Chapter 81

śrīnārāyaṇa uvāca |
śṛṇu lakṣmi pavitrāṃ tāṃ kathāṃ bhaktacamatkarām |
divodāso mama bhaktastato'pi bhūtarāṭ svayam || 1 ||
[Analyze grammar]

paramo mama bhakto vai tiṣṭhatī mandare girau |
mandareṇa tapastaptaṃ ghoraṃ paramadāruṇam || 2 ||
[Analyze grammar]

tapasā'tiprasanno vai mahādevo jagatpatiḥ |
mandaraṃ prāha bhūbhṛt te hṛdye kiṃ nu vidyate || 3 ||
[Analyze grammar]

prasanno'smi mahādevo vṛṇu sveṣṭaṃ vadāmyaham |
mandaraḥ prāha deveśa tava vāsaṃ vṛṇomyaham || 4 ||
[Analyze grammar]

tava vāsena me kāyaḥ pavitraḥ saṃbhaviṣyati |
tīrthamaurdhanyamāpanno mānyatāṃ saṃvrajiṣyati || 5 ||
[Analyze grammar]

sarve devarṣimunayo bhavaddarśanamāgatāḥ |
svapādajaladānena pāvayiṣyanti māṃ sadā || 6 ||
[Analyze grammar]

ityabhyarthanamāsādya śaṃkaro lokaśaṃkaraḥ |
uvāsa mandaragirau tadā sarve divaukasaḥ || 7 ||
[Analyze grammar]

ṛṣayo munayaścātha yakṣarākṣasapārṣadāḥ |
sarve'pi mandaravāsaṃ cakruḥ śaṃbhusamāśrayāḥ || 8 ||
[Analyze grammar]

kāśyāṃ pūrve ca ye hyāsan skandaviṣṇugaṇādhipāḥ |
sūryo devyastathā cānye tyaktvā kāśīṃ giriṃ gatāḥ || 9 ||
[Analyze grammar]

gateṣu devasaṃgheṣu divodāsaḥ pratāpavān |
cakāra rājyaṃ nirdvandvaṃ prabhorbhaktibharaṃ śubham || 10 ||
[Analyze grammar]

rājadhānī kṛtā rājñā vārāṇasī suniścalā |
vardhayāmāsa bhaktyā tāṃ prajā dharmeṇa pālayan || 11 ||
[Analyze grammar]

kāśīvāsāstu ye devāḥ svargiṇaḥ sā'psarogaṇāḥ |
saṃyamena tu hīnāṃstān divodāso vyavāsayat || 12 ||
[Analyze grammar]

dharmahīnairvratahīnaiḥ saṃyamena tu varjitaiḥ |
mama kāśyāṃ na vai stheyaṃ devairanyairapi dhruvam || 13 ||
[Analyze grammar]

bhagavadbhaktihīnaiśca viśeṣeṇa na vai kṣaṇam |
sthātavyaṃ ceti rājā vai devādīn nirakāsayan || 14 ||
[Analyze grammar]

sūryavat sa pratapitā durhṛdāṃ hṛdi netrayoḥ |
candravat suhṛdāmāsīt hṛdi manasi netrayoḥ || 15 ||
[Analyze grammar]

śatrugaṇāḥ palāyante dṛṣṭvā taṃ tu dhanurdharam |
dharmādharmavivektā sa dharmarāja ivā'paraḥ || 16 ||
[Analyze grammar]

indra iva balī caiva pāśīva vairipāśakṛt |
kuberaiva dhanavān prāṇa iva prajāgrahaḥ || 17 ||
[Analyze grammar]

rājarājaḥ sa evāsīd rudra iva ripuñjayaḥ |
viśvadevasamo rūpe hyasādhyo vasunā'dhikaḥ || 18 ||
[Analyze grammar]

dasrato rūpamāpanno marutāmapi rodakaḥ |
sarvavidyādharo gītikuśalo lokatoṣaṇaḥ || 19 ||
[Analyze grammar]

yakṣarākṣasanāgāśca dānavāstaṃ siṣevire |
guhyakā guptadāsāstu yasya karmakarāḥ saṭā || 20 ||
[Analyze grammar]

pavano yasya cāśvānvai parāṃ gatimaśikṣayan |
dāninastu gajā yasya dānamanyānaśikṣayan || 21 ||
[Analyze grammar]

sabhāyāṃ yasya boddhāro yoddhāraśca raṇājire |
śāstrairyasya vijetā na na śastraiḥ kenacit kvacit || 22 ||
[Analyze grammar]

rājye yasya na vai dveṣyāḥ prajāḥ sukhamayāśayāḥ |
kalāvāneka evā''sījjanāḥ sarve kalālayāḥ || 23 ||
[Analyze grammar]

na ko'pyāsīd gotrabhit tadrājye sva eva gotrabhit |
nāsīt kopi kṣayī tasya rājye svarge kṣayī śaśī || 24 ||
[Analyze grammar]

na tadrājye'vagraho'bhūd grahāstu nava vai diti |
hiraṇyagarbho divyeko hyasya sarve hiraṇmayāḥ || 25 ||
[Analyze grammar]

svarge saptāśva eko'styasya janā bahuvājinaḥ |
svargāpsarogaṇaśreṣṭhā viṣaye'syā'psarāḥ sadā || 26 ||
[Analyze grammar]

ekaiva padmā vaikuṃṭhe'sya vai padmākarāḥ śatam |
iti duḥkhāni naivā'sya nāsannupadravāḥ kvacit || 27 ||
[Analyze grammar]

vasudhā vasudā sarvā dhanahāstu gṛhe gṛhe |
evaṃ sukhayato rājyaprajā rājño'yutā'ṣṭakam || 28 ||
[Analyze grammar]

śaradāṃ tu gataprāyaṃ tadā śaṃbhurmano dadhe |
vārāṇasyāṃ nivāsāya pratīkāraṃ cikīrṣati || 29 ||
[Analyze grammar]

devā bṛhaspatiṃ prāpya tena cakruśca mantraṇām |
vayaṃ bhavadyutāḥ syāmo vipatkartāra eva ha || 30 ||
[Analyze grammar]

yadyapi bhūbhṛtā tena devā yajñaiḥ sumānitāḥ |
tathāpi mānavā naiva mitrāṇi vastuto matāḥ || 31 ||
[Analyze grammar]

yadyapi tena cāsmākaṃ nāpakṛtyaṃ vidhīyate |
tathāpi dyusadāṃ rītiḥ parotkarṣā'sahiṣṇutā || 32 ||
[Analyze grammar]

divodāsagṛhe rājye nālpo'pyadharmasaṃgrahaḥ |
nā'sya parābhavo rājñaḥ kartuṃ kenāpi śakyate || 33 ||
[Analyze grammar]

ekapatnīvratāḥ sarve narāstasya ca maṇḍale |
pātivratyaparā nāryo vidyante cā'sya maṇḍale || 34 ||
[Analyze grammar]

tadrājye'vidyavipro na nā'vīro bāhujastathā |
nā'nudyogo'pi vaiśyo'sti nā'sevākṛt tu śūdrakaḥ || 35 ||
[Analyze grammar]

nā'sya rājye brahmacāryabrahmavrataparāyaṇaḥ |
nā'pyasatkārakṛdasya gārhasthyamapi maṇḍale || 36 ||
[Analyze grammar]

nā'pyavanyavṛttikarā vānaprasthāśca niḥspṛhāḥ |
na cā'saṃgavihīnāstu sanyāsapathagāminaḥ || 37 ||
[Analyze grammar]

evamanye'pi tadrājye nā'vartmagatikā vṛthā |
nā'napatyo na cā'bhakto nā'dravyaḥ ko'pi tadbhuvi || 38 ||
[Analyze grammar]

nā'vṛddhasevī nā'kāṇḍamṛtirnā'drohaketaraḥ |
na cāṭā naiva vācāṭā na śaṭhā vaṃcakā nahi || 39 ||
[Analyze grammar]

na pākhaṇḍā na vai bhaṇḍā na raṇḍā na ca śauṇḍikāḥ |
tasya rājye tu sarvatra śrutiśāstrādisevanam || 40 ||
[Analyze grammar]

sarvatra śubhakṛdvāṇī madyamāṃsādihīnatā |
na dyūtadyotakāstatra ṛṇino na na taskarāḥ || 41 ||
[Analyze grammar]

pitṛdevādipūjāpi na vicchinnā kadācana |
na tadrājye vratalopo nā'tīrthasevanaṃ tathā || 42 ||
[Analyze grammar]

patipatnyoḥ sadā snehaḥ kuṭumbaṃ kleśakṛnnahi |
vandyante vandakairvandyāḥ pūjyante pūjakaiḥ parāḥ || 43 ||
[Analyze grammar]

ādriyante tu vidvāṃsaḥ prajābhistatra sarvadā |
vidvadbhiśca tapaḥśreṣṭhāstāpasaiśca jitānnarāḥ || 44 ||
[Analyze grammar]

jitāntarairjñānadhanā jñānibhirbrahmavijjanāḥ |
brahmavidbhiḥ sarvatattvamīkṣyate brahmarūpakam || 45 ||
[Analyze grammar]

viprasādhuprasādhvīnāṃ mukhe devānnamarpyate |
vāpīkūpataḍāgānāṃ jalānyāpūravanti ca || 46 ||
[Analyze grammar]

meghā mehanta aiśānyā sasyavastrā mahī sadā |
hṛṣṭapuṣṭāḥ prajāstasya śucayo'pyubhaye sadā || 47 ||
[Analyze grammar]

mārgayanto'pi chidraṃ tadrājye devā manāgapi |
nāpnuvannatha devāṃstān bṛhaspatiruvāca vai || 48 ||
[Analyze grammar]

parābhavo vinā chidraṃ naiva bhāvīti sarvathā |
upāyaṃ bhedamādāyā'chidro'pi paribhūyate || 49 ||
[Analyze grammar]

asmatpakṣā api tatra bhavanti sukhasampadaḥ |
tathāpi bhedakārye tu sāhāyyāḥ syuratanmatāḥ || 50 ||
[Analyze grammar]

iti nirṇayamāsādya tadā'syā'ntarbahiścarān |
vijñāpya dyusadaḥ sarve cāgnidevaṃ vavandire || 51 ||
[Analyze grammar]

indro'pyagniṃ tadā prāha tvaṃ kāśyāṃ saṃpratiṣṭhitaḥ |
mūrtirūpo bhavāṃstatra rājate viṣayāt tataḥ || 52 ||
[Analyze grammar]

tāmupāsaṃhara kṣipramevaṃ syādvijayastu naḥ |
mūrtiśūnye yājakāstu havyakavyādivarjitāḥ || 53 ||
[Analyze grammar]

viraṃkṣyante nṛpe tatra prajā apyarthaśūnyatām |
rājaśabdasya cālokya rūḍhiśaktivihīnatām || 54 ||
[Analyze grammar]

prajāstatra viraktāḥ syuḥ kṣīṇaṃ kośabalaṃ bhavet |
rājā'pi kṣīṇavṛttiḥ syāt trivargaḥ kṣīyate svayam || 55 ||
[Analyze grammar]

divodāsastathā kṣīṇo naśyatyathavā yāsyati |
tena cāsmākamevātra kāśyāṃ vāso hyakaṇṭakaḥ || 56 ||
[Analyze grammar]

atiśayākhyadoṣādyasaṃbhinna eva saṃbhavet |
ityagnirindrakathitamupāgamya hṛdi smaran || 57 ||
[Analyze grammar]

mahādevaṃ svakāṃ mūrtimājahāra sthalāt tataḥ |
āhavanīyāṃ ca gārhapatyāṃ dākṣiṇakāṃ trikam || 288 ||
[Analyze grammar]

jāṭharāgniṃ cāpi tatratyaprajānāṃ jahāra saḥ |
rājā prajā na vindanti prātarmadhyāhnakarmasu || 59 ||
[Analyze grammar]

kamapyagniṃ tadā sarve karmaṭhāḥ pācakāstathā |
cintayāmāsurugraṃ vai kiṃ syātkṛtyaṃ vinā'gninā || 60 ||
[Analyze grammar]

rājā mādhyāhnikaṃ kṛtvā praviveśa mahānasam |
vaiśvadevāya bhojyāya yāvadāgatya tiṣṭhati || 61 ||
[Analyze grammar]

āndhasikā vepamānāḥ kṣudhārtaṃ taṃ vyajijñapan |
yadi viśrāvayed rājan bhavānabhayadakṣiṇām || 62 ||
[Analyze grammar]

tadā vijñāpayiṣyāmaḥ kimabhūditi tatvataḥ |
rājñā tathā kṛtādeśāḥ pācakā hyūcire śanaiḥ || 63 ||
[Analyze grammar]

na jānīmo vayaṃ nātha kathamagnirapāsarat |
purāt kṛśānau vigate kathaṃ pātrādi saṃbhavet || 64 ||
[Analyze grammar]

sūryapākena yatpakvaṃ tat kiṃcidānayāmahe |
tāvadrājā vivedaitaddevānāṃ kṛtyameva ha || 65 ||
[Analyze grammar]

tapobalādavetyaitadvicāryā'pyavadattadā |
agnau gate na me hānirdevānāṃ hānireva vai || 66 ||
[Analyze grammar]

mayā tebhyo na rājyaṃ vai labdhaṃ labdhaṃ pitāmahāt |
svātmabalād racayiṣye vāyumagniṃ jalaṃ bhuvam || 67 ||
[Analyze grammar]

prakāśaṃ ceti tatsarvaṃ yadyadvā'pekṣyate'tra tat |
sarvaṃ kariṣye caitanyājjaḍe me na prayojanam || 68 ||
[Analyze grammar]

iti cintayatastasyā''yayurjānapadā janāḥ |
tameva virāvaṃ kartuṃ dvāḥsthenā'ntaḥ praveśitāḥ || 69 ||
[Analyze grammar]

datvopadāṃ yathārhaṃ te niṣedurmānadāsane |
jagadurduḥkhamatyarthaṃ vahniyātrākṛtaṃ tadā || 70 ||
[Analyze grammar]

prāha rājā tadāśrutya sarvasya sukhamāvahan |
cikīrṣurahamevā''saṃ paurāḥ kāryamidaṃ purā || 71 ||
[Analyze grammar]

paraṃ hyupekṣitaprāyaṃ droho na syāditīcchayā |
gato'nalo'bhavadbhadraṃ prāṇo'pi yātvito drutam || 72 ||
[Analyze grammar]

śaśī sūryo varuṇaśca bhūrākāśo'pi yāntvitaḥ |
bhagavadyogaprābalyādahamagnirbhavāmyaham || 73 ||
[Analyze grammar]

caturdhā vahnirūpeṇa gṛhṇāmi pācayāmi yat |
ahaṃ prāṇa svayaṃ bhūtvā jīvayiṣyāmi dehinaḥ || 74 ||
[Analyze grammar]

mahāvāyuḥ svayaṃ bhūtvā dhārayiṣyāmi golakān |
śaśī cāhaṃ svayaṃ bhūtvā''pyāyayiṣyeṃ'kuraṃ jagat || 75 ||
[Analyze grammar]

tāpayiṣye svayaṃ sūryo bhūtvemāṃ medinīṃ sadā |
megho bhūtvā svayaṃ vṛṣṭiṃ kariṣye varuṇo'pyaham || 76 ||
[Analyze grammar]

sthāsyehaṃ jalarūpeṇa bhūrūpo'pi bhavāmi ca |
dhārayiṣye jagatsarvaṃ vyomarūpo bhavāmi ca || 77 ||
[Analyze grammar]

ityuktvā sāntayitvā svaprajā rājā hyabhūt tathā |
bahurūpaśca saṃbhūya tattatkāryāṇyavartayat || 78 ||
[Analyze grammar]

bhagavallabdhayogena hyekopyanekaśo'bhavat |
tadā divaukasāṃ rājā śalyarūpo babhūva ha || 79 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne śaṃkarasya mandaragirau varadānakṛtāvāsaḥ kāśīto devā api tatra gatāḥ divodāsarājye guṇavarṇanaṃ kāśīto divodāsasya niṣkāsanopāyaracanaṃ cetyādinirūpaṇanāmā ekāśītitamo'dhyāyaḥ || 81 ||
[Analyze grammar]