Chapter 223

| śrīnārāyaṇa uvāca |
tato gacchenmahālakṣmi tīrthaṃ viṣṇupadodbhavam |
yatra gaṃgā samutpannā viṣṇupādāśrayā ca yā || 1 ||
[Analyze grammar]

ekadā khalu durvāsā yātrārthaṃ samupāgataḥ |
tacchrutvā sahasotthāya bhagavān ramayā yutaḥ || 2 ||
[Analyze grammar]

yayau cātithyavidhyarthaṃ durvāsasaṃ prati prabhuḥ |
gṛhiṇī na gṛhe yasya satpātragamanaṃ ca na || 3 ||
[Analyze grammar]

tasya devā na gṛhṇanti pitaraścodakaṃ tathā |
iti kṛtvā yayatustau śrīśca kṛṣṇaśca harṣitau || 4 ||
[Analyze grammar]

rathamāruhya śrīkṛṣṇo rukmiṇyā sahito yayau |
samudrasya taṭe śrāntaṃ snātaṃ jvalanamojasā || 5 ||
[Analyze grammar]

praṇamya bhagavān bhaktyā papracchā'nāmayaṃ tathā |
muniruvāca kuśalaṃ kva vāsaḥ kṛṣṇa te'dhunā || 6 ||
[Analyze grammar]

kati dārā dhanānyeva kaccitte kuśalaṃ sadā |
kṛṣṇa prāha bhavadāśīrvādairvai kuśalaṃ mama || 7 ||
[Analyze grammar]

darśanācca viśeṣeṇa pāvitaṃ me kulaṃ tvayā |
samudreṇa pradattā me bhūmistu daśayojanā || 8 ||
[Analyze grammar]

daśayojane bhūbhāge purī hemamayī mayā |
kāritā tatra prāsādā navalakṣāṇi kāritāḥ || 9 ||
[Analyze grammar]

tasyāṃ vasāmi saṃhṛṣṭo nirbhayaste prasādataḥ |
durvāsāḥ prāha śrutvā tat saṃkhyāṃ vadasva me tava || 10 ||
[Analyze grammar]

yāvatyaśca mahiṣyo vai putrāḥ parijanāstathā |
śrīkṛṣṇaḥ prāha bhagavan kṛpayā te mama gṛhe || 11 ||
[Analyze grammar]

santi ṣoḍaśasāhasraṃ bhāryāścāṣṭādhikaṃ śatam |
ekaikasyāṃ daśa putrāḥ kanyā caikā prajā mama || 12 ||
[Analyze grammar]

ṣaṭ paṃcāśat jñātayo me santi parijanāstathā |
iyaṃ mukhyā mama patnī rukmiṇī yā ramā smṛtā || 13 ||
[Analyze grammar]

bhavān muniprapūjyo'sti samāgacchatu me gṛham |
śirasā''dhāya pādāstu tato yāmi pavitratām || 14 ||
[Analyze grammar]

durvāsāḥ prāha bho kṛṣṇa sadā'kṣamo bhavāmyaham |
kṣaṇe ruṣṭo bhavāmyeva kiṃ māṃ nayasi keśava || 15 ||
[Analyze grammar]

naya māṃ yadi madvākyaṃ karoṣi sahabhāryayā |
yadi māṃ netukāmo'si sabhāryastvaṃ rathaṃ vaha || 16 ||
[Analyze grammar]

śrutvā kṛṣṇaḥ prasanno'bhūt rukmiṇyā sahitastadā |
rathadhuryo'bhavacchīghraṃ pāvitohamiti bruvan || 17 ||
[Analyze grammar]

tadā ca ṛṣivaryaḥ saṃyujya kṛṣṇaṃ ca rukmiṇīm |
rathe sthitvā''gṛhya rajjuṃ yāhi yāhītyabhāṣata || 18 ||
[Analyze grammar]

devaiśca kusumaiḥ kṛṣṇa pūjyamāno jagāma ha |
vāhyamāne rathe tābhyāṃ rukmiṇī tṛṣitābhavat || 19 ||
[Analyze grammar]

prāha kāntaṃ jalaṃ dehi tṛṣā māṃ bādhate'dhunā |
tacchrutvā pṛthivī kṛṣṇastatāḍa pādalattayā || 20 ||
[Analyze grammar]

bhūmirbhinnā tato gaṃgā nirgatā śītalā tadā |
sugandhasalilā śvetā jalarūpā babhau śubhā || 21 ||
[Analyze grammar]

apṛṣṭvā ca muniṃ payau rukmiṇī jāhnavī jalam |
dṛṣṭvā ṛṣiścukopā''śu śaśāpa parameśvarīm || 22 ||
[Analyze grammar]

māmapṛṣṭvā pītavatī jalaṃ tasmācca tatphalam |
kṛṣṇaviyogarūpaṃ tvaṃ prāpnuhīti bruvan rathāt || 23 ||
[Analyze grammar]

samuttīryā'tiraktākṣo bhūmāvevā'dhyatiṣṭhata |
śrīkṛṣṇastaṃ vinayena tuṣṭāva ramayāyutaḥ || 24 ||
[Analyze grammar]

ṛṣivarya yathārthaṃ te vākyaṃ bhavatu sarvathā |
rukmiṇī madviyuktā'stu vane'tra jalarūpiṇī || 25 ||
[Analyze grammar]

gaṃgayā saha nityaṃ vai gaṃgārūpeṇa tiṣṭhatu |
yatra jalaṃ vinirbhidya bhūmiṃ prakaṭatāṃ gatam || 26 ||
[Analyze grammar]

tajjalaṃ rukmiṇī rūpaṃ tīrthaṃ samastu śāśvatam |
atraiva rukmiṇīvāso mandire'stu sadā vane || 27 ||
[Analyze grammar]

mokṣaścāpi tairthikānāṃ cāstu ramāprasādanāt |
durvāsāśca tadā prāha kṛṣṇa prātarniśāmukhe || 28 ||
[Analyze grammar]

rukmiṇyāstava yogo'stu nityaṃ karomyanugraham |
ityuktvā prayayau tasmātsthalānmunistadā'trijaḥ || 29 ||
[Analyze grammar]

rukmiṇī saṃsthitā tatrodyānaprāsādapuṃgave |
jalarūpā dvitīyena rūpeṇāpi pratiṣṭhitā || 30 ||
[Analyze grammar]

tīrthaṃ tajjalarūpaṃ vai viṣṇupādodakaṃ smṛtam |
mukhyarūpeṇa mahiṣī sadā kṛṣṇasya sevane || 31 ||
[Analyze grammar]

sadā tiṣṭhatu prāsāde ityapyanugrahaṃ vyadhāt |
durvāsā varadānaṃ tadgatvā pūjāmavāpya ca || 32 ||
[Analyze grammar]

yayau kailāsamevā'smātsthānāt kṛṣṇo gṛhaṃ yayau |
rukmiṇī ca trirūpā'bhūt kṛṣṇāpādodake jalam || 33 ||
[Analyze grammar]

tatrodyānasthasaudhe sā mūrtirūpā dvitīyakā |
tṛtīyā ca mahārājñī śrīkṛṣṇe nityayoginī || 34 ||
[Analyze grammar]

ityevaṃ rukmiṇītīrthaṃ kṛṣṇapādodakaṃ hi tat |
gaṃgārūpaṃ samajani snāturmokṣapradaṃ śubham || 35 ||
[Analyze grammar]

śrāddhakartuśca pitṝṇāmakṣayyapuṇyadaṃ tathā |
akṣayyatṛptidaṃ cāpi tathā golokadhāmadam || 36 ||
[Analyze grammar]

dānaṃ homaṃ japaṃ dhyānaṃ pūjāṃ cārghaṃ karoti yaḥ |
tatsarvamakṣayapuṇyapradaṃ bhavati tatsthale || 37 ||
[Analyze grammar]

yatra sākṣācchriyā yuktaḥ kṛṣṇo vasati sarvadā |
tatra kiṃ vai bhavennyūnaṃ golokāttīrthavāsinām || 38 ||
[Analyze grammar]

tīrthakṛto'pi na nyūnaṃ golokātprāpyate phalam |
bhojanaṃ vividhaṃ dadyād dakṣiṇāṃ svarṇarājatīm || 39 ||
[Analyze grammar]

dīnāndhakṛpaṇebhyaśca dānaṃ deyaṃ vidhānataḥ |
upānahau pradātavye jalakuṃbhaḥ savastrakaḥ || 40 ||
[Analyze grammar]

dadhyodanaṃ pradātavyaṃ dhānyāni vividhāni ca |
raktavastraṃ tathā śāṭī kaṃcukī ghargharī tathā || 41 ||
[Analyze grammar]

rukmiṇyai saṃpradātavyā bhūṣāḥ śṛṃgārakāṇi ca |
pūjayed viprayugalaṃ viṣṇurme prīyatāmiti || 42 ||
[Analyze grammar]

evaṃ tīrthe kṛte tatra pitarastrikulodbhavāḥ |
tṛptā yānti harerlokaṃ prasannaḥ śrīyuto hariḥ || 43 ||
[Analyze grammar]

iha kāmān sadā bhuktvā bhuktvā svargādivaibhavān |
ante yānti harerdhāma rukmiṇītīrthapāvanāḥ || 44 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne durvāsorathavahanakarmaṇi vyāpṛtāyāḥ rukmiṇyāstṛṣānivṛttyarthaṃ śrīkṛṣṇacaraṇaghātaniḥsṛta gaṃgājalākhyarukmiṇītīrtha rukmiṇītrisvarūpatā ceti nirūpaṇanāmā trayoviṃśatyadhikadviśatatamo'dhyāyaḥ || 223 ||
[Analyze grammar]