Chapter 181

śrīnārāyaṇa uvāca |
ekadā nārado devo yāyāddhimagirergṛham |
cakāra śailo devarṣeḥ saparyāṃ bahubhāvataḥ || 1 ||
[Analyze grammar]

nāradāṃ'ghryoḥ svatanayāṃ pāvitryārthamapātayat |
prāha ca matsutābhāgyaṃ brūhi devarṣisattama || 2 ||
[Analyze grammar]

nāradastatsutāhastaṃ sarvāṃgāni viśeṣataḥ |
dṛṣṭvā'vocadgire kanyā pitroḥ prītivivardhinī || 3 ||
[Analyze grammar]

svapateḥ sukhadā'tyantaṃ mahāsādhvī pativratā |
bhaviṣyati mahādivya mahārājñīva pūjitā || 4 ||
[Analyze grammar]

aṃguṣṭhamadhyasandhau ca rekhayā hīśvarī bhavet |
haste hastidhvajapadmaśūlarekhābhirīśvarī || 5 ||
[Analyze grammar]

kare cihnaṃ mahaccihnaṃ rājñī saiṣā bhaviṣyati |
lalāṭe candracihne yamīśapatnī bhaviṣyati || 6 ||
[Analyze grammar]

kare'syāḥ svastikaṃ cihnaṃ kārye vijayinī bhavet |
netre karṇāntalagne'syā brāhmī kācitpareśvarī || 7 ||
[Analyze grammar]

hṛdaye cāsya śaṃbhurvai dhavalāṃkamayo'sti vai |
yataḥ śaktirmahādevī bhaviṣyatyeva bhūdhara || 8 ||
[Analyze grammar]

udare'dhobāṇarekhā pūjyā devī bhaviṣyati |
caraṇe'syā nāgavallī devapatnī bhaveddhruvam || 9 ||
[Analyze grammar]

ekā vilakṣaṇā rekhā hyaṃguṣṭhopari vartate |
lalāṭe ca tathā rekhā vartate tatsahārthikā || 10 ||
[Analyze grammar]

tayoḥ phalaṃ śṛṇu śaila bhavedvā na bhavettathā |
tyāgī nagno guṇahīno mātṛtātavivarjitaḥ || 11 ||
[Analyze grammar]

akāmo'śivaveṣaśca patirasyā bhavediti |
menāhimālayau śrutvā kṣaṇaṃ duḥkhamavāpatuḥ || 12 ||
[Analyze grammar]

pūrvāṃ śivasmṛtiṃ labdhvā sukhamatyantamāpatuḥ |
pārvatī tu vacaḥ śrutvā jaharṣā'ti muhurhṛdi || 13 ||
[Analyze grammar]

daivarekhā brahmalipirna mṛṣā jāyate kvacit |
tādṛśo'sti varaḥ śaṃbhurnānyo'sti tādṛśaḥ patiḥ || 14 ||
[Analyze grammar]

iti matvā śailaputrī smaratyaharniśaṃ haram |
nāradaḥ satkṛtiṃ labdhvā gacchanvai śivamandiram || 15 ||
[Analyze grammar]

smārayāmāsa śailendraṃ satīṃ prati haroditam |
na tvāmṛte'nyāṃ varaye dākṣāyaṇi sati priye || 16 ||
[Analyze grammar]

bhāryārthaṃ na grahīṣyāmi satyametadbravīmi te |
iti śarvavacaḥ śailaṃ smārayitvā''ha nāradaḥ || 17 ||
[Analyze grammar]

siṃhāsanaṃ tava putryāḥ śaṃbhorūrau bhaviṣyati |
śaṃbhorūrvāsanaṃ prāpya mahārājñī bhaviṣyati || 18 ||
[Analyze grammar]

ityuktvā sa gato brahmalokaṃ devarṣināradaḥ |
putrīṃ bālāṃ ca pitarau ramayāmāsatuḥ sadā || 19 ||
[Analyze grammar]

vivardhamānā girijā vivāhārhasuyauvanā |
samabhavat tadā cendraḥ sasmāra nāradaṃ punaḥ || 20 ||
[Analyze grammar]

sa tu drāgeva samagāt mahendrabhavanaṃ muniḥ |
indra utthāya pādyādyaiḥ pūjayāmāsa nāradam || 21 ||
[Analyze grammar]

prāha vai kuśalaṃ svasya jñātavānnāradasya ca |
kathaṃ smṛto'hamityukto mahendraḥ prāha nāradam || 22 ||
[Analyze grammar]

yuvatī śailajā jātā yogaṃ yāyācca śaṃbhunā |
śīghraṃ tathodyamaḥ kāryaḥ sarvaṃ tādṛgvidhīyatām || 23 ||
[Analyze grammar]

śrutvā tu nāradaḥ śīghraṃ jagāma śailaketanam |
vṛddhaviprasvarūpeṇa jyotiḥpatraṃ kare dadhan || 24 ||
[Analyze grammar]

śailārpitāsane ramye niṣasādātha bhūsuraḥ |
śailārpitā'rhaṇāṃ saṃgṛhyā'vadacchūlakṣṇayā girā || 25 ||
[Analyze grammar]

kuśalaṃ śailarājā'tra tapasaḥ sarvadā kimu |
śailaḥ prāha suvṛddhānāṃ kṛpayā kuśalaṃ mama || 26 ||
[Analyze grammar]

kintu putrī varayogyā jātā'sti vada tatphalam |
tāvanmenā duhitrā'nuyātā''jagāma bhūsuram || 27 ||
[Analyze grammar]

vavande vipracaraṇau menā ca śailaputrikā |
putrīṃ vilokya viprarṣirāśīrbhistāṃ vyavardhayat || 28 ||
[Analyze grammar]

provāca vismitā''syaḥ sa vākyaṃ bhāgyaṃ vilokya ca |
na jāto'syāḥ patirbhadre lakṣaṇaiśca vivarjitā || 29 ||
[Analyze grammar]

uttānahastā nitarāṃ caraṇau vyabhicāriṇau |
svacchāyāṃ ceti bodhyaṃ vai kimanyadvācyamatra vai || 30 ||
[Analyze grammar]

śrutvaitatbhramamāpannaḥ śokamagno himālayaḥ |
pūrvaṃ nāradakathitaṃ vismṛtyovāca bhūsuram || 31 ||
[Analyze grammar]

karmarekhā'tidurgamyā'vaśyaṃbhāvi phalapradā |
janmāntaramanuyāti vicitrabhūtajātiṣu || 32 ||
[Analyze grammar]

striyā virahitā sṛṣṭiḥ prāṇināṃ naiva jāyate |
strījātistu prakṛtyaiva kṛpaṇā dainyabhāginī || 33 ||
[Analyze grammar]

tāsāmavajñā ca mā bhūditi vicārya vedhasā |
daśaputrasamā kanyā vaṃśakṣetramudīritā || 34 ||
[Analyze grammar]

durbhagā kṛpaṇā kanyā piturduḥkhakarī sadā |
tatrāpi patiputrārthasaubhāgyavidhurā'dhikā || 25 ||
[Analyze grammar]

tvaṃ coktavānmama putryā durguṇāneva sarvathā |
aho duḥkhaṃ mahajjātaṃ śrutvā tvanmukhato'dya me || 36 ||
[Analyze grammar]

athāpi kiṃcitsaubhāgyaṃ vārdhakye'syā bhavediti |
tarhyapi vipra vaktavyaṃ duḥkhaṃ mārjaya me'ghajam || 37 ||
[Analyze grammar]

striyastu brahmaṇā sṛṣṭāḥ puruṣāṇāṃ sukhāya vai |
tāsāṃ janma patilābhe sārthakau viphalo'nyathā || 38 ||
[Analyze grammar]

patipitṛkulānāṃ cehā'mutroddhārikāḥ striyaḥ |
satpatiprāptimatyo'troddhārikāḥ kīrtitā hi tāḥ || 39 ||
[Analyze grammar]

durlabhaḥ satpatiḥ strīṇāṃ viguṇo'pi patiḥ kila |
na prāpyate vinā puṇyaiḥ sujaḍo'pi patiḥ striyā || 40 ||
[Analyze grammar]

asādhano'pi saddharmaḥ putraprāptyātmikā ratiḥ |
dhanamājīvanaṃ bhāgyaṃ nāryāḥ kānte pratiṣṭhitam || 41 ||
[Analyze grammar]

nirdhano durmukho mūrkhaḥ sarvalakṣaṇavarjitaḥ |
bhāgyaṃ tu paramaṃ nāryāḥ patireva sadā mataḥ || 42 ||
[Analyze grammar]

yā nārī matsarād dveṣādīrṣyayā vā svabhāvataḥ |
anyaratisukhaṃ hanti tatphalaṃ patihīnatā || 43 ||
[Analyze grammar]

yā'nyakāmasukhaṃ dveṣṭi kāme vighnaṃ karoti ca |
kāmena sukhinornindāṃ karoti nā'pnuyātpatim || 44 ||
[Analyze grammar]

vivāhitā'pi pataye kāmabhikṣāṃ dadāti na |
ratyadātryāḥ kāmukasya patiprāptirhi durlabhā || 45 ||
[Analyze grammar]

bahusaṃcitapuṇyānāṃ phalaṃ kāmasukhādikam |
manuṣyebhyaḥ sadā dattaṃ pāpināṃ tadbhavennahi || 46 ||
[Analyze grammar]

paśavaḥ pakṣiṇaścāpi kāmā''saktā viyojitāḥ |
yayā tasyāḥ kāmasukhaṃ patisukhaṃ na jāyate || 47 ||
[Analyze grammar]

dharmakāmā narā yābhistiraskṛtya tṛṇīkṛtāḥ |
tāsāṃ satkulajanmāpi patyalābhāt tṛṇīkṛtam || 48 ||
[Analyze grammar]

yāsāṃ kāmasukhaṃ nāsti tāsāṃ kāmāgnidagdhatā |
dukhaṃ satatasaṃlagnaṃ taptasūrmī hi sā'tra vai || 49 ||
[Analyze grammar]

kāmā'vighnātmakaṃ dānaṃ nānyaddānaṃ hi vidyate |
trasya puṇyaṃ sadā prāptiḥ satpaterbhavatīti vai || 50 ||
[Analyze grammar]

kāmadānamahatpuṇyaṃ yasyā bhavati saṃcitam |
tasyā mānuṣajanmā'tra bhavati nityakāmadam || 51 ||
[Analyze grammar]

pārāvatacaṭakādyāḥ pakṣiṣu nityakāminaḥ |
prākpradattakāmadānaphalaṃ bodhyaṃ na cānyathā || 52 ||
[Analyze grammar]

paśūnāṃ gomahiṣīṇāṃ kāmanā viralā tu sā |
prāgapradattakāmasya phalaṃ svalpaṃ kṛtaṃ tathā || 53 ||
[Analyze grammar]

vṛkṣeṣvapi narayogājjāyante tu phalāni hi |
vallīṣvapi puṣpayogo phalaṃ naiva ca dṛśyate || 54 ||
[Analyze grammar]

tatsarvaṃ tu pradattasya kāmā'kāmasya vai phalam |
mama putryā kīdṛśaṃ vai kṛtaṃ karma purā bhavet || 55 ||
[Analyze grammar]

yena nā'syāḥ patirjāta ucyate bhūsura tvayā |
etad daurbhāgyamatulamasaṃkhyaduḥkhabhājanam || 56 ||
[Analyze grammar]

kiṃ cottānitahasteyaṃ tvayoktā nityadāṃ hyataḥ |
uttānahastatā bhikṣāṃ yācatāmeva saṃbhavet || 57 ||
[Analyze grammar]

śubhodayānāṃ bhāgyānāmadātārau daridrakau |
succhāyayā'syāścaraṇau tvayoktau vyabhicāriṇau || 58 ||
[Analyze grammar]

tatrāpi śreyasī hyāśā na me'syā vai sudṛśyate |
pūrvaṃ tu nāradenoktaṃ bhūsura śrāvayāmi tat || 59 ||
[Analyze grammar]

tyāgī nagno guṇahīno mātṛtātavivarjitaḥ |
akāmo'śivaveṣaśca patirasyā bhavediti || 60 ||
[Analyze grammar]

tadatra bhrāmaṇe satyaṃ kiyadgrāhyaṃ mayā'nagha |
brūhi jānāsi ced deva duḥkhaṃ me līnatāṃ vrajet || 61 ||
[Analyze grammar]

nārado vṛddhaviprātmā prāha śailaṃ suduḥkhitam |
harṣasthāne tu mahati duḥkhaṃ te bhrāntijaṃ yataḥ || 62 ||
[Analyze grammar]

śṛṇu śaila na jāto'syāḥ svāmī tvajaḥ sadāśivaḥ |
nityaḥ sa śāśvataḥ sthāṇuracalo'sti sanātanaḥ || 63 ||
[Analyze grammar]

anyeṣāṃ karmajanmāno dehā nāsya tathā hyajaḥ |
śṛṇu vai lakṣaṇaireṣā varjiteti vivicyate || 64 ||
[Analyze grammar]

lakṣaṇaṃ karmajanyāṃ'kaṃ cihnaṃ śārīramucyate |
taccā''yurdhanasaubhāgyasampanmṛtipradarśakam || 65 ||
[Analyze grammar]

iyaṃ tu brahmarūpā'sti karmaśūnyā maheśvarī |
nāsyāḥ karmakṛtaṃ dehaṃ lakṣaṇaṃ vidyate iti || 66 ||
[Analyze grammar]

svābhāvikāni daivāni cihnānyasyā bhavanti hi |
śṛṇu cottānakaratāṃ hyuttāno varadaḥ sadā || 67 ||
[Analyze grammar]

hasto'syāśca mahādevyā bhaviṣyatyeva sarvathā |
surā'suramuniprāṇivaradātrī bhaviṣyati || 68 ||
[Analyze grammar]

śṛṇu cāsyāstu caraṇau svacchāyau vyabhicāriṇau |
caraṇau padmasaṃkāśau svacchāvasyā nakhojjvalau || 69 ||
[Analyze grammar]

surāsurāṇāṃ namatāṃ kirīṭamaṇikāntayaḥ |
viśiṣṭā abhitaścāriṇyaḥ praviṣṭā yayorhi tau || 70 ||
[Analyze grammar]

tādṛśau bhavataścāsyāścaraṇau bhāgyasevitau |
śivapatnyāstu kiṃ vastu nyūnaṃ śaila bhaved vada || 71 ||
[Analyze grammar]

pūrvaṃ yaduktaṃ tyāgī ca patirasyā bhaviṣyati |
śivastu sarvadā rāgaśūnyastyāgī mato dhruvam || 72 ||
[Analyze grammar]

nagno'pimāyayā hīno māyāvastravihīnakaḥ |
guṇahīnaśca māyāyā guṇatrayavihīnakaḥ || 73 ||
[Analyze grammar]

parabrahmasvarūpasya na mātā janakastathā |
mātṛtātavihīnatvaṃ śivasya ghaṭate sadā || 74 ||
[Analyze grammar]

akāmaḥ kāmanā gradhnā tṛṣṇā tayā vihīnakaḥ |
aśivastāmaso bhāvaḥ sṛṣṭisaṃhārakārakaḥ || 75 ||
[Analyze grammar]

sa cātra veśarūpeṇa kāryārthaṃ sandhṛtaḥ khalu |
raudraḥ saṃhārako veṣo hyaśivaveṣa ucyate || 76 ||
[Analyze grammar]

citābhasmajaṭājūṭavyāghracarmā'sthidhāraṇam |
aśivaveṣa ityevaṃ loke'pi śaṃkare'sti hi || 77 ||
[Analyze grammar]

sa śaṃbhuḥ svaḥ paraṃbrahmāvatāro bhagavān haraḥ |
patirasyāstava putryā bhāgyodayād bhaviṣyati || 78 ||
[Analyze grammar]

tatropāyaṃ śṛṇu prītyā kṛtvā yaṃ lapsyase sukham |
tatra śaṃbhau lakṣaṇāni śubhānyaśubhavanti vā || 79 ||
[Analyze grammar]

sukhadānyeva bodhyāni sukhamūrtiryato haraḥ |
ravipāvakagaṃgānāṃ tatra grāhyaṃ nidarśanam || 80 ||
[Analyze grammar]

tasmāttvamapi śailendra dehi śivāya kanyakām |
śīghraprasādaḥ sa haro grahīṣyati sutāṃ tava || 81 ||
[Analyze grammar]

śivasya tapasā prāptiḥ kuryāttapaḥ sutā tava |
samartho'pi tava putryā vaśaṃ yāsyati sarvathā || 82 ||
[Analyze grammar]

kulipirapi sulipirbhaviṣyati tapobalāt |
avaśyaṃ bhāvinī patnī tava putrī śivapriyā || 82 ||
[Analyze grammar]

śaṃbhościttaṃ vaśe caiṣā kariṣyati susevayā |
so'pyenāṃ te sutāṃ tyaktvā nānyāmudvāhayiṣyati || 84 ||
[Analyze grammar]

nā'nayoḥ sadṛśī prītiranyayorbhūtabhāvinī |
anayormelane devakāryāṇi subahūni vai || 85 ||
[Analyze grammar]

kartavyāni suvidyante tasmād dehi harāya tām |
anayā kanyayā śaṃbhurardhanārīśvaro'sti vai || 86 ||
[Analyze grammar]

vivāhavidhinā khyātiṃ tādṛśīṃ tu gamiṣyati |
tapasā ca haraṃ samyagārādhya tava putrikā || 87 ||
[Analyze grammar]

kṛṣṇarūpaṃ vidhūyaiva gaurarūpā bhaviṣyati |
gaurīti vai tathā nāmnā vidyudgaurī bhaviṣyati || 88 ||
[Analyze grammar]

nāmānyasyāstathā'nyāni bahūni santi tāni ca |
śṛṇu tubhyaṃ kathayāmi bhaviṣyanti yathātathā || 89 ||
[Analyze grammar]

kālī tārā mahāvidyā ṣoḍaśī bhuvaneśvarī |
bhairavī chinnamastā ca vidyā dhūmāvatī tathā || 90 ||
[Analyze grammar]

bagalāmukhī siddhavidyā mātaṃgī kamalā tathā |
caṇḍī ca bhairavī saiṃhītyevaṃ nāmāni santi vai || 91 ||
[Analyze grammar]

nānyasmai tvamimāṃ dātuṃ kvacitsaṃkalpamācareḥ |
idaṃ copāṃśu devānāṃ na prakāśyaṃ ca kutracit || 92 ||
[Analyze grammar]

śailaḥ prāha tadā vṛddhabrāhmaṇaṃ śṛṇu madvacaḥ |
śivastu sarvadā dhyānī devānāmapyagocaraḥ || 93 ||
[Analyze grammar]

tyaktasaṃgo virāgaśca dhyānayogaparaḥ sadā |
brahmārpitā'ntarātmā saḥ kathaṃ sādhyo bhaviṣyati || 94 ||
[Analyze grammar]

nirguṇo nirvikāraśca nirāmayo nirīhakaḥ |
akṣaro brahma paramaḥ kathaṃ sādhyo bhaviṣyati || 956 ||
[Analyze grammar]

yasyāntarvartate viśvaṃ bāhyaṃ naiva nirīkṣate |
saḥ kathaṃ tapasā putryā'nayā sādhyo bhaviṣyati || 96 ||
[Analyze grammar]

brāhmaṇaḥ prāha tacchrutvā cintā kāryā na vai tvayā |
devadevo nirīho'pi tvatputryāmīhayā yutaḥ || 97 ||
[Analyze grammar]

tapasā'vaśyameva syādato'sādhyaṃ na vidyate |
kālī svayaṃ mahākālaṃ haraṃ tu prāpsyati dhruvam || 98 ||
[Analyze grammar]

gacchāmyahaṃ tu śailendra vivāhakaraṇaṃ kuru |
itikṛtvotthito vipro gamanāya mano dadhe || 99 ||
[Analyze grammar]

śailastāvatsusatkārā'rhaṇāṃ tasyā'karonmudā |
vṛddhaviprasvarūpaṃ ca tirodhāyā'pi bhūsuraḥ || 100 ||
[Analyze grammar]

devarṣirnāradaṃ rūpamāsthāya vyomamārgagaḥ |
nārāyaṇaṃ raṭanpremṇā paśyatośca tayordvayoḥ || 101 ||
[Analyze grammar]

menakāśailayoḥ śīghraṃ jagāmendrapurīṃ prati |
menāśailau mahāścaryaṃ gatau dṛṣṭvā tu nāradam || 102 ||
[Analyze grammar]

niścitā śaṃbhupatnīyaṃ sutā bhāgyavatī sadā |
ānanditā ca sā kanyā prasannau pitarau tathā || 103 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vṛddhaviprarūpeṇa nāradasya himagirigṛhāgamanaṃ pārvatyā rekhābhiḥ aguṇasya patnītvamuktam himālayacintā aguṇādiśabdārthasphuṭatā śivapatnī bhāvinīti nirṇayaḥ vṛddhabrāhmaṇatvaṃ vihāya nāradarūpeṇākāśapathā mahendrapurīṃ prati gamanamityādi |
nirūpaṇanāmaikāśītyadhikaśatatamo'dhyāyaḥ || 181 ||
[Analyze grammar]