Chapter 234

śrīnārāyaṇa uvāca |
śṛṇu lakṣmi kathāṃ caikādaśyā utpattibodhikām |
pūrve kṛtayuge jātāṃ nārāyaṇavibhāvitām || 1 ||
[Analyze grammar]

tatra satye yuge jātastālajaṃghakule mahān |
atyadbhuto mahāraudro nāḍījaṃghāhvayo'suraḥ || 2 ||
[Analyze grammar]

tasya putrau murajaṃgho'bhavad devabhayaṃkaraḥ |
tapastaptvā'bdasāhasraṃ paraṃ balamavāpa saḥ || 3 ||
[Analyze grammar]

indro'pi nirjitastena sarve devāśca nirjitāḥ |
svargānniṣkāsitā devā vicerurbhūmimaṇḍale || 4 ||
[Analyze grammar]

bhītāḥ svāsthyavihīnāste yayuryatra purandaraḥ |
purandaro'pi dukhāḍhyo yayau yatra janārdanaḥ || 5 ||
[Analyze grammar]

śaṃkaraśca tathā brahmā yayuścānye sureśvarāḥ |
jalamadhye śayānaṃ śrīnārāyaṇaṃ pratuṣṭuvuḥ || 6 ||
[Analyze grammar]

namaste devadeveśa śaraṇāgatavatsala |
dānavānāṃ ca daityānāmasurāṇāṃ vimardaka || 7 ||
[Analyze grammar]

śaraṇaṃ tvaṃ sadā''rtānāṃ duḥkhahāḥ śaraṇārthinām |
rakṣā'smān karuṇāsindho daityādbalasamedhitāt || 8 ||
[Analyze grammar]

tvaṃ gatistvaṃ paraṃ saukhyaṃ bhaktānāṃ paramāyanam |
tvaṃ mātā rakṣakaḥ svāmī tvaṃ pitā pālakaḥ prabhuḥ || 9 ||
[Analyze grammar]

tvaṃ sadvācyaṃ kāraṇaṃ vai cotpattiḥ sṛṣṭirityapi |
tvamevā''pūrakastatra tvameva rūpavān haraḥ || 10 ||
[Analyze grammar]

saṃhārakārako devastvameva bhojanapradaḥ |
svāhā svadhā vaṣaṭkārastvamevāgnistvamomiti || 11 ||
[Analyze grammar]

aniruddhaśca pradyumnaḥ saṃkarṣaṇastvameva hi |
brahmaviṣṇumaheśānāstvameva devakoṭayaḥ || 12 ||
[Analyze grammar]

sūryaścandrastvamevāsi vyomā'nilā'nalā''bbhuvaḥ |
tato'vāntarasṛṣṭiśca tvameva puruṣottama || 13 ||
[Analyze grammar]

varadātā rakṣakaśca varasaṃhārakṛd bhavān |
sthāvaraṃ jaṃgamaṃ sarvaṃ bhavatyeva pratiṣṭhitam || 14 ||
[Analyze grammar]

daityadānavarakṣobhirnirjitāḥ surapuṃgavāḥ |
yadā bhavantyasukhāste śaraṇaṃ yānti te tadā || 15 ||
[Analyze grammar]

vayaṃ sarve svargabhraṣṭā dānavādibhirarditāḥ |
aṭāmo'raṇyabhūbhāge rakṣāmicchāma īśvara || 16 ||
[Analyze grammar]

rakṣā'smān sarvathā deva dānavānmurasaṃjñakāt |
śrutvā nārāyaṇasteṣāṃ papraccha bhaktavatsalaḥ || 17 ||
[Analyze grammar]

kīdṛśo dānavaḥ so'sti kiṃnāmā kiṃbalaṃ sthitiḥ |
sarvaṃ brūta surendrā yacchrutvā nāśāya cintaye || 18 ||
[Analyze grammar]

indraḥ prāha tadā devaṃ viṣṇuṃ nārāyaṇaṃ prabhum |
brahmaṇo vaṃśajaḥ so'sti kaśyapād danujo'bhavat || 19 ||
[Analyze grammar]

tālajaṃgho mahākrūrastasya nāḍīprajaṃghakaḥ |
suto'bhavanmahāpāpastasyāsti putra eva saḥ || 20 ||
[Analyze grammar]

murajaṃgha iti nāmnā kṛtavāṃstapa ugrakam |
varṣāṇāṃ vai sahasraṃ yannirāhāro'bhavattadā || 21 ||
[Analyze grammar]

śatavarṣaṃ bhuve pādāṃguṣṭhe sthitvā'tapat tapaḥ |
śatavarṣaṃ jalaśāyī ghoraṃ tapaścakāra saḥ || 22 ||
[Analyze grammar]

śatavarṣaṃ vāyubhakṣī sūryadraṣṭā śataṃ samāḥ |
śatavarṣaṃ bāṣpabhojī tapastaptvā'tidāruṇam || 23 ||
[Analyze grammar]

paṃcaśataṃ ca varṣāṇāṃ samādhāvatapattapaḥ |
tasya dehopari tatra valmīkaḥ kācakānvitaḥ || 24 ||
[Analyze grammar]

vṛkṣavallīsamākrānto hyabhavacchṛṃgasadṛśaḥ |
tato dhūmo viniṣkrānto divaṃ yāto'tidāruṇaḥ || 25 ||
[Analyze grammar]

tanmūrdhno'bhūnmahānagniryena jajvāla dyauratha |
bhūśca satyādilokāśca devāstresuśca mānavāḥ || 26 ||
[Analyze grammar]

yayurvai śaraṇaṃ sarve brahmāṇaṃ prapitāmaham |
sveṣāṃ nāpātipātitvaṃ jagadurduḥkhasāgaram || 27 ||
[Analyze grammar]

ko'yaṃ vahniḥ kathaṃ jātaḥ sarvaṃ prajvālayatyaho |
rakṣa rakṣa prajānātha śāntiṃ kuru jagatprabho || 28 ||
[Analyze grammar]

śrutvaivaṃ tadvaco brahmā sasuro mārgaṇāya tat |
yayau vahnidhūmalekhāsṛtyā mūlaṃ bhuvi sthitam || 29 ||
[Analyze grammar]

dṛṣṭvā vṛkṣādikān tatra mumoha sṛṣṭikṛttadā |
aho kaścinna vai cātra dṛśyate tāpaso janaḥ || 30 ||
[Analyze grammar]

kathaṃ kasmānmayā cātra mārgaṇīyo bhaveddhi saḥ |
iti vicārya brahmā vai niṣasāda mahītale || 31 ||
[Analyze grammar]

viṣṇustadā mahāśaṃkhanādaṃ cakāra vai muhuḥ |
tathāpi na murastatra prabubodha tadā surāḥ || 32 ||
[Analyze grammar]

hatāśāḥ saṃsthitāḥ sarve pramlānāntarakāmanāḥ |
tadā 3 viṣṇunā tatra samādhiḥ saṃyamaḥ kṛtaḥ || 33 ||
[Analyze grammar]

praveśaśca kṛtastatra muradaityasya varṣmaṇi |
śuṣkakāṣṭhasamaṃ śuṣkanāḍīmāṃsāsthipiṇḍakam || 34 ||
[Analyze grammar]

sādraṃ ca sakriyaṃ kṛtvā varṣma cā'plāvayat tvajaḥ |
kamaṇḍalorjalenā'bhyasiñcan mūrdhni yadā punaḥ || 35 ||
[Analyze grammar]

tadā pallavatāṃ yāte varṣmaṇi muradānave |
netre pronmīlite jāte dṛṣṭvā sa dānavaḥ surān || 36 ||
[Analyze grammar]

natvā prāha kathaṃ yātāstapobhaṃgavidhitsayā |
yāta dūraṃ na me kāryaṃ devaiḥ kiñciddhi vidyate || 37 ||
[Analyze grammar]

brahmā prāha tadā daityaṃ prasannāstapasā tava |
vayaṃ prāptā varaṃ dātuṃ yatheṣṭaṃ brūhi putraka || 38 ||
[Analyze grammar]

muraḥ prāha na me mṛtyustava sṛṣṭyā kathaṃcana |
viṣṇunā vā hareṇāpi bhavediti pradehi me || 39 ||
[Analyze grammar]

tathā'stviti varaṃ datvā yayurbrahmādayastataḥ |
muro'pi protthito hṛṣṭo yayau svasthānameva saḥ || 40 ||
[Analyze grammar]

merau candrāvatīṃ ramyāṃ rājadhānīṃ kulāgatām |
pālayāmāsa vidhinā dānavairadhivāsitām || 41 ||
[Analyze grammar]

devāśca nirjitāstena svargāccāpi nirākṛtāḥ |
indrasthānaṃ samāhṛtya dānavaścendrakaḥ kṛtaḥ || 42 ||
[Analyze grammar]

vahnisthānaṃ svakaṃ kṛtvā vahiścānyo vinirmitaḥ |
sūryacandrau kṛtau cānyau grahanakṣatrasaṃyutau || 43 ||
[Analyze grammar]

dikprapālāḥ kṛtāścānye dānavāḥ svīyavarṇajāḥ |
lokapālāḥ kṛtāścānye devān jitvā mureṇa vai || 44 ||
[Analyze grammar]

kārāgrahe devagaṇā nigaḍeṣu nipātitāḥ |
devalokaḥ kṛtaścānyo dānavaiḥ pariśobhitaḥ || 46 ||
[Analyze grammar]

sarvaṃ tvanyat kṛtaṃ tena pūrvaṃ vai parivartitam |
yāvannāyāti lakṣmyarthaṃ tāvattaṃ prajahi prabho || 46 ||
[Analyze grammar]

yāvaccirāyate devo hānistāvatpale pale |
tasmācchīghraṃ samutthāya tannāśāya manaḥ kuru || 47 ||
[Analyze grammar]

śrutvaitadindravacanaṃ hariḥ śeṣāyanaḥ svayam |
samutthāya ca vidhvaṃse murasyā'vāpa niścayam || 48 ||
[Analyze grammar]

hariśca śaṃkaro brahmā tathā devā maharṣayaḥ |
gatā yatrā'bhavatpuryāṃ candrāvatyāṃ mahāsuraḥ || 49 ||
[Analyze grammar]

upakaṃṭhe bahiḥ sthitvā śaṃkhaṃ dadhmau haristadā |
yuddhasambodhaśabdaṃ sa śrutvā''yayau purādbahiḥ || 50 ||
[Analyze grammar]

sasainyo yuddhadānāya cakāra raṇamulbaṇam |
naikarūpadharo vīro muro'straśastrakoṭibhiḥ || 51 ||
[Analyze grammar]

mantrairmāyābalaiścaindrajālikaiḥ rūpakoṭibhiḥ |
saṃgrāmamakarodghoraṃ devasaṃhārakārakam || 52 ||
[Analyze grammar]

kṣatā hatā vinaṣṭāśca devā rūpāntarātmakāḥ |
bhagnāśca mūrchitā naṣṭā viprāṇāścetanojjhitāḥ || 53 ||
[Analyze grammar]

asaṃkhyātasahasrairāyudhairasurapuṃgavaiḥ |
hanyamānāḥ surāḥ sarve dudruvuśca diśo daśa || 54 ||
[Analyze grammar]

viṣṇuṃ dṛṣṭvā murastaṃ ca tiṣṭha tiṣṭheti cā'bravīt |
gadāṃ gurvīṃ prāhiṇot mukundastāṃ vyapothayat || 55 ||
[Analyze grammar]

svīyayā gadayā śīghraṃ prāhiṇoccakramulbaṇam |
varadānaprabhāveṇa cakraṃ vikhaṇḍitaṃ mure || 56 ||
[Analyze grammar]

viṣṇustvāścaryamāpanna krodhasaṃraktanetrakaḥ |
dvitīyaṃ cakramādāya mumoca sainyakoṭiṣu || 57 ||
[Analyze grammar]

dānavā daityamūrdhanyāḥ chinnaśirasa eva te |
patitāśca mṛtāścānye mūrchitā vyasavo'bhavan || 58 ||
[Analyze grammar]

medinī tatra daityādimedamāsādya sārthakā |
samabhūd raṇabhūmiḥ sā dānavāraṇyasuptikā || 99 ||
[Analyze grammar]

na vai talamabhūd riktaṃ kabandhena vinā kvacit |
murastato mahākhedamavāpa sainyanāśataḥ || 60 ||
[Analyze grammar]

ekākī vyacaran śastrairyuyudhe viṣṇunā tadā |
viṣṇorāyudhadhuryāṇāṃ vināśastena śatruṇā || 61 ||
[Analyze grammar]

kṛtaṃścāstrāṇi sarvāṇi pragrastāni tadā punaḥ |
astraśastravihīnaśca viṣṇurjāto yadā tadā || 62 ||
[Analyze grammar]

mumudire daityagaṇāḥ praharṣuścātidānavāḥ |
surā vai mlānatāṃ prāptāḥ sāśakāśca prajīvane || 63 ||
[Analyze grammar]

atha viṣṇuṃ viśastraṃ vai jñātvā nītyā murastadā |
bāhuyuddhaṃ samakarod viṣṇunā dāruṇaṃ tataḥ || 64 ||
[Analyze grammar]

māyayā muradaityena viṣṇorbāhuḥ pradharṣitaḥ |
bāhubandhaḥ kṛtastena jaḍībhūtā bhujāḥ khalu || 65 ||
[Analyze grammar]

catvāro'pyabhavaṃstatra devā vai duḥkhino'bhavat |
hāheti karuṇa cākruśyā''saṃstrastā gatāśayāḥ || 66 ||
[Analyze grammar]

murasyā''sīttadā samyag vijayo devakardane |
cakāra rājyaṃ ruciraṃ vijitvā satyalokajam || 67 ||
[Analyze grammar]

caturdaśabhuvanānāṃ samrāḍabhūnmurastataḥ |
viṣṇustrasto gato badrikāśramaṃ himaśailagam || 68 ||
[Analyze grammar]

himālaye guhā siṃhavatī nāmnī mahattarā |
vartate yojanānāṃ vai catvāro dīrghavistarā || 69 ||
[Analyze grammar]

dvāramekaṃ ca yasyāste tasyāṃ gatvā mahāprabhuḥ |
suptau bhayaṃ darśayan vai lokānāṃ hitakāmyayā || 70 ||
[Analyze grammar]

dānavatsaṃ mārgayan vai kadācittatra gahvare |
jñātvā viṣṇuṃ prasuptaṃ sa praviveśa guhāntaram || 71 ||
[Analyze grammar]

prasuptaṃ śrīhariṃ dṛṣṭvā dānavendro jagāda tam |
aho trailokyapūjya tvaṃ kathamāśrayase guhām || 72 ||
[Analyze grammar]

tvadāśritānāṃ rakṣāṃ cāpatkāle kiṃ karoṣi na |
uttiṣṭha viṣṇo bhadraṃ te prottiṣṭha yuddhamācara || 73 ||
[Analyze grammar]

tvādṛśānāṃ śṛgālānāṃ svapanaṃ kiṃ nisargajam |
nayāmi yamabhavanaṃ yadvā tvaṃ māṃ samāśraya || 74 ||
[Analyze grammar]

kuru dāsyaṃ sadā me tvaṃ dehi vaikuṇṭhameva me |
yadvā yuddhaṃ kuru viṣṇo śāṭhyaṃ mā samaye cara || 75 ||
[Analyze grammar]

ityevaṃ vadatastasya murasya nāśanāya vai |
hariḥ saṃcintayāmāsa supta eva tadantare || 76 ||
[Analyze grammar]

mahālakṣmīṃ prasasmāra dānavāntakarāya vai |
smṛtvā brahmapradattaṃ ca varaṃ murasya pūrvajam || 77 ||
[Analyze grammar]

vedhaḥsṛṣṭikṛtānnāśo mā bhūditi vicintya ca |
lakṣmyaṃśātmakasāmarthyaṃ svaikādaśendriyātmakam || 78 ||
[Analyze grammar]

divyaṃ tapaḥsvarūpaṃ tat prāviścakāra vai hariḥ |
tacca mūrtamabhūttatra kanyārūpaṃ susundaram || 79 ||
[Analyze grammar]

kanyakā sā'titejobhiḥ projjvalā svarṇasannibhā |
candrakāntisamavyāptaḍhīptisandohaśītalā || 80 ||
[Analyze grammar]

sarvākṛtisamāyogyā harirūpā'tisundarī |
divyapraharaṇairyuktā prodbhinnanavasustanī || 81 ||
[Analyze grammar]

kiñcidanaṃgarūpābhibhūtā dṛṣṭimanoharā |
saubhāgyadravyabhūṣābhivastrakuntalaśobhanā || 82 ||
[Analyze grammar]

vidyuttejaḥsamākrāntā''karṇāntadīrghalocanā |
mahābalasamāviṣṭā mohinīva vapuṣmatī || 82 ||
[Analyze grammar]

svarṇābhūṣaṇaśobhāḍhyā sugandhamukhamārutā |
susvarā sarvalāvaṇyaprasannamukhapaṃkajā || 84 ||
[Analyze grammar]

campakābhakarapādatalo'ṅguliprabhāvatī |
komalā komalāṃgī ca sarvaśobhādhivāsinī || 85 ||
[Analyze grammar]

cakṣurharā manoharā cātmaharā'tikarṣaṇī |
samudbhūtā mahāramyākṛtirhāsyaṃ karoti ca || 86 ||
[Analyze grammar]

dṛṣṭā mureṇa tatraiva tejomadhye virājitā |
muraśca mohamāsādya parirabdhuṃ pracakrame || 87 ||
[Analyze grammar]

kanyā prāha mahādaitya sujño'si dharmavānasi |
vinā vaivāhikaṃ kṛtyaṃ tvadarthaṃ nāhamutsahe || 88 ||
[Analyze grammar]

vijitya māṃ gṛhāṇādya paṇo'yaṃ mama dānava |
yuddhe jitvā gṛhāṇemāṃ dāsībhūtāṃ manasvinīm || 89 ||
[Analyze grammar]

murastasyāḥ samākarṇya vismṛtya viṣṇumeva ca |
sajjo'bhūd yuddhavṛttāya śastrā'strādibhiranvitaḥ || 90 ||
[Analyze grammar]

kanyayā raṇasaṃgrāme pravartite mahāsure |
kartitaḥ kaṇṭhadeśādvai mastakaṃ bhasmitaṃ tadā || 91 ||
[Analyze grammar]

dehaścūrṇīkṛtastasya gadayā pallatādibhiḥ |
muraśca nihatastasya yoddhāro'pi hatāstayā || 92 ||
[Analyze grammar]

mahākolāhalaṃ śrutvā viṣṇurnidrāṃ vihāya ca |
abudhyata mṛtaṃ dṛṣṭvā muraṃ vismayamāgataḥ || 93 ||
[Analyze grammar]

aho'nayā kanyayā vai hato mahābalo'suraḥ |
mayā yo na jitaḥ pūrvaṃ jito hato'nayā hi saḥ || 94 ||
[Analyze grammar]

mahālakṣmīrmahāśaktirmahāmāyā nviyaṃ khalu |
samarthā duḥkhanāśāya devānāṃ hitakāriṇī || 95 ||
[Analyze grammar]

upakāraḥ kṛtaḥ sarvo devānāṃ mama cāpi vai |
nihato dānavo duṣṭo devāsurabhayaṃkaraḥ || 96 ||
[Analyze grammar]

iti prasannatāṃ prāpya tadā papraccha kanyakām |
kā tvaṃ kathaṃ hato daitya kiṃ te manasi vartate || 97 ||
[Analyze grammar]

kanyā prāha hariṃ viṣṇorahamekādaśī matā |
sarvaśatrukṣayakartrī sarvapāpavināśinī || 98 ||
[Analyze grammar]

sarvatejomayī cāsmi sarvapumarthadāyinī |
tavāsmi vigrahājjātā tavendriyabalodbhavā || 99 ||
[Analyze grammar]

tava caitanyasaṃpṛktā tavāsmi putrikā prabho |
prasuptaṃ pitaraṃ daityo hantumatra samāgataḥ || 100 ||
[Analyze grammar]

cicchaktiścā'suraṃ vīkṣyā'hamudbhūtendriyādibhiḥ |
ekādaśendriyatejomayī cāhaṃ bhavāmi te || 101 ||
[Analyze grammar]

tasmādekādaśīnāmnā sarvapuṇyapradā hare |
asurasya vināśāya samudbhūtā'smi mādhava || 102 ||
[Analyze grammar]

vināśito mayā daityo devānāṃ duḥkhado mahān |
iti śrutvā sutāvākyaṃ hariḥ prāha ca tāṃ sutām || 103 ||
[Analyze grammar]

varaṃ varaya kalyāṇi kṛtaṃ kāryaṃ mahanmama |
prasanno'smi ca bhadraṃ te sarvaṃ dāsye manogatam || 104 ||
[Analyze grammar]

nā'deyaṃ vidyate devi tvayā devāḥ surakṣitāḥ |
dharmaḥ saṃsthāpanāṃ prāpto vrataṃ daivaṃ ca lakṣitam || 105 ||
[Analyze grammar]

kalyāṇamārgaḥ satataṃ janānāṃ kāritastvayā |
tasmāt svasya ca yāvadvai sarvaṃ deyaṃ hi te kṛte || 106 ||
[Analyze grammar]

śrutvaitadbhagavadvākyamekādaśī jagāda yat |
ahamekādaśī nāmnā hyadhiṣṭhātrī vratātmikā || 107 ||
[Analyze grammar]

ekādaśīdinasyā'smi sa dino māmako mataḥ |
śuklaḥ kṛṣṇaśca me divyo divaso vratameva saḥ || 108 ||
[Analyze grammar]

mahāpuṇyaḥ pavitro'yaṃ sarvapuṇyeṣu puṇyakṛt |
ato maddivasaḥ pālyo vratopoṣaṇajāgaraiḥ || 109 ||
[Analyze grammar]

indriyāṇāṃ tadā''hārā varjanīyāḥ prayatnataḥ |
mānavo maddine yo'tra hyupavāsaṃ karoti saḥ || 110 ||
[Analyze grammar]

aśvamedhasamaṃ puṇyaṃ prāpnotyeva na saṃśayaḥ |
ekabhaktena naktenopavāsena phalena vā || 111 ||
[Analyze grammar]

jalenāpi vrataṃ kuryāt sa yāyānmādhavālayam |
rātrau jāgaraṇaṃ kuryāddhareste ca prapūjanam || 112 ||
[Analyze grammar]

puṣpairdhūpaiśca dīpaiśca vividhaiśca suvastubhiḥ |
pūjanaṃ kārayenme te hyudyāpanaṃ samācaret || 113 ||
[Analyze grammar]

evaṃ vrataprakartā te dhāma yāyānparākṣaram |
garbhavāsaṃ na cāpnuyānniṣpāpaḥ syācca sarvathā || 114 ||
[Analyze grammar]

mamā'hani tu bhaktānāṃ nairmalyaṃ jāyatāṃ sadā |
bhaktiśca vardhatāṃ deve tathā śraddhā ca madvrate || 115 ||
[Analyze grammar]

mā kṣudhā pīḍayedbhaktaṃ vratinaṃ pramadājanam |
ityevaṃ varadānāni me deyāni yadi prabho || 116 ||
[Analyze grammar]

dātavyāni hare mahyaṃ tathā'nyanme śṛṇu prabho |
hariḥ pitā harirmātā bāndhavo'pi hariḥ sadā || 117 ||
[Analyze grammar]

harirbhartā hariḥ kartā poṣṭā hartā hariḥ svayam |
tasmād rūpāntaraiḥ kṛṣṇa patirme bhava sarvadā || 118 ||
[Analyze grammar]

ahaṃ ṣaḍviśatirūpā patnī te syāṃ tathā kuru |
yenā'saṃskāradoṣo me vinaśyet saṃvivāhataḥ || 119 ||
[Analyze grammar]

pātivratyaparā nityaṃ seviṣye tvāṃ patiṃ priyam |
varaṃ dehi tathā nātha saubhāgyaṃ me pravardhaya || 120 ||
[Analyze grammar]

śrutvā prāha harirbhadre bhavatād vāñcchitaṃ tava |
vrataṃ bhavatāt puṇyaṃ te rūpāṇyapi bhavantu te || 121 ||
[Analyze grammar]

patirbhavāmi te rūpāntaraiḥ śreyaḥpradā bhava |
dharmārtha kāmamokṣāṇāṃ sampradā bhava sarvathā || 122 ||
[Analyze grammar]

ekādaśīvratapūtā yāntu me vaiṣṇavaṃ padam |
aihikaṃ satphalaṃ prāpya cānte mokṣamavāpnuyuḥ || 123 ||
[Analyze grammar]

iti te varadānāni vitarāmi mama priye |
omityuktvā svayaṃ caikādaśī vai bahudhā'bhavat || 124 ||
[Analyze grammar]

haristadā svamūrteśca ṣaḍviṃśatisvarūpakaiḥ |
jagrāha vidhivat patnīrūpāmekādaśīṃ tadā || 125 ||
[Analyze grammar]

putrīrūpaṃ vilīyaiva patnīrūpaiśca vartate |
varṣe dvādaśamāsānāṃ dve'dhikasyāpi vai tathā || 126 ||
[Analyze grammar]

militvaikādaśikāḥ ṣaḍviṃśatisaṃkhyakā matāḥ |
ekādaśī tvahorātraṃ daśamī ghaṭikā'pi cet || 127 ||
[Analyze grammar]

sā tithiḥ parihartavyā hyupoṣyā dvādaśī śubhā |
ekādaśī tu sampūrṇā dvādaśī vṛddhigāminī || 128 ||
[Analyze grammar]

tasyāṃ śataguṇaṃ puṇyaṃ trayodaśyāṃ tu pāraṇā |
evaṃ vrataṃ janaḥ kuryāt phalabhāṅ mokṣabhāgbhavet || 129 ||
[Analyze grammar]

na gaṃgā na gayā naiva kāśī puṣkarameva vā |
na cāpi vaiṣṇavaṃ kṣetraṃ tulyaṃ haridinena vai || 130 ||
[Analyze grammar]

iti kṛtvā praśaṃsāṃ ca patnīṃ nītvā yayau hariḥ |
yatra candrāvatī rājadhānī murakṛtāsti vai || 131 ||
[Analyze grammar]

tatra nigaḍabandhasthān devān vyamocayaddhariḥ |
svargaṃ devātmasātkṛtvā vaikuṇṭhaṃ prayayau prabhuḥ || 132 ||
[Analyze grammar]

iti te kathitaṃ lakṣmi vratamāhātmyamuttamam |
ekādaśyāstrispṛśāyāḥ kimanyacchrotumicchasi || 133 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne muradānavayuddhanimittakaikādaśyutpattivratādivaradānanirūpaṇanāmā catustriṃśadadhikadviśatatamo'dhyāyaḥ || 234 ||
[Analyze grammar]