Chapter 199

śrīlakṣmīruvāca |
samudramanthane daityamohārthaṃ tvamabhūḥ prabho |
mohinīrūpamāpannastvāṃ dṛṣṭvā śaṃkarastadā || 1 ||
[Analyze grammar]

māyeśopi kathaṃ māyāmohamavāpa nirguṇaḥ |
iti me saṃśayaṃ chindhi tāṃ kathāṃ kathaya prabho || 2 ||
[Analyze grammar]

śrīnārāyaṇa uvāca |
śrūyatāṃ tanmahālakṣmi sarvaṃ niḥsaṃśayaṃ yathā |
ahaṃ nārāyaṇaḥ sākṣātparaṃbrahma parātparaḥ || 3 ||
[Analyze grammar]

nirguṇo'pi sadā divyaguṇākaro bhavāmyapi |
madicchāyā jagatsarvaṃ nirguṇānmama varṣmaṇaḥ || 4 ||
[Analyze grammar]

samutpannaṃ saguṇaṃ tat sattvādiguṇamiśritam |
prakṛteśca guṇānāṃ ca prerako'haṃ prayojakaḥ || 5 ||
[Analyze grammar]

yathā yatra yādṛśaṃ ca kārye bhavati tādṛśam |
rūpamāsthāya tatsarvaṃ sādhayāmi svayaṃ yathā || 6 ||
[Analyze grammar]

anyapraveśamāsthāya sādhayāmi guṇārthivat |
śaṃkaro mama bhakto'sti nirlepo māyayā sadā || 7 ||
[Analyze grammar]

māyāguṇairanudvejyo māyayā sa na lipyate |
tathāpyanyapraśikṣārthaṃ mohanaṃ darśitaṃ mayā || 8 ||
[Analyze grammar]

sādhvyaśca sādhavaścāpi tyāgavrataṃ samāśritāḥ |
te tu mohaṃ prajitvaiva divyabhāvā bhavanti hi || 9 ||
[Analyze grammar]

tathāpīndriyavegena kadācidyogasaṃbhave |
grāmyakriyāprakartāro bhaveyurmohasaṃbhave || 10 ||
[Analyze grammar]

śaṃkaro yogirāṭ bhakto māyāmohamavāptavān |
tasmānmuktiṃ samicchadbhirbhettavyamindriyāditaḥ || 11 ||
[Analyze grammar]

apramādaḥ sadā rakṣyaḥ pramādo mṛtyurucyate |
moha eva pramādo'sti naranārīprayogajaḥ || 12 ||
[Analyze grammar]

tadbhaktairnaiva yoktavyaṃ mohanaṃ dehajaṃ kvacit |
iti pratyupadeśārthaṃ darśitaṃ śaṃkare mayā || 13 ||
[Analyze grammar]

anyaccā'syā vasumatyā garbhe svarṇaprapattaye |
śivadhātupradānārthaṃ kṛtaṃ mayā sahetukam || 14 ||
[Analyze grammar]

śṛṇu tacca yathājātaṃ mamaiva tatkathānakam |
dvayoraikyānmokṣakarī kathaiṣā śravaṇānmatā || 15 ||
[Analyze grammar]

yoṣidrūpadharo viṣṇurmohayitvā tu dānavān |
somamapāyayaddevān śrutveti śaṃkaraḥ svayam || 16 ||
[Analyze grammar]

draṣṭumaicchacca tadrūpaṃ samāyācca tvarānvitaḥ |
śaṃkarasya ca saṃkalpaṃ jñātvā'tha mohinīhariḥ || 17 ||
[Analyze grammar]

pāyayitvā'mṛtaṃ devānapāsarat yato haraḥ |
ṣoḍaśahāyanā nārī kāmapūrabharānvitā || 18 ||
[Analyze grammar]

kabarīkeśaveṣāḍhyā caṃcatpatralatānvitā |
śaratpūrṇaniśānāthanibhānanamanoharā || 19 ||
[Analyze grammar]

kāmabāṇāśritabhālabhrṛkuṭidvayahṛdgamā |
raktapītasudhavalapuṣpāvataṃsaśobhitā || 20 ||
[Analyze grammar]

sthalapadmakṛtagucchagrathitadhammilottamā |
sugandhacandanamiśrakuṃkumapatrikānvitā || 21 ||
[Analyze grammar]

madhyasūkṣmaprabhābindvīsmāritānaṃgasadguhā |
nīlacaṃcatkajjalārdrakoṇā'pāṃgasunetrakā || 22 ||
[Analyze grammar]

sūkṣmaratnamaṇisvarṇahīrakāñcitakuṇḍalā |
caṃcanmauktikasūkṣmāgryālambamānairikānvitā || 23 ||
[Analyze grammar]

suprabhahīrakāñcitasvarṇacandrakapolikā |
tanutārātmasauvarṇavālīmaṇibhanāsikā || 24 ||
[Analyze grammar]

pakvabimbauṣṭhayugalasmāritā'cumbanakriyā |
ratnamadhyakṛticaṃcatsvarṇacibukabindvikā || 25 ||
[Analyze grammar]

prodyatadsūryasamakāntikaustubhavaramaṇḍanā |
svarṇahārāvalīśobhadvakṣaḥsthalastanadvayā || 26 ||
[Analyze grammar]

kambukaṇṭhī niṣkakaṇṭhī kadalīgarbhasadbhujā |
raktapallavasatkānticandranakhāṅguliprabhā || 27 ||
[Analyze grammar]

svarṇormikāṃ'gadaramyakaṭakavaṃgiḍīyutā |
śaṃkhalāraśanānūpurarājicaraṇadvayā || 28 ||
[Analyze grammar]

kvaṇatkiṃkiṇikāyuktasvarṇamaṃjīraśobhitā |
svarṇaraktaraṃgacitravicitraghargharīyutā || 29 ||
[Analyze grammar]

svarṇatārā'ñcitaprāntaśobhacchāṭīsamambarā |
nava raṃgaphalakalpastanā''ptakaṃcukīyutā || 30 ||
[Analyze grammar]

candravidyudvilāsābhaṃ naktakaṃ bibhratī kare |
kūrdatkandukavaryeṇa sakrīḍā ca muhurmuhuḥ || 31 ||
[Analyze grammar]

puṣpapallavaśobhāḍhye vṛkṣakuṃje gatīmatī |
īṣatkampāñcitastananitambacāpalānvitā || 32 ||
[Analyze grammar]

viguṇṭhadvastravaivartagocarībhavadaṃkanā |
hāvabhāvavilāsādicaṃcalāyatalocanā || 33 ||
[Analyze grammar]

kaṃcukīṃ stanayorhastaṃ datvā'pīḍayadatyati |
kvacicca kabarīṃ dhṛtvā sannahyatī ca śāṭikām || 34 ||
[Analyze grammar]

ramamāṇā kandukena manomohātikāriṇī |
muhurhāsyānanā śāṭīmuddhṛtyoddhṛtya gacchati || 35 ||
[Analyze grammar]

ghargharīṃ mukulīkṛtyā'nāvṛtasakthidarśanā |
yatrāsti śaṃkarastatra miṣeṇā''sṛtya sarpati || 36 ||
[Analyze grammar]

evaṃvidhāmekatānāmekatānena lokayan |
jaḍībhūto'bhavacchaṃbhurvihvalātmā hatāntaraḥ || 37 ||
[Analyze grammar]

jñaptismṛtivilopenā'bhavadbhānavivarjitaḥ |
kāmabhāvaprabhāmātrārūḍhasaṃkalpatanmayaḥ || 38 ||
[Analyze grammar]

vātataraṃgaprotkṛṣṭaśāṭīhīnā tadā'bhavat |
ślathannīvyapatadbhūmau ghargharyapi tadantare || 39 ||
[Analyze grammar]

cidākāśagataṃ vidyudbinduṃ sābhramivāntaram |
mahāprakāśatejasvi svarṇacampakabhānvitam || 40 ||
[Analyze grammar]

vilokya śaṃkarastasyāṃ manaścakre'tiṣañjitum |
vāyurharati vastrāṇi sā ca harati śaṃkaram || 41 ||
[Analyze grammar]

apasarpati vrīḍāḍhyā vṛkṣādvṛkṣāntaraṃ tadā |
kāmavegāptakārkaśyendriyo vīryaprapūritaḥ || 42 ||
[Analyze grammar]

so'nugatvā'tidārḍhyena keśāndhṛtvā ca tadvapuḥ |
samākṛṣya samunnīya bāhubhyāṃ pariṣasvaje || 43 ||
[Analyze grammar]

prasahyopāliṃgitā sā cūmbitā ca muhurmuhuḥ |
anicchukī ca sā''tmānaṃ mocayitvā bhujāntarāt || 44 ||
[Analyze grammar]

prādravatsā vṛkṣasaṃghe'nujagāma haraśca tām |
retaso vegaprābalyātsrāva'bhavatpradhāvataḥ || 45 ||
[Analyze grammar]

yatra yatrā'pradhāvatsā tatra tāmanudhāvataḥ |
reto mahyāṃ cāpatad yat tā hemnaḥ khanayo'bhavan || 46 ||
[Analyze grammar]

mohinī vyomamārgeṇa purogā yāti vegataḥ |
mugdho maheśvaraḥ kāmavegastāmanudhāvati || 47 ||
[Analyze grammar]

bhūmāvaraṇyaśailādau cāpagāsu vaneṣu ca |
yatrā'dhāvanmahādevo dhātustasyā'patattathā || 48 ||
[Analyze grammar]

tatra tatra ca tadyogāt pṛthvī raupyamayī hyabhūt |
śaṃkarasya samagrasya dhātorvai kṣaraṇādanu || 49 ||
[Analyze grammar]

samajāyata śaithilyaṃ prabodho'bhūttataḥ punaḥ |
keyaṃ vai mohinīrūpā ko'haṃ gacchāmi kutra ca || 50 ||
[Analyze grammar]

kathaṃ me kalmaṣaṃ prāptamavikṛtasya vikṛtiḥ |
naitādṛśaṃ bhavedrūpaṃ jagaddhātāramantarā || 51 ||
[Analyze grammar]

amāyikasya kā māyā yena māyā vaśīkṛtā |
māṃ yāhīti kṛtayatnā māyeyaṃ vaiṣṇavī nanu || 52 ||
[Analyze grammar]

tasyaiva māyayā vyāptaṃ jagadetaccarācaram |
yadyahaṃ tena cākṛṣṭastadā nāstyadbhutaṃ hi me || 53 ||
[Analyze grammar]

tenaiva saṃyojito'haṃ ramāmi śivayā sadā |
tenaiva preritaścāhaṃ viharāmi tadicchayā || 54 ||
[Analyze grammar]

iti vicārya mumude na mlānimagamaddharaḥ |
bhagavānapi taṃ bhaktaṃ pramātāraṃ vicintya ca || 55 ||
[Analyze grammar]

mohinīrūpadhṛk prāha kastvaṃ kasmājjaḍīkṛtaḥ |
kva gataṃ tava satsattvaṃ vinā yogamasatvavat || 56 ||
[Analyze grammar]

samarthasyāpi te kena gamitaitādṛśī daśā |
ehyāgaccha nikuṃjeṣu ramāvo nirjane vane || 57 ||
[Analyze grammar]

naitādṛśī punarnārīṃ prāpsyase'kṣatamadhyamām |
iti kṛtvā svayaṃ kṛṣṇo nārāyaṇaścucumba tam || 58 ||
[Analyze grammar]

harastu dhātunirbhinnaḥ śaithilyākrāntameḍhrakaḥ |
notsāhavānabhūttatra tayā sākaṃ riraṃsitum || 59 ||
[Analyze grammar]

sa prāha mohinīṃ tatra nārāyaṇamṛte kvacit |
yogināṃ manaso dhairyaṃ hartuṃ śakto na vai paraḥ || 60 ||
[Analyze grammar]

tasmai namo bhagavate māyārūpadhārāya ca |
namaḥ kṛṣṇāya devāya nārāyaṇāya viṣṇave || 61 ||
[Analyze grammar]

mohinyātmasvarūpāya moharūpāya te namaḥ |
tvayi nātra mama śoko nārāyaṇe parātpare || 62 ||
[Analyze grammar]

tathāpi devadeveśa rakṣa māyāvimohanāt |
moho'yaṃ jagatāṃ bandhakaro'sti vāsanodayaḥ || 63 ||
[Analyze grammar]

tava yogo'pi mohātmā muktyātmā nirguṇo mataḥ |
tavedaṃ rūpamatyarhasaundaryabhājanaṃ param || 64 ||
[Analyze grammar]

na me cānyasya bandhāya mokṣamātrapradaṃ hi tat |
tasmāt tvayā kṛtaṃ yadvai tadvai me lābhadaṃ param || 65 ||
[Analyze grammar]

pārvatyāḥ sahavāse'pi smṛtvā tvāṃ mohinīṃ sadā |
vinirbandho bhaviṣyāmi lapsye nairguṇyameva ca || 66 ||
[Analyze grammar]

śrutvaitacchaṃbhuhārdajño bhagavān kamalāpatiḥ |
yoṣidrūpaṃ ca saṃhṛtya caturbāhuḥ kṣaṇe'bhavat || 67 ||
[Analyze grammar]

prahasanprāha sarvātmā samāśliṣya haraṃ hṛdā |
madbhakto matkṛtāṃ māyāṃ jītavānasi śaṃkara || 68 ||
[Analyze grammar]

jñānena cāpi dhairyeṇa bhaktyā ca parayā tathā |
nānyaścātitarenmāyāṃ yoṣidrūpāṃ hi tvadṛte || 69 ||
[Analyze grammar]

seyaṃ bhāvānsṛjamānā mohinīvadviḍambanā |
rajjūrūpā bandhanākhyā spṛśatyeva na macchritān || 70 ||
[Analyze grammar]

abhaktānāṃ mohikā sā bhaktānāṃ bhuktimuktidā |
saiva madyogamāpannā bhaktānāṃ nirguṇā sadā || 71 ||
[Analyze grammar]

mahāmāyā mahālakṣmīḥ kamalā rādhikā ramā |
sarasvatī ca sāvitrī pārvatī naiva bandhadā || 72 ||
[Analyze grammar]

rukmiṇī kambharā brāhmī pativratā ca jānakī |
mohinī tulasī caitā mokṣadā na tu bandhadāḥ || 73 ||
[Analyze grammar]

prabhā ca māṇikī jayā lalitā naiva bandhadāḥ |
kṛṣṇarūpāstu tāḥ sarvā muktidā yogataḥ smṛtāḥ || 74 ||
[Analyze grammar]

haṃsā ca maṃjulā campā haimī dayā ramā tathā |
puṣpā muktā tathā devī śāntā godāvarī manuḥ || 75 ||
[Analyze grammar]

ojasvatī ca jīvā ca maṃgalā tāḥ sakhīvarāḥ |
divyāstāsāṃ mūrtayo yāḥ sādhvyo yoginya eva ca || 76 ||
[Analyze grammar]

sākṣātkṛṣṇāṃkavāsāstāḥ pāvanā mokṣadāstataḥ |
sāṃkhyayoginya evātra sanyāsinyaśca yāstathā || 77 ||
[Analyze grammar]

virāgiṇyaśca madrūpā yatinyaścāpi mokṣadāḥ |
macchaktayastu tāḥ sarvā madrūpā eva nirguṇāḥ || 78 ||
[Analyze grammar]

tāsāṃ yogaṃ gatā ye ye te jīvā nirguṇāḥ sadā |
pavitrāścātra jīvanto muktā eva na saṃśayaḥ || 79 ||
[Analyze grammar]

yathā tāsāṃ yogavanto brahmaviṣṇumaheśvarāḥ |
kṛṣṇarāmādayo nityamuktā nityapareśvarāḥ || 80 ||
[Analyze grammar]

atha tāsāṃ kṛpāpātrajīvā mukteśvarāḥ sadā |
iti te kathitaṃ śaṃbho manmāhātmyamanuttamam || 81 ||
[Analyze grammar]

nedṛksamyagvijānanti ye doṣā''dṛtadṛṣṭayaḥ |
matsvarūpaprasaktā ye matto bodhagrahāśca ye || 82 ||
[Analyze grammar]

madātmakamidaṃ sarvaṃ jānanto'nidameva yat |
ta evedṛksumatayo nirbandhāḥ santi sarvathā || 83 ||
[Analyze grammar]

ityuktvā śaṃkaraṃ viṣṇurantardhānaṃ gataḥ kṣaṇāt |
mahādevo'pi gaṃgāyāṃ snānārthamagamattadā || 84 ||
[Analyze grammar]

iti te lakṣmi sāmarthyaṃ mohinyā śaṃkarāya yat |
darśitaṃ kathitaṃ sarva kiṃ punaḥ śrotumicchasi || 85 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne śaṃkarasya mohinīdarśanena dhātupātāt svarṇakhanyutpattiḥ tatsakhīnāṃ divyatā cetyādi |
nirūpaṇanāmā navanavatyadhikaśatatamo'dhyāyaḥ || 199 ||
[Analyze grammar]