Chapter 211

śrīlakṣmīruvāca |
agnayo vai brahmamukhā brahmāṃśā yajñadevatāḥ |
kadā kasmātsamutpannāstatkathāṃ śrāvaya prabho || 1 ||
[Analyze grammar]

śrīnārāyaṇa uvāca |
uṣṇasparśavataścāgneḥ kāryātmakasya kāraṇam |
devaḥ sa cetano vahnirbrahmaṇo mānasaḥ sutaḥ || 2 ||
[Analyze grammar]

agnyabhimānidevaḥ saḥ tasmāt svāhā vyajāyata |
pāvakaḥ pavamānaśca śuciśceti trayaḥ sutāḥ || 3 ||
[Analyze grammar]

sauraḥ śucirbhavatyeva pāvakā vaidyutā matāḥ |
śrāddhe vahniḥ pavamānastatsutaḥ kavyavāhanaḥ || 4 ||
[Analyze grammar]

pāvakasya suputro'bhūt saharakṣābhidhastathā |
śuceḥ putro havyavāho devānāṃ bhojanapradaḥ || 5 ||
[Analyze grammar]

pitṝṇāṃ kavyavāhaścā'surāṇāṃ saharakṣakaḥ |
eteṣāṃ putrapautrāśca catvāriṃśattathā nava || 6 ||
[Analyze grammar]

vaidyutasya brahmaudanastatsuto bharatāhvayaḥ |
tasya vaiśvānaravahnistasya kāvyo hyapāṃ rasaḥ || 7 ||
[Analyze grammar]

puṣkarodadhimathanādatharvā'gnirajāyata |
tasya sutaśca dadhyaṃgo bodhyo vai vahnimaṇḍale || 8 ||
[Analyze grammar]

atharvā ca bhṛguḥ prokto'ṅgirāścā'tharvaṇaḥ sutaḥ |
ataśca bhārgavoṃ'girā laukikāgniḥ prakathyate || 9 ||
[Analyze grammar]

pavamānastu nirmathyo gārhapatyo'pi nāmataḥ |
tasya putradvayaṃ śaṃsyaḥ śukraśceti pranāmataḥ || 10 ||
[Analyze grammar]

śaṃsyastvāhavanīyo'gniryo havyavāṭ kriyātmakaḥ |
tathā sabhyā'vasathyau dvau śaṃsyasyā'gneḥ sutau matau || 11 ||
[Analyze grammar]

śaṃsyastu ṣoḍaśanadīścakame pramadāvarāḥ |
kāverīṃ kṛṣṇaveṇīṃ ca narmadāṃ yamunāṃ tathā || 12 ||
[Analyze grammar]

godāvarīṃ vitastāṃ ca candrabhāgāmirāvatīm |
vipāśāṃ kauśikīṃ caiva śatadruṃ sarayūṃ tathā || 13 ||
[Analyze grammar]

sītāṃ sarasvatīṃ caiva hrādinīṃ pāvanīṃ ca tāḥ |
tāsūtpannā hyagnayo ye dhiṣṇayaste prakīrtitāḥ || 14 ||
[Analyze grammar]

ṛtuḥ pravāhaṇognīdhraḥ samrāḍagniḥ kṛśānukaḥ |
samrāḍagnayastvaṣṭau ca parṣannāmnā nabhastathā || 15 ||
[Analyze grammar]

vasuśca havyasūryaśca viśvasyāyaśca paṃcamaḥ |
ṛtudhāmā'jaikapāccā'hirbudhnaśceti te smṛtāḥ || 16 ||
[Analyze grammar]

śaṃsyasutā hyupastheyā viharaṇīyāstatsutāḥ |
aṣṭau viharaṇīyāḥ syuḥ śāntiḥ pracetāḥ satyakaḥ || 17 ||
[Analyze grammar]

viśvadevaścā'vakṣuśca hyacchāvāka uśīrakaḥ |
vyaratniśceti te bodhyāḥ yajñe savanasaṃkramāt || 18 ||
[Analyze grammar]

apāṃ garbhe pāvako'vabhṛthastasya ca hṛcchrayaḥ |
jāṭharasya suto manyustasya ghorasaṃvartakaḥ || 19 ||
[Analyze grammar]

samudre sa vaḍavākhyastatsutaḥ saharakṣaka |
tasya kṣāmastasya kravyādo'gniḥ pāvakavaṃśajāḥ || 20 ||
[Analyze grammar]

śuceścāraṇeyavahnirāyurnāmā sa ucyate |
tasya mahimān putraśca tasya śāvānsuto mataḥ || 21 ||
[Analyze grammar]

tasyāpi savanaḥ putrastasyāpyadbhuta ucyate |
adbhutasya viviciśca tasyā'rkaḥ suta ucyate || 22 ||
[Analyze grammar]

arkasyā'nīkavān vāsṛjavāśca rakṣohā tathā |
pitṛkṛt tathā surabhiḥ rukmavāṃśceti vahnayaḥ || 23 ||
[Analyze grammar]

manvantareṣu sarveṣu bhavanti jātavedasaḥ |
prajānāṃ patayaḥ sarve jyotiṣmantaśca te smṛtāḥ || 24 ||
[Analyze grammar]

iti te kathitā lakṣmi vahnayo mukhyanāmataḥ |
homādyaiḥ phaladāḥ sarve mantrasiddhikarāḥ sadā || 25 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne vahnivaṃśavarṇanaṃ nāmaikādaśādhikadviśatatamo'dhyāyaḥ || 211 ||
[Analyze grammar]