Chapter 297

| śrīnārāyaṇa uvāca |
śrūyatāṃ ca tvayā lakṣmi śāradāyāḥ kathā śubhā |
adhimāsasya paṃcamyāṃ vrataṃ kṛtvā ca pūjanam || 1 ||
[Analyze grammar]

aiśvaryamatulaṃ prāpa kaumāryaṃ śāśvataṃ ca sā |
rājasvalyavihīnatvaṃ prasāraṇaṃ mukhe mukhe || 2 ||
[Analyze grammar]

tathā vaikuṇṭhanāthasya patnītvaṃ divyamavyayam |
avāpa śāradā loke pūjyatāṃ padmajā yathā || 3 ||
[Analyze grammar]

patnītve sati kaumārye kumārītve vadhūtvakam |
viruddhadharmayoścāsyāṃ sthitiḥ śrīharitoṣaṇāt || 4 ||
[Analyze grammar]

adhimāsabalopetāṃ camatkāramayīṃ kathām |
śṛṇu lakṣmi mahāpuṇyāṃ puruṣottamamāsikīm || 5 ||
[Analyze grammar]

brahmadhāmasthitā'nādikṛṣṇanārāyaṇāṃ'gataḥ |
brahmavidyā śāradākhyā prakaṭībhūya sundarī || 6 ||
[Analyze grammar]

vairājalokamāgatyā''jñayā nārāyaṇasya sā |
vairāje līnatāṃ prāpya brahmaviṣṇumaheśvaraiḥ || 7 ||
[Analyze grammar]

sahotpannā kanyakā sā vairājī śāradā sutā |
bahukālaṃ pitṛgehe vāsaṃ cakre kumārikā || 8 ||
[Analyze grammar]

brahmajñānātmikā nityaṃ vicārayati varṣmaṇi |
yadarthaṃ brahmaṇā cāhamāviṣkṛtā tu devatā || 9 ||
[Analyze grammar]

vāṅmayī vedhasaḥ sṛṣṭau sthātuṃ pratimukhaṃ khalu |
tato'haṃ vaidhasī bhūtvā gacchāmi yadi sṛṣṭiṣu || 10 ||
[Analyze grammar]

kumārī cennivatsyāmi hyaśuddhā cāpyasaṃskṛtā |
aspṛśyā vai bhaviṣyāmi sarvairbahiṣkṛtā sadā || 11 ||
[Analyze grammar]

tadā tu maraṇaṃ tatra śaraṇaṃ me bhaviṣyati |
kumārikāśarīraṃ vai garbhīyaṃ pāpakaṃ hi tat || 12 ||
[Analyze grammar]

kasyāpi karmaṇo yogyaṃ bhavatyeva na sarvathā |
mūtrendriyaprajanmā'sau mūtrakukṣau pravardhitaḥ || 13 ||
[Analyze grammar]

mūtrātmajalamagno'sau mūtradvāreṇa nirgataḥ |
bālye'pi malamūtrātmā'spṛśyā'śuddhamalāvṛtaḥ || 14 ||
[Analyze grammar]

yajñopavītasaṃskārahīno dehaḥ sadā'śuciḥ |
aśuddhakaphaphītādivikṛtipūttalātmakaḥ || 15 ||
[Analyze grammar]

kumārikāsthitau nārīdehaḥ kathaṃ śubho bhavet |
vivāhakaraṇe śuddhirnānyathā tu kadācana || 16 ||
[Analyze grammar]

vivāho'pi mahāduḥkhapradaḥ puruṣavaśyatā |
mūtrendriyaparādhīnamālinyakarmakāritā || 17 ||
[Analyze grammar]

mūtrakukṣau garbhavāso garbhajanmamalāktatā |
sūtakaṃ sarvathā cārte raktasrāvo malānvayaḥ || 18 ||
[Analyze grammar]

malamūtrasamutpattirapānānilasaṃsṛtiḥ |
mālinyaṃ sarvathā patnībhāve maithunakarmaṇi || 19 ||
[Analyze grammar]

tasmāt parāśrayaḥ patnībhāvo'tyadhikaduḥkhakṛt |
kiṃ kartavyaṃ kva gantavyaṃ nārī kṛtā parāśrayā || 20 ||
[Analyze grammar]

nārīdehaḥ parādhīnaḥ parabhogyaḥ parārthakaḥ |
yena tādṛk kṛtaṃ pāpaṃ nārītāṃ saḥ prapadyate || 21 ||
[Analyze grammar]

tanna mayā paranāryā bhavitavyamadhīnayā |
evaṃ rajasvalādharmo mālinyaṃ pāpakārakam || 22 ||
[Analyze grammar]

neṣyate yena tadapi pāravaśyaṃ na me bhavet |
madiṣṭaṃ yadi naiva syānmariṣyāmi na saṃśayaḥ || 23 ||
[Analyze grammar]

amālinyaṃ pavitratvamarājasvalyamityapi |
patnīdharmavihīnatvaṃ kaumārye ca yathā mama || 24 ||
[Analyze grammar]

śāśvataṃ syād yathā yatnastathā kāryo hyataḥ param |
iti nityaṃ cintayānā mārgayāmāsa sādhanam || 25 ||
[Analyze grammar]

śuśrāva dundubhiṃ viṣṇoradhimāsavratāya vai |
puruṣottamamāsasya vratināṃ vai manorathāḥ || 26 ||
[Analyze grammar]

paripūrṇā bhaviṣyantītyāha śrīpuruṣottamaḥ |
ekakālaṃ dvikālaṃ vā pūjayiṣyanti māṃ janāḥ || 27 ||
[Analyze grammar]

naro nārī ca ṣaṇḍho vā matkṛpāleśato hi saḥ |
alabhyalābhavān syācca dāsye sarvaṃ tadīpsitam || 28 ||
[Analyze grammar]

kumārī śāradā vairājasya putrī praghoṣaṇām |
śrupvā'tiharṣamāpannā manaścakre vratārcane || 29 ||
[Analyze grammar]

pañcamyāṃ sā tithau prātaḥ śīghraṃ śīghraṃ samutthitā |
śrutvaivaṃ dundubhiṃ snātvā dhyātvā mūrti harestathā || 30 ||
[Analyze grammar]

pūjādravyāṇi divyāni saṃgṛhya bhavane svake |
viṣṇuṃ nārāyaṇaṃ devaṃ pūjayāmāsa bhāvataḥ || 31 ||
[Analyze grammar]

lakṣmīṃ nārāyaṇaṃ svarṇaṃ śrīhariṃ puruṣottamam |
āvāhyāsanamāstīrya pādyārghyācamanāni ca || 32 ||
[Analyze grammar]

datvā paṃcāmṛtaiḥ kṛṣṇaṃ snāpayitvā jalena ca |
amṛtena rasenāpi sugandhidravavastubhiḥ || 33 ||
[Analyze grammar]

sammardya gātramurudhā śṛṃgāramakarottataḥ |
alaṃkāravibhūṣāśca dhārayitvā'mbarāṇi ca || 34 ||
[Analyze grammar]

prapūjya kastūrikābhiścandanākṣatakuṃkumaiḥ |
tulasīpuṣpamandāracampakaiḥ paripūjya ca || 35 ||
[Analyze grammar]

dhūpadīpasunaivedyaiḥ phalaiḥ pānaiśca carvaṇaiḥ |
tāmbūlakaistoṣayitvā''rārtrikaṃ tvakarottataḥ || 36 ||
[Analyze grammar]

pradakṣiṇaṃ stutiṃ kṛtvā daṇḍavat praṇanāma sā |
kṣamā'parādhaṃ svābhīṣṭaṃ prārthayat sā kumārikā || 37 ||
[Analyze grammar]

dundubhinā pravaktarhe lakṣmīnārāyaṇa prabho |
brahmagolokavaikuṇṭhavāsin śrīpuruṣottama || 38 ||
[Analyze grammar]

satyaṃ dadāsi bhaktāya yatheṣṭaṃ vratakāriṇe |
tadā mahyaṃ tathā dehi yathā'haṃ pravṛṇomi tat || 39 ||
[Analyze grammar]

kumārītvaṃ śāśvataṃ me rājasvalyaṃ kadāpi na |
aśuddhatvaṃ ca me māstu tathā satyapi me punaḥ || 40 ||
[Analyze grammar]

patimattvaṃ sumāṃgalyaṃ saubhāgyaṃ sarvadā'stu me |
sagarbhātvaṃ ca me māstu patnītve'pi kadācana || 41 ||
[Analyze grammar]

etadvai durlabhaṃ yāce viruddhaṃ sarvathā tanau |
yadi satyapravaktā tvaṃ hyekakālavrate kṛte || 42 ||
[Analyze grammar]

adhimāse pūjite ced dadāsi dehi me tathā |
anyathā dundubhiṃ deva mā pravādaya cā'nṛtam || 43 ||
[Analyze grammar]

chatraṃ dadāmi te nātha cāmare'pi dadāmi te |
pāduke te pradadāmi śayyāṃ dadāmi komalām || 44 ||
[Analyze grammar]

pādasaṃvāhanārthāya mā dadāmi samarpitām |
śaraṇāgatapāla tvaṃ bhaktavāñcchāprapūraka || 45 ||
[Analyze grammar]

puṣpāṃjaliṃ gṛhāṇaināṃ karaṃ gṛhāṇa vā na vā |
dehi madarthitaṃ nātha śāśvataṃ sukhadaṃ hi tat || 46 ||
[Analyze grammar]

kumārī naiva patnī syāt patnī syānna kumārikā |
patnītve bahavo doṣā mā spṛśeyuśca māṃ yathā || 47 ||
[Analyze grammar]

kumārītve'pi ye doṣā mā spṛśeyuśca māṃ yathā |
tathā dehi kṛpānātha satyārtho dundubhiryadi || 48 ||
[Analyze grammar]

kartuṃ cākartumevāpyanyathākartuṃ prabhostava |
kimapyaśakyaṃ nāstyevā'nyathā te dundubhirvṛthā || 49 ||
[Analyze grammar]

iti stutvā phalairyuktamarghyaṃ samarpya viṣṇave |
akṣatairvardhayāmāsa kumārī śāradā tataḥ || 50 ||
[Analyze grammar]

devaṃ tu dakṣiṇāṃ svīyasamarpaṇātmikāṃ hṛdi |
datvā visarjayāmāsa dhyāyamānā narāyaṇam || 51 ||
[Analyze grammar]

tāvannārāyaṇo lakṣmīpatiḥ śrīpuruṣottamaḥ |
ramāpatirhasanmandaṃ prāvirbabhūva cāgrataḥ || 52 ||
[Analyze grammar]

dakṣadoṣṇā'bhayadaśca vāmena mastake spṛśan |
uvāca śāradaṃ kinte manasyasti prakāśaya || 53 ||
[Analyze grammar]

pūjayā te prasanno'smi viśvāsavratacāriṇi |
subhru viśvāsapāśena baddho'smi sarvadā tvayā || 54 ||
[Analyze grammar]

dātuṃ sarvaṃ samartho'smi tathāpi śṛṇu me vacaḥ |
kumārītvaṃ ca patnītvaṃ naikatra kvāpi dṛśyate || 55 ||
[Analyze grammar]

anyataraṃ tayostasmād vṛṇu tubhyaṃ dadāmyatha |
kumārītvaṃ kalakāya loke tvājīvanaṃ bhavet || 56 ||
[Analyze grammar]

tasmāt patnītvamevātra vṛṇu saubhāgyadaṃ dade |
anyaccāpi ca te kāmyaṃ dadāmi vṛṇu kanyake || 57 ||
[Analyze grammar]

strīrājyaṃ vā mahadrājyaṃ māyārājyaṃ dadāmi te |
viruddhaṃ mā vṛṇu kanye brūhi vicārya mā ciram || 58 ||
[Analyze grammar]

ityāśrutya harervākyaṃ śāradā prāha keśavam |
bhakteṣṭapūraka svāmiṃstavoddhoṣānmayā'rthitam || 59 ||
[Analyze grammar]

svasatyarakṣaṇārthāya yathecchasi tathā kuru |
nahi bhakte tvāgrahaḥ syādāgrahī nahi bhaktimān || 60 ||
[Analyze grammar]

ahaṃ tava prapannā'smi bhaktacintāṃ hara prabho |
tavā'smi tava bhaktā'smi pādayoḥ patitā tava || 61 ||
[Analyze grammar]

nārīduḥkhāni me mā syuriti bhakteṣṭamāvaha |
ityarthitaśca dṛṣṭaśca spṛṣṭo nataḥ kṛtādaraḥ || 62 ||
[Analyze grammar]

pūjito bhojitastatrātyantapremṇā vilokitaḥ |
bhaktārtihā prabhuḥ svabhaktāyāḥ kṛte vyacintayat || 63 ||
[Analyze grammar]

kathamasyā manobhīṣṭaṃ pradātavyaṃ bhavediti |
kayā rītyā pūraṇīyo bhavenmanoratho'pi ca || 64 ||
[Analyze grammar]

dadāmyasyai mahāsiddhiṃ vyāpyavyāpakarūpiṇīm |
naikarūpabhavitrīṃ ca divyāṃ siddhiṃ dadāmi ha || 65 ||
[Analyze grammar]

iti saṃkalpya bhagavān dadau śaṃkhajalaṃ mukhe |
tāvatsā sarvasāmarthyanidhirūpā babhūva vai || 66 ||
[Analyze grammar]

bhagavāṃstu tataḥ prāha śārade śāradātmikā |
divyarūpā mama patnī sadā vaikuṇṭhavāsinī || 67 ||
[Analyze grammar]

garbhādidoṣaśūnyā tvaṃ bhavasīti vibhāvaya |
dattaṃ madīyapatnītvaṃ yaunamālinyavarjitam || 68 ||
[Analyze grammar]

malamūtrādyanāspṛṣṭaṃ divyaṃ rūpaṃ sadā'stu te |
atha rūpaṃ dvitīyaṃ tvaṃ gṛhāṇa vāṅmayaṃ priye || 69 ||
[Analyze grammar]

kumārībhāvasampannaṃ sarasvatīsvarūpakam |
dadāmi tādṛśaṃ rūpaṃ sukumāraṃ tathā bhava || 70 ||
[Analyze grammar]

gaccha tena svarūpeṇa vedhodvārā prajāsu vai |
vyāpakaṃ te svarūpaṃ syāṃ vāṇīrūpaṃ mukhe mukhe || 71 ||
[Analyze grammar]

kumārītvaṃ sadā tatra svarūpe te'stu śārade |
antarmukhapracāritve tvarājasvalyamastu te || 72 ||
[Analyze grammar]

sāttvikatvaṃ kumārītvaṃ sarvadā tattathā'stu te |
atha tṛtīyarūpega kenacitsanmiṣeṇa vai || 73 ||
[Analyze grammar]

sarasvatī nadīrūpā tvantarjalapravāhiṇī |
arajaskā kumārī tvaṃ sadā tiṣṭhatu śārade || 74 ||
[Analyze grammar]

cāñcalyaṃ ca bahirbhāvo rājasvalyaṃ ca mā'stu te |
pāvitryaṃ sarvadā te'stu ṛtudharmavivarjanam || 75 ||
[Analyze grammar]

rājasvalyaṃ vilīnaṃ te mālinyabhāvavarjitam |
bhavatācchārade kā'pyaśuddhirmāstu tvayi kvacit || 76 ||
[Analyze grammar]

sarvaiśvaryavatī pūjyā lokeṣu vyāpinī bhava |
lokānāṃ rājasaṃ pāpaṃ māstu tvayi sarasvati || 77 ||
[Analyze grammar]

bahirbhāve tvayi rājasvalyādi lokakṛd yadi |
dṛśyeta taddūṣaṇaṃ tu lokānāṃ na tu tat tvayi || 78 ||
[Analyze grammar]

rājasvalyakṛtaṃ pāpaṃ vaktṝṇāṃ syādaśuddhatā |
pāvitryaṃ sarvadā te'stu santu te divyasampadaḥ || 79 ||
[Analyze grammar]

kumārītvaṃ ca patnītvaṃ te'stu śuddhaṃ yathepsitam |
mama patnī śāradā tvaṃ kumārī brahmaputrikā || 80 ||
[Analyze grammar]

sarvaṃ dattaṃ mayā tubhyaṃ vad tvanyat kimicchasi |
ityuktā prāha sā devī mama pūjākṛtastu ye || 81 ||
[Analyze grammar]

sarasvatyāḥ śāradāyā nadyā vāṇyā upāsakāḥ |
vaikuṇṭhaṃ te samāyāntu svāminaste pratāpataḥ || 82 ||
[Analyze grammar]

adhimāsasya pañcamyāṃ prātaḥ sampūjya vai kramāt |
nārāyaṇaṃ yathā prāptā'smyahaṃ pūrṇamanorathā || 83 ||
[Analyze grammar]

tathā te pūjakāścādhimāsasya pūjakāstathā |
narā nāryaḥ samāyāntu vaikuṇṭhaṃ tava pādayoḥ || 84 ||
[Analyze grammar]

janmamṛtyujarāvyādhiduḥkhadāridryavarjiṃtam |
śāśvataṃ saccidānandasandohamūrtirājitam || 85 ||
[Analyze grammar]

tathāstviti prāha kurvan haridundubhighoṣaṇām |
sārthakā satyaphaladāṃ tvādhimāsasya puṣṭidām || 86 ||
[Analyze grammar]

adhimāso'pi tāṃ prāha bhaktā ye yā mayi tvayi |
teṣāṃ tāsāṃ samuddhartā tvahaṃ vai puruṣottamaḥ || 87 ||
[Analyze grammar]

doṣahartā sukhadātā mano'bhīṣṭapradastathā |
pāvayitā siddhidātā bhavāmyeva na saṃśayaḥ || 88 ||
[Analyze grammar]

śāradāyā idaṃ prārthya śroṣyanti ye tu durlabham |
paṭhiṣyanti ca vā teṣāṃ durlabhaṃ sulabhaṃ bhavet || 89 ||
[Analyze grammar]

apatarkyaṃ sutarkyaṃ syādaprāpyaṃ prāpyatāṃ vrajet |
abhāvyaṃ bhāvyatāṃ yāyādaniṣṭaṃ ceṣṭatāṃ vrajet || 90 ||
[Analyze grammar]

bhuvi svarge tathā'nyatra durlabhaṃ sulabhaṃ bhavet |
kṛṣṇanārāyaṇaḥ sākṣāllabhyetānyasya kā kathā || 91 ||
[Analyze grammar]

nārāyaṇaḥ svakṛpayā dadātyasya vai bahu |
adhimāsi kṛtasyātrā'saṃkhyaphalaṃ dadāti hi || 92 ||
[Analyze grammar]

labdha lakṣmi yathā devyā śāradāyā vicitrakam |
tathā vicitrāṃ bhuktiṃ ca muktiṃ ca labhate'rcakaḥ || 93 ||
[Analyze grammar]

japo homo vrataṃ dānaṃ dhyānaṃ mālā tapaḥ śrutam |
pañcamyāṃ tatkṛtaṃ sahasrādiguṇaṃ bhaviṣyati || 94 ||
[Analyze grammar]

ityuktvā śāradāṃ nītvā vaikuṇṭhaṃ harirāyayau |
sarasvatīsvarūpāṃ tāṃ prāhiṇod vaidhasīṃ prajām || 95 ||
[Analyze grammar]

amālinyaṃ pavitratvamarājasvalyamityapi |
patnīdharmā'nabhibhūtiḥ kaumārye ceti rakṣitam || 96 ||
[Analyze grammar]

iti śrīlakṣmīnārāyaṇīya saṃhitāyāṃ prathame kṛtayugasantāne puruṣottamamāsamāhātmye vairājaputryāḥ śāradāyā adhikamāsapañcamyāṃ vratapūjanādikaraṇena nārāyaṇapatnītvaṃ pavitratvam arājasvalyaṃ kumārikātvam agarbhākatvaṃ sarasvatītā cetyādiprāptinirūpaṇādināmā saptanavatyadhikadviśatatamo'dhyāyaḥ || 1297 ||
[Analyze grammar]