Chapter 237

śrīnārāyaṇa uvāca |
śruṇu lakṣmi mahānidrā puṇyakṣayavidhāyinī |
sarvathā parihartavyā vratarātrau divā'pi ca || 1 ||
[Analyze grammar]

nidrāvṛttirmahāghorā tāmasī cittadhūmriṇī |
abhāvapratyayālambanātmikā''lasyakāriṇī || 2 ||
[Analyze grammar]

svāpnadoṣādikartrī ca bhaktisevāvighātinī |
kadāciddoṣabāhulye rājase puṣṭatāṃ gate || 3 ||
[Analyze grammar]

brahmacaryavratabhaṃgapradasrāvādikāriṇī |
vratanāśakarī syāt sā vāyuvīryajavādinā || 4 ||
[Analyze grammar]

tasmājjāgaraṇaṃ kāryaṃ vratasya niśi sarvathā |
bahvāhāre'nnasaṃbhāre prāyaḥ śārīradhātavaḥ || 5 ||
[Analyze grammar]

puṣṭā bhavanti tadyogāt kvaciddhātukṣaye'vaśāt |
brahmacaryavratabhaṃge tūpavāso nirarthakaḥ || 6 ||
[Analyze grammar]

tasmāt tadā phalāhārādikaṃ saṃkṣepato matam |
annāhāraḥ sadāvarjyo vratasya divase janaiḥ || 7 ||
[Analyze grammar]

nidrā tu sarvathā varjyā sattvavṛttivināśinī |
puṇyakṣayapradā sarvadoṣādhārā'titāmasī || 8 ||
[Analyze grammar]

vijetavyā prayatnena bhaktena vratinā khalu |
vratapuṣṭikaraṃ jāgaraṇaṃ kāryaṃ prayatnataḥ || 9 ||
[Analyze grammar]

ekādaśyāṃ janaḥ kṛṣṇaṃ saṃpūjya premato niśi |
vaiṣṇavaiḥ saha sammīlya kuryājjāgaraṇaṃ vrate || 10 ||
[Analyze grammar]

gītavādyābhinṛtyādi saṃhitākathanādinā |
vārtayā bhagavapkīrtyātmikayā sevayā ca vā || 11 ||
[Analyze grammar]

kuryājjāgaraṇaṃ bhakto vratasāphalyahetave |
dhūpaṃ dīpaṃ ca naivedyaṃ puṣpaṃ gandhānulepanam || 12 ||
[Analyze grammar]

phalamarghyaṃ tathā śraddhāṃ bhūṣaṇaṃ premabhāvanam |
vinidraṃ ca vrataṃ sarvaṃ dadyātkuryācca bhaktitaḥ || 13 ||
[Analyze grammar]

sa sarvapāpā'tisaṃśuddho jāyate pārṣado hareḥ |
vrate jāgaraṇe prāpte sotsāhā vaiṣṇavāstadā || 14 ||
[Analyze grammar]

sopavāsaṃ vrataṃ jāgaraṇaṃ kuryuḥ satāṇḍavam |
tadvrataṃ viṣṇusaṃjñaṃ vai kuryurnāmnāṃ ca kīrtanam || 15 ||
[Analyze grammar]

manasā śrīhariṃ dhyātvā muhurnāma vadanti vai |
te tu dhanyatamā loke tārakā mama pārṣadāḥ || 16 ||
[Analyze grammar]

praśvāse ca tathā śvāse harernāma caturguṇam |
prahare nāmaraṭaṇaṃ phaladaṃ koṭisadguṇam || 17 ||
[Analyze grammar]

caturyāme nāmabhaktistvasaṃkhyaphaladā matā |
jāgaraṃ nimiṣārdhaṃ ca kṛtaṃ mūrteśca sannidhau || 18 ||
[Analyze grammar]

tatphalaṃ koṭikoṭyabjaguṇitaṃ syādanuttamam |
kṛṣṇāgre nartanaṃ kuryāt sāścaryaṃ premasaṃbhṛtam || 19 ||
[Analyze grammar]

sotsāhaṃ ca pramādālasyādivarjitameva ca |
pradakṣiṇaṃ tathā kuryāt namaskāraṃ muhurmuhuḥ || 20 ||
[Analyze grammar]

ārārtrikaṃ tathā kuryād yāme yāme punaḥ punaḥ |
cetasā cārdrabhāvena paśyanmūrtiṃ kṣaṇe kṣaṇe || 11 ||
[Analyze grammar]

tālikāvādanaṃ kuryādityevaṃ jāgaraṃ bhavet |
evaṃ bahuguṇairyuktaṃ kuryād yo jāgaraṃ vrate || 22 ||
[Analyze grammar]

vittaśāṭhyaṃ na ca kuryānna lobhaṃ pūjane tathā |
evaṃ yaḥ kurute bhaktyā na punarjāyate bhuvi || 23 ||
[Analyze grammar]

jāgaraṇaṃ prakurvan vai vratī viṣṇau hi līyate |
nāstikatvena cātmānaṃ vrate naiva pratārayet || 24 ||
[Analyze grammar]

nārāyaṇavrate jāgaraṇe tu hyupahāsakṛt |
ṣaṣṭivarṣasahasrāṇi viṣṭhāyāṃ jāyate kṛmiḥ || 25 ||
[Analyze grammar]

vedavettā ca yo vipro nartane copahāsyakṛt |
doṣalipto bhavedatra cāṇḍālādadhamo hi saḥ || 26 ||
[Analyze grammar]

kṣaṇaṃ vā praharaṃ vāpi jāgaraṃ nartanānvitam |
karoti yo bhāvayuktaścaturvargaphalaṃ vrajet || 27 ||
[Analyze grammar]

yājako vaidikaścāpi jāgare pravinindakaḥ |
ekaviṃśatikulayuk narakaṃ pratipadyate || 28 ||
[Analyze grammar]

nāstikabhāvasarpeṇa daṃṣṭāḥ svapanti vai vrate |
māyayā mohitā naiva kurvanti jāgaraṃ hi te || 29 ||
[Analyze grammar]

vinaṣṭāste na sandeho mokṣātpracyavitā hi te |
netrahīnā jñānahīnāḥ pumarthavigatā hi te || 30 ||
[Analyze grammar]

jāgare vācake prāpte hareḥ kathāṃ prakārayet |
śrāvayed vividhān divyāṃścamatkārān harermuhuḥ || 31 ||
[Analyze grammar]

vācakasyā'pralābhe tadkīrtanaṃ kārayenmithaḥ |
gāyanaṃ nartanaṃ kuryāt hāsyādi hariyogajam || 32 ||
[Analyze grammar]

utsavo rāsaramaṇaṃ kṛṣṇalīlāṃ pragāpayet |
aśvamedhasahasrasya vājapeyā'yutasya ca || 33 ||
[Analyze grammar]

puṇyaṃ bhavet koṭiguṇaṃ vrate jāgaraṇe kṛte |
vinā jāgaraṇaṃ vrate vratapuṇyakṣayo bhavet || 34 ||
[Analyze grammar]

pitṛpakṣā mātṛpakṣā bhāryāpakṣāstathā yujaḥ |
śataśaścoddharantyeva vrate jāgaraṇe kṛte || 35 ||
[Analyze grammar]

upoṣaṇasya rātrirvā dinaṃ vā nidrayā yadi |
vidhyate tadvrataṃ viddhaṃ cāsuraṃ vratameva tat || 36 ||
[Analyze grammar]

phalaṃ tvāsurabhāvātma śāpātmakaṃ ca tadbhavet |
viṣṇustatra na cāyāti tvāgatyāpi vigacchati || 37 ||
[Analyze grammar]

harirnidrākṛte sthāne śāpaṃ dattvā vigacchati |
kṛte tu jāgare sthāne lakṣmīruddhopi vai hariḥ || 38 ||
[Analyze grammar]

samāgacchati dṛṣṭaḥ san bhakteṣu nṛtyati svayam |
premapūrṇaprabhakteṣu praviṣṭo'tīva hṛṣyati || 39 ||
[Analyze grammar]

yāvad vratāni kurute jāgaraṃ harisannidhau |
tāvad yugāni vratakṛd viṣṇuloke mahīyate || 40 ||
[Analyze grammar]

ekādaśyādivratāhe śaśvannidrālusadgṛhe |
asurā rākṣasā yāmyā nṛtyantyaniṣṭakārakāḥ || 41 ||
[Analyze grammar]

harervratadine gānaṃ pāṭhaṃ japaṃ samācaret |
mūkavannirgame saptajanmasu mūkatā bhavet || 42 ||
[Analyze grammar]

hareragre nartanaṃ yo nācaratyatilajjayā |
paṃgutvaṃ tasya vijñeyaṃ cātra paratra janmani || 43 ||
[Analyze grammar]

gītanṛtyajapajāgaraṇakartustu matpadam |
vāsāya vaiṣṇavaṃ sarvaśreṣṭhaṃ mayā vinirmitam || 44 ||
[Analyze grammar]

kārayeccānyabhaktān yo jāgaraṃ vai harerdine |
animeṣo mama pārṣadāgryo vaset sa dhāmani || 45 ||
[Analyze grammar]

nidrāluṃ jāgrati bhāve yojayedyo harerdine |
vasecciraṃ tu vaikuṇṭhe pitṛkoṭibhiranvitaḥ || 46 ||
[Analyze grammar]

matiṃ dadāti yaḥ kṛṣṇavrate jāgaraṇaṃ prati |
ṣaṣṭivarṣasahasrāṇi śvetadvīpe vaseddhi saḥ || 47 ||
[Analyze grammar]

kāmadoṣakṛtaṃ pāpaṃ janmanyanyatra vāṃ kṛtam |
śrīharerjāgare sarvaṃ niśi nāśaṃ pragacchati || 48 ||
[Analyze grammar]

hareścāgre tathā śālagrāmasyāgre prajāgaram |
kurvanti tu phalaṃ teṣāṃ koṭitīrthakṛtaṃ bhavet || 49 ||
[Analyze grammar]

anyathā sukṛtaṃ sarvaṃ naśyatyeva hi nidrayā |
nindayāpi vrataṃ naśyatyeva phalaṃ kṛto bhavet || 50 ||
[Analyze grammar]

pūruṣārthāḥ sampadaśca putrā kīrtirdhanādikam |
śāśvatāḥ svargalokāya labhyante jāgare vrate || 51 ||
[Analyze grammar]

vinā jāgaraṇaṃ naiva viṣṇoḥ prasannatā bhavet |
yajñāyutaiḥ śāśvato vai loko naivāpyate kvacit || 52 ||
[Analyze grammar]

vrate ca jāgare labdhe labhyate dhāma śāśvatam |
jāgarārthaṃ gacchataḥ syātpade'śvamedhajaṃ phalam || 53 ||
[Analyze grammar]

pādayoḥ pāṃsavaḥ saktāstāvadvarṣasahasrakam |
jāgarī tiṣṭhate divye vaikuṇṭhe ca pare divi || 54 ||
[Analyze grammar]

vratarātrau jāgarārthaṃ gantavyaṃ harimandiram |
pādalagnarajaḥsaṃkhyayugavāso harergṛhe || 55 ||
[Analyze grammar]

ekādaśyāstathā dvādaśyāśca rātrau prajāgaram |
prakartavyaṃ prayatnena jīvā'jñānavidhūtaye || 56 ||
[Analyze grammar]

uttamaṃ ca madhyamaṃ ca kaniṣṭhaṃ ceti vai matam |
tridhā jāgaraṇaṃ tatra cottamaṃ kāryameva tat || 57 ||
[Analyze grammar]

kathāyuktaṃ gānayuktaṃ nṛtyayuktaṃ viśeṣataḥ |
sāttvikībhāvanāyuktaṃ jāgaraṃ tūttamaṃ matam || 58 ||
[Analyze grammar]

gāndharvaharikīrtyādiyutaṃ tālādisaṃyutam |
dīpadhūpādiśobhāḍhyaṃ jāgaraṃ cottamaṃ matam || 59 ||
[Analyze grammar]

bhaktibhāvasamāyuktaṃ nāmoccārasamanvitam |
nairmalyatuṣṭijanakaṃ jāgaraṃ cottamaṃ matam || 60 ||
[Analyze grammar]

lokaraṃjanakotsāhaprotsavādisamanvitam |
naivedyaphalapānādiyutaṃ jāgaramuttamam || 61 ||
[Analyze grammar]

harerārārtrika yatra hareryatra pradakṣiṇam |
hareragre rāśayogastadvai jāgaramuttamam || 62 ||
[Analyze grammar]

śāstrajñānaṃ guroḥ sevā devasevā ca yatra vai |
smaraṇaṃ pādasevā ca jāgaraṃ cottamaṃ hi tat || 63 ||
[Analyze grammar]

sarvabhāvā harau yatra vaiṣṇavāgryāśca yatra vai |
tajjāgaraṃ hi kartavyaṃ pakṣayoḥ śuklakṛṣṇayoḥ || 64 ||
[Analyze grammar]

vratadānatapohomasvādhyāyādibhirityapi |
kiṃ cānyaiḥ puṇyakāryairvā na vrate jāgaraṃ yadi || 65 ||
[Analyze grammar]

pravāse ca vane kṣetre'raṇye grāmāntare'pi ca |
vāṭikāyāṃ samāje vā nadyāṃ śaile'tige raṇe || 66 ||
[Analyze grammar]

khinnā'vasthā'tikāle vā parādhīne mahāpathe |
jāgaraṇaprakartā me vrate so'tīva me priyaḥ || 67 ||
[Analyze grammar]

yasya kasyāpi bhakto vā mama bhakto'pi sarvathā |
vrate'hni sarvathā nidrātyāgaṃ kuryād vrajet phalam || 68 ||
[Analyze grammar]

śaivaḥ sauraśca śāktaśca gaṇeśabhakta ityapi |
mama vibhūtibhakto'pi vrate jāgaraṇaṃ caret || 69 ||
[Analyze grammar]

nidrālustu paśurjñeyaḥ indriyārāma eva saḥ |
vipriyaṃ me kṛtaṃ tena vrate no jāgaraṃ kṛtam || 70 ||
[Analyze grammar]

nidrā ca bhojanaṃ caivendriyāhārān karoti yaḥ |
vrate me sa bhavet tiryagyonau pratikaṇaṃ muhuḥ || 71 ||
[Analyze grammar]

nihatāḥ pitarastena devānāṃ ca vadhaḥ kṛtaḥ |
puṇyarekhā hatā tena saubhāgyaṃ nāśitaṃ tayā || 72 ||
[Analyze grammar]

sampado vipadāṃ pātraṃ kṛtaṃ tenātimāninā |
jāgaraṃ ca vrataṃ yena kṛtaṃ naiva harerdine || 73 ||
[Analyze grammar]

satālīvādanaṃ kurvan gālavādyaṃ ca vādayan |
nṛtyan gāyan kautukaṃ darśayan vai jāgaraṃ caret || 74 ||
[Analyze grammar]

caritrāṇi smārayaiśca raṃjayan vaiṣṇavān janān |
romāṇi premapūrṇāni saṃprahṛṣṭāni darśayan || 75 ||
[Analyze grammar]

ālāpān janayan ramyān miṣṭān bhāvān prakāśayan |
hāvān vyaṃgyān śaktalakṣyān kīrtanārthān vivecayan || 76 ||
[Analyze grammar]

evaṃ vrate prakurvan jāgaraṃ prema pradarśayan |
nimiṣe nimiṣe tasya puṇyaṃ syānnaimiṣaṃ tathā || 77 ||
[Analyze grammar]

tīrthakoṭiphalaṃ tasya yajñakoṭiphalaṃ mahat |
svargakoṭiphalaṃ caiva dānakoṭiphalaṃ mahat || 78 ||
[Analyze grammar]

śāntena manasā dhūpaṃ dīpaṃ nīrājanaṃ tathā |
kuryācca jāgaraṃ rātrau saptadvīpādhipo bhavet || 79 ||
[Analyze grammar]

mahāpāpātipāpāni koṭihatyāsamāni vai |
sajāgare vrate samyag vilayaṃ yānti khaṇḍaśaḥ || 80 ||
[Analyze grammar]

ekataḥ sarvapuṇyāni caikato vratajāgaram |
jāgarasya mahatpuṇyaṃ viśiṣyate'nyapuṇyataḥ || 81 ||
[Analyze grammar]

kāśī dvārāvatī raivatācalaḥ somapāṭṭaṇam |
arbudaścāruṇaścaiva mandaro himaparvataḥ || 82 ||
[Analyze grammar]

sahyādrirnavalakṣaśca vindhyo droṇācalastathā |
mahākālavanaṃ vṛndāvanaṃ cāvantikā tathā || 83 ||
[Analyze grammar]

puṣkaraṃ ca prayāgaṃ ca revā svarṇā yamasvasā |
gayā ca gokulaṃ godāvarī gaṃgā ca bhadrikā || 84 ||
[Analyze grammar]

gaṇḍakī tāmraparṇī ca brahmaputrādayo nadāḥ |
kukumavāpikā māyā kāṃcī śrīpuruṣottamā || 85 ||
[Analyze grammar]

sarve te tīrthavidhinā kṛtā api na te tathā |
phalaṃ yacchanti vai yādṛk phalaṃ haridinavratāt || 86 ||
[Analyze grammar]

sajāgarāt kṛtāt puṇyaṃ sarvapuṇyātigaṃ yataḥ |
tīrthāni parvatā nadyaḥ sāgarāśca vanāni ca || 87 ||
[Analyze grammar]

araṇyāni ca caityāni dvīpāśca pṛthivī tathā |
tattvāni devāḥ ṛṣayo munayaḥ pitaro'gnayaḥ || 88 ||
[Analyze grammar]

gandharvāḥ kinnarāḥ nāgāścāraṇā brāhmasṛṣṭayaḥ |
vaimānikāśca vairājāḥkālābhimānikeśvarāḥ || 89 ||
[Analyze grammar]

ye kecittārakāḥ proktāste sarve lokadhārakāḥ |
ekādaśyā jāgare vai samāgacchanti sarvataḥ || 90 ||
[Analyze grammar]

tato jāgarakartāro devā eva na saṃśayaḥ |
tatra samāgatān devān prasādaiśca sutarpayet || 91 ||
[Analyze grammar]

prāsādikaṃ sunaivedyaṃ rakṣaṇīyaṃ prayatnataḥ |
dvādaśyāṃ pāraṇāyāṃ tad bhakṣaṇīyaṃ vratārthinā || 92 ||
[Analyze grammar]

prātaḥkāle brāhmabhāge snātvā hariṃ prapūjya ca |
samarpayedupavāsaṃ jāgaraṃ vratamityapi || 93 ||
[Analyze grammar]

haraye cārpayet sarvaṃ vrataṃ ca phalamityapi |
prasīda śrīhare me tvaṃ vratenā'nena sarvathā || 94 ||
[Analyze grammar]

ityuccārya jalaṃ dadyāt pṛthivyāṃ harisannidhau |
jñānado muktido bhaktasukhado bhava sarvathā || 95 ||
[Analyze grammar]

ityuktvā ca tato natvā bhojayedvaiṣṇavān vratī |
pāraṇāṃ ca tataḥ kuryād yathāsaṃbhavamagrataḥ || 96 ||
[Analyze grammar]

dānaṃ dadyātsarvatobhadrākhyamaṇḍalamityapi |
sadhānyaṃ gurave dadyād ghaṭādikaṃ samūrtikam || 97 ||
[Analyze grammar]

prātaryadā dvādaśī tu svalpāpi na bhavettadā |
rātrau tu pāraṇāṃ kuryād dvādaśyāmeva sarvathā || 98 ||
[Analyze grammar]

na tatra rātridoṣo'sti niṣedho nāsti pāraṇe |
niśi snānaṃ pāraṇaṃ ca tatra doṣapradaṃ nahi || 99 ||
[Analyze grammar]

tatpūrvāparayāmābhyāṃ dinavat karma kārayet |
yarhi bhavati svalpāpi dvādaśī pāraṇādine || 100 ||
[Analyze grammar]

uṣaḥkāle dvayaṃ kuryāt prātarmadhyāhnikaṃ tadā |
sādhitā dvādaśī yena phalaṃ tasya hyanantakam || 101 ||
[Analyze grammar]

evaṃ vrataṃ kṛtaṃ yena sādhitaṃ sakalaṃ bhavet |
dvādaśīṃ ca vrataṃ kṛtvā sādhayitvā harerdinam || 102 ||
[Analyze grammar]

bahavo vaiṣṇavā divyā gatā vaiṣṇavadhāma yat |
nāsti hareḥ samo devo na tithirdvādaśīsamā || 103 ||
[Analyze grammar]

vrataṃ naikādaśītulyaṃ trayaṃ mokṣapradaṃ yataḥ |
hareryogācca tatsarvaṃ bhavet pūrṇaṃ ca śāśvatam || 104 ||
[Analyze grammar]

bhaktānāṃ vallabhaṃ kuryād bhaktānāṃ vallabho hariḥ |
vratajāgaraṇapūjāprakartā vallabho hareḥ || 105 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne ekādaśīvratajāgaraṇādimahimanirūpaṇanāmā saptatriṃśadadhikadviśatatamo'dhyāyaḥ || 237 ||
[Analyze grammar]