Chapter 192

śṛṇu lakṣmi tato gatvā nārado vismito'bhavat |
dṛṣṭvā''ścaryakarāṃ viśvakarmaṇā racitāṃ kṛtim || 1 ||
[Analyze grammar]

kṛtrimeṣu mohitaḥ sannāradaḥ prāha bhūbhṛtam |
varavāhinī prāgevā'yātā'tra kimu vidyate || 2 ||
[Analyze grammar]

śailaḥ pratyāha devarṣe vismayaṃ tyaja kṛtrimam |
viśvakarmakṛtaṃ caitaddṛśyaṃ devādimaṇḍalam || 3 ||
[Analyze grammar]

bhojitaḥ pūjitaḥ prārthitaḥ śaṃbhorāgamāya ca |
nāradastvarito gatvā prāha śaṃbhuṃ surādikān || 4 ||
[Analyze grammar]

pratīkṣate himādriścā''yātu vai varavāhinī |
tatra vimohanārthaṃ ca samāścaryārthamityapi || 5 ||
[Analyze grammar]

citramayī kṛtā māyā yatra trailokyamāhitam |
brahmaviṣṇumahendrādyāḥ sarve devāḥ sucitritāḥ || 6 ||
[Analyze grammar]

kṛtrimāścitrarūpeṇa na kiṃcidavaśeṣitam |
jaḍaṃ tu cetanaṃ yadvad dṛśyate sakriyaṃ hi tat || 7 ||
[Analyze grammar]

śrutvaitacca varādyā āturā hyāsan nirīkṣitum |
śivājñayā varayātrā vāhinī nirjagāma ha || 8 ||
[Analyze grammar]

ājagāmopahemādripuraṃ tu haravāhinī |
ākarṇyaitattu hemādriḥ preṣayāmāsa parvatān || 9 ||
[Analyze grammar]

viprāṃścāpi svayaṃ cāpi yayau saṃbhārasaṃbhṛtaḥ |
senayā sahitaḥ śailaḥ saṃbhāṣāṃ kartumīśvaram || 10 ||
[Analyze grammar]

śailendrāṇāṃ mahāsenāṃ śaivānāṃ ca tato'dhikām |
dṛṣṭvobhapakṣagāste tu vismayaṃ paramaṃ gatāḥ || 11 ||
[Analyze grammar]

virajeturmilitvaiva pūrvapaścimasāgarau |
haimo śailāśca viprādyāḥ praṇemurvaraśaṃkaram || 12 ||
[Analyze grammar]

vṛṣavimānasaṃsthaṃ suprasannāsyaṃ subhūṣitam |
divyāvayavasatkāntiprakāśitadigantaram || 13 ||
[Analyze grammar]

ratnabhṛte sureśaiśca sevitaṃ chatracāmaraiḥ |
vāmasthitahariṃ dakṣasthitabrahmāṇamityapi || 14 ||
[Analyze grammar]

pṛṣṭhasthitamahendraṃ ca tato devagaṇānvitam |
atha satkṛtya hārādyairjalapānādibhirvaram || 15 ||
[Analyze grammar]

varapakṣāṃśca saṃsthāpya viśrāntibhavaneṣu ca |
śivājñayā himaśailo yayau ca vidhivedikām || 16 ||
[Analyze grammar]

kartuṃ tvatha varācāramāhūtāḥ seśvarāśca te |
gamanaṃ cakrurīśādyā agragā girirāṭgṛham || 17 ||
[Analyze grammar]

tasminnavasare menā śivadarśanalālasā |
nāradaṃ pārśvataḥ kṛtvā candraśālāṃ samāgatā || 18 ||
[Analyze grammar]

śivo'pi svacamatkāraṃ darśayituṃ samicchati |
prāha vai vedhasaṃ viṣṇuṃ yātaṃ yūpaṃ pṛthakpṛthak || 19 ||
[Analyze grammar]

senāṃ kramayasārāṃ ca kṛtvā yāmaḥ sudarśanām |
menā vyavasthitāṃ ramyāṃ senāṃ dṛṣṭvā jaharṣa ca || 20 ||
[Analyze grammar]

prathamaṃ ca giridvāraṃ gandharvāḥ sundarāḥ prabhāḥ |
divyālaṃkāravastrāḍhyāḥ subhagā vāhanairyutāḥ || 21 ||
[Analyze grammar]

vādayantaśca vādyāni hyapsarobhiḥ svarāyitāḥ |
patākājayapaṭṭaiśca yutāḥ praviviśustadā || 22 ||
[Analyze grammar]

atha vasupatiṃ dṛṣṭvā śivo'yamiti sā'bravīt |
nāradaḥ prāha nā'yaṃ sa hyete vai śivakiṃkarāḥ || 23 ||
[Analyze grammar]

atha dviguṇaśobhāḍhyayakṣasenādhipaṃ tu sā |
maṇigrīvābhidhaṃ dṛṣṭvā rudroya'miti sā'bravīt || 24 ||
[Analyze grammar]

nāradaḥ prāha nāyaṃ sa hyete'pi śivasevakāḥ |
athadviguṇaśobhāḍhyasenāmadhyagato'nalaḥ || 25 ||
[Analyze grammar]

dṛṣṭo hyāyāta ityayaṃ śivāsvāmīti sā'bravīt |
nāradaḥ prāha nā'yaṃ saḥ śivanetrānalo hyayam || 26 ||
[Analyze grammar]

atha tato'pi dviguṇaśobhāvān yama āgataḥ |
taṃ svasenāyutaṃ dṛṣṭvā menā śivo'yamabravīt || 27 ||
[Analyze grammar]

nāradaḥ prāha nā'yaṃ saḥ sūryaputrastvayaṃ yamaḥ |
athā''yāntaṃ nirṛtiṃ svasenānvitaṃ vilokya sā || 28 ||
[Analyze grammar]

yamāddviguṇaśobhāḍhyaṃ puṇyajanamahāprabhum |
śivo'yamabravīnmenā nāradaḥ prāha neti saḥ || 29 ||
[Analyze grammar]

athā''yāntaṃ varuṇaṃ dviguṇaśobhānvitaṃ ca sā |
senāmadhyagataṃ dṛṣṭvā'bravīdrudro'yameva kim || 30 ||
[Analyze grammar]

nāradaḥ prāha nāyaṃ saḥ tāvadvāyuḥ samāgataḥ |
tato'pi dviguṇaśobhaṃ dṛṣṭvā taṃ sainyamadhyagam || 31 ||
[Analyze grammar]

menā'bravīcca rudro'yaṃ nāradaḥ prāha naiva saḥ |
athā''yāt taddviguṇādhiśobhānvito dhanādhipaḥ || 32 ||
[Analyze grammar]

sainyamadhyagataṃ dṛṣṭvā menā prāha śivo hyayam |
nāradaḥ prāha nāyaṃ sa guhyakādhipatistvayam || 33 ||
[Analyze grammar]

athāta īśāna āyāt svasainyaparivāritaḥ |
tato dviguṇaśobhāḍhyaṃ taṃ dṛṣṭvā menakā'bravīt || 14 ||
[Analyze grammar]

rudro'yamiti tāṃ nāradaḥ prāhā'yaṃ na śaṃkaraḥ |
athendraḥ sainyaśobhāḍhyo dviguṇasmṛddhirāyayau || 35 ||
[Analyze grammar]

dṛṣṭvā taṃ harṣitā menā prāhā'yaṃ macchivāpatiḥ |
nāradaḥ prāha nāyaṃ saḥ kintvindro'yaṃ surādhipaḥ || 36 ||
[Analyze grammar]

atha candraḥ samāyātastato dviguṇaśobhitaḥ |
dṛṣṭvā svasainyamadhyaṃ taṃ menā'bravīcchivo hyayam || 37 ||
[Analyze grammar]

nāradaḥ prāha nā'yaṃ saḥ kintu tadbhālacandrakaḥ |
atha sūryaḥ samāyātsvasainyamadhyagataḥ svarāṭ || 38 ||
[Analyze grammar]

tato dviguṇaśobhaṃ taṃ dṛṣṭvā''hā'yaṃ śiveti sā |
nāradaḥ prāha nā'yaṃ saḥ kintvayaṃ tattanū raviḥ || 39 ||
[Analyze grammar]

athā''yayuśca bhṛgvādyāḥ ṛṣayastejasā'dhikāḥ |
svaśiṣyagaṇasainyāḍhyāstanmadhyastha bṛhaspatim || 40 ||
[Analyze grammar]

tato dviguṇaśobhaṃ ca dṛṣṭvā''hā'yaṃ śiveti sā |
nāradaḥ prāha nā'yaṃ saḥ kintvayaṃ devadeśikaḥ || 41 ||
[Analyze grammar]

atharṣimaṇḍalaistejorāśibhiḥ pūjito hyajaḥ |
tato'pi bahuśobhāḍhyaḥ samāyādvai pitāmahaḥ || 42 ||
[Analyze grammar]

dṛṣṭvā tato bahuśobhaṃ menā harṣavatī hyabhūt |
provāca śaṃkaro'yaṃ syāt nāradaḥ prāha naiva saḥ || 43 ||
[Analyze grammar]

kintu brahmā viśvasṛṣṭā menā''ścaryagatā'bhavat |
atha viṣṇurbahurūpo'tyatilakṣmīramāyutaḥ || 44 ||
[Analyze grammar]

sarvaśobhānvito meghaśyāmaḥ svarṇasamujjvalaḥ |
koṭikandarpalāvaṇyaḥ pītāmbaraścaturbhujaḥ || 45 ||
[Analyze grammar]

cakrādicihnavān vakṣaḥsthalarājatsukaustubhaḥ |
mukuṭakaṭakādyuktaḥ padmapatrābhalocanaḥ || 46 ||
[Analyze grammar]

lāvaṇyasaundaryanidhiraprameyaprabhojjvalaḥ |
anantadāsadāsīnāṃ sainye garuḍarājitaḥ || 47 ||
[Analyze grammar]

praviveśa tamāyāntaṃ dṛṣṭvā'tiharṣavihalā |
cakitā'kṣyabhavanmenā'bravīdayaṃ sa eva saḥ || 48 ||
[Analyze grammar]

nāradaḥ prāha nā'yaṃ tvattsutāsvāmī hi menake |
śivabhrātā hyayaṃ viṣṇuḥ śivakāryādhikāryayam || 49 ||
[Analyze grammar]

vaivāhike mahā'mātyo'nuvaro varapārśvagaḥ |
śivastvasmādadhiko'sti rūpasmṛddhacādivaibhavaiḥ || 50 ||
[Analyze grammar]

athaikādaśakoṭyaśca rudrāṇāṃ viviśustadā |
sarve śaṃbhusamākārā viṣṇutulyavibhūṣaṇāḥ || 51 ||
[Analyze grammar]

athā''dityā dvādaśakoṭyaśca saṃviviśustadā |
sarve viṣṇusamākārā nārāyaṇasumūrtayaḥ || 52 ||
[Analyze grammar]

dṛṣṭvā menā matyagamyān bhāgye svaṃ bahvamanyata |
vāraṃ vāraṃ paryapṛcchannāradaṃ kvā'sti śaṃkaraḥ || 53 ||
[Analyze grammar]

tāvat praviviśustatra vairājāścordhvaretasaḥ |
nārāyaṇādapyadhikarūpatejo'bhisaṃvṛtāḥ || 54 ||
[Analyze grammar]

caturviṃśatikoṭyaste mahāviṣṇustadantare |
rājādhirājalakṣmyā sa rājate sarvato'dhikaḥ || 55 ||
[Analyze grammar]

tamanu sādhavaḥ sarve yogino'rbudakoṭayaḥ |
āyayuśca puradvāraṃ mahāviṣṇusvarūpiṇaḥ || 56 ||
[Analyze grammar]

dṛṣṭvā tatra mahāviṣṇuṃ menā harṣapariplutā |
atyutsāhavatī prāha so'yaṃ śivaḥ samāgataḥ || 57 ||
[Analyze grammar]

aho bhāgyaṃ mama putryā yogyaṃ tapaḥ kṛtaṃ tayā |
arjitaścedṛśaḥ svāmī sukhī bhavatu putrikā || 58 ||
[Analyze grammar]

nāradaṃ prāha meneyaṃ na śivastvacchivāpatiḥ |
kintu śivaḥ sadāśivo rājate īśasṛṣṭiṣu || 59 ||
[Analyze grammar]

tasya bhrātā mahāsamrāṭ mahāviṣṇurayaṃ kila |
ato'tirūpavān samṛddho vartata pārvatīpatiḥ || 60 ||
[Analyze grammar]

varṇayituṃ tu tacchobhāṃ mayā naiva hi śakyate |
mā tvarā tvaṃ kuru mene paśyainaṃ ko'yamāgatā || 61 ||
[Analyze grammar]

tāvacchrīkṛṣṇacandraḥ śrīrādhākṛṣṇaḥ svayaṃprabhuḥ |
āyayau koṭikoṭyabjā'rbudadāsādimaṇḍitaḥ || 62 ||
[Analyze grammar]

nāradaḥ praṇanāmainaṃ menā'pi praṇatā'bhavat |
dṛṣṭvā kṛṣṇasvarūpaṃ ca kṣaṇaṃ mūrchāmavāpa sā || 63 ||
[Analyze grammar]

tanmūrtidarśanasaukhyāplutā''kṛṣṭā''ntarā tadā |
samādhisukhamāpannā hyutthitā ca kṣaṇāntare || 64 ||
[Analyze grammar]

prāha nārada pārvatyāḥ patiścāyaṃ na saṃśayaḥ |
nārada prāha mene'yaṃ śivāpatipitā'sti hi || 65 ||
[Analyze grammar]

śivastvasmātsamutpannaścā'syā'sti dāyabhāk sadā |
ayaṃ kṛṣṇaḥ paraṃbrahma golokādhipatiḥ prabhuḥ || 66 ||
[Analyze grammar]

tanmūrteśca samutpanno mānasastanayaḥ śivaḥ |
mahāvairāgyamūrtiḥ sa varṇayituṃ na śakyate || 67 ||
[Analyze grammar]

āyātyanantaraṃ paśya rūpaguṇamahākhaniḥ |
menā svasyāśca jāmāturdṛṣṭvā tu pitaraṃ tadā || 68 ||
[Analyze grammar]

niḥsandehā'bhavaccātiprahṛṣṭā'pyabhavanmuhuḥ |
draṣṭuṃ samutsukā'bhūcca tāvacchaṃbhuḥ samāyayau || 69 ||
[Analyze grammar]

idānīṃ yāvacchṛṃgāraḥ kṛtsnaḥ kṛṣṇasamo'bhavat |
nāsīnnyūnaṃ tu śobhāyāṃ vare śobhā'styato'dhikā || 70 ||
[Analyze grammar]

varayātrāpravāhinyāṃ varaśobhā viśiṣyate |
koṭikandarpalāvaṇyasaundaryakāntisūjjvalam || 71 ||
[Analyze grammar]

śrīkṛṣṇasadṛśaṃ rūpaṃ dṛṣṭvā menā'tiharṣitā |
ātmasvārpaṇabhaktyā sā'bhavacchuddhā'drirāḍapi || 71 ||
[Analyze grammar]

mene'pyaho mayā dṛṣṭā sarve'pi devanāyakāḥ |
eteṣāṃ yaḥ patiḥ so'tra patiḥ putryā bhaviṣyati || 73 ||
[Analyze grammar]

svabhāgyamadhikaṃ mene putryāścāpi tato'dhikam |
yatpatiṃ prāpya me putrī jaganmātā bhaviṣyati || 74 ||
[Analyze grammar]

kuṭumbamapi sarvaṃ me yaśobhāk saṃbhaviṣyati |
varṇayantīti bhāgyaṃ svaṃ kṛṣṇaśaṃbhuṃ dadarśa sā || 75 ||
[Analyze grammar]

evamevā'bhavacchaṃbhuḥ kintu menāhimālayau |
tādṛksuśobhitaṃ śaṃbhuṃ paśyetāṃ bhāvato yadi || 76 ||
[Analyze grammar]

manvīyātāṃ kṛtakṛtyau putrīdānena bhāvataḥ |
sarvato bhāvanābhaktyā prāpnuyātāṃ ca śuddhatām || 77 ||
[Analyze grammar]

śaṃbhormāhātmyavijñānāt pāramārthikaniścayāt |
muktiṃ drāgeva gacchetā śailaśca līnatāṃ vrajet || 78 ||
[Analyze grammar]

tathāsati mahadduḥkhaṃ śvaśuradhvaṃsasaṃbhavam |
śvaśrvāścāpi nidhanasya duḥkhaṃ cātyadhikaṃ bhavet || 79 ||
[Analyze grammar]

raṃge bhaṃgo bhaveccāpi bhavet kailāsanāśanam |
bhavecca devakoṭīnāṃ sthānanāśo mṛte hime || 80 ||
[Analyze grammar]

himācalavināśena pṛthvī riktā bhavettadā |
asaṃkhyauṣadhayaḥ sarvā vinaṣṭāḥ syustathā tadā || 81 ||
[Analyze grammar]

iti sarvaṃ tvāpatecca tanmābhūditivāñcchayā |
menāhimācalādīnāṃ bhāvabhaktinivṛttaye || 82 ||
[Analyze grammar]

avaguṇagrahārthāya śailabhūvāsalabdhaye |
śaṃkaro hi tadā rūpaṃ parivyavartayat svakam || 83 ||
[Analyze grammar]

kṛṣṇākṛtisamaṃ rūpaṃ vivṛtya rudramūrtikam |
śāṃbhavaṃ rūpamāsthāya menāyai darśanaṃ dadau || 84 ||
[Analyze grammar]

himālayāya tadvacca śailādibhyastathaiva ca |
dadau hi darśanaṃ svasya bhasmāktaṃ muṇḍamālikam || 85 ||
[Analyze grammar]

sajaṭāsarparudrākṣatriśūlacarmarājitam |
kadarūpaṃ tathā'tītā'rdhā''yuṣkaṃ rūkṣavigraham || 86 ||
[Analyze grammar]

sapinākaṃ pañcavaktraṃ vyāghracarmasudhautrakam |
daśahastaṃ saḍamaruṃ raudrarūpaṃ ca dhūrjaṭam || 87 ||
[Analyze grammar]

duḥśmaśru romasarvāṃgaṃ bhūtapretādisevitam |
sakapardaṃ sakapālaṃ draṣṭurbhayakaraṃ mahat || 88 ||
[Analyze grammar]

gaṃjāpānarataṃ netre ghūrṇite cā'pyadarśayat |
tundilaṃ pīnamatyartha śyāmavarṇaṃ ca vāmanam || 89 ||
[Analyze grammar]

menā prāha tadā ko'yaṃ kva gataḥ kṛṣṇarūpadhṛk |
surūpo vilayaṃ yāto raudrarūpo'sti ko'tra vai || 90 ||
[Analyze grammar]

paśya nārada jāmātā kvā'sti me darśayā'tra mām |
nāradaḥ prāha paśyantīṃ kurūpaṃ menakāṃ tadā || 91 ||
[Analyze grammar]

yo'yamāyāti rudrāṇāṃ senāyā madhyage vṛṣe |
niṣīdan pretabhūtādigaṇāvṛtamahāprabhuḥ || 92 ||
[Analyze grammar]

yasya sainye vātarūpāḥ patākā marmarūpiṇaḥ |
vakratuṇḍā virūpāśca karālāḥ śmaśrulāstathā || 93 ||
[Analyze grammar]

khañjā hyalocanā daṇḍapāśamudrarapāṇayaḥ |
śaṃkhaḍamarugomukhavādino nartakā iva || 94 ||
[Analyze grammar]

viruddheṣu vāhaneṣu pucchābhimukhamāsthitāḥ |
kecittu vimukhāḥ pṛṣṭhamukhā bahumukhāstathā || 95 ||
[Analyze grammar]

akarā vikarāḥ kecitkecidbahukarāstathā |
aśirā viśirāścāpi kuśirāśca vinetrakāḥ || 96 ||
[Analyze grammar]

anetrā bahunetrāśca bahukarṇā akarṇakāḥ |
anāsāḥ chinnanāsāśca vṛkṇāśca kekarākṣakāḥ || 97 ||
[Analyze grammar]

piṃgalāḥ dhūmravarṇāśca prordhvaromāṇaityapi |
hyete sarve mahāvīryāḥ santi śiṣyāstriśūlinaḥ || 98 ||
[Analyze grammar]

paśya mene tava jāmātaraṃ sevanta ādarāt |
ime sarve nirātaṃkā niṣparigrahavigrahāḥ || 99 ||
[Analyze grammar]

nirdvandvāśca nirīhāśca prabalāstāpasāḥ śivāḥ |
paśyaitān tava jāmātṛgaṇān jāmātaraṃ tathā || 100 ||
[Analyze grammar]

ityaṃgulyā vinirdiśya nāradastamadarśayat |
raudraṃ rūpaṃ mano'bhāvyaṃ vīkṣya bhītā śivāprasūḥ || 101 ||
[Analyze grammar]

duḥkhitā'bhūt vañcitā'haṃ cetyuktvā mūrchitā'bhavat |
putryāpi vañcitā nāradena tvayāpi vañcitā || 102 ||
[Analyze grammar]

saptarṣibhirvañcitā ca kṣiptā hyamānuṣe sutā |
vigartā'rdhaparā''yuṣye'sughaṭe śmaśrule'guṇe || 103 ||
[Analyze grammar]

prāyo'sukhakare netrā'raṃjane cā'manohare |
rūkṣe vṛkṣe kaṃṭakāḍhye tyaktā puṇyalatā mayā || 104 ||
[Analyze grammar]

ityevaṃ mānase menā muhuḥ śocati khidyati |
sāśrunetre tadā kṛtvā sakhībhirupasevitā || 105 ||
[Analyze grammar]

kṣaṇād dhairyaṃ samālambyodvegājjajalpa kālikam |
aniṣṭotthasagadgadakaṇṭhā tāpāturā hyabhūt || 106 ||
[Analyze grammar]

iti śrīlakṣmīnārāyaṇīyasaṃhitāyā prathame kṛtayugasantāne varayātrāyāṃ varavāhinījanavāhānāṃ śobhā menākṛtavāhinovarapratīkṣaṇaṃ śaṃkaradarśanānmenāyāḥ śokaścetyādinirūpaṇanāmā dvānavatyadhikaśatatamo'dhyāyaḥ || 192 ||
[Analyze grammar]