Chapter 187

śrīnārāyaṇa uvāca |
ṛṣayaḥ prāhuravyagrā deveśaṃ śaṃkaraṃ priye |
pārvatī śaṃkarārthaṃ vai prāṇaglahaṃ vidhāya ca || 1 ||
[Analyze grammar]

nirbhīkā ca nirālambā nirāśā niṣparigrahā |
nirguṇā ca nirīhā ca tapatyābhūtasaṃplavam || 2 ||
[Analyze grammar]

miledvā na milecchaṃbhustapaḥ śailanisargajam |
milet syādubhayaṃ saukhyaṃ na milenmokṣajaṃ tataḥ || 3 ||
[Analyze grammar]

sukhaṃ bhavatyadhikaṃ vai tapo nāsti nirarthakam |
sādhayāmi śivaṃ yadvā pātayāmi śarīrakam || 4 ||
[Analyze grammar]

śaṃbhumudvāhayiṣye vā sthāsye kumārikā sadā |
neṣye ca brahmacaryātvaṃ grahīṣyāmi pravrajyikām || 5 ||
[Analyze grammar]

mariṣyāmi naiṣṭhikatve yāsyāmi brahmaśaṃkaram |
iti vai nirṇayaṃ kṛtvā tapaḥ karoti sā satī || 6 ||
[Analyze grammar]

athā'tra yadvidheyaṃ syātkartavyamīśvareṇa vai |
iti nivedya vṛttāntaṃ prāpyā''jñāṃ svagṛhaṃ yayuḥ || 7 ||
[Analyze grammar]

śaṃkarastu tapo devyā aicchan parīkṣituṃ tadā |
parīkṣākāmuko rūpaṃ dhṛtvā jāṭilamuttamam || 8 ||
[Analyze grammar]

sthaviro vipracihnāḍhyo daṇḍacchatrānvito dvijaḥ |
bhūtvā yayau tu tacchṛṃgaṃ prajvalaṃstejasā'bhitaḥ || 9 ||
[Analyze grammar]

mṛgājīnadharaṃ muñjamekhalaṃ sakamaṇḍalum |
sopavītaṃ mahāvṛddhaṃ sajaraṃ bhasmavigraham || 10 ||
[Analyze grammar]

pratyāśramaṃ paryaṭantaṃ kālyāśramamupāgatam |
dṛṣṭvā''yāntaṃ bhikṣukaṃ sā samutthāya nanāma ca || 11 ||
[Analyze grammar]

upakaṇṭhaṃ yayau prītyā pādayorapatat satī |
apūjayattathā sarvātīthyasatkāravastubhiḥ || 12 ||
[Analyze grammar]

brahmacārisvarūpaṃ taṃ papraccha kuśalaṃ satī |
kasmādāgamyate vipra kutra sthāne tavā''śramaḥ || 13 ||
[Analyze grammar]

kāṃ diśaṃ parigantā'si viśrāmaṃ kuru cātra vai |
bhikṣuruvāca tīrthebhya āgacchāmyatra tāpasi || 14 ||
[Analyze grammar]

vārāṇasyāṃ nivāso me yāsye pṛthūdakasthalam |
mayā snāta prayāge ca kubjāmre caṇḍikeśvare || 15 ||
[Analyze grammar]

banghuvṛnde kurukṣetre haridvāre kanakkhale |
kedāre badarīkuṇḍe tato'bhyāgāṃ tavāśramam || 16 ||
[Analyze grammar]

atra tīrthavidhiṃ kṛtvā gamiṣyāmi pṛthūdakam |
ahamicchābhigāmī ca tapasvyanyasukhapradaḥ || 17 ||
[Analyze grammar]

niṣkāyayātrākuśalastapasviduḥkhabhaṃjanaḥ |
nirdvandvo'smi mumukṣuśca devānāṃ pūjako'smi ca || 18 ||
[Analyze grammar]

vṛddho'haṃ tapasā''tmānaṃ śoṣayāmi yathocitam |
pṛcchāmi yadahaṃ tvāṃ vai tatra me vaktumarhasi || 19 ||
[Analyze grammar]

kimarthaṃ bhavatī raudraṃ prathamāśramasaṃsthitā |
tapaḥ karoṣi kalyāṇi duḥkhānubhavakāriṇi || 20 ||
[Analyze grammar]

kā tvaṃ kasyā'si tanayā kimarthaṃ vijane vane |
tapaścarasi durdharṣaṃ munibhiścāpi duṣkaram || 21 ||
[Analyze grammar]

na bālā na ca vṛddhā'si taruṇī bhāsi śobhanā |
prauḍhā patiṃ vinā kasmāt tīkṣṇaṃ karoṣi vai tapaḥ || 22 ||
[Analyze grammar]

madhyame vayasi strīṇāṃ saha bhartrā vilāsitā |
subhogā''yojitāḥ kālā vrajanti sthirayauvane || 23 ||
[Analyze grammar]

kiṃ tvaṃ tapasvino bhadrā kasyacitsahacāriṇī |
tapasvī sa na puṣṇāti devi tvāṃ sa gato'nyataḥ || 24 ||
[Analyze grammar]

vada kasya kule jātā kaḥ pitā tava kā vidhā |
mahāsaubhāgyapātraṃ tvaṃ kathaṃ te'sti taporatiḥ || 25 ||
[Analyze grammar]

kiṃ tvaṃ vedaprasūrlakṣmīḥ kiṃ ramā kiṃ sarasvatī |
manye rūpajanaiśvaryasmṛddhimatī bhavatyapi || 26 ||
[Analyze grammar]

tatkimarthamapāsyaitānalaṃkārān jaṭā dhṛtāḥ |
cīnāṃśukaṃ parityajya kathaṃ vai valkalaṃ dhṛtam || 27 ||
[Analyze grammar]

kasya kimarthe kā ceti yogyo'smi vinivedaya |
śrutvaivaṃ prāha viprendraṃ pārvatī himavatsutā || 28 ||
[Analyze grammar]

śaṃkarārthaṃ tapaḥ kurve patiṃ vindāmi śaṃkaram |
purā dakṣasutā yogamayī tvāsaṃ satī tataḥ || 29 ||
[Analyze grammar]

dagdhadehā śailaputrī jātā'smyadya kumārikā |
tapasyataścātra śaṃbhoḥ sevāyāṃ saṃsthitā'bhavam || 30 ||
[Analyze grammar]

māṃ tyaktvā bhasmasātkṛtvā manmathaṃ sa jagāma ha |
ahaṃ tu tapase cā'trā''yātā'pyaprāpya śaṃkaram || 31 ||
[Analyze grammar]

tapo'nte'gnau vivikṣantī tvāṃ dṛṣṭvā saṃsthitā kṣaṇam |
gaccha tvaṃ praviśāmyagnau janmāntare śivārthinī || 32 ||
[Analyze grammar]

ityuktvā pārvatī vahnau tatpuraḥ praviveśa hi |
babhūva tatkṣaṇe vahniḥ śītaścandanapaṃkavat || 33 ||
[Analyze grammar]

atha kṣaṇāntare vahnerutthāya vyomavartmanā |
samutpatantīmākāśaṃ papraccha vihasan dvijaḥ || 34 ||
[Analyze grammar]

aho tavātitapasaḥ pratāpo vartate mahān |
yadbalādanalo'pi tvāṃ na dadāha suśītalaḥ || 35 ||
[Analyze grammar]

vada devi yathāsatyaṃ kariṣye te manoratham |
kamicchasi varaṃ subhru mā gopyaṃ vai manāgapi || 36 ||
[Analyze grammar]

tvayi sarvaṃ tu sāmarthyaṃ cā'sti kiṃ tapasā tava |
ratnaṃ haste prasaṃprāpya vyarthaṃ kācaṃ kimicchasi || 37 ||
[Analyze grammar]

īdṛśaṃ rūpasaundaryaṃ kathaṃ vyarthaṃ prayāpitam |
hitvā bhūṣāmbarapuṣpadravyāṇi valkalaṃ dhṛtam || 38 ||
[Analyze grammar]

gṛhaṃ tyaktvā vanaṃ labdhaṃ vāsāya duḥkhadaṃ sadā |
vada devi sukhaṃ syānme kariṣye tu hitaṃ tava || 39 ||
[Analyze grammar]

śrutvaitadvijayāṃ vaktuṃ sakhīṃ prairayatā'mbikā |
vijayā''ha vṛddhavipra suteyaṃ himabhūbhṛtaḥ || 40 ||
[Analyze grammar]

nāmnāsti pārvatī kālī varaṃ śaṃkaramicchati |
ūḍheyaṃ na ca kenāpi kumāryevāsti me sakhī || 41 ||
[Analyze grammar]

pañcavarṣasahasrāṇi tapasyasyā gatāni vai |
tathāpi daivaputrītvāt ṣoḍaśābdā hi dṛśyate || 42 ||
[Analyze grammar]

nahi devasujātīnāṃ varṣairhrāso'sti varṣmasu |
koṭivarṣāyuṣāṃ teṣāṃ rūpaṃ vai ṣoḍaśābdikam || 43 ||
[Analyze grammar]

sarvadā susthiraṃ cāsti na jarā palitāni na |
seyaṃ hitvā mahendrādīn viṣṇuṃ hitvā ca vedhasam || 44 ||
[Analyze grammar]

patiṃ tu śaṃkaraṃ labdhumabhivāṃcchati pārvatī |
anayā''ropitā vṛkṣāḥ phalapuṣpasamṛddhayaḥ || 45 ||
[Analyze grammar]

śaṃkarārhaṇayogyāste kṛtāḥ santi hṛdā sadā |
sarvaṃ samarpaṇaṃ kṛtvā sadā tapasi tiṣṭhati || 46 ||
[Analyze grammar]

āgacchedvā na cāgacchet sātu śarve'rpitāsti vai |
iti mayā ca te khyātaṃ pārvatyā mānasaṃ vṛtam || 47 ||
[Analyze grammar]

jaṭilo'pi hasan prāha sakhyukte viśvasīmi na |
yathārthaṃ cet navai hāsaḥ svamukhenābhibhāṣatām || 48 ||
[Analyze grammar]

pārvatī manasi jñātvā śaṃbhusambandhinaṃ janam |
prasannamānasā'vocat sakhyuktaṃ tattathaiva yat || 49 ||
[Analyze grammar]

manasā vacasā kṛtyā vṛto vai śaṃkaro mayā |
jānāmi durlabhaṃ śaṃbhuṃ matvā sulabhameva tam || 50 ||
[Analyze grammar]

karomi tapa ājanma viśvāso'pi tathāsti me |
bāhyato na miledvāpi hyāntare milito'sti saḥ || 51 ||
[Analyze grammar]

aho'sti me mahadbhāgyaṃ saptarṣīṇāṃ tu darśanam |
vṛddhabrāhmaṇadevasya darśanaṃ śivagarbhitam || 52 ||
[Analyze grammar]

prāptaṃ me'tra vane ghore tatrāpi śailaśṛṃgake |
tanme manorathavṛkṣa ārtavaṃ bhāvamāptavān || 53 ||
[Analyze grammar]

jānātu vā na jānātu sa udāsīna īśvaraḥ |
jānāmyahaṃ kṛpāleśaḥ prerito'sti dayālunā || 54 ||
[Analyze grammar]

brāhmaṇo'sya mukhamāsīdvipro vaktīti tanmukham |
vaktītyevahi jānāmi gūḍho'sti śaṃkarastvayi || 55 ||
[Analyze grammar]

tasmai cārpyaḥ praṇāmo me saṃyujya tatpade śiraḥ |
yathā'haṃ te caraṇayoḥ saṃyujya mastakaṃ natā || 16 ||
[Analyze grammar]

vipraḥ prāha ca tacchrutvā śṛṇu kanye harapriye |
yogyaṃ subhrū yathāyogyaṃ sarvaṃ vadasi suvrate || 57 ||
[Analyze grammar]

jānāmyahaṃ mahādevaṃ sāvadhānatayā śṛṇu |
kvacinnagnaḥ kvacidvyāghragajacarmadharo haraḥ || 58 ||
[Analyze grammar]

vṛṣadhvajo bhasmadigdho jaṭājūthavirūpakaḥ |
kapālāsthikarakaṇṭhaḥ sapairgātreṣu veṣṭitaḥ || 59 ||
[Analyze grammar]

viṣabhakṣo'bhakṣyabhakṣo virūpākṣo'sti sarvathā |
ajñātagṛhajanmādirgṛhabhogādivaṃcitaḥ || 60 ||
[Analyze grammar]

daśahasto bhūtagaṇaiḥ sevito malino'sukhī |
krūraḥ saṃhārakṛt prokto dakṣayajñādināśakaḥ || 61 ||
[Analyze grammar]

yasya gṛhe na vai saukhyaṃ kleśaḥ kleśo hi vartate |
tādṛśaṃ tvaṭamānaṃ taṃ kathamicchasi bhāmini || 62 ||
[Analyze grammar]

tvaṃ strīratnaṃ tava pitā rājā nikhilabhūbhṛtām |
tathāvidhaṃ patiṃ kasmādugreṇa tapasehase || 63 ||
[Analyze grammar]

datvā suvarṇamudrāṃ ca grahītuṃ kācamicchasi |
hitvā tu candanaṃ śreṣṭhaṃ kardamaṃ leptumicchasi || 64 ||
[Analyze grammar]

sūryatejaḥ parityajya khadyotadyutimicchasi |
cīnāṃśukaṃ parityajya carmavalkalamicchasi || 65 ||
[Analyze grammar]

saudhavāsaṃ vihāyaiva kuvāsaṃ ca samicchasi |
ratnaśevadhimutsṛjya kṛṣṇāṃgāraṃ samicchasi || 66 ||
[Analyze grammar]

nṛpālānsaṃparityajya gopālaṃ tvaṃ samicchasi |
lokapālān vihāyaiva bhūtapālaṃ kiṃmicchasi || 67 ||
[Analyze grammar]

naitad yogyaṃ tu me bhāti viruddhaṃ tava dṛśyate |
kā tvaṃ kamalapatrākṣī kvā'sau vahnivilocanaḥ || 68 ||
[Analyze grammar]

śaśāṃkavadanā kā tvaṃ kvā'sau paṃcā'nalānanaḥ |
śiroveṇīmatī kā tvaṃ kva jaṭājūṭamastakaḥ || 69 ||
[Analyze grammar]

kva tvaṃ candanayogyāṃgā kva citābhasmalepanaḥ |
kva mṛdusnigdhasadvastrā kva vyāghragajavastrakaḥ || 70 ||
[Analyze grammar]

svarṇabhūṣaṇayogyā kva kva krūrasarpaśekharaḥ |
kva ṛṣyannapriyā devī kva bhūtabalisupriyaḥ || 71 ||
[Analyze grammar]

kva tantrīmiṣṭavādaśca kva taḍḍamaruḍḍuhḍḍaṃhaḥ |
kva te kaṇṭhasya mādhuryaṃ kva vṛṣabhasvaraḥ kharaḥ || 72 ||
[Analyze grammar]

kva te sthalābjamṛdutā kvā'sya rūkṣakharaspṛśiḥ |
nā'sya dravyaṃ manāgasti prāpyate nāpi cāmbaram || 73 ||
[Analyze grammar]

nāsya smṛddhirmanāgasti balīvardoragau vinā |
nā'sya satsevakāḥ santi nagnān bhūtādikān vinā || 74 ||
[Analyze grammar]

nā'sya saumyā janāḥ santi bhairavavīrakān vinā |
nāsya bhojyaṃ miṣṭamasti bhaṃgāgṛṃjaviṣaṃ vinā || 75 ||
[Analyze grammar]

tāmbūlaṃ nā''nane tvasya dhattūragaralaṃ vinā |
nā'sya puṣpamayī mālā pretakapālikāṃ vinā || 76 ||
[Analyze grammar]

nāsya haste mṛdulaṃ vai vinā triśūlaloṣṭhakam |
nā'sya cauṣṭhe premaraso vinā saṃhāraniṣṭhurām || 77 ||
[Analyze grammar]

nā'sya pārśvaṃ komalāṃgaṃ kāṣṭhapāvaṭikāṃ vinā |
nā'sya bimbaṃ suvarṇābhaṃ kṛṣṇabhasmādikaṃ vinā || 78 ||
[Analyze grammar]

nāsya guptaṃ bhavedvā na kartitaṃ brāhmaṇaiḥ purā |
pumānvā'yaṃ tṛtīyaḥ syāt strīrūpo bhāti naiva ca || 79 ||
[Analyze grammar]

tasya nāsti prasannā strīḥ tṛtīyaprakṛtirbhavet |
tṛtīyaprakṛtiguptyai kāmo'nena hi bhasmitaḥ || 80 ||
[Analyze grammar]

anādarastadā te vai kṛto hitvā'nyato gataḥ |
tasyodare mahāṇḍāni bhavanti kākapakṣivat || 81 ||
[Analyze grammar]

tasyā'ṇḍavṛddhi rogo'sti jñātaṃ nāsti tvayā tu tat |
mahārātrāvapi māyāṃ svapituṃ na dadāti saḥ || 82 ||
[Analyze grammar]

patnīto'pi viśeṣeṇa bhuṃkte duḥkhākaroti saḥ |
tādṛśā'palakṣaṇo'sti tvāṃ tu duḥkhā kariṣyati || 83 ||
[Analyze grammar]

sati tyajā'sya nāmā'pi śivo'pitvaśivaḥ sadā |
jātirnāsti kulaṃ nāsti mātā nāsti kutaḥ pitā || 84 ||
[Analyze grammar]

jñānaṃ saujanyamāstikyaṃ nāsti kiṃciddhi śaṃkare |
śarīre dṛśyate rakṣā kaṇṭhe sandṛśyate viṣam || 85 ||
[Analyze grammar]

āntare dṛśyate krodho rāgaleśo'pi nāsti vai |
dveṣa eva dhṛtastena yena saṃharate prajāḥ || 86 ||
[Analyze grammar]

kva hārayogyaṃ vakṣaste kva tasya muṇḍaghaṭṭitam |
kvāṃ'garāgaśca saundaryaṃ kva rakṣādhūlikā'ñcitam || 87 ||
[Analyze grammar]

mahyaṃ na rocate tadvai yathecchasi tathā kuru |
asadvastu tu yatkiṃcit tat sarvaṃ rocate tava || 88 ||
[Analyze grammar]

manye kenā'bhicāreṇa mantreṇaiva vibhrāmitam |
yadvā pūrvā'rjitā'dṛṣṭabalenaivaṃ vighaṭṭitam || 89 ||
[Analyze grammar]

anyathā tvaṃ kathaṃ dṛṣṭvā khāte patitumicchasi |
gacchāmyahaṃ mahādevi yathecchasi tathā kuru || 90 ||
[Analyze grammar]

pārvatī prāha taṃ vipraṃ matvā śivasya nindakam |
gaccha gacchasi ced vipra kutaḥ pādo'tra te'spṛśat || 91 ||
[Analyze grammar]

nindakasyā'pavitrasya pādo'pi puṇyanāśakaḥ |
śivo vā'pyathavā bhīmaḥ sadhano nirdhano'pi vā || 92 ||
[Analyze grammar]

nā'laṃkṛto'laṃkṛto vā yādṛśastādṛśaśca vā |
amaṃgalo maṃgalo vā saumyo rūkṣo jaḍo'pi vā || 93 ||
[Analyze grammar]

asmṛddho yānahīno vā viṣākto'viṣayo'pi vā |
durguṇo nirguṇo vāpi saguṇo viguṇo'pi vā || 94 ||
[Analyze grammar]

durgandho vā sugandho vā nirgandho vā kapālavān |
vivastro vā savastro vā dhūlībhasmādivastrakaḥ || 95 ||
[Analyze grammar]

saliṃgo vāpyaliṃgo vā tṛtīyaprakṛtiśca vā |
kāmārirbahukāmo vā niṣkāmo vā nirīhakaḥ || 16 ||
[Analyze grammar]

bhasmāḍhyo vā ca carmāḍhyo bhūtāḍyo ḍamarūyutaḥ |
vṛṣāḍhyo rūkṣadeho vā dravyahīnaśca soragaḥ || 97 ||
[Analyze grammar]

bhaṃgāgṛṃjanadhattūragaralādiyuto'pi vā |
satriśūlo'thavā nārīcihno vāpi mahā'ṇḍakaḥ || 98 ||
[Analyze grammar]

akulo'jātipitṛko mārako rakṣako'pi vā |
jaḍo vā cetano vāpi stambo grāvāṇa eva vā || 99 ||
[Analyze grammar]

sa eva me patiścāsti sṛṣṭau sṛṣṭyantare'pi ca |
yuge yugāntare cāpi cātra janmāntare'pi vā || 100 ||
[Analyze grammar]

sa eva me patirbhūto vartate ca bhaviṣyati |
bahuvāramahaṃ jātā adhavā sadhavāpi ca || 101 ||
[Analyze grammar]

mahālaye'dhavā cāhaṃ sṛṣṭau tu sadhavā sadā |
kā cintā te mamā'saukhye gaccha vipra yathāsukham || 102 ||
[Analyze grammar]

na te lābho mama saukhye duḥkhe naiva ca bhāgavān |
vṛthā nindasi śaṃbhuṃ māṃ tapaścā''śīviṣo bhavan || 103 ||
[Analyze grammar]

etāvaddhi mayā jñāto bhavān yātrālurāgatāḥ |
tāpaso hitakartā ca na jñāto viparītakṛt || 104 ||
[Analyze grammar]

ajñātvā nindasi śaṃbhuṃ sakalaiśvaryabhājanam |
svecārī bhavatyeva kvacit tvādṛśaveṣavān || 105 ||
[Analyze grammar]

chalī balī vihārī ca brahmacārī pratārakaḥ |
bahurūpo vanavāsī bhavatyaparatantrakaḥ || 106 ||
[Analyze grammar]

nirguṇo'pi līlayā saḥ kvacitsaguṇatāṃ bhajet |
sadvitīyasya jātiḥ syānaikasmin jātirasti vai || 107 ||
[Analyze grammar]

vyakterabhedo jātitve sarvathā bādhako'sti hi |
jñānā''nandasvarūpasya kiṃ jñānādyarjanena vai || 108 ||
[Analyze grammar]

guṇe guṇā'navasthānāt jñāne jñānaṃ kimiṣyate |
jñānaṃ ca jñānavān so'sti nityajñānāśrayo'sti saḥ || 109 ||
[Analyze grammar]

sūryakriyākṛtavayo'vasthāḥ sūryakṛtaḥ katham |
karmakṛtaṃ saligādi brahmaṇo'karmaṇaḥ katham || 110 ||
[Analyze grammar]

jñānakriyāsamīhāśca tisrastajjā hi śaktayaḥ |
tasmiṃstu brahmaṇi nātipravartante hyaśaktike || 111 ||
[Analyze grammar]

tatkṛpābhiḥ smṛddhayaścā'smṛddhayaḥ syustato'nyathā |
kiṃ tasya smṛddhyasmṛddhyādi satyasaṃkalpinaḥ sadā || 112 ||
[Analyze grammar]

devā devatvamāpannā yatkṛpāleśataḥ khalu |
divyatve vā malinatve kiṃ tasyā'sti prayojanam || 113 ||
[Analyze grammar]

lokapālāḥ sadā yasya dvāri tiṣṭhanti kiṃkarāḥ |
kiṃ tasya narapālatve gopālatve'tha vā spṛhā || 114 ||
[Analyze grammar]

bhālacakṣustriśūlaṃ vā paripūrṇaṃ mahālaye |
kiṃ tasyābhijanavrāternityasya janakena kim || 115 ||
[Analyze grammar]

sadā śuddhasya kiṃ bāhyairaśuddhaiḥ śucibhiśca kim |
vijarasya vimṛtyoścā'pipāsasyā'kṣudhasya ca || 116 ||
[Analyze grammar]

satyakāmasya ca satyasaṃkalpasyā'sti kiṃ gṛhaiḥ |
kimambarairvastubhiḥ kiṃ kalyāṇaguṇaśālinaḥ || 117 ||
[Analyze grammar]

siddhayo'ṣṭau yadagāre luṭhanti dhūlikāmaye |
kā tatra me'tigaṇanā yoginīkoṭisaṃkule || 118 ||
[Analyze grammar]

amaṃgalānyapi yānti māṃgalyaṃ yatpadāśrayāt |
kā tatra gaṇanā cā'styamaṃgalārthavicāriṇām || 119 ||
[Analyze grammar]

dāridryarekhayā vyāpto yatsevābhiḥ samāḍhyakaḥ |
kā tatra gaṇanā cāsti niṣparigrahaprakṛteḥ || 120 ||
[Analyze grammar]

yasyā'rhaṇena trailokyarājyasmṛddhiḥ phalaṃ bhavet |
kutastasya samīhā syānnirīhasya mahātmanaḥ || 121 ||
[Analyze grammar]

śiveti nāmajapanāt pūtā bhavanti cetanāḥ |
kimasyā'śivabhasmādi kariṣyati surārthitam || 122 ||
[Analyze grammar]

śivanindāṃ yaḥ karoti tattvamajñāya karmakṛt |
ājanma saṃcitaṃ puṇyaṃ bhasmībhavati tasya vai || 123 ||
[Analyze grammar]

yathā tathā bhavedrudraḥ pāṣāṇaḥ kiṃ na vā bhavet |
mamā'bhīṣṭatamo rudraḥ karomi tatkṛtaṃ tapaḥ || 124 ||
[Analyze grammar]

gaccha cāsmatsthalācchīghraṃ mā kuru śivanindanam |
śrutvaitad brāhmaṇaḥ kiṃcit prativaktuṃ samicchati || 125 ||
[Analyze grammar]

pārvatī prāha vijayāṃ vārayainaṃ vinindakam |
vakturyathā tathā śrotuḥ pāpaṃ drohasya jāyate || 126 ||
[Analyze grammar]

śrotavyo naiva cāsmābhirdroho devasya sarvathā |
nā'yaṃ gacchati duṣṭo'taḥ sthānāt nindāṃ kariṣyati || 127 ||
[Analyze grammar]

hitvaitatsthalamadyaiva yāsyāmo'nyatra mā ciram |
atha saṃbhāṣaṇaṃ na syādanena nindakena vai || 128 ||
[Analyze grammar]

ityuktvā pārvatī yāvadutthāyā'nyasthalaṃ prati |
gantuṃ pādakramaṃ dhatte tāvadbhikṣuḥ śivo'bhavat || 129 ||
[Analyze grammar]

surūpaḥ sundaraḥ saumyo yuvā ṣoḍaśahāyanaḥ |
puṣṭaḥ piśaṃgasvarṇābhasujaṭo bhālacandrakaḥ || 130 ||
[Analyze grammar]

satriśūlaḥ savāsukiḥ kṛttivāso'timohanaḥ |
koṭikandarpalāvaṇyastejoparidhivigrahaḥ || 131 ||
[Analyze grammar]

etādṛśaṃ nijaṃ rūpaṃ satīpratītikāraṇam |
satyā pūrvaṃ sevitaṃ yadanubhūtaṃ bhavāntare || 132 ||
[Analyze grammar]

pārvatyai darśayitvā tāmuvācā'dhomukhāṃ śivaḥ |
mā yāhyanyatra kalyāṇi paśya me rūpamaiśvaram || 133 ||
[Analyze grammar]

śikharaṃ tvāvayoścaitad gaurīśaṃkaranāmakam |
yacceha rudramīhantyā mṛnmayaśceśvaraḥ kṛtaḥ || 134 ||
[Analyze grammar]

gaurībhadreśvaraśceti loke khyātiṃ gamiṣyati |
tvaṃ na tyajasi māṃ devi na ca tyājyā mayā punaḥ || 135 ||
[Analyze grammar]

prasanno'smi varaṃ brūhi nā'deyaṃ vidyate tava |
adyā''rabhya dhanaṃ te'smi krīto'smi tapasā tvayā || 136 ||
[Analyze grammar]

atha pakṣī matā me'si saṃkocaṃ tyaja sundari |
mayā parīkṣitā cāti kṣamasva tāpasi priye || 137 ||
[Analyze grammar]

na tvādṛśī dṛḍhā nārī dṛṣṭā niḥsvārthatāpasī |
tavātmāsmi tavādhīnaḥ svakāmaḥ pūryatāṃ priye || 138 ||
[Analyze grammar]

ehi priye sakāśaṃ me tiṣṭha meṃ'ke kṣaṇaṃ tataḥ |
yāsyāvaste pituḥ saudhaṃ vivāhavidhilabdhaye || 139 ||
[Analyze grammar]

ityādṛtā satī śīghraṃ harāṃke niṣasāda sā |
patyarpitā pramuditā tapaḥkaṣṭaṃ jahau satī || 140 ||
[Analyze grammar]

phale labdhe śramaḥ pūrvo naśyatyatipurātanaḥ |
pratyuvāca mahāsādhvī harāṃkasukhasāgarā || 141 ||
[Analyze grammar]

atīva sukhitā cātiprītyutphullānanā śivā |
sukhātipulakitāṃgā navā''nandapariplutā || 142 ||
[Analyze grammar]

tvaṃ nātho mama deveśa tvayā kiṃ vismṛtaṃ purā |
gārhasthyaduḥkhamāptena kiṃ vairāgyaṃ dhṛtaṃ tvayā || 143 ||
[Analyze grammar]

dakṣayajñavināśaṃ vā vicārya ca satīhaṭham |
gārhasthyaṃ duḥkhadaṃ matvā kiṃ vairāgyaṃ dhṛtaṃ tvayā || 144 ||
[Analyze grammar]

nārīgrahe nāryadhīnaṃ narasya yāti jīvanam |
parādhīnāmitijñātvā kiṃ vairāgyaṃ dhṛtaṃ tvayā || 145 ||
[Analyze grammar]

nārīyogād brahmayogaḥ khaṇḍito jāyate yateḥ |
tenā'mokṣa iti matvā kiṃ vairāgyaṃ dhṛtaṃ tvayā || 146 ||
[Analyze grammar]

nāryā'patyādivistāro jāyate gṛhamedhinaḥ |
kaṣṭaṃ tatpoṣaṇaṃ matvā kiṃ vairāgyaṃ dhṛtaṃ tvayā || 147 ||
[Analyze grammar]

patnīyogena sambandho laukiko vardhate sadā |
jhaṃjhāvātaṃ ca taṃ jñātvā kiṃ vairāgyaṃ dhṛtaṃ tvayā || 148 ||
[Analyze grammar]

dhyānakāle praśāntau ca nidrāyāṃ cātmacintane |
nārī vighnamiti jñātvā na smṛtā'haṃ tvayā nu kim || 149 ||
[Analyze grammar]

na jāne brahmarūpasya lakṣakālaḥ kṣaṇāyate |
jānāmi svārthacittāyāḥ kṣaṇakālo yugāyate || 150 ||
[Analyze grammar]

kathaṃ kālo mayā nītaḥ paṃcavarṣasahasrakaḥ |
vinā patiṃ priyaṃ prāṇamityuktvā'śrūṇyapātayat || 151 ||
[Analyze grammar]

prāha śāntiṃ punarlabdhvā sa tvaṃ sā'haṃ satī purā |
menāputrī bhavāmyadya patirbhava vacaḥ kuru || 152 ||
[Analyze grammar]

śrutvā śaṃbhuḥ kṣaṇaṃ mlāno bhūtvā'bhūd vigatajvaraḥ |
satyāḥ śiraḥ karābhyāṃ saṃpramṛtyā''śliṣya cā''nanam || 153 ||
[Analyze grammar]

cucumba smaraṇārthaṃ tadduḥkhavismaraṇāya ca |
prāha devīṃ priye gaccha svameva bhavanaṃ pituḥ || 154 ||
[Analyze grammar]

tavārthāya praheṣyāmi maharṣīn himavadgṛhe |
omityājñāṃ samādāya prāha prānte ca pārvatī || 155 ||
[Analyze grammar]

bhikṣurbhūtvā samāyāhi māṃ yācasva himālayāt |
piturme saphalaṃ sarvaṃ kuruṣveva gṛhāśramam || 156 ||
[Analyze grammar]

ṛṣiproktaṃ pitā me tu satvaraṃ saṃvidhāsyati |
dakṣakanyā yadā deva tvayā vivāhitā tadā || 157 ||
[Analyze grammar]

vidhau vyu्tkramadoṣeṇa grahadoṣeṇa bhasmitā |
tasmāt yathoktavidhinā vivāhaṃ kartumarhasi || 158 ||
[Analyze grammar]

bahuvidhyutsavapūrvaṃ vivāhaṃ kuru śaṃkara |
sarvarītirvivāhasya kartavyā paripūrṇataḥ || 159 ||
[Analyze grammar]

caturdaśabhuvanasthā janavāhā bhavantu vai |
jānātu himavān samyak jānantu bhuvaneśvarāḥ || 160 ||
[Analyze grammar]

carā'caraṃ prajānātu pārvatyā'pi kṛtaṃ tapaḥ |
yādṛśaḥ prāpaṇe yatno bhāvyastādṛṅmahotsavaḥ || 161 ||
[Analyze grammar]

sṛṣṭau sṛṣṭyantare gāthāṃ pragāyeyurjanā yathā |
pārvatyā tapasā labdho'nālabdho yo maharṣibhiḥ || 162 ||
[Analyze grammar]

pārvatyā tu haṭhāt krīto na krīto vedavādibhiḥ |
sākṣāllabdhaḥ sa pārvatyā na labdho yastu sādhubhiḥ || 163 ||
[Analyze grammar]

pārvatyā svāṃgaṇe labdho na labdhastīrthayāyibhiḥ |
premṇā labdhaḥ sa pārvatyā na labdho yogibhiśca yaḥ || 164 ||
[Analyze grammar]

pārvatyā vidhinā labdhaḥ na labdho yājñikairapi |
pārvatyā parvate labdho na labdhaḥ svargasādhanaiḥ || 169 ||
[Analyze grammar]

pārvatyā vakṣasi prāpto na prāpto hṛtsamādhibhiḥ |
pārvatyā sa kṣaṇāllabdho na labdho vedhasā yugāt || 166 ||
[Analyze grammar]

pārvatyā sa punarlabdho'pyapunarbhavalakṣaṇaḥ |
iti gāsyanti dhavalaṃ yaśo mokṣapradaṃ śivam || 167 ||
[Analyze grammar]

iti yāsyanti paramaṃ sādhanaṃ cāpi mokṣadam |
vivāhasya vidhirloke pravartsyate yathā''vayoḥ || 168 ||
[Analyze grammar]

śrutvā priyāyāḥ priyakṛt samuvāca pratipriyam |
gaccha devi sumāṃgalyaṃ drāk vidhehi yathocitam || 169 ||
[Analyze grammar]

ahaṃ svayaṃ na vai pūrvaṃ gacchāmi bhikṣuko yathā |
mahāguṇairgariṣṭho'pi mahātmā yadi bhikṣukaḥ || 170 ||
[Analyze grammar]

dehīti vacanāt sadyaḥ puruṣo yāti lāghavam |
tatastvāṃ bhikṣuko bhūtvā na yāceya kathaṃcana || 171 ||
[Analyze grammar]

kintu saptarṣayaḥ preṣyā mayā pūrvaṃ tvadarthakam |
vākdānanirṇayaṃ kuryustato yāsyāmi te gṛham || 172 ||
[Analyze grammar]

tava tapaḥprabhāveṇa yāciṣye tvāṃ pitustava |
ityuktvā pārvatīmukhā''śleṣaṃ vidhāya śaṃkaraḥ || 173 ||
[Analyze grammar]

vijayāyai jayāyai ca karau datvā tu mastake |
tatkṛtā praṇatiṃ labdhvā prāgevā'dṛśyatāṃ gataḥ || 174 ||
[Analyze grammar]

kailāsaṃ prayayau vṛttaṃ nandyādibhyaḥ sa ūcivān |
bhairavādyā gaṇāḥ śrutvā cakrustatra mahotsavam || 175 ||
[Analyze grammar]

kṛtvā samāptiṃ tapaso'bhivandya vanacetanān |
sasakhī pārvatī hṛṣṭā jagāma bhavanaṃ pituḥ || 176 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne saptarṣibhiḥ pārvatyāḥ prāṇaglahatapaḥ śaṃkarāya niveditam vṛddhajaṭilavipraveṣeṇa śaṃkarasya pārvatīṃ pratyāgamanam śaṃbhoraguṇaviguṇādivarṇanampārvatyāḥ śaṃbhoḥ sarvasadguṇaparatāgrāhyatvam śaṃbhunā svasvarūpeṇa darśanam parasparaṃ sukhavārtālāpaḥ vivāhārthaṃ nirṇayavacanaṃ tapaḥsamāptiścetyādinirūpaṇanāmā saptāśītyadhikaśatatamo'dhyāyaḥ || 187 ||
[Analyze grammar]