Chapter 97

śrīnārāyaṇa uvāca |
śṛṇu lakṣmi  kṛpāluḥ sa śrīkṛṣṇaḥ karuṇānidhiḥ |
svarūpaṃ darśayāmāsa prathamaṃ sarvamohanam || 1 ||
[Analyze grammar]

brahmacaryasvarūpaṃ vai sākṣādrūpanidhiṃ param |
ṣaṇmukhaṃ samayūraṃ ca bahuhetisamanvitam || 2 ||
[Analyze grammar]

bahujñānaṃ bahubalaṃ bahukalaṃ suyauvanam |
divyaṃ senāsvāmiyogyacihnaṃ ṣoḍaśahāyanam || 3 ||
[Analyze grammar]

atha dvitīyarūpaṃ svaṃ sthūlaṃ vaṃśakaraṃ param |
vanamālāgalaṃ śyāmaṃ ratnabhūṣaṇabhūṣitam || 4 ||
[Analyze grammar]

kiśoravayasaṃ sarpayajñopavītaśobhanam |
koṭikandarpalāvaṇyaṃ mūṣakasthiravāhanam || 5 ||
[Analyze grammar]

atīva hṛṣṭaṃ sarveśaṃ bhaktānugrahakārakam |
dṛṣṭvā rūpe rūpavatī putrau tadanurūpakau || 6 ||
[Analyze grammar]

manasā varayāmāsa varaṃ samprāpya tatkṣaṇam |
varaṃ datvā tadā kṛṣṇastattejo'ntaradhīyata || 7 ||
[Analyze grammar]

prāptau putrāviti hṛṣṭā jagadambā nirambikā |
brāhmaṇabhikṣubandibhyo dadau dānāni cāmbikā || 8 ||
[Analyze grammar]

tāṃstathā bhojayāmāsa pūjayāmāsa śaṃkaram |
dundubhiṃ vādayāmāsa kārayāmāsa maṃgalam || 9 ||
[Analyze grammar]

saṃgītaṃ gāpayāmāsa kṛṣṇasambandhi susvaram |
vrataṃ samāpya śailotthā bhojayitvā tadāśritān || 10 ||
[Analyze grammar]

dugdhapākaṃ pūrikāśca bubhuje svāminā saha |
tāmbūlaṃ susugandhāḍhyaṃ bubhuje śaṃbhunā saha || 11 ||
[Analyze grammar]

sarvān prāghūṇikān sā tu prasthāpya prayatā punaḥ |
śrāṃgārika pariṣkṛtya śārīrakaṃ pramodanam || 12 ||
[Analyze grammar]

payaḥphenanibhāṃ śayyāṃ ramyāṃ sadratnamaṃcake |
puṣpacandanasaṃyuktāṃ kastūrīdānavāsitām || 13 ||
[Analyze grammar]

rahasi svāminā sārdhaṃ suṣvāpa parameśvarī |
sugandhikusumāḍhyena vāyunā surabhīkṛte || 14 ||
[Analyze grammar]

bhramaradhvanisaṃyukte puṃskokilarutāśraye |
kailāsadhāmasīmānte ramye candanakānane || 15 ||
[Analyze grammar]

gandhamādanabhūbhāge siṣeve surataṃ patim |
vyahārṣīt sā surasikā śaṃkareṇa sahāmbikā || 16 ||
[Analyze grammar]

dvayoḥ suratamāpannaṃ yad dvayośca tadā'bhavat |
skandanaṃ mahadāścaryaṃ prathame vīryapātane || 17 ||
[Analyze grammar]

vīryamagnisvarūpaṃ tad bhayakṛcca mahāprabham |
yonidvāre skhalitaṃ tad bahireva pravāhitam || 18 ||
[Analyze grammar]

ayonijasya putrasyotpattaye'bhūddharīcchayā |
atha pravāharūpeṇa jvālārūpeṇa retasā || 19 ||
[Analyze grammar]

uṣṇatejaḥsamudbhūtoṣmasvarūpeṇa cā'mbare |
antarikṣe bhūtale ca prāṇino mūrchanāṃ yayuḥ || 20 ||
[Analyze grammar]

tacchāntyarthaṃ svayaṃ brahmā viṣṇuścānye divaukasaḥ |
sasmarurmanasā cāgniṃ so'pyājagāma satvaram || 21 ||
[Analyze grammar]

devānāmanumatyā ca viveśa suratasthalam |
tadaṃgaṇamanuprāpya bhikṣāṃ dehīti tūcivān || 22 ||
[Analyze grammar]

pāṇipātrasya me hyamba bhikṣāṃ dehi vrajāmyaham |
bhikṣāṃ tasmai dadau cāmbā dugdharūpāmupasthitām || 23 ||
[Analyze grammar]

paramānnaṃ dugdhapākaṃ pradattaṃ cāṃjalau yadā |
tadā ca prāsarad retaḥ śaṃbhorvyomādhvanaścyavat || 24 ||
[Analyze grammar]

vahnyaṃjalau prapatitaṃ miṣṭaṃ sugandhi sadrasam |
nigīrṇaṃ miśritaṃ bhaikṣaṃ pratyakṣaṃ vahninā svayam || 25 ||
[Analyze grammar]

rasāsvāde mohito'gniranyadreto'pi yattvabhūt |
vyomno'ntarikṣādbhūmeśca śayyāyāścā'labheddhi tat || 26 ||
[Analyze grammar]

tat sarvaṃ bhikṣayā sārdhaṃ rasalobhācca mohataḥ |
svayameva gṛhītvā tanmiśrayitvā muhurmuhuḥ || 27 ||
[Analyze grammar]

jagrāsā''svādayandugdhapākaṃ vīryaṃ ca bhāvataḥ |
na kiṃcidavaśiṣṭaṃ hi putrārthaṃ pārvatīśaye || 28 ||
[Analyze grammar]

tadā cintāparā gaurī rasāsvāde pralobhinam |
vahniṃ śaśāpa bho vahne rasāsvādapradūṣaṇāt || 29 ||
[Analyze grammar]

bījaṃ putrātmakamapi śayyāsthaṃ bhakṣitaṃ tvayā |
tasmād bhikṣo mama śāpātsarvabhakṣo bhavā''śu vai || 30 ||
[Analyze grammar]

śāpaḥ prāpto mahadduḥkhamabhavadvahnimānase |
reto na jīrṇaṃ prabalaṃ tejo'pyuṣṇataraṃ yataḥ || 31 ||
[Analyze grammar]

pratyuta vahniṃ tadretaḥ prājvālayadatīva ca |
vahnirjājvalyamāno vai gatvā gaṃgāmahāhrade || 3 ||
[Analyze grammar]

vamati sma ca tatsarvaṃ vahniḥ svastho'bhavattadā |
kintu vīryoṣmaṇā gaṃgā taptā dagdhā'bhavattadā || 33 ||
[Analyze grammar]

jalānyucchalitānyāsan tattāpaṃ naiva sehire |
gaṃgayā projjhito dhātuḥ śarastambe papāta ha || 34 ||
[Analyze grammar]

tatra samajvaladdhāturvahnibhrāntikarastadā |
saptarṣipramadāstatra gaṃgāyāṃ snātumāgatāḥ || 35 ||
[Analyze grammar]

dṛṣṭvā prajvalitaṃ tatra snātāśca śītapīḍitāḥ |
kṛttikāstaptusaṃkalpā hyarundhatyā nivāritāḥ || 36 ||
[Analyze grammar]

api tatrāgaman ṣaḍ vai ṛṣipatnyaśca tatsthale |
yāvat tepuśca tāḥ sarvā retasaḥ paramāṇavaḥ || 37 ||
[Analyze grammar]

viviśū romakūpeṣu tāsāṃ tatraiva satvaram |
sagarbhāstāśca saṃjātāḥ ṣaḍgarbhairjajvalurbhṛśam || 38 ||
[Analyze grammar]

śuśucuśca kutastādvai garbhavatyo bhavāma ha |
dāhayatyakhilaṃ dehaṃ kimidaṃ tvanalādabhūt || 39 ||
[Analyze grammar]

tyajāmaścainamevā'tra nālakhaṇḍauṣadhigrasāt |
pītvā rasaṃ ca tadretaḥ utsasṛjurbhuvastale || 40 ||
[Analyze grammar]

aikapadyena tadretaḥ ṣaṇmukhaṃ hāṭakaprabham |
apatyaṃ drāgabhavadvai surūpaṃ sukumārakam || 41 ||
[Analyze grammar]

gaṃgāyāḥ puline jātaḥ kārtikeyaḥ pratāpavān |
jāto yadā hi gaṃgāyāṃ ṣaṇmukhaḥ śaṃkarātmajaḥ || 42 ||
[Analyze grammar]

tadānīmeva girijā jātā snutapayodharā |
śivaṃ nirīkṣya tanvaṃgī he śaṃbho prasravaḥ stanāt || 43 ||
[Analyze grammar]

saṃjāto me mahādeva kimarthastannirīkṣyatām |
samādhinā mahādevo jñātvā'bravīt suto'bhavat || 44 ||
[Analyze grammar]

nāradena tadāgatya kathitaṃ janma tasya tat |
śivāya ca śivāyai ca putro jāto'tisundaraḥ || 45 ||
[Analyze grammar]

tadākarṇya vaco viprāḥ ṛṣayaḥ pramathāstathā |
kailāsaṃ bhūṣayāmāsurvitānadhvajatoraṇaiḥ || 46 ||
[Analyze grammar]

patākākadalīstaṃbhaiḥ svastimaṃgalamaṇḍanaiḥ |
tadā surarṣayaḥ siddhāścāraṇā apsarogaṇāḥ || 47 ||
[Analyze grammar]

yakṣāḥ sarpā mānavāśca jagmurgaṃgātaṭaṃ śubham |
draṣṭuṃ gāṃgeyamāruhya vṛṣabhaṃ śaṃkarastathā || 48 ||
[Analyze grammar]

pārvatyā saha sagaṇo gaṃgātaṭamupāyayau |
tathā śaṃkhāśca bheryaśca nedustūryāṇyanekaśaḥ || 49 ||
[Analyze grammar]

kecinnṛtyanti gāyanti stuvanti tadguṇārṇavam |
yāvatsamīkṣayāmāsurgāṃgeyaṃ śaṃkaropamam || 50 ||
[Analyze grammar]

dadṛśustejasā vyāptaṃ bālaṃ sūryasamaprabham |
sumukhaṃ suśriyaṃ ramyaṃ sunāsaṃ sasmitekṣaṇam || 51 ||
[Analyze grammar]

prasannaṃ cārudaśanaṃ sarvāvayavasundaram |
snigdhālakaṃ kumāraṃ taṃ devā vavandire tadā || 52 ||
[Analyze grammar]

pramathāśca gaṇāḥ sarve vīrabhadrādayastathā |
brahmā viṣṇurmahendraśca parivārya kumārakam || 53 ||
[Analyze grammar]

upasaṃsthāstathā cānye vāmadakṣiṇabhāgataḥ |
avatīrya vṛṣācchaṃbhuḥ pārvatyā saha suvrataḥ || 54 ||
[Analyze grammar]

putraṃ dadarśa cātmānaṃ snehapluto babhūva ha |
upaguhya guhaṃ tatra pārvatī premasaṃplutā || 55 ||
[Analyze grammar]

prasnutaṃ pāyayāmāsa stanyaṃ cāṃke nidhāya vai |
cucumba pārvatī putramaślikṣat śaṃkaraḥ pitā || 56 ||
[Analyze grammar]

yojito hyāśiṣā sarvaiḥ śarkarā dāpitā tadā |
dānāni vividhānyeva dāpitāni hareṇa vai || 57 ||
[Analyze grammar]

dampatī tau tadā tatra caikapadyena rejatuḥ |
kumārastu tadā reme dhṛtvā kaṃṭhasthavāsukim || 58 ||
[Analyze grammar]

atha tatragatā gaṃgā kṛttikāścāgnidevatā |
dṛṣṭvā bālaṃ mahārūpaṃ sabalaṃ sūryavarcasam || 59 ||
[Analyze grammar]

mamā'yaṃ na ca te bālo vivadante sma cāgrahāt |
bālaḥ prāha tadā sākṣānmadālokāt tu yatstanāt || 60 ||
[Analyze grammar]

dugdhaṃ parisnutaṃ snehāt tasyāścāhaṃ suputrakaḥ |
ityuccārya nanāma svapitarau prāk tato'parān || 61 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne |
pārvatyai śrīkṛṣṇapradattaputradvayarūpadarśanaṃ śaṃkarapārvatīvahnigaṃgāśarastambakṛttikādvārā kārtikeyajanma ceti pradarśananāmā saptanavatitamo'dhyāyaḥ || 97 ||
[Analyze grammar]