Chapter 177

śrīnārāyaṇa uvāca |
dakṣastadā bhayodvigno viṣṇuṃ sasmāra padmaje |
devadeva harekṛṣṇa nārāyaṇa jagadguro || 1 ||
[Analyze grammar]

mama rakṣā vidhātavyā makhasya ca janasya ca |
makhabhaṃgo mā bhavatu makhātmakastvamacyuta || 2 ||
[Analyze grammar]

brahmaṇā viṣṇunā tasya śrutā vai prārthanā tadā |
haṃsaṃ garuḍamāruhya svasthānātpunarāgatau || 3 ||
[Analyze grammar]

papāta pādayostayorbhayavyākulamānasaḥ |
utthāpya ca tato viṣṇurdakṣaṃ viklinnamānasam || 4 ||
[Analyze grammar]

prāha dakṣa śṛṇu tattvaṃ sarvathā hitakṛdvacaḥ |
avajñā hi kṛtā dakṣa tvayā tattvamajānatā || 5 ||
[Analyze grammar]

īśasyā'vajñayā sarvaṃ kṛtaṃ bhavati niṣphalam |
viphalaṃ kevalaṃ naiva vipattiśca pade pade || 6 ||
[Analyze grammar]

apūjyā yatra pūjyante pūjanīyo na pūjyate |
trīṇi tatra bhavantyeva dāridryaṃ maraṇaṃ bhayam || 7 ||
[Analyze grammar]

asatkṛtānmahādevāt mahadbhayamupasthitam |
śaṃkaro vaiṣṇavo devo nārāyaṇaparāyaṇaḥ || 8 ||
[Analyze grammar]

nārāyaṇasya bhaktasya hyaparādhaḥ kṛtastvayā |
bhaktāparādhino rakṣāṃ kartuṃ svāmī na vai kṣamaḥ || 9 ||
[Analyze grammar]

śivasya śaraṇaṃ yāhi sa vai rakṣāṃ kariṣyati |
ahaṃ bhaktaparādhīnaḥ satīnāśena duḥkhyaham || 10 ||
[Analyze grammar]

krūrasya kṛtakāryasya phalaṃ prāpnuhi kiṃ bhavet |
dakṣastadvacanaṃ śrutvā vivarṇavadano'bhavat || 11 ||
[Analyze grammar]

prāha ca śrīhariṃ kṛṣṇa yajñāraṃbho bhavadbalāt |
kṛto'yaṃ karmaṇāṃ sākṣin vedadharmasya siddhaye || 12 ||
[Analyze grammar]

tasmād rakṣā vidhātavyā yajñasyā'sya mama prabho |
tvāṃ vinā rakṣituṃ yajñaṃ cā'smān śakto na vidyate || 13 ||
[Analyze grammar]

viṣṇuḥ prāhā'dhvararakṣā vidhātavyā mayā dhruvam |
khyāto mama paṇaḥ sarvo dharmasya paripālanam || 14 ||
[Analyze grammar]

maryādā vedadharmasya rakṣaṇīyā mayā sadā |
yajñe devatrayāṇāṃ ca tathā'nyeṣāṃ mahātmanām || 15 ||
[Analyze grammar]

surādīnāṃ ca bhāgo'sti vedo vakti na cā'nyathā |
tvayā vyatikramastasya mānenācarito'dhvare || 16 ||
[Analyze grammar]

vada dakṣa dharmapaṇaḥ kathaṃ tyājyo mayā bhavet |
kathaṃ satīśivau yajñe tvayā nā'kāritau purā || 17 ||
[Analyze grammar]

kathaṃ yajñasya maryādā hyullaṃghitā vijānatā |
kiṃ karma kimakarmeti na kiṃ paśyasi durmate || 18 ||
[Analyze grammar]

devenaikena śūnyo'yaṃ yajño naiva phalapradaḥ |
kevalaṃ jñānamāśritya mānamāśritya yājakāḥ || 19 ||
[Analyze grammar]

īśvaraṃ ca parityajya kevale karmaṇi sthitāḥ |
te nu karmamayaiḥ pāśairbadhyante bahujanmasu || 20 ||
[Analyze grammar]

nirayeṣu prapacyante hīśvarasya'vamānakāḥ |
ekatra tu śivākhyasya bhrātuḥ sainyamupasthitam || 21 ||
[Analyze grammar]

aparatra ca dakṣādeḥ putrapautrādivāhinī |
sarve sambandhino devāḥ kuṭumbaṃ tvekameva ha || 22 ||
[Analyze grammar]

kutra sudarśanaṃ cakraṃ moktavyaṃ vada me'dhunā |
kuṭumbināṃ sevakānāṃ sarvathā ca mahātmanām || 23 ||
[Analyze grammar]

nāśa upasthitaste'tra śivā'vamānadoṣataḥ |
nāśa āmantrito buddhyā gṛhanāśa upasthitaḥ || 24 ||
[Analyze grammar]

ayaṃ rudragaṇādhīśo vīrabhadro'rimardanaḥ |
sarvavināśanārthaṃ vai cāgato'sti na saṃśayaḥ || 25 ||
[Analyze grammar]

evaṃ bruvati govinde sainyamāpatitaṃ tadā |
parito'dhvarabhūmau tad vyapaśyan vai surādayaḥ || 26 ||
[Analyze grammar]

indrastadā hasan rudraṃ vīrabhadraṃ tathā gaṇam |
vajraṃ dhṛtvā kare yoddhuṃ sajjo'bhūt surasainyakaḥ || 27 ||
[Analyze grammar]

indraḥ svagajamārūḍho vastārūḍho'nalaḥ svayam |
yamo mahiṣamārūḍho nirṛtiḥ pretavāhanaḥ || 28 ||
[Analyze grammar]

varuṇo makarārūḍho mṛgārūḍho'nilastathā |
kuberaḥ puṣpakārūḍho yuyudhe śaṃkaraiḥ saha || 29 ||
[Analyze grammar]

tathā'nye surayoddhāro yakṣacāraṇaguhyakāḥ |
āruhya vāhanānyeva yuyudhire pratāpinaḥ || 30 ||
[Analyze grammar]

devānāṃ ca gaṇānāṃ ca tadāsītsamaro mahān |
neduḥ śaṃkhāśca bheryaśca mahādundubhayastathā || 31 ||
[Analyze grammar]

ḍiṇḍimāḥ paṭahā neduḥ raṇaśṛṃgāṇi gomukhāḥ |
tīkṣṇatomaranārācaiḥ surā jaghnurgaṇān bahūn || 32 ||
[Analyze grammar]

indrādyairlokapālādyairgaṇāḥ śaṃbhorvinirjitāḥ |
bhṛgormantrajasainyaiśca nirjitāśca palāyitāḥ || 33 ||
[Analyze grammar]

uccāṭanaṃ kṛtaṃ teṣāṃ bhṛguṇā yajvanā tadā |
caṇḍikānāṃ ca sainyāni makhe tatrā''patanti ca || 34 ||
[Analyze grammar]

mahālayānāṃ sainyāni yuddhyanti ṛbhusaṃgare |
kālānāṃ bhairavāṇāṃ ca bhūtapretādidhanvinām || 35 ||
[Analyze grammar]

sainyāni devasainyeśca śṛṃbhusainyaiḥ raṇaṃ vyadhuḥ |
nipātitāni sarvāṇi ṛbhuśṛṃbhudharāṃbhubhiḥ || 36 ||
[Analyze grammar]

abjārbudaparārdhāni gamitāni yamakṣayam |
araṇyaṃ ca śarīrāṇāṃ samabhūt raṇapātinām || 37 ||
[Analyze grammar]

parājitān svakān dṛṣṭvā vīrabhadro'drisannibhaḥ |
bhūtapretapiśācāṃśca kṛtvā tāneva pṛṣṭhataḥ || 38 ||
[Analyze grammar]

mahāgaṇānpuraskṛtya samāpatadraṇāṃgaṇe |
mahātriśūlamādāya pātayāmāsa nirjarān || 39 ||
[Analyze grammar]

devānsādhyagaṇānyakṣāṃścāraṇānguhyakānapi |
śūlaiśca tomaraiḥ śaktipravaraiste prajaghnire || 40 ||
[Analyze grammar]

keciddvedhā kṛtāḥ khaḍgairmudgaraiśca vipothitāḥ |
anyaiḥ śastraistathā'straiśca surā bhinnā mahāgaṇaiḥ || 41 ||
[Analyze grammar]

kālakavalamantraiśca svabhaṭā jīvitāḥ kṛtāḥ |
dakṣabhaṭā vinaśyanti ko'pi tajjīvako'sti na || 42 ||
[Analyze grammar]

sarve parājitā devāḥ palāyanaparāyaṇāḥ |
yuddhasthānaṃ parityajya gatāḥ sarve triviṣṭapam || 43 ||
[Analyze grammar]

kevalaṃ lokapālāste śakrādyāstasthurutsukāḥ |
vīrabhadro'bravītsarvāndakṣapakṣaprapātinaḥ || 44 ||
[Analyze grammar]

sarve yūyaṃ bāliśatvādavadānārthamāgatāḥ |
avadānaṃ prayacchāmi samāgacchata me'ntikam || 45 ||
[Analyze grammar]

he śakra he guro bhāno śaśin yama dhaneśvara |
vāyo varuṇa nirṛte śeṣa sūryādayaḥ surāḥ || 46 ||
[Analyze grammar]

samāgacchata sānnidhye prayacchāmyavadānakam |
evamuktvā tīkṣṇabāṇaiḥ śastrairastraiśca parvataiḥ || 47 ||
[Analyze grammar]

nirjaghāna surānsarvān dikpatīndrasureśvarān |
te ca palāyanaparā vidudruvurdiśo daśa || 48 ||
[Analyze grammar]

atha palāyitāndṛṣṭvā yajñanārāyaṇaḥ svayam |
nārāyaṇo naro bhūtvā dadhmau śaṃkhaṃ mahāsvanam || 49 ||
[Analyze grammar]

śrutvā taṃ śaṃkhanirhrādaṃ devāste punarāyayuḥ |
nandinā yuyudhe śakro vahnistatrā'śmanā saha || 50 ||
[Analyze grammar]

kuṣmāṇḍāgreṇa dhanarāṭ yuyudhe prāṇadānataḥ |
yamena ca mahāloko muṇḍastu varuṇena vai || 51 ||
[Analyze grammar]

nairṛtena tu caṇḍaśca bhṛṃgiṇā vāyurityapi |
yoginīcakrasaṃyukto bhairavīnāyako mahān || 52 ||
[Analyze grammar]

vidāryā'paradevānvai papau śoṇitamuṣṇakam |
kṣetrapālā jajakṣustānkālī ca rudhiraṃ papau || 53 ||
[Analyze grammar]

avaśiṣṭāstadā devāḥ pracakrire palāyanam |
viṣṇurbrahmā svasvalokaṃ jagmatuḥ prāk tato'dhvarāt || 54 ||
[Analyze grammar]

vināśo'rbudakoṭīnāṃ tadā'bhūdadhvarasthale |
praviṣṭāśca gaṇā yajñe mardanaṃ vai pracakrire || 55 ||
[Analyze grammar]

kaiścidutpāṭitā yūpāḥ kecitkuṇḍānyapūrayan |
kaiścittu maṇḍapā dhvastā vedāśca khanitāḥ paraiḥ || 56 ||
[Analyze grammar]

kaiściddhavīṃṣi bhuktāni pītānyājyāni cā'paraiḥ |
kaiściddhvastāni cānnāni pītāni pāyasāni ca || 57 ||
[Analyze grammar]

pakvānnāni prabhuktāni kṣīrāṇyāsvāditāni ca |
cūrṇitāni ca bhagnāni yajñapātrāṇi sarvathā || 58 ||
[Analyze grammar]

bhagnāśca śakaṭāḥ kaiścit srucaḥ sruvāśca moṭitāḥ |
paśavaḥ khāditāḥ kaiścit kuṇḍāgnayo vināśitāḥ || 59 ||
[Analyze grammar]

dukūlāni ca ratnāni kaiściddhṛtāni tatsthale |
tamupadravamālokya yajño mṛgarūpadhṛk || 60 ||
[Analyze grammar]

bhītaḥ palāyito vyomnā vīrabhadreṇa saṃdhṛtaḥ |
tataścālātacakreṇa viśiraskastadā kṛtaḥ || 61 ||
[Analyze grammar]

nandī bhagasya netre dve samujjahāra yo bhagaḥ |
śapantaṃ dakṣaṃ netrābhyāmasūsucatpunaḥ punaḥ || 62 ||
[Analyze grammar]

caṇḍaścotpāṭayāmāsa pūṣṇo dantānpravegataḥ |
śapamāne hare pūrvaṃ yo'hasad darśayandataḥ || 63 ||
[Analyze grammar]

sarasvatyāśca nāsāgraṃ ciccheda vīrabhadrakaḥ |
aditeroṣṭhapuṭakau cicchedaścānyabhadrakaḥ || 64 ||
[Analyze grammar]

vyapothayad bhṛguṃ pṛthvyāṃ maṇibhadro mahābalaḥ |
padā''kramyorasi tasyā'kārṣīdvai śmaśruluṃcanam || 65 ||
[Analyze grammar]

aryamṇo bāhuyugalaṃ tadotpāṭitavānparaḥ |
agnerutpāṭayāmāsa jihvāmanyo gaṇastadā || 66 ||
[Analyze grammar]

ciccheda vāyorvṛṣaṇau gaṇo'nyo balavardhanaḥ |
gaṇo yamaśirāḥ kaścit yamaṃ babandha rajjubhiḥ || 67 ||
[Analyze grammar]

śṛṃgī ca nairṛtaṃ vṛkṣe babandha jaṭayā tadā |
atolayacca śākhāyāṃ tāḍayāmāsa kaṭyadhaḥ || 68 ||
[Analyze grammar]

kuberaṃ padayordhṛtvā rajjvā badhvā hyadhomukham |
tolayāmāsa yūpordhvaṃ gaṇo dharābhunāmakaḥ || 69 ||
[Analyze grammar]

rudrāstu vāmayāmāsurbhakṣakānadhvarāhutīḥ |
varuṇodaramāpīḍyodgīrayāmāsurājyakam || 70 ||
[Analyze grammar]

indro mayūrarūpeṇoḍḍīya cchanno'bhavad girau |
prathamāḥ kālayāmāsuranyānapi ca yājakān || 71 ||
[Analyze grammar]

pragṛhyāriṣṭaneminamaṃgirasaṃ ca kaśyapam |
dattaṃ kṛśāśvaṃ pādena jaghāna mūrghni bhadrakaḥ || 72 ||
[Analyze grammar]

tato'nyānapi devādīn vidārya pṛthivītale |
munīnṛṣīn vīrabhadrādayaḥ śāntiṃ na vai yayuḥ || 73 ||
[Analyze grammar]

viḍambitāḥ svadhā svāhā dakṣiṇā'nyāśca yoṣitaḥ |
mantrāstantrāstathā cānye vastuśeṣā vināśitāḥ || 74 ||
[Analyze grammar]

vavṛṣuste purīṣāṇi vinānāgnau ruṣā gaṇāḥ |
pramathaiḥ sā kṛtā yajñabhūmiḥ śmaśānasannibhā || 75 ||
[Analyze grammar]

atiśocyadaśāpannā vīrabhadro jagau gaṇān |
kva sa dakṣo durācāraḥ kva ca yajña bhujaḥ surāḥ || 76 ||
[Analyze grammar]

sarvānānayata dhṛtvā yāta drutataraṃ gaṇāḥ |
ityājñayā dhāvatastān dṛṣṭvā kruddho janārdanaḥ || 77 ||
[Analyze grammar]

kṛtavān śaktihrāsaṃ yat gaṇāḥ śuṣkatṛṇāyitāḥ |
tena kruddho vīrabhadro dadarśa śārṅgiṇaṃ harim || 78 ||
[Analyze grammar]

prāha dakṣaṃ samānīya dehi yuddhyasva vā mayā |
hariḥ prāhā'hamapyatra dakṣarakṣaṇadakṣadhīḥ || 79 ||
[Analyze grammar]

paśyāmi tava sāmarthyaṃ kathaṃ dakṣaṃ hariṣyasi |
iti kṛtvā dhṛtaṃ cakraṃ mumoca vīrabhadrake || 80 ||
[Analyze grammar]

hāhākāro mahānāsīt lagnaṃ bhadragale tadā |
yāvat kṛntati kaṇṭhaṃ ca kaṇṭhe śaṃbhuḥ samāsthitaḥ || 81 ||
[Analyze grammar]

kaṇṭhaṃ tyaktvā samāyātaṃ vipṇuhastagataṃ hyabhūt |
garuḍaśca tadā kruddhastvekaikaṃ pramathaṃ nakhaiḥ || 82 ||
[Analyze grammar]

dārayāmāsa lakṣāṃste prāpuḥ śobhāṃ tu kaiṃśukīm |
sarvāngaṇāṃstato viṣṇuḥ staṃbhayāmāsa tatsthale || 83 ||
[Analyze grammar]

vīrabhadravināśāya yāvatsudarśanaṃ hariḥ |
prairayacca punastāvad vyomavāṇī jagād tam || 84 ||
[Analyze grammar]

hare sāhasaṃ mā'kārṣārvīrabhadre haraḥ sthitaḥ |
haranāśāya te yatno lajjāvaho nivartaya || 85 ||
[Analyze grammar]

dakṣaḥ karmaphalaṃ yātu mā'nyaḥ kaścit tathā''caret |
śrutvaitāṃ ca hariścakraṃ na mumoca punastadā || 86 ||
[Analyze grammar]

antarvedyāntaragataṃ nilīnaṃ prāpya dakṣakam |
vīrabhadro vinadyoccaiḥ prāha dhikśaṃbhunindakam || 87 ||
[Analyze grammar]

yasyedṛgasti sampatiryatra devāḥ sabhāsadaḥ |
saḥ kathaṃ seśvaraṃ yajñaṃ na kuryāddakṣatāṃ dadhan || 88 ||
[Analyze grammar]

yenā''syenā'pavitreṇa bhavatā ninditaḥ śivaḥ |
chedayāmi tadāsyaṃ te tīkṣṇadhārā'sinā drutam || 89 ||
[Analyze grammar]

evamuktvā'sya mūrdhā'tra khaṇḍitastvasinā'pi saḥ |
kabandhād bhinnatāṃ nāpto yato'bhedyo hi yogataḥ || 90 ||
[Analyze grammar]

abhedyaṃ tacchiro matvā śastrāstrairapi sarvaśaḥ |
cūrṇayāmītyabhidhāya capeṭābhiracūrṇayat || 91 ||
[Analyze grammar]

karābhyāṃ troṭayāmāsa padbhyāmākramya corasi |
agnikuṇḍe ca tatkṣiptvā vīrabhadro juhāva ha || 92 ||
[Analyze grammar]

athā'nyānapi yajñasyāndhṛtvā saṃmṛdya tatra ca |
tarūnprajvālya tatraiva jvālayāmāsa bhūsurān || 93 ||
[Analyze grammar]

athā'ṭṭahāsamakarot pūrayaṃśca jagattrayam |
tatastvaditimukhyānāṃ militānāṃ mahotsave || 94 ||
[Analyze grammar]

troṭayāmāsa karṇādīnyaṃgapratyaṃgakāni ca |
veṇīdaṇḍāṃśca kāsāñcit tena chinnā tadā ruṣā || 95 ||
[Analyze grammar]

kāsāṃcicca karāśchinnāḥ kāsāṃcitkartitā bhujāḥ |
nāsikāśca tathāṃ'gulyaḥ chinnā kāsāṃcideva ha || 96 ||
[Analyze grammar]

jihvāḥ karṇāstathā chinnā nindoktā vā śrutā yayā |
candro dharmo bhṛguścaiva mārīcādyāḥ sutādhavāḥ || 97 ||
[Analyze grammar]

atyantamapamānasya bhājanaṃ tena kāritāḥ |
tāni kuṇḍāni te yūpāste staṃbhāḥ sa ca maṇḍapaḥ || 98 ||
[Analyze grammar]

tā vedyastāni pātrāṇi tāni havyānyanekadhā |
te ca vai yajñasaṃbhārāste te yajñapravartakāḥ || 99 ||
[Analyze grammar]

te rakṣapālāste mantrā vineśuḥ śivahelayā |
kṣaṇatulyena kālena āsan nā''san babhūvire || 100 ||
[Analyze grammar]

mahatāṃ helanāllakṣmi kṣīyate'rjitasukṛtam |
tannāśe sarvanāśaḥ syād yathā dakṣasya sampadām || 101 ||
[Analyze grammar]

tasmāddroho na kartavyo'lpīyasāmapi dehinām |
paraduḥkhaphalaṃ svasyā'vaśyaṃ bhoktavyamāpatet || 102 ||
[Analyze grammar]

atha viṣṇuryayau vyomni vimānasthaṃ tu vedhasam |
prāha brahman śaṃkaraṃ vai nītvā''yāhyatra satvaram || 103 ||
[Analyze grammar]

vidhihīnaṃ makhadhvasa paśyedāgatya śaṃkaraḥ |
adhvarasya ca dakṣasya nistāro'pi bhavettadā || 104 ||
[Analyze grammar]

śrutvaivaṃ satvaraṃ brahmā kailāsaṃ prajagāma ha |
uvācā'dhvaravṛttāntaṃ śaṃbhumādāya vai drutam || 105 ||
[Analyze grammar]

ājagāmā'dhvarasthānaṃ sarvaṃ dhvastaṃ vilokya ca |
trāsadaṃ dṛśyamālokya dayāleśānvito haraḥ || 106 ||
[Analyze grammar]

kṣaṇaṃ śarvastu saṃpaśyan dūyamānamanā hyabhūt |
vīrabhadro'pi natvaiva saṃsthito bahulajjitaḥ || 107 ||
[Analyze grammar]

brahmā prāha haraṃ tatra prasādya ca muhurmuhuḥ |
aparādhyapyayaṃ dakṣaḥ samprasādyaḥ surottama || 108 ||
[Analyze grammar]

yathāpūrvaṃ punaramūn sarvānkāraya śaṃkara |
yathā vidhiḥ pravarteta vaidikaḥ punareva saḥ || 109 ||
[Analyze grammar]

tathā''jñā dīyatāṃ śaṃbho karma siddhyati seśvaram |
anīśvarāsu sarvāsu kriyāsu vai maheśvara || 110 ||
[Analyze grammar]

evameva bhavantyeva vighnajātāḥ sahasraśaḥ |
devabhakto'pi dakṣo'yaṃ devaṃ tyaktvā'karot kratum || 111 ||
[Analyze grammar]

loke vigarhaṇāṃ prāptā nidarśanāya so'bhavat |
īśaṃ tyaktvā ca kāryāṇi kariṣyanti janā yadi || 112 ||
[Analyze grammar]

tadantaṃ te na paśyanti lokā gāsyanti dakṣavat |
tato magaladaṃ devaṃ vihāyā'nyo janaḥ kvacit || 113 ||
[Analyze grammar]

svārthaṃ cāpi padārthaṃ ca daivaṃ vā'daivamityapi |
karma naiva kvacitkiṃcit śrutvaitatpravidhāsyati || 114 ||
[Analyze grammar]

brahmaṇoktaṃ vicāryaiva prahasya śaṃkaraḥ punaḥ |
vīramājñāpayāmāsa yathāpūrvaṃ prakalpaya || 115 ||
[Analyze grammar]

tadā gaṇān svasainyāni prairayanmārjanāya tat |
sthalaṃ bhūtairmārjitaṃ ca bhūmirvipraiḥ susaṃskṛtā || 116 ||
[Analyze grammar]

ujjīvitā mṛtā mantraiḥ saṃjīvanyā'mṛtādibhiḥ |
ye sainyārthaṃ dvayoḥ pakṣe nūtnāścotpāditā bhaṭāḥ || 117 ||
[Analyze grammar]

śaṃbhunā bhṛguṇā svasvamantrairlīnīkṛtāśca te |
koṭyarbudāni sainyāni parārthalakṣakāṇi ca || 118 ||
[Analyze grammar]

asaṃkhyadevadevīnāṃ paśūnāṃ pṛtanāstathā |
sarvaṃ līnīkṛtaṃ tatra bhṛguṇā śaṃbhunā tathā || 119 ||
[Analyze grammar]

aṃganāśāśca nārīṇāṃ dravyanāśāḥ kratostathā |
dehanāśā makhasthānāṃ punarujjīvya sandhitāḥ || 120 ||
[Analyze grammar]

viṣṇunā brahmaṇā candramasā ca śaṃbhunā makhe |
kumāreṇā'śvinījena dhanvantariyutena ca || 121 ||
[Analyze grammar]

sūryeṇa guruṇā yoginībhiḥ śrībhistathā tadā |
munibhiḥ ṛṣibhiścaiva svasvasāmarthyasaṃyutaiḥ || 122 ||
[Analyze grammar]

yathāpūrvaṃ kṛtaṃ sarvaṃ cotpāditaṃ tu mānasam |
sauvarṇaṃ rājataṃ tāmraṃ dāravaṃ caurṇamikṣujam || 123 ||
[Analyze grammar]

pāyasaṃ vallijaṃ sasyajanyaṃ kārpāsakaṃ tathā |
annajaṃ jalajaṃ codbhijjātaṃ hrasva mahacca yat || 124 ||
[Analyze grammar]

svalpaṃ pracūrakaṃ cāpi havyaṃ cānyacca yaddhyabhūt |
vinā dakṣasya vadanaṃ yathāpūrvaṃ samīkṛtam || 125 ||
[Analyze grammar]

śaṃkarādyā''jñayā''gṛhya yajñīyameṣamastakam |
tena meṣamukhaṃ dakṣaṃ vīrabhadragaṇo vyadhāt || 126 ||
[Analyze grammar]

dakṣasya yajñaśīrṣṇaḥ syāt sadā hyajamukhaḥ śiraḥ |
mitranetreṇa saṃpaśyet yajñabhāgaṃ bhagaḥ suraḥ || 127 ||
[Analyze grammar]

bhagnadantaḥ suraḥ pūṣā bhavatu yajñapiṣṭabhuk |
bastaśmaśrurbhavedeva bhṛguḥ śivavirodhakṛt || 128 ||
[Analyze grammar]

devāḥ prakṛtisarvāṃgā bhavantveva sadā svayam |
bāhubhyāmaśvinau pūṣṇo hastābhyāṃ kṛtavāhakaḥ || 129 ||
[Analyze grammar]

bhavantvadhvaryavaścānye yathāpūrvaṃ śivājñayā |
abhavaṃste tathā sarve sarvaṃ svasthamabhūttadā || 130 ||
[Analyze grammar]

atha yajñakriyāstatra prāvartanta punaḥ suraiḥ |
pūrṇāhutiḥ pradattā'vabhṛthasnānaṃ kṛtaṃ surān || 131 ||
[Analyze grammar]

viprānabhyāgatānputraduhitṛsvasṛbāndhavān |
bhāgineyāndeyapātravarānsatkṛtya sarvathā || 132 ||
[Analyze grammar]

dānāni dattavāṃstebhyo dakṣo bastamukho'rthinām |
tṛptiṃ cākārayat bhakṣyabhojyapānā'mbarādibhiḥ || 133 ||
[Analyze grammar]

sarve svānsvānsvatvabhāgānnītvā yātā nijālayān |
viṣṇuryayau ca vaikuṇṭhaṃ brahmā satyaṃ jagāma ha || 134 ||
[Analyze grammar]

dikpālā lokapālāśca surā munyādayaśca ye |
gatāḥ sarve tṛptahṛdo dānamānārhaṇādibhiḥ || 135 ||
[Analyze grammar]

atha śaṃbhurvidhuro vai kva yāmīti vicārayan |
himālayasya śikharaṃ tapase saṃjagāma saḥ || 136 ||
[Analyze grammar]

vānaprasthakriyādharmaṃ jagrāha śaṃkarastadā |
anāśramavatā puṃsā yataḥ kālo manāgapi || 137 ||
[Analyze grammar]

vyarthaṃ kalayitavyo na vane śreyastapaḥśramaḥ |
tapaścacāra śarvaḥ sagaṇaḥ śṛṃge śivābhidhe || 138 ||
[Analyze grammar]

kailāsasya ca rakṣārthaṃ vīrabhadramayojayat |
dakṣo'pi pāpaśāntyarthaṃ kāśīṃ jagāma caikalaḥ || 139 ||
[Analyze grammar]

tapasā''rādhayacchaṃbhuṃ liṃgaṃ saṃsthāpya satvaram |
prāvirbhūtvā svayaṃ śaṃbhurdakṣapāpaṃ hyamārjayat || 140 ||
[Analyze grammar]

prāha brūhi varaṃ dakṣa dāsyāmi manasepsitam |
prāha dakṣo haraṃ deyo varo mama yadi tvayā || 141 ||
[Analyze grammar]

tava bhaktiḥ sadā cāstu kṣantavyo me'parādhakaḥ |
dakṣeśvare tvayā stheyaṃ liṃge tu sarvadā prabho || 142 ||
[Analyze grammar]

dattamiti tathā cā'nyad gṛhāṇa dakṣa me'grataḥ |
parārdhadvitīyaprānte tato mokṣamavāpsyasi || 143 ||
[Analyze grammar]

iti haro dadau tasmai varadānaṃ pramokṣaṇam |
dakṣasya yajñabhaṃgaḥ sa na hareṇa kṛtaḥ khalu || 144 ||
[Analyze grammar]

paraṃ dveṣṭi pareṣāṃ yadātmanastadbhaviṣyati |
pareṣāṃ kadanaṃ karma na kāryaṃ tat kadācana || 145 ||
[Analyze grammar]

paraṃ dveṣṭi pareṣāṃ yadātmanastadbhaviṣyati |
iti sambodhitaṃ tasmād drohaṃ parasya nācaret || 146 ||
[Analyze grammar]

ārto jijñāsurarthārthī jñānī caiva caturthakaḥ |
caturvidhā bhajante'jaṃ caturtho'tra viśiṣyate || 147 ||
[Analyze grammar]

kevalaṃ karmaṇā yo vai saṃsāraṃ tartumicchati |
na ca pāramavāpnoti madhye vighnena lupyate || 148 ||
[Analyze grammar]

harerbhakto haraṃ nindet harabhakto hariṃ tathā |
tayoḥ śāpā bhaveyuste tattvaprāptirbhavennahi || 149 ||
[Analyze grammar]

hariharau sadā caikatattvaṃ brahmāpi tanmayaḥ |
haro brahmā ca viṣṇuśca jagataḥ kāraṇaṃ param || 150 ||
[Analyze grammar]

haransṛjaṃstathā rakṣandadhe saṃjñāḥ kriyocitāḥ |
advitīye pare tasmin brahmaṇyātmani kevale || 151 ||
[Analyze grammar]

ajñaḥ paśyati bhedena bhūtāni brahma ceśvaram |
ityetadbrahmarūpasya satyāśca śaṃkarasya ca || 152 ||
[Analyze grammar]

caritraṃ śṛṇuyād bhaktyā śrāvayedbhaktimān janān |
sarvasaukhyaṃ labhedatra paratra paramāṃ gatim || 153 ||
[Analyze grammar]

yaḥ paṭhetpāṭhayedvāpi satyākhyānamidaṃ śubham |
bhuktimuktipradaṃ divyaṃ sarvārthasampradāyakam || 154 ||
[Analyze grammar]

svargyaṃ yaśasyamāyuṣyaputrapautraphalapradam |
sa ca bhuktvā'khilān bhogānante mokṣamavāpnuyāt || 155 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne bhītadakṣaprārthanā viṣṇunyāyavākyaṃ surādīnāṃ gaṇādīnāṃ |
ca yuddhaṃ yajñādidhvaṃsaḥ ṛtvijāmaṃgabhaṃgāni cakreṇa śivāviṣṭavīrabhadrā'nāśaḥ śaṃkarāgamanaṃ sarveṣāṃ punaḥ sajīvanaṃ yajñasamāptirityādinirūpaṇanāmā saptasaptatyadhikaśatatamo'dhyāyaḥ || 177 ||
[Analyze grammar]