Chapter 173

śrīnārāyaṇa uvāca |
śṛṇu lakṣmi himādrau tu tayorviharatostadā |
kāmasmṛtyā kāmadevaḥ praviṣṭastatra sannidhau || 1 ||
[Analyze grammar]

tasminpraviṣṭe śaṃbhau ca satyāṃ ca kāmanā śubhā |
samabhavattadā śaṃbhorbhāvaṃ vijñāya sarvathā || 2 ||
[Analyze grammar]

vasantaḥ svasya kartavyaṃ samārebhe harāntike |
mandasugandhaśaityāḍhyo vavau ca malayo marut || 3 ||
[Analyze grammar]

vṛkṣāśca puṣpitāḥ sarve latāśca puṣpitāstadā |
virejire palāśāśca kiṃśukaiḥ raktakomalaiḥ || 4 ||
[Analyze grammar]

kamalāni vicitrāṇi saraḥsvapi virejire |
padmapuṣpāḍhyapavano vavau tatra harāntike || 5 ||
[Analyze grammar]

nāgakeśarapuṣpāṇi svarṇavarṇasugandhibhiḥ |
manojñānyabhavaṃstatra śaṃkarasya mahātmanaḥ || 6 ||
[Analyze grammar]

sugandhagandhasaṃpṛktā nāgavallī ca mārutam |
satī śaṃkaranikaṭe prairayanmohakārakam || 7 ||
[Analyze grammar]

kokilāśca tadānīṃ susvaraṃ jagurmanoharam |
āmrāḥ praphullitāḥ patramaṃjarībhirbabhustadā || 8 ||
[Analyze grammar]

jalāni nirmalānyabhirejuśca phullakāśakāḥ |
jyotiścakrāṇi saṃrejurvāsantikaprabhādibhiḥ || 9 ||
[Analyze grammar]

kaumudyā saha raktāśca vibhāvaryo'bhavan priyāḥ |
śādvalāḥ supradeśāścā'bhavan kāmasukhapradāḥ || 10 ||
[Analyze grammar]

nadīṣu ca nikuṃjeṣu kandarīṣu sthalīṣu ca |
reme satyā samaṃ śaṃbhurvireje śaṃbhunā satī || 11 ||
[Analyze grammar]

ramayāmāsa deveśaṃ vividhābhistu kelibhiḥ |
harastu puṣpamālābhiḥ priyāṃ śṛṃgārayatyapi || 12 ||
[Analyze grammar]

kabarīkaraṇairaṃke svāpanaiścūmbanaistathā |
santoṣayati cālāpairhāsyavīkṣaṇamardanaiḥ || 12 ||
[Analyze grammar]

tadvaktraśaśyadharā'mṛtapānamattatāṃ gatā |
nānāvidhāsanasetumādideśa priyai tadā || 14 ||
[Analyze grammar]

satyā vaktrasugandhena saundaryeṇa ca narmaṇā |
premṇā ratyā subaddho'yaṃ śaṃkaraḥ saṃtutoṣa ha || 15 ||
[Analyze grammar]

ityevaṃ himavacchṛṅge ramayitvā satīṃ śivaḥ |
kailāsamagamat svasya nivāse śāntimāvahat || 16 ||
[Analyze grammar]

tāpakālo vyatītaśca yadā meghāgamo'bhavat |
satī prāha tadā śaṃbhuṃ śṛṇu me vacanaṃ priya || 17 ||
[Analyze grammar]

ghanāgamo'yaṃ samayo meghā varṣanti sarvadā |
pravānti vātā hṛdyaṃ kampayantyativeginaḥ || 18 ||
[Analyze grammar]

sthalyaḥ sarvatra saṃklinnāḥ kardamāḍhyā anāśrayā |
vṛkṣā vallyaḥ prabhinnāśca samārdrā jalasaṃbhṛtāḥ || 19 ||
[Analyze grammar]

meghānāṃ garjanā vidyudvilāsāḥ prabhavanti ca |
meghacchannau na dṛśyete sūryācandramasau divi || 20 ||
[Analyze grammar]

vātāhatā mahāvṛkṣāḥ patanti trāsadā bhuvi |
vyāghrāḥ siṃhā mahākrūrā viṣavantaśca dehinaḥ || 21 ||
[Analyze grammar]

bhramanti nirjane'raṇye śītoṣṇā'nilavahnayaḥ |
ete cānye duḥkhadāśca vighnā bhavanti sarvadā || 22 ||
[Analyze grammar]

tasmāt kvacinnivāsārthaṃ gṛhaṃ kāryaṃ tvayā'dhunā |
yatracchāyā sukhaśayyā pānabhojanavaibhavāḥ || 23 ||
[Analyze grammar]

rakṣituṃ ca bhaveyurvai śakyāḥ sāmayikāḥ sadā |
yadi virāmalābhāya saudhaṃ nāsti janasya tu || 24 ||
[Analyze grammar]

tadā ko dāravahane lābho'sti vanavāsinaḥ |
cakravākakapotādyā pakṣiṇo'pi nirāśrayāḥ || 25 ||
[Analyze grammar]

prāpte kāle prakurvanti gṛhāṇi vṛkṣakoṭare |
pipīlikāmūṣakādyāḥ kurvanti bhūgṛhāṇyapi || 26 ||
[Analyze grammar]

tasmādgārhasthyadharmasyāṃgabhūtā'patyarakṣaṇam |
gṛhe vai syānnirābādhaṃ sarvartusukhade dṛḍhe || 27 ||
[Analyze grammar]

anyāsāṃ madbhaginīnāṃ bhavanāni mahānti vai |
divyānyasaṃkhyasmṛddhīni vartante nāsti me gṛham || 28 ||
[Analyze grammar]

prathame gṛhaśūnyatvaṃ duḥkhaṃ saṃsārasāgare |
dvitīyaṃ dhānyahīnatvaṃ tṛtīyaṃ dhanaśūnyatā || 29 ||
[Analyze grammar]

caturthaṃ nirapatyatvaṃ mālinyaṃ paṃcamaṃ matam |
ṣaṣṭhaṃ rogakṛtamaitryaṃ saptamaṃ cā'gavādikam || 30 ||
[Analyze grammar]

aṣṭamaṃ ca gṛhe kleśaḥ siṃhavṛṣabhabhoginām |
etadduḥkhāṣṭakaṃ me'sti kiṃ gārhasthyena yoginaḥ || 31 ||
[Analyze grammar]

yogī syānna bhavedbhogī bhogī syāt kintu yogitā |
tasmādyogaphalaṃ duḥkhāṣṭakanāśe prayujyatām || 32 ||
[Analyze grammar]

paśyā'raṇye ca dāvāgnirbahudhā jāyate'tra vai |
prarohanti ca sasyāni nibīḍāni nivāsane || 33 ||
[Analyze grammar]

śyāmalā rājatā raktā viśadāstṛṇajātayaḥ |
āsanasthalabhūmau vai prarohanti prakardamāḥ || 34 ||
[Analyze grammar]

asamaśrīśca kuṭilā sthalī sevyā'tiduḥkhadāḥ |
nidrāyāṃ ratiyoge vā madhyarātrau bhayaṃkarāḥ || 35 ||
[Analyze grammar]

śabdāḥ śrūyanta ugrāśca kāryadhvaṃse'tiduḥkhadāḥ |
madhyāhne tūlbaṇastāpo varṣādhārāśca duḥkhadāḥ || 36 ||
[Analyze grammar]

paśya me pādayostīkṣṇakaṇṭakānāṃ ca śāśvatī |
kuṭikā saṃgatā tatra kaṇṭakāḥ santi kīdṛśāḥ || 37 ||
[Analyze grammar]

śarīre paśya me meghakarakāṇāṃ ca durnayam |
patitvā chādayantyeva śarīraṃ śaityaduḥkhadam || 38 ||
[Analyze grammar]

etasmin viṣame kāle nīḍaṃ kākāścakorakāḥ |
kurvanti tvāṃ vinā gehān kathaṃ śāntimavāpsyasi || 39 ||
[Analyze grammar]

mahatīvā'dya me bhītirmeghotthā jāyate hṛdi |
tato yatasva saudhārthaṃ mā ciraṃ vacanānmama || 40 ||
[Analyze grammar]

bhāryā rakṣyā vane stheyaṃ ratiḥ svādyā na bhojanam |
etatsarvaṃ vināśāya no sukhāya prajāyate || 41 ||
[Analyze grammar]

kailāse vā himādrau vā gaṃgātīre'thavā kṣitau |
yatra kvāpi vāsayogyaṃ bhavanaṃ kuru śaṃkara || 42 ||
[Analyze grammar]

prāghūṇikāḥ samāgatya śāntā bhaveyurāśrame |
dhanadhānyasmṛddhimati yathāpekṣaṃ tathā kuru || 43 ||
[Analyze grammar]

śrutvā satīvyāhṛtaṃ ca matvā manasi sārthakam |
śaṃbhuḥ prāha tadā devyai rañjayanmānasaṃ muhuḥ || 44 ||
[Analyze grammar]

vada devī yatra meghā gacchantyeva nahi kvacit |
tatra saudhaṃ kārayeyaṃ yadi te rocate śive || 45 ||
[Analyze grammar]

meghā nitambaparyantaṃ saṃcaranti mahīdhare |
merau vā tādṛśe śṛṃge kurve te yadi rocate || 46 ||
[Analyze grammar]

kailāsasya tathā devi nitambe prāyaśo ghanāḥ |
varṣāsvapi pracaranti kurve te tatra rocate || 47 ||
[Analyze grammar]

aruṇācalaśṛṃgai ca nitambe prāyaśo ghanāḥ |
saṃcaranti na gacchanti tata ūrdhvaṃ kadācana || 48 ||
[Analyze grammar]

saurāṣṭre raivate śaile svargaśṛṃge sutaijase |
yatra meghā nitambasthā na gacchantyuparīti vā || 49 ||
[Analyze grammar]

himālaye śivaśṛṃge meghā gacchanti naiva yat |
yatrāsti candrajaṃ śaityaṃ kurve saudhaṃ tu rocate || 50 ||
[Analyze grammar]

ityeteṣu girīndreṣu tvayā dṛṣṭeṣu prāgbhave |
manorucirbhavedyatra tamācakṣva drutaṃ hi me || 51 ||
[Analyze grammar]

yatra haime proccaśṛṃge siddhapatnyo vasanti vai |
tatra te yadi vāñchāsti kurve tatra mahālayam || 52 ||
[Analyze grammar]

svarṇaśṛṃge yatra devyo nivasanti sakautukāḥ |
tatra te yadi vāñcchā syāt kurve saudhaṃ suvarṇajam || 53 ||
[Analyze grammar]

āruṇe maṇikuṭṭe vā lokāloke'tha raivate |
nāgakanyā girikanyāḥ kinnaryaḥ phaṇikanyakāḥ || 54 ||
[Analyze grammar]

gāndharvyaścā'psaraso vidyādhryaḥ pravasanti ca |
yatra tatra ruciste'sti kurve svargopamaṃ gṛham || 61 ||
[Analyze grammar]

sarvāstāḥ satataṃ sevāṃ kariṣyanti tava priye |
anumodaiḥ sahayānaiḥ sahakrīḍādibhiḥ sadā || 56 ||
[Analyze grammar]

rūpaṃ tavedamatulaṃ vadanaṃ cāru vīkṣya tāḥ |
tava dāsyo bhaviṣyanti helayitvā nijaṃ vapuḥ || 57 ||
[Analyze grammar]

yadvā himālaye menā bahurūpaguṇānvitā |
tatra te sā manomodaṃ kariṣyatyatisevayā || 58 ||
[Analyze grammar]

girīṇāṃ kanyakā haime śikṣārthaṃ yānti nityadā |
tatra vai śikharaṃ ramyaṃ śivākhyaṃ yadi rocate || 59 ||
[Analyze grammar]

vicitraiḥ kokilālāpamodaiḥ kujagaṇāvṛtam |
sadā vasantaprabhavaṃ vastumicchasi kiṃ priye || 60 ||
[Analyze grammar]

nānājalasaroyuktaṃ sarojā'saṃkhyatākulam |
kalpavṛkṣā'mṛtavallīkāmadhenusamanvitam || 61 ||
[Analyze grammar]

praśāntaśvāpadagaṇaṃ yatisādhususevitam |
sphāṭikasvargahīrakarājatairupaśobhitam || 62 ||
[Analyze grammar]

mānasatālahaṃsā'śvavyomahastiniṣevitam |
hiraṇmayai ratnajālaiḥ paṃkajairmukulaiḥ sumaiḥ || 63 ||
[Analyze grammar]

nīlotpalādibhiḥ puṣpairmaṃjulaiḥ suniṣevitam |
kuṃkumaiḥ sarvagandhaiśca lasadgandhajalaistathā || 64 ||
[Analyze grammar]

śādvalaistaruṇaistuṅgairvaṃśavṛkṣaiḥ suśobhitam |
nṛtyadbhirvṛddhamayūrairguṃjadbhirbhramarādibhiḥ || 65 ||
[Analyze grammar]

sārasaiḥ kokilābhiśca madhurā''rāvibhiryutam |
gāyanaiḥ satataṃ teṣāṃ śabdāyamānamanvaham || 66 ||
[Analyze grammar]

sahelībhiḥ sadāyuktaṃ kāmoddīpanakārakam |
nūtnanūtnasakhīyukta vastumicchasi kiṃ priye || 67 ||
[Analyze grammar]

yadvā meroḥ suśikhare sārabhūte mahāśubhe |
saṃvihartuṃ sakhīyuktā sā'psarogaṇamaṇḍitā || 68 ||
[Analyze grammar]

samicchasi tatra rantuṃ kurve bhavanamuttamam |
nityaṃ śacī kariṣyati tava sevāṃ sahāyatām || 69 ||
[Analyze grammar]

jaleśasya kuberasyeśānasya ca yamasya ca |
agnernairṛtadevasya mārutasya parasya vā || 70 ||
[Analyze grammar]

purībhiḥ śobhite śṛṃge meroruccasurālaye |
śacīraṃbhāmenakādiraṃbhorugaṇasevite || 71 ||
[Analyze grammar]

tvamicchasi savihartuṃ kurve tatra mahālayam |
athavā mama kailāse parvatendre sadāśraye || 72 ||
[Analyze grammar]

sthānamicchasi kuberanagarīsannidhau śubham |
gaṃgājalakaṇairārdraṃ pūrṇacandrasamojjvalam || 73 ||
[Analyze grammar]

darīṣu sānuṣu droṇyāṃ brahmakanyā'bhiśobhitam |
nānāmṛgakṛtā''vāsaṃ padmākaraśatāvṛtam || 74 ||
[Analyze grammar]

merorapi viśeṣeṇa sadvastuguṇamaṇḍitam |
āvayoḥ sānukūlaṃ ca racaye tādṛśaṃ tadā || 75 ||
[Analyze grammar]

yatrā'styadhikavāsecchā samācakṣva drutaṃ mama |
gṛha svarṇamaṇiratnasampatpūrṇaṃ karomi vai || 76 ||
[Analyze grammar]

satyuvāca tadā śaṃbhuṃ himādrau vasituṃ sadā |
samīhe nacirāt tatra kuru saṃvāsamiṣṭadam || 77 ||
[Analyze grammar]

śrutvā śaṃbhuḥ satīṃ nītvā tuṃgaṃ śṛṃga yayau sadā |
siddhāṃganāgaṇayuktaṃ sarasīvanarājitam || 78 ||
[Analyze grammar]

vicitraiḥ kusumairvyāptaṃ naikadhāratnakarburam |
pakṣibhiryadagamyaṃ vai sphaṭikā'bhramayaṃ ca yat || 79 ||
[Analyze grammar]

vicitrapuṣpatatibhiḥ śādvalairdrabhiranvitam |
praphullataruśākhāgra guṃjadbhramaraghoṣitam || 80 ||
[Analyze grammar]

paṃkeruhaiḥ praphullaiśca nīlotpalacayairyutama |
svargīyasārasahaṃsaśukamenābhisevitam || 81 ||
[Analyze grammar]

turaṃgavadanaiḥ siddhairapsarobhiśca sevitam |
vidyādharībhirdevībhiḥ kinnarībhirvihāritam || 82 ||
[Analyze grammar]

purandhrībhiḥ pārvatībhiḥ kanyābhirabhisaṃgatam |
viṇāvipañcītantrikāmṛdaṃgapaṭahasvanaḥ || 83 ||
[Analyze grammar]

nṛtyadbhirapsarobhiśca kṛtakautukaśobhitam |
devikābhidīrghikābhirgandhibhiḥ susamāvṛtam || 84 ||
[Analyze grammar]

praphullapuṣpavallīnāṃ sukuṃjairupaśobhitam |
himālayapurā'bhyarṇe kuberapurasannidhau || 85 ||
[Analyze grammar]

ramyaṃ viśālaśikharaṃ svargatulyamanoharam |
śivaśṛṃgaṃ haro gatvā dākṣāyaṇyā samaṃ mudā || 86 ||
[Analyze grammar]

ciraṃ reme kṛtasaudhaḥ kṛtakailāsanāmake |
saprākāre mahāśāle kailāsanagare nave || 87 ||
[Analyze grammar]

viśvakarmāṇamāhūya kārayāmāsa satpuram |
kailāsanāmakaṃ yatra bhavanāni cakāsire || 88 ||
[Analyze grammar]

svarṇaratnamaṇinaddhabhittimanti dṛḍhāni ca |
śayyāsthānāni ramyāṇi snānasthānāni santi ca || 89 ||
[Analyze grammar]

śītoṣṇajalakuṇḍāśca vāpyo miṣṭodakāstathā |
mahānasāni ramyāṇi vahniśālāstathā śubhāḥ || 90 ||
[Analyze grammar]

bhakṣyabhojyādisāmagrīrakṣāsthānāni santi ca |
śṛṃgārakāryasusthalyo hāsyavinodamaṇḍapāḥ || 91 ||
[Analyze grammar]

hāvabhāvavilāsārthaṃ guptaharmyāṇi santi ca |
prāghūṇikanivāsārthaṃ gṛhāṇi sumahānti ca || 92 ||
[Analyze grammar]

nidrāvirāmamañcāḍhyaśayyāgṛhāṇi santi ca |
preṃkhādolādisaṃrājadvitardībhūmikottamāḥ || 93 ||
[Analyze grammar]

glahadyūtādiraṅgāni samājaraṃgamaṇḍapāḥ |
catuṣkyaścodakuṃbhyaścā'ṭṭālikāḥ santi sarvaśaḥ || 94 ||
[Analyze grammar]

udyānāśca gṛhodyānā gṛhayānāni vaidyutāḥ |
pradīpāḥ śrāvayantrāṇi dṛśyayantrāṇi santi ca || 95 ||
[Analyze grammar]

vastrāṇi lakṣaśo naikajātīyāni kṛtāni vai |
pātrāṇi svārṇaraupyāṇi vibhūṣā rātnapauraṭāḥ || 96 ||
[Analyze grammar]

veśāstathopaveśāśca kapāṭaguptasaṃgrahāḥ |
vāyuvyajanayantrāṇi kāmasaṃgītaśālikāḥ || 97 ||
[Analyze grammar]

manoraṃjanamārgāśca bahudṛśyā''paṇāstathā |
koṭilakṣā'yutagaṇanivāsāḥ sadgṛhottamāḥ || 98 ||
[Analyze grammar]

vāṭikāśca vihārāśca rājadhānyaḥ śubhāḥ kṛtāḥ |
yatrā'mṛtarasā divyāḥ santi brahmarasāstathā || 99 ||
[Analyze grammar]

kāmottejakapānādyāḥ sadrasāḥ santi yatra vai |
navayauvanapuṣṭyāpādakavallyoṣadhisthalam || 100 ||
[Analyze grammar]

kāmadhenunivāsāśca rasaśālāstathā śubhāḥ |
vṛṣabhasiṃhagaruḍagajāśva vāhanāni ca || 101 ||
[Analyze grammar]

kṛtāni kāritāni vai kanyāśikṣāgṛhāṇi ca |
etādṛśo navastatra kailāso nagarottamaḥ || 102 ||
[Analyze grammar]

kāritaṃ śaṃbhunā viśvakarmadvārā mahottamaḥ |
yasyāgre lokapālānāṃ sodhāḥ kṣudrāstadā'bhavan || 103 ||
[Analyze grammar]

dakṣagṛhācchataguṇasmṛddhiyuktāṃ purīṃ nijām |
vilokya vīkṣya saṃlokya satī jaharṣa sā muhuḥ || 104 ||
[Analyze grammar]

yadyacca kalpyate vastu tattat tatropatiṣṭhate |
na nyūnaṃ vartate kiñcit brahmaviṣṇusurāditaḥ || 105 ||
[Analyze grammar]

rājādhirājasallakṣmyā sevyate satīśaṃkarau |
rājete rājarājeśasampattyā chatracāmaraiḥ || 106 ||
[Analyze grammar]

vimānavaramāruhya kvacidyātaḥ sthalāntaram |
mervādāvantarīkṣe ca svargādau saṃvihṛtya ca || 107 ||
[Analyze grammar]

gatvā gatvā punarnūtne kailāsai'bhyetya rematuḥ |
satīśau caivamānaṃdaṃ gārhasthyamanucakratuḥ || 108 ||
[Analyze grammar]

evaṃ śrīśaṃkarasukhaṃ satyapaśyatsma sarvadā |
śrīśaṃbhurapi sarvatra samadrākṣīt satīsukham || 109 ||
[Analyze grammar]

evamanyonyasaṃsargādanurāgamahīruham |
vardhayāmāsatuḥ satīśivau bhāvā'mbusecanaiḥ || 110 ||
[Analyze grammar]

satī tatraikadā śaṃbhuṃ papraccha vismitānanā |
vairāgyavṛttimāpannā santuṣṭā sukhabhogataḥ || 111 ||
[Analyze grammar]

devadeva mahādeva kṛpāṃ kuru mamopari |
tvaṃ parabrahmatādātmyabhāvā''panno'guṇaḥ paraḥ || 112 ||
[Analyze grammar]

dhanyā'haṃ te priyā jātā jātastvaṃ me patiḥ prabhuḥ |
jñātumicchāmi deveśa tattvaṃ yena bhavaṃ taret || 113 ||
[Analyze grammar]

yatkṛtvā viṣayī jīvo'vaśyaṃ vrajetparaṃ padam |
ākarṇya tat śivo'vocat satījñānārthamatra yat || 114 ||
[Analyze grammar]

śṛṇu priye pravakṣyāmi tattvaṃ mukto bhaved yataḥ |
paratattvaṃ vijānīhi hariṃ nārāyaṇaṃ sadā || 115 ||
[Analyze grammar]

durlabhaṃ tasya vijñānaṃ tajjñātā viralaḥ priye |
nārāyaṇasya dāso'haṃ brahmaṇaḥ paramātmanaḥ || 116 ||
[Analyze grammar]

nārāyaṇasya bhaktiśca bhuktimuktiphalapradā |
smaryase prāgbhave devi naranārāyaṇāśrame || 117 ||
[Analyze grammar]

gatvā'rhaṃ vaiṣṇavo jātastatastvaṃ vaiṣṇavī kṛtā |
golokādvaiṣṇavaścāhaṃ punarbhāvī ca vaiṣṇavaḥ || 118 ||
[Analyze grammar]

tvayā bhāvyaṃ ca vaiṣṇavyā brahmabhaktyā mama gṛhe |
brahmadhāmni sthitasyā'sya nārāyaṇasya sarvathā || 119 ||
[Analyze grammar]

smṛtirvijñānamevārādhanopāstiśca sarvadā |
mananaṃ cātha bhaktiśca premaseveti caikatā || 120 ||
[Analyze grammar]

tayā vai prāpyate nārāyaṇo nānyena kenacit |
sulabhā tatprasādātmā navadhā'tra prakīrtitā || 121 ||
[Analyze grammar]

śravaṇaṃ kīrtanaṃ caiva smaraṇaṃ sevanaṃ sadā |
dāsyaṃ tathā'rcanaṃ devi vandanaṃ śrīharestathā || 122 ||
[Analyze grammar]

sakhyamātmaniveditvaṃ navāṃgāni ca tāni vai |
kathādernityasammānaṃ kurvandehādibhirhareḥ || 123 ||
[Analyze grammar]

tadarthapānaṃ sthairyeṇa yattacchravaṇamucyate |
śrutvā tadarthamananaṃ kartavyaṃ phaladaṃ hi tat || 124 ||
[Analyze grammar]

hṛdaye śrīharerjanmakarmāṇi cintayanmuhuḥ |
prītyoccoccāraṇaṃ teṣāmetatkīrtanamucyate || 125 ||
[Analyze grammar]

vyāpakaṃ śrīhariṃ jñātvā sa vai sarvatra sarvadā |
smaryate yena manasā smaraṇaṃ tadudāhṛtam || 126 ||
[Analyze grammar]

sarvathā jāgrati svapne vastubhiḥ svasya supriyaiḥ |
paricaryā tu yā tasya sevanaṃ tadudāhṛtam || 127 ||
[Analyze grammar]

sadā'nukūlabhāvena hṛdayāmṛtabhogataḥ |
hareḥ priyaṃ yathā vṛttyaṃ tadvai dāsyamudāhṛtam || 128 ||
[Analyze grammar]

sadā smṛddhyānukūlyena vidhinā paramātmane |
arpaṇaṃ ṣoḍaśānāṃ vai pādyādīnāṃ tadarcanam || 129 ||
[Analyze grammar]

nāmoccāraṇadhyānābhyāṃ manasā vacasā tathā |
yadaṣṭāṃgena bhūsparśā daṇḍavat vandanaṃ hi tat || 130 ||
[Analyze grammar]

maṃgalā'maṃgalaṃ yadyat karoti śrīharirhi me |
sarvaṃ tanmaṃgalāyeti viśvāsaḥ sakhyamucyate || 131 ||
[Analyze grammar]

kṛtvā dehādikaṃ tasya prītyai sarvaṃ tadarpaṇam |
nirvāhāya svaśūnyatvaṃ harāvātmaniveditā || 132 ||
[Analyze grammar]

navāṃgāni harerbhakterbhuktimuktipradāni ca |
mama priyāṇi cātīva vijñānotpādakāni ca || 133 ||
[Analyze grammar]

upāṃgāni ca tadbhakterbahūni santi me priye |
tulasīsevanādīni mandiramārjanāni ca || 134 ||
[Analyze grammar]

devālayaprarakṣādi samūhyāni vicārataḥ |
iti sāṃgopāgabhaktirhareḥ sarvottamā priye || 135 ||
[Analyze grammar]

jñānavairāgyajananī muktidāsī virājate |
trailokye bhaktisadṛśaḥ panthā nāsti sukhāvahaḥ || 136 ||
[Analyze grammar]

bhaktimato janasya śrīhariścāsti sahāyakṛt |
bhaktitattvaṃ paratattvaprāpakaṃ tattvameva tat || 137 ||
[Analyze grammar]

sā ca bhaktiḥ punardvedhā saguṇā nirguṇā tathā |
phalecchayā kṛtā sarvā saguṇā parikathyate || 138 ||
[Analyze grammar]

phalecchārahitā saiva nirguṇā bhaktirucyate |
sā ca bhaktiḥ punardvedhā vaidhī svābhāvikī tathā || 139 ||
[Analyze grammar]

prasahya vidhinā kāryā vaidhī sā tvājñayā kṛtā |
svabhāvenaiva kāryā yā svābhāvikī tu sā matā || 140 ||
[Analyze grammar]

sā ca bhaktiḥ punadvaidhā parā cā'thā'parā tathā |
parā sādhyaharirūpā'parā sādhanarūpiṇī || 141 ||
[Analyze grammar]

naiṣṭhikyanaiṣṭhikī dvedhā ṣaḍvidhā naiṣṭhikī matā |
viśvāso varaṇaṃ nyāsaḥ kārpaṇyaṃ ca sthirā matiḥ || 142 ||
[Analyze grammar]

ānukūlyasahakṛtaprātikūlyavivarjanam |
ṣaḍvidhā naiṣṭhikī bhaktiranaiṣṭhikyekadhā matā || 143 ||
[Analyze grammar]

svārthamātrakṛtā bhaktiranaiṣṭhikī prakīrtitā |
vihitā'vihitā sā'tha dvedhā''jñā vihitā matā || 144 ||
[Analyze grammar]

anājñā cā'vihitoktā punarmadhyottamā'vamā |
tredhā tatra taratamairbhāvairbhavatyanekadhā || 145 ||
[Analyze grammar]

harernāmajapasāmyaṃ nānye bhavati kutracit |
harirityarthakaṃ brahma vyāharaṃśca hariṃ smaran || 146 ||
[Analyze grammar]

yaḥ prayāti tyajandehaṃ sa yāti paramāṃ gatim |
bhaktyā tuṣyati lokaśca bhaktyā tuṣyati vai hariḥ || 147 ||
[Analyze grammar]

śṛṇu devi mayā pūrve kalpe nārāyaṇopari |
yugaṣaṣṭisahasrāṇi tapastaptaṃ suduścaram || 148 ||
[Analyze grammar]

tadā nārāyaṇaḥ sākṣādabhūnme dṛṣṭigocaraḥ |
atīva kamanīyāṃgaḥ kiśoraḥ śyāmasundaraḥ || 149 ||
[Analyze grammar]

rūpānurūpāvayavaḥ suprasannamanoharaḥ |
dṛṣṭvā hariṃ tādṛśaṃ me netre tṛptiṃ na vai gate || 150 ||
[Analyze grammar]

paśyannimeṣarahito'bhavaṃ tṛpto na vai ciram |
tadā māṃ bhagavānprāha kiṃ śaṃbho naiva tṛpyasi || 151 ||
[Analyze grammar]

gacchāmyahaṃ svakaṃ dhāma varaṃ vṛṇu yathepsitam |
tava bhaktyā ca tapasā prasanno'smi ca mā ciram || 152 ||
[Analyze grammar]

tadā mayā'rthitaṃ nārāyaṇāt śṛṇu priye mama |
tavopabhogyaṃ yatsyāttanna me bhogyaṃ bhavettu prāk || 153 ||
[Analyze grammar]

tava prasādasarvasvaṃ mama bhogyaṃ mataṃ prabho |
tava dāsyaṃ sadā me syādātmaniveditā'pi ca || 154 ||
[Analyze grammar]

anyāpi vividhā bhaktistavaiva me'stu mokṣadā |
mastake me jaṭā nityā tapasyābodhikā'stu vai || 155 ||
[Analyze grammar]

śarīre me citābhasma vairāgyabodhikā'stu vai |
samatā candane paṃke loṣṭhe ratne maṇīśvare || 156 ||
[Analyze grammar]

sadāstu mukuṭādyā na bhūṣā dhāryā mayā prabho |
tatra sarpā mayā dhāryā garuḍadveṣiṇo hare || 157 ||
[Analyze grammar]

vāhanaṃ tu vṛṣo golokāt kṛṣṇārpita eva me |
pārijātādikaṃ puṣpaṃ sugandhi candanādikam || 158 ||
[Analyze grammar]

tava yogyaṃ bhavettatra me bhāgaḥ kvāpi mā bhavet |
dhattūre'stu sadā prītirbilvapatrānudhāraṇe || 159 ||
[Analyze grammar]

gandhahīneṣu puṣpeṣu prītirme'stu virāgataḥ |
vastraveśe mā'stu rāgo'stu gajavyāghracarmaṇoḥ || 160 ||
[Analyze grammar]

dityatalpe divyabhoge mā'stu prītiḥ kadācana |
śmaśāne'stu sadā vāso janatāyāṃ na me kvacit || 161 ||
[Analyze grammar]

śmaśāne vighnaśūnye me dhyānaṃ tava sadā bhavet |
jñānaṃ te śrīhare nityaṃ guṇatrayavināśakam || 162 ||
[Analyze grammar]

triśūlarūpaṃ me syācca vairāgyaṃ bhasmarūpakam |
dharmo me vṛṣarūpaḥ syādbhaktirme yogitā tvayi || 163 ||
[Analyze grammar]

kaṇṭhahāraśca te bhaktivirodhiśirasāṃ kṛtaḥ |
bhūṣāmālāśca te'yogyarudrākṣa phalakalpitāḥ || 164 ||
[Analyze grammar]

mā'stu vṛndādivṛkṣāṇāṃ bhogyaṃ te mā'stu matkṛte |
lakṣmīrdevī mama mā'stu kintvalakṣmīrmamā'stu vai || 165 ||
[Analyze grammar]

miṣṭaṃ peyaṃ hareryatsyāt tanme mā'stu kadācana |
mamā'stu viṣadhattūragaṃjābhaṃgādikaṃ sadā || 166 ||
[Analyze grammar]

ityevaṃ tu mayā sarvaṃ tapaḥkāle prapārthitam |
hariṇā ca pradattaṃ tadvaradānaṃ śubhāya me || 167 ||
[Analyze grammar]

prabhaktānāṃ praśikṣārthaṃ dāsabhaktyabhivyaṃjakam |
asurāṇāṃ vimohārthaṃ rakṣitaṃ tu tadājñayā || 168 ||
[Analyze grammar]

tasmāt sati tvayā dāsye harervṛttyaṃ na cā'nyathā |
śṛṇu cānyāṃ kathāṃ śreṣṭhāṃ hareḥ prasādagarbhitām || 169 ||
[Analyze grammar]

sanatkumāro vaikuṇṭhamekadā tu jagāma ha |
dadarśa bhuktavantaṃ ca hariṃ nārāyaṇaṃ muniḥ || 170 ||
[Analyze grammar]

tuṣṭāva gūḍhaiḥ stotraiśca praṇamya bhaktipūrvakam |
avaśeṣaṃ dadau tasmai santuṣṭo bhaktavatsalaḥ || 171 ||
[Analyze grammar]

tatraiva kiṃcittenaiva bhuktaṃ śeṣaṃ ca yaddhṛtam |
tadvai rarakṣa bandhūnāṃ bhakṣaṇārthaṃ ca durlabham || 172 ||
[Analyze grammar]

tasmādapi ca kiṃcicca siddhāśramasthitāya me |
dattavān sa munistacca bhuktaṃ sarvaṃ mayā''darāt || 173 ||
[Analyze grammar]

bhuktvā'haṃ durlabhaṃ hareḥ prasādaṃ nṛtyamācaram |
pulakāṃkitasarvāṃgaḥ sāśrunetro'bhavaṃ mudā || 174 ||
[Analyze grammar]

śrīharerguṇagānaṃ ca tālamānena susvaram |
rāgabhedaikatānena bhaktyā cā'karavaṃ tadā || 175 ||
[Analyze grammar]

papāta ḍamarurhastācchṛṃgaṃ ca vyāghracarma ca |
svayaṃ nipatya paścācca rudanmūrchāṃ gato'pyaham || 176 ||
[Analyze grammar]

atīva kamanīyaṃ śrīhareḥ rūpaṃ manoharam |
hṛdaye mūrchitastatra dhyāyāmi tāvadeva ha || 177 ||
[Analyze grammar]

tadantare ca durgā tvaṃ mudā''jagāma bhāminī |
ahamutthāya mūrchāto yāvattiṣṭhāmi bhāmini || 178 ||
[Analyze grammar]

tāvanmūrchākaraṃ tatra kāraṇaṃ pṛṣṭameva me |
mayā tubhyaṃ tu kathitaṃ prasādalābha eva yat || 179 ||
[Analyze grammar]

jñātvā tvaṃ kupitā devi proktavatī ca māṃ tadā |
tvaṃ poṣṭā jagatāṃ pātā mamaiva ca viśeṣataḥ || 180 ||
[Analyze grammar]

vaktā caturṇāṃ vedānāṃ dātā ca sarvasampadām |
tvaṃ cetkaroṣi durnītiṃ ko dharmaṃ rakṣayiṣyati || 181 ||
[Analyze grammar]

sadā te paripālyā'haṃ poṣyā bhaktā ca kiṃkarī |
vaṃcitā karmadoṣeṇa hareḥ prasādabhakṣaṇe || 182 ||
[Analyze grammar]

kiṃcicchuddhaṃ hiraṇyena kiṃcicchuddhaṃ ca vāyunā |
kiṃcitprakṣālanenaiva sarvaṃ viṣṇornivedanāt || 183 ||
[Analyze grammar]

viṣṇorniveditā'nnena yaṣṭavyāḥ sarvadevatāḥ |
pitaro'tithayaścaivamiti vedeṣu niścitam || 184 ||
[Analyze grammar]

anivedyamabhakṣyaṃ ca naivedyaṃ bhakṣyameva hi |
evamaśnāti yo bhaktyā pārṣadapravaro bhavet || 185 ||
[Analyze grammar]

amṛtaṃ sarvavastūnāmiṣṭasāraṃ sudurlabham |
viṣṇorniveditānnasya kalāṃ nā'rhati ṣoḍaśīm || 186 ||
[Analyze grammar]

hantyakālikamṛtyuṃ tadamṛtaṃ mūḍharaṃjanam |
naivedyaṃ ca harereva haritulyaṃ karotyaho || 187 ||
[Analyze grammar]

yadṛcchayā tannaivedyaṃ yo bhuṃkte sādhusaṃgataḥ |
ṣaṣṭivarṣasahasrāṇāṃ prāpnoti tapasaḥ phalam || 188 ||
[Analyze grammar]

yo nivedya hariṃ bhuṃkte bhaktyā bhaktaśca nityaśaḥ |
sa paṃktipāvano bodhyaḥ sa harestejasā samaḥ || 189 ||
[Analyze grammar]

nā'haṃ vedavidhātryasmi kimahaṃ vaktumīśvarī |
suciraṃ tu tapastaptvā mayā labdhastvamīśvaraḥ || 190 ||
[Analyze grammar]

tvayā viṣṇoḥ prasādena vaṃcitā'haṃ kathaṃ prabho |
ityabhidhāya durgā tvaṃ rodanaṃ kṛtavatyasi || 191 ||
[Analyze grammar]

tato'haṃ tvāṃ parapremṇā kṛtvā vakṣasi sādaram |
kareṇa cakṣuṣornīraṃ saṃmṛjyā'bodhayaṃ muhuḥ || 192 ||
[Analyze grammar]

parituṣṭā tadā tvaṃ māṃ bhartāramuktavatyasi |
kalevaraṃ ca tyakṣyāmi naivedyena vinā hareḥ || 193 ||
[Analyze grammar]

bibharmi dehaṃ satataṃ tava saubhāgyavardhanam |
kathaṃ vahāmi saubhāgyarahitaṃ tu kalevaram || 194 ||
[Analyze grammar]

apūrvaṃ harinaivedyaṃ janmamṛtyujarāharam |
mahyaṃ dattaṃ na vai yasmātpaśya dehaṃ tyajāmyaham || 195 ||
[Analyze grammar]

ityuktvā tvaṃ mahādevi dehaṃ tyaktuṃ samudyatā |
tadā mayā stutā tvaṃ vai mahādevi sthirā bhava || 196 ||
[Analyze grammar]

mamā'parādhamakhilaṃ kṣantumarhasi sundari |
māṃ bhṛtyaṃ tapasā krītaṃ kṛpāṃ kuru mamopari || 197 ||
[Analyze grammar]

icchaiva śrīhareḥ sākṣānnā'haṃ dātumapi kṣamaḥ |
śrutvaivaṃ śrīharericchāṃ durgā tuṣṭā babhūva sā || 198 ||
[Analyze grammar]

tato jagāma tūrṇaṃ svarṇadīṃ snānārthamityatha |
snātvā sampūjya bhaktyā ca kṛtvā pakvānnamityatha || 199 ||
[Analyze grammar]

naivedye me'rpitavatī tadā nārāyaṇo'pyaham |
gatvā sarvamahaṃ bhuktvā tasyai datvā'bhivāñchitam || 200 ||
[Analyze grammar]

ājagāma ca vaikuṇṭhaṃ lakṣmi prasādameva tam |
bhartre datvā ca śeṣaṃ yad durgā bhuktavatī ca tat || 201 ||
[Analyze grammar]

evaṃ śivāśivau bhaktau prāgbhavīyau hi vaiṣṇavau |
vartete sarvadā magnau yanmūrtau yoginau parau || 202 ||
[Analyze grammar]

na saṃvasāmi goloke vaikuṇṭhe tava vakṣasi |
sadā śivasya hṛdaye nibaddho bhaktipāśataḥ || 203 ||
[Analyze grammar]

svarasiddhaṃ sutānena pañcavaktreṇa śaṃkaraḥ |
śaśvadgāyati madgāthāṃ tenā'haṃ taddhṛdi sthitaḥ || 204 ||
[Analyze grammar]

mama bhaktiṃ ca dāsyaṃ ca muktiṃ ca sarvasampadaḥ |
mayyevāyaṃ sarvasiddhīḥ samarpayati śaṃkaraḥ || 205 ||
[Analyze grammar]

pañcavaktre mannāma yo hi gāyatyaharniśam |
madrūpaṃ dhyāyati śaśvanna bhaktaḥ śaṃkarātparaḥ || 206 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne satīśivayorhimācale vihāraḥ gṛhanirmāṇārthaṃ satīprārthanāgṛhayogyaparvatādināmāni himālaye kailāsapurīnirmāṇaṃ satīkṛtasaṃsārataraṇapraśraḥ śivoktaharinavadhābhaktiḥ śivakṛtapūrvakalpīyatapasā haridarśanaṃ haribhogyaṃ śivasyā'bhogya |
mitidhattūrabhasmādidhāraṇaṃ pārvatyoktaharinaivedyamahimetyādinirūpaṇanāmā trisaptatyadhikaśatatamo'dhyāyaḥ || 173 ||
[Analyze grammar]