Chapter 296

śrīnārāyaṇa uvāca |
śṛṇu lakṣmi trayaste'pi gatvā golokamityatha |
viśaśramuḥ kṣaṇaṃ paścāt |
kṛṣṇo dvābhyāṃ prapūjitaḥ || 1 ||
[Analyze grammar]

puruṣottamamahimā goloke bahudhā'bhavat |
kṛṣṇaṃ natvā cāyayaturadhomāsa narāyaṇau || 2 ||
[Analyze grammar]

vaikuṇṭhaṃ cātha tatrāpi māso mahattvamāptavān |
puruṣottamamāsaṃ ca vāsayāmāsa vai hariḥ || 3 ||
[Analyze grammar]

vāsamāsādya māso'pi ramate viṣṇunā saha |
māsānāmadhipo bhūtvā gauraveṇa vyavasthitaḥ || 4 ||
[Analyze grammar]

athātra ca mahālakṣmyā gauraveṇa prapūjitaḥ |
drutaṃ nārāyaṇenāpi pratibrahmāṇḍameva ha || 5 ||
[Analyze grammar]

tṛtīyāyāścāparāhṇe preṣayitvā svapārṣadān |
samuddhoṣitamevā'yaṃ malamāso mahottamaḥ || 6 ||
[Analyze grammar]

puruṣottamanāmā'sau puruṣottamadaivataḥ |
puruṣottamanāthena svargado mokṣadaḥ kṛtaḥ || 7 ||
[Analyze grammar]

svaguṇāścārpitā hyasmai na nyūnaḥ puruṣottamāt |
pūjane vandane jāpe dāne snāne vrate'pi ca || 8 ||
[Analyze grammar]

puruṣottamatulyo'yaṃ puruṣottamayogadaḥ |
naro nārī suro devī ye'pi sthāvarajaṃgamāḥ || 9 ||
[Analyze grammar]

bhāvato'pyekakāle'pi vrataṃ cātha prapūjanam |
adhimāsasya sarvāṃgaṃ kariṣyanti madicchayā || 10 ||
[Analyze grammar]

prāpsyanti svepsitaṃ sarvaṃ nārāyaṇo bravīmyaham |
kimu tarhiṃ trikāle ca vrate vaktavyamasya hi || 11 ||
[Analyze grammar]

māsavrate tu naivaiva vaktavyaṃ śiṣyate mama |
tasmātpūjyaścaikakālaṃ dvikālaṃ samayatrayam || 12 ||
[Analyze grammar]

yatheṣṭaṃ prāpsyati nārī naro'pīṣṭamavāpsyati |
kṣaṇaṃ kṣaṇārdhaṃ ghaṭikāṃ sāyaṃ prātaḥ pramadhyake || 13 ||
[Analyze grammar]

yathāśakti yathāvastu pūjyo'yaṃ puruṣottamaḥ |
nārāyaṇo bravīmyatra puruṣottamasākṣikaḥ || 14 ||
[Analyze grammar]

śrīkṛṣṇasākṣikaścāpi puruṣottamasaṃjñake |
māse'tra māṃ kṣaṇamātraṃ pūjayiṣyanti bhāvata || 15 ||
[Analyze grammar]

svarge satyaṃ caiśalokaṃ prāpsyanti sveṣṭamityapi |
prāpsyanti māṃ sukhavārdhi paraṃbrahma parātparam || 16 ||
[Analyze grammar]

nārāyaṇecchayā ye'tra pūjayiṣyanti bhāvataḥ |
vaikuṇṭhasthaṃ ca te māṃ vai prāpsyantyeva narāyaṇam || 17 ||
[Analyze grammar]

śrīmatkṛṣṇecchayā ye'tra pūjayiṣyanti bhāvataḥ |
golokasthaṃ ca te māṃ vai prāpsyantyeva hi mādhavam || 18 ||
[Analyze grammar]

puruṣottamakāmena pūjayiṣyanti ye janāḥ |
brahmadhāmagataṃ prāpsyantyeva māṃ puruṣottamam || 19 ||
[Analyze grammar]

yadyadrūpaṃ ca māṃ ye'tra pūjayiṣyanti dehinaḥ |
tattadrūpaṃ tatra tatra prāpsyanti te tu māṃ tathā || 20 ||
[Analyze grammar]

iti praśrāvitaṃ lakṣmi brahmāṇḍeṣu punaḥ punaḥ |
mahādundubhibhirdūtaiḥ pārṣadairdivyavigrahaiḥ || 21 ||
[Analyze grammar]

malamāsastṛtīyāyāṃ niśyeva bahukoṭibhiḥ |
satkṛtaḥ pūjitaḥ samyagbhojitaḥ śramamāpa vai || 22 ||
[Analyze grammar]

caturthyāṃ tu prage saptadvayalokanivāsibhiḥ |
snānavratārcanadānādyairatīva pratoṣitaḥ || 23 ||
[Analyze grammar]

bahavaḥ sthāvarāścāpi cetanā vratakāriṇaḥ |
samājagmurharerdhāma lakṣaśaḥ koṭiśastathā || 24 ||
[Analyze grammar]

caturthyāstu prage koṭidāsīyuktā vimānagā |
ramādevī samāyātā vaikuṇṭhaṃ kṣairasāgarāt || 25 ||
[Analyze grammar]

vadhūṭīrūpatāṃ prāptā varamālāsamanvitā |
lakṣmīsamā tu sarvāṃge na vai nyūnā manāgapi || 26 ||
[Analyze grammar]

nārāyaṇā''jñayā sā tu lakṣmyādibhiḥ susatkṛtā |
sabhājitā tato nārāyaṇenāṃ'ke niṣāditā || 27 ||
[Analyze grammar]

lakṣmyādayastadāścarye samprāpustadvilokya vai |
kathaṃ patnīsvarūpeyaṃ svāmīnāṃ'gīkṛtā drutam || 28 ||
[Analyze grammar]

atha lakṣmyā ramā pṛṣṭā taditivṛttavittaye |
kathaṃ kasmāt samāyātā kathaṃ nārāyaṇaḥ patiḥ || 29 ||
[Analyze grammar]

kasya putrī kathaṃ prāptā kiṃ kṛtvainaṃ narāyaṇam |
vada subhru svasaḥ sarvaṃ parivedyaṃ sukhottaram || 30 ||
[Analyze grammar]

lakṣmyā nārāyaṇenāpi bhojitā satkṛtā hi sā |
samārebhe pravaktuṃ ca svakaṃ vṛttaṃ yathātatham || 31 ||
[Analyze grammar]

varamālāṃ hareḥ kaṇṭhe prasamarpyā'grataḥ sthitā |
nārāyaṇāṃ'guṣṭhavāri pītvā kṛtvā pradakṣiṇam || 36 ||
[Analyze grammar]

kuṃkumataṇḍulaiḥ kṛtvā bhāle śobhanacandrakam |
varamālā'rdhakaṃ svasyāḥ kaṇṭhe kṛtvā'tha pāyasam || 33 ||
[Analyze grammar]

bhojayitvā hariṃ datvā tāmbūlaṃ tatprasādakam |
gṛhītvā ca svayaṃ nārāyaṇāṃke kusumāṃjalim || 34 ||
[Analyze grammar]

sākṣatāṃ ca salājāṃ ca prasamarpyā''sane sthitā |
patnī bhūtvā jagādedaṃ śṛṇu lakṣmi ramoditam || 35 ||
[Analyze grammar]

śṛṇvatsu sarvabhakteṣu bhaktāsu prāha yad ramā |
mama pūjye mahālakṣmi tṛtīyārātrisaṃcare || 36 ||
[Analyze grammar]

dundubhiḥ suśrutaḥ sarvairnārāyaṇasya nāmataḥ |
adhimāse pūjakasya pūrayiṣye manorathān || 37 ||
[Analyze grammar]

mayā'pi kanyayā kṣīrodadhergṛhe sa saṃśrutaḥ |
vāñchitaśca patirnārāyaṇo lakṣmīpatiḥ prabhuḥ || 38 ||
[Analyze grammar]

malamāse tṛtīyāyāṃ sāyaṃ vai bhojanaṃ vinā |
vinā jalaṃ vrataṃ kṛtvā snātvā cā'pūjayaṃ harim || 36 ||
[Analyze grammar]

pṛṣṭvā me janakaṃ kṣīrasāgaraṃ ca tadājñayā |
maṇḍapaṃ kadalīstambhaiḥ śobhitaṃ patratoraṇaiḥ || 40 ||
[Analyze grammar]

kārayitvā ca tanmadhye dolāṃ ramyāṃ suśobhanām |
lakṣmīnārāyaṇamūrtiṃ sauvarṇīṃ ratnarājitām || 41 ||
[Analyze grammar]

saṃsnāpya sarvasāmudraiḥ ratnaiḥ prapūjya bhāvataḥ |
divyavastrairvibhūṣābhiścālaṃkṛtya dravādibhiḥ || 42 ||
[Analyze grammar]

sampūjya dhūpadīpaiśca bhojanairjalapānakaiḥ |
ārārtrikastutipradakṣiṇābhirabhivandya ca || 43 ||
[Analyze grammar]

puṣpāṃjaliṃ pradāyaiva saṃkalpya manasā punaḥ |
patirme bhava viśvātman ramāyāstvaṃ narāyaṇa || 44 ||
[Analyze grammar]

iti saṃstūya caraṇāmṛtaṃ pītvā sukomale |
paryaṃke śrīhariḥ premṇā mayā prasvāpitaḥ saha || 45 ||
[Analyze grammar]

dhyāto mayā sa nidrāyāṃ sevayāmi hariṃ tataḥ |
pādasaṃvāhanaṃ tasya karomīti nibhālitaḥ || 46 ||
[Analyze grammar]

kṣaṇaṃ svapne harirdṛṣṭo mayā sve śayane saha |
hasanmāṃ svakaṭākṣeṇā''karṣayanniva bhāvataḥ || 47 ||
[Analyze grammar]

vadan śruto vratena tvāṃ svīkaromi priyāṃ rame |
prātarnetuṃ mama lokaṃ tvāgamiṣye punaḥ priye || 48 ||
[Analyze grammar]

iti drāgeva saṃśrāvya svayamadṛśyatāṃ gataḥ |
so'yaṃ nārāyaṇaḥ svāmī lakṣmīpatirvirājate || 49 ||
[Analyze grammar]

mayā nārāyaṇe yāte muhūrte brāhmasaṃjñake |
caturthyāmadhimāsasya dhyātvainaṃ puruṣottamam || 50 ||
[Analyze grammar]

snātvā śayyāgataṃ devaṃ snāpayitvā'tibhāvataḥ |
kṣīrādibhistathā vārbhiścandanādi pramardya ca || 51 ||
[Analyze grammar]

śrāṃgārikāṇyarpayitvā vivāhavaravat kṛtaḥ |
dattaṃ pītāmbaraṃ cātimūlyaṃ pītāṃgarakṣakam || 52 ||
[Analyze grammar]

prāvāraṃ svarṇatārāḍhyaṃ cottarīyaṃ tathottamam |
mastake svarṇamukuṭaḥ sakalgiḥ kuṇḍale śrutau || 53 ||
[Analyze grammar]

tilakaṃ candrako bhāle kajjalaṃ netrayorbhruvi |
candanaṃ gaṇḍayorbindū cibuke svalpacandrakaḥ || 54 ||
[Analyze grammar]

puṣpaprāvaraṇaṃ bhāle varamālā ca kaṇṭhake |
vakṣasi svarṇahārāśca kaṃkaṇe karayoḥ śubhe || 55 ||
[Analyze grammar]

ūrmikāścāṃguligrāme bhujabandhau bhujadvaye |
tulasīpuṣpahārāśca khaṅgo haste suvarṇajaḥ || 56 ||
[Analyze grammar]

nārikelaphalaṃ cāpi kare kaṭyāṃ ca mekhalā |
nupūre pādayoścāpi pāduke kānakī śubhe || 57 ||
[Analyze grammar]

kāmaphalaṃ prakoṣṭhe vai bhojane pāyasaṃ śubham |
tāmbūlakaṃ jalapānaṃ phalaṃ drākṣā rasātmikā || 58 ||
[Analyze grammar]

pūgīphalaṃ tato dānaṃ dakṣiṇā varamālikā |
havanāni śataṃ cāṣṭau ghṛtena vahnimaṇḍale || 59 ||
[Analyze grammar]

ārārtrikaṃ pañcavarti pradakṣiṇacatuṣṭayam |
vareṇyo varadaścāsi varo me bhava sadvacāḥ || 60 ||
[Analyze grammar]

puṣpāṃjalistathā'rghyaṃ ca namaskāraḥ kṣamārthanā |
visarjanaṃ pādavāripānaṃ ca śeṣabhakṣaṇam || 61 ||
[Analyze grammar]

svapnadṛṣṭasya saṃdhyānaṃ pratīkṣā ca kadā''gamaḥ |
kṛṣṇanārāyaṇanāmnā bhajanaṃ cātiharṣaṇam || 62 ||
[Analyze grammar]

bhojanaṃ bālikābhyaśca dānaṃ kanyābhya ityapi |
dhyānaṃ nārāyaṇe dehaḥ kṣīrasāgarake gṛhe || 63 ||
[Analyze grammar]

netre vyomni pare mārge hyātmā vaikuṇṭhavāsini |
ityevaṃ parivārāḍhye'dhimāse pūjite harau || 64 ||
[Analyze grammar]

natvā ca janakaṃ kṛtvā pāraṇāṃ payasā manāk |
yāvat tiṣṭhāmi bhavane tāvannārāyaṇo hyayam || 65 ||
[Analyze grammar]

prādurbhūto mamāgretirūpānurūparājitaḥ |
prasannaścātitejasvī cā'spṛśanmāṃ kareṇa vai || 66 ||
[Analyze grammar]

svasamīpaṃ samākṛṣya samāgacchetyuvāca mām |
malamāse hyekakāle tṛtīyāyāṃ tvayā'rcitaḥ || 67 ||
[Analyze grammar]

niśi savāhitaścāpi caturthyāṃ cātipūjitaḥ |
prātareva tvayā mānye cārjito'smi vratena vai || 68 ||
[Analyze grammar]

yathā bhāvanayā subhru tvayā cādya prapūjitaḥ |
tathā prāpto'smi kalyāṇi subhage'si mama priye || 69 ||
[Analyze grammar]

samāgaccha mayā sārdhaṃ jātā'si śāśvatī vadhūḥ |
tava vratena te dāsyaḥ sarvā api mama gṛham || 70 ||
[Analyze grammar]

samāyāntu mama dāsyo bhāvinyaḥ sarvathā rame |
iti kṛtvā garuḍaṃ svaṃ darśayāmāsa sadvaraḥ || 71 ||
[Analyze grammar]

yānāni vāhanānyatra yāni santi sahasraśaḥ |
mayā matpitaraṃ gatvā''veditaṃ sarvameva tat || 72 ||
[Analyze grammar]

sopi tatra samāgatya dattavān māṃ hareḥ kare |
pitrājñayā kṛtakṛtyā jātā'ruroha pakṣiṇam || 73 ||
[Analyze grammar]

pitrā prasthāpitā sainyayutā satkārapūrvakam |
yautakaṃ saṃgṛhītvaiva samāyātā hareḥ puram || 74 ||
[Analyze grammar]

so'yaṃ nārāyaṇaścātra bhavane'pi vilokitaḥ |
mayā sahāpi sa eva vartate paśya bhāmini || 75 ||
[Analyze grammar]

adhimāse niśi prātaḥ pūjane'sya phalena vai |
prāptā'haṃ satpatiṃ nārāyaṇaṃ cātra samāgatā || 76 ||
[Analyze grammar]

nītā tenaiva kṛṣṇena prāpitāṃ'kamanena vai |
kṛtā navavadhūścāpi patnī vaikuṇṭhavāsinī || 77 ||
[Analyze grammar]

ramā'smi te sakhī dāsī tvatkṛpākāṃkṣiṇī sadā |
ityevaṃ cā'dhimāsasya phalaṃ prāptaṃ mayā'naghe || 78 ||
[Analyze grammar]

mayā nārāyaṇapūjā kṛtā tadvat kariṣyati |
kanyakā yuvatī vāpi prāpsyatyenaṃ narāyaṇam || 79 ||
[Analyze grammar]

kṛṣṇanārāyaṇaṃ cādhimāse saṃpūjya sarvathā |
caturthyāṃ prātarevāpi madhyāhne vā niśīthake || 80 ||
[Analyze grammar]

pūjayiṣyanti yadvṛttyā pūrayiṣyatyayaṃ tathā |
dhanaṃ putrān sukhaṃ dārān patiṃ dhānyāni sadgṛham || 81 ||
[Analyze grammar]

yānaṃ ca vāhanaṃ tejo rūpamaiśvaryamuttamam |
rājyaṃ sattāṃ priyāṃ bhāryā dāsān dāsīśca vaibhavān || 82 ||
[Analyze grammar]

bhogyān bhogopasambaddhān bhojyānpeyānanantakān |
padārthān divyatattvasthān yatheṣṭān suratān ratim || 83 ||
[Analyze grammar]

svargān satyaparān lokān pārameṣṭhisthalānyapi |
vairājāṃścāpi vaikuṇṭhabhūmikā dhenubhūmikāḥ || 84 ||
[Analyze grammar]

golokaṃ cākṣaraṃ cāpi divyaṃ cā'divyameva yat |
saṃkalpyā'dhikamāse vai nārāyaṇasya pūjakāḥ || 85 ||
[Analyze grammar]

narā nāryo devadevyaścaturdaśastarasthitāḥ |
prāpsyanti svepsitaṃ sarve puruṣottamavāñchayā || 86 ||
[Analyze grammar]

yathā'haṃ svalpayatnena saṃjātā śāśvatīsamāḥ |
susaubhāgyavatī lakṣmi tathā'nyāpi bhaviṣyati || 87 ||
[Analyze grammar]

vidhavāpi yadi strī vai madvat kṛṣṇasya pūjanam |
kariṣyatyadhimāse sā vaikuṇṭhaṃ prāpsyati dhruvam || 88 ||
[Analyze grammar]

nārāyaṇaṃ patiṃ labdhvā syāt saubhāgyavatī sadā |
vṛddhā vā rogiṇī yadvā tiraskṛtā ca bāndhavaiḥ || 89 ||
[Analyze grammar]

karmaṇā yā paribhraṣṭā paścāttāpena saṃyutā |
anāthā caikalā cātyāśritā raṇḍā ca puṃścalī || 90 ||
[Analyze grammar]

svairiṇī kāminī vāpi yena kenāpi saṃgatā |
jñātihīnā vratahīnā paśusaṃsargakāriṇī || 91 ||
[Analyze grammar]

jaihvye ratyāṃ sadā lubdhā madyamāṃsādinī kimu |
rājasvalyādidoṣasthā sāṃkaryadoṣasaṃsthitā || 92 ||
[Analyze grammar]

śvapacādyāśrayāpannā susaṃskāravivarjitā |
yā kāpi vā bhavennārī śubhasaṃskārayogataḥ || 93 ||
[Analyze grammar]

śrutvā kathāṃ vrataṃ kṛtvā'dhimāse tu yathābalam |
hariprāptīcchayā caikabhuktaṃ naktamayācitam || 94 ||
[Analyze grammar]

phalāhāraṃ payaḥpānaṃ kṛtvāpi śrīharerbalāt |
pramārjya sarvapāpātipāpāni cātipāvanī || 95 ||
[Analyze grammar]

paṃktisaṃpāvanī bhūtvā veśyā vā gaṇikāpi vā |
nartakī vā prabhaṇḍā vā kuṭṭinī vā prasādhinī || 96 ||
[Analyze grammar]

yā vā kā vā bhavelloke bhūtvā pavitravigrahā |
kṣetraṃ viṣṇoḥ kṛpāyāśca bhūtvā kāṃcanasadṛśī || 97 ||
[Analyze grammar]

divyā śuddhā pāpahīnā puṇyapuñjānvitā satī |
kṛṣṇanārāyaṇaviṣṇukṛpābhiratipāvitā || 98 ||
[Analyze grammar]

svasamānāstathā'nyāśca pāvayitvā svasaṃgataḥ |
sanātanaṃ paraṃ dhāma viṣṇoryat tatprayāsyati || 99 ||
[Analyze grammar]

ramā'haṃ saṃsthitā nārāyaṇāṃ'ke lakṣmi sarvathā |
kathayāmi punaḥ satyaṃ sā prāpsyati hareḥ padam || 100 ||
[Analyze grammar]

ṣaṇḍho vā ṣaṇḍhatulyo vā ṣaṃḍhā vā ṣaṇḍhasadṛśī |
anārtavī vicittā vā vānarīva vratacyutā || 101 ||
[Analyze grammar]

yā kāpi vā bhavet sā'pi māse śrīpuruṣottame |
vrataṃ kṛtvā varaṃ nārāyaṇaṃ samarjayiṣyati || 102 ||
[Analyze grammar]

niṣkāmo vā'tha niṣkāmā muktatāṃ prāpya sarvathā |
harerdivyākṣaraṃ dhāma prāpsyatyeva na saṃśayaḥ || 103 ||
[Analyze grammar]

kimvadhikaṃ kathayāmi māyā'pyamāyikī bhavet |
yadyogāttarhi nārīṇāṃ kā kathā muktisaṃgame || 104 ||
[Analyze grammar]

tasmādvrataṃ prakartavyaṃ tvadhimāsasya sarvathā |
bhuktirmuktistathā svargaṃ sarvaṃ prāpyeta yadbalāt || 106 ||
[Analyze grammar]

ahaṃ cātra sthitā jyeṣṭhe nibhālyā'nugraheṇa vā |
ityuktvā praṇanāmaināṃ lakṣmīṃ vātsalyavardhinīm || 106 ||
[Analyze grammar]

nārāyaṇo'pi tāmenāṃ bhavanāni nināya ca |
ramayāmāsa satkāmaiḥ pūrayāmāsa bhāvanāḥ || 107 ||
[Analyze grammar]

evaṃ priye ramā jātā kathaṃ nārāyaṇapriyā |
kṣīrasāgaraputrīyaṃ sā tubhyaṃ kathitā kathā || 108 ||
[Analyze grammar]

asyāḥ śravaṇamātreṇa paṭhanena ca pūjayā |
adhimāsavratajanyaṃ phalaṃ vindettu mānavaḥ || 109 ||
[Analyze grammar]

itiśrīlakṣmīnārāyaṇīya saṃhitāyāṃ prathame kṛtayugasantāne puruṣottamamāsa māhātmye nārāyaṇādhimāsayorvaikuṇṭhavasatirbrahmāṇḍeṣvadhikamāsavratārthe dundubhighoṣaṇā tāṃ śrutvā kṣīrasāgaraputrīramayā tṛtīyāsāyaṃ caturthīprātarvratapūjādikaraṇena vaikuṇṭhe nārāyaṇapatnītvaprāptirityādinirūpaṇanāmā ṣaṇṇavatyadhikadviśatatamo'dhyāyaḥ || 1296 ||
[Analyze grammar]