Chapter 268

śrīnārāyaṇa uvāca |
śrūyatāṃ ca tvayā lakṣmi tṛtīyāyā vratāni vai |
yāni kṛtvā naro nārī bhuktiṃ muktiṃ samāpnuyāt || 1 ||
[Analyze grammar]

caitraśuklatṛtīyāto gauryā tapaḥ sudāruṇam |
kṛtaṃ śaṃkaraprāptyarthaṃ gaurīvrataṃ hi tanmatam || 2 ||
[Analyze grammar]

caitraśuklatṛtīyāyāṃ gaurīṃ kṛtvā saśaṃkarām |
sauvarṇāṃ rājatīṃ vāpi tāmrīṃ vā mṛṇmayīṃ ca vā || 3 ||
[Analyze grammar]

abhyarcya gandhapuṣpādyairvastrairābharaṇaiḥ śubhaiḥ |
durvākāṇḍaiśca vidhivatsopavāsā tu kanyakā || 4 ||
[Analyze grammar]

varārthinī sutāputrārthinī bhartrarthinī tathā |
nīrājayenmahāgaurīṃ śāṃkarīṃ śaṃkarānvitām || 5 ||
[Analyze grammar]

punaḥ punaḥ praṇamyaiva prārthayenmanasi sthitam |
sapta navaikādaśa cādhikā vā dvijayoṣitaḥ || 6 ||
[Analyze grammar]

bhartṛmatīśca vā kanyā gaurīrūpā sulakṣaṇāḥ |
samāhūya bahumānapūrvakaṃ tu ca tāstataḥ || 7 ||
[Analyze grammar]

sindūrāṃ'janavastrādyairbhūṣābhiḥ prītamānasā |
vratakartrī pūkayettā tathā dānaiśca toṣayet || 8 ||
[Analyze grammar]

miṣṭānnāni piṇḍakādīn phalānyapi samarpayet |
evaṃ santoṣayitvā tāḥ vratinī phalamāpnuyāt || 9 ||
[Analyze grammar]

rātrau jāgaraṇaṃ kuryād vratasampūrtikāmyayā |
prātastāṃ ca punaḥ saṃpūjyā'rpayed gurave mudā || 10 ||
[Analyze grammar]

yadvā visarjayenmūrtiṃ tīrthe vāryāśaye kṣipet |
evaṃ dvādaśavarṣāṇi kṛtvā gaurīvrataṃ śubham || 11 ||
[Analyze grammar]

kanyā tu labhate śaṃbhusadṛśaṃ guṇinaṃ patim |
dhenūrdvādaśa saṃkalpya dadyādvratasya siddhaye || 12 ||
[Analyze grammar]

kimatra bahunoktena gaurī saubhāgyadāyinī |
strīṇāṃ yathā tathā nānyā vidyate bhuvanatraye || 13 ||
[Analyze grammar]

dhanaṃ putrānpatiṃ putrīṃ vidyāṃ siddhiṃ yaśaḥ sukham |
dadāti sarvameveṣṭaṃ gaurī vratena toṣitā || 14 ||
[Analyze grammar]

pārvatyā prabhayā lakṣmyā māṇikyā ramayā kṛtam |
vrataṃ labdhaḥ patirīśaḥ kṛṣṇo dhvajadhanuḥkaraḥ || 15 ||
[Analyze grammar]

mīnatriśūlacakrasvastikacihnakaro hariḥ |
tasmādidaṃ vrataṃ rūpasaubhāgyabhogamuktidam || 16 ||
[Analyze grammar]

vaiśākhaśuklatṛtīyā tvakṣayatṛtīyāvratam |
tithistretāyugādyā sā kṛtasyā'kṣayakāriṇī || 17 ||
[Analyze grammar]

atra tretāyugaṃ svarṇamūrtirūpaṃ vidhāya ca |
yadvā lakṣmīyutaṃ kṛṣṇaṃ nārāyaṇaṃ samarcayet || 18 ||
[Analyze grammar]

puṣpadhūpavilepādyairgaṃgāvārbhistathā'kṣataiḥ |
vividhairbhojanaiścaiva toṣayecchrījagadgurum || 19 ||
[Analyze grammar]

saktūn saṃbhojayed viprān vratītvekādano bhavet |
evaṃ kṛtavidhestasya vratito'nāśanaṃ phalam || 20 ||
[Analyze grammar]

kāryā''rambhopi saphalo nirvighno yāti pūrṇatām |
naro nārī vrataṃ cāsmin kṛtakāryatvamāpnuyāt || 21 ||
[Analyze grammar]

vaiśākhasya site pakṣe tṛtīyāyāṃ punarvasau |
jamadagnigṛhe prādurāsītparaśudhṛk hariḥ || 22 ||
[Analyze grammar]

asmin rāmaṃ saparaśu sauvarṇaṃ kārayed vratī |
madhyāhne tu mahāpūjāṃ kṛtvā kurvīta bhojanam || 23 ||
[Analyze grammar]

ita ārabhya nityaṃ ca jyeṣṭhapūrṇā'vadhiṃ prabhum |
dhārayed gandhavāsāṃsi vāsāṃsi ca sitānyapi || 24 ||
[Analyze grammar]

uśīratālavṛntaiśca vejayetpratyahaṃ prabhum |
naivedye śarkarāyuktaṃ dadyādāmrarasādikam || 25 ||
[Analyze grammar]

jyeṣṭhaśuklatṛtīyāyāṃ raṃbhā svargād bhuvaṃ gatā |
rabhāphalaṃ vrate bhakṣyaṃ raṃbhā pṛjyā'kṣatairjalaiḥ || 26 ||
[Analyze grammar]

gandhapuṣpāṃśukādyaiśca sabhāryaṃ pūjayed dvijam |
raṃbhāvrataṃ karotyatra nārī saubhāgyakāmyayā || 27 ||
[Analyze grammar]

vittaṃ labhate putrāṃśca matiṃ lakṣmīṃ dhanādikam |
patiṃ gāṃ pṛthivīṃ saudhaṃ tathopakaraṇāni ca || 28 ||
[Analyze grammar]

labhate kadalīsāmyaṃ saukumāryaṃ vratārthinī |
dāne raṃbhāphalānyatra śarkarāghṛtamityapi || 29 ||
[Analyze grammar]

athā'ṣāḍhatṛtīyāyāṃ samārebhe tapo ramā |
keśavārthamato lakṣmīvrataṃ kāryaṃ tu yoṣitā || 30 ||
[Analyze grammar]

keśavaṃ tu salakṣmīkaṃ suvarṇapratimātmakam |
ṣoḍaśopasuvastvādyaiḥ pūjayettu vidhānataḥ || 31 ||
[Analyze grammar]

bhojanaiḥ surabhīdānairvastraiścāpi vibhūṣaṇaiḥ |
ārārtrikanamaskārairdakṣiṇābhiśca pūjayet || 32 ||
[Analyze grammar]

sastrīkaṃ ca dvijaṃ tatra pūjayed bhojayettathā |
vipravākyairmānayecca toṣayeddharṣayettathā || 33 ||
[Analyze grammar]

evaṃ vrate prasādyaināṃ lakṣmīrūpāṃ tu bhūsurīm |
vipraṃ viṣṇusvarūpaṃ ca visarjayecca tau gṛham || 34 ||
[Analyze grammar]

vratakartrī gṛhayuktā nārī saubhāgyavāñcchayā |
devadevaprasādena dhanadhānyasamanvitā || 35 ||
[Analyze grammar]

putrapautrayutā bhūtvā viṣṇulokamavāpnuyāt |
kanyā vindetsurūpaṃ supatiṃ sveṣṭasubhogadam || 36 ||
[Analyze grammar]

śrāvaṇaśuklatṛtīyā svarṇagaurīvrataṃ matam |
kālī tapaḥ paraṃ kṛtvā svarṇagauryabhavad yataḥ || 37 ||
[Analyze grammar]

upacāraiḥ ṣoḍaśabhirbhavānī pūjayet vratī |
prārthayedtpūjanānte ca rūpaṃ gauraṃ pradehi me || 38 ||
[Analyze grammar]

putrāndehi dhanaṃ dehi saubhāgyaṃ dehi suvrate |
anyāṃśca vividhānkāmānpūrayā'tra namo'stu te || 39 ||
[Analyze grammar]

tato bhavayutāṃ devīṃ vāyanaṃ tu dadecchubham |
ṣoḍaṣavarṣaparyantaṃ vratametatprakīrtitam || 40 ||
[Analyze grammar]

tadante subhagā nārī kuryādudyāpanaṃ mahat |
kadalīmaṇḍape sarvabhadrākhyamaṇḍale satīm || 41 ||
[Analyze grammar]

madhye saṃsthāpayetsvarṇaghaṭe ratnādisaṃyute |
paritaḥ śrīgaṇeśādipaṃcāyatanamarcayet || 42 ||
[Analyze grammar]

kalaśopari tāmrasyā'kṣatayukte supātrake |
sauvarṇī pratimāṃ śaṃbhubhavānyāḥ pratipūjayet || 43 ||
[Analyze grammar]

ṣoḍaśabhirvastubhiśca tato homaṃ samācaret |
veṇupātraiḥ ṣoḍaśabhiḥ pakvānnaparipūritaiḥ || 44 ||
[Analyze grammar]

samarpya satyai naivedyaṃ sādhuṣvetannivedayet |
vāyanaṃ ca tato dadyāduttamaṃ bāndhavādiṣu || 45 ||
[Analyze grammar]

pratimāṃ gurave dadyād dvijebhyo dakṣiṇāṃ tathā |
bahudānāni kurvīta vratasāphalyahetave || 46 ||
[Analyze grammar]

pūrṇaṃ vindet phalaṃ nārī kanyā vā sadhavā'dhavā |
dhanadhānyādisusmṛddhā bhūtvā yāti paraṃ padam || 47 ||
[Analyze grammar]

bhādraśuklatṛtīyāyāṃ vrataṃ vai haratālikam |
harahastena pārvatyā hastasya melanaṃ hyabhūt || 48 ||
[Analyze grammar]

tadidaṃ haratālyākhyaṃ vrataṃ saubhāgyavardhanam |
kuryād bhaktyā vidhānena pādyārghyārcanapūrvakam || 49 ||
[Analyze grammar]

atra vai kāṃcane pātre rājate vā'tha tāmrake |
vaiṇave mṛnmaye vā'tha vinyasyā'nnaṃ sadakṣiṇam || 50 ||
[Analyze grammar]

bharjitaṃ tilataṇḍulacaṇakādikamityapi |
phalaṃ vastrādikaṃ bhūṣāṃ vinyasyātraiva pātrake || 51 ||
[Analyze grammar]

dadyāttu gurave tadvai kuryātpaścāttu pāraṇām |
bhojayed brāhmaṇānsādhūnsādhvīḥ kanyāśca bālakān || 52 ||
[Analyze grammar]

saubhāgyadravya pātrāṇi vaṃśapātrāṇi ṣoḍaśa |
pradadyācchraddhayā tvevaṃ viprebhyo vidhinā tathā || 53 ||
[Analyze grammar]

anyebhyo brāhmaṇebhyaśca bhūyasīṃ dakṣiṇāṃ śubhām |
dadyād vratavatī nārī tena saubhāgyamāpnuyāt || 54 ||
[Analyze grammar]

evaṃ kṛtavratā nārī bhuktvā bhogānmanoramān |
vrataprabhāvato'mutra gaurosahacarī bhavet || 55 ||
[Analyze grammar]

dhanaṃ dhānyaṃ sutāṃ putrān labhate'tra paratra śam |
bhuktimuktipradaṃ devīprasādāpyaṃ vrataṃ matam || 56 ||
[Analyze grammar]

yadā tṛtīyā bhādre'tra bhaveddhastarkṣasaṃyutā |
sāmagaistvatra kartavyaṃ pitṛdevarṣitarpaṇam || 57 ||
[Analyze grammar]

navaṃ yajñopavītaṃ ca dhāryaṃ śākhoktakarmaṇā |
hastagaurīvrataṃ nāma kartavyaṃ bhūtihetave || 58 ||
[Analyze grammar]

viṣaprāṇipradaṃśādinivārakamidaṃ bhavet |
mahiṣāsuranāśārthaṃ koṭirūpadharā yadā || 59 ||
[Analyze grammar]

babhūva sā tadā durgā koṭīśvarīti nāmataḥ |
pinākinā svayaṃ proktā koṭīśvarīvrataṃ tu tat || 60 ||
[Analyze grammar]

lakṣacaṇḍīsvarūpāṇi yadā dhṛtavatī hi sā |
lakṣeśvarī tadā proktā svayaṃ pinākinā satī || 61 ||
[Analyze grammar]

lakṣeśvarīvrataṃ kāryaṃ yāvadvarṣacatuṣṭayam |
sopavāsaṃ prakartavyaṃ lakṣeśvaryāḥ prapūjanam || 62 ||
[Analyze grammar]

akhaṇḍānāṃ taṇḍulānāṃ tilānāṃ vāpi padmaje |
lakṣamekaṃ viśodhyā'tra kṣiped dugdhe'gnasaṃśrute || 63 ||
[Analyze grammar]

yāvadvai kaṭhino dravyasāro bhavetsupiṇḍakaḥ |
tena piṇḍena nirmāya devyā mūrtiṃ surūpiṇīm || 64 ||
[Analyze grammar]

gandhapuṣpākṣataratnaromavastravibhūṣitām |
pārvatīṃ tatra cā''vāhya pūjayed bhaktibhāvataḥ || 65 ||
[Analyze grammar]

gandhaiḥ puṣpairjalairdhūpairdīpairnaivedyaprārthanaiḥ |
vividhaiḥ satphalaiḥ śreṣṭhadakṣiṇābhiśca vandanaiḥ || 66 ||
[Analyze grammar]

ārārtrikairdaṇḍavadbhirvardhayecca kṣamāpayet |
arthayeddhanadhānyādisutāputragṛhādikam || 67 ||
[Analyze grammar]

tato visarjayed durgāṃ jalamadhye'tha dakṣiṇām |
datvā śrīgurave paścād rātrau jāgaraṇaṃ caret || 68 ||
[Analyze grammar]

datvā dānāni viprebhyo bhuñjītāyaṃ pare dine |
iti te kathitaṃ lakṣmi koṭilakṣeśvarīvratam || 69 ||
[Analyze grammar]

vratakartryā gṛhe lakṣmīrdhanadhānyamayī sadā |
rājate vardhate nityaṃ vratasyā'sya prabhāvataḥ || 70 ||
[Analyze grammar]

gaurīlokaṃ prayātyante bhogamokṣau hi vindati |
iṣaśuklatṛtīyāyāṃ bṛhadagaurīvrataṃ matam || 71 ||
[Analyze grammar]

pañcavarṣaṃ prakartavyaṃ koṭikundanamāpnuyāt |
durgāṃ tu pūjayetprātaḥ ṣoḍaśabhiḥ suvastubhiḥ || 72 ||
[Analyze grammar]

suvāsinyaḥ paṃca pūjyā vastrālaṃkāracandanaiḥ |
śāṭīkaṃcukatāṭaṃkakaṇṭhasūtravibhūṣaṇaiḥ || 73 ||
[Analyze grammar]

dhātupātrāṇi paṃcaiva vāṭikāsthālikāstathā |
sindūraṃ jīrakaṃ miṣṭaṃ saubhāgyadravyamaṃjanam || 74 ||
[Analyze grammar]

godhūmapiṣṭajātaṃ ca navā'pūpaṃ phalādikam |
vastrāṇi vividhānyeva vāyanāni ca pañca vai || 75 ||
[Analyze grammar]

tābhyo dadyād bhojayecca paścād bhuñjīta vāgyatā |
rātrau jāgaraṇaṃ kuryāt kṛṣṇakīrtanamiśritam || 76 ||
[Analyze grammar]

phalaṃ tu dhārayetkaṇṭhe pūgīṃ vānyad yadarpitam |
rātrau kaṇṭhagataṃ sarvakāmasmṛddhipradaṃ phalam || 77 ||
[Analyze grammar]

tata prātaḥ samutsāhā sālaṃkārā sakhījanaiḥ |
gītavādyayutā gacchet saritaṃ snānamācaret || 78 ||
[Analyze grammar]

gaurīṃ sambodhayettatra prārthanāṃ saṃvadedimām |
āhūtā'si mayā bhadre pūjitā ca yathāvidhi || 79 ||
[Analyze grammar]

mama saubhāgyade devi sarvaṃ rakṣaya nityadā |
nyūnaṃ ca kṣamyatāṃ devi yatheṣṭaṃ gamyatāṃ tvayā || 80 ||
[Analyze grammar]

ityabhyarthya namaskṛtya jayaśabdaiśca vādanaiḥ |
sotsāhapūrvakaṃ dṛṣṭvā jale gaurīṃ visarjayet || 81 ||
[Analyze grammar]

evaṃ kṛtvā vrataṃ bhaktyā vratī devīprasādataḥ |
bhuktvā bhogāṃstu dehānte gaurīlokamavāpnuyāt || 82 ||
[Analyze grammar]

ūrjaśuklatṛtīyāyāṃ viṣṇugaurīvrataṃ matam |
gauryā prapūjito viṣṇustapasaḥ phalasiddhaye || 83 ||
[Analyze grammar]

tasmād vratamidaṃ proktaṃ viṣṇugauryabhidhaṃ śubham |
tatra vai pūjanīyā'sau gaurī viṣṇuyutā mudā || 84 ||
[Analyze grammar]

ṣoḍaśabhistūcārairbhojanaiśca pṛthagvidhaiḥ |
suvāsinīrūpāṃ gaurīṃ lakṣmīnāmnā prabhojayet || 85 ||
[Analyze grammar]

pūjayenmaṃgaladravyaiviṣṇugaurīpratuṣṭaye |
visarjayetpraṇamyaināṃ dadyād dānāni bhāvataḥ || 86 ||
[Analyze grammar]

putraṃ vai labhate nārī vratakartrī na saṃśayaḥ |
mārgaśuklatṛtīyāyāṃ haragaurīvrataṃ matam || 87 ||
[Analyze grammar]

haraśayyāgatā gaurī harayogamupāgatā |
harayogena sā tṛptā'bhavat svāmisukhānvitā || 88 ||
[Analyze grammar]

haraṃ gaurīṃ vrate tvatra caikaśayyāṃ prakalpya ca |
svāpayetpūjayed bhaktyā sevayed divyabhāvataḥ || 89 ||
[Analyze grammar]

etadvrataprabhāveṇa bhuktvā bhogānmanoramān |
gaurīlokaṃ samāsādya hareṇa saha modate || 90 ||
[Analyze grammar]

pauṣaśuklatṛtīyāyāṃ brahmagaurīvrataṃ matam |
brahmaṇā tu samāgatyā''śīrvādāḥ śaṃkarāptaye || 91 ||
[Analyze grammar]

pradattā tad vrataṃ proktaṃ kartavyaṃ suvidhānataḥ |
gaurīṃ ca vedhasaṃ kṛtvā suvarṇasya prapūjayet || 92 ||
[Analyze grammar]

ṣoḍaśabhiścopacārairekabhuktaṃ samācaret |
dānaṃ dadyād yatheṣṭaṃ tu gurave bhojayed dvijān || 93 ||
[Analyze grammar]

brahmagaurīprasādena modate tatra saṃgatā |
māghaśuklatṛtīyāyāṃ lakṣmīḥ saubhāgyasundarī || 94 ||
[Analyze grammar]

viṣṇau varamālikāyā arpaṇāt samabhūt priyā |
tasmāt saubhāgyasundaryātmakaṃ kāryaṃ vrataṃ mudā || 95 ||
[Analyze grammar]

lakṣmīstatra pūjanīyā nālikerārghyadānataḥ |
upacāraiḥ ṣoḍaśabhirmiṣṭānnairbhūṣaṇādibhiḥ || 96 ||
[Analyze grammar]

saubhāgyadā prasannā syāt svīyaṃ dhāma nayatyapi |
dānaṃ śrāṃgārikaṃ sarvaṃ deyaṃ vastu tu yoṣite || 97 ||
[Analyze grammar]

ekabhuktaṃ vrataṃ kāryaṃ hāraścārpyastu viṣṇave |
prasādamālā sā cā'rpyā patikaṇṭhe tu putradā || 98 ||
[Analyze grammar]

phālgunasya site pakṣe tṛtīyāyāṃ niśottare |
harayogātsatī labdhavatī putrāṃstu rudrakān || 99 ||
[Analyze grammar]

tasmātsoktā tṛtīyā tu kulasaukhyavratātmikā |
pūjitā gandhapuṣpādyairgaurī kulakarī bhavet || 100 ||
[Analyze grammar]

evaṃ sarvavrateṣvatra dānaṃ homo visarjanam |
devadevīprapūjā ca vipraguruprapūjanam || 101 ||
[Analyze grammar]

ekabhuktādikaṃ sarvasāmānyaṃ prasamācaret |
bhaktyā kṛtāni sarvānvai kāmān dadyurmanogatān || 102 ||
[Analyze grammar]

sarvadeveṣu tatsarvāntarātmā śrīhariḥ svayam |
vartate pūjanīyo'sau sarvakarmaphalapradaḥ || 103 ||
[Analyze grammar]

yadyad vratyarthayed vastu naro nārī tathā'nyakaḥ |
samāpnoti ca tatsarvaṃ śrīhareḥ samanugrahāt || 14 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vārṣikatṛtīyāvrateṣu gaurītapovratā'kṣayatṛtīyātretādyatithiparśurāmajayantīkadalīvratalakṣmītapovratakālīgaurīvrataharagaurīlagnavratasāmagaśrāvaṇīkoṭīśvarīmāhiṣaghnalakṣeśvarībṛhadgaurīviṣṇugaurīhara |
gaurīyogabrahmāśīrgaurīviṣṇuvaramālākulavṛddhivratādinirūpaṇanāmā'ṣṭaṣaṣṭyadhikadviśatatamo'dhyāyaḥ || 268 ||
[Analyze grammar]