Chapter 136

śrīnārāyaṇa uvāca |
śrūyatāṃ sā kathā lakṣmi tvayā caikamanīṣayā |
evaṃ varānsamāpanno hiraṇyakaśipuḥ ripuḥ || 1 ||
[Analyze grammar]

smṛtvā bhrātṛvināśaṃ vai dveṣaṃ karoti mādhave |
gatvā gatvā diśāḥ sarvā jitvā tathā ca sāgarān || 2 ||
[Analyze grammar]

dvīpāṃstathopasudvīpān pātālasahitāṃ bhuvam |
vedhaḥsthānaṃ parityajya sarvaṃ vaśīcakāra saḥ || 3 ||
[Analyze grammar]

manūnṛṣīnpitṛpatīnsurāsurāndivaspatīn |
siddhacāraṇagāndharvān vidyādhrānmānuṣāṃstathā || 4 ||
[Analyze grammar]

yakṣarakṣaḥpretabhūtapiśācoragakinnarān |
kiṃpuruṣāṃśca kūṣmāṇḍān vetālāṃśca vināyakān || 5 ||
[Analyze grammar]

sādhyāṃśca maruto viśvedevānsarisṛpāṃstathā |
nāgān salilakṛdvāsāṃstrilokisthānadhīśvarān || 6 ||
[Analyze grammar]

jitvā vaśaṃ paraṃ kṛtvā viśvajitso'bhavannatha |
lokapālakṛtā devāḥ prāsādāḥ smṛddhayastathā || 7 ||
[Analyze grammar]

devodyānāni sarvāṇi sāmudraṃ ratnajātakam |
mahendrabhavanaṃ yāvat dikpālānāṃ gṛhāṇi ca || 8 ||
[Analyze grammar]

grahāṇāṃ ca rathāḥ sarve devā devyo navā navāḥ |
sarvaṃ vaśīkṛtaṃ tena daityāḥ sarvatra yojitāḥ || 9 ||
[Analyze grammar]

caturdaśabhuvanānāmagryā lakṣmīrnijīkṛtā |
mahanto divyasatsaudhāḥ prāsādāḥ paramālayāḥ || 10 ||
[Analyze grammar]

yatra vidrumasopānā divyasphāṭikabhittayaḥ |
mahāmārakatīsthalyo vaidūryastambharājayaḥ || 11 ||
[Analyze grammar]

divyāmbaravitānāni padmarāgāsanāni ca |
vimānāni mahārhāṇi candraśālāḥ sudīptayaḥ || 12 ||
[Analyze grammar]

dugdhaphenasamāḥ śayyā muktāmaṇiparicchidāḥ |
khānapānavilāsāśca vilāsinyo'bdaṣoḍaśāḥ || 13 ||
[Analyze grammar]

svarṇavarṇāḥ sugandhāḍhyāḥ mṛgākṣyo viditeṅgitāḥ |
sakiṃkiṇīkanakakṛnnūpuraśabditagṛhāḥ || 14 ||
[Analyze grammar]

sadratnakhacitā''darśadṛṣṭānanasaroruhāḥ |
sudatyaḥ svalpamadhyāśca padmapatrāyatekṣaṇāḥ || 15 ||
[Analyze grammar]

susaṃkocavikāsādiśaktisvātantryasaṃbhṛta |
dṛḍhagranthyagramadhyāntahṛsvāvakāśayonayaḥ |
svarṇavarṇacamatkāracaṃcadgātrāḥ surastriyaḥ || 16 ||
[Analyze grammar]

vilasanti yatra daityaṃ ramayanti ca sarvadā |
prāsādāstena te sarve svādhikāre vaśīkṛtāḥ || 17 ||
[Analyze grammar]

sarvadevābhivanditapādapīṭho mahābalaḥ |
rājate ca mahendrasya siṃhāsanavirājitaḥ |
aśeṣadhiṣṇyapairdivyopadābhiḥ paripūjitaḥ || 18 ||
[Analyze grammar]

viśvāvasutumburugāndharvāgryairatyabhistutaḥ |
siddharṣimunividyādhrā'psarobhiḥ kṛtasaṃstavaḥ || 19 ||
[Analyze grammar]

nārāyaṇo'para iva rājate bhuvanaikarāṭ |
yajñeṣu dānakāryeṣu vaiśvānaravidhānake || 20 ||
[Analyze grammar]

ityābhāgān svayaṃ bhuṃkte'rpitā ṛtvigbhirādarāt |
bhūstasyāsīd vasumatī medinyakṛṣṭapākadā || 21 ||
[Analyze grammar]

svargaṃ kāmapravarṣyabhūd vāyuḥ śāntikaro'vasat |
ratnānyarpayate cābdhiḥ saritaḥ salilāni ca || 22 ||
[Analyze grammar]

saptadvīpāḥ samudrāśca sevante vardhayanti tam |
śailā drumā vanodyānāḥ ṛtavo gaganaṃ tathā || 23 ||
[Analyze grammar]

svasvaparicchadaistasya sevāṃ kurvanti nityaśaḥ |
agnistasya pāvako'bhūd vāyurvai gṛhamārjakaḥ || 24 ||
[Analyze grammar]

pṛthvī śayyākarī cāsījjalaṃ vāriharaṃ hyabhūt |
medhāḥ śaityābhivyañjakavyajanā'rpayiṇo'bhavan || 25 ||
[Analyze grammar]

candro ratiśramanode śaityado'bhūtsadāsthitaḥ |
kuberastasya bhūṣādhṛk gāyikā ca sarasvatī || 26 ||
[Analyze grammar]

indraḥ pānapradātā'bhūd yamo hārādhipo'bhavat |
kṣīramiṣṭodakāḥ sarve sāgarāścodakumbhayaḥ || 27 ||
[Analyze grammar]

sūryastasya kirīṭasyā'bhavanmaṇyamaṇiḥ svayam |
pātālāni ca daityasya pādapīṭhāstadā'bhavan || 28 ||
[Analyze grammar]

apsarasaḥ sadā dāsyo devyaśca pādamardikāḥ |
nadyaḥ snānavidhāyinyo'raṇyāni phaladāni ca || 29 ||
[Analyze grammar]

kiṃ nyūnaṃ kṛtabhakteśca dāsasya padabhraṃśane |
tatrāpi tapasā prāptaprasādasya sadā priye || 30 ||
[Analyze grammar]

na me bhaktasya kiñcidvai nyūnaṃ bhogye bhavediha |
yadyadicchati tasmādapyadhikādhikamuddade || 31 ||
[Analyze grammar]

aiśvaryaṃ madasampattiryauvanaṃ cā'vivekitā |
pratyekaṃ cāpyanarthāya kimu yatra catuṣṭayam || 32 ||
[Analyze grammar]

tasmāttu sarvadā bhāvyaṃ nirlepatvena sarvathā |
sa vai bhogaṃ ca mokṣaṃ ca vindate'nyaḥ patatyadhaḥ || 33 ||
[Analyze grammar]

yathā yathā prabhuṃkte ca mūḍho viṣayaparvatān |
tathā tathā bhavellubdho mohapāśaprajālitaḥ || 34 ||
[Analyze grammar]

yatheṣṭaṃ saḥ prabhuñjāno viṣayān sārvabhaumajān |
nā'tyatṛpyanmahāmūrkhaḥ pratyutotpathago'bhavat || 35 ||
[Analyze grammar]

ugradaṇḍairlokapālānudvejayati tāmasaḥ |
rakṣati na prajā daityānuttejayati pakṣataḥ || 36 ||
[Analyze grammar]

daityapakṣavardhayitā surapakṣavināśakaḥ |
nināya kālamarbudamabdānāmevameva saḥ || 37 ||
[Analyze grammar]

tato duḥkhaṃ paraṃ prāptā udvignā lokapālinaḥ |
ṛṣayo munayaścaiva brāhmaṇā naṣṭarakṣaṇāḥ || 38 ||
[Analyze grammar]

devāśca pitaraścānye ye ye duḥkhadaśānvitāḥ |
te sarve kṣīradhestīre śaraṇaṃ yayuracyutam || 39 ||
[Analyze grammar]

namaḥ śaraṇyāya śāntasvarūpāya namonamaḥ |
duḥkhāvāsāya daityāṃśalakṣmīsthitāya te namaḥ || 40 ||
[Analyze grammar]

rakṣākartre yatisanyāsārthine haraye namaḥ |
parivarttanivāsāya parivartātmane namaḥ || 41 ||
[Analyze grammar]

bahukālaṃ svabhaktāya daityāya sārvabhaumakam |
dattavān sāmprataṃ daityabhinnebhyo dātumarhasi || 42 ||
[Analyze grammar]

surādivāñcchitaṃ cāpi kṛpayā dātumarhasi |
parāvarttaṃ kuru viṣṇotvasahyaḥ samayo gataḥ || 43 ||
[Analyze grammar]

iti prārthya surāḥ sarve kṣīrābdhyuttarabhūtale |
samādhau susthitāścānye japayajñe vyavasthitāḥ || 44 ||
[Analyze grammar]

nārāyaṇādvaraṃ labdhvā rakṣāyā vacanaṃ tathā |
tato yāsyāma iti me pratipattiṃ vidhāya ca || 45 ||
[Analyze grammar]

smaranti sma hariṃ kṛṣṇaṃ nārāyaṇamahāprabhum |
tāvadākāśaśabdākhyā vāguvācā'śarīriṇī || 46 ||
[Analyze grammar]

bho bhoḥ surādayo mukhyā yuṣmatkāryaṃ bhaviṣyati |
āyatiḥ subhagā yuṣmatkṛte cāyāti niścitam || 47 ||
[Analyze grammar]

sarveṣāṃ kālacakrasyodayasyā'vanatestathā |
samayo bhavati paścānna bhavatyeva sarvathā || 48 ||
[Analyze grammar]

puṇyā'puṇyakṛtaṃ cakraṃ sarveṣāṃ kṛtibandhanam |
pravartate yathānyāyaṃ tadasyāsti pravardhitaḥ || 49 ||
[Analyze grammar]

api mahattaraṃ puṇyaṃ hiraṇyakaśipoḥ khalu |
prakāśate ca yāvat tannāśo'pi duṣkaraḥ khalu || 50 ||
[Analyze grammar]

daurātmyaṃ pūjyahāniścā'dharmaḥ patnyavrataṃ tathā |
āyurnāśaṃ karotyeva puṇyanāśaṃ tu vegataḥ || 51 ||
[Analyze grammar]

so'yaṃ lakṣmīmadāndho vai samācarati tadbahu |
pūrṇe nāśaṃ kariṣyāmi cekṣantāṃ kālamāgatam || 52 ||
[Analyze grammar]

dvijadevagavāṃ sādhvīsādhudharmakṛtāṃ mama |
vidveṣo nāśakṛddhyāśu madbhaktasya viśeṣataḥ || 53 ||
[Analyze grammar]

tadasya divasāḥ prāyaḥ samāptā eva sarvathā |
tadupāyaṃ karomyeva yāta yūyaṃ svakaṃ sthalam || 54 ||
[Analyze grammar]

ityabhidhāya sā vāṇī virame'tha surādayaḥ |
taddiśaṃ śrīhariṃ smṛtvā natvā sadaṃḍavatpunaḥ || 55 ||
[Analyze grammar]

sarve yātāḥ svakaṃ sthānaṃ hataṃ daityaṃ ca menire |
hariḥ prahlādamālakṣya daityanāśamaciklṛpat || 56 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne hiraṇyakaśipukṛtasuramunyādidveṣatadvaibhavatadvināśārtha devādikṛtaviṣṇvārādhanādivarṇananāmā ṣaṭtriṃśadadhikaśatatamo'dhyāyaḥ || 136 ||
[Analyze grammar]