Chapter 176

śrīnārāyaṇa uvāca |
śrūyatāṃ ca mahālakṣmi kīdṛśaṃ trāsakṛddhi tat |
anātmyaṃ tu pitustasyā nānyastathā kariṣyati || 1 ||
[Analyze grammar]

bhasmībhūte satīdehe dṛśyaṃ sakaruṇaṃ tadā |
samabhūcca samāje'nyonyavāṇī karuṇāvahā || 2 ||
[Analyze grammar]

hanta priyā parā śaṃbhorahādasūnprakopitā |
dakṣeṇa paśyataitasya daurātmyaṃ tu prajāpateḥ || 3 ||
[Analyze grammar]

carācaraṃ prajā yasya tasyāpi hṛdayaṃ sadā |
kṣubdhaṃ ruṣṭaṃ kharaṃ śuṣkamaho saṃsārakaṣṭatā || 4 ||
[Analyze grammar]

śaṃkarasya priyā'bhīkṣṇaṃ mānayogyā satāṃ sadā |
dakṣeṇa vimanā sā'bhūt tatrāpi sumahotsave || 5 ||
[Analyze grammar]

tasmāddurmarṣahṛdayo brahmadhik ca duhitṛdhṛk |
mahatīmapakīrtiṃ saḥ prāpsyatyakhilasṛṣṭiṣu || 6 ||
[Analyze grammar]

yaḥ svāṃgajāṃ sutāṃ śabhudviṭ nyaṣedhatsamāgatām |
mahānarakabhogī sa putrīhā no'parādhataḥ || 7 ||
[Analyze grammar]

vadatyevaṃ jane dṛṣṭvā satyāścā'suviyojanam |
drāgeva pārṣadāḥ krūrā hyudatiṣṭhannudāyudhāḥ || 8 ||
[Analyze grammar]

ṣaṣṭisahasrāṇi te sarve saṃvṛtya makhabhūmikām |
mā kaścid bahirnigacchedghātayantu makhasthale || 9 ||
[Analyze grammar]

hāhākārairvikrośanto dhigdhikdakṣetivādinaḥ |
mārayantu nāśayantu mardayantu makhāṃ'gaṇe || 10 ||
[Analyze grammar]

gaganaṃ ca tadā hāhākārairvyāptamabhūt priye |
devāḥ prāpan bhayaṃ sarve munayo'nye'pi ye sthitāḥ || 11 ||
[Analyze grammar]

akāṃḍayuddhaṃ saṃprāptaṃ pralayo vai bhaviṣyati |
dakṣayajñā''gatānāṃ te hyakurvan hananaṃ bahu || 12 ||
[Analyze grammar]

śastrairaghnanparāṃgāni sutīkṣṇaiḥ prāṇanāśibhiḥ |
dakṣapakṣaistathā tatra ghātitā dve'yute tadā || 13 ||
[Analyze grammar]

anye śastrairdakṣanāśaṃ kartuṃ yātā udāyudhāḥ |
teṣāmāpatatāṃ vegaṃ dṛṣṭvā tu bhagavān bhṛguḥ || 14 ||
[Analyze grammar]

yajñaghnaghnena yajuṣā dakṣiṇāgnau tadā''juhot |
hūyamāne samutpetuḥ ṛbhavaśca sahasraśaḥ || 15 ||
[Analyze grammar]

alātaśastrāste sarve bhṛguvahnibalānvitāḥ |
yuyudhuḥ pramathaistatra prāṇārpaṇasamīhayā || 16 ||
[Analyze grammar]

ṛbhubhiḥ prabalaistatra hanyamānāḥ satīgaṇāḥ |
dve'yute cā'pare tatra mṛtāḥ śeṣāḥ palāyitāḥ || 17 ||
[Analyze grammar]

dakṣapakṣasya sainyānāṃ lakṣaṃ yamagṛhaṃ gatam |
tatkāle ye gurujanā viṣṇubrahmarṣayo'malāḥ || 18 ||
[Analyze grammar]

na hantavyā iti kṛtvā na hatā bhūsurāstathā |
tadā te ṛṣayo devāḥ śakrādyāḥ samarudgaṇāḥ || 19 ||
[Analyze grammar]

viśve'śvinau lokapālāstūṣṇīmāsan grahādayaḥ |
svasvavimānayāneṣu vyomamārge vyavasthitāḥ || 20 ||
[Analyze grammar]

udvignāḥ prārthayantaśca vighnā'bhāvaṃ muhurmuhuḥ |
dakṣajāmātaro dakṣakanyā dakṣakuṭumbinaḥ || 21 ||
[Analyze grammar]

viṣṇubrahmarṣisainyaistu rakṣitā bahuyatnataḥ |
yajñabhūmistadā śuddhāṃ kṛtā śavavivāhanaiḥ || 22 ||
[Analyze grammar]

yajñabhūmau punardakṣā'grahātsarve vyavasthitāḥ |
yajñapūrtīcchayā śīghraṃ homakarmā'bhavattataḥ || 23 ||
[Analyze grammar]

etasminnantare tatra vyomavāṇī jagāda ha |
re re dakṣa durācāra daṃbhācāra mahākhala || 24 ||
[Analyze grammar]

kimidaṃ kṛtavān mūḍha bhāvyanarthakaraṃ tava |
dadhīciste makhācchāpaṃ datvā yāto na buddhavān || 25 ||
[Analyze grammar]

gṛhā''gatāṃ jyeṣṭhaputrīṃ yogyāṃ mānitavānnahi |
jñānahīna śivau pūjyau garvātpūjitavānnahi || 26 ||
[Analyze grammar]

putrīṃ matvā satīṃ phaladāmārādhitavānnahi |
sarvasaubhāgyadāṃ sādhvīṃ samprasāditavānnahi || 27 ||
[Analyze grammar]

bhaktamaṃgaladāṃ devīṃ tvaṃ samarcitavānnahi |
sarvabhītiharāṃ śaktiṃ natvā raṃjitavānnahi || 28 ||
[Analyze grammar]

mano'bhīṣṭapradāṃ prahvāṃ premṇā drāvitavānnahi |
kīrtisampatpradāmīśāṃ dhyātvā yājitavānnahi || 29 ||
[Analyze grammar]

bhuktimuktipradāṃ dhātrīṃ prasaṃbhojitavānnahi |
rakṣikāṃ poṣikāṃ hantrīṃ hṛdi dhāritavānnahi || 30 ||
[Analyze grammar]

sarvasṛṣṭiprajananīṃ śāntiṃ nayitavānnahi |
śaṃbhorbhāgaṃ śaṃbhupatnyai yajñe cārpitavānnahi || 31 ||
[Analyze grammar]

tapyate hi tapaḥ siddhaiḥ sādhvībhirdarśanecchayā |
yujyate yogibhiryogairetaddarśanakāṃkṣayā || 32 ||
[Analyze grammar]

tayoḥ sarvajagatpitroḥ satkāraṃ kṛtavānnahi |
ata evā'dhvarasyā'sya vināśo bhavitā dhruvam || 33 ||
[Analyze grammar]

satkāryau satkṛtau naiva kathaṃ śreyo bhaviṣyati |
daurbhāgyaṃ tvayi saṃkrāntaṃ saṃkrāntāstvayi cāpadaḥ || 34 ||
[Analyze grammar]

anabhyarcya śivāṃ śaṃbhuṃ kalyāṇaṃ prāpnuyāmiti |
kiṃ te garvaḥ samāyāto garvaste'dya vinaṃkṣyati || 35 ||
[Analyze grammar]

śaṃkarādvimukho bhūtvā deveṣveteṣu kastava |
sāhāyyado bhavedatra na taṃ paśyāmi kaṃcana || 36 ||
[Analyze grammar]

devā vā yadi vā cānye'dhunā ye te sahāyinaḥ |
dhruvaṃ te nāśamāpsyanti vahninā śalabhā iva || 37 ||
[Analyze grammar]

śiraste jvalitaṃ cāstu yajñopadā jvalantvapi |
tvatsahāyā amāṃgalye viśantu prajvalantu ca || 38 ||
[Analyze grammar]

viniryāntu surāḥ svokaścāsmādadhvarabhūsthalāt |
adyā'trasthāyināṃ dhvaṃso bhavitā'tra kṣaṇāntare || 39 ||
[Analyze grammar]

bālā vṛddhāḥ striyaścānye svakā niryāntu cā'dhvarāt |
viṣṇo vidhe puṣpavantau niryāntu cā'dhvarasthalāt || 40 ||
[Analyze grammar]

anyathā bhavatāṃ nāśo bhavitā vai kṣaṇāntare |
sarvān saṃśrāvya vyaramat nabhovāṇī tathāpi vai || 41 ||
[Analyze grammar]

yajñabhūmigatā bhāvidaivanaṣṭā na niryayuḥ |
yajñakālaḥ saśoko'pi yajñapūrtyarthameva te || 42 ||
[Analyze grammar]

kurvanti havanaṃ śīghraṃ yajñakāryaṃ pravartate |
atha śrīnārado devaḥ satīdāhottaraṃ drutam || 43 ||
[Analyze grammar]

satīvṛttāntamakhilaṃ harāyā''śaṃsituṃ yayau |
kailāse śaṃbhunikaṭe gatvā natvā haraṃ śvasan || 44 ||
[Analyze grammar]

duḥkhaṃ ca darśayan śokaṃ vaimanasyaṃ pradarśayan |
kāruṇyaṃ cātijanayan bhayamāvedayaṃstathā || 49 ||
[Analyze grammar]

netrādaśru vimuñcaśca prakampan prāha śaṃkaram |
amāyikasya māyāyā bādho naiveti dṛśyate || 46 ||
[Analyze grammar]

sarvasvamapi naśyeta kā cintā yogino'tra vai |
nāpacīyeta te kiṃcinnopacīyet te'thavā || 47 ||
[Analyze grammar]

avyayatvācca pūrṇatvāt hānivṛddhī kutastvayi |
dakṣeṇā'dya tavaiśvaryamāskanditaṃ padena vai || 48 ||
[Analyze grammar]

yasya mānā'vamānena nindāstutī same tathā |
hānyahānī na gaṇite kiṃ tadagre raveṇa vai || 49 ||
[Analyze grammar]

svasya nāśe'pi yatkeśaḥ kampate nahi sarvathā |
kiṃ vṛthā saṃbhṛtastena bhāraścaiśvaryakośajaḥ || 50 ||
[Analyze grammar]

nā'bhimānadhanaṃ yasya nā'vajñājanyaśocanam |
tasyāgre kathanaṃ sarvaṃ mahiṣyagre kathā yathā || 51 ||
[Analyze grammar]

abhimānarahitāgre sābhimānāṃganā varā |
dhanyā nirabhimānasya sābhimānā tu sā satī || 12 ||
[Analyze grammar]

śrūyate svapyate kiṃvā karṇau sto vā na vā mune |
tava nindāśravātsādhvī tṛṇīcakre svajīvitam || 13 ||
[Analyze grammar]

ityākarṇya tadā śaṃbhurmahākāla ivā'paraḥ |
rudraścātīva rudro'bhūt bahukopāgnidīpitaḥ || 54 ||
[Analyze grammar]

vikarālānanastatrā'vocattu nāradaṃ drutam |
huṃ huṃ huṃ kimabhūt tatra tṛṇīcakre svajīvitam || 55 ||
[Analyze grammar]

ho nārada kiṃ bravīṣi satī tatyāja jīvitam |
ḍūṃh ḍūṃh ḍūṃh ḍūṃh ḍūṃh ḍamāk ḍaṃ ḍūṃh ḍamarūṃ ninādya śaṃkaraḥ || 56 ||
[Analyze grammar]

jaṭāṃ saṃbhramya bhūpṛṣṭhe balāt tāḍitavān ruṣā |
praghaṭṭanānmahādhūmraḥ samutpannaḥ kṣitiṃ khanan || 57 ||
[Analyze grammar]

tanmadhyāttu samutpanno mahājvālodayo giriḥ |
girideva tato jātaḥ kālamṛtyuprakampanaḥ || 58 ||
[Analyze grammar]

pratyakṣaḥ pratimākāro rudra iva bhayaṃkaraḥ |
vīrabhadro'paro rudraḥ śatarudraparākramaḥ || 59 ||
[Analyze grammar]

yasya haste mandarādrisamā cāsīt gadā tadā |
bhūśuṇḍī vindhyavaddīrghā parighaṃ raivatādrivat || 60 ||
[Analyze grammar]

netre prasphārite tasya sūryācandramasāviva |
lalajjihā jvalajjvālāmukhipaṭṭābhisadṛśī || 61 ||
[Analyze grammar]

arbudācalavattasya vakṣaḥsthalamaśobhata |
pādāṃ'guṣṭhāṃ'gulībhyāṃ sa madhye saṃgṛhya satvaram || 62 ||
[Analyze grammar]

himādreḥ śṛṃgamutpāṭya dhṛtvā kukṣau kapardavat |
natvā śaṃbhuṃ tadovāca ki dāsyaṃ karavai tava || 63 ||
[Analyze grammar]

karavāṇyekakavalaṃ brahmāṇḍaṃ sacarācaram |
pibāmi sakalānabdhīnekenāṃ'jalinā''jñayā || 64 ||
[Analyze grammar]

pātālāni vinimayya nayāmyadho uparyapi |
ihā''naye lokapālān keśaiḥ pragṛhya sendrakān || 61 ||
[Analyze grammar]

kālaṃ mṛtyuṃ tathā vadhvā hyānaye tu tvadantikam |
daityadānavasaṃgrāme prabalaṃ praṇihanmyaham || 66 ||
[Analyze grammar]

paśya matpādapatanāt kampate kṣoṇimaṇḍalam |
dorbhyāṃ tu parvatānsarvān cūrṇayāmi ca te balāt || 67 ||
[Analyze grammar]

kiṃ bahūktena dehyājñāṃ mamā'sādhyaṃ na kiṃcana |
tvatpādabalamāsādya kṛtaṃ viddhyadya cintitam || 68 ||
[Analyze grammar]

ityuktvā vīrabhadraḥ saḥ pronnato doḥsahasravān |
yāvacchaṃbhoḥ pādadhūlīṃ dadhāra mūrdhni sannidhau || 69 ||
[Analyze grammar]

tāvattatra rudantaśca samāyātā makhādgaṇāḥ |
procurdeva mahādeva pāhi naḥ śaraṇāgatān || 70 ||
[Analyze grammar]

saṃśṛṇvādarato nātha satīvārtāṃ pravistarāt |
garvitena tu dakṣeṇa satyā anādaraḥ kṛtaḥ || 71 ||
[Analyze grammar]

tubhyaṃ bhāgamadānno saḥ devebhyaśca pradattavān |
durvacāṃsyavadat proccaiḥ śrutvā'kupyat satī makhe || 72 ||
[Analyze grammar]

vinindya bahuśastātamadhākṣītsvatanuṃ makhe |
caturayutasaṃkhyākā gaṇā naṣṭā tadā'dhvare || 73 ||
[Analyze grammar]

lajjayā raṇasaṃgrāmaṃ kṛtvā cāpi hatā makhe |
yajñanāśaprakartāro'smatpakṣāśca gaṇāstadā || 74 ||
[Analyze grammar]

bhṛguhomotpāditaiśca ṛbhubhirvai hatā makhe |
lakṣayoddhāra evānye dakṣasya tu hatā gaṇaiḥ || 75 ||
[Analyze grammar]

tathāpi makhabhūmeste śuddhiṃ kṛtvā vitanvate |
yajñaṃ dakṣastathā dakṣapakṣagrāhāḥ surarṣayaḥ || 76 ||
[Analyze grammar]

satīśokaṃ na kurvanti śaṃbhuṃ naiva smaranti ca |
vihasanti satīnāśāt dantān kurvanti vaḥ prati || 77 ||
[Analyze grammar]

apamānaṃ tava satyāstasmin yajñe viśeṣataḥ |
dakṣādyāste'khilā duṣṭā akurvan garvitā ati || 78 ||
[Analyze grammar]

naṣṭānāṃ ca gaṇānāṃ tu saṃjīvanārthameva vai |
mantraṃ bhasmobhayaṃ dehi dehi no'mṛtabuṭṭikām || 79 ||
[Analyze grammar]

tatra bhṛgvādayaścānyāna navānutpādayanti tān |
vināśayituṃ roddhuṃ ca dehi śaktiṃ mahālayām || 80 ||
[Analyze grammar]

brahmaṇā śaṃbhave dattaḥ kālakavalasaṃjñakaḥ |
sa mantraḥ śaṃbhunā datto vīrabhadrāya dhīmate || 81 ||
[Analyze grammar]

śastraṃ phutkṛtya roṣeṇa śatrūn dṛṣṭvā prayojayet |
kālakavalamantraḥ sa hyanyebhyo'pi pradīyatām || 82 ||
[Analyze grammar]

oṃ mṛtemṛtyo mahāmṛtyo mṛtyā saha sthiro bhava |
oṃ mṛtimṛtyo mahāmṛtyau svamṛtyā saṃstiro bhava || 83 ||
[Analyze grammar]

iti phutkārapūrvaṃ vai śastraṃ śarādikaṃ ca yat |
prakṣipecchatruśarīre mṛtvā punarna jīvati || 84 ||
[Analyze grammar]

vīrabhadreṇa tatkāle śaṃkarādeva śikṣitaḥ |
sādhitaścāpi tatreva śaṃkarasya nideśataḥ || 85 ||
[Analyze grammar]

śarīre bhasma sammṛdya homā'yutaṃ tadā'nale |
lakṣajapān sa tatraiva kṛtvā'yutasuvarṣmabhiḥ || 86 ||
[Analyze grammar]

sādhayitvā kālamantraṃ śarīrāṇi vilīya ca |
ekākyeva punarbhūtvā vīrabhadro mahākṣayaḥ || 87 ||
[Analyze grammar]

sajjo'bhūdgamanāyaiva nideśamārthayaddharāt |
haro'pi ca satīdehaṃ bhasmībhūtaṃ tu nāradāt || 88 ||
[Analyze grammar]

gaṇebhyaśca nijāṃ nindāṃ dakṣasyātipragarvitām |
śrutvā dakṣasya sarvasya nāśārthaṃ svajaṭāṃ kṣitau || 89 ||
[Analyze grammar]

prāsphālayāmāsa roṣāt tāḍayāmāsa vegataḥ |
mārjayāmāsa saṃkrodhāddhūnayāmāsa sarvataḥ || 90 ||
[Analyze grammar]

prāsphālane jaṭābhyaśca mahālayākhyaśaktitaḥ |
tāḍane ca jvarā jātā mārjane kālikāhvayāḥ || 91 ||
[Analyze grammar]

dhūnane ca gaṇā jātā arbudārbudakoṭayaḥ |
hastatālikayā mahābhayadā bhūtakoṭayaḥ || 92 ||
[Analyze grammar]

devyo mahālayāstatra koṭirarbudamityapi |
saśastrā aṣṭasaddhastā navayauvanagarvitāḥ || 93 ||
[Analyze grammar]

atibhayaṃkarākārā yuddhakarmakṛtaśramāḥ |
jvarā mūrtidharāḥ krūrāstrayodaśābjakoṭayaḥ || 94 ||
[Analyze grammar]

saśastrā nāśakāryāntā ripvapunarāvartikāḥ |
kālikādimahācaṇḍyo raṇāṃgaṇapranartikāḥ || 95 ||
[Analyze grammar]

saśastramantrabuṭṭyāḍhyā mahākālyo bhayaṃkarā |
gaṇāḥ sarve parārdhāśca parārdhasya parārdhakāḥ || 96 ||
[Analyze grammar]

saśastrakavacā'strādijñātāro yuddhakovidāḥ |
prārthayanto haraṃ śīghraṃ prajvalanto diśo daśa || 97 ||
[Analyze grammar]

sajjā vai tvarayāṃcakruḥ śaṃbhvājñāvāṭadarśinaḥ |
sainyaṃ tvasaṃkhyamevātra kailāse samabhūnnavam || 98 ||
[Analyze grammar]

vīrabhadro haraṃ prāha śīghramājñāpaya prabho |
śoṣaṇīyā mayā śaṃbho kṣaṇārdhenaiva sindhavaḥ || 99 ||
[Analyze grammar]

peṣaṇīyā mayā tatra kṣaṇārdhenaiva parvatāḥ |
kṣaṇena bhasmasātkuryāṃ brahmāṇḍamuta devatāḥ || 100 ||
[Analyze grammar]

sarve lokā vyasavaśca kimu kāryāśca me vad |
praṇato'smi mahādeva bhūyo'pi praṇato'smyaham || 101 ||
[Analyze grammar]

spando'pi jāyate'savyāṃgānāṃ te vijayapradaḥ |
harṣotsāhaviśeṣopi jāyate'pūrva eva me || 102 ||
[Analyze grammar]

śīghraṃ preṣaya māṃ śaṃbho kiṃ kāryaṃ brūhi satvaram |
śaṃbhuḥ prāha tadā vīrabhadraṃ tāmravilocanaḥ || 103 ||
[Analyze grammar]

dakṣo makhaṃ karotyāśu madvirodhena garvataḥ |
tanmakhaṃ bhasmasātkṛtvā sayāgaparivārakam || 104 ||
[Analyze grammar]

punarāyāhi kailāsaṃ gaccha śīghraṃ tvarāṃ kuru |
madviruddhāḥ surā yadvā gandharvā munayo'pare || 105 ||
[Analyze grammar]

ṛṣayo bhūsurā yadvā ye kecittatra saṃgatāḥ |
tānapyadyaiva sahasā bhasmasātkuru satvaram || 106 ||
[Analyze grammar]

yadi viṣṇuśca brahmā ca mahendro vā yamo'pi vā |
dakṣasya pakṣapātī syād bhasmasāt tānvidhehi vai || 107 ||
[Analyze grammar]

dadhīcimatamullaṃghya ye dakṣapakṣapātinaḥ |
tiṣṭhanti cādhvare tāṃstvaṃ bhasmasātkuru bhadraka || 108 ||
[Analyze grammar]

ākāśavāṇyā bodhitāstathāpi yānti no bahiḥ |
yajñasthān me drohiṇastān bhasmasātkuru bhadraka || 109 ||
[Analyze grammar]

dakṣamakhā''ptadraviṇān dakṣaśraiṣṭhyapravādinaḥ |
satīśaṃbhurghrāṇanastān bhasmasātkuru bhadraka || 110 ||
[Analyze grammar]

dakṣapakṣagatāścāpi mṛtyubhayaṃ vilokya ye |
syustāvakāḥ kṣaṇikā bhasmasātkuru tānapi || 111 ||
[Analyze grammar]

devā vā devaputrā vā manavo manuputrakāḥ |
brāhmā vā brahmaputrā vā tatpautrā vāpi ye khalāḥ || 112 ||
[Analyze grammar]

sastrīkāśca saputrāśca satīśaṃbhuvirodhinaḥ |
bhasmasātkuru tānsarvān paścāśca salilaṃ piba || 113 ||
[Analyze grammar]

ityukto vīrabhadrastu raktāveśo bhavan muhuḥ |
rudrāveśastathā kālāveśo'bhavat pracaṇḍakaḥ || 114 ||
[Analyze grammar]

adṛśyaścā'pradhṛṣyaśca nārāyaṇena vedhasā |
babhūva pralayāveśo bhayāveśo bhayaṃkaraḥ || 115 ||
[Analyze grammar]

mastakāttasya kālāgnisamudrāḥ prābhavaṃstadā |
brahmāṇḍaṃ jvālayannatvā śaṃkaraṃ pracacāla saḥ || 116 ||
[Analyze grammar]

nārado'pi kaliṃ samyagudbhāvyā'gre makhaṃ gataḥ |
prāha viṣṇuṃ ca śakraṃ ca vedhasaṃ ca tathā surān || 117 ||
[Analyze grammar]

vīrabhadraḥ samāyāti vināśaḥ syādbhayaṃkaraḥ |
tasmādato'pasarpantu mā paśyantu yamagṛham || 118 ||
[Analyze grammar]

kālo nā'yaṃ kuṭumbasya sambandhasyāpi locakaḥ |
tasmātpralayavegebhyo'pasartavyaṃ subuddhibhiḥ || 119 ||
[Analyze grammar]

śrutvā viṣṇuyamavedhomahendrabhūsurādayaḥ |
dakṣapakṣā'vamantāro makhāttasmādviniryayuḥ || 120 ||
[Analyze grammar]

sastrīkā saparīvārāḥ svasvavimānasaṃsthitāḥ |
vyomamārgeṇa yātāste dūraṃ dūraṃ prayānti vai || 121 ||
[Analyze grammar]

bhṛguṇā tu tadā jñātvā sainyāni homakarmabhiḥ |
ṛbhuśṛṃbhudharāṃbhvādigaṇānāmarbudāni ca || 122 ||
[Analyze grammar]

parārdhāni navānyeva kṛtāni dakṣapātataḥ |
saśastrāḥ sāgnikā svecchārūpavirūpadhārakāḥ || 123 ||
[Analyze grammar]

yuddhamātranipūṇāste mantreśūnyā najīvanāḥ |
sajjāḥ samabhavan bhūmau gagane yakṣarakṣakāḥ || 124 ||
[Analyze grammar]

pravartate yajñakāryaṃ pūrṇatvamavaśiṣyate |
pūrṇāhutistu madhyāhne bhāvinīti ca satvaram || 125 ||
[Analyze grammar]

yājakā yajñakāryāṇi kurvanti tvaritāstadā |
kintu satīpraśāpena dadhīcivacanena ca || 126 ||
[Analyze grammar]

pūrṇo yajño na vai bhāvī madhyāhnapūrvameva yat |
vīrabhadraḥ samāyāto'rbudā'rbudaprasainyavān || 127 ||
[Analyze grammar]

śatayojanataḥ pūrvaṃ sainyaśabdaṃ samāgataḥ |
daśayojanataḥ paścāddhūlīprādrirvyadṛśyata || 128 ||
[Analyze grammar]

kṣayāntare'drisadṛśāḥ samadṛśyanta śāṃkarāḥ |
gaṇā bhayakarā raudrā yoddhāro'māpavigrahāḥ || 129 ||
[Analyze grammar]

avaterurnipetuśca ṛbhusainyeṣu cāmbare |
śṛṃbhusainyeṣu pṛthvyāṃ ca dharāmbhupṛtanāsvapi || 130 ||
[Analyze grammar]

atha śaṃbhurvīrabhadrānugāṃścānyān mahāgaṇān |
svaniśvāsasamudbhūtān śatakoṭīnavāsṛjat || 131 ||
[Analyze grammar]

ambaraṃ taiḥ samākrāntaṃ celuḥ pārśve ca pṛṣṭhataḥ |
śṛṃgāgrāṇi girīṇāṃ ca kaiścidutpāṭitāni vai || 132 ||
[Analyze grammar]

kaiścittvācūḍamūlāśca parvatā vai samuddhṛtāḥ |
kecanotpāṭya vai śālavṛkṣānādāya saṃyayuḥ || 133 ||
[Analyze grammar]

pārṣadāḥ kālakālasya sarve rudrasvarūpiṇaḥ |
ayutā'yutasiṃhāśca śārdūlā makarā gajāḥ || 134 ||
[Analyze grammar]

koṭilakṣāṇi yānāni vāhanāni pragṛhya ca |
gatāni tatra sainyāni puṣpavṛṣṭirabhūdgatau || 135 ||
[Analyze grammar]

kālī kātyāyanīśānī cāmuṇḍā muṇḍamardinī |
bhadrakālī tathā bhadrā kauśikī vaiṣṇavī tathā || 136 ||
[Analyze grammar]

etābhirnavadurgābhiryuktā ghorasvarūpiṇī |
mahākālī yayau dakṣavināśāya tu satvarā || 137 ||
[Analyze grammar]

ḍākinī śākinībhūtagaṇapramathaguhyakāḥ |
kūṣmāṇḍāḥ parpaṭāścaiva caṭakā brahmarākṣasāḥ || 138 ||
[Analyze grammar]

bhairavāḥ kṣetrapālāśca vetālāśca vināyakāḥ |
niryayustvaritaṃ vīrā dakṣayajñavināśakāḥ || 139 ||
[Analyze grammar]

tathaiva yoginīcakraṃ catuḥṣaṣṭigaṇānvitam |
niryayau sahasā kruddhaṃ koṭivetālinīyutam || 140 ||
[Analyze grammar]

abhyayācchaṃkukarṇaśca daśakoṭyā gaṇeśvaraḥ |
daśabhiḥ kekarākṣaśca vikṛto'ṣṭābhirityapi || 141 ||
[Analyze grammar]

catuḥṣyā viśākhaśca navabhiḥ pāriyātrikaḥ |
ṣaḍbhiḥ sarvāṃkako vīrastathaiva vikṛtānanaḥ || 142 ||
[Analyze grammar]

jvālakeśo dvādaśakoṭibhirjīmāṃstu saptabhiḥ |
dudrubho'ṣṭābhiḥ koṭibhiḥ kapālīśastu paṃcabhiḥ || 143 ||
[Analyze grammar]

ṣaḍbhiḥ saṃdārako yāyāt kokuṇḍaḥ koṭikoṭibhiḥ |
viṣṭaṃbho'ṣṭā'ṣṭabhiryāyāt koṭibhirgaṇasattamaḥ || 144 ||
[Analyze grammar]

sahasrakoṭibhiryāyāt śaṃnādaḥ pippalastathā |
āveśānastathā'ṣṭābhiraṣṭābhiścandratāpanaḥ || 145 ||
[Analyze grammar]

mahāveśaḥ sahasreṇa koṭinā gaṇapastathā |
kuṇḍī dvādaśakoṭibhistathā parvatako yayau || 146 ||
[Analyze grammar]

kālaśca kālakaścaiva mahākālastathā gaṇaḥ |
koṭīnāṃ śatakenaiva yajñanāśaṃ yayuḥ prati || 147 ||
[Analyze grammar]

agnikṛcchatakoṭyā ca koṭyā'gnimukha ityapi |
ādityamūrdhā koṭyā ca tathā koṭyā ghanāvahaḥ || 148 ||
[Analyze grammar]

sannāhaḥ śatakoṭyā ca koṭyā ca kumudo gaṇaḥ |
amoghaḥ kokilaścaiva koṭikoṭyā gaṇādhipaḥ || 149 ||
[Analyze grammar]

kāṣṭhāgūḍhaścatuḥṣaṣṭyā sukeśī vṛṣabhastathā |
sumantrako gaṇādhīśastathā yajñaṃ viniryayuḥ || 150 ||
[Analyze grammar]

kākapādodaraḥ santānakaśca ṣaṣṭikoṭibhiḥ |
mahābalaḥ puṃgavaśca navabhiḥ koṭibhistathā || 151 ||
[Analyze grammar]

madhupiṃgaḥ pūrṇabhadro navatikoṭibhiryayau |
virūpākṣastālaketuḥ ṣaḍāsyaḥ paṃcavaktrakaḥ || 152 ||
[Analyze grammar]

saṃvartakaḥ kulīśo daityānto lokāntakastathā |
bhṛṃgīriṭiḥ śṛṃgiriṭiraśanirbhālakastathā || 153 ||
[Analyze grammar]

catuḥṣaṣṭyā sahitāste pratyekamadhvaraṃ yayuḥ |
bhūtakoṭisahasrāṇi śvagaṇastisṛkoṭibhiḥ || 154 ||
[Analyze grammar]

nyapatadvyomamārgeṇa dakṣasyā'dhvarabhūmiṣu |
tayā bheryaśca śaṃkhāśca paṭahāścāpi gomukhāḥ || 155 ||
[Analyze grammar]

śṛṃgāṇi vividhānyeva nineduśca raṇotsave |
dakṣavāmākṣi bāhūruvispandaḥ samajāyata || 156 ||
[Analyze grammar]

bhūkampo'bhūcca madhyāhne dakṣo'paśyannakṣatrakam |
diśo malīmlucastvāsan nistejo'bhūddivākaraḥ || 157 ||
[Analyze grammar]

pariveṣaiḥ saptabhiśca parivṛto bhayapradaḥ |
nakṣatrāṇi patanti smā'kālikastanayitnavaḥ || 158 ||
[Analyze grammar]

nakṣatrāṇāmabhūdvakrā gatiścādhomukhī tadā |
gṛdhro dakṣaśiraḥ spṛṣṭvā yayau nītvā śiraḥpaṭam || 159 ||
[Analyze grammar]

vavāśire ca jambūkāḥ kharā vātā vavustadā |
ulkāvṛṣṭiḥ pāṃsuvṛṣṭiḥ śvetavṛścikavarṣaṇam || 160 ||
[Analyze grammar]

arbudā'rbudaśalabhā dṛśyante sma makhāṃ'bare |
nītaśca pavanairūrdhvaṃ dakṣasyā'dhvaramaṇḍapaḥ || 161 ||
[Analyze grammar]

vemuḥ raktaṃ yājñīyāste sakampā babhūvustadā |
asṛgvṛṣṭirdiśāṃ dāhastimirāvṛtikā diśaḥ || 162 ||
[Analyze grammar]

evaṃvidhānyariṣṭāni cādrākṣurdakṣayajñagāḥ |
bhuvi te mūrchitāḥ peturhā hatāḥ smeti cairayan || 163 ||
[Analyze grammar]

etasminnantare tatrākāśavāṇī jagāda tān |
dhik dakṣa dhik surādyā vo'nivāryaṃ duḥkhamāgatam || 164 ||
[Analyze grammar]

tāvattu śaṃbhusainyāni praviṣṭāni makhāṃgaṇam |
bhayā''viṣṭastadā dakṣo hyagacchaccharaṇaṃ hareḥ || 165 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne satīpārṣadānāṃ yuddhaṃ dakṣāya vyomavāṇī nāradasya punaḥ kailāsagamanaṃ śaṃbhujaṭāto vīrabhadrotpattiḥ avaśeṣagaṇānāṃ kailāsāgamanam kālikājvaragaṇabhūtasiṃhādisainyasarjanam yajñaṃ prati preṣaṇam nāradasya yajñaṃ pratyāgamaḥ dakṣāderapaśakunāni cetyādi nirūpaṇanāmā ṣaṭsaptatyadhikaśatatamo'dhyāyaḥ || 176 ||
[Analyze grammar]