Chapter 132

śrīnārāyaṇa uvāca |
yadā yadā mahālakṣmi sāyāhno vedhaso bhavet |
tadā tadā laye nitye daśa lokāḥ svarādayaḥ || 1 ||
[Analyze grammar]

pātālāntā layaṃ yānti pūrvasṛṣṭau yathā hyabhūt |
tathā tathā laye kāle bījarakṣaṇahetave || 2 ||
[Analyze grammar]

harirgṛhṇāti mātsyaṃ vai rūpaṃ salilasañcaram |
prathamaṃ brahmaṇaḥ sāyaṃ varṣaśatamavagrahaḥ || 3 ||
[Analyze grammar]

vṛṣṭyabhāvāt sudurbhikṣāddehino yānti nāśatām |
jalaṃ śuṣkāyate sarvamudbhijjā yānti nāśatām || 4 ||
[Analyze grammar]

sūryatāpena pṛthivī rukṣā bhavati sarvathā |
bījāni bharjitānyeva bhavanti kramaśastadā || 5 ||
[Analyze grammar]

kandamūlāni naśyanti prāṇijātaṃ ca naśyati |
śatavarṣaṃ kramādeva vṛṣṭihīnaṃ pratāpitam || 6 ||
[Analyze grammar]

bhavatyataḥ samudrā vai śuṣkāyante samantataḥ |
tadā tatsthaṃ prāṇijātaṃ sarvaṃ naśyati sarvathā || 7 ||
[Analyze grammar]

sūryā dvādaśa cottaptā ugrāstapanti kṛtsnaśaḥ |
teneyaṃ śatavarṣeṣu pṛthvī satalaparvatā || 8 ||
[Analyze grammar]

dagdhā bhasmasamā sarvā jāyate hi samantataḥ |
āpātālācca āsvargāt sarvepi jantavo mṛtāḥ || 9 ||
[Analyze grammar]

sūkṣmaśarīrasahitā tadā yānti mahartalam |
maharloke ca te sarve tiṣṭhanti puṇyaraśmibhiḥ || 10 ||
[Analyze grammar]

meghāstataḥ pravarṣanti śatavarṣāṇi sarvadā |
ādaśabhuvanaṃ yāvat sarvaṃ jalamayaṃ bhavet || 11 ||
[Analyze grammar]

āsvargaṃ vai jalaṃ tatra pūryate pralaye bahu |
evaṃ sāyāhnamārabhya prātaḥparyantameva ha || 12 ||
[Analyze grammar]

daśalokavināśo'yaṃ nityapralaya ucyate |
punaḥ prātaḥ svayaṃ brahmā sṛjati daśabhūstarān || 13 ||
[Analyze grammar]

svargamārabhya pātālān sṛṣṭvā sṛṣṭiṃ karoti saḥ |
pūrvaṃ pūrvaṃ tadā smṛtvā yathāpūrvamakalpayat || 14 ||
[Analyze grammar]

prāpte punaśca sāyāhne punarvai vilayo bhavet |
layakāle tadā devaḥ svayaṃ nārāyaṇo hariḥ || 11 ||
[Analyze grammar]

sarvasadbījarakṣārthaṃ matsyarūpo bhavatyapi |
vedhodināvasāne sa svayameva dayānidhiḥ || 16 ||
[Analyze grammar]

samāgatya surakṣārhaṃ rakṣatyeva kṛpāvaśāt |
dināvasāne sāyaṃ vai brahmā sandhyārthamutthitaḥ || 17 ||
[Analyze grammar]

kamaṇḍaluṃ svamādāya puṣkaraṃ prati gacchati |
snātvā kamaṇḍalau vāri bhṛtvā tīraṃ samāsīnaḥ || 18 ||
[Analyze grammar]

ācamanāya yāvadvai gṛhṇātyambu kamaṇḍaloḥ |
hastatale tadā matsyarūpaṃ svalpaṃ dadarśa saḥ || 19 ||
[Analyze grammar]

yavabījasamaṃ hrasvaṃ yathā vai kṣudrajantukam |
jale jalāṃjaliṃ yāvan kṣipatyeva pitāmahaḥ || 20 ||
[Analyze grammar]

tāvadvitastimātraṃ tad bhūtvotplutyā'patattaṭe |
prāha māṃ rakṣa devānāṃ pitāmaha kamaṇḍalau || 21 ||
[Analyze grammar]

tathā karotyajo yāvanmamau naiva kamaṇḍalau |
tataḥ prāha timistaṃ vai nālaṃ me bhavati prabho || 22 ||
[Analyze grammar]

deho me vardhate drāgvai tasmātkūpe tu māṃ kṣipa |
brahmaṇā vai tataḥ kūpe nikṣipto'pi pravavṛdhe || 23 ||
[Analyze grammar]

kūpe mātuṃ na yogyo'bhūt sa prāha vedhasaṃ tataḥ |
na kūpo'yamalaṃ me syāt pitaḥ sarasi mākṣipa || 24 ||
[Analyze grammar]

uddhṛtya brahmaṇā kūpāt puṣkare sarasi dhṛtaḥ |
tāvatpuṣkaradeho'yaṃ mahān babhūva tatkṣaṇāt || 25 ||
[Analyze grammar]

puṣkare na mamau sopi punarāha pitāmaham |
nālaṃ me puṣkaraṃ jātaṃ samudre māṃ kṣipeṣṭakṛt || 26 ||
[Analyze grammar]

brahmaṇā tu tato nītvā samudre vinipātitaḥ |
uktaśca kastvamatrāsi vadāścaryaṃ karoṣi mām || 27 ||
[Analyze grammar]

samudre vardhito matsyastadovāca pitāmaham |
ahaṃ nārāyaṇaḥ sākṣājjagadrakṣaṇahetave || 28 ||
[Analyze grammar]

matsyarūpaṃ sudhṛtavān sāyaṃ te'hno bhavatyataḥ |
daśalokāstāpaśuṣkā jalamagnā drutaṃ matāḥ || 29 ||
[Analyze grammar]

tasmādbījāni mukhyāni catuḥkhanigatāni vai |
gṛhītvā'yaṃ manuścaturdaśo nāvi pratiṣṭhatu || 30 ||
[Analyze grammar]

naurapi koṭigavyūtidīrghā gabhīrabhūmikā |
śatabhūmirdṛḍhā pūraṇīyā bījaiḥ prarohaṇaiḥ || 31 ||
[Analyze grammar]

ṛṣīnmunīṃstathā devān gohastiyānavāhanam |
udbhijjātīni bījāni pṛthvīṃ devīṃ ca bhūsurān || 32 ||
[Analyze grammar]

yadyatpunastava prātarupayuktaṃ sṛjau bhavet |
tatsarvaṃ bījarūpaṃ vai nītvā saṃsthāpya nāvi tat || 33 ||
[Analyze grammar]

manuṃ satyaṃ tatra vai tvaṃ pratiṣṭhāpya vraja svakam |
satyalokaṃ tato'haṃ vai nādaṃ śṛṃkhalayāñcitām || 34 ||
[Analyze grammar]

mama śṛṃge nibadhyaiva bhramiṣyāmi mahājale |
avagrahe sūryatāpe varṣaṇe śatavārṣike || 35 ||
[Analyze grammar]

mahāpātālavārīṇāṃ nidhau nāvaṃ nināya ca |
rakṣiṣyāmi ca tānsarvānārātripralayāvadhim || 36 ||
[Analyze grammar]

āprātastānpoṣayiṣye mama divyabalānnanu |
mā tvaṃ khedaṃ kuru brahman prātardāsye punardhanam || 37 ||
[Analyze grammar]

kariṣyati tato daśalokānāṃ sṛṣṭimeva tām |
ityājñaptastato brahmā manuṃ prāha caturdaśam || 38 ||
[Analyze grammar]

bījānyarpayya sadevamunibījāntarāṇi ca |
nāvaṃ samarpayāmāsa matsyāya keśavāya saḥ || 39 ||
[Analyze grammar]

brahmā tu gatavān satyaṃ lokaṃ rātrirbabhūva ha |
sandhyākāle tadā yugasahasrānte yugakṣaye || 40 ||
[Analyze grammar]

sadā jātā anāvṛṣṭistadā sā śatavārṣikī |
saptaraśmiratho bhūtvā hyudatiṣṭhadvibhāvasuḥ || 41 ||
[Analyze grammar]

tasya te raśmayaḥ saptā'pibannambho mahārṇavāt |
tatasteṣāṃ pratāpena dahyamānā vasundharā || 42 ||
[Analyze grammar]

sādrinadyarṇavā sarvā visnehā samapadyata |
tīkṣṇapradīptakiraṇairekajvālaṃ babhūva ha || 43 ||
[Analyze grammar]

tataḥ saṃvartako ghoro lokān jahāra pāvakaḥ |
nirdahya sarvapātālānūrdhvama dadāha vai divam || 44 ||
[Analyze grammar]

tato gajakulākārāstaḍidbhiḥ samalaṃkṛtāḥ |
uttiṣṭhanti sma vai ghorā vyomni saṃvartakā ghanāḥ || 45 ||
[Analyze grammar]

nīlāḥ śvetāścāṃjanāśca dhūmrāḥ pītāḥ payodharāḥ |
ghorarūpā ghoranādāḥ pūrayanti sma vṛṣṭibhiḥ || 46 ||
[Analyze grammar]

sughoramaśivaṃ sarvaṃ śamayanti sma pāvakam |
naṣṭe cāgnau varṣaśate jalapūrṇaṃ nabhastalam || 47 ||
[Analyze grammar]

ityambhasā''vṛte loke sarvamekārṇavaṃ jagat |
jalaṃ vinā tadānīṃ vai prājñāyata na kiṃcana || 48 ||
[Analyze grammar]

caturyugasahasrānte rātriṃ sma kurute prabhuḥ |
matsyāvatāro bhagavānnāvaṃ rakṣati sarvathā || 49 ||
[Analyze grammar]

śatavarṣe sudurbhikṣe mahākālānalāntare |
svasyā'mṛtapratāpena nāvaṃ rakṣati sa prabhuḥ || 50 ||
[Analyze grammar]

rātrau rakṣati caivā'yaṃ tamasyekārṇave jale |
tato rātrikṣaye prāpte pratibuddhaḥ prajāpatiḥ || 51 ||
[Analyze grammar]

racayāmāsa vividhān daśalokān yathāprajān |
evaṃ layaṃ karoti sma pratisāyāhnameva hi || 52 ||
[Analyze grammar]

sṛṣṭiṃ punaḥ karoti sma pratiprātaḥ sadaiva saḥ |
so'yaṃ dainandinaḥ proktaḥ pralayo daśalokinām || 53 ||
[Analyze grammar]

evaṃ varṣaśatānte vai brahmāṇḍaṃ brahmaṇā saha |
naśyate sa tu saṃprokto layo naimittiko'paraḥ || 54 ||
[Analyze grammar]

tato'pi mūlamāyāyāścaturviṃśatimūrtayaḥ |
vilīyante tadā bodhyaḥ prākṛtapralayo mahān || 55 ||
[Analyze grammar]

jīvasya tu prabhoḥ samyagyogād bhakteśca bhāvataḥ |
yadā mokṣo bhavet so'yaṃ vodhyastvātyantiko layaḥ || 56 ||
[Analyze grammar]

pralaye tatra rātrau tu sṛṣṭyabhāvānna vā'vanam |
avanārthaṃ manūnāṃ ca naivāvaśyakatāsti yat || 57 ||
[Analyze grammar]

ato manvantarāṇāṃ vai rātrau sṛṣṭirna vidyate |
antimo yo manuḥ prokto bījāni ṛṣayastathā || 58 ||
[Analyze grammar]

mahānaukāsthitāsteṣāṃ nidrāvṛttisuvartinām |
viṣṇornārāyaṇecchāyā balānmṛtyurna vidyate || 59 ||
[Analyze grammar]

āprātaste tu jīvanti sṛṣṭerbījatayā sthiteḥ |
ciraṃjīvāstu ye sarve brahmanārāyaṇehayā || 60 ||
[Analyze grammar]

prātaḥ sṛṣṭiṃ punaḥ kṛtvā svayaṃ brahma hi tāṃstataḥ |
līnīkaroti tatraiva sṛṣṭau vai nānyathā kvacit || 61 ||
[Analyze grammar]

ityevaṃ matsyarūpāṇi jāyante me sahasraśaḥ |
avatārā yathākāryaṃ lakṣmi jānāmi tānaham || 62 ||
[Analyze grammar]

evaṃ diterapatyaṃ yo hiraṇyākṣo'bhavanmahān |
asuraḥ sa tadā sṛṣṭeḥ prāraṃbhe kardamasthitim || 63 ||
[Analyze grammar]

jalāntaḥsthāṃ mahāpṛthvīṃ bhuṃkte rājādhirājavat |
tamahaṃ brahmaṇo nastaḥ saṃbhūya nāśayāmi vai || 64 ||
[Analyze grammar]

vārāharūpamāsthāya nayāmi yamasādanam |
asuraṃ taṃ tadā hatvā pṛthvīṃ kṛtvā supiṇḍikām || 65 ||
[Analyze grammar]

nāyāmyupari vārāṃ tāṃ sthāpayāmi ca susthirām |
evaṃ vārāharūpāṇi sahasrāṇi bhavanti me || 66 ||
[Analyze grammar]

yadā yadā''vaśyakatva bhavet kroḍo bhavāmyaham |
iti te sarvamākhyātaṃ kimanyat kathayāmyanu || 67 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne brahmaṇaḥ sāyāhne nityapralaye sabījanaukārakṣaṇārthaṃ matsyāvatāradhāraṇahiraṇyākṣahṛtapṛthivyuddhāraṇārtha |
varāharūpadhāraṇādikathananāmā dvātriṃśadadhikaśatatamo'dhyāyaḥ || 132 ||
[Analyze grammar]