Chapter 231

śrīnārāyaṇa uvāca |
śṛṇu lakṣmi siṃharāśigate bṛhaspatau muniḥ |
nārado gautamāśramaṃ yayau godāvarītaṭe || 1 ||
[Analyze grammar]

ekavarṣamuvāsātra dṛṣṭvā''yātāni sarvaśaḥ |
tīrthāni pāvanānyeva varṣakālaṃ sthitāni hi || 2 ||
[Analyze grammar]

vārāṇasī kurukṣetraṃ madhupurī hyavantikā |
māyā kāṃcī ca sāketā gayā kuṃkumavāpikā || 3 ||
[Analyze grammar]

tisro gayā hariharakṣetraṃ ca puruṣottamā |
prabhāsādīnyaraṇyānyāśramā gaṃgā sarasvatī || 4 ||
[Analyze grammar]

tāpī payoṣṇī sarayū bhīmarathī ca gaṇḍakī |
kṛṣṇā svarṇā ca kāverī sarāṃsi jharaṇā yamī || 5 ||
[Analyze grammar]

caturdaśasu lokeṣu bhavanti yāni tāni vai |
girayo bhūstarā dvipāḥ sthitā godāvarītaṭe || 6 ||
[Analyze grammar]

siṃhe bṛhaspatau tatra varṣamekaṃ praharṣitāḥ |
sindhavaḥ puṣkarādyāśca maryādāparvatāstathā || 7 ||
[Analyze grammar]

prayāgaṃ vedaśāstrāṇi siddharṣimunidevatāḥ |
pitarodyusurāścāpi bhūsurā yogisādhavaḥ || 8 ||
[Analyze grammar]

sādhvyo devyaśca devāśca varṣamūṣuḥ praharṣitāḥ |
gautamo nārado vīkṣya tānyavasan maharṣayaḥ || 9 ||
[Analyze grammar]

kṣālāyitvā svapāpāni tairthikairarpitāni vai |
gautamyāṃ ca tato gantumudyuktāni tu tāni vai || 10 ||
[Analyze grammar]

tīrthānyāsan tadā godāvarī nāradamabravīt |
etāni sarvatīrthāni matprasaṃgena nārada || 11 ||
[Analyze grammar]

niṣpāpāni prajātāni pāpāni pradaduśca me |
mayā tatpāpabhāraṃ kva kṣeptuṃ gantavyameva yat || 12 ||
[Analyze grammar]

adhunā'haṃ dahyamānā tattatpāpāgnibhiḥ prabho |
kva yāmi bho mune'tyarthaṃ duḥkhitā kiṃ karomyanu || 13 ||
[Analyze grammar]

śrutvā tannārado dhyātvā kṣaṇaṃ maunaṃ samāsthitaḥ |
tāvacca gautamo yogī tatrāyāto munīśvaraḥ || 14 ||
[Analyze grammar]

tīrthānyāhurmuniṃ tatra tvatprasādena gautamī |
bhūtale yatsamāyātā tathā vai pāvitā vayam || 15 ||
[Analyze grammar]

tathā tvasmatprapāpāni godāvaryā'rjitāni vai |
pāpamuktā jāyate sā tattu gautama cintyatām || 16 ||
[Analyze grammar]

gautamo'cintayat tādṛk tīrthaṃ pāpavināśakam |
tathāpi tasya prajñāyāṃ na bhātaṃ balavattadā || 17 ||
[Analyze grammar]

maunamāsthāya śrīkṛṣṇaṃ cintayāmāsa gautamaḥ |
tāvadākāśavāgdevī harṣayantī jagāda tām || 18 ||
[Analyze grammar]

śṛṇvantu tīrthamunyādyāḥ kṛpayā saṃvadāmyaham |
paścimasya samudrasya tīramāśritya vartate || 19 ||
[Analyze grammar]

dvārakākṣetravaryaṃ ca yatrāste gomatī śubhā |
paścimābhimukho yatra mahāviṣṇuḥ sadā sthitaḥ || 20 ||
[Analyze grammar]

tatsarvaṃ pāparāśīnāmugrāṇāmapi dāhakam |
tad gamyatāṃ ca gautamyāḥ pāpadāhāya devatāḥ || 21 ||
[Analyze grammar]

śrutvā sarvottamaṃ kṣetraṃ jagarjustīrthadevatāḥ |
jitaṃ bho jitamasmābhirdhanyā dhanyatamā vayam || 22 ||
[Analyze grammar]

ityuktvā niryayuḥ sarve dvārakāṃ kṛṣṇapālitām |
durlabho dvārikāvāso durlabhaṃ kṛṣṇadarśanam || 23 ||
[Analyze grammar]

durlabhaṃ gomatīsnānaṃ rukmiṇīdarśanaṃ tathā |
dvārakādarśanaṃ puṇyaṃ cāsmākaṃ saṃbhaviṣyati || 24 ||
[Analyze grammar]

nārado gautamo godāvarī tīrthāni devatāḥ |
sarve cābhyāyayurdvārāvatīsīmāntamādarāt || 25 ||
[Analyze grammar]

pṛṣṭhavanto nāradaṃ ca mudā tīrthavidhiṃ ca te |
prāha vai nāradastāṃśca vidhiṃ ca jānāti yādṛśam || 26 ||
[Analyze grammar]

kṛtasnānastu gomatyāṃ tataḥ sampūjya gomatīm |
kṛṣṇasya darśanaṃ kuryāt sādhūn viprān prabhojayet || 17 ||
[Analyze grammar]

kṛṣṇaprasādaṃ saṃbhujya śayīta bhuvi tīrthakṛt |
prabhāte ca punaḥ snātvā sampūjya parameśvaram || 28 ||
[Analyze grammar]

pradakṣiṇaṃ namaskṛtvā sadgurum praṇipatya ca |
gītaṃ ca kīrtanaṃ kuryāt bhajanaṃ śrīharestathā || 29 ||
[Analyze grammar]

brahmacaryaṃ prarakṣecca niyamyetendriyāṇi ca |
devānāṃ ca satāṃ pādasaṃvāhanamathā''caret || 30 ||
[Analyze grammar]

darśanaṃ pūjanaṃ kuryān dānaṃ dadyācca śaktitaḥ |
api svalpaṃ yathāśakti kṛtaṃ koṭiguṇaṃ bhavet || 31 ||
[Analyze grammar]

ekagrāsasya dānasya yāvadbhūdānajaṃ phalam |
ekasmin bhojite sādhau rājasūyā'yutaṃ phalam || 32 ||
[Analyze grammar]

upānadannapānīyapādukāchatrakambalān |
vāsāṃsi toyapātrāṇi dadyāt kṛṣṇāya tuṣṭaye || 33 ||
[Analyze grammar]

yasya hastau ca pādau ca mano jihvā janīndriyam |
saṃyatāni bhavettasya tīrthapuṇyamanantakam || 34 ||
[Analyze grammar]

parānnaṃ parapākaṃ ca paravastu vivarjayet |
śrotavyā satkathā viṣṇorjaptavyaṃ nāma vai hareḥ || 35 ||
[Analyze grammar]

utsavaśca prakartavyo gītavāditraniḥsvanaiḥ |
ārārtrikaṃ phalaṃ cāpi naivedyaṃ cārpayettathā || 36 ||
[Analyze grammar]

ṣoḍaśavastubhiḥ kṛṣṇapūjanaṃ kārayettathā |
na śakyate phalaṃ tasya vaktuṃ vai yugasaṃkhyayā || 37 ||
[Analyze grammar]

evaṃ te nāradenoktāstīrthadevamaharṣayaḥ |
cakrustīrthe yathoktaṃ tatsarvaṃ bhaktisamanvitam || 38 ||
[Analyze grammar]

śṛṇvanti tatkathāḥ kecid varṇayanti guṇāntare |
gāyanti ca yaśaḥ kecitsmaranti śrīhariṃ pare || 39 ||
[Analyze grammar]

kecijjapanti tannāma kecit kurvanti darśanam |
utsavaiśca vrajantyanye nṛtyanti cāpare tadā || 40 ||
[Analyze grammar]

kecid garjanti yugapajjayaśabdaṃ harermuhuḥ |
gṛhaṃ harermārjayanti raṭanti vaiṣṇavaṃ manum || 41 ||
[Analyze grammar]

premamagnāḥ prahasanti spṛśanti sādhupatkajam |
kurvanti guṇagānaṃ militā pathi sarvathā || 42 ||
[Analyze grammar]

maṇḍalībhūya tīrthāni kurvanti tairthikaṃ vidhim |
tān dṛṣṭvā brahmahāḥ śuddhaye satyaṃ satyaṃ vadāmi te || 43 ||
[Analyze grammar]

ete vai vaiṣṇavāḥ sarve naranārī svarūpiṇaḥ |
prayāgādīni tīrthāni kṣetrāṇi śailasāgarāḥ || 44 ||
[Analyze grammar]

nararūpadharāḥ sarve saṃghaṃ kṛtvā prayānti vai |
gaṃgādyāḥ sarito devyo nārī rūpairyayustadā || 45 ||
[Analyze grammar]

kuṃkumavāpikā svasyāstīrthānyādāya saṃyayau |
caturdaśastarasthānāṃ saṃgho divyo hyabhūttadā || 46 ||
[Analyze grammar]

vādanaṃ kīrtanaṃ saṃghe sarve kurvanti vai tadā |
dvārikāyā mahāyātrā kṛtā saṃghena vai tadā || 47 ||
[Analyze grammar]

gomatyāṃ ca kṛtaṃ snānaṃ kṛṣṇasya darśanaṃ kṛtam |
yātrāvidhiḥ kṛtaḥ sarvaḥ pāpaṃ sarvaṃ vināśitam || 48 ||
[Analyze grammar]

godāvarī saṃghayuktā cātiśuddhā'bhavattadā |
tatkālīnaṃ rajasteṣāṃ pathi vai gacchatāṃ ca yat |
spṛṣṭaṃ syādaśvamedhānāṃ puṇyadaṃ varṇayāmi kim || 49 ||
[Analyze grammar]

ekaikasminpade datte dvārakāpathi gacchatām |
puṇyaṃ kratusahasrāṇāṃ pratyekarajasā bhavet || 50 ||
[Analyze grammar]

nārada prāha sarvāṃstān divyāṃstairthikasaṃghagān |
rāśayaḥ puṇyapuñjānāṃ yuṣmākaṃ vai sahasraśaḥ || 51 ||
[Analyze grammar]

yaiḥ kṛtaṃ gomatītīrthaṃ darśanaṃ śrīharestathā |
yūyaṃ sarvāṇi tīrthāni kṣetrāṇyapi ca kṛtsnaśaḥ || 52 ||
[Analyze grammar]

dhanyānyatra bhavadbhiśca dṛṣṭā kṛṣṇapurī yataḥ |
imāṃ paśyati tīrthāni yūyaṃ sarvāḥ saridvarāḥ || 53 ||
[Analyze grammar]

dvārakā naśca pāpānāṃ hantrī tīrthottamottamā |
brahmāṇḍasya kīrtikarī dvārakā kṛṣṇavallabhā || 54 ||
[Analyze grammar]

gomatī kṛṣṇadevaśca rukmiṇī ca haripriyā |
golokasadṛśī ceyaṃ rājate sarvato'dhikā || 55 ||
[Analyze grammar]

bhū vaikuṇṭhamiti bodhyā vaikuṇṭhapratimā nviyam |
nāradena praśaṃsāyāṃ varṇitāyāṃ tadā svayam || 56 ||
[Analyze grammar]

dvārakā gomatī mūrtimatī svāgatakāṃkṣayā |
samāgatā tadā devaistīrthaiścāpi namaskṛtā || 57 ||
[Analyze grammar]

nāradaśca tadā prāha dvārakāṃ gomatīṃ tathā |
namaskurvanti te pādau gautamī ca prayāgarāṭ || 98 ||
[Analyze grammar]

gaṃgā ca narmadā sūryaputrī prācī sarasvatī |
candrabhāgā ca sarayūḥ kṣiprā kuṃkumavāpikā || 59 ||
[Analyze grammar]

sindhuḥ śoṇā gaṇḍakī ca vipāśā tapatī tathā |
kṛṣṇā bhīmarathī svarṇā payoṣṇī tvāṃ namanti vai || 60 ||
[Analyze grammar]

iyaṃ vārāṇasī te vai pādayornamati dhruvam |
kurukṣetraṃ mathurā cāvantikā tvāṃ namanti vai || 61 ||
[Analyze grammar]

māyā'yodhyā gayā kāṃcī viśālā tvāṃ namanti ca |
śālagrāmaṃ mahākṣetraṃ prabhāsaṃ puruṣottamam || 62 ||
[Analyze grammar]

saptābdhayo dhenukaṃ ca daśāraṇyaṃ ca daṇḍakam |
arbudaṃ ca kurukṣetraṃ dharmāraṇyaṃ ca kālakam || 63 ||
[Analyze grammar]

nārāyaṇasaraścāpi puṣkaraṃ gokulaṃ tathā |
mānasaṃ merukailāsau mandaro himavāṃstathā || 64 ||
[Analyze grammar]

vindhyo namanti te pādau dvārike kṛṣṇasevite |
vadato nāradasyaivaṃ dvārakā hṛṣṭamānasā || 65 ||
[Analyze grammar]

uvāca lalitāṃ vācaṃ karaiḥ saṃsmṛtya gomatīm |
yūyaṃ dhanyāḥ samāyātā mam lābho mahānayam || 66 ||
[Analyze grammar]

sarveṣāṃ svāgataṃ kurve bhuñjantāṃ kṛṣṇabhojanam |
pibata kṛṣṇacaraṇā'mṛtaṃ tiṣṭhata cātra vai || 67 ||
[Analyze grammar]

kṛṣṇayogānmama sparśāt pāpāni bhavatāṃ khalu |
prajvalitāni sarvāṇi kṛpayā śrīharerhi vaḥ || 68 ||
[Analyze grammar]

iti svāgatasaṃlāpaiḥ sarvānānandayattadā |
adṛśyanta ca vai vyomni brahmādyā devatāgaṇāḥ || 69 ||
[Analyze grammar]

śivā śivau gaṇairyuktau yakṣagandharvakiraṇaiḥ |
maruto lokapālāśca siddhā vidyādharāstathā || 70 ||
[Analyze grammar]

viśvādityāḥ grahāḥ sarve bhṛgvādyāḥ ṛṣayastathā |
maharṣayaḥ sanakādyā vairājāścāpyadhīśvarāḥ || 71 ||
[Analyze grammar]

patnīvratāśca nṛtyanti cā'vateruḥ praharṣitāḥ |
kṣmāyāṃ snātvā ca gomatyāṃ te cakruḥ kṛṣṇadarśanam || 72 ||
[Analyze grammar]

prasādaṃ ca jalaṃ pītvā dṛṣṭvā saṃghaṃ ca tairthikam |
paramāścaryamāpannāstīrthāni jayateti ca || 73 ||
[Analyze grammar]

cakrurvai ghoṣaṇāṃ vāraṃvāraṃ hṛṣṭā hṛdantare |
dvārikayā ca teṣāṃ vai svāgataṃ mānanaṃ kṛtam || 74 ||
[Analyze grammar]

gomatyāpi ca sarveṣāṃ pāpaprakṣālanaṃ kṛtam |
praṇemuryugapatsarve devāstīrthāni bhāvataḥ || 75 ||
[Analyze grammar]

devasaṃghastīrthasaṃghaḥ parasparaṃ praṇematuḥ |
praṇemuryugapat sarve prahṛṣṭāścā'bhavaṃstataḥ || 76 ||
[Analyze grammar]

jñātvā śraiṣṭhyaṃ dvārakāyā gomatyāḥ śraiṣṭhyamityapi |
kṛṣṇakṛṣṇetikṛṣṇeti jaya kṛṣṇeti vādina || 77 ||
[Analyze grammar]

gomatyā dvārakāyāśca śriyaḥ kṛṣṇasya te tadā |
pūjanaṃ divyavastraiśca divyagandhānulepanaiḥ || 78 ||
[Analyze grammar]

sudivyābharaṇairbhaktyā sadratnahīrakādibhiḥ |
divyamālyavibhūṣābhiḥ karpūrā'gurucandanaiḥ || 79 ||
[Analyze grammar]

tulasyā kesarairdhūpairnīrājanapradakṣiṇaiḥ |
naivedyairvividhairdivyairmiṣṭairmiṣṭānnapānakaiḥ || 80 ||
[Analyze grammar]

tāmbūlaiḥ svāducūrṇaiśca priyaiścopāyanaistathā |
mahāmāṃgalyasaddravyaiścāmaravyajanādibhiḥ || 81 ||
[Analyze grammar]

sampūjya kṛtakṛtyāste nanṛtuḥ purato hareḥ |
tadā kṛṣṇaḥ svayamāvirbhūtastānprāha saṃhasan || 82 ||
[Analyze grammar]

bho tīrthāni tathā devā devyaḥ śailā maharṣayaḥ |
prīto'haṃ bhavatāṃ tīrthavidhānena ca vo'stu śam || 83 ||
[Analyze grammar]

tīrthādyāśca tadā prāhustāritāḥ paramātmanā |
prāptaḥ kāmavaro'smābhirbhavataḥ kṛpayā bibho || 84 ||
[Analyze grammar]

bhūyāt tava padāmbhoje bhaktirno hyanapāyinī |
tathā syācca hi sarveṣāṃ vandyeyaṃ dvārakā sadā || 85 ||
[Analyze grammar]

ityuktvā ca tadā saṃghau dvāvapi dvārakāṃ tathā |
gomatīṃ sarvatīrthānāmādhipatye'bhyaṣiñcatām || 86 ||
[Analyze grammar]

divyopacārakaiḥ pūjāṃ cakrāte prāñjalī muhuḥ |
tadā''yātā mahādivyāḥ puruṣāḥ pārṣadā hareḥ || 87 ||
[Analyze grammar]

ūcuśca tīrtharājānāṃ mahārājñī tviyaṃ śubhā |
dvārakā sevanīyā vai sthīyantāṃ svecchayā sadā || 88 ||
[Analyze grammar]

tadā pradakṣiṇaṃ kṛtvā dvārakāṃ praṇipatya ca |
āvāsāñcakrire tatra kṣetratīrthasurādayaḥ || 89 ||
[Analyze grammar]

pañcāśatkoṭitīrthāni sthitānyuttarataḥ priye |
nadyastu pūrvadigbhāge tīrthaiḥ ṣaṣṭiprakoṭibhiḥ || 90 ||
[Analyze grammar]

dakṣiṇasyāṃ tīrthaśailā'raṇyādīni sarāṃsi ca |
sthitāni svakuṭumbaiśca navanavatikoṭibhiḥ || 91 ||
[Analyze grammar]

sāgarādyāśca saptādyāḥ paścimāyāṃ diśi sthitāḥ |
vidiśāsu ca sarvāsu tīrthasaṃkhyā na vidyate || 92 ||
[Analyze grammar]

śatakoṭipratīrthāni vasantyudadhisaṃgame |
vārāṇasī ca hīśāne hyavantī pūrvadiksthitā || 93 ||
[Analyze grammar]

āgneyyāṃ kuṃkumavāpī kāṃcī dakṣe tu māthurī |
nairṛtyāṃ ca sthitā māyā hyayodhyā paścime sthitā || 94 ||
[Analyze grammar]

vāyavyāṃ kurukṣetraṃ ca harikṣetraṃ tathottare |
tīrthakṣetrādibhiḥ prathamā''varaṇaṃ prapālitam || 95 ||
[Analyze grammar]

prajeśvarairdvitīyaṃ tu tṛtīyaṃ devanāyakaiḥ |
caturthamṛṣisiddhaughairgaṃgādyābhiśca paṃcamam || 96 ||
[Analyze grammar]

ṣaṣṭhaṃ cāvaraṇaṃ tīrthaiḥ kāśyādyābhiśca saptamam |
aṣṭamaṃ kṣetramukhyādyairnavamaṃ cā''śramādibhiḥ || 97 ||
[Analyze grammar]

mervādyairdaśamaṃ divyadṛśaḥ paśyanti tāni vai |
iti vai pārṣadā devā stīrthāni cānyapāvanā || 98 ||
[Analyze grammar]

nivāsaṃ cakrire sveṣāṃ dvitīyairvai svarūpakaiḥ |
vidāyaṃ te samagṛhya śrīkṛṣṇād gomatīvarāt || 99 ||
[Analyze grammar]

tīrthaṃ kṛtvā yayuḥ sarve tīrthadevādipārṣadāḥ |
āyānti prativarṣaṃ ca siṃharāśisthite gurau || 100 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dvārakāmāhātmye siṃharāśisthabṛhaspatau godāvarīsahitasarvatīrthasarvadevasarvapārṣadādīnāṃ dvārikātīrthe saṃghaśaḥ samāgamanaṃ tatra vāsaścetyādinirūpaṇanāmaikatriṃśadadhikadviśatatamo'dhyāyaḥ || 231 ||
[Analyze grammar]