Chapter 236

śrīnārāyaṇa uvāca |
śṛṇu lakṣmi pravakṣye tvāṃ pakṣavardhinikā'bhidhām |
ekādaśī priyāṃ me'ti yayā mokṣamavāpnuyāt || 1 ||
[Analyze grammar]

ekādaśī prapūrṇā ca daśamīvedhasaṃyutā |
ekadaśīvedhayuktā dvādaśyarkodaye ca yā || 2 ||
[Analyze grammar]

evaṃkramādamāvāsyā pūrṇimā vā'rkaprākkṣaṇe |
sampūrṇā nāḍikāṣaṣṭiḥ pratipacca tathāvidham || 2 ||
[Analyze grammar]

ekādaśī samārabhya pratipaddivasāvadhi |
sampūrṇā nāḍikāṣaṣṭiryadā tvahnaḥ pramāṇatā || 4 ||
[Analyze grammar]

saikādaśī tadā jñeyā pakṣavardhinikā'bhidhā |
dvādaśī sā samupoṣyā vrataṃ kāryaṃ vidhānataḥ || 5 ||
[Analyze grammar]

aśvamedhā'yutaistulyā sā bhavet pakṣavardhinī |
yāṃ kṛtvā tu mahālakṣmi phalā''nantyamavāpnuyāt || 6 ||
[Analyze grammar]

pūjite cā'rcite viṣṇau vaikuṇṭhaṃ phalamāpyate |
pūjāṃ tatra pravakṣyāmi yayā tuṣyati keśavaḥ || 7 ||
[Analyze grammar]

maṇḍalaṃ sarvatobhadraṃ saptadhānyaiḥ prakārayet |
madhye ghaṭaṃ ca sauvarṇa sajalaṃ sthāpayennavam || 8 ||
[Analyze grammar]

tāmraghaṭaṃ ca yadvā'tra pañcapallavaśobhitam |
pañcaratnasamāyuktaṃ śvetavastrapraveṣṭitam || 9 ||
[Analyze grammar]

candanārcitamevainaṃ puṣpahārābhiveṣṭitam |
ghaṭe tatra mahatpātraṃ sagodhūmaṃ tu tāmrajam || 10 ||
[Analyze grammar]

saphalaṃ sanārikelaṃ samiṣṭānnaṃ suyojayet |
sauvarṇaṃ kārayet kṛṣṇaṃ māsasaṃjñābhidhānakam || 11 ||
[Analyze grammar]

snāpayecca tathā paṃcāmṛtena vidhinā harim |
abhiṣekaṃ tīrthajalaiḥ kārayellepayettataḥ || 12 ||
[Analyze grammar]

kuṃkumā'kṣatakastūrīcandanāttarakarpuraiḥ |
vastrayugmaṃ copavītaṃ kaustubhaṃ bhūṣaṇāni ca || 13 ||
[Analyze grammar]

alaṃkārāḥ pradātavyāḥ puṣpahārādayastathā |
kaṭakāṃgadamukuṭaśṛṃkhalāraśanormikāḥ || 14 ||
[Analyze grammar]

siṃhāsanaṃ pradātavyaṃ chatropānahasaṃyutam |
sugandhadravyamatyugraṃ pradātavyaṃ ca bhāvataḥ || 15 ||
[Analyze grammar]

lakṣmīstatra ca saṃsthāpyā sarvābharaṇabhūṣitā |
sarvālaṃkārasaubhāgyadravyabhūṣaṇabhūṣitā || 16 ||
[Analyze grammar]

pūjanīyā hareḥ pārśve tvekādaśī svarūpiṇī |
pūjayecchrīhariṃ tatra kuṃbhapātropari sthitam || 17 ||
[Analyze grammar]

dhyāyecca padmanābhaṃ vai pādau tatra vicintayet |
viśvamūrtiṃ vicintyaiva jānunī saṃsmarettataḥ || 18 ||
[Analyze grammar]

jñānagamyaṃ ca saṃsmṛtya hyūrū tatra vicintayet |
jñānapradaṃ hariṃ smṛtvā kaṭiṃ cāpi vicintayet || 19 ||
[Analyze grammar]

viśvanāthaṃ hariṃ smṛtvā hyudaraṃ saṃvicintayet |
śrīdharaṃ śrīhariṃ smṛtvā hṛdayaṃ cintayeddhareḥ || 20 ||
[Analyze grammar]

sakaustubhaṃ hariṃ smṛtvā kaṇṭhaṃ samyag vicintayet |
kṣatrāntakāriṇaṃ smṛtvā bāhū samyag vicintayet || 21 ||
[Analyze grammar]

cidākāśaṃ hariṃ smṛtvā lalāṭaṃ cintayettataḥ |
sarvarūpaṃ hariṃ dhyātvā śiraḥ samyag vicintayet || 22 ||
[Analyze grammar]

kṛṣṇanāmnā ca śastrāṇi sarvāṃgāni ca cintayet |
evaṃ dhyātvā tataścārghyaṃ nālikereṇa dāpayet || 23 ||
[Analyze grammar]

saṃsārasāgarāt kṛṣṇa māṃ samuddhara keśava |
pūjāmarghyaṃ gṛhāṇeśa harikṛṣṇa namo'stute || 24 ||
[Analyze grammar]

ṣoḍaśavastuvaryāṇi deyāni paramātmane |
naivedyaṃ vividhaṃ dadyājjalaṃ dadyāttu śītalam || 25 ||
[Analyze grammar]

tāmbūlaṃ susugandhaṃ sudravyaṃ dadyācca bhaktitaḥ |
ghṛtenā'pyatha tailena dīpa kuryācca bhaktitaḥ || 26 ||
[Analyze grammar]

ārārtrikaṃ namaskāraṃ pradakṣiṇaṃ ca saṃstavam |
kṣamāpanaṃ ca yāceta puṣpāñjaliṃ prakalpayet || 27 ||
[Analyze grammar]

hareḥ pūjāṃ śubhāṃ kṛtvā guroḥ pūjāṃ prakārayet |
candanādyarpaṇavastrabhūṣādānādinā tathā || 28 ||
[Analyze grammar]

kañcukoṣṇīṣahārādisugandhādi pradāpayet |
dakṣiṇāṃ cānnadhānyādi tathā mudrādi cārpayet || 29 ||
[Analyze grammar]

bhojanaṃ caiva tāmbūlaṃ datvā''cāryaṃ pratoṣayet |
yathāvittaṃ yathāśakti kāryaṃ utsava uttamaḥ || 30 ||
[Analyze grammar]

sāyaṃ cāpi tathā pūjā kartavyā bhaktibhāvataḥ |
tato jāgaraṇaṃ kuryādgītanṛtyasamanvitam || 31 ||
[Analyze grammar]

prācyākhyānakathāyuktaṃ hāsyāhlādasamāyutam |
śrīṃ pakṣavardhinīnāmnīṃ pūjayet kṛṣṇasannidhau || 32 ||
[Analyze grammar]

tanmāhātmyaṃ saṃśṛṇuyādvratasya phalamāpnuyāt |
paṃcāgnisādhane puṇyaṃ yattu syāttīrthakoṭiṣu || 33 ||
[Analyze grammar]

tatphalaṃ samavāpnoti viṣṇorjāgaraṇājjanaḥ |
upavāse kṛte tatra hatyākoṭikṣayo bhavet || 34 ||
[Analyze grammar]

kartavyā tu viśeṣeṇa vaiṣṇavairjñānayogibhiḥ |
na tīrthāni na cāraṇyakṣetrāṇi kulaparvatāḥ || 35 ||
[Analyze grammar]

tārayanti janān yadvattārayetpakṣavardhinī |
site candre kalāvṛddhistathā'syāṃ puṇyavardhanam || 36 ||
[Analyze grammar]

sūryodaye tamonāśastathā'jñānavināśinī |
pakṣavivardhinī seyaṃ mokṣapakṣavivardhinī || 37 ||
[Analyze grammar]

muktikalāpradā ṣoḍaśādikalāprapoṣikā |
kāśīsamā sadā muktau dvārakāsadṛśī tathā || 38 ||
[Analyze grammar]

kuṃkumavāpikātulyā vāṃchitaṃ pradadātyasau |
bhaktānāṃ tu sadā muktipakṣaṃ vardhayatīva sā || 39 ||
[Analyze grammar]

jñānaṃ dharmaṃ tathā bhaktiṃ vardhayatyeva sarvathā |
yathā śuklā tathā kṛṣṇā vibhedaṃ naiva kārayet || 40 ||
[Analyze grammar]

santārayati kartāraṃ daśapūrvāndaśā'parān |
santārayati vratinaṃ dvādaśyubhayataḥ kṛtā || 41 ||
[Analyze grammar]

vārāṇasyāṃ bhavedvāsaḥ ṣaṣṭivarṣasahasrakam |
yajñadānaṃ kurukṣetre somaparvasahasrakam || 42 ||
[Analyze grammar]

vidhṛtyādisuyogeṣu lakṣadānottamottamam |
sūryacandragrahadānaṃ kurukṣetre kṛtaṃ śatam || 43 ||
[Analyze grammar]

prabhāse vā kṛtaṃ dānaṃ somayāgasahasrakam |
yatilakṣaṃ gṛhe bhuṃkte tatphalaṃ nityameva yat || 44 ||
[Analyze grammar]

kedārajalapānasya janmā'darśanakaṃ phalam |
ekādaśyupavāsasya kalāṃ nārhanti ṣoḍaśīm || 45 ||
[Analyze grammar]

gosahasrapradānādvai sahasraguṇitaṃ phalam |
sādhūnāṃ pūjane proktaṃ tasmād daśaguṇaṃ phalam || 46 ||
[Analyze grammar]

brahmaniṣṭhaprapūjāyāṃ tato daśaguṇaṃ punaḥ |
devārthaṃ bhūmidātuśca kanyādātustatastathā || 47 ||
[Analyze grammar]

tato'pi daśaguṇakaṃ yajñāvabhṛthapāvane |
tato'nantaṃ bhavedekādaśīvratini vai phalam || 48 ||
[Analyze grammar]

upavāse tu yatpuṇyaṃ tato'rdhaṃ naktabhojane |
naktasyā'rdhaṃ bhavedekabhukte vā phalabhojane || 49 ||
[Analyze grammar]

ekabhuktena naktenopavāsena phalena ca |
yatpuṇyaṃ labhate tacca rātrau jāgaraṇe kṛte || 50 ||
[Analyze grammar]

ekādaśyupavāsasya puṇyasaṃkhyā na vidyate |
pratyekāyāśca māhātmyaṃ pravadāmi nibodha me || 51 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pakṣavardhinyekādaśīvratapūjādinirūpaṇanāmā ṣaṭtriṃśadadhikadviśatatamo'dhyāyaḥ || 236 ||
[Analyze grammar]