Chapter 103

śrīnārāyaṇa uvāca |
śṛṇu priye sahā''lībhiḥ pārvatī harasundarī |
devyaḥ sarvāśca dāsyaśca militvā dyunadīṃ saha || 1 ||
[Analyze grammar]

gatāḥ snānārthamityatra niḥśaṃkaṃ snānti vāriṣu |
sugandhisāratailāni sammṛdyā'tyamṛtāni ca || 2 ||
[Analyze grammar]

dadhīni madhubhiścāpi rasyānyapi kaṭūni ca |
sakhyaḥ snānaṃ kārayanti pārvatīṃ jagataḥ prasūm || 3 ||
[Analyze grammar]

ramayanti jale tāṃ vai prāṃjalakṣepaṇādibhiḥ |
sugandhi salilaṃ jātaṃ sugandhadravamiśritam || 4 ||
[Analyze grammar]

snāne sakhīvihāre'tra tṛptirnāsāṃ prajāyate |
snānti caiva punaḥ snānti patanti salile muhuḥ || 5 ||
[Analyze grammar]

vinirgatya punaḥ snānti snānāntaṃ naiva yānti hi |
saṃgavo vigataḥ kālaḥ śaṃbhurdhyānād bahistadā || 6 ||
[Analyze grammar]

āgataḥ svāsanaṃ tyaktvā caikākī svāśramaṃ gataḥ |
gaṇāṃścānye na jānanti snānalagnāstadā'bhavan || 7 ||
[Analyze grammar]

śaṃbhuḥ svābhāviko dhyānī śanaiḥ śanaiḥ prayāti hi |
svāśramasya mahaddvāraṃ yāvat praviśatīśvaraḥ || 8 ||
[Analyze grammar]

tāvatpārvatyātmajena niruddho yāhi mā tviti |
kastvaṃ kasmātsamāyātaḥ karamādviśasi gopuram || 9 ||
[Analyze grammar]

tiṣṭha vivṛtya taṃ mārgaṃ yāhi yenā''gato'tra vai |
nā'tra sthātuṃ pradeyo vai mayā kau'pi jano naraḥ || 10 ||
[Analyze grammar]

ājñā nāstyeva me mātustasmādvigaccha gopurāt |
tathāpi śaṃkarastasya naiva śrutvā prayāti hi || 11 ||
[Analyze grammar]

tāvat krodhasamāviṣṭo gaṇeśo mātṛsevakaḥ |
prodghuṣya ca samutplutya pradudrāva haraṃ prati || 12 ||
[Analyze grammar]

gatvā tanmārgamārudhya mā gacchoktvā hyupasthitaḥ |
parāgaccha parāgaccha ko'si kva gacchasi drutam || 13 ||
[Analyze grammar]

atrodyāne praveśāya manmātrājñā na vartate |
snānaṃ kurvanti sakhyaśca manmātrā saha vāribhiḥ || 14 ||
[Analyze grammar]

mā yāhi naiva gantavyaṃ vigaccheto bahiḥ pivan |
śaṃbhuḥ prāha tamajñātvā ko'si roddhā mama gṛham || 15 ||
[Analyze grammar]

mamodyānaṃ tu gacchāmi kastvaṃ roddhā mamāpi ca |
gaccha yāhi tvitaḥ sthānāt kayā tvaṃ yojito'tra vai || 16 ||
[Analyze grammar]

bahirgaccha mama dvārādgopurānmama rakṣitāt |
ityākruśya hareṇa svamavijñāya tu bālakam || 17 ||
[Analyze grammar]

haste dhṛtvā gopurāt sa bahirniṣkāsito balāt |
tāvadgaṇeśastaddhastāddhastaṃ svaṃ praviyujya ca || 18 ||
[Analyze grammar]

śaṃbhuṃ hastadvaye dhṛtvā cākruśya nītavān bahiḥ |
prāha śaṃbhuṃ yāhi dūraṃ mā mukhaṃ me pradarśaya || 19 ||
[Analyze grammar]

śaṃbhunā'pi tadā jñātaṃ matto'pi balavānayam |
na vai śārīrayuddhena jetuṃ śakyo bhavedayam || 20 ||
[Analyze grammar]

aho madīyaḥ kailāso gṛhodyānaśca rakṣasā |
svāyattīkṛta evaitya kenā'pi dhruvamarthataḥ || 21 ||
[Analyze grammar]

kva syād devī mama patnī kimabhūd viparītakam |
kiṃ kartavyaṃ mayā cādya hyayaṃ tu balavāniti || 22 ||
[Analyze grammar]

yadi gatvā gaṇān vakṣye tadā me balahīnatā |
hāsyāspadatvamāpnuyāṃ yuddhe cāpi parājayam || 23 ||
[Analyze grammar]

svasya mānaṃ dhanaṃ mantraṃ cāvamānaṃ ca maithunam |
dānaṃ dharmaṃ gṛhakleśaṃ kāryaṃ naiva prakāśayet || 24 ||
[Analyze grammar]

tataḥ kimiti vai kāryaṃ bālo'yaṃ balavāniti |
pārvatī ced vijānīyād yuddhe śaṃbhuḥ parājitaḥ || 25 ||
[Analyze grammar]

tadagre ca mayā bhāvyaṃ natakaṃdharavartinā |
vaktyayaṃ pārvatīputraḥ kimevaṃ saṃbhavediti || 26 ||
[Analyze grammar]

sarvasmājjayamicchedvai putrācchiṣyātparājayam |
ataḥ sāmnā bodhayitvā gacchāmi mama mandiram || 27 ||
[Analyze grammar]

vicāryetthaṃ kṣaṇaṃ sthitvā yāvadvadati śaṃkaraḥ |
gaṇeśo'pi tadā dvāraṃ niruddhya pratitiṣṭhati || 28 ||
[Analyze grammar]

śaṃbhuḥ prāha mamaiṣo vai kailāso vartate gṛham |
patnī bhāryā mama devī pārvatī vartateṃ'gaja || 29 ||
[Analyze grammar]

mā'haṃ tvayā niroddhavyo gantuṃ dehi mama gṛham |
śrutvaitatsa gaṇeśastu prāha taṃ roṣataḥ khalu || 30 ||
[Analyze grammar]

mā vocaḥ śaṭha patnīti bhāryeti cāṃgajeti ca |
mārayiṣyāmi ca tvāṃ vai no ced gacchasi dūrataḥ || 31 ||
[Analyze grammar]

sthūlo mahānaraṇyastho gaccha dūraṃ na te gamaḥ |
śaṃbhuḥ prāha ca taṃ jñātvā mātṛbhaktaṃ samudyatam || 32 ||
[Analyze grammar]

aho bāla  na te mātā na pitā te'sti kaścan |
mātā piteti nāmnā vai svārthamātranibandhanā || 33 ||
[Analyze grammar]

kathaṃ prāṇān priyāṃstyaktumīhase mātṛnāmataḥ |
haniṣye tvāṃ triśūlena no cenmuñcasi mārgakam || 34 ||
[Analyze grammar]

ityuktvā taṃ haraścā'pāsārayat svakareṇa vai |
gaṇeśo'pi haraṃ cāpāsārayat svakareṇa hi || 35 ||
[Analyze grammar]

gopurānnirgatau bāhye deśe yuyudhatuśca tau |
keśākeśi muṣṭāmuṣṭi daṇḍādaṇḍi nijaghnatuḥ || 36 ||
[Analyze grammar]

bahubalena pāśena bāhubhirjānubhistathā |
kaphoṇikābhiranyonyaṃ tāḍayāmāsaturmuhuḥ || 37 ||
[Analyze grammar]

tayostu tāḍanaṃ tatra tvākaṇṭhāgraṃ yadā hyabhūt |
gaṇeśastu tadā śaṃbhumūrdhvamuttolya vegataḥ || 38 ||
[Analyze grammar]

bhuvi prakṣipya tadvakṣaḥ prapīḍyopari saṃsthitaḥ |
yuvā kruddho gaṇeśastaṃ mūḍhamāramamārayat || 39 ||
[Analyze grammar]

śaṃbhuḥ prāha aho hā hā mṛto'smi muñca māṃ yadi |
tadā te laḍḍukāndatvā pūjayiṣyāmi cāgrataḥ || 40 ||
[Analyze grammar]

gaṇeśastu tadā tyaktvā śaṃbhuṃ pārśve sthito'bhavat |
śaṃbhurjaṭāṃ samāṃ kṛtvā dhulīrdehādamārjayat || 41 ||
[Analyze grammar]

svastho bhūtvā ca yāvadvai gopurāntarvivikṣati |
triśūlaṃ tu gaṇastāvat samādāya ruṇaddhitam || 42 ||
[Analyze grammar]

śaṃbhuścāpi mahākruddhaḥ prāha bālamaninditam |
kathaṃ prāṇān vihātuṃ tvaṃ mayā virodhamicchasi || 43 ||
[Analyze grammar]

gacchā'ntaḥ pṛccha jananīṃ śaṃkaraḥ ko bhavettava |
yadi sā kathayenmāṃ svapatiṃ dehi praveśanam || 44 ||
[Analyze grammar]

gaṇeśaḥ prāha dhūrtastvaṃ vadhyo bhavasi śastrataḥ |
śaṃbhuḥ prāha varākastvaṃ vadhyo bhavasi śūlataḥ || 45 ||
[Analyze grammar]

gaṇaḥ prāha svamātrārthaṃ yadi prāṇāḥ paretakāḥ |
tadāpi me śubhaṃ bhūyāt svargaṃ vindāmi sevayā || 46 ||
[Analyze grammar]

mātrarthaṃ janakārthaṃ ca patnyarthaṃ ca satāṃ kṛte |
prāṇādyarpayitā yāti svargaṃ vā mokṣamityapi || 47 ||
[Analyze grammar]

yadi prāṇā mama yānti mātrarthaṃ saphalaṃ januḥ |
hato yadyajñātapitrā tathāpi saphalaṃ januḥ || 48 ||
[Analyze grammar]

evamuktvā namaḥ kṛtvā jagrāha ca triśūlakam |
śaṃbhūrapi varaṃ putrahastānmṛtyumupasthitam || 49 ||
[Analyze grammar]

yāvadajñātacaryau svastāvat snehaḥ kuto mataḥ |
mṛtyurbuddhimatā'pohyo yāvadbuddhibalodayam || 50 ||
[Analyze grammar]

vicāryetthaṃ hariṃ smṛtvā jagrāha svatriśūlakam |
parasparaṃ prajaghnaturdayāṃ kṛtvā tu pṛṣṭhataḥ || 51 ||
[Analyze grammar]

gaṇeśena tadā śaṃbhostriśūlaṃ parigṛhya ca |
dvivṛttaṃ valayaṃ kṛtvā kṣepitaṃ bhūtale drutam || 52 ||
[Analyze grammar]

dṛṣṭvā bālabalaṃ śaṃbhuḥ kṣaṇamātraṃ sumohitaḥ |
punaḥ paraśumādāya jaghāna gaṇakaṃdhare || 53 ||
[Analyze grammar]

gaṇastaṃ paraśuṃ svasya kuṭhāreṇa babhaṃja vai |
dvedhā jātaṃ tu paraśuṃ tyaktvā śaktimupādade || 54 ||
[Analyze grammar]

gaṇeśo'pi tvaritaḥ san utplutya vyomavartmani |
śaktiṃ vidhṛtya ca balācchaṃbhuṃ tayā jaghāna saḥ || 55 ||
[Analyze grammar]

mūrchito roṣamāpanno niṣasāda haro bhuvi |
punarutthāya yāvadvai khaḍgaṃ gṛhṇāti śaṃkaraḥ || 56 ||
[Analyze grammar]

gajastāvat triśūlena khaḍgaṃ dvedhā babhaṃja ha |
śaṃkaraścātikhinnaḥ san mahākālasurūpadhṛk || 57 ||
[Analyze grammar]

gaṇasyaiva triśūlaṃ tvāskandya prāmārayad gale |
chinnaḥ kaṇṭho gaṇeśasya patitaṃ mastakaṃ bhuvi || 58 ||
[Analyze grammar]

kṛṣṇe tallīnatāṃ prāptaṃ kabandho vartate'tra tu |
śaṃbhuḥ saroṣatāmrākṣaḥ snātvā svāṃ pārvatīṃ prati || 59 ||
[Analyze grammar]

tatra sthāne gato yāvad dṛśyate kālarūpadhṛk |
pārvatī bhayamāpannā drāgeva pādayorgatā || 60 ||
[Analyze grammar]

kṣamāpaya mahādeva  kiṃ krodho deharaktatā |
kiṃ kṛtaṃ bhavatā svāmin kathaṃ raktapluto bhavān || 61 ||
[Analyze grammar]

kva yuddhaṃ kena sākaṃ vā jātaṃ cā'niṣṭamāgatam |
śaṃbhustadā priyāśliṣṭaḥ śānto bhūtvā'bravīdidam || 62 ||
[Analyze grammar]

ko'yaṃ gopurasaṃroddhā tvayā rakṣita ujjaḍaḥ |
kiṃ kiṃ deva kṛtaṃ kiṃ vā kiṃ jātaṃ vada me bhramaḥ || 63 ||
[Analyze grammar]

tava putro gaṇeśaḥ sa bahunā tapasā'rthitaḥ |
mayā snānaprakālasyetarapraveśarodhakaḥ || 64 ||
[Analyze grammar]

niṣāditaḥ kimaniṣṭaṃ jātaṃ prāṇada me vada |
iti kṛtvā gale lagnāṃ śaṃbhuḥ prāha mṛto hyayam || 65 ||
[Analyze grammar]

mayā triśūlaghātena nāśitaḥ kādviyojitaḥ |
pārvatī tu samāśrutya roditī kurarīva sā || 66 ||
[Analyze grammar]

aho putrajaneḥ saukhyaṃ nidhane duḥkhamityapi |
patiṃ tyaktvā satvaraṃ so dudrāva gopuraṃ prati || 67 ||
[Analyze grammar]

patitaṃ tatkabandhaṃ tu svāṃke sthāpyaruroda ha |
svātmābhimānajaṃ duḥkhaṃ sati jñāne nivartate || 68 ||
[Analyze grammar]

putraṃ śocāmi kiṃ vā me patiṃ śocāmi nāśakam |
gṛhe hantā ca ghātyaśca kaṃ śocāmi gṛhiṇyaham || 69 ||
[Analyze grammar]

re putra tvaṃ svayaṃ kṛṣṇo ha janimṛtireva ha |
na vai te maraṇaṃ yogyaṃ hyevaṃ cecca mriye'pyaham || 70 ||
[Analyze grammar]

yadi tvāṃ na jīvayate śaṃkaraste vināśakaḥ |
anāhāravrataṃ kṛtvā yātrāpāraṃ karomyaham || 71 ||
[Analyze grammar]

ityuktvā hyaśanaṃ tyaktvā vilalāpa muhurmuhuḥ |
saṃgṛhya gopurasthāne kabandhaṃ tatra saṃsthitā || 72 ||
[Analyze grammar]

aho ho lokamātā sā hyaśokā'pi śucānvitā |
loko'yaṃ dehasambaddho jñānināmapi śokakṛt || 73 ||
[Analyze grammar]

kṣaṇaṃ bhavati saṃmohādbhrāmakaḥ kā vicitratā |
śrutvā vilāpaṃ pārvatyāḥ sakhyastatra samāgatāḥ || 74 ||
[Analyze grammar]

śaṃbhuśca kārtikeyaśca brahmaviṣṇusurādayaḥ |
gaṇāśca prāyayuḥ sarve vilopaṃ cakrire tadā || 75 ||
[Analyze grammar]

caturdaśasu lokeṣu śoko'yaṃ prasṛto drutam |
ājagmustatkṣaṇe tatra caturdaśabilasthitāḥ || 76 ||
[Analyze grammar]

śokārtāṃ pārvatīṃ devyo bodhayanti narāstathā |
śaṃbhuḥ svayaṃ vicāraṃ saṃcakre tajjīvanāya ca || 77 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne gaṇeśaśaṃkarayoryuddhe gaṇeśamastakacchedatajjanyaśokaścetyādinirūpaṇanāmā tryadhikaśatatamo'dhyāyaḥ || 103 ||
[Analyze grammar]