Chapter 281

śrīnārāyaṇa uvāca |
atha dvādaśamāseṣu yānyanyāni vratāni ca |
kartavyānyapi te vakṣye śṛṇu puṇyāni padmaje || 1 ||
[Analyze grammar]

caitramāsasya śuklāyāmekādaśyāṃ tu vaiṣṇavaiḥ |
āndolanīyo bhagavān lakṣmīyukto mahotsavaiḥ || 2 ||
[Analyze grammar]

sugandhipuṣpamayyāṃ tu tasyāṃ ta ghaṭikādvayam |
āndolayitvā nīrājayitvā cottārayetprabhum || 3 ||
[Analyze grammar]

bhojayecca vratī natvā taṃ kṣamāpya visarjayet |
āṣāḍhe śuklake puṣye rathayātrāṃ samācaret || 4 ||
[Analyze grammar]

sāśvaṃ rathaṃ sthāpayecca kṛṣṇanārāyaṇāgrataḥ |
vāsāṃsi rājayogyāni dhārayed bhūṣaṇāni ca || 5 ||
[Analyze grammar]

śreṣṭhān haimān śastravaryān khaḍgādīn dhārayetprabhum |
dadhi bhaktaṃ laḍḍukāṃśca bhojayitvā rathe'rcayet || 6 ||
[Analyze grammar]

hariṃ nīrājayitvā ca caturvāraṃ punaḥ punaḥ |
uttārayed rathāt tatra gāpayet kīrtanāni vai || 7 ||
[Analyze grammar]

tataśca bhojanaṃ kuryād vratī mokṣapradaṃ vratam |
āṣāḍhakṛṣṇadvitīyādinādārabhya māsikaḥ || 8 ||
[Analyze grammar]

śrāvaṇakṛṣṇatṛtīyāvadhiṃ dolotsavo mataḥ |
vṛṣarāśeścandrabale kuryād dolāṃ svalaṃkṛtām || 9 ||
[Analyze grammar]

nityaṃ navīnavastvādyairnavīnāṃ śrīhareḥ priyām |
sāyāhne pratyahaṃ kṛṣṇanārāyaṇaṃ nidhārayet || 10 ||
[Analyze grammar]

nīrājayitvā naivedyaṃ samarpyā''ndolayed vratī |
dolāpadyāni ramyāṇi gāpayennṛtyamācaret || 11 ||
[Analyze grammar]

nabhaḥkṛṣṇatṛtīyāyāṃ prapūjyottārayeddharim |
śrāvaṇaḥ sarvathā māso vrataiśca niyamairyamaiḥ || 12 ||
[Analyze grammar]

yāpanīyo viśeṣeṇa bhuktiṃ muktiṃ samicchatā |
kārtiko'pi tathā neyo vratadānajapādibhiḥ || 13 ||
[Analyze grammar]

mārgaśīrṣe dhanūrāśau dhanurlagne ravau gate |
vidhāyā'bhyaṃgamuṣṇena snapayedvāriṇā harim || 14 ||
[Analyze grammar]

dhārayitvā suvāsāṃsi tadagre'gniṣṭikāmapi |
nidhāya naityakaṃ kuryācchṛṅgāraṃ saśriyaḥ prabhoḥ || 15 ||
[Analyze grammar]

naivedye modakān dadyānnavanītaṃ ghṛtaṃ dadhi |
roṭakaṃ taralāṃ bharjitaṃ vṛntākaṃ samarpayet || 16 ||
[Analyze grammar]

kvathikāṃ pāyayet kṛṣṇamadhyayanāya yojayet |
evaṃ vai māsaparyantaṃ śikṣārthaṃ tūtsavaṃ caret || 17 ||
[Analyze grammar]

pauṣamāse makare ca yadā sūryāyanaṃ bhavet |
catvāriṃśaddhaṭikā vai puṇyakālo viśeṣataḥ || 18 ||
[Analyze grammar]

dānasnānārcanādyaṃ tu kartavyaṃ tilalaḍḍukāḥ |
miṣṭānnāni ca deyāni hyanāthebhyo viśeṣataḥ || 19 ||
[Analyze grammar]

gavāṃ grāsādi deyaṃ ca śrāddhaṃ puṇyapradaṃ tathā |
māghamāse tu pañcamyāṃ vasantotsavamuttamam || 20 ||
[Analyze grammar]

tata ārabhya nityaṃ ca holikāvadhikaṃ sadā |
kuṃkumaraṃgagulālārpaṇapūjanabhojanaiḥ || 21 ||
[Analyze grammar]

prakuryāt śvetavāsāṃsi hariṃ navāni dhārayet |
raṃgān lakṣmīharikṛṣṇavāsassu prakṣiped vratī || 22 ||
[Analyze grammar]

gulālaṃ sthalapadmāmbu nikṣipecca punaḥ punaḥ |
śekharaṃ tvāmrapuṣpāṇāṃ dhārayed bhojayeddharim || 23 ||
[Analyze grammar]

kaisarāṇyaṃśukāni śrīkṛṣṇaṃ lakṣmīṃ ca dhārayet |
holikāntāṃ ca vāsantīṃ krīḍāṃ gāyettu phālgunīm || 24 ||
[Analyze grammar]

athā''virbhāvadivasād yāvatṣaṭdivasāvadhim |
pālane rohayet kṛṣṇanārāyaṇamapi vratī || 25 ||
[Analyze grammar]

pāyayet taṃ tu dugdhādi hyāndolayetsagītikam |
sevayed bālabhāvena muhurnāthaṃ prasādayet || 26 ||
[Analyze grammar]

vaiśākhaśuklatṛtīyādinācchrīkṛṣṇamūrtaye |
kesarāktaiścandanādyairlepanaṃ māsikaṃ caret || 27 ||
[Analyze grammar]

sūryacandragrahāhassu kuryātsnānajapādikam |
āṣāḍhaśuklaṣaṣṭhyāṃ tu kausuṃbhāmbaramarpayet || 28 ||
[Analyze grammar]

haraye sūkṣmasusnigdhatantujaṃ komalaṃ śubham |
āśvinakṛṣṇapakṣe tu śrāddhaiḥ saṃtarpayet pitṝn || 29 ||
[Analyze grammar]

āśvine śuklapakṣe tu mūlenā''vāhayet tathā |
pūjayedbhojayeddugdhapākādyaṃ tu sarasvatīm || 30 ||
[Analyze grammar]

visarjayecchravaṇena vidvān bhavati vai vratī |
svajanmadivasaḥ sarvairvardhanīyaḥ samutsavaiḥ || 31 ||
[Analyze grammar]

dānabhojanavṛddhābhivandanairdevadarśanaiḥ |
ekādaśīto dvādaśyo mokṣadā harivāsarāḥ || 32 ||
[Analyze grammar]

kartavyā bhojanaidānaiḥ pūjanotsavatarpaṇaiḥ |
prasīdati hariryaistu prayacchatyabhayaṃ padam || 33 ||
[Analyze grammar]

yena kenāpyupāyena prasanno yasya vai hariḥ |
ihāmutra sukhaṃ tasya puṇyavṛddhirvrataṃ bhavet || 34 ||
[Analyze grammar]

dvādaśyāṃ mārgaśuklasya pūjayejjalaśāyinam |
upacāraiḥ ṣoḍaśakaiḥ pauṇḍarīkaphalaṃ labhet || 35 ||
[Analyze grammar]

dvādaśyāṃ pauṣaśuklasya pūjayet prayato harim |
upacāraiḥ ṣoḍaśakairagniṣṭomaphalaṃ laset || 36 ||
[Analyze grammar]

māghadhavaladvādaśyāṃ pūjayenmādhavaṃ prabhum |
ṣoḍaśādyairupacārairvājapeyaphalaṃ vrajet || 37 ||
[Analyze grammar]

phālgunaśukladvādaśyāṃ govindaṃ pūjayejjanaḥ |
vastuṣoḍaśakaiḥ śreṣṭhairgomedhasya phalaṃ jayet || 38 ||
[Analyze grammar]

caitradhavaladvādaśyāṃ viṣṇuṃ kṛṣṇaṃ samarcayet |
ṣoḍaśādyupacārairvai syādagniṣṭomapuṇyabhāg || 39 ||
[Analyze grammar]

vaiśākhaśukladvādaśyāṃ pūjayenmadhumūdanam |
ṣoḍaśottamasāmagryā tvaśvamedhaphalaṃ bhavet || 40 ||
[Analyze grammar]

jyeṣṭhadhavaladvādaśyāṃ pūjayedvai trivikramam |
ṣaṭdaśabhistūpacārairnaramedhaphalaṃ bhavet || 41 ||
[Analyze grammar]

āṣāḍhaśukladvādaśyāṃ vāmanaṃ pūjayed vratī |
ṣoḍaśākhyopacāraiśca śatāgniṣṭomapuṇyabhāg || 42 ||
[Analyze grammar]

śrāvaṇaśukladvādaśyāṃ śrīdharaṃ pūjayed vratī |
ṣoḍaśā''mitavastvādyairvājimedhasahasrabhāk || 43 ||
[Analyze grammar]

bhādradhavaladvādaśyāṃ hṛṣīkeśaṃ prapūjayet |
ṣoḍaśā'bhyupacāraiśca brahmamedhaphalaṃ labhet || 44 ||
[Analyze grammar]

āśvinaśukladvādaśyāṃ padmanābhaṃ prapūjayet |
ṣoḍaśābhyupacārādyairīśamedhasahasrabhāk || 45 ||
[Analyze grammar]

kārtikaśukladvādaśyāṃ dāmodaraṃ prapūjayet |
ṣoḍaśābhyupacārādyairdvyaśvamedhasahasrabhāk || 46 ||
[Analyze grammar]

homo japastapo dānaṃ sādhuviprādibhojanam |
dakṣiṇāprārthanājāgaraṇānītyācared vrate || 47 ||
[Analyze grammar]

alpaparikarasyā'lpaṃ viśālasya mahat phalam |
bhaktiyukte vrate jāte phalaṃ prāpyeta mokṣaṇam || 48 ||
[Analyze grammar]

vrataṃ saṃvatsaraṃ kṛtvā kuryādudyāpanaṃ vratī |
prātaḥ snātvā'mbare śuddhe dhṛtvā bhāle supuṇḍravān || 49 ||
[Analyze grammar]

maṇḍapaṃ kārayed bhavyaṃ viśālaṃ caturasrakam |
ghaṇṭācāmarakalaśā''darśakiṃkiṇikāyutam || 50 ||
[Analyze grammar]

puṣpamālyadhvajatoraṇavitānāmbarā'ñcitam |
dīpamālācaturdvārakomalāstaraṇānvitam || 51 ||
[Analyze grammar]

tanmadhye sarvatobhadraṃ kuryāddhānyādyalaṃkṛtam |
tasyopari nyaset kuṃbhān dvādaśā'mbuprapūritān || 52 ||
[Analyze grammar]

śuklāmbaraiśchāditāṃśca pañcaratnasamanvitān |
tatra saṃsthāpayet haimīṃ rājatīṃ tāmrajāṃ ca vā || 53 ||
[Analyze grammar]

lakṣmīnārāyaṇamūrtiṃ tilapātre ghaṭopari |
athāvāhanamārabhya pūjāṃgāni samārabhet || 54 ||
[Analyze grammar]

pañcāmṛtaiḥ snāpayecca bhūṣāvastrāṇi dāpayet |
sugandhacandanādīni prāpayet dhūpadīpakān || 55 ||
[Analyze grammar]

śrāṃgārikadravān dadyānnīrājayecca bhojayet |
pānaṃ tāmbūlakaṃ dadyāt prasvāpayet kṣamāpayet || 56 ||
[Analyze grammar]

rātrau jāgaraṇaṃ kuryāt prātarhomaṃ samācaret |
pūjanaṃ bhojanaṃ vaisarjanaṃ devasya cārpaṇam || 57 ||
[Analyze grammar]

pāraṇāṃ ca svayaṃ kuryād vrataṃ samāpayed vratī |
pratimāṃ dakṣiṇāyuktāmācāryāya samarpayet || 58 ||
[Analyze grammar]

evamudyāpanakartā vratakartā'tra bhogavān |
trisaptakulasaṃyukto yāti viṣṇoḥ paraṃ padam || 59 ||
[Analyze grammar]

ya idaṃ śṛṇuyāllakṣmi vratākhyānaṃ ca vācayet |
sarvavrataphalaṃ labdhvā tvante yāyāddhareḥ padam || 60 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vārṣikaprakīrṇakavrateṣu dolāvratarathayātrādolotsava |
śrāvaṇakārtikadhanurmāsamakarasaṃkrāntivasantotsavapālanārohaṇaholikāpuṣpadolakaisaracandanāmbaraśrāddhasarasvatyutsavadvādaśīvrataphalodyāpana |
prabhṛtinirūpaṇanāmaikāśītyadhikadviśatatamo'dhyāyaḥ || 281 ||
[Analyze grammar]