Chapter 161

śrīnārāyaṇa uvāca |
śṛṇu lakṣmi tato devau dāmodaranarāyaṇau |
samāgatān bhojayitvā sarvān brahmasurāṃstataḥ || 1 ||
[Analyze grammar]

jagṛhatuḥ prasādaṃ taṃ haryarpitaṃ ca pāyasam |
dāmodarastataḥ prāha mahimānaṃ narāyaṇam || 2 ||
[Analyze grammar]

idaṃ guptatamaṃ kṣetraṃ sarvaprāṇisukhāvaham |
mokṣadaṃ sarvajantūnāṃ vaiṣṇavaṃ śaivameva vā || 3 ||
[Analyze grammar]

vrahmaghno goghnamātṛghnagurughnā'rbhakaghātakāḥ |
strīghnaścātra hrade snātvā mucyante nātra saṃśayaḥ || 4 ||
[Analyze grammar]

snātvā'tra sukṛtī bhūtvā mṛto yāyātparaṃ padam |
kṣetre'tra nivasanto ye bhaktāḥ sukṛtino hareḥ || 5 ||
[Analyze grammar]

anyoddhārasamarthā vai nārāyaṇasamā matāḥ |
bhittvājanmabandhajālaṃ prāpayanti hareḥ padam || 6 ||
[Analyze grammar]

iḍā ojasvatī bodhyā bhadrā tu piṃgalā matā |
svarṇarekhā suṣumṇā'sti tayā mokṣamavāpnuyāt || 7 ||
[Analyze grammar]

anāyāsena vai yatra mokṣaprāptiḥ prajāyate |
nānāvarṇā vikarmāṇaścāṇḍālā ye jugupsitāḥ || 8 ||
[Analyze grammar]

kilbiṣaiḥ pūrṇadehāśca prakṛṣṭaiḥ pātakaistathā |
bheṣajaṃ paramaṃ teṣāṃ kṣetraṃ vastrāpathaṃ matam || 9 ||
[Analyze grammar]

duṣṭāndhādīnakṛpaṇānpāpānduṣkṛtakāriṇaḥ |
ahantu dayayā sarvānnayāmi paramāṃ gatim || 10 ||
[Analyze grammar]

vastrāpathaṃ gatā ye vai mahāpuṇyakṛto narāḥ |
akṣayyā hyajarāścaiva videhāśca bhavanti te || 11 ||
[Analyze grammar]

ajñānājjñānato vāpi nāryā vā puruṣeṇa vā |
yatkiṃcidaśubhaṃ karma kṛtaṃ cāpi kubuddhinā || 12 ||
[Analyze grammar]

vastrāpathe praviṣṭasya tatsarvaṃ bhasmasādbhavet |
sadā yajati yajñena sadā dānaṃ prayacchati || 13 ||
[Analyze grammar]

sadā tapasvī bhavati raivatādrau sthito naraḥ |
sarvātmanā tapaḥ satyaṃ prāṇināṃ raivatācale || 14 ||
[Analyze grammar]

na sā gatiḥ kurukṣetre gaṃgādvāre na puṣkare |
yā gatirvihitā puṃsāṃ raivatādrinivāsinām || 15 ||
[Analyze grammar]

raivatādrau sthitā nityaṃ pāṃśubhirvāyuneritaiḥ |
spṛṣṭā duṣkṛtakarmāṇo yānti vai paramāṃ gatim || 16 ||
[Analyze grammar]

revatādrau vased yaśca saṃyatātmā samāhitaḥ |
trailokyamapi bhuṃjāno vāyubhakṣasamaḥ smṛtaḥ || 17 ||
[Analyze grammar]

raivatādrau vasenmāṃsaṃ laghvāhāro jitendriyaḥ |
cāturmāsyavṛtānyeva kṛtāni syuśca tena vai || 18 ||
[Analyze grammar]

janmamṛtyubhayaṃ jītvā sa yāti paramāṃ gatim |
niḥśreyasagatiṃ puṇyāṃ tathā yogagatiṃ vrajet || 19 ||
[Analyze grammar]

nahi brahmagatirlabhyā janmāntaraśatairapi |
prāpyate raivatabalāt prabhāvācchrīharestathā || 20 ||
[Analyze grammar]

ekāhārastu yastiṣṭhenmāsaṃ tu raivatācale |
yāvajjīvakṛtaṃ pāpaṃ māsenaikena naśyati || 21 ||
[Analyze grammar]

vighnairāhanyamāno'pi raivataṃ yastu na tyajet |
sa muṃcati jarāmṛtyū janma caitaddhi naśvaram || 22 ||
[Analyze grammar]

ādehapatanād ye tu sevante raivatācalam |
te mṛtā haṃsayānena divyān lokān prayānti hi || 23 ||
[Analyze grammar]

saṃsāravyāptacitto'pi tyaktamokṣakriyo janaḥ |
raivatādrau mṛtaḥ so'pi saṃsāraṃ na punarviśet || 24 ||
[Analyze grammar]

svargā'pavargayorheturetattīrthavaraṃ bhuvi |
yastatra paṃcatāṃ yāti tasya muktirna saṃśayaḥ || 25 ||
[Analyze grammar]

janmāntarasahasreṇa yogī yatpadamāpnuyāt |
raivatādrau paraṃ mokṣaṃ maraṇādadhigacchati || 26 ||
[Analyze grammar]

brāhmaṇāḥ kṣatriyā vaiśyāḥ śūdrāśca varṇasaṃkarāḥ |
kṛmayaścaiva ye mlecchāḥ saṃkīrṇāḥ pāpayonayaḥ || 27 ||
[Analyze grammar]

kīṭāḥ pipīlikāścāpi ye tvanye mṛgapakṣiṇaḥ |
kālena maraṇaṃ prāptāste'pi deveśvarāḥ smṛtāḥ || 28 ||
[Analyze grammar]

akāmo vā sakāmo vā tiryagyonigato'pi vā |
raivatādrau tyajanprāṇān muktibhāṅ nātra saṃśayaḥ || 29 ||
[Analyze grammar]

raivatādrau kṛtavāsāḥ svarṇarekhājalā'plavāḥ |
dāmodaraprāṇacittā jīvanmuktā na saṃśayaḥ || 30 ||
[Analyze grammar]

raivatādrau mṛtyukāle harirdāmodaraḥ svayam |
lakṣmīnārāyaṇamantraṃ karṇajāpyaṃ prayacchati || 31 ||
[Analyze grammar]

atiprasannacittena raivatādrinivāsine |
mumūrṣordakṣiṇe karṇe yasya kasyāpi vā svayam || 32 ||
[Analyze grammar]

upadekṣyāmi manmantraṃ sa mukto bhavitā dhruvam |
dāmodare mṛtaḥ ko'pi na yāti narakaṃ kvacit || 33 ||
[Analyze grammar]

vāmanānugṛhītāste sarve yānti parāṃ gatim |
prāṇāniha janāstyaktvā joṣante na punaḥ kvacit || 34 ||
[Analyze grammar]

prathamo revatīkuṇḍastato dāmodarāhvayaḥ |
nārāyaṇākhyastṛtīyo mṛgīkuṇḍaścaturthakaḥ || 35 ||
[Analyze grammar]

pañcamo bhavakuṇḍaśca ṣaṣṭho gaṃgā tu gomukhī |
kamaṇḍaluḥ saptamaścā'ṣṭamo bhairavanāmakaḥ || 36 ||
[Analyze grammar]

mārkaṇḍeyaśca daśamo hyekādaśastu dattakṛt |
ete snātāśca pītāśca dṛṣṭāścā''cāmitā api || 37 ||
[Analyze grammar]

spṛṣṭā api janān śuddhān kṛtvā mokṣaṃ nayanti hi |
anantā sā gatisteṣāṃ yā gatiryogināṃ matā || 38 ||
[Analyze grammar]

teṣu muktiḥ samuddiṣṭā patitānāṃ tu pāvanī |
tatrāpi sarvakuṇḍānāṃ śreṣṭho nārāyaṇo hradaḥ || 39 ||
[Analyze grammar]

yathā nārāyaṇahradastathā dāmodaro hradaḥ |
yatra nītyaṃ śrīhareśca sānnidhyaṃ vāmanasya ca || 40 ||
[Analyze grammar]

daśānāmaśvamedhānāṃ yajñānāṃ yatphalaṃ smṛtam |
tadavāpnoti dharmātmā tatra snātvā na saṃśayaḥ || 41 ||
[Analyze grammar]

upavāsaṃ tu yaḥ kṛtvā viprān sādhūṃśca tarpayet |
sa sautrāmaṇiyajñasya phalamāpnoti niścitam || 42 ||
[Analyze grammar]

tatra dīpapradānena jñānavatsphuratīndriyam |
ārārtrikapradānena nairogyaṃ jāyate sadā || 43 ||
[Analyze grammar]

kimatra bahunoktena dharmādīṃstu prakurvataḥ |
śrīhariṃ vai samuddiśya tadanantaphalaṃ bhavet || 44 ||
[Analyze grammar]

daśāśvamedhikaṃ puṇyaṃ puṣpadāne prakīrtitam |
agnihotraphalaṃ dhūpe gandhe bhūdānajaṃ phalam || 45 ||
[Analyze grammar]

mārjane gopradānasya phalamatra prakīrtitam |
anulepe daśaguṇaṃ mālye daśaguṇaṃ smṛtam || 46 ||
[Analyze grammar]

gīte sahasraguṇitaṃ vādye lakṣaguṇaṃ matam |
dāmodaraṃ raivatādrāvarcayanti stuvanti ye || 47 ||
[Analyze grammar]

sarvapāpavimuktāste vaikuṇṭhaṃ yānti śāśvatam |
kalpakoṭiśataiścāpi teṣāṃ nāsti punarbhavaḥ || 48 ||
[Analyze grammar]

ye tu dhyānaṃ samāsādya muktātmānaḥ samāhitāḥ |
lakṣmīnārāyaṇaṃ jāpaṃ kurvanti niyatendriyāḥ || 49 ||
[Analyze grammar]

raivatādrau sthitā nityaṃ kṛtārthāste janottamāḥ |
tārayitvā'nantajīvān viṣṇulokaṃ prayānti te || 50 ||
[Analyze grammar]

māghyāṃ tathā ca kārtikyāṃ sādhvyaśca sādhavastathā |
dṛṣṭāḥ spṛṣṭā natāścaivā'rcitāḥ saṃbhojitāstathā || 51 ||
[Analyze grammar]

śuśrūṣitā marditāśca sevitā vāhitāstathā |
yena kena prakāreṇa yairjanaiḥ samprasāditāḥ || 52 ||
[Analyze grammar]

prasāditā ramā taiśca nārāyaṇaḥ prasāditaḥ |
tatra lakṣmīstathā nārāyaṇo vai vartate sadā || 52 ||
[Analyze grammar]

sādhvīsādhusvarūpeṇa lakṣmīnārāyaṇaḥ svayam |
vastrāpathe vicarati janakalyāṇahetave || 54 ||
[Analyze grammar]

tayoranugrahātkāryaṃ sarve siddhyati mānasam |
aihikaṃ ca pāralaukikaṃ ca siddhyati vai dhruvam || 55 ||
[Analyze grammar]

dehena manasā vācā sevayā bhojanena ca |
arpaṇena ca yairatra vastrāpathe tu raivate || 56 ||
[Analyze grammar]

sādhavaḥ sevitāḥ samyak sevitāḥ sarvadevatāḥ |
hariḥ svayaṃ prasevito mokṣaṃ dadāti sevine || 57 ||
[Analyze grammar]

vastrāpathaṃ mahattīrthaṃ sādhūn sādhvīṃśca devatāḥ |
nindiṣyanti janā ye te yāsyanti narakaṃ dhruvam || 58 ||
[Analyze grammar]

bhagavatā nṛsiṃheṇa cāgatya raivate girau |
yatra svarṇanadīpārśve guhāyāṃ vāsa ādṛtaḥ || 59 ||
[Analyze grammar]

tatsthalaṃ mokṣadaṃ puṇyaṃ rajo'pyaghavināśakam |
kiṃ bahunā'tra sattīrthe pratyekaṃ raja ityapi || 60 ||
[Analyze grammar]

vastrāpathe raivatādrau patraṃ puṣpaṃ tṛṇādikam |
sarvaṃ divyaṃ ca pāpaghnaṃ muktidaṃ nātra saṃśayaḥ || 61 ||
[Analyze grammar]

rājñā''nartena golokāt khaṇḍaḥ saurāṣṭrasaṃjñakaḥ |
sthāpito madhyabhavane punastatra harergalāt || 62 ||
[Analyze grammar]

kaustubhakhaṇḍaānītastaijaso raivatācalaḥ |
punaśca revatīnakṣatrasya khaṇḍo'pi saṃsthitaḥ || 63 ||
[Analyze grammar]

punarmerostu śikharaṃ mandaraṃ kumudaṃ tathā |
aruṇaṃ ceti divyāni ūrjayanto giristathā || 64 ||
[Analyze grammar]

brahmaviṣṇumaheśānā yatra tiṣṭhanti nityadā |
svarṇarekhā nadī divyā ojasvatī tathā śubhā || 65 ||
[Analyze grammar]

kṛṣṇā bhadrā tathā'nyāśca hareḥ patnyaḥ saridrūpāḥ |
sarasvatī tathā''kāśagaṃgā śṛṃgeṣu vartate || 66 ||
[Analyze grammar]

ko'sya raivatarājasya mahimnaḥ pārameti nu |
sarve divyāḥ samuditāstasmānmokṣasthalaṃ hi tat || 67 ||
[Analyze grammar]

bhuvastalād bahiryāvān tato daśaguṇastu saḥ |
pṛthvīgarbhe praviṣṭo'sti raivatācalabhūdharaḥ || 68 ||
[Analyze grammar]

vastrāpathe pradṛśyante ye prakīrṇakaparvatāḥ |
tāni tu śikharāṇyeva dṛśyante na tu parvataḥ || 69 ||
[Analyze grammar]

yadā hyāgatya patito vivare raivatācalaḥ |
daśayojanamucchrāyo hyabhūtsa raivatācalaḥ || 70 ||
[Analyze grammar]

vegenaivā'patanmāndyādyadā pṛthvyāmavātarat |
yojanānāṃ śataṃ tatra gagane bhramaṇaṃ hyabhūt || 71 ||
[Analyze grammar]

pūrvottaradiśābhāgāt punaḥ punarbhramiṃ yadā |
nyūnavegāṃ hyakarot sa tadā tanmūrdhabhāgataḥ || 72 ||
[Analyze grammar]

dakṣiṇāyāṃ diśi vegācchikharāṇāṃ sahasrakam |
bhaṃktvā viyujya cotkṛtya patitaṃ bahuvistaram || 73 ||
[Analyze grammar]

vyāghrāraṇye patitāni raivataśikharāṇi vai |
tathaiva tāni sthāsyanti yāvadācandratārakam || 74 ||
[Analyze grammar]

somanāthaṃ samārabhya bhīmanāthāvadhi kṣitau |
śikharāṇi patitāni vyāghrāraṇyasthalāntare || 75 ||
[Analyze grammar]

tadatra raivate bhāge bhavaṃ dāmodaraṃ tathā |
smṛtvā mṛtiṃ ca yāsyanti yāsyanti muktimeva te || 76 ||
[Analyze grammar]

māhātmyamityupādiśya harirdāmodaraḥ svayam |
samāśliṣyā'tha taṃ vipraṃ muhuḥ patnīvrataṃ muhuḥ || 77 ||
[Analyze grammar]

prāha tīrthāya gamane tirodadhe svayaṃ tadā |
iti te kathitaṃ lakṣmi pūrvaṃ yaccaritaṃ mayā || 78 ||
[Analyze grammar]

paṭhitaṃ pāṭhitaṃ yadvā śrāvitaṃ mokṣadaṃ sadā |
naitādṛśaṃ bhavedanyat kiṃ bhūyaḥ śrotumicchasi || 79 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne raivatādrivastrāpathakṣetratīrthamahimavarṇananāmaikaṣaṣṭhyadhikaśatatamo'dhyāyaḥ || 161 ||
[Analyze grammar]