Chapter 275

śrīnārāyaṇa uvāca |
athānyāni daśamyāste vratāni kathayāni vai |
yāni kṛtvā mahālakṣmi janaḥ svargaṃ śamāpnuyāt || 1 ||
[Analyze grammar]

caitraśukladaśamyāṃ vai dharmarājavrataṃ caret |
snānapuṣpaphalagandhā'mbarabhūṣābhirarcayet || 2 ||
[Analyze grammar]

ekabhakto vratī caturdaśaviprān samarcayet |
bhojayed dakṣiṇāṃ dadyāt kṛtvaivaṃ svargamāpnuyāt || 3 ||
[Analyze grammar]

vaiśākhaśukladaśamītithau viṣṇuṃ prapūjayet |
ṣoḍaśabhistūpacāraiḥ śataṃ kuryāt pradakṣiṇāḥ || 4 ||
[Analyze grammar]

sādhūn viprān bhojayitvā vaikuṇṭhaṃ labhate dhruvam |
jyeṣṭhaḥ śukladalaṃ hasto budhaśca daśamī tithiḥ || 5 ||
[Analyze grammar]

garānandavyatīpātāḥ kanyenduvṛṣabhāskarāḥ |
daśayogo mahāpuṇyo daśapāpaharo hi saḥ || 6 ||
[Analyze grammar]

gaṃgādaśaharā bodhyā gaṃgā svargāt samāgatā |
gaṃgāyāṃ vidhinā snātvā prayāti harimandiram || 7 ||
[Analyze grammar]

aṣāḍhaśukladaśamī manvādyātithirasti yat |
asyāṃ snānaṃ japo dānaṃ homo vā svargatipradāḥ || 8 ||
[Analyze grammar]

śrāvaṇe śukladaśamī sarvāśāparipūrtidā |
śivārcanaṃ prakuryādvai dānahomādipūrvakam || 9 ||
[Analyze grammar]

bhādraśukladaśamyāṃ ca daśāvirbhāvasadvratam |
tīrthe snānaṃ tathā kuryād devarṣipitṛtarpaṇam || 10 ||
[Analyze grammar]

daśāvatārapūjāṃ ca kuryāt pṛthag vratī svayam |
matsyaṃ kūrmaṃ varāhaṃ ca narasiṃhaṃ trivikramam || 11 ||
[Analyze grammar]

rāmaṃ kṛṣṇaṃ jāmadagniṃ bauddhaṃ kalkiṃ prapūjayet |
daśamūrtīstu sauvarṇīḥ pūjayitvā'rpayed vratī || 12 ||
[Analyze grammar]

dvijāya caikabhaktaṃ ca kṛtvā sādhūn subhojayet |
evaṃ kṛtvā vrataṃ bhuktvā svargaṃ vaikuṇṭhamāpnuyāt || 13 ||
[Analyze grammar]

āśvinaśukladaśamī vijayādaśamī matā |
caturgomayapiṇḍāni prātarnyasya gṛhāṃgaṇe || 14 ||
[Analyze grammar]

cakrarūpeṣu madhye'tra vāsudevasukarṣaṇau |
pradyumnamaniruddhaṃ ca pūjayeccaturo'pi hi || 15 ||
[Analyze grammar]

sapidhānāsu pātrīṣu gomayīṣu catusṛṣu |
klinnaṃ dhānyaṃ saraupyaṃ ca dhṛtvā śuklāmbarā''vṛtam || 16 ||
[Analyze grammar]

saṃpūjyā'kṣatapuṣpādyairnamaskurvīta vai tataḥ |
madhyāhne bhojayedbālān miṣṭamadyāttathā vratī || 17 ||
[Analyze grammar]

athā'parāhṇe pūrvasyāṃ śamīmūlasthamṛttikām |
gṛhītvā svagṛhaṃ nītvā saṃpūjyāpi vidhānataḥ || 18 ||
[Analyze grammar]

kṣatriyaścet svakaṃ sainyaṃ sajjīkṛtya ca sarvathā |
nirgatya pūrvadvāreṇa grāmādbahiranākulaḥ || 19 ||
[Analyze grammar]

śatrupratikṛtiṃ tatra nirmitāṃ patrakādibhiḥ |
manasā kalpitāṃ tāṃ ca svarṇapuṃkhaśareṇa saḥ || 20 ||
[Analyze grammar]

vidhyediti bhṛśaṃ prītaḥ prāpnuyāt svagṛhaṃ tataḥ |
paścād yuddhaṃ prakuryācced vijayī syānna saṃśayaḥ || 21 ||
[Analyze grammar]

dhanaṃ jayaṃ mahārājyaṃ sutagogajavājinaḥ |
ajāvikamiha dadyādante svargagatiṃ tathā |
śrīrāmaḥ prasthitaścādya vijayāyotsavaṃ caret || 22 ||
[Analyze grammar]

daśamyāṃ kārtike śukle sārvabhaumavrataṃ caret |
ekabhukto vratī tatra niśīthe'pūpakādibhiḥ || 23 ||
[Analyze grammar]

daśa dikṣu baliṃ dadyād gṛhādvāpi purād bahiḥ |
gośakṛlliptabhūbhāge maṇḍale'ṣṭadale vratī || 24 ||
[Analyze grammar]

balidānaṃ prakurvīta vadannaitādṛśaṃ tadā |
yanme pūrvagataṃ pāpamindro dhunotu ceṣṭadaḥ || 25 ||
[Analyze grammar]

yanme vahnigataṃ pāpaṃ vahnirdhunotu ceṣṭadaḥ |
yanme dakṣagataṃ pāpaṃ yamo dhunotu ceṣṭadaḥ || 26 ||
[Analyze grammar]

yanme nairṛtigaṃ pāpaṃ rakṣo dhunotu ceṣṭakṛt |
yanme paścimage pāpaṃ yādo dhunotu ceṣṭakṛt || 27 ||
[Analyze grammar]

yanme vāyugataṃ pāpaṃ vāyurdhunotu ceṣṭadaḥ |
yanme saumyagataṃ pāpaṃ yakṣo dhunotu ceṣṭadaḥ || 28 ||
[Analyze grammar]

yanme tvīśagataṃ pāpaṃ ceśo dhunotu ceṣṭadaḥ |
yanme ūrdhvagataṃ pāpaṃ brahmā dhunotu ceṣṭadaḥ || 29 ||
[Analyze grammar]

yanme'dhaḥsaṃgataṃ pāpaṃ nāgo dhunotu ceṣṭadaḥ |
evaṃ datvā baliṃ dikṣu vidikṣu ca vratī tataḥ || 30 ||
[Analyze grammar]

kṣetrapālāya tadbāhye kṣiped balimatandritaḥ |
śeṣarātrau jāgaraṇaṃ kuryād gṛhaṃ samāgataḥ || 31 ||
[Analyze grammar]

prātaḥ snātvā samabhyarcya lokapālāṃstato dvijān |
dvādaśā'bhyarcya saṃbhojayitvā dadyācca dakṣiṇām || 32 ||
[Analyze grammar]

itthaṃ kṛtvā vrataṃ lakṣmi bhogān bhuktvaihikān śubhān |
yugaṃ svargasukhaṃ bhuktvā sārvabhaumo nṛpo bhavet || 33 ||
[Analyze grammar]

mārgaśukladaśamyāṃ tvaśvinīkumāramarcayet |
dhanvantariṃ pūjayeccārogyaṃ bhavati sarvadā || 34 ||
[Analyze grammar]

pauṣaśukladaśamyāṃ tu viśvedevān samarcayet |
kratuṃ dakṣaṃ vasūn satyaṃ kālaṃ kāmaṃ muniṃ gurum || 35 ||
[Analyze grammar]

vipraṃ rāmaṃ kṛṣṇanārāyaṇarūpān samarcayet |
darbhāsaneṣu sannyasya dhūpadīpanivedanaiḥ || 36 ||
[Analyze grammar]

ṣoḍaśavastubhiḥ saṃpūjayitvā tān visarjayet |
vratī lokadvayasaukhyabhoktā bhavati sarvathā || 37 ||
[Analyze grammar]

māghaśukladaśamyāṃ vai tvāṃgirasānsamarcayet |
ātmā hyāyurmano dakṣo madaḥ prāṇo gaviṣṭhakaḥ || 38 ||
[Analyze grammar]

dattaḥ satyaśca varhiṣmān daśā'rcayet suvastubhiḥ |
upacāraiḥ ṣoḍaśādyairmūrtīrdadyād dvijātaye || 39 ||
[Analyze grammar]

āṃgirasānparān lokānāpnotyevaṃ vratī vrate |
phālgunaśukladaśamītithau yamān prapūjayet || 40 ||
[Analyze grammar]

yamaśca dharmarājaśca mṛtyuścaivāntakastathā |
vaivasvataśca kālaśca sarvabhūtakṣayastathā || 41 ||
[Analyze grammar]

audumbaraśca dadhnaśca nīlaścaiva vṛkodaraḥ |
parameṣṭhī tathā citraścitraguptaścaturdaśa || 42 ||
[Analyze grammar]

pūjayettān bhojayecca tarpayecca tilāṃbubhiḥ |
tataḥ sūryāya cārghyaṃ ca dadyādvai tāmrapātrataḥ || 43 ||
[Analyze grammar]

raktacandanasammiśratilā'kṣatayavāṃbubhiḥ |
bhojayed vāḍavān paścād vratī bhuṃjīta vāgyataḥ || 44 ||
[Analyze grammar]

evaṃ vratī dharmarājaprasannatāmavāpya ca |
atra bhogānparān bhuktvā dehānte viṣṇudhāmabhāk || 45 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vārṣikadaśamīvrateṣu dharmarājavrataviṣṇuvratagaṅgādaśaharāmanvāditithisarvāśāpūrtivratadaśāvatārapūjāvijayādaśamīsārvabhaumavratā''rogyavrataviśvedevāṃgirasayamavratādipradarśananāmā pañcasaptatyadhikadviśatatamo'dhyāyaḥ || 275 ||
[Analyze grammar]