Chapter 276

śrīnārāyaṇa uvāca |
prāk kathitāni te lakṣmi hyekādaśīvratāni yat |
tāni tridinasādhyāni sampūrṇāni vratāni vai || 1 ||
[Analyze grammar]

tyajeccatvāri bhuktāni padmaje vai dinatraye |
ādyantayorekamekaṃ madhyame dvayameva ca || 2 ||
[Analyze grammar]

kāṃsyaṃ māṃsaṃ masūrānnaṃ caṇakānkodravāṃstathā |
śākaṃ madhu parānnaṃ ca punarbhojanamaithunaṃ || 3 ||
[Analyze grammar]

daśamyāṃ daśa vastūni varjayettu vratī sadā |
dyūtakrīḍāṃ ca nidrāṃ ca tāmbūlaṃ dantadhāvanam || 4 ||
[Analyze grammar]

parāpavādaṃ paiśunyaṃ steyaṃ hiṃsāṃ tathā ratim |
kopaṃ hyanṛtavākyaṃ ca hyekādaśyāṃ vivarjayet || 5 ||
[Analyze grammar]

kāṃsyaṃ māṃsaṃ surāṃ kṣaudraṃ tailaṃ viṇmlecchabhāṣaṇam |
vyāyāmaṃ ca pravāsaṃ ca punarbhojanamaithune || 6 ||
[Analyze grammar]

aspṛśyasparśamityetān dvādaśyāṃ daśa varjayet |
ekabhuktaṃ ca vā naktaṃ kṛtvā'pi vratamācaret || 7 ||
[Analyze grammar]

śrāvaṇaśuklaikādaśyāṃ pavitraṃ haraye'rpayet |
haimaṃ raupyaṃ kauśeyajaṃ kṣaumaṃ kauśaṃ kārpāsajam || 8 ||
[Analyze grammar]

ṣaṣṭyādhikatriśatatantujaṃ śreṣṭhaṃ pavitrakam |
sādhāraṇaṃ trisūtrotthaṃ madhyamaṃ tu yatheṣṭakam || 9 ||
[Analyze grammar]

uttamaṃ śatagranthi ṣaḍtriṃśadgranthi kaniṣṭhakam |
śreṣṭhamājānulambi kaniṣṭhaṃ nābhispṛśaṃ matam || 10 ||
[Analyze grammar]

pūjanaṃ śrīkṛṣṇanārāyaṇasya ramayā saha |
kurvīteha sukhī devā vaikuṇṭhaṃ cāpnuyātparam || 11 ||
[Analyze grammar]

dvādaśyāmapi gurave śrīkṛṣṇāyāpi cārpayet |
pavitrāṇi tu ramyāṇi sukhasampatkarāṇi hi || 12 ||
[Analyze grammar]

atha bhādrapade māsi śuklaikādaśikādine |
dānilīlāṃ hareḥ kuryāt kālindyāṃ nāvi tu prabhoḥ || 13 ||
[Analyze grammar]

dadhi nītvā vikrayārthaṃ yāntīrgopīrayācata |
karaṃ dāṇamiti tasya tadā padāni gāpayet || 14 ||
[Analyze grammar]

naivedye ca dadhiṃ bhaktaṃ dadyāt kṛṣṇāya vai vratī |
kaṭidānaṃ dadhidānaṃ śrīkṛṣṇāya prakalpayet || 15 ||
[Analyze grammar]

atha kārtikaśuklaikādaśyāṃ dharmārcanotsavaḥ |
dharmajanmanimitto madhyāhne kāryo vratārthinā || 16 ||
[Analyze grammar]

svarṇamūrtiṃ racayitvā sarvatobhadramaṇḍale |
maṇḍapāntargate tāmre ghaṭe nidhāya pūjayet || 17 ||
[Analyze grammar]

caturvaktraṃ caturbāhuṃ catuṣpādaṃ sitāmbaram |
śvetavarṇaṃ kare dakṣe mālāṃ vāme ca pustakam || 18 ||
[Analyze grammar]

dadhānaṃ dakṣiṇe pārśve vyavasāyaṃ sumūrtakam |
vāmapārśve sukhaṃ nyasya sānnidhye bhaktimeva ca || 19 ||
[Analyze grammar]

pūjāpātraṃ dhṛtavatīṃ pūjayed bhāvato vratī |
ṣoḍaśakairupacāraiḥ pūjayitvā'tha bhojayet || 20 ||
[Analyze grammar]

visarjayenniśi kṛtvā jāgaraṃ pūjanaṃ prage |
dadyād dānāni cānyāni dharmabhaktibalaṃ bhavet || 21 ||
[Analyze grammar]

dharmeṇa saha tatpatnya śraddhādyā vai trayodaśa |
dakṣaputryaḥ susaṃsthāpyā bhojyāḥ pūjyā vidhānataḥ || 22 ||
[Analyze grammar]

dharmasyemā dharmapatnyaḥ śraddhā śāntirdayā gatiḥ |
medhā tuṣṭistathā puṣṭirmaitrī lajjā kriyonnatiḥ || 23 ||
[Analyze grammar]

mūrtibuddhirdivyarūpā nāmāntareṇa vāpi tāḥ |
suvarṇamūrtayaḥ kāryāstāsāṃ vaṃśo'pi vistṛtaḥ || 24 ||
[Analyze grammar]

pūjanīyo viśeṣeṇa paralokaṃ samicchatā |
tannimittāni dānāni pradeyānyuttamānyapi || 25 ||
[Analyze grammar]

ityekādaśikāsādhyaṃ tapo vrataṃ vratī caret |
bhuktiṃ muktiṃ vrajed yadyadiṣṭaṃ tatsarvamāpnuyāt || 26 ||
[Analyze grammar]

ekādaśīnāṃ sarvāsāṃ vratānyuktāni prāgyathā |
vidhivat tadvratānyatra kṛtau grāhyāṇi sarvathā || 27 ||
[Analyze grammar]

udyāpanāni sarveṣāṃ kartavyāni vidhānataḥ |
bhuktiṃ muktiṃ vrajet kartā naro nārī napuṃsakam || 28 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne ekādaśīpālyaniyamapavitrāropaṇavratadānilīlāvratadharma |
jayantyādivratanirūpaṇanāmā ṣaṭsaptatyadhikadviśatatamo'dhyāyaḥ || 276 ||
[Analyze grammar]