Chapter 86

śrīnārāyaṇa uvāca |
śṛṇu lakṣmi tadā strīṇāṃ viśvāsāya samādhinā |
prāgudantaṃ parijñāya gaṇeśo'ntaḥpuraṃ hyagāt || 1 ||
[Analyze grammar]

dṛṣṭārthameva kathayan strīṇāṃ viśvāsabhūrabhūt |
yadyatpūrvaṃ tu sajjātaṃ tat sarvaṃ kathayatyayam || 2 ||
[Analyze grammar]

ekāmāsādya saṃprāha putrāṇāṃ navatistrayam |
tava jajñe teṣu caiko'śvātpatito mamāra ca || 3 ||
[Analyze grammar]

sagarbheyaṃ śubhāṃ kanyāṃ janayiṣyati bhāgyataḥ |
adyāpi yāvaddurbhāgyā sāmprataṃ subhagā tviyam || 4 ||
[Analyze grammar]

rājñā yasyai pradatto'yaṃ muktāhāraḥ suśobhanaḥ |
seyaṃ rājñiṣu mānyā vai bhavatīvāti jīvavat || 5 ||
[Analyze grammar]

imāṃ rājā'timanute bahusnehāspadāṃ muhuḥ |
dvau grāmau tu prasādena cāsyai dātumudīritau || 6 ||
[Analyze grammar]

anyāṃ rājñīṃ tataḥ prāha kumāro yadi jāyate |
tadā tubhyaṃ pradāsye vai daśagrāmāṃstu vṛttaye || 7 ||
[Analyze grammar]

iti rājñā pratijñātaṃ śayyāyāṃ tava sannidhau |
aparāṃ tu tadā prāha yadi tvaṃ syāḥ suputrakā || 8 ||
[Analyze grammar]

ardhaṃ rājyaṃ pradāsye tvāṃ suputrāyai tato'vadat |
anyasyai premasamaye rājā prāha madarthakam || 9 ||
[Analyze grammar]

tāmbūlaṃ yad rakṣitaṃ tad dehi dāsye puratrayam |
ityevaṃ pratyakṣajātaṃ samuvāca gaṇādhipaḥ || 10 ||
[Analyze grammar]

svapnānapyāha tāsāṃ vai tena viśvāsabhūrabhūt |
varṇayanti ca rājñyo'sya parokṣe ca guṇān bahūn || 11 ||
[Analyze grammar]

aho kaścit sthavīro vai vipraḥ satyavivecanaḥ |
prāgudantaṃ yathārthaṃ vai vakti sarva pramāṇataḥ || 12 ||
[Analyze grammar]

alolupaḥ sadācāraḥ santuṣṭo bhūtabhāvidṛk |
prasannāsyaḥ śuciḥ śāstraśrutismṛtiviśāradaḥ || 13 ||
[Analyze grammar]

yadyad vakti jyotiṣā saḥ sarvaṃ satyaṃ pravartate |
nānyādṛśaḥ svapnavaktā sākṣādvaktā ca dṛggataḥ || 14 ||
[Analyze grammar]

divodāsasya paṭṭāṃgī rājñī līlāvatī svayam |
prāha rājñe mahārāja vipro brahmasamo nidhiḥ || 15 ||
[Analyze grammar]

kāśyāṃ kaścit samāyāto draṣṭavyo grahabodhane |
kā daśā kīdṛśaṃ svapnaṃ kaḥ kālaḥ śakunaṃ kimu || 16 ||
[Analyze grammar]

vetti sarvaṃ tadasmādvai praṣṭavyaṃ kiṃ ca bhāvi vai |
ityākarṇya tadā rājñā hyākārito gaṇādhipaḥ || 17 ||
[Analyze grammar]

samājagāma rājarṣiṃ labdhavān satkṛtiṃ tataḥ |
samupaviṣṭoviṣṭare hyāśīrbhirabhyanandayat || 18 ||
[Analyze grammar]

kṣemaṃ te kuśalaṃ cāstu śreyo'bhyudaya ityapi |
śivo dharmo'stu te saudhe tava vāso harergṛhe || 19 ||
[Analyze grammar]

samākarṇya ca rājā taṃ brāhmaṇaṃ prāha bho dvija |
prāptaṃ saṃrakṣitaṃ kṣemaṃ kau pṛthvyāṃ śaṃ sukhāvaham || 20 ||
[Analyze grammar]

tatsarvaṃ laṃ layaṃ yāyāditi te'sti manorathaḥ |
mama śreyo'bhyudayaśca śivo śivārthamastviti || 21 ||
[Analyze grammar]

abhyudayaḥ śivo yo vai so'pyadharmo bhavatviti |
mama saudhe śivarājyaṃ mama muktirharāviti || 22 ||
[Analyze grammar]

asmātsthānādvināśo me kimicchasi dvijottama |
divodāsasya sārvajñyaṃ jñātvā''ścaryamavāpa saḥ || 23 ||
[Analyze grammar]

saṃgṛhyā'rhāṃ gaṇeśastu svasthānaṃ saṃjagāma ha |
rājā rājñīṃ tadā prāha vipro'styayaṃ trikāladṛk || 24 ||
[Analyze grammar]

prajā yāntyanyaviṣayaṃ svapnaṃ bhāti bhayāvaham |
udghoṣaḥ śrūyate bhāvivināśonmukhatā sthitā || 25 ||
[Analyze grammar]

prātarāhūya praṣṭavyaḥ kiṃ bhaviṣyaditi sphuṭam |
manye devo viruddho me śaṃkaro'pyastyaśaṃkaraḥ || 26 ||
[Analyze grammar]

yadbhāvi tadbhavedeva nārāyaṇasamicchayā |
prātarāhūya satkṛtya rājā papraccha hṛdgatam || 27 ||
[Analyze grammar]

śāsiteyaṃ mahīṃ sarvāṃ bhuktā bhogā vibhūtayaḥ |
rājyaprajā hyatandriṇā prapālitāḥ svajīvavat || 28 ||
[Analyze grammar]

dvijasevā kṛtā pūrṇā nā'pūrṇaṃ me'vaśiṣyate |
prajāpalāyanaṃ svāpnaduṣṭatāṃ tu vilokya vai || 29 ||
[Analyze grammar]

kiṃbhāvīti pramugdho'haṃ dṛṣṭvā tathyaṃ nivedaya |
gaṇeśaḥ prāha rājānaḥ prāyaḥ karṇaprasādanāḥ || 30 ||
[Analyze grammar]

miṣṭaṃ miṣṭaṃ tu śṛṇvanti daṇḍayanti kaṭubruvam |
ahaṃ miṣṭaṃ kaṭuṃ cāpi tathyaṃ vacmi prasahyatām || 31 ||
[Analyze grammar]

vikrānto bhāgyavān śūro yaśaḥ puṇyasubuddhimān |
yādṛśo'si tathā nāsti tridaśeśo'pi vai divi || 32 ||
[Analyze grammar]

dhiyā gurusamaścāsi prasādena sudhākaraḥ |
tejasā'si bhānusamaḥ pratāpenāmninā samaḥ || 32 ||
[Analyze grammar]

bale'si vāyunā tulyaḥ śriyā kuberasadṛśaḥ |
śāstā rudrasamo devo nirṛtisadṛśo raṇe || 34 ||
[Analyze grammar]

duṣṭapāśe varuṇo'si daṇḍe tu yamarāḍasi |
kṣamayā bhūmisadṛśo maryādayā saritpatiḥ || 35 ||
[Analyze grammar]

mahattve himavāṃścāsi śukro nītyāṃ nṛpasya vai |
rājāsi manusadṛśastāpahā meghavanmataḥ || 36 ||
[Analyze grammar]

pavitro gaṃgayā tulyaḥ kāśīva sugatipradaḥ |
sṛjipuṣṭirhṛtikārye brahmaviṣṇuharārthavān || 37 ||
[Analyze grammar]

sarasvatī mukhe te'sti kamalā te karāmbuje |
viṣaṃ cāsti tava krodhe'mṛtaṃ vāci tava sthitam || 38 ||
[Analyze grammar]

hṛdi nārāyaṇaste'sti macchiṣyāḥ santi na tvayi |
teṣāṃ vṛttipradānāya hyāgato'smi tavāṃgaṇe || 39 ||
[Analyze grammar]

tathyaṃ vacmi na cā'tathyaṃ guptaṃ vacmi na cā'nṛtam |
svārthaṃ vacmi parārthāḍhyaṃ miṣṭaṃ vacmi phalaṃ kaṭu || 40 ||
[Analyze grammar]

ārabhyā'dya dinādbhūpa brāhmaṇo'ṣṭādaśe'hani |
udīcyaḥ kaścidāgatyā'vaśyaṃ tvāmupadekṣyati || 41 ||
[Analyze grammar]

tattathaiva prakartavyaṃ tvaṃ hṛtsthaṃ prāpyase tataḥ |
adyāhaṃ svagṛhaṃ yāmi pratīkṣasva tadāgamam || 42 ||
[Analyze grammar]

ityuktvā śrīgaṇeśastu kāśyāmeva hi tasthivān |
kīrtaye śrīgaṇeśasya nāmāni mūrtayo yathā || 43 ||
[Analyze grammar]

ḍhuṇḍhivināyakaścārkavināyako gaṇādhipaḥ |
dūrgo'tha bhīmacaṇḍaśca dehalināyakastathā || 44 ||
[Analyze grammar]

uddaṇḍaḥ pāśapāṇiśca kharvaḥ siddhivināyakaḥ |
bāhyāvaraṇagāścaite kāśyāmaṣṭau vināyakāḥ || 45 ||
[Analyze grammar]

laṃbodaraḥ kūṭadantaḥ tathā śālakaṭaṃkaṭaḥ |
kūṣmāṃḍo muṇḍo vikaṭadanto'tha rājaputrakaḥ || 46 ||
[Analyze grammar]

praṇavaścāṣṭau dvitīyāvaraṇe tu vināyakāḥ |
vakratuṇḍo hyekadantaḥ kapisiṃhadvipānanaḥ || 47 ||
[Analyze grammar]

pañcāsyo herambanāmā vighnarājo varapradaḥ |
modakapriya ete'ṣṭau tṛtīyāvaraṇasthitāḥ || 48 ||
[Analyze grammar]

abhayadaḥ siṃhatuṇḍaḥ kūṇitākṣo gajānanaḥ |
kṣipraprasādanaścātha cintāmaṇivināyakaḥ || 49 ||
[Analyze grammar]

dantahastaḥ piciṇḍila uddaṇḍamuṇḍasaṃjñakaḥ |
ete'ṣṭau tu gaṇādhīśāścaturthāvaraṇasthitāḥ || 50 ||
[Analyze grammar]

sthūladantaḥ kalipriyaścaturdanto dvituṇḍavān |
jyeṣṭho gajastathā kālo nāgeśaḥ pañcamāvṛtau || 51 ||
[Analyze grammar]

maṇikarṇa āśāvināyakaḥ sṛṣṭigaṇādhipaḥ |
yakṣākhyagajakarṇaścitraghaṇṭaḥ sthūlajaṃghakaḥ || 552 ||
[Analyze grammar]

maṃgalo mitranāyako'ṣṭau te ṣaṣṭhyāvṛtau matāḥ |
modaḥ pramodaḥ saṃmodo mahāmodo'tha arthadaḥ || 53 ||
[Analyze grammar]

jñāno dvāro vimuktākhyo'ṣṭau saptamāvṛtau sthitāḥ |
ṣaṭpaṃcāśadgaṇeśāste kāśyāṃ parita āsthitāḥ || 54 ||
[Analyze grammar]

nāmānyetāni śrutvā'pi duḥkhebhyo viprahīyate |
jātu vighnairna bādhyeta pāpebhyo'pi prahīyate || 55 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne rājño'ntaḥpurastrīṇāṃ viśvāsāya gaṇeśena prāgudantasvapnādi kathitaṃ divodāsāya bhāvivipadādi |
kathitaṃ ṣaṭpaṃcāśadgaṇeśasthityādi kathitaṃ ceti nirūpaṇanāmā ṣaḍaśītitamo'dhyāyaḥ || 86 ||
[Analyze grammar]