Chapter 269

śrīnārāyaṇa uvāca |
lakṣmi śṛṇu kathayāmi caturthīnāṃ vratāni te |
yāni kṛtvā naro nārī bhuktiṃ muktiṃ vrajet parām || 1 ||
[Analyze grammar]

golokādhipatiḥ kṛṣṇaḥ pārvatyāḥ śaṃkaragṛhe |
śarīrāktadhātuyogādutpanno yastvabhūt prabhuḥ || 2 ||
[Analyze grammar]

sa vai kṛṣṇaścaturdhā'sti vāsudevasvarūpakaḥ |
saṃkarṣaṇasvarūpaśca pradyamnarūpakastathā || 3 ||
[Analyze grammar]

aniruddhasvarūpaśca tasmāt sa gaṇanāyakaḥ |
caturmūrtisvarūpo'sti vratānyapi tathā tathā || 4 ||
[Analyze grammar]

caitramāsacaturthyāṃ tu vāsudevasvarūpiṇam |
gaṇeśaṃ samyagabhyarcya datvā suvarṇadakṣiṇām || 5 ||
[Analyze grammar]

āvāhanādi cārabhya visarjanāntameva yat |
kṛtvā vidhānataḥ sarvaṃ viṣṇulokamavāpnuyāt || 6 ||
[Analyze grammar]

ekabhuktaṃ vrataṃ kāryaṃ bhojye deyāstu laḍḍukāḥ |
dūrvāsindūrakau deyau pūjane vratinā tathā || 7 ||
[Analyze grammar]

anyānyapi ca dānāni deyāni kṛṣṇatuṣṭaye |
svayaṃ tu pāraṇāṃ laḍḍukānāṃ kuryād vratī śubhām || 8 ||
[Analyze grammar]

evaṃ kṛtvā vrataṃ loke bhuktiṃ muktiṃ samāpnuyāt |
prasādya viṣṇuṃ vaikuṇṭhaṃ gacched devābhivanditaḥ || 9 ||
[Analyze grammar]

vaiśākhasya caturthyāṃ tu pūjyaḥ saṃkarṣaṇābhidhaḥ |
āvāhanādvisarjanaparyantaṃ vividhaṃ vidhim || 10 ||
[Analyze grammar]

kṛtvā saṃpūjayed devaṃ gaṇeśaṃ bhojayed bahu |
śaṃkhadānaṃ tathā cānyaddānaṃ kuryād yathābalam || 11 ||
[Analyze grammar]

tena puṇyena vratakṛd bhūtvā divyavapurdharaḥ |
prāpya saṃkarṣaṇaṃ lokaṃ modate bahukalpakam || 12 ||
[Analyze grammar]

jyeṣṭhaśuklacaturthyāṃ tu pūjyaḥ pradyumna īśvaraḥ |
ṣoḍaśabhirupacāraiḥ pūjayitvā gaṇādhipam || 13 ||
[Analyze grammar]

phalaṃ mūlaṃ jalaṃ dūrvāṃ datvā vai bhāvato vratī |
tena puṇyena saṃyāti prādyumnaṃ svargameva vai || 14 ||
[Analyze grammar]

āṣāḍhasya caturthyāṃ tu pūjanīyo'niruddhakaḥ |
āvāhanātsamārabhya visarjanāntamarcanam || 15 ||
[Analyze grammar]

kuryād vividhapuṣpādyaiḥ phalairbhojyādibhistathā |
dadyād dānāni bahūni kuryānnīrājanādikam || 16 ||
[Analyze grammar]

kṣamāṃ ca prārthayed dāne'lābupātrāṇi tumbikā |
kāṣṭhapātrāṇyapi dadyāt sādhave nyāsine vratī || 17 ||
[Analyze grammar]

evaṃ kṛtvā vratī yāyādaniruddhālayaṃ param |
caturmūrtivratānyevaṃ kṛtvā dvādaśa vatsarān || 18 ||
[Analyze grammar]

mahadudyāpanaṃ kuryānmaṇḍape maṇḍale śubhe |
suvarṇasya ghaṭaṃ nyasya paṃcaratnādisaṃyutam || 19 ||
[Analyze grammar]

pañcāyatanaṃ gāṇeśaṃ vinyasya vidhinā tataḥ |
pūjanaṃ ṣoḍaśavastūttamaiḥ kuryād vratī janaḥ || 20 ||
[Analyze grammar]

gītavāditranirghoṣairvedamantraiḥ stavaistathā |
homairjapaistathā bhojyairvastudānādibhistathā || 21 ||
[Analyze grammar]

mahotsavaṃ śubhaṃ kuryādgaṇeśakṛṣṇatuṣṭaye |
evaṃ vodyāpane jāte pūrṇaṃ vrataphalaṃ bhavet || 22 ||
[Analyze grammar]

bhuktiṃ muktiṃ svayaṃ kṛṣṇo dadātyatra paratra ca |
yadyadicchati vratakṛt svargaṃ sarvamavāpnuyāt || 23 ||
[Analyze grammar]

anyajjyeṣṭhacaturthyāṃ tu satīvratamudāhṛtam |
brāhmadakṣādasiknyāṃ vai satī jātā purā yataḥ || 24 ||
[Analyze grammar]

satījanmotsavaṃ kuryād vratī tvekānnamityapi |
phalaṃ vā copavāsaṃ vā mahat kuryācca pūjanam || 25 ||
[Analyze grammar]

evaṃ satīvrataṃ kṛtvā datvā dānāni viṣṇave |
vratī gaṇapatermāturloke modeta tatsamam || 26 ||
[Analyze grammar]

tathā''ṣāḍhacaturthyāṃ tu vrataṃ cānyad bhavecchubham |
rathantarā''hvakalpasyā''dyabhūtaṃ vai dinaṃ yataḥ || 27 ||
[Analyze grammar]

śraddhāpūtena manasā kalpaṃ rathantarāhvayam |
kālarūpaṃ kṛṣṇarūpaṃ gaṇeśaṃ vā prapūjayet || 28 ||
[Analyze grammar]

ekabhuktaṃ vrataṃ kuryāt phalaṃ svargaṃ labhed vratī |
śrāvaṇasya caturthyāṃ tu prage madhye niśāmukhe || 29 ||
[Analyze grammar]

śrīgaṇeśaṃ pūjayedvai sarvavidhiprapūrvakam |
candrodaye tathā jāte punastaṃ pūjayed vratī || 30 ||
[Analyze grammar]

arghyaṃ dadyād bhojanādi sindūrādi samarpayet |
lambodaraṃ caturbāhuṃ trinetraṃ raktapāṇḍuram || 31 ||
[Analyze grammar]

naikaratnavibhūṣāḍhyaṃ prasannāsyaṃ vicintayet |
āvāhanādibhiḥ sarvairupacāraiḥ samarcayet || 32 ||
[Analyze grammar]

naivedye modakān dadyād gaṇeśatuṣṭidān vratī |
evaṃ vrataṃ vidhāyaiva bhuktvā prasādamodakān || 33 ||
[Analyze grammar]

rātrau bhūśayanaṃ kuryātprātaḥ samarcayetpunaḥ |
dānāni dadyād bahūni gaṇeśakṛṣṇatuṣṭaye || 34 ||
[Analyze grammar]

vratasyā'sya pratāpena kāmān labdhvā manogatān |
pare loke paraṃ sthānaṃ gaṇeśapadamāpnuyāt || 35 ||
[Analyze grammar]

tasmātkāryaṃ prayatnena kāmānsarvānabhīpsatā |
nānena sadṛśaṃ tvanyat vidyate vratamuttamam || 36 ||
[Analyze grammar]

asminneva dine lakṣmi dūrvāgaṇeśapūjanam |
kartavyaṃ tadvidhānaṃ te vadāmi pūrṇapuṇyakṛt || 37 ||
[Analyze grammar]

suvarṇasya gaṇādhyakṣaṃ vidhāya tāmrapātrake |
sthāpayitvā ca tatpātraṃ sarvatobhadramaṇḍale || 38 ||
[Analyze grammar]

nyasyet tadveṣṭitaṃ kuryād raktāmbareṇa vai tataḥ |
pūjayedraktakusumaiḥ patraiḥ pañcabhireva ca || 39 ||
[Analyze grammar]

bilbapatramapāmārgaḥ śamī dūrvā haripriyā |
etatpatraiśca kusumaiḥ pūjayet satphalādibhiḥ || 40 ||
[Analyze grammar]

bhojayenmodakādīni śubhāṃ dadyāttu dakṣiṇām |
arghyaṃ dadyādupahāraṃ śayyāṃ sopaskarāṃ tathā || 41 ||
[Analyze grammar]

vighneśātmakagurave satkṛtya vinivedayet |
kṛtvaivaṃ pañcavarṣāṇi vrataṃ gaṇapateḥ śubham || 42 ||
[Analyze grammar]

bhuktveha bhogānakhilān lokaṃ gaṇapatervrajet |
iha loke bhavetsmṛddhaḥ pare loke mahāsukhaḥ || 43 ||
[Analyze grammar]

śrāvaṇe śukla pakṣe tu caturthyāṃ bhaumavāsare |
madhyāhne brahmaṇo nasto varāho jajña īśvaraḥ || 44 ||
[Analyze grammar]

varāharūpaṃ sauvarṇaṃ kṛtvā taṃ pūjayed vratī |
dhārayet tatra vāsāṃsi kausuṃbhāni ramāpatim || 45 ||
[Analyze grammar]

naivedye pāyasaṃ dadyādghaṭakāṃśca viśeṣataḥ |
varāhajanmapadyāni gāpayetpūjayettathā || 46 ||
[Analyze grammar]

ṣoḍaśā'bhisūpacāraistataḥ kuryāttu bhojanam |
narāṃgaṃ sūkarāsyaṃ ca caturbāhuṃ ca sāyudham || 47 ||
[Analyze grammar]

dharāṃ gṛhītvā dantāgre śobhantaṃ dānamācaret |
evaṃ kṛtvā vrataṃ viṣṇorvaikuṇṭhaṃ prāpnuyād vratī || 48 ||
[Analyze grammar]

athabhādracaturthyāṃ tu bahulādhenusadvratam |
gaṇeśo'pi samutpannaḥ pārvatīśayane sutaḥ || 49 ||
[Analyze grammar]

gaṇeśasya vrataṃ cāpi prakṛṣṭotsavapūrvakam |
kartavyaṃ vidhinā lakṣmi dinacatuṣṭayātmakam || 50 ||
[Analyze grammar]

haritavallikāvṛkṣaśākhākadalītoraṇaiḥ |
maṇḍapaḥ śobhanaḥ kāryaḥ sarvatobhadramaṇḍalam || 51 ||
[Analyze grammar]

kartavyaṃ ca gaṇeśo'pi mṛdā vā dhātunāpi vā |
suvarṇena ca raupyeṇa tāmreṇa maṇinā'pi vā || 52 ||
[Analyze grammar]

kartavyaścāpi sindūrakuṃkumādibhirityam |
śobhanīyastathā pūjanīyaḥ ṣoḍaśavastubhiḥ || 53 ||
[Analyze grammar]

nityaṃ rātrau pūjanīyo vratinā laḍḍukādibhiḥ |
toṣaṇīyaśca nityaṃ saḥ prārthanīyaḥ sukhāptaye || 54 ||
[Analyze grammar]

dānaṃ deyaṃ ca vividhaṃ naktabhojī vratī bhavet |
ante visarjanaṃ vārṣuṃ kāryaṃ gaṇapatermudā || 55 ||
[Analyze grammar]

evaṃ kṛtvā vrataṃ bhuktiṃ muktiṃ vai prāpnuyād vratī |
pūrṇe varṣe gate māturājñayā śraddhayā tathā || 56 ||
[Analyze grammar]

gaṇeśena kṛtā pradakṣiṇā goratra vai dine |
tasmādvratamidaṃ proktaṃ bahulādhenusaṃjñakam || 57 ||
[Analyze grammar]

pūjanīyā'tra yatnena sraggandhayavasādibhiḥ |
tataḥ pradakṣiṇāṃ kuryācchaktaśceddānamācaret || 58 ||
[Analyze grammar]

aśaktaḥ punaretāṃ tu namaskṛtya visarjayet |
paṃcābdaṃ vā daśābdaṃ vā ṣoḍaśābdamathāpi vā || 59 ||
[Analyze grammar]

vrataṃ kṛtvodyāpanaṃ ca dhenuṃ datvā payasvinīm |
vrataṃ samāpayetpatnīṃ padminīmāpnuyātphalam || 60 ||
[Analyze grammar]

atra bhogānparān bhuktvā satkṛto devatāgaṇaiḥ |
patnyā putrādinā sākaṃ golokaṃ samavāpnuyāt || 61 ||
[Analyze grammar]

atra śuklacaturthyāṃ vai siddhivaināyakavratam |
kartavyaṃ śrīgaṇeśasya pūjanaṃ vratinā''darāt || 62 ||
[Analyze grammar]

āvāhanādibhiḥ sarvairupacāraiśca modakaiḥ |
ekāgramanasā dhyāyed gaṇeśaṃ siddhināyakam || 63 ||
[Analyze grammar]

viśvakarmasutāyāśca ṛddheḥ siddheśca nāyakaḥ |
vivāhenā'dya saṃjāto gaṇeśaḥ siddhināyakaḥ || 64 ||
[Analyze grammar]

tasmāttaṃ pūjayedekadantaṃ suvarṇasannibham |
pāśāṃkuśadharaṃ devaṃ gajavaktraṃ caturbhujam || 65 ||
[Analyze grammar]

śūrpakarṇaṃ sindūrādicarcitaṃ tundilaṃ śubham |
dhyātvā cārghyaṃ samarpyaiva punaśca pūjayed vratī || 66 ||
[Analyze grammar]

ekaviṃśatipatrāṇi tvekaviṃśatināmabhiḥ |
samarpayet vratī tāni nāmāni ca yathā śṛṇu || 67 ||
[Analyze grammar]

sumukhāya śamīpatraṃ gaṇādhīśāya bhṛṃgajam |
umāputrāya bailvaṃ tu dūrvāṃ gajamukhāya ca || 68 ||
[Analyze grammar]

lambodarāya badarīṃ dhattūraṃ harasūnave |
śūrpakarṇāya tulasīṃ vakratuṇḍāya śiṃbijam || 69 ||
[Analyze grammar]

apāmārgaṃ guhabhrātre bārhataṃ tvekadantine |
herambāya tu sindūraṃ caturhotre tu patrajam || 70 ||
[Analyze grammar]

sarveśvarāya śāntāyā'gastyapatraṃ pradāpayet |
gandhapuṣpākṣatadūrvāpatrayugmaṃ samarpayet || 71 ||
[Analyze grammar]

modakapañcakaṃ dadyājjalaṃ miṣṭaṃ samarpayet |
datvā tāmbūlakaṃ natvā samprārthya ca visarjayet || 72 ||
[Analyze grammar]

mūrtiṃ sopaskarāṃ haimīṃ gurave brāhmaṇāya bā |
arpayed dakṣiṇāṃ dadyānmodakādīni bhojayet || 73 ||
[Analyze grammar]

ekaṃ kṛtvā vrataṃ pañcavarṣāṇi mānavo bhuvi |
upāsya labhate kāmānehikānpāralaukikān || 74 ||
[Analyze grammar]

asyāṃ caturthyāṃ candraṃ tu na paśyedvai kathaṃcana |
paśyan mithyābhiśāpaṃ tu prāpnuyānnātra saṃśayaḥ || 75 ||
[Analyze grammar]

atastaddoṣanāśāya mantraṃ tu śāśvataṃ paṭhet |
hato hiraṇyakaśipurnṛsiṃhena niśāmukhe || 76 ||
[Analyze grammar]

śarabheṇa hataḥ siṃhaḥ śarabhaḥ śaṃkaro'bhavat |
śaṃkareṇa dhṛtaścandro mithyāśāpaṃ haro haret || 77 ||
[Analyze grammar]

ityuccārya na vai mithyākalaṃko jāyate jane |
namaskuryācchivaṃ candraśekharaṃ bhāvasaṃyutaḥ || 78 ||
[Analyze grammar]

iṣaśuklacaturṣyāṃ tu kapardīśaṃ vināyakam |
pauruṣeṇa tu sūktena pūjayedupacārakaiḥ || 79 ||
[Analyze grammar]

tāṇḍulān baṭave dadyād gandhapuṣpārcitāya ca |
kapardigaṇanātho'sau prīyatāṃ taṇḍulārpaṇaiḥ || 80 ||
[Analyze grammar]

bhuktimuktiprado me'stu gaṇeśaḥ kṛṣṇarūpadhṛk |
evaṃ kṛtvā vrataṃ dehī dhruvaṃ golokamāpnuyāt || 81 ||
[Analyze grammar]

caturthyāṃ kārtike śukle nāgavratamudāhṛtam |
sarpadaṃśādināśārtha kartavyaṃ sarvathā janaiḥ || 82 ||
[Analyze grammar]

prātarvrataṃ tu saṃkalpya dhenuśṛṅgajalaṃ śuci |
pītvā snātvā'tha madhyāhne śaṃkhapālādipannagān || 83 ||
[Analyze grammar]

śeṣaṃ tvāhvānapūrvaiśca pūjayedupacārakaiḥ |
dugdhenā''pyāyanaṃ kuryād dugdhaṃ dadyācca bhogine || 84 ||
[Analyze grammar]

kṛte nāgavrate tvevaṃ na vai daśanti pannagāḥ |
nopadravanti viṣāṇi brahmaṇo varadānataḥ || 85 ||
[Analyze grammar]

sarpānprāha purā brahmā kārtike vaḥ prapūjakān |
mā daśantu iti te'pi naiva daśanti pūjakān || 86 ||
[Analyze grammar]

kārtikakṛṣṇacaturthyāṃ karakākhyaṃ vrataṃ smṛtam |
strīṇāmevā'dhikāro'tra kartavyaṃ tābhireva tat || 87 ||
[Analyze grammar]

snātvā dehamalaṃkṛtya pūjayed gaṇanāyakam |
āvāhanātsamārabhya sarvaṃ vai vidhinā caret || 88 ||
[Analyze grammar]

tadagre pūrṇapakvānnaṃ vinyasyet karakān daśa |
kalaśān vā jalapūrṇān nyasyed daśa tadagrataḥ || 89 ||
[Analyze grammar]

devo me prīyatāmevamuccāryaiva samarpayet |
suvāsinībhyaḥ kalaśān dadyācca daśaśaṃkhyakān || 90 ||
[Analyze grammar]

miṣṭānnāni pradadyācca tataścandrodaye sati |
datvā'rghyaṃ vidhinā nārī bhuñjīta miṣṭameva ha || 91 ||
[Analyze grammar]

dugdhapūrṇaṃ jalapūrṇaṃ ghaṭaṃ dadyād dvijātaye |
sapūgā'kṣataratnāḍhyaṃ vratasya paripūrtaye || 92 ||
[Analyze grammar]

evaṃ kṛtvā vrataṃ nārī ṣoḍaśadvādaśābdakam |
udyāpanaṃ vidhāyā'tha vrataṃ samāpayettataḥ || 93 ||
[Analyze grammar]

yāvajjīvaṃ tu vā nāryā kāryaṃ saubhāgyavāñchayā |
vratenā'nena sadṛśaṃ strīṇāṃ saubhāgyadāyakam || 94 ||
[Analyze grammar]

nānyadvai vidyate loke kartavyaṃ tatprayatnataḥ |
maṃgalo grahavaryaśca pṛthivyāḥ suta eva yaḥ || 95 ||
[Analyze grammar]

asyāṃ tithau śaṃkarasya bindorutpanna eva saḥ |
aṃgārakaṃ vrataṃ tasmātkartavyaṃ śreya icchatā || 96 ||
[Analyze grammar]

maṃgalaḥ sarvadā tasya bhadraṃ bhadraṃ dadāti vai |
ekabhuktaṃ ca vā naktaṃ vrataṃ kartavyamādarāt || 97 ||
[Analyze grammar]

maṃgalasya tathā pūjā japaḥ kartavya iṣṭadaḥ |
raktaratnapradānaṃ ca raktavastrādidānakam || 98 ||
[Analyze grammar]

raktagodhūmadānaṃ ca kartavyaṃ vratinā tadā |
raktatilapradānaṃ ca sarvasmṛddhikaraṃ bhavet || 99 ||
[Analyze grammar]

mārgaśuklacaturthyāstu varṣaṃ yāvad vratī janaḥ |
kṣapayedekabhaktena naktena vatsarāntaram || 100 ||
[Analyze grammar]

ayācitena tṛtīyamupavāsaiścaturthakam |
evaṃ catvāri varṣāṇi vrataṃ kuryādatandritaḥ || 101 ||
[Analyze grammar]

vināyakavrataṃ tvetatkāśyāṃ vināyakodbhavān |
ṣoḍaśavastusaṃpūjyaḥ sarvāsu ca caturthīṣu || 102 ||
[Analyze grammar]

dadyād dānāni sarvāṇi yathāśakti yathādhanam |
vatsarānte vratānte vā mahadudyāpanaṃ caret || 103 ||
[Analyze grammar]

kārayecchrīgaṇapatiṃ mūṣakaṃ kānakaṃ ratham |
yadvā tu tāmrajaṃ sarvaṃ kāṣṭhajaṃ mṛttikākṛtam || 104 ||
[Analyze grammar]

yathāyogyaṃ kārayitvā yadvā padma supatrakam |
yadvā tu sarvatobhadramaṇḍalaṃ dhānyanirmitam || 105 ||
[Analyze grammar]

madhye yogyaṃ ghaṭaṃ nyasya tāmrasthālyanvitaṃ śubham |
pūrayettaṇḍulaistatra sthāpayecca vināyakam || 106 ||
[Analyze grammar]

āvāhanādibhiḥ snānaiḥ sindūracandanādibhiḥ |
dūrvāpuṣpāmbarabhūṣādhūpadīpasugandhakaiḥ || 107 ||
[Analyze grammar]

modakātmakanaivedyaiḥ phalaistāmbūlacarvaṇaiḥ |
dakṣiṇāstutikusumāṃjalibhirjāgaraistathā || 108 ||
[Analyze grammar]

pūjayettoṣayed devaṃ gītavādyakathānakaiḥ |
prabhāte śarkarāvrīhiyavaghṛtatilādibhiḥ || 109 ||
[Analyze grammar]

śrīphalaiḥ sarṣapaiḥ śvetairhomaṃ kuryād vidhānataḥ |
gaṇo gaṇādhipaścaiva kūṣmāṇḍastripurāntakaḥ || 110 ||
[Analyze grammar]

lambodaraikadantau ca rukmadaṃṣṭraśca vighnapaḥ |
brahmā yamo'tha varuṇaḥ somaḥ sūryo hutāśanaḥ || 111 ||
[Analyze grammar]

gandhamādī parameṣṭhītyevaṃ ṣoḍaśanāmabhiḥ |
tathā vakrasutuṇḍe'ti nāmato'ṣṭottaraṃ śatam || 112 ||
[Analyze grammar]

hūyādvai dahane bhaktyā hutvā pūrṇāhutiṃ caret |
dikpālān pūjayitvā'tha caturviṃśatibhūsurān || 113 ||
[Analyze grammar]

modakaiḥ pāyasaiḥ śākaiḥ pūrikābhiśca tarpayet |
ācāryāya tato dadyād dogdhrīṃ gāṃ vatsikāyutām || 114 ||
[Analyze grammar]

dakṣiṇāṃ ca yathāśakti bhūyasīṃ prārpayettathā |
anyebhyaścāpi dānāni dadyāt praṇamya bhūsurān || 115 ||
[Analyze grammar]

visṛjya bandhubhiḥ sārdhaṃ bhuñjīta prītamānasaḥ |
evaṃ vratamidaṃ kṛtvā bhuktvā bhogānihottamān || 116 ||
[Analyze grammar]

sāyujyaṃ prāpnuyād viṣṇorvināyakaprasādataḥ |
etad varavataṃ proktaṃ bhuktimuktiphalapradam || 117 ||
[Analyze grammar]

pauṣamāsacaturthyāṃ tu prapūjya tu vināyakam |
vipraikaṃ bhojayeccaiva modakairdakṣiṇāṃ diśet || 118 ||
[Analyze grammar]

evaṃkṛte vratī syādvai sarvasampattibhājanam |
māghaśuklacaturthyāṃ tu gaurīvratamanumattamam || 119 ||
[Analyze grammar]

gaurīpūjyā yoginīnāṃ gaṇaiḥ sākaṃ tu bhāvataḥ |
naraiḥ strībhiḥ kundapuṣpaiḥ raktapuṣpādibhistathā || 120 ||
[Analyze grammar]

raktasūtrairalaktakairdhūpairdīpaiḥ subhojanaiḥ |
sagūḍalaḍḍukaiścāpi kṣīreṇa pāyasena ca || 121 ||
[Analyze grammar]

pūjyāḥ saubhāgyavatyaśca nāryo viprāśca sādhavaḥ |
saubhāgyavṛddhaye tebhyo dātavyāni viśeṣataḥ || 122 ||
[Analyze grammar]

dānāni bhojanānyevāmbarāṇisatphalāni ca |
idaṃ gaurīvrataṃ lakṣmi saubhāgyārogyavardhanam || 123 ||
[Analyze grammar]

prativarṣaṃ prakartavyaṃ gauryāḥ kṛtaṃ punaḥ punaḥ |
ḍhuṇḍhivratamidaṃ bodhyaṃ gaṇeśastatra pūjyate || 124 ||
[Analyze grammar]

kāśyāṃ saḥ śāṃbhavānāṃ ḍhuṇḍhanārthaṃ tvāgataḥ sthitaḥ |
tannimittaṃ vrataṃ tvetat kartavyaṃ śreya icchatā || 125 ||
[Analyze grammar]

kuṇḍavrataṃ śāntivratalalitāvratamityapi |
tilavrataṃ tvetadeva kundavrataṃ ca kīrtitam || 126 ||
[Analyze grammar]

snāna dāna japā homastarpaṇaṃ yatkṛtaṃ bhavet |
sahasraguṇitaṃ tatsyād gaurīgaṇeśatoṣaṇāt || 127 ||
[Analyze grammar]

māghakṛṣṇacaturthyāṃ tu saṃkaṣṭahārakaṃ vratam |
upavāsaṃ prakurvīta vīkṣya candrodayaṃ tataḥ || 128 ||
[Analyze grammar]

mṛdā kṛtvā gaṇeśaṃ sāyudhaṃ savāhanaṃ śubham |
pīṭhe nyasya ca taṃ ṣoḍaśopacāraiḥ prapūjayet || 129 ||
[Analyze grammar]

modakāṃstilacūrṇaṃ ca saśarkaraṃ nivedayet |
arghyaṃ dadyāttāmrapātre raktacandanamiśritam || 130 ||
[Analyze grammar]

kuśān dūrvāḥ kusumānyakṣatān śamīdalān dadhi |
dadyādarghyaṃ tato visarjanaṃ kuryādatha vratī || 131 ||
[Analyze grammar]

bhojayed bhūsurān sādhūn sādhvīśca bālabālikāḥ |
vratī ca pāraṇāṃ kuryād dadyāddānāni bhāvataḥ || 132 ||
[Analyze grammar]

evaṃ kṛtvā vrataṃ smṛddhaḥ saṃkaṭaṃ naiva cāpnuyāt |
dhanadhānyasutāputraprapautrādiyuto bhavet || 133 ||
[Analyze grammar]

phālgunaśuklacaturthyāṃ ḍhuṇḍhirāja vrataṃ punaḥ |
prakartavyaṃ pūjanīyo gaṇaśaḥ sarvavastubhiḥ || 134 ||
[Analyze grammar]

tilapiṣṭaistilaiścaiva dānahomaprapūjanaiḥ |
toṣayitvā ḍhuṇḍhirājaṃ sarvasampattimāpnuyāt || 135 ||
[Analyze grammar]

sauvarṇaṃ gajavaktraṃ ca datvā dvijātaye dhanam |
bahubhogyānavāpnoti vratī nātra vicāraṇā || 1856 ||
[Analyze grammar]

yasminkasmin bhavenmāsi caturthī ravivārayuk |
maṃgalena yutā yadvā sā viśeṣaphalapradā || 137 ||
[Analyze grammar]

yāvatīṣu caturthīṣu vighneśaḥ kṛṣṇa eva ha |
pūjanīyastathā paṃcāyatanaṃ bhaktibhāvataḥ || 138 ||
[Analyze grammar]

udyāpanaṃ vrate kārya niyamaḥ saṃyamastathā |
brahmacaryaṃ rakṣitavyaṃ phalaṃ vai śāśvataṃ bhavet || 139 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vārṣikacaturthīvrateṣu gaṇeśātmakavāsudevasaṃkarṣaṇapradyumnāniruddhavratasatījanmavratarathantarakalpavārāhajayantīgaṇeśajayantīgopradakṣiṇāsiddhivināyakavratanāgavratakarakāvratāṃgārakavratakāśīvināyakavrataḍhuṇḍirājavratā |
dīnāṃ nirūpaṇanāmaikonasaptatyadhikadviśatatamo'dhyāyaḥ || 269 ||
[Analyze grammar]