Chapter 139

śrī nārāyaṇa uvāca |
prahlādaḥ prāha tāndaityārbhakān jñānānurāgiṇaḥ |
mandarādrau me pitari tapati dhūmra utthite || 1 ||
[Analyze grammar]

valmīkavaṃśakāṣṭhādicchanne daityā nirāśakāḥ |
mṛtau daityapramūrdhanya iti matvā ca duḥkhitāḥ || 2 ||
[Analyze grammar]

tadā tānnirbalān jñātvā cakruryuddhamatiṃ surāḥ |
hatā daityāḥ surasainyairdudruvuḥ sarvatodiśam || 3 ||
[Analyze grammar]

strīputraduhitṛsvasṛpitṛkuṭumbajīvinaḥ |
dhanadhānyaparicchadān parityajya ca dudruvuḥ || 4 ||
[Analyze grammar]

devāḥ sarvabalopetāḥ vyalumpan daityasaṃgrahān |
rājaprāsādamācchidya kalyāṇīṃ mama mātaram || 5 ||
[Analyze grammar]

indro nītvā yadā yāti svargaṃ tāvacca nāradaḥ |
mārge eva militastaṃ prāha kva nayasi drutam || 6 ||
[Analyze grammar]

satīṃ netumayogyastvaṃ muñcaināṃ vai nirāgasam |
indraḥ prāha tadā'syāstu garbhe daityasya bālakaḥ || 7 ||
[Analyze grammar]

aprasahyo'sti tasmādvai yāvatprasava rakṣaya |
kṛtārthena parityājyā nānyanme'sti prayojanam || 8 ||
[Analyze grammar]

nāradaḥ prāha cendrāya garbho mahān sa vaiṣṇavaḥ |
devaviṣṇugavāṃ bhakto viprasāttvatasevakaḥ || 9 ||
[Analyze grammar]

yadbhayaṃ te'sti tannaiva śaṃkanīyaṃ parityaja |
nāradoktaṃ tadā hīndraḥ svīkṛtyaināṃ vihāya ca || 10 ||
[Analyze grammar]

namaskṛtya gataḥ svargaṃ nārado'pi mahānprabhuḥ |
mātaraṃ me saha nītvā jagāma svāśramaṃ prati || 11 ||
[Analyze grammar]

āśvāsanena sambodhya yāvattapasaste patiḥ |
āgacchet tāvadatraiva sukhaṃ vatse samuṣyatām || 12 ||
[Analyze grammar]

ityāśrayaṃ śubhaṃ labdhvā satyavātsīcca nirbhayā |
nityaṃ paramayā bhaktyā ṛṣiṃ paryacaranmudā || 13 ||
[Analyze grammar]

ṛṣiḥ sakaruṇastasyai prādāt jñānaṃ tu mokṣadam |
tatsarvaṃ tu mayā garbhagatenā''sāditaṃ sthiram || 14 ||
[Analyze grammar]

tanmāturme layaṃ yātaṃ mamaiva dṛḍhatāṃ gatam |
dṛḍhasaṃskārakaṃ sarvaṃ smarāmi ca yathoditam || 15 ||
[Analyze grammar]

jñānaṃ rocayamānānāṃ bālānāṃ bhavatāṃ mudā |
śreyaskaraṃ paraṃ no'sti śraddhāgrāhyaṃ hi tadyataḥ || 16 ||
[Analyze grammar]

vacmi kiñcicca tajjñānaṃ sāramākṛṣya sarvataḥ |
ādarśasvacchahṛdaye drāglagnaṃ mokṣadaṃ bhavet || 17 ||
[Analyze grammar]

strībālānāṃ kṛte yena lābhaḥ sāralyato bhavet |
tadyathāvanmano datvā śrotavyaṃ sāramātmanaḥ || 18 ||
[Analyze grammar]

pūrvakarmānusāreṇa tejasvyātmā'tisūkṣmakaḥ |
piturdhātau viśatyeva vīrya garbhe niṣicyate || 19 ||
[Analyze grammar]

vīryaṃ tadbhautikaṃ vastu jīvaḥ saccitsukhātmakaḥ |
aṇuḥ prakāśo nityaśca jñātā jñānaghanātmakaḥ || 20 ||
[Analyze grammar]

jīvātmanā'nvitaṃ vīryaṃ rajoyuktaṃ bhavatyatha |
rajovīryātmabhiḥ sarvā sūṣṭirbhavati cetanā || 21 ||
[Analyze grammar]

vyātmako'yaṃ bhaved dehaḥ puruṣaḥ pramadā'thavā |
napuṃsako vā jāyeta ṣaṭkośātmātridhā'pi vai || 22 ||
[Analyze grammar]

pitṛtaḥ snāyvasthimajjā māṃsaromā'srajaḥ striyāḥ |
ṣaṭkośāste śarīrasthāḥ ṣaṭsvātmā saṃpratiṣṭhati || 23 ||
[Analyze grammar]

sthūle bālaśarīre vai pṛthvyaptejo'nilā'mbaram |
bhūtapaṃcakamastyeva tatra viṣayapaṃcakam || 24 ||
[Analyze grammar]

sthūlaṃ gandharasarūpasparśaśabdātmakaṃ tathā |
ghrāṇajihvānayanatvakśrotragrāhyaṃ kramāddhi tat || 25 ||
[Analyze grammar]

vāgdhastapādapāyūpasthendriyāṇi parāṇi ca |
vāṇyādānaviharaṇamalamūtravisarjanam |
kāryaṃ kramāddhi bodhavyaṃ manaścittamahaṃmatiḥ || 26 ||
[Analyze grammar]

antaḥkaraṇamityuktaṃ tatparaṃ prakṛtirmatā |
sattvarajastamoyuktā samāvasthā hi kāraṇam |
viṣamāvasthikā saiva saṃsārastattvavigrahaḥ || 27 ||
[Analyze grammar]

māyāyāstu vikārā ye nāśavantastu te matāḥ |
ātmā'styamāyikaḥ śuddho nāśo nāsya kadācana || 28 ||
[Analyze grammar]

dehastu jāyate paścād vardhate bahubhojanaiḥ |
vipariṇamate caiva kṣīyate naśyate mṛṣā || 29 ||
[Analyze grammar]

ātmā ca tatra sarvatra vartate'sti hyataḥ sa san |
dehādi jaḍamityeva cātmā cetana eva hi || 30 ||
[Analyze grammar]

dehādi duḥkharūpaṃ vai hyātmā''nandamayaḥ sadā |
saccidānanda ityukto na daityo na ca dānavaḥ || 31 ||
[Analyze grammar]

na suro nā'suraścātmā na nārī na pumān hi saḥ |
napuṃsako na rāgī na na dveṣī śuddha eva saḥ || 32 ||
[Analyze grammar]

ajñastu bādhahīno vai kvacitsāttvikabhāvanaḥ |
kvacittu rājasobhāvaḥ kvacittāmasabhāvanaḥ || 33 ||
[Analyze grammar]

sattvaṃ sukhakaraṃ manye rajo rāgakaraṃ bhavet |
tamaḥ pīḍākaraṃ proktaṃ tasmāt sattvaguṇaṃ bhajet || 34 ||
[Analyze grammar]

sattvamapyātmano lābhakaraṃ hitadamiṣyate |
yadyahitaṃ mokṣadaṃ na tadā tadapi tyajyate || 35 ||
[Analyze grammar]

svātmanyavasthite nārāyaṇe yā sāttvikī matiḥ |
sā vai sadā bhavellābhakarī mokṣapradāpi ca || 36 ||
[Analyze grammar]

jāgratsvapnaṃ suṣuptiśca dehādau nātmani kvacit |
sthaulyaṃ saukṣmyaṃ kāraṇatvaṃ dehādau nātmani kvacit || 37 ||
[Analyze grammar]

pāpaṃ puṇyaṃ cobhayaṃ ca janmapuṣṭirmṛtistathā |
devadaityamānavatvaṃ dehādau nātmani kvacit || 38 ||
[Analyze grammar]

na gṛhaṃ gṛhamityuktaṃ śarīraṃ gṛhamucyate |
kṣaṇabhaṃgurakaṃ tacca tena mokṣaṃ prasādhayet || 39 ||
[Analyze grammar]

ātmā hyasaṃgaḥ sarvatra janasaṃgī bhavedyadi |
śuddhe saṃgaḥ kulajāterabhimānakaro bhavet || 40 ||
[Analyze grammar]

tena dveṣo bhavet tattadviparīte ṛtārthake |
ahaṃ daitya ityahaṃkāreṇa cātmā yadi vṛtaḥ || 41 ||
[Analyze grammar]

tadā dveṣo bhaveddeve nārāyaṇe tu sarvathā |
patanaṃ muktimārgācca dveṣānnārāyaṇe tathā || 42 ||
[Analyze grammar]

tasmād bālā vayaṃ śuddhā yāvanna buddhibhedakāḥ |
śabdāḥ pakṣānugā labdhāstāvanmokṣaṃ prasādhayet || 43 ||
[Analyze grammar]

caturviśatitattveṣu paṃcaviṃśaṃ tu mārgayet |
svayaṃ svaṃ mārgayitvaiva ṣaḍviṃśe taṃ samarpayet || 44 ||
[Analyze grammar]

tāvatparyantamevā'yaṃ saṃsāro vāsanātmakaḥ |
ātmatadātmanoryāvat saṃviveko'tra no kṛtaḥ || 45 ||
[Analyze grammar]

śāntaṃ ghoraṃ ca mūḍhaṃ ca tattvajālaṃ vibudhya ca |
tatparaṃ svaṃ parijñāya parātparaṃ samāśrayet || 46 ||
[Analyze grammar]

na mātā na pitā putro bhaginī bāndhavāstathā |
paraloke sahāyāḥ syuḥ hariḥ sāhāyyado bhavet || 47 ||
[Analyze grammar]

sa ca sarvatra bhūteṣu vartamāno'pi dehinā |
vinā sādhanasampattyā nopalabhyata eva saḥ || 48 ||
[Analyze grammar]

prabhuprāpteḥ sādhanāni guroḥ śuśrūṣaṇaṃ tathā |
premabhaktiḥ sadā sevā sarvalabdhārpaṇaṃ tathā || 49 ||
[Analyze grammar]

sādhusādhvīprasaṃgaśca viṣṇorārādhanaṃ param |
tatkathāśravaṇaṃ tasya kīrtanaṃ guṇavarṇanam || 50 ||
[Analyze grammar]

tanmūrterdhyānamatyarthaṃ darśanaṃ smaraṇādikam |
sarvabhūteṣu tadbhānaṃ bhaktānāṃ tatsamārhaṇam || 51 ||
[Analyze grammar]

sarvaṃ samarpyate tatra ratiḥ sarvāpi tatra ca |
kriyāḥ sarvāśca tanmayyastato'nyannāvabudhyate || 52 ||
[Analyze grammar]

dhyāne vā dhāraṇāyāṃ vā samādhau cāpi tanmayaḥ |
jāgrati vā tathā svapne suṣuptāvapi tanmayaḥ || 53 ||
[Analyze grammar]

pravṛttau vā nivṛttau vā sarvāvasthāsu tanmayaḥ |
hasanaṃ rodanaṃ gānaṃ nartanaṃ krandanaṃ svapiḥ || 54 ||
[Analyze grammar]

chikkanaṃ vartanaṃ pānaṃ bhojanaṃ ramaṇaṃ gatiḥ |
sadanaṃ mārgaṇaṃ yadvā darśanaṃ sparśanaṃ śrutiḥ || 55 ||
[Analyze grammar]

kṣuvanaṃ cintanaṃ nirṇāyanamadhyāsanaṃ tathā |
mananaṃ tanmayaṃ harṣotpulakāśrusagadgadam || 56 ||
[Analyze grammar]

bhavettadā hariścātra bhaktiyogena dṛśyate |
tasya kathāśravaṃ kṛtvā mananaṃ kāryameva yat || 57 ||
[Analyze grammar]

tasya mūrteścintanena kalmaṣaṃ kṣālitaṃ bhavet |
nirmalātmā tadvā svasminnanyatrāpi ca sarvathā || 58 ||
[Analyze grammar]

nārāyaṇaṃ prapaśyet saṃbhajadhvaṃ vai tatocyutam |
prājñenā''pyaṃ dhruvaṃ tattvaṃ tyājyamadhruvameva yat || 59 ||
[Analyze grammar]

dhruveṇa cātmanā prāptavyo dhruvo harireva vai |
sa vai sarvatra saṃpoṣṭā sukhado mokṣadastathā || 60 ||
[Analyze grammar]

sukhaṃ sātiśayaṃ tyājyaṃ kṣayiṣṇu tyājyameva ca |
aviśuddhaṃ sadā tyājyaṃ grāhyaṃ taddoṣavarjitam || 61 ||
[Analyze grammar]

tattu nārāyaṇādeva nā'nyasmānmilati kvacit |
tasmānnārāyaṇo dhyeyaḥ svātmanyārādhya eva saḥ || 62 ||
[Analyze grammar]

dṛṣṭānuśravadoṣāptaṃ sarvaṃ māyāmayaṃ jagat |
tacchūnyaṃ sukhasaṃsthānaṃ nārāyaṇo bhavatyataḥ || 63 ||
[Analyze grammar]

tadbhaktyā śāśvatānandaḥ prāptavyo'smābhirarbhakāḥ |
aśāśvataṃ sukhaṃ yatra putradāragṛhādiṣu || 64 ||
[Analyze grammar]

dhane rājye tathā'mātye gajāśveṣu janādiṣu |
prāsāde vā suhṛdvarge tucche śāśvatikeṣu yat || 65 ||
[Analyze grammar]

kṣaṇa dṛśyeta subhagaṃ saha dehena naśvaram |
anarthadaṃ kṣaṇādarthābhāsaṃ duḥkhātikṛttathā || 66 ||
[Analyze grammar]

ko vā'styatrā''tmanaḥ svārthaḥ śāśvatastannirūpyatām |
dehe daihikasaṃghāte vastunyapi ca yatpriyam || 67 ||
[Analyze grammar]

tattu virṣṇornivāsādyat hariḥ sarvapriyātmakaḥ |
yatra kvāpi gato jīvo daityo yakṣo'thavā'suraḥ || 68 ||
[Analyze grammar]

suro vā mānavo vāpi gandharvo vāpi rākṣasaḥ |
bhajannārāyaṇaṃ devaṃ svastimān syānna tadṛte || 69 ||
[Analyze grammar]

mukundaprīṇane naiva vratadānatapaḥkriyāḥ |
bahujñatāvayorūpejyāśaucātikulārthitāḥ || 70 ||
[Analyze grammar]

kāraṇaṃ nirmalā bhaktirbhāvanārdrātmani prabhā |
evaṃvidhāṃ parāṃ bhaktiṃ harau kurvantu bālakāḥ || 71 ||
[Analyze grammar]

mayā sadā kṛtā bhaktyā yayā paśyāmi keśavam |
ṛṣayaḥ pitaro devā munayo mānavāstathā || 72 ||
[Analyze grammar]

dānavā rākṣasā daityā yakṣāḥ kiṃpuruṣāśca ye |
kinnarāścaiva gāndharvāścāraṇāḥ siddhapūruṣāḥ || 73 ||
[Analyze grammar]

vidyādharāḥ piśācā vā bhūtapretāśca ye'pare |
sādhyā viśvāśca kūṣmāṇḍā vaināyakāśca bhairavāḥ || 74 ||
[Analyze grammar]

vetālāśca gaṇāścaiva yāmyā nāgāḥ sarīsṛpāḥ |
khagā mṛgā jalavāsā bhūvāsāḥ pavanāśrayāḥ || 75 ||
[Analyze grammar]

antarīkṣagatā ye ca grahāḥ sthāvarajaṅgamāḥ |
bālā vṛddhāḥ striyaḥ śūdrāḥ saṃkarāḥ pāpayonayaḥ || 76 ||
[Analyze grammar]

hitvā pāpaṃ gatā muktiṃ śrīmannārāyaṇāśrayāt |
tasmādasmābhirapyatra durlabhe narajanmani || 77 ||
[Analyze grammar]

bhajanīyo hariḥ sākṣāt tadanyattu viḍambanam |
ityādeśo mayā garbhagatenā''ptastu nāradāt || 78 ||
[Analyze grammar]

nārāyaṇa hare kṛṣṇa śrīpate kamalāpate |
pārvatīśeśa mukteśa prabheśeśa ca te namaḥ || 79 ||
[Analyze grammar]

evaṃ bhajaṃśca varte'haṃ yūyaṃ kuruta tattathā |
śrutvaivaṃ bālakāḥ sarve jagṛhustadyathātatham |
śālāyāṃ te jagṛhurna guruśikṣitamaṇvapi || 80 ||
[Analyze grammar]

tadācāryasutaḥ khinno bhayabhītaśca bhūbhṛte |
nivedayāmāsa sarvaṃ bālāstu kupathaṃgatāḥ |
śrutvā svaputrakartavyamatikrodhena kampitaḥ || 81 ||
[Analyze grammar]

putrasya nidhanaṃ kartuṃ pitā daityo mano dadhe |
prahlādaṃ ca samāhūya vācā paruṣayā kṣipan || 82 ||
[Analyze grammar]

pāpena cakṣuṣā paśyan tiraścīnena roṣataḥ |
prāha śāntaṃ kuloddhārayogyaṃ bhāgavataṃ sutam || 83 ||
[Analyze grammar]

re buddhyā'dhama me vidyābhedakā'nyakṛtāśraya |
manyase na svayaṃ śikṣāmanyāṃśca nayase'patham || 84 ||
[Analyze grammar]

abhīta iva lokānāṃ śāsituḥ śāsanaṃ mama |
na gaṇayasi duṣṭātman preṣayiṣye yamālayam || 85 ||
[Analyze grammar]

caturdaśānāṃ lokānāṃ rājño'nādṛtya me vacaḥ |
balaṃ kasya samāśritya stabdho bhavasi re'dhama || 86 ||
[Analyze grammar]

prahlādaḥ prāha tacchrutvā pitaste cāsti yadbalam |
balaṃ tasyāpi me cāsti yadbalāt balavajjagat || 87 ||
[Analyze grammar]

vrahmarudrādayaḥ sarve yatsahaujobalādibhiḥ |
rājādhirājā rājante tadbalaṃ cāvayoḥ sadā || 88 ||
[Analyze grammar]

dveṣabhāvaṃ parityajya pitastvaṃ dhatsva mānase |
prahvībhāvena taddhyānaṃ manute sa samarhaṇam || 89 ||
[Analyze grammar]

tāvatā'pyuddharedātmā nānyathā tu kadācana |
digjetāro'pi mohasya krodhasya kṣudraveginaḥ || 90 ||
[Analyze grammar]

āpannā vaśameveti mā yāhi tadvaśaṃ pitaḥ |
naivamātmā pātitavyastrilokeśena bhūbhṛtā || 91 ||
[Analyze grammar]

bhaktyā tvārohayitavyo harerdhāma paraṃ padam |
kathaṃ pāpaṃ cārjayase sarvanāśakaraṃ pitaḥ || 92 ||
[Analyze grammar]

śrutvaitatsvasutoktaṃ sa hiraṇyakaśipustadā |
mumūrṣurasahamāno'viṣahyavedanānalam || 93 ||
[Analyze grammar]

prāha putraṃ tava mṛtyurvyaktaṃ cātra samāgataḥ |
asthāne katthase duṣṭa kvāsti te parameśvaraḥ || 94 ||
[Analyze grammar]

nānyo madanya īśo'sti cedasti tvāṃ sa rakṣayet |
sarvatrā'sti yadi cāsau yadi sarvagato bhavet || 95 ||
[Analyze grammar]

stambhe darśaya taṃ viṣṇumanyathā vadhamarhasi |
ityuktvā khaḍgamādāya sahasā ditijeśvaraḥ || 96 ||
[Analyze grammar]

pracakrame sutaṃ hantuṃ tāvat stambho dvidhā'bhavat |
jāto bhayaṃkaraḥ śabdaḥ staṃbhādvyāpto digambaram || 97 ||
[Analyze grammar]

saṃvartanāśasaṃrāvaiḥ khamiva sphuṭitāntaram |
tena śabdena mahatā daityaśrotravighātinā || 98 ||
[Analyze grammar]

sarve nipātitā bhūmau daityāstu menire tadā |
jagattrayaṃ vinaṣṭaṃ vā pralayaścāgato'sti naḥ || 99 ||
[Analyze grammar]

tāvat staṃbhe mahātejā niṣkrānto vai mahāgiriḥ |
nṛsiṃhavapurāsthāya cakāra ghoraniḥsvanān || 100 ||
[Analyze grammar]

anekakoṭisūryāgnitejasā prajvalan ruṣā |
mukhe pañcānanaprakhyaḥ śarīre mānuṣākṛtiḥ || 101 ||
[Analyze grammar]

daṃṣṭrākarālavadanaḥ sphurajjihvāgradairghyakaḥ |
jvālāvalitakeśāntastaptālātekṣaṇo vibhuḥ || 102 ||
[Analyze grammar]

divyamālāmbaradharo divyābharaṇabhūṣitaḥ |
tasthau nṛkesarī tatra saṃhartuṃ daityadānavān || 103 ||
[Analyze grammar]

dṛṣṭvā'dṛṣṭapūrvarūpaṃ vihvalāṃgo mahāsuraḥ |
hiraṇyakaśipurdaityaḥ papātā'nye ca mūrchitāḥ || 104 ||
[Analyze grammar]

prahlādo'tha tadā dṛṣṭvā nārasiṃhopamaṃ harim |
jayaśabdena deveśaṃ namaścakre janārdanam || 105 ||
[Analyze grammar]

nārasiṃhe tadā bhakto bhuvanāni dadarśa ha |
śṛṇu lakṣmi pravakṣyāmi yathāvaddarśitaṃ tu yat || 106 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne garbhasthaprahlādasya nāradopadeśagrahaṇasamayahiraṇyakaśipu |
vivādabālopadeśakhaḍgaghātanṛsiṃhaprādurbhāvanirūpaṇanāmā ekonacatvāriṃśadadhikaśatatamo'dhyāyaḥ || 139 ||
[Analyze grammar]