Chapter 277

śrīnārāyaṇa uvāca |
atha lakṣmi śṛṇu vakṣye dvādaśīnāṃ vratāni te |
kṛtvā yāni janā yānti śāśvataṃ harimandiram || 1 ||
[Analyze grammar]

caitraśukladvādaśīti madanavratamācaret |
śvetatandulasaṃpūrṇaṃ ghaṭaṃ phalekṣuśobhitam || 2 ||
[Analyze grammar]

vastrayugmayutaṃ svarṇamiṣṭānnasthālikāyutam |
candanādyarcitaṃ nyasya sarvatobhadramaṇḍale || 3 ||
[Analyze grammar]

sthālyāṃ śrīkāmadevasya mūrtiṃ ratisamanvitām |
sthāpayetpūjayetsarvapuṣparasasugandhibhiḥ || 4 ||
[Analyze grammar]

bhojayecca rājasāni bhojanāni ca pāyasam |
trayodaśyāṃ prage'bhyarcya visarjayedanaṃgakam || 5 ||
[Analyze grammar]

evaṃ varṣaṃ vrataṃ kṛtvā ghṛtaṃ śayyāṃ savatsagām |
svarṇaṃ kāmaṃ ratiṃ dadyād dānaṃ śrīgurave mudā || 6 ||
[Analyze grammar]

kṛṣṇanārāyaṇaṃ lakṣmīṃ pūjayetprārthayettathā |
prīyatāṃ kāmarūpī me hariḥ saukhyaprado bhava || 7 ||
[Analyze grammar]

madanadvādaśīvratakartā golokameti saḥ |
dampatī sukhamāpnoti śāśvataṃ kṛṣṇasevanāt || 8 ||
[Analyze grammar]

asyāmeva vrataṃ cānyad bhartṛdvādaśikāvratam |
maṃḍapaṃ kārayitvā ca sarvatobhadramaṇḍalam || 9 ||
[Analyze grammar]

svāstṛtā sukhaśayyāṃ ca sapuṣpāmupakalpayet |
ramāyuktaṃ hari tatra sampūjya ṣoḍaśādibhiḥ || 10 ||
[Analyze grammar]

nīrājayitvā śrīkṛṣṇaṃ svāpayedramayā saha |
vratī jāgaraṇaṃ kuryād gītavāditrapūrvakam || 11 ||
[Analyze grammar]

prātaḥ punaśca sampūjya gandhādyairbhojayecca tam |
saśayyāṃ śrīhariṃ haimaṃ śrīgurave nivedayat || 12 ||
[Analyze grammar]

bhojayitvā dvijān sādhūn visṛjed dakṣiṇāyutān |
evaṃ vratakṛścātra dāmpatyaṃ śāśvataṃ bhavet || 13 ||
[Analyze grammar]

saptajanmasu bhuṃkte'tra bhogān svarge stṛto vratī |
bhartuḥ pūjā prakartavyā patnyā api viśeṣataḥ || 14 ||
[Analyze grammar]

bhartā sākṣād vāsudevaḥ sarvān kāmān dadāti vai |
daihikaṃ laukikaṃ svargyaṃ sukhaṃ sarvaṃ dadāti saḥ || 15 ||
[Analyze grammar]

vaiśākhaśukladvādaśyāṃ hariṃ saṃpūjya mādhavam |
pakvānnaṃ sajalaṃ dadyāt sarvānkāmānavāpnuyāt || 16 ||
[Analyze grammar]

jyeṣṭhaśukladvādaśyāṃ tu prasaṃpūjya trivikramam |
miṣṭaṃ dadyāt karakādi sarvān bhogānavāpnuyāt || 17 ||
[Analyze grammar]

aṣāḍhaśukladvādaśyāṃ vāmanaṃ pūjayetprabhum |
śākavrataṃ prakuryāccā'lavaṇavratamācaret || 18 ||
[Analyze grammar]

dadyād dānāni dharmātmā vastrabhūṣopavītakam |
pātramudrormikādhānyadhanāni gurave'rpayet || 19 ||
[Analyze grammar]

śrāvaṇaśuklādvādaśyāṃ śrīdharaṃ pūjayed vratī |
śākavrataṃ samāpyaiva dadhivrataṃ samācaret || 20 ||
[Analyze grammar]

kauśeyajaṃ pavitraṃ ca śreṣṭhaṃ śrīgurave'rpayet |
dadyād dānāni sarvāṇi yathāśakti sukhī bhavet || 21 ||
[Analyze grammar]

bhādraśukladvādaśikā vrataṃ vāmanajanmanaḥ |
pāyasaṃ haraye dadyāt pūjayet bahuvastubhiḥ || 22 ||
[Analyze grammar]

suvarṇasya śubhāṃ kuryād vāmanārcāṃ śubhānanām |
bālā dvibhujāṃ sacchatradaṇḍakamaṇḍalusrajam || 23 ||
[Analyze grammar]

maṇḍape sarvatobhadre madhyāhne pūjayettu tām |
aditiṃ kaśyapaṃ bhaktaṃ baliṃ devān prapūjayet || 24 ||
[Analyze grammar]

pracurājyasitaiḥ kuryānnaivedyaṃ cūrṇalaḍḍukaiḥ |
phalāhāraṃ caikabhaktaṃ naktaṃ kuryācca vā vratī || 25 ||
[Analyze grammar]

dvādaśī yadi madhyāhne śravaṇarkṣayutā bhavet |
vaikādaśyāṃ tu madhyāhne yadi dvādaśikā bhavet || 26 ||
[Analyze grammar]

śravaṇarkṣa milettatra sa yogo viṣṇuśṛṃkhalaḥ |
bhuktimuttiprado viṣṇusāyujyaprada utsavaḥ || 27 ||
[Analyze grammar]

dvādaśyāmāśvine śukle padmanābhaṃ samarcayet |
bhojayenmadhurānnaṃ ca dadyād dānāni bhūriśaḥ || 28 ||
[Analyze grammar]

śveta dvīpagatiṃ vinded bhogāṃśca vāñchitān śubhān |
kārtike kṛṣṇapakṣe ca govatsadvādaśīvratam || 29 ||
[Analyze grammar]

kuryādvai vidhinā tatra kārayed gāṃ tu kānakīm |
savatsāṃ pūjayet puṣpacandanādibhirādarāt || 30 ||
[Analyze grammar]

bhojayecchubhavastūni hyarghyaṃ dadyāttu pādayoḥ |
māṣādivaṭakān dadyād grāsān dadyāttṛṇādikān || 31 ||
[Analyze grammar]

saṃkalpayecca tānnatvā kṛtvā pradakṣiṇaṃ tathā |
sarvadevamayi mātarmamā'bhilaṣitaṃ kuru || 32 ||
[Analyze grammar]

svargaṃ mokṣaṃ sukhaṃ dehi mātarmātarnamo'stu te |
pūjayitveti dadyācca gavāṃ dānaṃ yathābalam || 33 ||
[Analyze grammar]

taddine goḥ payastakraṃ dadhi ghṛtaṃ vivarjayet |
sthālīpakvaṃ tailapakvaṃ vaikṛtaṃ ca vivarjayet || 34 ||
[Analyze grammar]

mūrtāṃ vatsatarīyuktāṃ pūjayedvā vratī prage |
phalaṃ tu bahulaṃ syādvai pratyakṣārcanasevanāt || 35 ||
[Analyze grammar]

dvādaśyāmūrjaśuklāyāṃ devaṃ dāmodaraṃ priye |
pūjayet ṣoḍaśavastūttamaiśca bhojayeddharim || 36 ||
[Analyze grammar]

kuṃbhāṃśca salilaiḥ pūrṇān vastrapallavapūjitān |
pūgamodakaratnādiphalasvarṇādiśobhitān || 37 ||
[Analyze grammar]

dadyād dāne vratī prītyā gurave bhojayet sataḥ |
evaṃ kṛte priyo viṣṇorjāyate'khilabhogayuk || 38 ||
[Analyze grammar]

dvādaśyāṃ bhūbhṛtā kāryaṃ nīrājanottamavratam |
suptotthito jagannātho hyalaṃkāryo'tivastubhiḥ || 39 ||
[Analyze grammar]

niśāgame navaṃ vahniṃ kṛtvā cābhyarcya mantrataḥ |
hutvā ghṛtādi munyannaṃ raupyadīpikayā janaiḥ || 40 ||
[Analyze grammar]

gandhapuṣpādyarcitayā vratī nīrājayeddharim |
kṛṣṇanārāyanaṃ lakṣmīṃ prabhāṃ ramāṃ ca pārvatīm || 41 ||
[Analyze grammar]

brahmāṇīṃ caṇḍikāṃ gaurīṃ māṇikīṃ maṃgalāṃ tathā |
ādityaṃ śaṃkaraṃ yakṣaṃ nandāṃ gaṇapatiṃ grahān || 42 ||
[Analyze grammar]

mātṝḥ pitṝnnagānnāgānsarvānnīrājayettadā |
gavāṃ nīrājanaṃ kuryānnamo jayeti saṃvadet || 43 ||
[Analyze grammar]

govṛṣāṃśca vājinaśca gajāṃśca lakṣaṇānvitān |
rājacihnāni sarvāṇi chatrādīni navāni ca || 44 ||
[Analyze grammar]

nṛpaṃ purodhasaṃ mantribhṛtyā'ntaḥpuravāsinīḥ |
pūjayitvā yathāyogyaṃ śaṃkhatūryādi vādayet || 45 ||
[Analyze grammar]

alaṃkṛtastato rājā tiṣṭhet siṃhāsane nave |
sabhā'pi paripūrṇā syāttadā veśyā kulāṃganā || 46 ||
[Analyze grammar]

śīrṣopari narendrasya vardhayedakṣataistathā |
kusumaiḥ svarṇamudrābhistato nīrājayennṛpam || 47 ||
[Analyze grammar]

śāntimantrāstadā bhūdevānāṃ śravyāstu bhūbhṛtā |
evameṣā mahāśāntiḥ kartavyā prativāsaram || 48 ||
[Analyze grammar]

rājñā dhanavatā vāpi varṣamārogyamicchatā |
yeṣāṃ rāṣṭre pure grāme kriyate śāntiruttamā || 49 ||
[Analyze grammar]

nīrājanā'bhidhā lakṣmi tadrogā yānti saṃkṣayam |
yathākathaṃcitkartavyā saṃkṣiptā'pi janairiyam || 50 ||
[Analyze grammar]

asyāmeva tu dvādaśyāṃ kṛto vai viṣṇunā purā |
kṛtayuge tu tulasīvivāho vratamuttamam || 51 ||
[Analyze grammar]

uṣṇīṣaṃ dhārayetkṛṣṇanārāyaṇaṃ kusumbhakam |
hemasūtramayaṃ raktaṃ kañcukaṃ cāpi dhārayet || 52 ||
[Analyze grammar]

hemavarṇāṃ śubhāṃ śāṭīṃ tulasīṃ paridhāpayet |
vastrābharaṇapuṣpādiśṛṃgārāṇi sudhāpayet || 53 ||
[Analyze grammar]

guḍaudanaṃ tathā miṣṭaṃ naivedye tu samarpayet |
kadalyādikṛte ramye maṇḍape tu niśāmukhe || 54 ||
[Analyze grammar]

kṛṣṇanārāyaṇaviṣṇuṃ tulasīṃ pūjayed vratī |
upacāraiḥ ṣoḍaśabhirgodhūlisamaye'rcayet || 55 ||
[Analyze grammar]

svarṇāmbaraṃ kaṇṭhasūtraṃ nāsābhūṣāṃ ca kaṃkaṇān |
haridrāṃ kuṃkumādīni tulasyai vai samarpayet || 56 ||
[Analyze grammar]

phalāni cāmṛtādīni sekṣudaṇḍāni cārpayet |
naivedye pītasārāṇi khājakāni samarpayet || 57 ||
[Analyze grammar]

kṛtvā nīrājanaṃ vṛndākṛṣṇayoścāntaraṃ paṭam |
kṛtvā paṭhitvā māṃgalyaṃ vṛndāṃ śrīviṣṇave'rpayet || 58 ||
[Analyze grammar]

sādhūn sādhvīrbrāhmaṇāṃśca bālāṃśca bālikā janān |
bhojayecchaktito dadyād dānāni vividhāni ca || 59 ||
[Analyze grammar]

vṛndāvivāhapadyāni gāpayed rasikāni vai |
ityevamutsavaṃ kuryādakhaṇḍabhāgyarakṣakam || 60 ||
[Analyze grammar]

dvādaśyāṃ mārgaśuklāyāṃ sādhyavratamanuttamam |
manobhavastathā prāṇo naro yātaśca vīryavān || 61 ||
[Analyze grammar]

citirhayo nṛpaścaiva haṃso nārāyaṇastathā |
vibhuḥ prabhurdvādaśaitān sādhyān devān prapūjayet || 62 ||
[Analyze grammar]

sauvarṇāṃstaṇḍulasaṃkalpitān gandhādyamarpayet |
bhojayed bahumiṣṭānnaṃ priyānnārāyaṇastviti || 63 ||
[Analyze grammar]

etasyāmeva kartavyamādityadvādaśīvratam |
dhātā mitro'ryamā pūṣā śakroṃ'śo varuṇo bhagaḥ || 64 ||
[Analyze grammar]

tvaṣṭā vivasvān savitā viṣṇurdvādaśa tān ravīn |
pratimā dvādaśa haimīḥ kṛtvā saṃpūjya bhojayet || 65 ||
[Analyze grammar]

pratimāsaṃ tu śuklāyāṃ varṣamekaṃ vrataṃ caret |
dadyād dānāni sarvāṇi viprān sādhūṃśca bhojayet || 66 ||
[Analyze grammar]

evaṃ kṛtvā vrataṃ prāpya sūryalokaṃ samujjvalam |
bhuktvā bhogāṃściraṃ tatra bhittvā sauryaṃ tu maṇḍalam || 67 ||
[Analyze grammar]

māyāpare paraṃbrahma kṛṣṇanārāyaṇaṃ vrajet |
athātraivā'khaṇḍavrataṃ janārdanasya kārayet || 68 ||
[Analyze grammar]

mūrtiṃ kṛtvā ca sauvarṇīṃ janārdanaṃ prapūjayet |
bhojayet pratimāsaṃ tu varṣamekaṃ vratī tataḥ || 69 ||
[Analyze grammar]

naktāśīstāṃ svarṇamūrtiṃ dhenuṃ vatsayutāṃ śubhām |
arpayed gurave viprān bhojayetpāyasādikam || 70 ||
[Analyze grammar]

prārthayecchrīhariṃ kṛṣṇa vrataṃ cākhaṇḍamastu me |
saubhāgyaṃ ca dhanaṃ dhānyamārogyaṃ nityamastu me || 71 ||
[Analyze grammar]

dadyād dānāni cānyāni paralokārthameva ha |
kṛtvaivaṃ svarṇayānena yāti viṣṇoḥ padaṃ vratī || 72 ||
[Analyze grammar]

pauṣasya kṛṣṇadvādaśyāṃ rūpavratamudīritam |
daśamyāṃ vidhivat snātvā gṛhṇīyād gomayaṃ vratī || 73 ||
[Analyze grammar]

śvetāyā vaikavarṇāyā antarīkṣagataṃ priye |
aṣṭottaraśataṃ tasya piṇḍikāḥ śoṣayettataḥ || 74 ||
[Analyze grammar]

dhṛtvā tāmre mṛtapātre vā rakṣayet havanāya vai |
ekādaśyāṃ sopavāso viṣṇumabhyarcya kānakam || 75 ||
[Analyze grammar]

bhojayejjāgaraṃ kuryād dvādaśyāṃ ca prage punaḥ |
ghaṭe sthālyāṃ hariṃ nyasya pūjayedupacārakaiḥ || 76 ||
[Analyze grammar]

kāṣṭhasaṃgharṣaṇajanyamagniṃ sampūjya piṇḍikām |
ekaikāṃ homayet tilaghṛtādyuktāṃ tu śārṅgiṇaḥ || 77 ||
[Analyze grammar]

śatamaṣṭottaraṃ homaṃ dvādaśākṣaravidyayā |
nāmabhirvā prakuryād bhojayetpāyasapūrikāḥ || 78 ||
[Analyze grammar]

ghaṭamūrtiṃ tu gurave'rpayetsaṃbhojayed dvijān |
natvā virsajayennārī naro vā vratamādarāt || 79 ||
[Analyze grammar]

kṛtvaivaṃ labhate rūpaṃ saubhāgyaṃ cottamottamam |
pauṣaśuvale sujanmadvādaśīvratamathocyate || 80 ||
[Analyze grammar]

snātvā prātaśca gośṛṃgavāri pītvā praṇamya ca |
pradakṣiṇāṃ tathā kṛtvā gṛhṇīyād vārṣikaṃ vratam || 81 ||
[Analyze grammar]

pratimāsaṃ tataḥ śukle dvādaśyāṃ dānamācaret |
ghṛtaprasthaṃ pradadyācca vrīhiprasthacatuṣṭayam || 82 ||
[Analyze grammar]

yavaprasthacatuṣkaṃ ca hema dviraktikaṃ vratī |
tilā''ḍhakārdhaṃ dugdhaṃ tu ghaṭapūrṇaṃ samarpayet || 83 ||
[Analyze grammar]

raupyasya māsamekaṃ ca miṣṭānnāni bahūni ca |
chatraṃ māṣārdhahemnaśca prastha phāṇitamuttamam || 84 ||
[Analyze grammar]

candanaṃ palikaṃ vastraṃ daśahastamitaṃ śubham |
pratimāsaṃ tathā dānaṃ vratī dadyād yathābalam || 85 ||
[Analyze grammar]

gomūtraṃ jalamājyaṃ vā pibed vratī praśuddhaye |
dadhiyuktaṃ yavānnaṃ ca tilājyaṃ tu saśarkaram || 86 ||
[Analyze grammar]

kṣīraṃ darbhāmbunā yuktaṃ śākaṃ yatheṣṭameva ca |
bhakṣayetpratimāsaṃ vai varṣaṃ yāvattu bhāvataḥ || 87 ||
[Analyze grammar]

raveḥ pratimāṃ sauvarṇīṃ tāmrapātre samarcya ca |
arpayed gurave tāṃ sadhenuṃ ca praṇamettataḥ || 88 ||
[Analyze grammar]

viprān sādhūṃstathāsādhvīrbhojayitvā visarjayet |
vratavāṃllabhate janma dhanāḍhye hyuttame kule || 89 ||
[Analyze grammar]

sarvasmṛddhimaye bhojyabhojanaujaḥpraśālini |
ratiśaktyāśraye śreṣṭhāṃganāsaṃsevite kule || 90 ||
[Analyze grammar]

tato bhogānasaṃkhyātānatra bhuktvā divi dhruve |
devabhogān prabhuktvaiva vaikuṇṭhaṃ yāti śāśvatam || 91 ||
[Analyze grammar]

māghasya śukladvādaśyāṃ śālagrāmaṃ prapūjayet |
raupya pātre prasaṃsthāpya suvarṇaṃ tanmukhe'rpayet || 92 ||
[Analyze grammar]

bhojayetpāyasānnena khāṇḍājyasahitena ca |
pradadyād vedaviduṣe vastrābharaṇabhūṣitam || 93 ||
[Analyze grammar]

vratī yāyāttu vaikuṇṭhaṃ śāśvatānandabhāg bhavet |
phālgunaśukladvādaśyāṃ sauvarṇīṃ pratimāṃ hareḥ || 94 ||
[Analyze grammar]

abhyarcya gurave dadyād bhojayed bālabālikāḥ |
vrataṃ kṛtvā jano yāti śrīkṛṣṇamandiraṃ yataḥ || 95 ||
[Analyze grammar]

bhuktvā bhogānalabhyāṃśca śāśvataṃ sukhamaśnute |
trispṛśānmīlanī pakṣavardhinī vaṃjulī tathā || 96 ||
[Analyze grammar]

jayā ca vijayā caiva jayantī cāparājitā |
etā aṣṭau sadopoṣyā dvādaśyaḥ pāpahārikāḥ || 97 ||
[Analyze grammar]

ekādaśī nivṛttā cetsūryasyodayataḥ purā |
tadā tu trispṛśānāma dvādaśī sā mahāphalā || 98 ||
[Analyze grammar]

asyā vratenāśvamedhasahasraphalamaśnute |
yadā'ruṇodaye daśamyā viddhaikādaśī tithiḥ || 99 ||
[Analyze grammar]

tadā tāṃ samparityajya dvādaśīṃ samupoṣayet |
sonmīlitā rājasūyasahasraphaladāyinī || 100 ||
[Analyze grammar]

yadodaye tu savituryāmyā tvekādaśī spṛśet |
tadā vaṃjulikā sā tu sarvakratuphalapradā || 101 ||
[Analyze grammar]

kuhūrāke yadā vṛddhe syātāṃ sā pakṣavardhinī |
sarvaiśvaryapradā sā vai putrapautravivardhinī || 102 ||
[Analyze grammar]

yadā tu dhavale pakṣe dvādaśī syānmaghānvitā |
tadā proktā jayā nāma sarvatra jayadā matā || 103 ||
[Analyze grammar]

śravaṇarkṣayutā cetsyād dvādaśī dhavale dale |
vijayā sā sarvatīrthaphaladā sukhabhogadā || 104 ||
[Analyze grammar]

yadā syācca site pakṣe prājāpatyarkṣasaṃyutā |
dvādaśī sā jayantyākhyā vratadānaphalapradā || 105 ||
[Analyze grammar]

yadā tu syāt site pakṣe dvādaśī jīvabhānvitā |
tadā'parājitā jñānamuktidā pāpanāśinī || 106 ||
[Analyze grammar]

yadā tvāṣāḍhaśuklāyā dvādaśyāṃ maitrabhaṃ bhavet |
tadā vratadvayaṃ kāryaṃ na doṣo'traikadaivatam || 107 ||
[Analyze grammar]

śravaṇarkṣayutāyāṃ ca dvādaśyāṃ bhādraśuklake |
ūrje sitāyāṃ dvādaśyāmantyabhe ca vratadvayam || 108 ||
[Analyze grammar]

etābhyo'nyatra kartavyaṃ dvādaśyāmekabhuktakam |
ekādaśyā sahitaṃ vai vrataṃ dvādaśikādinam || 109 ||
[Analyze grammar]

pṛthaṅnodyāpanaṃ kāryaṃ dānaṃ kāryaṃ yathādhanam |
iti vratāni kamale kāryāṇi dvādaśīdine || 110 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne vārṣikadvādaśīvrateṣu madanavratabhartṛdvādaśīmādhavakarakaśā |
kā'lavaṇadadhivratapavitrāropaṇavāmanajayantīpadmanābhavratagovatsadvādaśīdāmodaranīrājanavratatulasīvivāha |
sādhyādityarūpavratasujanmadvādaśīśālagrāmaharipūjātrispṛśonmīlanīpakṣavardhinīvaṃjulījayāvijayājayantyaparājitā |
dvādaśyādinirūpaṇanāmāsaptasaptatyadhikadviśatatamo'dhyāyaḥ || 277 ||
[Analyze grammar]