Chapter 238

śrīnārāyaṇa uvāca |
śṛṇu lakṣmi mahādevaścaikadā māmupāgataḥ |
pṛṣṭhavān sa ca māhātmyaṃ pratyekādaśikābhavam || 1 ||
[Analyze grammar]

dvādaśyāścāpi māhātmyaṃ tasmai saṃkathitaṃ mayā |
yacchrutvā munayaḥ sarve phalaṃ prāpya divaṃ gatāḥ || 2 ||
[Analyze grammar]

taccāhaṃ te pravakṣyāmi koṭisvargaphalapradam |
ekādaśī sadā ṛkṣayogena cottamā matā || 3 ||
[Analyze grammar]

jayā ca vijayā caiva jayantī ca matottamā |
ekādaśyāṃ yadā ṛkṣaṃ śuklapakṣe punarvasū || 4 ||
[Analyze grammar]

nāmnā sā tu jayā bodhyā vratārthaṃ tithiruttamā |
yadā ca śukladvādaśyāṃ nakṣatraṃ śravaṇaṃ bhavet || 5 ||
[Analyze grammar]

vijayā sā samākhyātā sahasraguṇitaṃ phalam |
yadā ca śukladvādaśyāṃ prājāpatyaṃ bhavettadā || 6 ||
[Analyze grammar]

jayantīnāma sā sarvapāpanāśakarā tithiḥ |
saptajanmakṛtaṃ pāpaṃ śuṣkaṃ cārdraṃ vināśayet || 7 ||
[Analyze grammar]

yadā vai śukladvādaśyāṃ puṣyaṃ bhavati karhicit |
mahāpuṇyā ca sā bodhyā sarvottamā ca sā tithiḥ || 8 ||
[Analyze grammar]

tilaprasthapradānaṃ yaḥ saṃvatsaraṃ karoti hi |
upavāsaśca tasyāṃ yaḥ kuryādasyā'dhikaṃ phalam || 9 ||
[Analyze grammar]

asyā vratasyā'nuyogāt svayaṃ tuṣṭo bhaveddhariḥ |
pratyakṣadarśanaṃ yāti mokṣadaṃ ca phalaṃ bhavet || 10 ||
[Analyze grammar]

vācikānmānasāddehātpāpātsaptajanukṛtāt |
puṣyayuktāmupoṣyaivāpnuyānmuktiṃ tathā parām || 11 ||
[Analyze grammar]

ekādaśīsahasrasya phalaṃ ca labhate vratāt |
snānaṃ dānaṃ japo homaḥ svādhyāyo devatārcanam || 12 ||
[Analyze grammar]

akṣayyaphaladaṃ cāsyāṃ kṛtaṃ mokṣapradaṃ bhavet |
svarṇāṃgadena rājñā vai patnīvratadvijāya vai || 13 ||
[Analyze grammar]

pṛṣṭhaṃ kṛtayuge pūrve mokṣaprāptiprakāmyayā |
upavāsasya naktasya caikabhuktasya kiṃ phalam || 14 ||
[Analyze grammar]

viṣayebhya upāvṛttendriyāṇāṃ vāsa aiśvare |
mūrtau vā sa bhavelloke hyupavāsaḥ phalapradaḥ || 15 ||
[Analyze grammar]

nirjalo vā sajalo vā hyupavāsaḥ samucyate |
saphalo vā payaḥpānayukto'pi saḥ prakathyate || 16 ||
[Analyze grammar]

daśamyāṃ tvekabhuktaṃ ca kṛtvā vrataṃ samācaret |
daśamyāṃ vā tathā naktaṃ bhuktvā vai vratamācaret || 17 ||
[Analyze grammar]

divasasyā'ṣṭame bhāge mandībhūte divākare |
bhojanaṃ naktamityuktaṃ na naktaṃ niśi bhojanam || 18 ||
[Analyze grammar]

nakṣatradarśane naktaṃ vyāpṛtasya bhavet khalu |
vyavasāyijanasyaikādaśyāṃ naktaṃ ca bhojanam || 19 ||
[Analyze grammar]

nāsya niṣedhanaṃ yasmāt karmacārī jano'sti saḥ |
madhyāhne caikabhuktaṃ vā kṛtvāpi vratamācaret || 20 ||
[Analyze grammar]

abalasya durbalasya kṛte'yaṃ bhojanādaraḥ |
tataḥ prabhātasamaye caikādaśyāṃ vratī janaḥ || 21 ||
[Analyze grammar]

pragṛhṇīyācca niyamaṃ viṣayebhyo nivartane |
pūjayecca hariṃ prātaḥ ṣoḍaśopasuvastubhiḥ || 22 ||
[Analyze grammar]

prārthayecca hariṃ sampūrṇaṃ vrataṃ me bhavediti |
mā vighno me bhavettatra mā śraddhānāśa ityapi || 23 ||
[Analyze grammar]

vyavahāramayaṃ tatra vrate naiva samācaret |
āvaśyakaṃ prakuryācca yanna vratavidhāyakam || 24 ||
[Analyze grammar]

payo jalaṃ phalaṃ mūlaṃ patraṃ śākaṃ rasastathā |
oṣadhaṃ ca gurorvākyaṃ brahmavākyaṃ vivaśyatā || 25 ||
[Analyze grammar]

ekādaśāni caitāni hyavrataghnāni santi vai |
bhojanaṃ cā'pyaśaktasyā'vrataghnaṃ bodhyameva ca || 26 ||
[Analyze grammar]

madhyāhne'pi jalasnānaṃ kuryācca pūjayeddharim |
adhamaṃ kūpake snānaṃ vāpyāṃ tu madhyamaṃ hi tat || 27 ||
[Analyze grammar]

taḍāge vātha nadyāṃ vā snānaṃ vai cottamaṃ matam |
tīrthe vāpi mahānadyāṃ samudre cottamottamam || 28 ||
[Analyze grammar]

gṛhe snānaṃ hyaśaktasya smṛddhasyāpi bhavet khalu |
aśvakrānte rathakrānte viṣṇukrānte vasundhare || 29 ||
[Analyze grammar]

mṛttike tvāṃ śarīre me lepayāmi kṣamāṃ kuru |
hara pāpāni sarvāṇi puṇyāni kuru sāmpratam || 30 ||
[Analyze grammar]

ityuktvā lepayed dehe śuddhyarthaṃ mṛttikāṃ janaḥ |
maunamādāya kṛṣṇasya smarannāma jale śubhe || 31 ||
[Analyze grammar]

snāyāttathā ca haraye naivedyaṃ tatra kārayet |
jalaṃ tathā'rpayet kālaṃ kathayā kṣapayed vratī || 32 ||
[Analyze grammar]

bhaktyā bhagavataḥ pūrṇaṃ dinaṃ tu gamayed vratī |
rātrau tathā mahadbhāvabhṛtairvastubhirādarāt || 33 ||
[Analyze grammar]

pūjanaṃ devadevasya kuryājjāgaraṇaṃ niśi |
yathā śuklā tathā kṛṣṇā vidhinaivaṃ prakārayet || 34 ||
[Analyze grammar]

ekādaśīdinaṃ vandhyaṃ vratahīnaṃ na yāpayet |
evaṃ vratavidhāturvai bhagavān śrīhariḥ svayam || 35 ||
[Analyze grammar]

prasanno bhavati svasya dhāma nayati taṃ janam |
phalaṃ ca śāśvataṃ pūrṇānandarūpaṃ dadātyasau || 36 ||
[Analyze grammar]

saṃkrāntīnāṃ caturlakṣaṃ yo dānaṃ pradadāti vai |
ekādaśyupavāsasya taddhi naikakalāsamam || 37 ||
[Analyze grammar]

prabhāse kurubhūbhāge candrasūryagrahāplave |
yatphalaṃ ca tataḥ śreṣṭhamekādaśyupavāsinaḥ || 38 ||
[Analyze grammar]

kedāre ca jalaṃ pītvā punarjanma na vidyate |
tathā caikādaśīpuṇyavato janma na vidyate || 39 ||
[Analyze grammar]

aśvamedhādiyajñebhyo'dhikaṃ puṇyaṃ vrate bhavet |
tapasvināṃ sahasraṃ ca pratyahaṃ yadgṛhe'bdakam || 40 ||
[Analyze grammar]

bhuṃkte ca tatphalācchreṣṭhaṃ caikādaśyupavāsinaḥ |
gosahasrādhikaṃ puṇyaṃ śatordhvaṃ saṃprajāyate || 41 ||
[Analyze grammar]

brahmaviṣṇumaheśāḥ saṃvasantyekādaśīkṛtaḥ |
dehe devasvarūpo'yaṃ vratī bhavati keśavaḥ || 42 ||
[Analyze grammar]

rukmiṇīsvāminaḥ sevāpuṇyasyā'nto na vidyate |
ekādaśīvratasyāpi puṇyasaṃkhyā na vidyate || 43 ||
[Analyze grammar]

upavāsena pūrṇaṃ vai tadardhaṃ naktabhojanāt |
ekabhuktāttadardhārdhaṃ puṇyaṃ saṃjāyate vrate || 44 ||
[Analyze grammar]

tāvadgarjanti tīrthāni dānāni niyamāni ca |
yāvannopoṣayejjanturvāsaraṃ harivallabham || 45 ||
[Analyze grammar]

ekādaśīsamaṃ nāsti mahāyajñasahasrakam |
mahādānasahasraṃ ca mahāsvargaśataṃ tathā || 46 ||
[Analyze grammar]

bhavatyekādaśīpuṇyāt mokṣārthaṃ hi matā tu sā |
mārgaśīrṣe kṛṣṇapakṣe cotpannā'to mama priyā || 47 ||
[Analyze grammar]

utpannatvācca sā nāmnotpattirekādaśī matā |
utpattiṃ ca vidhānaṃ ca pūjanaṃ cācared vratī || 48 ||
[Analyze grammar]

abhayā sāpi saṃproktā pūjyaḥ sulakṣaṇāyutaḥ |
kṛṣṇastu tilapuṣpaiśca naivedye ca guḍaudanaḥ || 49 ||
[Analyze grammar]

deyaṃ skandhaphalaṃ tvarghye vṛṣadānaṃ ca sammatam |
tathaiva dakṣiṇā deyā kṛṣṇāya svarṇamudrikāḥ || 50 ||
[Analyze grammar]

utpattistatra kartavyā vidhinā vai vratotsave |
prātarnārāyaṇo nidrāvaśo'sti gahvare yathā || 51 ||
[Analyze grammar]

siṃhavatīpranāptayeva parvate himavartini |
himācalaguhā kāryā tadantaḥ śrīhariḥ svayam || 52 ||
[Analyze grammar]

supto'stīti praktvaptavyaṃ kartavyo muradānavaḥ |
ekādaśī tathā kanyārūpā divyā suvarṇajā || 53 ||
[Analyze grammar]

kartavyā śastrasampannā tathā yuddhaṃ pradarśayet |
muranāśastathā nārāyaṇajāgratsvabhāvatā || 54 ||
[Analyze grammar]

prakartavyā gahvare ca tayostatra prapūjanam |
ekādaśyā hareścaiva tadā ṣoḍaśavastubhiḥ || 55 ||
[Analyze grammar]

sarvatobhadranāmā'tra saptadhānyaiśca maṇḍalam |
kāraṇīyaṃ ca tanmadhye sauvarṇastāmrajo'thavā || 56 ||
[Analyze grammar]

ghaṭaḥ pañcasuratnādivastrapallavaśobhitaḥ |
phalayuktaḥ sthāpanīyastatra sthālī tilānvitā || 57 ||
[Analyze grammar]

sthāpanīyā tatra mūrtidvayaṃ sthāpyaṃ hi mantrataḥ |
pūjanaṃ vidhivat kārya pūrvoktavidhinā śubham || 58 ||
[Analyze grammar]

suśayyā sthāpanīyā saparyaṃkā sukhasaṃpradā |
vrataṃ kāryaṃ divārātrau jāgaraṃ kāryamityapi || 59 ||
[Analyze grammar]

rātrau ca pūjanaṃ tatra hareḥ kartavyamaṃjasā |
prātaḥ snānaṃ pūjanaṃ ca godānaṃ bhūmidānakam || 60 ||
[Analyze grammar]

svarṇadānaṃ yathāśakti gurave brāhmaṇāya vā |
kāryaṃ visarjanaṃ paścāt pāraṇāṃ parivartayet || 61 ||
[Analyze grammar]

sādhūn sādhvīrarbhakāṃśca viprān dīnān subhojayet |
mūrtidānaṃ ca gurave kuryād bhaktiprapūrvakam || 62 ||
[Analyze grammar]

yathādravyaṃ yathāśakti vistāraḥ kārya eva ca |
rājyadānaṃ grāmadānaṃ kṣetradānaṃ gṛhārpaṇam || 63 ||
[Analyze grammar]

kanyādānaṃ paśordānaṃ ratnamaṇipradānakam |
hastidānaṃ cāśvadānaṃ yānavāhanadānakam || 64 ||
[Analyze grammar]

annadānaṃ vastradānaṃ jñānavidyāpradānakam |
yatsāmarthyo bhaved dātā tathā dānaṃ mataṃ sadā || 65 ||
[Analyze grammar]

vittaśāṭhyaṃ na prakartavyaṃ dhaninā ca nṛpeṇa ca |
phaladānaṃ kāṣṭhadānaṃ tiladānādi vāpi ca || 66 ||
[Analyze grammar]

nirdhanenāpi kartavyaṃ sevā vā dehasaṃbhavā |
vācā vā manasā vātha karābhyāṃ sevanaṃ tathā || 67 ||
[Analyze grammar]

mārjanaṃ lepanaṃ vāryāharaṇaṃ pādamardanam |
mandire dāsyavat vartyaṃ phalānantyādyavāptaye || 68 ||
[Analyze grammar]

bhāvayuktena bhagavān sevanena pratuṣyati |
śṛṇu tatra śubhākhyānaṃ śravaṇādapi tārayet || 69 ||
[Analyze grammar]

purā tu vedhasastṛtīye kalpe marudeśajaḥ |
rājā''sīttu maruddhanvā svārthamātraparāyaṇaḥ || 70 ||
[Analyze grammar]

kalpasyā'nte kalau rājā pravṛtto viṣayeṣvati |
kāmalobhotthadoṣaiśca prajā jātāpi tādṛśī || 71 ||
[Analyze grammar]

prajāyāṃ doṣabāhulye rājā doṣeṇa lipyate |
rājñaḥ pāpācca vai vṛṣṭirjāyate nahi tadṛtau || 72 ||
[Analyze grammar]

evaṃ vṛṣṭipratibandhe prajāḥ sarvāḥ prapīḍitāḥ |
anyonyaṃ svaṃ cāharanti vastra cānnādi sarvathā || 73 ||
[Analyze grammar]

nīyate ca balātsarvaṃ nyāyastatra na vidyate |
yathā yathā vinā vṛṣṭiṃ samayo vyeti tattathā || 74 ||
[Analyze grammar]

prajāḥ niṣpīḍya rājā saḥ dhanānnāni vikarṣati |
nārīśca gāśca tatsarvaṃ prasahya nayati nṛpaḥ || 75 ||
[Analyze grammar]

hiṃsā'nṛtasteyabalātkārādipāpadūṣite |
deśe prajākṣayo jāto rājāpi dhvaṃsasanmukhaḥ || 76 ||
[Analyze grammar]

atipāpaṃ mahāpāpaṃ cakāra bahudhā muhuḥ |
evaṃ saptā'bdaparyantaṃ vṛṣṭirnaivā'bhavattataḥ || 77 ||
[Analyze grammar]

rājño bhāryā'nnarāhityād rogapīḍā'tisaṃbhavāt |
mṛtyūnmūkhī tathā putro mṛtyūnmukho'bhavat yadā || 78 ||
[Analyze grammar]

ākrośati sma rājā'sau paramātmā samuddhara |
pāpānyatikṛtānyeva na puṇyaṃ cārjitaṃ mayā || 79 ||
[Analyze grammar]

phalaṃ prāptaṃ mahadduḥkhaṃ nāśo'pi mastake dhṛtaḥ |
ataḥ paraṃ na kiñcidvai kartuṃ śaknomi mādhava || 80 ||
[Analyze grammar]

samuddhara mahāduḥkhāt kṣudhayā prāṇanāśayā |
ityākrośan hariṃ dhyāyan rauti vilāpapūrvakam || 81 ||
[Analyze grammar]

tāvadākāśavāṇyāsīnmā rājan rodanaṃ kuru |
paścāttāpena pāpāni dagdhāni matsmṛtestathā || 82 ||
[Analyze grammar]

gṛhāṇedaṃ jalaṃ varṣābhavaṃ patrādikaṃ tathā |
khādaya prāṇarakṣā vo bhaviṣyati sukhī bhava || 83 ||
[Analyze grammar]

ataścāgre tṛtīye ca dine tvekādaśī mama |
priyā tithiḥ samupāvartate tasyā vrataṃ kuru || 84 ||
[Analyze grammar]

vṛṣṭiḥ sarvatra rājye te bhaviṣyati sukhāvahā |
prajāḥ punaśca te rājye pravartsyanti sukhārthikāḥ || 85 ||
[Analyze grammar]

dhanadhānyamayo deśo bhaviṣyati ca tatphalam |
prāpsyante ca prajāste'pi kurvantvekādaśīvratam || 86 ||
[Analyze grammar]

ityuktvopararāmeyaṃ rājā rājñī sutastathā |
vrataṃ ca nirjalaṃ cakrurmahatpuṇyamabhūttataḥ || 87 ||
[Analyze grammar]

vrate kṛte mahāvṛṣṭirjātā deśaśca sasyavān |
prajāvāsastato jāto rājñī nīrujatāṃ gatā || 88 ||
[Analyze grammar]

suto'pi sukhavān jātastasmai dadau dhuraṃ nijām |
tatra varṣe kṛtāḥ sarvairekādaśyo hi vatsaram || 89 ||
[Analyze grammar]

tāvadākāśamārgeṇa vimānadvayamāgatam |
rājñyarthaṃ ca nṛpatyarthaṃ vaimānikairadhiśritam || 90 ||
[Analyze grammar]

prāhuḥ svargīyadūtāstau samāgacchatamatra yat |
yuvayorvratatajanyaṃ vai puṇyaṃ sahasranākadam || 91 ||
[Analyze grammar]

vartate tatsahasrayugavyāptaṃ bhogyameva hi |
tatpuṇyena marunnāmā devaḥ kalpe caturthake || 92 ||
[Analyze grammar]

bhaviṣyasi kṣmāpate sabhāryastvaṃ svargṛhāṇa vai |
ityuktaḥ sa tu bhūmīśo dehaṃ tyaktvā sabhāryakaḥ || 93 ||
[Analyze grammar]

yayau svargapradaṃ so'yaṃ kalpāntare punaḥ punaḥ |
devo bhūtvā ca bhogāṃśca bhuktvā bhuktvā'tibhāvataḥ || 94 ||
[Analyze grammar]

svarṇāṃgado mahābhāgavato bhūtvā'tidāsavat |
prasevya ca hariṃ prāpto dhāmā''vṛtivivarjitam || 95 ||
[Analyze grammar]

tato mārgā'sitapakṣotpattyaikādaśikāvratam |
prayatnena prakartavyaṃ svargātsvargaṃ ca mokṣaṇam || 96 ||
[Analyze grammar]

ityutpattyabhidhaikādaśikāvratena sarvathā |
rājyaputradhanalābhaścā''rogyaṃ sarvadā bhavet || 97 ||
[Analyze grammar]

sarvaṃ ceṣṭaṃ milet svargaṃ mokṣaścāpi bhavet tataḥ |
sakāmaiścāpi niṣkāmaiḥ kartavyaṃ tadvrataṃ mahat || 98 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mārgaśīrṣakṛṣṇapakṣotpattyekādaśīvratavidhyāditatphalaprāptyādinirūpaṇanāmā'ṣṭātriṃśadadhikadviśata |
tamo'dhyāyaḥ || 238 ||
[Analyze grammar]