Chapter 209

śrīnārāyaṇa uvāca |
śṛṇu lakṣmi yayau paścānnārado merusaṃjñakam |
sthalaṃ tīrthaṃ śubhaṃ brahmakuṇḍāddakṣiṇataḥ sthitam || 1 ||
[Analyze grammar]

narā''vāsagirirmeruḥ sthāpito hariṇā'tra saḥ |
yadā bhagavatā vāso viśālāyāṃ kṛtaḥ śubhaḥ || 2 ||
[Analyze grammar]

tadā meruṃ vihāyaiva savidyādharacāraṇāḥ |
devā maharṣayaḥ siddhā harerdarśanalālasāḥ || 3 ||
[Analyze grammar]

viśālāyāṃ sadā sthātuṃ samāyātāḥ samutsukāḥ |
bhagavaddarśanalabdhitiraskṛtatadālayāḥ || 4 ||
[Analyze grammar]

merurdevādihīno 3 jātaḥ śokaṃ cakāra ha |
bhūtvā dīno yayau nārāyaṇaṃ prārthanahetave || 5 ||
[Analyze grammar]

prāha he bhagavan sarve tava darśanalālasāḥ |
māṃ vihāyā'tra saṃyātā vinā'haṃ vasatiṃ śubhām || 6 ||
[Analyze grammar]

śobhe nāto mayā tatra naiva vastavyameva ha |
ahamapyatra vasitumicchāmi caraṇe tava || 7 ||
[Analyze grammar]

bhagavāṃśca tadā prāha naivaṃ kṣemāya vai bhavet |
tava sthityā caturdaśabhuvanānāṃ sthitirmatā || 8 ||
[Analyze grammar]

tasmāddevādibhistatra sthātavyaṃ vai madājñayā |
dvitīyasvasvarūpaiśca sthātavyamatra caiva yat || 9 ||
[Analyze grammar]

tvayā'pyatra dvitīyena svarūpeṇa mamāśrame |
sadā sthātavyamevā'tra matsevā lābhasaṃbhavāt || 10 ||
[Analyze grammar]

ityājñāṃ samanuprāpya meruśṛṃgāṇi sarvaśaḥ |
rūpaṃ dvitīyamāsādya samāyātāni sūkṣmataḥ || 11 ||
[Analyze grammar]

tāni kāṃcanarūpāṇi hariṇā svakareṇa hi |
gṛhītāni sthāpitāni sarvavāsāya tatra vai || 12 ||
[Analyze grammar]

sarve cālokya śṛṃgāṇi svarṇarūpāṇi harṣitāḥ |
prasannāstuṣṭuvurdevaṃ nārāyaṇaṃ kṛpākaram || 13 ||
[Analyze grammar]

dayālurbhagavān devo divānāṃ sukhahetave |
meroḥ śṛṃgāṇyānināya tasmai namo vidhema ca || 14 ||
[Analyze grammar]

bhaktakṛpālpabhaktestu bahudhā phalado'sti yaḥ |
so'yaṃ kṛpālayo devastuṣyatāṃ śrīnarāyaṇaḥ || 15 ||
[Analyze grammar]

sakaruṇaḥ sadā śikṣāṃ piteva vidhāti naḥ |
karuṇāsāgaraḥ kṛṣṇaḥ prapāyād vipado'pi naḥ || 16 ||
[Analyze grammar]

vidyādharāṇāṃ siddhānāmṛṣīṇāṃ mānaseṣṭadaḥ |
sadā rakṣatu naścātra bhagavān bhaktarakṣakaḥ || 17 ||
[Analyze grammar]

tatastuṣṭo hi bhagavān varaṃ vṛṇudhvamāha tān |
devāḥ prāhurmeruśṛṃgāṇi paśyanti ca ye janāḥ || 18 ||
[Analyze grammar]

teṣāṃ tava prasādena merau vāsau hi jāyatām |
tvayā naitatsthalaṃ tyājyaṃ merustyājyo na vai tathā || 19 ||
[Analyze grammar]

merau vāsaṃ ca labdhānāṃ bhogā'nte'stu layastvayi |
evamastviti saṃbhāṣya tatraivā'ntarhito hariḥ || 20 ||
[Analyze grammar]

tataḥ prabhṛti devādyā naranārāyaṇāśrame |
kvacinmerau kvacitsvarge kvacidvai raivatācale || 21 ||
[Analyze grammar]

nirviśaṃkā nivasanti yatra nārāyaṇo naraḥ |
evaṃ vai nārado merutīrthaṃ kṛtvā yayau tataḥ || 22 ||
[Analyze grammar]

lokapālairadhiśritaṃ tīrthaṃ saumyaṃ saroyutam |
hariḥ svayaṃ gato merau dṛṣṭāstatra ca devatāḥ || 23 ||
[Analyze grammar]

ṛṣayaścātha munayo lokapālāḥ surādayaḥ |
dṛṣṭvā''ha lokapālānsaḥ yūyaṃ rājāna eva vai || 24 ||
[Analyze grammar]

ṛṣyādivasatau vāso na yogyau bhavatāṃ kṛte |
āgacchantu mayā klṛpte sthāne yogye bhavatkṛte || 25 ||
[Analyze grammar]

nivasantu ca tatraiva mama sānnidhyamāśritāḥ |
ityānītā lokapālā merumadhyapradeśataḥ || 26 ||
[Analyze grammar]

sthāpitāstatsukhārthaṃ ca jalāśayo mahān kṛtaḥ |
daṇḍena ca bhuvaṃ hatvā krīḍāpuṣkariṇī kṛtā || 27 ||
[Analyze grammar]

lokapālāśca gandharvā gīrvāṇāḥ pramadāyutāḥ |
vicarantyanumodante pragāyanti ca sarvadā || 28 ||
[Analyze grammar]

vanāni kusumāmodaramyāṇi ca kṛtāni vai |
bhagavānapi sarveṣāmatyānandaṃ samāvahan || 29 ||
[Analyze grammar]

dvādaśyāṃ paurṇamāsyāṃ ca svayamāyāti majjane |
dṛśyate paramaṃ tejo jale madhyāhnakālataḥ || 30 ||
[Analyze grammar]

sarvatīrthāvagāhasya phalaṃ tatraiva labhyate |
daṇḍapuṣkariṇītīrthamihā'mutra phalapradam || 31 ||
[Analyze grammar]

piṇḍadānācca jāyeta gayāto'ṣṭaguṇaṃ phalam |
dvādaśyāṃ śuklapakṣasya jyeṣṭhamāse'tra puṣkare || 32 ||
[Analyze grammar]

yajñaṃ dānaṃ tapaḥ kṛtvā kṛtakṛtyo bhavejjanaḥ |
akṣayyaṃ phalamaśnāti mokṣaṃ yāti tataḥ param || 33 ||
[Analyze grammar]

badarītīrthamadhye tu guptametaddhi vartate |
bahuprasūtapuṇyā vai paśyantyetanna cetare || 34 ||
[Analyze grammar]

iti daṇḍodakaṃ tīrthaṃ kṛtvā ca nārado yayau |
gaṃgāyāṃ mānasodbhedasaṃgame tīrthasūttame || 35 ||
[Analyze grammar]

triṃśadvarṣasahasrāṇi prayāge tapasaḥ phalam |
tatphalaṃ mānasodbhede tīrthe snānakṛtaṃ bhavet || 36 ||
[Analyze grammar]

saṃgamāddakṣiṇe bhāge dharmasya bhavanaṃ śubham |
yatra mūrtyāṃ janma cāptau naranārāyaṇāvṛṣī || 37 ||
[Analyze grammar]

yatra dharmaścatuṣpādaḥ satyaṃ yajñastapastathā |
dānaṃ ceti vartate smā'nuṣṭhitasyā'kṣayaṃ phalam || 38 ||
[Analyze grammar]

tato dakṣiṇadigbhāge urvaśīsaṃgamābhidham |
kūrmoddhārastatastīrthaṃ snānātsattvasya śuddhikṛt || 39 ||
[Analyze grammar]

brahmāvartastatastīrthaṃ brahmalokapradaṃ hi tat |
evaṃ bahūni tīrthāni bhavanti badarīvane || 40 ||
[Analyze grammar]

darśanātsmaraṇātsnānātpānādācamanāttathā |
mārjanātpāpahantṝṇi mokṣadāni ca yogataḥ || 41 ||
[Analyze grammar]

kṛtvā sarvāṇi tīrthāni nāradaḥ punarāyayau |
narasyā''śramamādivyaṃ sthitvā naramukhāttataḥ || 42 ||
[Analyze grammar]

śuśrāva kṣetramāhātmyaṃ śāntyaikāgradhiyā''rttihṛt |
badaryākhyaṃ hareḥ kṣetraṃ triṣu lokeṣu durlabham || 43 ||
[Analyze grammar]

smaraṇāścāsya pāpāni naśyanti dāruṇānyapi |
anyatīrthe kṛtaṃ puṇyaṃ badaryāḥ smaraṇādbhavet || 44 ||
[Analyze grammar]

aśvamedhasahasrāṇāṃ vāyubhojyasya yatphalam |
kṣetrāntare badaryāṃ tu tatphalaṃ kṣaṇamātrataḥ || 45 ||
[Analyze grammar]

kṛte muktipradā nāmnā tretāyāṃ yogasiddhidā |
viśālā dvāpare nāmnā kalau badryāśramo hi saḥ || 46 ||
[Analyze grammar]

mukteḥ pradā ca yogasya siddhidā sarvathā yathā |
śālātmakasya dehasya viśālā tu vināśanāt || 47 ||
[Analyze grammar]

badarītaruyogāddhi badarikāśramo hi saḥ |
tyajetsarvāṇi tīrthāni kāle yugāntare'pi ca || 48 ||
[Analyze grammar]

badarīṃ tu harirnārāyaṇo muñcati naiva hi |
ṣaṣṭivarṣasahasrāṇi yogātkāśyāṃ tu yatphalam || 49 ||
[Analyze grammar]

badaryā tu dinaikena tatphalaṃ samavāpyate |
devatīrtharṣīṇāṃ śālā viśiṣṭāḥ santi yatra hi || 50 ||
[Analyze grammar]

viśālā ca matā sārthā śālā jñānasya vestathā |
viśālā'nādisiddhā sā yathā vedā harestanuḥ || 51 ||
[Analyze grammar]

anyatra maraṇānmuktiḥ svadharmavidhipūrvakāt |
badarīdarśanādeva muktiṃ puṃsāṃ kare sthitā || 52 ||
[Analyze grammar]

dharmādharmau vijityā'tha badarīśaṃ narāyaṇam |
dṛṣṭvā muktiṃ tūpayāti vinā''yāsaṃ jano'tra vai || 53 ||
[Analyze grammar]

sarvayugeṣu bhagavān vaikuṇṭhasadṛśīṃ śubhām |
badarīṃ samanuprāpya sākṣādevā'vatiṣṭhate || 54 ||
[Analyze grammar]

vinā jñānena yogena tīrthāṭanapariśramaiḥ |
ekena janmanā jantuḥ kaivalyapadamaśrute || 55 ||
[Analyze grammar]

janmāntarasahasraiśca yena cārādhito hariḥ |
sa gacched badarīṃ draṣṭuṃ yatra gatvā na śocati || 56 ||
[Analyze grammar]

badarībadarītyuktvā prasaṃgānmuktibhāgbhavet |
viśālāṃ badarīṃ dṛṣṭvā puṃso mṛtyubhayaṃ kutaḥ || 57 ||
[Analyze grammar]

saśailakānanā pṛthvī daśadhā dakṣiṇīkṛtā |
hareḥ pradakṣiṇaṃ bhūmau badaryāṃ tu pade pade || 58 ||
[Analyze grammar]

aśvamedhasya yajñasya vājapeyaśatasya ca |
hareḥ pradakṣiṇāyāśca puṇyaṃ pade padetra vai || 59 ||
[Analyze grammar]

badaryāṃ bhagavānatti yadannaṃ divyatāṃ gatam |
tatsattvaśuddhaye sarvairbhoktavyamavicāritam || 60 ||
[Analyze grammar]

amarā harinaivedyaṃ bhoktuṃ bhavanti tatparāḥ |
bālyayauvanavārdhakye kṛtaṃ prāṇāntapātakam || 61 ||
[Analyze grammar]

viṣṇorniveditaṃ bhuktvā badaryāṃ tannivartate |
naivedyabhakṣaṇādatra sālokyaṃ labhate hareḥ || 62 ||
[Analyze grammar]

hṛdi rūpaṃ mukhe nāma naivedyamudare hareḥ |
pādodakaṃ sanirmālyaṃ mastake yasya so'cyutaḥ || 63 ||
[Analyze grammar]

brahmahatyādipāpāni naśyanti caraṇāmṛtāt |
kiṃ dānaistapasā tīrthairniyamaiśca pariśramaiḥ || 64 ||
[Analyze grammar]

badaryā viṣṇupādāderbindumātraṃ miled yadi |
sūryagrahe kurukṣetre mahādānaphalaṃ hi yat || 65 ||
[Analyze grammar]

badaryāṃ grāsamātreṇa cāturmāsyaphalādhikam |
vedāntaśravaṇātpuṇyaṃ badaryāṃ caraṇāmṛtāt || 66 ||
[Analyze grammar]

badaryāṃ vaiṣṇavīṃ dīkṣāṃ ye gṛhṇanti jaḍā api |
muktiḥ karatale teṣāṃ bhūmikādarśanādapi || 67 ||
[Analyze grammar]

ya idaṃ śṛṇuyānnityaṃ śrāvayeccāpi pāṭhayet |
paṭhedvā pāpamuktaḥ saḥ padaṃ viṣṇoḥ prapadyate || 68 ||
[Analyze grammar]

rājā vijayamāpnoti sutārthī labhate sutam |
kanyārthī labhate kanyāṃ kanyā vindati satpatim || 69 ||
[Analyze grammar]

dhanārthī dhanamāpnoti vyādhyādhyadhananāśanam |
daurbhāgyā'pamṛtyugrahaduḥsvapnādivināśanam || 70 ||
[Analyze grammar]

śrutvā natvā naranārāyaṇau bhuktvā prasādakam |
yayau satyaṃ brahmalokaṃ vivāhārthaṃ sa nāradaḥ || 71 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne merutīrthadaṇḍapuṣkariṇīmānasodbhedanaranārāyaṇajanmasthānadharmorvaśīsaॆgamakūrmoddhārabrahmāvartāditīrtha |
tatkṣetraprasādacaraṇāmṛtamāhātmyādinirūpaṇanāmā navā'dhikadviśatatamo'dhyāyaḥ || 209 ||
[Analyze grammar]