Chapter 313

| śrīnārāyaṇa uvāca |
śrūyatāṃ ca tvayā lakṣmi śrīpuruṣottamāśritā |
kathā sampatpradā saukhyapradā sarveṣṭadā sadā || 1 ||
[Analyze grammar]

pūrve kalpe brahmaṇo vai marudeśe'tidhārmikaḥ |
dhanāḍhyo brāhmaṇo nāmnā devayavo babhūva ha || 2 ||
[Analyze grammar]

tasya patnī devajuṣṭā'pyāsītpativratā śubhā |
tayorbhṛtyo girikṣito bhṛtyā cādridyutistathā || 3 ||
[Analyze grammar]

babhūvatuḥ sadā kṛṣṇanārāyaṇaparāyaṇau |
svāmikāryaṃ vidhāyaiva kṛṣṇacaryā pracakratuḥ || 4 ||
[Analyze grammar]

brahmakarmaparā nityaṃ ṣaṭkarmādiparāyaṇāḥ |
catvāraste babhūvurvai kṛṣṇabhaktiparāyaṇāḥ || 5 ||
[Analyze grammar]

brāhmaṇau svāminau cāpi viprāṇyau sevike ca te |
haryarthaṃ manasā vāṇyā tanvā ninyuḥ kṣaṇātkṣaṇam || 6 ||
[Analyze grammar]

marudeśādhipatinā rājñā devasakhena vai |
nagaryāṃ bhāsvatīnāmnyāṃ kāritaṃ viṣṇumandiram || 7 ||
[Analyze grammar]

saptaśikharasaṃśobhaṃ tryagragolamanoharam |
svarṇastaṃbhāṃganaramyaṃ triprākāramanoharam || 8 ||
[Analyze grammar]

madhye tu śikharā'ntaḥsthasiṃhāsane caturbhujaḥ |
kṛṣṇanārāyaṇo viṣṇurlakṣmīrādhāsamanvitaḥ || 9 ||
[Analyze grammar]

dakṣaśikharagarbheṣu śrīprabhāpārvatītrikam |
svasvadāsīsamājuṣṭaṃ pratyekaṃ rājate śubham || 10 ||
[Analyze grammar]

vāmaśikharagarbheṣu māṇikyā lalitā jayā |
svasvadāsīsamājuṣṭā pratyekaṃ rājate triṣu || 11 ||
[Analyze grammar]

tatsevāyā niyuktāste catvāro vai pṛthak pṛthak |
devayavo madhyabhāge pūjāṃ karoti sarvadā || 12 ||
[Analyze grammar]

girikṣito bahiścandanādikāryakaro'bhavat |
devajuṣṭā dakṣabhāge pārvatīśrīprabhārcanam || 13 ||
[Analyze grammar]

adridyutirvāmabhāge māṇikyādyarcanādikam |
karotyeva vibhāgena rājā dadāti vetanam || 14 ||
[Analyze grammar]

bhavanaṃ vāsayogyaṃ ca jīvikāṃ vāṭikādikām |
vārṣikaṃ ca tathā dravyaṃ tathā svarṇasahasrakam || 15 ||
[Analyze grammar]

vastrānnabhūṣaṇādīni dadāti cotsave'dhikam |
devapūjāsunaivedyādikaṃ dadāti bhūpatiḥ || 16 ||
[Analyze grammar]

evaṃ vai vartamānena vipradevayavena vai |
lobhākṛṣṭena manasā gṛhyate ḍhabbukaṃ kvacit || 17 ||
[Analyze grammar]

kvacittu rūpyakaṃ svarṇamudrā yātrālubhiḥ khalu |
devāyā'rpitamityetaddevadravyaṃ mumoṣa saḥ || 18 ||
[Analyze grammar]

tena cauryaduritena devadhanena miśritam |
devayavasya saddravyaṃ dūṣitaṃ tvāsa cañcalam || 19 ||
[Analyze grammar]

iyeṣa gantumanyatra caṃcalā hi śriyo matāḥ |
devadravyānvitaṃ yattat samūlaṃ nāśameti vai || 20 ||
[Analyze grammar]

yadyapi nyāyalabdhaṃ svaṃ devadravyaspṛśiṃ gatam |
dūṣitaṃ tad vinaśyedvai lakṣaṃ nītvā pragacchati || 21 ||
[Analyze grammar]

annaṃ cāpi surānnādimiśritaṃ naśyati drutam |
vastraṃ devāmbarayuktaṃ nāśayatyeva dehinam || 22 ||
[Analyze grammar]

vastumātraṃ cauryalabdhaṃ yanna prasādarūpataḥ |
pūjakācāryagurubhirdattaṃ devasvarūpi tat || 23 ||
[Analyze grammar]

yatra kṣiptaṃ tu tat sarva mūlīyamapi dahyati |
cullīkāṣṭhā'nalo'raṇyagato'raṇyaṃ pradahyati || 24 ||
[Analyze grammar]

gavāmannaṃ bhikṣukānnaṃ viprānnaṃ pramadānnakam |
anāthānnaṃ nirādhārānnamagniḥ kupitaḥ sa vai || 25 ||
[Analyze grammar]

brahmasvaṃ vidhavāsvaṃ ca devasvaṃ bhikṣunāṇakam |
anāḍhyasvaṃ mahānagniḥ pated yatra sa dahyati || 26 ||
[Analyze grammar]

devapūjākṛtā kiñcitphalaṃ cānnaṃ ca ḍhabbukam |
na grāhyaṃ devatātvaṃ ced yato dahati tatkulam || 27 ||
[Analyze grammar]

pūrvaiḥ pūrvatamaiścāpi muṣitaṃ devanāṇakam |
tadevānyadapi nyāyyaṃ muṣṇāti muṣakasya vai || 28 ||
[Analyze grammar]

devayavo'pi devasya mandire harisannidhau |
yātrālubhistvarpitaṃ ca prakṣiptaṃ ḍhabbukādikam || 29 ||
[Analyze grammar]

puṣṇātyeva svake dravye nikṣipati ca vṛddhaye |
yena kena nimittena tasya nāśaṃ upāgataḥ || 30 ||
[Analyze grammar]

marukosalayoḥ rājñoryuddhaṃ ghoraṃ babhūva ha |
kosalasya tu sainyairvai vijito marubhūpatiḥ || 31 ||
[Analyze grammar]

sainyaistu nagarī sarvā bhāsvatī dhvaṃsitā tadā |
dhanāḍhyānāṃ nāṇakāni hṛtāni vai prasahya taiḥ || 32 ||
[Analyze grammar]

nṛpamānyaṃ dvijaṃ jñātvā sarvaṃ tasya hṛtaṃ dhanam |
niṣkāsitastataḥ sthānāt sabhāryābhṛtyamātrakaḥ || 33 ||
[Analyze grammar]

yayau sa raivatagirau hiraṇyāyāstaṭe śubhe |
somanāthasya nikaṣāṃ vane mūlaphalāśanaḥ || 34 ||
[Analyze grammar]

nirgamayatyahānyeva paryaṭan bhṛtyadārayuk |
sarasvatīṃ nadī prācīṃ gatvā pippalaśākhinam || 35 ||
[Analyze grammar]

niṣasāda jalaṃ pītvā viśaśrāma kṣaṇaṃ tadā |
sasmāra ca hariṃ kṛṣṇanārāyaṇaṃ jagadgurum || 36 ||
[Analyze grammar]

cintayāmāsuranyonyaṃ śatrujanyaṃ parābhavam |
girikṣitastadā bhṛtyaḥ prāha devayavaṃ dvijam || 37 ||
[Analyze grammar]

yasya vai pūjanaṃ samyak kṛtaṃ tenāpi śārṅgiṇā |
rakṣitā na vayaṃ śatrorupadrave'pi sevakāḥ || 38 ||
[Analyze grammar]

sarvasvaṃ vai hṛtaṃ sainyairmandirasyāpi kāṃcanam |
tatrāpi rakṣaṇaṃ naiva kṛtaṃ śrīviṣṇunā tadā || 39 ||
[Analyze grammar]

parasya rakṣaṇaṃ kasmāt kuryād yaḥ svaṃ na rakṣayet |
ityukte brāhmaṇo devayavaḥ prāha svabhṛtyakam || 40 ||
[Analyze grammar]

maivaṃ vada tathā nāsti yathā tvaṃ vadasi dvija |
rakṣati śrīhariḥ sarvān jīvato rakṣitā vayam || 41 ||
[Analyze grammar]

rakṣā kṛtā caturṇāṃ vai yajjīvāmo'tra saṃyutāḥ |
devadravyāpahārasya pātakaṃ tvantavarjitam || 42 ||
[Analyze grammar]

tatkṛtaṃ vai mayā tacca dravyaṃ svadravyamiśritam |
tena sarvaṃ gato no vai dravyaṃ matpātakena vai || 43 ||
[Analyze grammar]

devadravyaṃ ca devānnaṃ yasya kośe hi jīryati |
tasya sarvasvanāśāya phalaṃ bhavati niścitam || 44 ||
[Analyze grammar]

sarvasvaṃ tadgataṃ yogyaṃ phalamatraiva cārjitam |
yamaloko'pi bhoktavyo hyadhunā śiṣyate'pi hi || 45 ||
[Analyze grammar]

tathāpi sevanasyaitatphalaṃ rakṣati no'tra vai |
yadvayaṃ ghātitā naiva rakṣitāḥ paramātmanā || 46 ||
[Analyze grammar]

devadravyaṃ na bhoktavyaṃ patraṃ puṣpaṃ phalādikam |
vastraṃ yānaṃ gṛhaṃ pātraṃ bhoktavyaṃ naiva sarvathā || 47 ||
[Analyze grammar]

anyāyenāpi lobhenā'jñānenāpi prasahya vā |
bhuktaṃ yadi tadā tattu bhokturnāśakaraṃ bhavet || 48 ||
[Analyze grammar]

tadvayaṃ nāśitā naiva kṛpā seyaṃ harerdvija |
atha yatnaḥ prakartavyo yathā yamo na saṃcaret || 49 ||
[Analyze grammar]

prapannānāṃ haristrātā yamastatra na saṃcaret |
prapattau ṣaḍvidhatvaṃ vai nārāyaṇena darśitam || 50 ||
[Analyze grammar]

viśvāso varaṇaṃ nyāsaḥ kārpaṇyaṃ ca sthirā matiḥ |
ānukūlyasya saṃkalpaḥ prātikūlyavivarjanam || 51 ||
[Analyze grammar]

tatra harirmadarthaṃ yat karoti sakalaṃ tu tat |
madarthaṃ yogyamevā'sti tvevaṃ viśvāsamācaret || 52 ||
[Analyze grammar]

tvaṃ mamāsi tavāhaṃ cetyevaṃ varaṇamarthayet |
sarvasvo'haṃ pādayoste nyasto'smi nyāsamācaret || 53 ||
[Analyze grammar]

satyapi sārvabhaume'pi kārpaṇyaṃ dāsavaccaret |
sarvanāśe'pi khedaṃ na kuryānmatiṃ sthirāṃ caret || 54 ||
[Analyze grammar]

tava toṣo mama toṣo nānyatheti sukalpayet |
ityevaṃ tasya yadramyaṃ ramyameva mamāpi tat || 55 ||
[Analyze grammar]

nānyaditi prakuryādvai matvā bhaktiṃ sadā hareḥ |
aparādhān kṣamāpyaiva so'smān saṃtārayiṣyati || 56 ||
[Analyze grammar]

udarārthaṃ pralobhena kṛtaṃ cauryādi pātakam |
tatsarvaṃ bhagavān bhaktyā dhruvaṃ prajvālayiṣyati || 57 ||
[Analyze grammar]

kṛṣṇanārāyaṇaṃ brahma vyāharaṃstaṃ tvanusmaran |
yaḥ prayāti tyajanvarṣma sa yāti paramaṃ padam || 58 ||
[Analyze grammar]

tasmādatraiva sattīrthe hyuṣitvā cirameva tu |
ārādhya taṃ kṛṣṇanārāyaṇaṃ yāsyāma vai punaḥ || 59 ||
[Analyze grammar]

yadvā''yuṣyakṣaye tasya dhāma prāpsyāma īpsitam |
aparādhasahasrāṇi sa śrīhariḥ kṣamiṣyate || 60 ||
[Analyze grammar]

iti vicārya catvāraḥ kṛṣṇanārāyaṇābhidhām |
japayajñaṃ pracakruste prācīsarasvatīsthale || 61 ||
[Analyze grammar]

prātaḥ snātvā hariṃ dhyātvā pupūjurnityameva te |
dalaṃ puṣpaṃ phalaṃ toyaṃ kandādi yadupasthitam || 62 ||
[Analyze grammar]

arpayanti haraye te jalārthaṃ prārthanādikam |
kurvanti sma prage madhye sāyaṃ niśi punaḥ punaḥ || 63 ||
[Analyze grammar]

evaṃ vai vartamāneṣu vyomamārgeṇa saṃśrutaḥ |
dundubhistvadhimāsasya śrīpuruṣottamoditaḥ || 64 ||
[Analyze grammar]

ṣaṣṭhyāṃ prātardundubhestu puruṣottamamāsi vai |
ghoṣaṇā mokṣadā yadvā sakāmānāṃ tu bhogadā || 65 ||
[Analyze grammar]

pravartate sma sā karṇapathaṃ prāptā manoramā |
caturbhistvapi sadhyānāṃ vicārvā'vadhṛtā hṛdi || 66 ||
[Analyze grammar]

śṛṇvantu mānavāḥ sarve nirdhanāḥ sadhanā api |
nirāgasaḥ sāparādhāstathā nāryo narā api || 67 ||
[Analyze grammar]

pūjāyāṃ me tvaparādhā bhavanti bahavopi vai |
yadi kaiścit kṛtāstān vai gaṇayiṣye manāṅ na vai || 68 ||
[Analyze grammar]

kurvantu vratamadyaiva ṣaṣṭhyāṃ dvitīyapakṣake |
puruṣottamamāsyasmin kṣamayiṣye nu pātakam || 69 ||
[Analyze grammar]

vajralepādikaṃ pāpaṃ kṣālayiṣye'dya vai vratāt |
ekabhuktaṃ ca vā naktaṃ vinā yāñcāṃ samāgatam || 70 ||
[Analyze grammar]

gṛhītvāpi tu ṣaṣṭhyāṃ vai vrataṃ kāryaṃ mamātra hi |
phalaṃ bhuktvā jalaṃ pītvā grasitvā pavanaṃ ca vā || 71 ||
[Analyze grammar]

vrataṃ kārya mama ṣaṣṭhyāṃ tasmai dāsye yathepsitam |
prāk kṛtaṃ me viparītaṃ smariṣye tanna sarvathā || 72 ||
[Analyze grammar]

adyā'haṃ kṛpayā dāsye tadiṣṭaṃ puruṣottamaḥ |
puruṣottamamāso'yaṃ vartate bhuvanatraye || 73 ||
[Analyze grammar]

īśaloke'pyayaṃ māso mamā''jñayā pravartate |
sarvamūrdhanyamāso'yaṃ mūrdhanyapuruṣottamāt || 74 ||
[Analyze grammar]

mūrdhanyaphaladastasmād vṛṇutepsitamuttamam |
ityuktvā dundubhistasmāt sthānāt sthānāntaraṃ yayau || 75 ||
[Analyze grammar]

catvāro brāhmaṇāste tu dāridryaduḥkhapīḍitāḥ |
ṣaṣṭhyāṃ vrataṃ pracakruste śrutvā dundubhiśabditam || 76 ||
[Analyze grammar]

dāridryaṃ naṣṭatāṃ gacchet sukhaṃ vaibhavasaṃbhavam |
pūrvato'pyadhikaṃ syācca viśālā dhanasampadaḥ || 77 ||
[Analyze grammar]

yānavāhanasaudhāni dāsā dāsyaḥ samujjvalāḥ |
rājyādapyadhikaṃ sarvaṃ bhavettarhi sukhaṃ bhavet || 78 ||
[Analyze grammar]

ityabhilaṣya taiḥ sarvaistūpavāsavrataṃ kṛtam |
pūrvaṃ saṃbhoginaḥ paścād vāñchanti bhogasampadaḥ || 79 ||
[Analyze grammar]

svabhāvaṃ yānti bhūtāni nigrahastu durādharaḥ |
yāvadvāñcchā na vai śāntā tāvajjñātā pravartate || 80 ||
[Analyze grammar]

bhaktānāmapi ceṣṭeṣu bhogyeṣvasti pravartanam |
rāgaśūnyasya nāstyeva samadraṣṭuḥ pravartanam || 81 ||
[Analyze grammar]

vicārya viṣavat tyaktaṃ yadi rāgo na līyate |
tarhi suyoge sampanne punarādātumicchati || 82 ||
[Analyze grammar]

tasmādindriyanairbalyaṃ sādhayanti suyoginaḥ |
tapasā kṣālitapāpabalā jayanti māyikam || 83 ||
[Analyze grammar]

anāhāreṇa vijayo bahukleśena vā jayaḥ |
śaithilyena ca vijayo bhavatyāhāraśālinām || 84 ||
[Analyze grammar]

ebhistu brāhmaṇairdārāyuktairna vijayaḥ kṛtaḥ |
iṣṭaṃ vai māyikaṃ taistu rājyaṃ vai pūrvato'dhikam || 85 ||
[Analyze grammar]

pārameṣṭhyapadaṃ yadvā sūryacandrādikaṃ padam |
indrapadasamaṃ devarājavannā'nyadasti tat || 86 ||
[Analyze grammar]

brahmaṇaḥ sarvadā tvasti vārdhakyaṃ svaprajāḥ prati |
sūryacandrādikā vyomni bhramanti paravaśyagāḥ || 87 ||
[Analyze grammar]

pravāsināṃ sukhaṃ nāsti viśrāmo nāsti vai kvacit |
aviśrāntaḥ sadā kliṣṭastasmādaindrapadaṃ varam || 88 ||
[Analyze grammar]

rājyaṃ sarvasurāṇāṃ vai dārādhāmadhanādikam |
svarge lakṣmīḥ śāśvatī ca smṛddhirindrasya vartate || 89 ||
[Analyze grammar]

tasmādaindrapadaṃ grāhyaṃ bhogottamapradaṃ śubham |
paścād bhaktyā samupārjya vaikuṇṭhaṃ divyasādhanam || 90 ||
[Analyze grammar]

evaṃ niścitya taiḥ sarvaiḥ kṛtaṃ ṣaṣṭhyāṃ vrataṃ śubham |
prātaḥ snātvā mṛdo mūrtiṃ kārayitvā harestadā || 91 ||
[Analyze grammar]

pārśve sphaṭikapāṣāṇaṃ sthāpayitvā tataśca te |
āvāhayitvā śrīkṛṣṇanārāyaṇaṃ pumuttamam || 92 ||
[Analyze grammar]

saṃsnāpya paṃcadugdhādyamṛtena ca jalena ca |
vastrābhūṣādravaddravyākṣatapuṣpādicandanaiḥ || 93 ||
[Analyze grammar]

dhūpadīpasunevedyaiḥ phalapatrajalādibhiḥ |
saṃpūjyā'rghyaṃ bilvaphalairyuktaṃ datvā namaḥ stutim || 94 ||
[Analyze grammar]

prārthanāṃ stavanaṃ puṣpāñjalīnsamarpya viṣṇave |
āndolayāṃcakrire ca latārajjvādidolane || 95 ||
[Analyze grammar]

madhyāhne ca tathā sāyaṃ rātrau pūjāṃ sajāgarām |
cakruste nṛtyagītādi tatrā''virāsa keśavaḥ || 96 ||
[Analyze grammar]

varān vṛṇuta bhaktāḥ stha gataṃ duḥkhaṃ vratena me |
yatheṣṭaṃ tvarpayituṃ cāgato'smi toṣito'smi ca || 97 ||
[Analyze grammar]

dṛṣṭvā śrutvā kṛṣṇanārāyaṇaṃ hariṃ caturbhujam |
natvā te pādayoḥ puṣpāṃjaliṃ vāri dadustadā || 98 ||
[Analyze grammar]

vavrire devasadanaṃ mahendrapadamṛddhimat |
tathāstviti varaṃ datvā haristirobabhūva ha || 99 ||
[Analyze grammar]

adhimāse sarasvatyāstaṭe prācyāḥ supippale |
sthale tyaktvā śarīrāṇi catvāro divamāgatāḥ || 100 ||
[Analyze grammar]

prāntendrasyā''yuṣo nāśe daśalokikṣayottaram |
catvāraste yayuḥ saumye maharloke ciraṃsthitāḥ || 101 ||
[Analyze grammar]

punaḥ kalpāntarāraṃbhe catvāro divamāgatāḥ |
devayavo mahendro vai babhūva vratapuṇyataḥ || 102 ||
[Analyze grammar]

devajuṣṭā mahendrāṇī saṃbabhūva hareḥ priyā |
girikṣito babhūvendraputro jayantanāmakaḥ || 103 ||
[Analyze grammar]

adridyutirvijayantapatnī jātā tu mānasī |
viśvakarmasutā tveṣā snuṣā tvindrasya yā matā || 104 ||
[Analyze grammar]

pulomajā'bhavadindrāṇīti sā mānasī sutā |
indrapatnī saṃbabhūva dāsīdāsā'rbudā'nvitā || 105 ||
[Analyze grammar]

ṣaṣṭhīvratena vipraistairāptaṃ tvaindrapadaṃ śubham |
sukhaṃ deveśvarapadaṃ prāptaṃ śrīharyanugrahāt || 106 ||
[Analyze grammar]

imāṃ kathāṃ paṭhed yastu śṛṇuyādvā samāhitaḥ |
tasya ṣaṣṭhīphalaṃ syādvai tatheṣṭaṃ saṃlabheta ca || 107 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye marudeśīyadevayavagirikṣitaviprayostatpatnyordevajuṣṭā''rdradyutyośca devadravyacauryeṇa sarvasvanāśottaraṃ tvadhikamāsasya dvitīyapakṣasya ṣaṣṭhyā vratena mahendrajayantamahendrāṇījāyantīpadaprāptinirūpaṇanāmā trayodaśādhikatriśatatamo'dhyāyaḥ || 1313 ||
[Analyze grammar]