhiṃ prāpya devānāṃ gururbṛhaspatistadā || 60 ||
[Analyze grammar]

yatra vai pramathāḥ śaṃbhugaṇā naṣṭā yudhi sthale |
tatra prayojayāmāsā'sthimāṃsaśavaprabhṛtau || 61 ||
[Analyze grammar]

sarve rudragaṇā yuddhe hatāste jīvitāḥ punaḥ |
niravaśeṣataḥ sarve kailāsaṃ prayayuḥ sukham || 62 ||
[Analyze grammar]

parvato'pi yathā''sītprāk tatsthale lokahetave |
sthāpito viṣṇuvāhena kāle yogyaṃ prajāyate || 63 ||
[Analyze grammar]

sarvo'pi bhuṃkte svaṃ karma lakṣmi tad viddhyasaṃśayam |
yāvad deho'sti karmāṇi sukhaduḥkhādi vartate || 64 ||
[Analyze grammar]

itihāsamimaṃ śrutvā na duḥkhaiḥ paribhūyate |
kleśā dūre bhavantyasya jātā api punaḥ punaḥ || 65 ||
[Analyze grammar]

yādṛśo yasya saṃyogo bandhanaṃ cāpi tādṛśam |
vṛndāyāṃ kṛtayogena viṣṇoścāpi subandhanam || 66 ||
[Analyze grammar]

lokarītyā'bhavat sarvaṃ śṛṇu lakṣmi tataḥ punaḥ |
vṛndayā mohito viṣṇurvṛndāyāḥ prāptaye punaḥ || 67 ||
[Analyze grammar]

vṛndāmṛtisthalaṃ naivā'tyajaddevādibodhitaḥ |
vṛndāpi taṃ dhyāyamānā satī jātā hyataḥ khalu || 68 ||
[Analyze grammar]

viṣṇuṃ vāñchati tatraiva punarvṛndāvane punaḥ |
sūkṣmarūpeṇa viṣṇorvai śarīrāttu bahirbahiḥ || 69 ||
[Analyze grammar]

prākaṭyaṃ yāti vijane punarviṣṇau vilīyate |
viṣṇoḥ śaktistrividhā yā gaurī lakṣmīḥ ramā tathā || 70 ||
[Analyze grammar]

dṛśyā'dṛśyasvarūpiṇyo vartante yā harau sadā |
tābhirdṛṣṭā haristatra vṛndayā cāti mohitaḥ || 71 ||
[Analyze grammar]

vṛndā cāpi patidhvaṃse patyantaraṃ samicchati |
viṣṇunāṃgīkṛtā ceyaṃ viṣṇumādātumicchati || 72 ||
[Analyze grammar]

nirjane sā samūrtā vai bhūtvā viṣṇuṃ prasevate |
viṣṇuṃ prāha tvayā yasmādaṃgīkṛtā'smi sarvathā || 73 ||
[Analyze grammar]

tasmād gṛhāṇa hastaṃ me vivāhavidhinā prabho |
pūrvaṃ golokadhāmasthā paścājjalaṃdharapriyā || 74 ||
[Analyze grammar]

punastvayā kṛtā naijā tasmād vaha nijāṃ tu mām |
viṣṇuḥ prāha bhava kedārasya putrī vahāmi tām || 75 ||
[Analyze grammar]

tadvai vilokitaṃ dṛṣṭaṃ gauryā lakṣmyā ramākhyayā |
tatastābhiśca śaktibhirdattāni tatra vai tadā || 76 ||
[Analyze grammar]

bījāni devatābhyaśca kṣiptāni tatsthale ca taiḥ |
kṣiptebhyastatra bījebhyo vṛkṣāstrayo'bhavan śubhāḥ || 77 ||
[Analyze grammar]

dhātrī ca mālatī caiva tulasī ceti te trayaḥ |
gauryaṃśā sā smṛtā dhātrī lakṣmyaṃśā mālatī smṛtā || 78 ||
[Analyze grammar]

ramā vṛndā tu tulasī samabhūd vṛkṣarūpiṇī |
tāśca nāryo'bhavaṃstatra divyarūpadharā api || 79 ||
[Analyze grammar]

sustrīrūpivanaspatī ndṛṣṭvā viṣṇuḥ praharṣitaḥ |
viṣṇuṃ dṛṣṭvā ca tulasī vṛndā'pyatipraharṣitā || 80 ||
[Analyze grammar]

evaṃ parasparaṃ sā sa rāgeṇaiva vyalokayat |
taṃ viṣṇuṃ tulasī dhātrī rāgeṇaiva vyalokayat || 81 ||
[Analyze grammar]

tvayā lakṣmyā tadā bījamīrṣyayaiva samarpitam |
tasmāttadudbhavā nārī viṣṇāvīrṣyāyutā'bhavat || 82 ||
[Analyze grammar]

ataḥ barbarītyākhyāmavāpa cātigarhitām |
dhātrītulasyau tadrāgād viṣṇuprītiprade sadā || 83 ||
[Analyze grammar]

abhavatāṃ ca te nītvā viṣṇurvaikuṇṭhamāptavān |
tatraiva te vivāhyaiva viṣṇurvṛndāyuto'bhavat || 84 ||
[Analyze grammar]

kedārasya sutā bhūtvā vṛndā viṣṇumavāpa ha |
vṛndayā grathitā tatra vane mālā manoharā || 85 ||
[Analyze grammar]

mandārapārijātānāṃ puṣpāṇāṃ varavarṇinī |
devyo devāḥ samāyātā śubhe vṛndāvane sthale || 86 ||
[Analyze grammar]

maṇḍapaṃ kārayitvā ca yajñakuṇḍaṃ vidhāya ca |
vahniṃ prajvālya tatraiva homaṃ kṛtvā vidhānataḥ || 87 ||
[Analyze grammar]

dehaśuddhiṃ tulasyāśca kārayitvā ca maṇḍanam |
vastrābharaṇabhūṣādi sugandhasnānamaṃgalam || 88 ||
[Analyze grammar]

kārayitvā tu tulasīṃ bhojayāmāsa bhāvataḥ |
viṣṇuṃ śṛṃgārayitvā ca brahmādyā devakoṭayaḥ || 89 ||
[Analyze grammar]

yānavāhanayuktāśca devībhiranuyāyinaḥ |
sagāyakagaṇayuktāḥ savāditraninādanāḥ || 90 ||
[Analyze grammar]

sadivyavāhanāḥ sarve yātā gauryā gṛhaṃ tu te |
gaurīlakṣmīramādyāśca viṣṇuṃ pupūjurādarāt || 91 ||
[Analyze grammar]

lokācāraṃ vidhāyaiva maṇḍapā'ntarnyaveśayan |
tatrānīya navāṃ vṛndāṃ kanyakāṃ yuvatīṃ tu tāḥ || 92 ||
[Analyze grammar]

homaṃ prakārayitvaiva pradakṣiṇaṃ vidhāpya ca |
analaṃ taṃ namaskṛtya bṛhaspatistayordvayoḥ || 93 ||
[Analyze grammar]

kare karaṃ pradatvaiva varamālāṃ nidhāpya ca |
vṛndādānaṃ kṛtavāṃśca tadā gauryādyanujñayā || 94 ||
[Analyze grammar]

jayaśabdāśca devānāṃ devīnāṃ gītamaṃgalam |
puṣpavṛṣṭivṛddhivāco jātāstatrobhayoḥ kṛte || 95 ||
[Analyze grammar]

yautakāni bhojanāni pradattāni tataśca te |
vṛndāvanād yayuḥ sarve svasvadeśaṃ surādayaḥ || 96 ||
[Analyze grammar]

svargyaṃ pāpaharaṃ puṇyaṃ śokamohavināśanam |
ākhyānametadanaghaṃ śrutvā sajjanahṛtpriyam || 97 ||
[Analyze grammar]

brāhmaṇo jñānamāpnoti kṣatriyo rājyavān bhavet |
vaiśyastu sampadā yuktaḥ śrutvā śūdraḥ sukhī bhavet || 98 ||
[Analyze grammar]

hiraṇyatilavastrādyairdhenubhūmipradānakaiḥ |
santoṣayed vācakaṃ tu tasmiṃstuṣṭe phalaṃ bhavet || 99 ||
[Analyze grammar]

devatāśca prasīdeyurarcite vācake gurau |
annadānaṃ pradāyā'tha brāhmaṇādīn prapūjayet || 100 ||
[Analyze grammar]

jāyate vijayī nityaṃ putrapautrasamṛddhimān |
iti vyājena te lakṣmi tulasyutpattikāraṇam || 101 ||
[Analyze grammar]

prakathitaṃ ca tatchrutvā labhate puṇyamuttamam |
svagṛhe ropitā cāpi tulasī pāpanāśinī || 101 ||
[Analyze grammar]

darśanād brahmahatyādi naśyati nātra saṃśayaḥ |
vaiśākhe kārtike māghe tulasīṃ bahu pūjayet || 102 ||
[Analyze grammar]

tulasyā pūjayed viṣṇuṃ sahasramañjarīstathā |
arpayed viṣṇave prātaḥ koṭiyajñaphalaṃ bhavet || 104 ||
[Analyze grammar]

yatra vṛndā ca haritā tulasī śyāmalaprabhā |
jātā vṛndāvane tatra viṣṇuścātīva mohitaḥ || 105 ||
[Analyze grammar]

vāsaṃ cakāra mohaṃ ca naiva tatyāja keśavaḥ |
tadā tasyā''tmanastisraḥ śaktayaḥ prakaṭīkṛtāḥ || 106 ||
[Analyze grammar]

mahādbhutaiḥ svatejobhirbhāsayanti digambaram |
tābhirbījāni tatraiva nyastāni svāṃśatastadā || 107 ||
[Analyze grammar]

vṛndāvane tadā dhātrī mālatī tulasī tathā |
abhavan vṛkṣarūpiṇyastā dṛṣṭvā tatra keśavaḥ || 108 ||
[Analyze grammar]

mumoha tasmiṃstulasī dhātrī ca rāgamāpatuḥ |
dhātrī tulasyau tadrāgāt tasya prītipade sadā || 109 ||
[Analyze grammar]

tato viṣṇuśca te nītvā vaikuṇṭhamagamat punaḥ |
lakṣmīścerṣyākarī tatra barbarīti viyojitā || 110 ||
[Analyze grammar]

ya idaṃ hi paṭhennityaṃ pāṭhayecchṛṇuyāttathā |
sadgatiḥ svargavāsaśca mokṣastasya tathā bhavet || 111 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne jālaṃdharavṛndākhyāne jālaṃdhareṇa māyayā kapaṭagaurīnāśadarśanaṃ māyayā yuddhaṃ śaṃkaracakradvārā jālaṃdharanāśaḥ vṛndāyā viṣṇuto varaṇayāñcā vṛndāyāḥ kedārarājaputrītvaṃ viṣṇunā tulasīvivāhaḥ vṛndāvane gaurīlakṣmīramāṃśā |
dhātrīmālatīvṛndāvṛkṣarūpāḥ lakṣmyā barbarītvaṃ cetyādinirūpaṇanāmā triṃśatyadhikatriśatatamo'dhyāyaḥ || 330 ||
[Analyze grammar]