Chapter 261

śrīlakṣmīruvāca |
kārtikaścaturo māsān varṣāḍhyān puṇyakāryataḥ |
antarbhūyā'timāhātmyaśālinaḥ saṃkaroti hi || 1 ||
[Analyze grammar]

cāturmāsye na vai jātaṃ vrataṃ puṇyaṃ samarpaṇam |
kārtike tasya karaṇāccāturmāsyaphalaṃ bhavet || 2 ||
[Analyze grammar]

pāpānāṃ nāśakaḥ svargasatyavairājalokadaḥ |
golokavaikuṇṭhadaścākṣaralokaprado hi saḥ || 3 ||
[Analyze grammar]

kārtike yat kṛtaṃ puṇyaṃ sahasraguṇitaṃ bhavet |
tasmādātmakṛte sarvaṃ kartavyaṃ kārtike vratam || 4 ||
[Analyze grammar]

kārtikaśuklapakṣe tu kiṃnāmnyekādaśī matā |
ko devaḥ ko vidhistatra kiṃ dānaṃ ca vrataṃ phalam || 5 ||
[Analyze grammar]

cāturmāsyāntimamāse vaiśiṣṭyaṃ kiṃ hi gaṇyate |
yena vai vratino muktiṃ prayāntyapi ca me vada || 6 ||
[Analyze grammar]

śrīnārāyaṇa uvāca |
śṛṇu lakṣmi pravakṣyāmi kārtikasya site dile |
nāmnā prabodhinī proktaikādaśī tūttamottamā || 7 ||
[Analyze grammar]

yasyāṃ jāgartiṃ lakṣmīśaḥ śeṣaśāyī tu dhārmikaḥ |
yasyā vrataprabhāveṇa līyate'jñānajaṃ tamaḥ || 8 ||
[Analyze grammar]

prakarṣeṇā''tmabodhaśca jāyate'taḥ prabodhinī |
muktidātrī sukhadātrī svargadātrī ca bodhadā || 9 ||
[Analyze grammar]

upoṣyā vidhivattatra pūjyo dāmodaraḥ prabhuḥ |
rādhayā ca prabodhinyā sahārcyo bahuvastubhiḥ || 10 ||
[Analyze grammar]

kamalaiḥ śreṣṭhapuṣpaiśca pūjanīyo janārdanaḥ |
naivedye mudgalaḍaḍukā arghye padmaphalāni ca || 11 ||
[Analyze grammar]

dāne sopaskaro mañco deyānyanyānyapi priye |
prabodhinīvrataṃ lakṣmi pāpaghnaṃ puṇyavardhakam || 12 ||
[Analyze grammar]

tāvattīrthānyaraṇyāni garjantyāyatanāni ca |
yāvatkārtikamāsasya nāyāti bodhinīvratam || 13 ||
[Analyze grammar]

aśvamedhasahasrāṇi rājasūyaśatāni ca |
vājapeyasahasrāṇi prabodhinīsamāni na || 14 ||
[Analyze grammar]

alabhyaṃ cāpyagamyaṃ cā'sādhyaṃ cā'śakyameva vā |
dadātyupoṣitā vratyarthitaṃ vai haribodhinī || 15 ||
[Analyze grammar]

vidyāṃ dhanaṃ rājasattāṃ prajāsattāṃ yaśo'malam |
siddhiṃ ca sampadaṃ dadātyupoṣitā'tra bodhinī || 16 ||
[Analyze grammar]

mahāpāpā'tipāpāni saṃkarīkaraṇāni ca |
śuṣkārdrāṇi ca sarvāṇyupoṣitā dahati nviyam || 17 ||
[Analyze grammar]

anekajanmasamprāptapāpaduritaparvatāna |
kṛtaṃ jāgaraṇaṃ rātrau dahati bodhinīvrate || 18 ||
[Analyze grammar]

jñātvā'jñātvā'thavā rogādibhiśceyamupoṣitā |
pāravaśyopoṣitā vā svargaṃ mokṣaṃ dadāti sā || 19 ||
[Analyze grammar]

śraddhayā bhāvataścātra vidhivat kṛtameva yat |
api svalpaṃ kṛtaṃ tasya phalaṃ lakṣaguṇaṃ bhavet || 20 ||
[Analyze grammar]

ajñātenā'pyavidhinā cā'manaskena vā'pi yat |
nindādrohānvitaṃ merupramaṃ kṛtaṃ tu niṣphalam || 21 ||
[Analyze grammar]

kartavyaṃ khalu svalpaṃ vā nindādrohau na vai caret |
nindādrohā'pekṣayā nu na kartavyaṃ varaṃ matam || 22 ||
[Analyze grammar]

pitṝnsaṃsmṛtya ye tvatra puṇyaṃ kurvanti mānavāḥ |
gacchanti pitarasteṣāṃ tṛptā viṣṇoḥ paraṃ padam || 23 ||
[Analyze grammar]

brahmahatyādipāpāni vrate naśyanti jāgarāt |
aśvamedhādikairyajñairapi duṣprāpyameva yat || 24 ||
[Analyze grammar]

anyaiśca sādhanaiḥ śreṣṭhairalabhyaṃ cāpi yadbhavet |
prāpyate tatsukhenaiva prabodhinyāstu jāgarāt || 25 ||
[Analyze grammar]

yāvattīrthā'bhiṣekasya mahīsvarṇārpaṇasya ca |
phalātphalaṃ tvadhikaṃ vai prāpyate vratajāgarāt || 26 ||
[Analyze grammar]

sa eva sukṛtī jātaḥ kulānāṃ pāvitaṃ śatam |
tena yena kṛtā bhāvāt kārtike tu prabodhinī || 27 ||
[Analyze grammar]

vratapuṇyaṃ dhruvaṃ proktaṃ tadanyat sarvamadhruvam |
vicāryeti prakartavyaṃ vrataṃ samyaggharerdine || 28 ||
[Analyze grammar]

prabodhinīvratakarturgṛhe tīrthāni sarvaśaḥ |
pāvanāni pravasanti tadgṛhaṃ tīrtharājakam || 29 ||
[Analyze grammar]

putrapautradhanasampatpradā vai haribodhinī |
putrādyarthaṃ vrataṃ tvanyat kartavyaṃ nā'vaśiṣyate || 30 ||
[Analyze grammar]

prabodhinyā vratakarturbhogo mokṣaḥ kare sthitaḥ |
jñānaṃ yogastapo homaḥ saṃyamo'pi vrate sthitaḥ || 31 ||
[Analyze grammar]

dharmapuṣṭikarī viṣṇoḥ priyā muktipradā nṛṇām |
garbhavāsādiduḥkhānāṃ nāśayitrī hyupoṣitā || 32 ||
[Analyze grammar]

karmaṇā manasā vācā śuṣkaṃ cārdraṃ ca pātakam |
kṛṣṇaḥ kṣālayati prabodhinyā vrate sajāgare || 23 ||
[Analyze grammar]

kṛṣṇamuddiśya bodhinyāṃ snānaṃ homo japo'rpaṇam |
pitṝṇāṃ tarpaṇaṃ caitatkṛtaṃ bhavati cākṣayam || 34 ||
[Analyze grammar]

mahāvratamidaṃ proktaṃ nedṛśaṃ tu vratāntaram |
śatajanmārjitā'saṃkhyamahāpāpaughanāśanam || 35 ||
[Analyze grammar]

prabodhinyā vratenā'tra toṣayitvā janārdanam |
satkṛtaḥ svargasaṃsthaiḥ saḥ prayāti harimandiram || 36 ||
[Analyze grammar]

rūpasaundaryapuṣṭatvasaughaṭyārthibhirādarāt |
dārāputragṛhakṣetrapatijairogyamicchubhiḥ || 37 ||
[Analyze grammar]

dhanavāhanayānādismṛddhidhenudhanecchubhiḥ |
kartavyaiṣā prayatnena bodhinī pramadānaraiḥ || 38 ||
[Analyze grammar]

bālyayauvanavārdhakyāvasthāyogena vai kṛtam |
śatajanmakṛtaṃ pāpaṃ vratādasyā vinaśyati || 39 ||
[Analyze grammar]

sūryacandroparāgasya yatphalaṃ kaurave sthale |
tataḥ sahasraguṇitaṃ prabodhinyāṃ tu jāgare || 40 ||
[Analyze grammar]

yasya prayāti māsastu kārtiko vandhya eva ha |
tasya bodhyaṃ nṛjanmāpi vandhyaṃ tvatra paratra ca || 41 ||
[Analyze grammar]

janmārjitasya puṇyādikarmaṇaścāpi vai phalam |
bandhyakārtikamāsasya vyarthaṃ yāti sukhāya na || 42 ||
[Analyze grammar]

parānnaṃ varjayettasya cāndrāyaṇaphalaṃ bhavet |
kārtike tu kathākarturyajñāyutaphalaṃ bhavet || 43 ||
[Analyze grammar]

tuṣyati na tathā yajñairna dānairvā japādibhiḥ |
yathā śāstrakathābhistuṣyati kṛṣṇastu kārtike || 44 ||
[Analyze grammar]

śrotāraścāpi vaktāraḥ kathāyāḥ kārtike tu me |
pratiślokaṃ labhante te gosahasrārpaṇaṃ phalam || 45 ||
[Analyze grammar]

kārtike śreyaso buddhyā keśavā'gre'tibhāvataḥ |
kathāvācayitā lakṣmi kulānāṃ tārayecchatam || 46 ||
[Analyze grammar]

pratyahaṃ niyamenā'tra kārtike śṛṇuyātkathām |
hareryogātphalaṃ tasyā gosahasrapradānajam || 47 ||
[Analyze grammar]

prabodhinīvrate viṣṇoścaritraṃ śṛṇuyācca yaḥ |
saptadvīpavatīdānaphalaṃ sa labhate vratī || 48 ||
[Analyze grammar]

viṣṇubuddhyā kathāṃ śrutvā ye'rcayanti kathāvidam |
dhanadhānyāmbaraiḥ śaktyā teṣāṃ loko'kṣayo mataḥ || 49 ||
[Analyze grammar]

nāmakīrtanabhajanaiścaritraśravaṇādibhiḥ |
kārtikaṃ kṣapayettasya punarāvarttanaṃ na vai || 50 ||
[Analyze grammar]

haryagre tu kathāṃ gītaṃ vādyaṃ nṛtyaṃ samutsavam |
yaḥ karauti vrate prāpte nityaṃ vā muktibhāk sa vai || 51 ||
[Analyze grammar]

lakṣmīnārāyaṇasaṃhitāṃ paṭhecchṛṇuyāttu yaḥ |
pratyakṣaraṃ bhavedasya kapilādānajaṃ phalam || 52 ||
[Analyze grammar]

vittaśāṭhyaṃ na kartavyaṃ samprāpte harivāsare |
yataḥ puṇyamasaṃkhyātaṃ dhanadāne bhavatyapi || 53 ||
[Analyze grammar]

daśamyāmekabhuktaḥ san vratī bhūśayano niśi |
saṃyamī brahmacārī ca śrīkṛṣṇaṃ hṛdi saṃsmaret || 54 ||
[Analyze grammar]

ekādaśyāṃ prage devo jāgartīti vibhāvya vai |
dhyātvā snātvā hariṃ ghaṇṭānādaṃ kṛtvā prabodhayet || 55 ||
[Analyze grammar]

āvāhanaṃ samārabhya vratī visarjanāntimām |
pūjāṃ tu naityikīṃ kṛtvā harermaṇḍapamuttamam || 56 ||
[Analyze grammar]

śobhitaṃ kadalīstambhapatratoraṇaketubhiḥ |
kārayecca vitānaṃ saccitraṃ vai bandhayecchubham || 57 ||
[Analyze grammar]

catuṣkoṇeṣu kalaśānuparyupari saptakān |
klṛptayetparitastatra raṃgāvalīśca kārayet || 58 ||
[Analyze grammar]

madhye tu sarvatobhadramaṇḍalaṃ saptadhānyakam |
kārayecca ghaṭaṃ tāmrakṛtaṃ vā'tha suvarṇajam || 59 ||
[Analyze grammar]

maṇḍale sthāpayenmadhye mahattamaśubhaṃ navam |
parito maṇḍale tatra caturviṃśatisadghaṭān || 60 ||
[Analyze grammar]

sthāpayetsvarṇajān yadvā tāmrajān sajalānnavān |
paṃcaratnapaṃcapatrapūgīphalā'ñcitaṇḍulān || 61 ||
[Analyze grammar]

vastrasūtranārikelaphalamodakaśobhitān |
puṣpacandanakuṃkumākṣatavāryabhipūjitān || 62 ||
[Analyze grammar]

tanmukheṣu sthāpanīyāstilasthālyastu nūtanāḥ |
śarkarailālavaṃgāḍhyāḥ phalanaivedyasaṃyutāḥ || 63 ||
[Analyze grammar]

madhyasthālyāṃ sthāpanīyo rādhādāmodaraḥ svayam |
prabodhinyā sahitaḥ śrīmūrtirūpo hariḥ prabhuḥ || 64 ||
[Analyze grammar]

pārśve paryaṃka āstheyaḥ śayyāsādhanaśobhitaḥ |
gendukaṃ kaśipurguptadorakaṃ prāvaraṃ tathā || 65 ||
[Analyze grammar]

vyajanaṃ cāmaraṃ chatraṃ pāduke darpaṇastathā |
dantakaḥ kalaśaḥ sthālī vāṭikāḥ phulavāṭikāḥ || 66 ||
[Analyze grammar]

anyānyapi tvapekṣyāṇi phalamiṣṭānnakāni ca |
sthāpanīyāni tatraiva paryaṃke kṛṣṇatuṣṭaye || 67 ||
[Analyze grammar]

śrīgaṇeśaṃ sakuṭumbaṃ pūjayecca nivedayet |
ghaṇṭāṃ ca kalaśaṃ śaṃkhaṃ pūjayedupacārakaiḥ || 68 ||
[Analyze grammar]

tīrthānyāvāhayetpaścāddhariṃ tvāvāhayed vratī |
āsanaṃ ca dadet pādyamarghyamācamanaṃ tataḥ || 69 ||
[Analyze grammar]

arpayed dantakāṣṭhaṃ ca śaucaśuddhiṃ prakalpayet |
gaṇḍūṣānkārayetpaścāttīrthavāryabhiṣecanam || 70 ||
[Analyze grammar]

kārayecca tataḥ paṃcāmṛtasnānaṃ samarpayet |
punaḥ śuddhodakasnānaṃ tathā vastreṇa mārjanam || 71 ||
[Analyze grammar]

dukūlārpaṇamaṃgeṣu sugandhyattarakā'rcanam |
kaustubhaṃ brahmasūtraṃ ca kaṃcukaṃ śāṭikādikam || 72 ||
[Analyze grammar]

dhautraṃ ca kaṃcukīṃ divyāṃ ghargharīṃ prasamarpayet |
mukuṭaṃ cottarāvastraṃ kuṇḍalairanakādikam || 73 ||
[Analyze grammar]

kaṭake śṛṃkhale vyaṅgiḍīśca ratnormikāstathā |
raśanāṃ jhanjhirāṃścāpi tantīṃ natthīṃ ca mālikāḥ || 74 ||
[Analyze grammar]

hārānsvarṇamayāṃścānyānbhūṣaṇāni samarpayet |
candanaṃ kajjalaṃ cūrṇaṃ kauṃkumaṃ kaisaraṃ jalam || 75 ||
[Analyze grammar]

kastūrikāṃ śvetacūrṇaṃ sindūrakamalaktakam |
anyatsaubhāgyasaddravyaṃ cārpayet rādhikeśvare || 76 ||
[Analyze grammar]

abīraṃ ca gulālaṃ cā'kṣatānpuṣpāṇi cārpayet |
bahupuṣpairbahuphalaiḥ karpūrā'gurukuṃkumaiḥ || 77 ||
[Analyze grammar]

hareḥ pūjāṃ prakuryācca kārtike bodhinīprage |
phalairnānāvidhairdravyairdhūpadīpanivedanaiḥ || 78 ||
[Analyze grammar]

miṣṭānnairvividhaiḥ śākapatraistathā''ranālakaiḥ |
bhakṣyairbhojyairlehyacoṣyai rasairmiṣṭaiśca pānakaiḥ || 79 ||
[Analyze grammar]

phalaiśca vividhairdevaṃ toṣayed bhāvato vratī |
śaṃkhatoyena vidhivattoṣayettu janārdanam || 80 ||
[Analyze grammar]

ketakyā ekapatreṇa pūjito garuḍadhvajaḥ |
samāsahasraṃ suprīto jāyate kamalāpatiḥ || 81 ||
[Analyze grammar]

agastikusumaiḥ kṛṣṇaṃ pūjayettu vidhānataḥ |
pūjayiturdarśanācca nirayāgniḥ praśāmyati || 82 ||
[Analyze grammar]

munipuṣpārcito viṣṇuḥ kārtike puruṣottamaḥ |
dadātyabhimatānkāmān divyā'divyāṃstathā parān || 83 ||
[Analyze grammar]

vihāya sarvapuṣpāṇi munipuṣpeṇa keśavam |
kārtike yo'rcayed bhaktyā vājimedhaphalaṃ labhet || 84 ||
[Analyze grammar]

tulasīdalapuṣpāṇi śamīpatrāṇi lā tathā |
viṣṇāvarpayitā janmaśatajaṃ kārtike dahet || 85 ||
[Analyze grammar]

dṛṣṭā spṛṣṭā'thavā dhyātā kīrtitā nāmataḥ stutā |
ropitā secitā nityaṃ pūjitā tulasī natā || 86 ||
[Analyze grammar]

navadhā tulasībhaktiṃ yaṃ kurvanti dine dine |
yugakoṭisahasrāṇi tanvanti sukṛtaṃ priye || 87 ||
[Analyze grammar]

yāvacchākhāpraśākhābhirbījapuṣpadalairnavaiḥ |
ropitā tulasī puṃbhirvardhate pṛthivītale || 88 ||
[Analyze grammar]

teṣāṃ vaṃśe tu ye jātā ye bhaviṣyanti ye gatāḥ |
teṣāmākalpasāhasraṃ vāso harergṛhe bhavet || 89 ||
[Analyze grammar]

yatphalaṃ sarvapuṣpeṣu sarvapatreṣu yatphalam |
tulasyekadalenaiva prāptaṃ vai kārtike bhavet || 90 ||
[Analyze grammar]

nityaṃ tu kārtike viṣṇustulasīdalakaistathā |
padmairdhātrīdalaiścaiva pūjanīyaḥ śamīdalaiḥ || 91 ||
[Analyze grammar]

iṣṭvā kratuśatairdevāndattvā dānānyanekaśaḥ |
tatpuṇyaṃ tulasīpatraiḥ kārtike keśavārcane || 92 ||
[Analyze grammar]

ārārtrikaṃ namaskāraṃ stotraṃ pradakṣiṇāstathā |
dakṣiṇā daṇḍavat puṣpāṃjaliṃ ca kṣamaṇārthanam || 93 ||
[Analyze grammar]

vratapūrtiprārthanāṃ ca vratī kṛtvā tataḥ param |
guroḥ pūjāṃ prakurvīta bhojanācchādanādibhiḥ || 94 ||
[Analyze grammar]

suvarṇadakṣiṇābhiśca tuṣṭyarthaṃ cakrapāṇinaḥ |
goprabhatīni dānāni dātavyāni bahūnyapi || 95 ||
[Analyze grammar]

madhyāhne pūjayeddevaṃ bhojayedvai vidhānataḥ |
sāyaṃ cāpi mahāpūjāṃ kārayedbhojayeddharim || 96 ||
[Analyze grammar]

jalapānādyarpayecca preṃkhāyāṃ sthāpayettataḥ |
āndolayettoṣayecca pādasaṃvāhanaṃ caret || 97 ||
[Analyze grammar]

vratī jāgaraṇaṃ kuryādgītavāditranartanaiḥ |
kathābhī rāsaramaṇairlīlānukaraṇādibhiḥ || 98 ||
[Analyze grammar]

prātardvādaśikāyāṃ tu snātvā sampūjya mādhavam |
bhojayettarpayedārārtrikeṇa vardhayeddharim || 99 ||
[Analyze grammar]

stutvā visarjayetsarvān bhojayedbahubhāvataḥ |
sādhūnsādhvīḥ sātvatāṃśca viprān bālān subhojayet || 100 ||
[Analyze grammar]

dadyād dānānyanekāni pāraṇāṃ ca tataścaret |
evamudyāpanaṃ kṛtvā ghaṭādi gurave'rpayet || 101 ||
[Analyze grammar]

evaṃ vrataṃ prapūrṇaṃ ca kṛtvā'kṣaramavāpnuyāt |
bhuktiṃ bhuktiṃ samāpnoti śāśvataṃ ca sukhaṃ dhruvam || 102 ||
[Analyze grammar]

śṛṇu vrate prabodhinyāḥ kurvantaṃ harimandire |
kīrtanaṃ tvekacāṇḍālaṃ rākṣasādrakṣitaṃ priye || 103 ||
[Analyze grammar]

araṇye raivate kṣetre hyaśvapaṭṭasarastaṭe |
brahmaṇā nirmitaṃ tvāsīd viṣṇusthānamanāvṛtam || 104 ||
[Analyze grammar]

āraṇyakā janā yasya darśanād yānti sadgatim |
bhadrāvatī taṭāvāsī kaściddīnajanaḥ khalu || 105 ||
[Analyze grammar]

dvijastu karmacaṇḍālaḥ kāṣṭhahāro'bhavannanu |
nadīpūreṇa sannaṣṭa gṛhadārādikaḥ sa hi || 106 ||
[Analyze grammar]

araṇye'rocatā''vāsaṃ kāṣṭhahāritvakarmataḥ |
śubhasaṃskārayukto'sau nityaṃ sāyaṃ tu bhāvataḥ || 107 ||
[Analyze grammar]

viṣṇusthānaṃ prayāti sma kīrtanaṃ prakarotyapi |
darśanaṃ nayanaṃ cāpi punaryāti nijālayam || 108 ||
[Analyze grammar]

kārtike tu prabodhinyāṃ jāgaraṃ kartumutsukaḥ |
niśi gacchantamenaṃ vai jagrāha pathi rākṣasaḥ || 109 ||
[Analyze grammar]

jahāsa karmacāṇḍālo rākṣaso vismayaṃ gataḥ |
papraccha maraṇe kāle nirbhayaṃ hāsyakāraṇam || 110 ||
[Analyze grammar]

karmacaṇḍāla āhainaṃ dhanyo'haṃ mṛtirāgatā |
ekādaśītithistvadya vrataṃ me'sti prabodhinī || 111 ||
[Analyze grammar]

devālayaṃ tu gacchāmi kīrtanāyā'rcanāya ca |
jāgarāya prayāmyevaṃ mṛtyuryadi samāgataḥ || 112 ||
[Analyze grammar]

tadā me sadgatistvasti na hyadho yāti bhaktikṛt |
yadi te'sti kṣudhā tarhi śīghraṃ bhakṣaya māmiha || 113 ||
[Analyze grammar]

vrate yadvā jāgarādi kṛtvā bhakṣaya māṃ prage |
rākṣasaḥ prāha mṛtyorvai mukhād yo mucyate janaḥ || 114 ||
[Analyze grammar]

na cāyāti punarmṛtyusthale tvāsthā name tvayi |
cāṇḍālaḥ prāha yadyevaṃ samāgaccha mayā saha || 115 ||
[Analyze grammar]

kariṣye kīrtanaṃ paścād yatheṣṭaṃ māṃ prabhakṣaya |
kīrtanena bhavenmuktiḥ śravaṇenāpi mokṣaṇam || 116 ||
[Analyze grammar]

rākṣasaḥ prāha yadyevaṃ tvayā gacchāmyahaṃ saha |
pūrvaṃ devasvakośasyādhikāre hyāsameva yat || 117 ||
[Analyze grammar]

yaśodātrīpurīmadhye devasvaṃ coritaṃ bahu |
tena pāpena jāto'haṃ brāhmaṇo brahmarākṣasaḥ || 118 ||
[Analyze grammar]

yadi vai kīrtanādatra śravaṇādvā pramokṣaṇam |
bhavatīti mamāpi syānmokṣaṇaṃ nāgraho bhujeḥ || 119 ||
[Analyze grammar]

vicāryeti yayatustau vrate viṣṇusthale niśi |
caṇḍālena pragītaṃ vai kīrtanaṃ nṛtyatālitam || 120 ||
[Analyze grammar]

rātrau jāgaraṇaṃ cāpi kṛtaṃ dvābhyāṃ subhāvataḥ |
prātaḥ śuddhāvabhūtāṃ tau devayānaṃ samāgatam || 121 ||
[Analyze grammar]

dehau vihāya tatraiva yayatuḥ svargameva tau |
bhogān bhuktvā'saṃkhyasamā apsarogaṇasevitau || 122 ||
[Analyze grammar]

paścānmuktiṃ prayātau tau vaikuṇṭhaṃ viṣṇvanugrahāt |
evaṃ tvasadgatikānāṃ patitānāṃ ca mokṣakṛt || 123 ||
[Analyze grammar]

vrataṃ prabodhinī śreṣṭhaṃ kartavyaṃ sarvathā janaiḥ |
anyānyapi vratānyatra kartavyānyapi me śṛṇu || 124 ||
[Analyze grammar]

eteṣvekatame jāte kārtikaḥ pāpakartanaḥ |
snātavyaṃ brāhmakāle ca kartavyaṃ kṛcchramādarāt || 125 ||
[Analyze grammar]

āśvayujyāḥ samārabhya kārtikyavadhiṃ bhaktitaḥ |
vrataṃ māsopavāsākhyaṃ kāryaṃ cāndrāyaṇaṃ śubham || 126 ||
[Analyze grammar]

tithihrāse kṛṣṇapakṣe grāsānāmalakopamān |
tyaktvaikaikaṃ prabhuñjīta vardhayecca site dale || 127 ||
[Analyze grammar]

tithivṛddhyā śuklapakṣe grāsānāmalakopamān |
ekaikavṛddhyā bhuñjīta hrāsayecca sitetare || 128 ||
[Analyze grammar]

pūrvaṃ pipīlikānāma dvitīyaṃ yavanāmakam |
madhye kṣīṇaṃ ca puṣṭaṃ ca proktaṃ cāndrāyaṇaṃ śubham || 129 ||
[Analyze grammar]

carurbhaikṣaṃ saktukaṇā yāvakaḥ śākamityapi |
payo dadhi ghṛtaṃ mūlaṃ phalaṃ pānīyameva vā || 130 ||
[Analyze grammar]

uttarottaraśastāni havīṣyetāni vai vrate |
amāyāṃ naiva bhuñjīta tithivṛddhau tu ṣoḍaśa || 131 ||
[Analyze grammar]

tithikṣaye tu tadgrāsā grāhyāścaturdaśaiva hi |
yathākathañcit piṇḍānāṃ catvāriṃśacchatadvayam || 132 ||
[Analyze grammar]

māsenaivopabhuñjīta tadapīnduvrataṃ bhavet |
aṣṭāvaṣṭau samaśnīyād yati cāndrāyaṇaṃ hi tat || 133 ||
[Analyze grammar]

prātaścaturaḥ sāyaṃ ca śiśucāndrāyaṇaṃ hi tat |
athānyāni pravakṣyāmi śṛṇu lakṣmi samāhitā || 134 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne kārtikaśuklaprabodhinīvratamāhātmyaṃ vipranimittakakīrtanavratayogena karmacaṇḍālaviprasya rākṣasasya ca muktiścāndrāyaṇasvarūpaṃ cetyādinirūpaṇanāmaikaṣaṣṭyadhikadviśatatamo'dhyāyaḥ || 261 ||
[Analyze grammar]