Chapter 232

śrīnārāyaṇa uvāca |
viśeṣeṇa mahālakṣmi siṃharāśisthite gurau |
dvārakātīrthakartṝṇāṃ dahyanti pāparāśayaḥ || 1 ||
[Analyze grammar]

prativarṣaṃ prakurvanti dvārakāgamanaṃ tu ye |
teṣāṃ pādarajaḥ spṛṣṭvā muktiṃ prayānti mānavāḥ || 2 ||
[Analyze grammar]

dilīpena vaśiṣṭhāya pṛṣṭhaṃ pūrvaṃ vadāmi tat |
anyakṣetre kṛtaṃ pāpaṃ naśyati tīrthasevanāt || 3 ||
[Analyze grammar]

tīrthakṣetrajapāpānāṃ vajralepatvamucyate |
vajralepāyato'ghasya kvā'pyasti mokṣaṇaṃ na vā || 4 ||
[Analyze grammar]

yatra pāpapraroho na tatkṣetraṃ kathyatāṃ mune |
śrutvā tad divyacakṣuṣko vaśiṣṭhaḥ prāha bhūpatim || 5 ||
[Analyze grammar]

māyānando yatiḥ kaścid tridaṇḍī kāśikāsthitaḥ |
yuvatyāṃ khalu mātaṃgyāṃ surūpāyāṃ vimohitaḥ || 6 ||
[Analyze grammar]

rājasena ca bhāvena cākṛṣṭo madyamāṃsakam |
yuyuje bhojane kāmagarveṇa matimohitaḥ || 7 ||
[Analyze grammar]

cāṇḍālatāṃ vahan rātrau cauryaṃ karoti lobhataḥ |
pāpāni vardhitānyasya mātaṃgyāḥ saṃgatermuhuḥ || 8 ||
[Analyze grammar]

kāśyāṃ kālavaśātso'pi mṛtastiryagvṛko'bhavat |
tato vyāghro markaṭaḥ śvā śṛgālaḥ śūkaro'bhavat || 9 ||
[Analyze grammar]

pāpaṃ janmasahasraistannā'naśyadatha coṣare |
nirjane rākṣaso jātismaro'bhūtkāśikābalāt || 10 ||
[Analyze grammar]

aṭannaraṇyaśailāṃśca vindhyādriṃ prāpa rākṣasaḥ |
tatrā'bhūt tasya sāścaryaṃ mokṣaṇaṃ pāpayonitaḥ || 11 ||
[Analyze grammar]

dvārāvatyāṃ mahāyātrāṃ kṛtvā ca kṛṣṇadarśanam |
snātvā ca gomatīnīre pītvā kṛṣṇāmṛtaṃ jalam || 12 ||
[Analyze grammar]

kaścid vipro gayāvāsī gacchan gṛhaṃ pathi sthitaḥ |
vindhyādrau vṛkṣasustambe viśrāntyarthaṃ kṣaṇaṃ sadā || 13 ||
[Analyze grammar]

tamūrdhvatilakaṃ vipraṃ bhaktaṃ tulasīmālikam |
gomatīnīrasaṃpūtaṃ tatra dadarśa rākṣasaḥ || 14 ||
[Analyze grammar]

tasya darśanamātreṇa vajralepo'ghasañcayaḥ |
bhāviduḥkhaprado'pyasya bhasmasādabhavat kṣaṇāt || 15 ||
[Analyze grammar]

reje puṇyaprakāśena kṛṣṇapānthikadarśanāt |
tato'bhimukhamabhyetya dvārakākṛṣṇapānthikam || 16 ||
[Analyze grammar]

natvā stutvā ca taṃ prāha tavā'dya darśanānmama |
vajralepo'ghasaṃbhāro dagdho mukto'smi sarvathā || 17 ||
[Analyze grammar]

tataḥ pāntho'vrajat svasya gṛhaṃ cāpyatha rākṣasaḥ |
samprāpto dvārakāṃ tatra jñātvā tīrthabalaṃ mahat || 18 ||
[Analyze grammar]

gomatyāṃ svatanuṃ tyaktvā prāptaśca vaiṣṇavaṃ padam |
na prarohanti pāpāni yasyā yātrāludarśanāt || 19 ||
[Analyze grammar]

dvārāvatyāstadā sākṣād yoge vācyaṃ nu kiṃ phalam |
vajralepā'tilepānāṃ pāpānāṃ dāhakaṃ mahat || 20 ||
[Analyze grammar]

sarvakṣetrapramūrdhanyaṃ kṣetraṃ golokajaṃ param |
dvārakākṣetramevāsti kṛṣṇena sthāpitaṃ bhuvi || 21 ||
[Analyze grammar]

śrutvā cāpi dilīpopi tīrthārthaṃ dvārakāṃ yayau |
kṛṣṇaṃ ca gomatīṃ dṛṣṭvā parāṃ siddhimupāyayau || 22 ||
[Analyze grammar]

dvārakāyāṃ sthitāścaturbhujāḥ narāśca yoṣitaḥ |
golokasthā bhavantyeva tānpaśyanti divaukasaḥ || 23 ||
[Analyze grammar]

api kīṭapataṃgādyā jaḍāśca sthāvarāstathā |
dvārakāvāsamāpannā divyā golokamūrtayaḥ || 24 ||
[Analyze grammar]

gatirdvāravatīsthānāṃ durlabhā cordhvaretasām |
dvārakāyāṃ hutaṃ japtaṃ dattaṃ snātaṃ tapaḥ kṛtam || 25 ||
[Analyze grammar]

sarvaṃ koṭiguṇaṃ lakṣmi hyanantaṃ kṛṣṇasannidhau |
dvārakāyāṃ sthitāḥ sarve narā nāryaścaturbhujāḥ || 26 ||
[Analyze grammar]

dvārakāyāṃ na vai pāpaṃ prarohati harerbalāt |
supuṇyāḥ pāṃsavo yasyāḥ pāpināṃ muktikārakāḥ || 27 ||
[Analyze grammar]

kuśāvartāt samārabhya yāvacca sāgarānvitā |
gomatī bhavati tatra siṃharāśigate gurau || 28 ||
[Analyze grammar]

snānaṃ tu dviṣaṣṭigodāvarīsnānādhikaṃ phalet |
dvārakāṃ gomatīṃ gopīsaraḥ śrīṃkṛṣṇameva ca || 29 ||
[Analyze grammar]

smaranti pratyahaṃ ye tu sahasrayojanasthitāḥ |
te'pi dvārāvatītīrthapūrṇaphalaprabhāginaḥ || 30 ||
[Analyze grammar]

mitradhugbhrātṛhā goghnaḥ paradārarataśca yaḥ |
mātṛhā pitṛhābhrūṇabrahmahā gurutalpagaḥ || 31 ||
[Analyze grammar]

sarvapāpaiḥ pramucyante dvārakākṛṣṇadarśanāt |
viśeṣeṇa tu vaiśākhyāṃ jayantyāṃ viṣṇuvāsare || 32 ||
[Analyze grammar]

māghe ca phālgune caiva caitre cāpi viśeṣataḥ |
paurṇamāsyāmamāyāṃ caikādaśyāṃ saṃgame tathā || 33 ||
[Analyze grammar]

dvādaśyāṃ ca pratipakṣaṃ rohiṇyāṃ śravaṇe tathā |
puṣye punarvasau caiva vyatīpāte dinakṣaye || 34 ||
[Analyze grammar]

sapuṣyatithinakṣatre grahaṇe candrasūryayoḥ |
śrīkṛṣṇadarśanaṃ dvārāvatyāmanantapuṇyadam || 35 ||
[Analyze grammar]

yasyāṃ satraṃ prapāṃ saudhaṃ prāsādaṃ maṭhameva vā |
yatisādhuvāsaśālāṃ sādhvīśālāṃ ca mandiram || 36 ||
[Analyze grammar]

vāpīṃ kūpaṃ taḍāgaṃ ca jīrṇoddhāraṃ ca jīvikām |
mūrterviṣṇoḥ pratiṣṭhāṃ ca rājabhogādikaṃ tathā || 37 ||
[Analyze grammar]

kārayitvā naro nārī bhuktvā bhogān divi sthitān |
vairājān vaikuṇṭhabhogān prāpnuyāt kṛṣṇasāmyatām || 38 ||
[Analyze grammar]

sthāpayed dvāravatyāṃ yo mūrtiṃ dāruśilāmayīm |
sārvabhaumatvamāptvaiva śrīviṣṇoḥ sāmyatāṃ vrajet || 39 ||
[Analyze grammar]

dvārikātīrthasaṃyātāḥ kulamekottaraṃ śatam |
tārayantyeva gotrāṇāṃ saptānāṃ kṛṣṇayogataḥ || 40 ||
[Analyze grammar]

ekaikasminpade datte purīṃ dvārāvatīṃ prati |
puṇyaṃ kratusahasrāṇāṃ kalau bhavati dehinām || 41 ||
[Analyze grammar]

pāṣāṇaścakracihno'pi dṛṣṭo yena sa muktibhāg |
sudarśanaścaikacakro lakṣmīnārāyaṇāvubhau || 42 ||
[Analyze grammar]

tribhiścaivā'cyutaścaindraścatuḥcakro janārdanaḥ |
pañcabhirvāsudevaḥ saḥ ṣaḍbhiḥ pradyumna eva saḥ || 43 ||
[Analyze grammar]

saptabhirbaladevaḥ sa cāṣṭabhiḥ puruṣottamaḥ |
sarvātmā navacakraśca daśacakro daśaprabhuḥ || 44 ||
[Analyze grammar]

ekādaśairmahāviṣṇudvādaśātmā tu mokṣadaḥ |
ataūrdhvamananto'sau bhuktimuktipradāyakaḥ || 45 ||
[Analyze grammar]

vṛṣotsarge prakurvanti vaiśākhyāṃ caiva kārtike |
dvārakāyāṃ piśācatvaṃ muktvā muktāḥ pitāmahāḥ || 46 ||
[Analyze grammar]

kulakoṭisahasrāṇi kulakoṭiśatāni ca |
vasanti tatpadaṃ viṣṇostrispṛśākṛṣṇadarśanāt || 47 ||
[Analyze grammar]

sukarmasthā vikarmasthā yānti śrīkṛṣṇamandire |
saptaṣaṣṭiṣu tīrtheṣu snānāt kiṃ vai mama priye || 48 ||
[Analyze grammar]

samprāpte mānuṣe dehe dvārakāṃ na gato yadi |
dvārakāsthā janā divyāḥ śocantyenaṃ vṛthājanim || 49 ||
[Analyze grammar]

iti te kathitaṃ lakṣmi mama kṣetrasya sarvathā |
māhātmyaṃ śravaṇād yasya muktiḥ karagatā matā || 50 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dvārakāmāhātmye kāśīsthamāyānandayatervajralepapāpanāśakadvārakāyātrālumahimakathanādināmā dvātriṃśadadhikadviśatatamo'dhyāyaḥ || 232 ||
[Analyze grammar]