Chapter 118

śrīnārāyāṇa uvāca |
śaṃbhuḥ prāha tato devīṃ brahmadhāmavibhūtikāḥ |
kathayiṣye samāsena śṛṇu parvataputrike || 1 ||
[Analyze grammar]

akṣaraṃ dhāma paramaṃ brahmavyoma paraṃ sadā |
rājate taddhi sarvatra śvetatejomayaḥ staraḥ || 2 ||
[Analyze grammar]

yāvantastārakāḥ sarve sūryāḥ syurdivi saṃsthitāḥ |
pṛthvī sṛṣṭisuyuktā ca divyakācamayī bhavet || 3 ||
[Analyze grammar]

parasparaṃ ca tadyogādyādṛśaṃ tejaudbhavet |
tādṛśaṃ tu ghanaṃ tejo mahat satye tu vedhasaḥ || 4 ||
[Analyze grammar]

tādṛgvedhastarātsatyāt koṭiguṇaṃ tu taijasam |
vairājaikakaṇṭhamaṇau vartate'tha tato'pi vai || 5 ||
[Analyze grammar]

koṭiguṇaṃ mahattejo mahāviṣṇoḥ śiromaṇau |
tataḥ koṭiguṇaṃ tejo vāsudevasya vai maṇau || 6 ||
[Analyze grammar]

tādṛśāścāpyanantāśca maṇayo'vyākṛte stare |
badaryāmamṛte śvete śrīpure ca vikuṇṭhake || 7 ||
[Analyze grammar]

goloke ceti tejāṃsi teṣāmādāya piṇḍakam |
kuryāccettattvakṣarākhyadhāmnaḥ pūgīphalasthale || 8 ||
[Analyze grammar]

līnatāṃ tu samīyādvai pūrṇaṃ tatkīdṛśaṃ bhavet |
tādṛśākṣaradhāmnaśca muktānāṃ tejasāṃ tathā || 9 ||
[Analyze grammar]

samūho līnatāṃ gacchecchrīharerekaromṇi yat |
tadā pūrṇaharau tatra tejaḥ kīdṛgbhavenmahat || 10 ||
[Analyze grammar]

api śakyaṃ nānumātumagamyaṃ teja aiśvaram |
ahantu nahi sākṣādvai draṣṭā kintu samādhinā || 11 ||
[Analyze grammar]

brahmāṇḍapiṇḍabrahmākhyadhāmagaṃ śrīhariṃ prabhum |
ekīkṛtyātmani svasminpaśyāmyalaukikena vai || 12 ||
[Analyze grammar]

tattadā sannikarṣeṇa dṛśyate'pārameva yat |
mantuṃ cintayituṃ boddhaṃ nainaṃ śakyamagocaram || 13 ||
[Analyze grammar]

kathaṃ tarhi bhavedvaktuṃ śakyaṃ cāvaihi sundari |
tādṛśo'nantatejasvī tathā'sīmaguṇārṇavaḥ || 14 ||
[Analyze grammar]

saundaryarūpasaumyeṣaddhāsyā'pāramahodadhiḥ |
koṭimuktacakorā'kṣisthiravṛttyekacandramāḥ || 15 ||
[Analyze grammar]

rājādhirājo bhagavān paramātmā parātparaḥ |
virājate mahāsiṃhāsane ṣoḍaśahāyanaḥ || 16 ||
[Analyze grammar]

rūpānurūpāvayavo mandahāsyalasanmukhaḥ |
koṭikoṭyarkacandrāgnilīnamāṇikyakuṇḍalaḥ || 17 ||
[Analyze grammar]

asaṃkhyamaṇiratnādinaddhakirīṭakalgikaḥ |
divyahīrakasadratnā'mūlyahāṭakahāradhṛk || 18 ||
[Analyze grammar]

yāvattejaḥkhanivrātikaustubhaujjvalakaṇṭhakaḥ |
naikatejaḥprasaratsatkiraṇodbhavamaṇḍakaḥ || 19 ||
[Analyze grammar]

divyaprakāśasaṃrājanmadhyabhālasubhāsvaraḥ |
meghaghaṭṭasadānīlaklṛptakesarakuntalaḥ || 20 ||
[Analyze grammar]

naikakāmakṛtavakradhanuḥprāntabhruvānvita |
svarṇasūkṣmanimeṣāḍhyapuṭaromālinetrakaḥ || 21 ||
[Analyze grammar]

divyaśvetasphaṭikāgryasatkoṇanetragolakaḥ |
raktasūkṣmasukiñjalkabhāsavatpārśvanāyanaḥ || 22 ||
[Analyze grammar]

madhyadivyaghaṭṭarūpasphurattejasvikṛṣṇikaḥ |
tatrāpi grāhyasāmarthyasphuratkṛṣṇakanīnikaḥ || 23 ||
[Analyze grammar]

śaratsarojapatrābhā''karṇāntavyāsanetrakaḥ |
komalasaptavalayaśaṣkulīpītakarṇaka || 24 ||
[Analyze grammar]

divyapuraṭasatphullacampakaśṛṃgalāśravāḥ |
golaphullāḍhyakārpāsapiṇḍakomalagaṇḍakaḥ || 25 ||
[Analyze grammar]

tilapuṣpapiśaṃgadvipuṭanatāntanāsikaḥ |
sūkṣmasvarṇatantukalparekhārājitaśmaśrukaḥ || 26 ||
[Analyze grammar]

madhyāgrāṇikavakrāntadhanūrekhottarauṣṭhakaḥ |
premapātrasarinmūrtikāmasthānā'dharauṣṭhakaḥ || 27 ||
[Analyze grammar]

raktasthalābjapatrābharasasetūbhayauṣṭhakaḥ |
abahiracipīṭāgranimnasughaṭacībukaḥ || 28 ||
[Analyze grammar]

kundaśubhrasutīkṣṇāgryā'viralasthiradantakaḥ |
raktarasāḍhyadāḍimabījacaṃcaddaṃtasthaliḥ || 2 ||
[Analyze grammar]

svarṇamukhyamaṇiprāptaśaṃkhatulyakṛkāṭikaḥ |
merumūlasamasthūlāraṃbhadyudharakandharaḥ || 30 ||
[Analyze grammar]

yugacandrakalāvyastā''skandhādhiṣṭhitajatrukaḥ |
tattvapūrabalā''baddhonnataskandhasupuṣṭakaḥ || 31 ||
[Analyze grammar]

yogidhyānasadāyogyaromadrukukṣikandaraḥ |
śeṣabhogasamākārasvarṇapuṣṭasubāhukaḥ || 32 ||
[Analyze grammar]

citsupuṣṭalasadraktakaṃcanābhobhasadbhujaḥ |
dhruvacakrabhramibindusthirakīlakaphoṇikaḥ || 33 ||
[Analyze grammar]

kramavṛttapuṣṭatanusughaṭobhayahastakaḥ |
dhṛtakārtasvarasaumyaśṛṃkhalākaṭakāṃgadaḥ || 34 ||
[Analyze grammar]

ratnahīrakamaṇyāḍhyormikābhūṣāñcitāṃguliḥ |
nakhacandrasphuratkāntidyotisadbhaktamaṇḍalaḥ || 35 ||
[Analyze grammar]

supeśalasuraṃgāḍhyamakhamallāṃgarakṣakaḥ |
svarṇaprāntakṛtaśobhottarīyā'bhyanvitāṃ'sakaḥ || 36 ||
[Analyze grammar]

divyarājatsvarṇarekhaśrīvatsoraḥsulāṃchanaḥ |
saptaviṃśatisrakklṛptasvarṇamaṇyāḍhyamekhalaḥ || 37 ||
[Analyze grammar]

brahmakūpasamānābhiprasarattrivalodaraḥ |
kramavṛttakariśūṇḍhojjvalakāmāḍhyasakthikaḥ || 38 ||
[Analyze grammar]

karikuṃbharacanārhapuṣṭagaddikaśroṇikaḥ |
aṣṭasiddhyakṣayavīryasamavartulaliṅgakaḥ || 39 ||
[Analyze grammar]

yuvatīvrātamadhvatyānandarasaratipradaḥ |
svarṇaromāvalīrājatsvarṇavarṇapaṭodaraḥ |
samavartulaśobhāḍhya kaṭhinojjvalajānukaḥ || 40 ||
[Analyze grammar]

puṣṭatanunālīpaścimā'sthitārhasujaṃghakaḥ |
antarekabahiḥsattrighūṭikāmaṇibandhanaḥ || 41 ||
[Analyze grammar]

upamuktikṛtanimno'dhodhanurdaṇḍavakrapat |
svarṇaraktanakhakānticandrasacchaviśobhanaḥ || 42 ||
[Analyze grammar]

puṣṭipṛṣṭhaḥ svastiguptaścottamottamamūrtikaḥ |
virājate mahādhāmni hariḥ siṃhāsanasthitaḥ || 43 ||
[Analyze grammar]

sarvaiśvaryakriyāśaktijñānayogādibhiryutaḥ |
siṃhāsanaṃ catuṣpādaṃ pauraṭaṃ ca suśobhitam || 44 ||
[Analyze grammar]

saptasopānakaṃ cāste kammānikā'bhitolitam |
makhamallamahāgaddīpārśvatakkīyarājitam || 45 ||
[Analyze grammar]

upari saṃdhṛtaṃ chatraṃ śalākāviṃśativṛtam |
pauraṭaṃ komalaṃ divyaṃ vastraṃ chatre niyojitam || 46 ||
[Analyze grammar]

svarṇanirmitakalaśaṃ ratnādyañcitadaṇḍakam |
parito maṇayo baddhāḥ svarṇakiṃkaṇikāstathā || 47 ||
[Analyze grammar]

samantataḥ saptarūpidivyajhallarikāyutam |
cāmare tadbhave śvete vyajano darpaṇastathā || 48 ||
[Analyze grammar]

divyā muktāstathā santi sevādharmasusaṃsthitāḥ |
chatroparimahāmuktaḥ sahasraphaṇarājitaḥ || 49 ||
[Analyze grammar]

mahadrūpaṃ phaṇī dhṛtvā phaṇābhiḥ kṛdvitānakaḥ |
sevate śrīhariṃ paścāttiṣṭhandhāmanibho mahān || 50 ||
[Analyze grammar]

tatra siṃhāsane paścādbhāge divyamahāpaṭaḥ |
svarṇatantumayo muktaścitraraṃgādisevanaḥ || 51 ||
[Analyze grammar]

kamalākāramagryaṃ yatstaṃbhā divyāstathā sthitāḥ |
muktānāṃ ca maṇīnāṃ ca maṇḍalāni ca teṣu vai || 52 ||
[Analyze grammar]

saccidānandarūpāśca śukasārasamenakāḥ |
vṛkṣavallyādayastatra staṃbheṣu kṛtasusthalāḥ || 53 ||
[Analyze grammar]

śobhante cetanāḥ sarve parabrahmaprasaṃginaḥ |
citraśilpakalāramyaṃ pīṭhikākomalāstaram || 54 ||
[Analyze grammar]

tejovārdhiriva dṛśyaṃ ratnakoṭivirājitam |
nakhacandramaṇikāntidyotitānantamuktakam || 55 ||
[Analyze grammar]

siṃhāsanaṃ svayamakṣarākhyaṃ dhāma na cetarat |
tatra mūrtau mahātejaḥparidhirvartulo mahān || 56 ||
[Analyze grammar]

miṣṭaśaityasaumyatejo'nantagovyāptapārśvakaḥ |
saptarūpaḥ saptabhūmiḥ paridhiḥ sopi muktakaḥ || 57 ||
[Analyze grammar]

daśadikṣu harestejo mahāsiṃhāsane'bhitaḥ |
vyāpnotyeva na cā''nto'sti gāvastā bhūriśṛṃgikāḥ || 58 ||
[Analyze grammar]

yatra siṃhāsane tadvai maṇḍapaḥ samayojanaḥ |
tatra divyamahāstaṃbhā hyakṣarāḥ kadalīkṛtāḥ || 59 ||
[Analyze grammar]

haridvarṇā haritpatrā haritkadalamaṃgalāḥ |
śatastaṃbhāḥ svarṇavarṇā vastraveṣṭitaśobhanāḥ || 60 ||
[Analyze grammar]

teṣāṃ kammānikāḥ śilpakalāvyāptivicitritāḥ |
nānāvidhā gajāḥ śvetāḥ makarā haṃsasārasāḥ || 61 ||
[Analyze grammar]

menāśukaśvetapārāvatacakrakacātakāḥ |
sarve muktā bhavantyeva saccidānandavigrahāḥ || 62 ||
[Analyze grammar]

divyasusvaramādhuryakṛtagītikamaṃgalāḥ |
tatratyasaṃskṛtavāṇyā gāyanti guṇakīrtanam || 63 ||
[Analyze grammar]

naikakoṭimahāmuktamaṇḍalāni tu maṇḍape |
pratiṣṭhanti sthale bhūmau madhye copari cāntare || 64 ||
[Analyze grammar]

sṛṣṭisṛṣṭyantare yāni rūpāṇi saṃdhṛtāni vai |
hariṇā tāni sarvāṇi maṇḍape sthāpitāni hi || 65 ||
[Analyze grammar]

śobhante vividhākārā vividhaiśvaryacihnakāḥ |
tattajjanmā'vatārādicaritrodbodhahetayaḥ || 66 ||
[Analyze grammar]

vṛttāntabodhakākārā bhagavanto vibhūtayaḥ |
sarve tiṣṭhanti tatraiva maṇḍapāgrordhvamadhyataḥ || 67 ||
[Analyze grammar]

tatratyā muktamūrdhanyāḥ sūryacandrādidarpaṇāḥ |
bhūtvā bhūtvā teṣu teṣu staṃbheṣu saṃvasanti vai || 68 ||
[Analyze grammar]

ullecastatpramāṇāḍhyo yatra muktātmatārakāḥ |
lagnāḥ samyakprakāśante śītakāntipravartakāḥ || 69 ||
[Analyze grammar]

muktāśca toraṇāstatra maṇihīrakarūpakāḥ |
kācakāntikarā naikadivyadīpakacandrakāḥ || 70 ||
[Analyze grammar]

ūrdhvamadhastathā pārśve dikṣu sarvavidikṣu ca |
maṇḍapāt kiraṇā yānti projjvalā vyomamārgagāḥ || 71 ||
[Analyze grammar]

tādṛśo maṇḍapastādṛk siṃhāsanamathāpi vā |
nānyadhāmasu vidyete kā varṇyā taccamatkṛtiḥ || 72 ||
[Analyze grammar]

śobhā divyāpi nānyatra na varṇyā jāyate mayā |
maṇḍapopariprāsādaḥ śrīharestaṃ śṛṇu priye || 73 ||
[Analyze grammar]

itiśrīlakṣmīnārāyaṇīyasaṃhitāyā prathame kṛtayugasantāne'kṣaradhāmasthaparabrahmatatsiṃhāsanatanmaṇḍapavarṇananāmā'ṣṭādaśādhikaśatatamo'dhyāyaḥ || 118 ||
[Analyze grammar]