Chapter 72

śrīnārāyaṇa uvāca |
śṛṇu lakṣmi  pravakṣyāmi pretān tvakālamṛtyujān |
pākhaṇḍakān lobhamṛtān cā'saṃskāramṛtāṃstathā || 1 ||
[Analyze grammar]

cāṇḍālādudakātsarpāt śāpād drumācca vaidyutāt |
daṃṣṭriśṛṃgipaśubhyaśca mṛtāḥ pretā bhavanti te || 2 ||
[Analyze grammar]

udbandhanamṛtā ye ca viṣaśastrādisaṃhatā |
ātmaghātina evā''bhicārakarmādisaṃhatāḥ || 3 ||
[Analyze grammar]

mahakaṣṭairmṛtā rogairdasyubhirmāritāśca ye |
visūcyagnihatā ye ca bhūkhaṇḍādimṛtāśca ye || 4 ||
[Analyze grammar]

asaṃskṛtāḥ pramṛtā ye malinā malamṛtyavaḥ |
piṇḍaluptā vṛṣotsargakriyāhīnā mṛtāśca ye || 5 ||
[Analyze grammar]

parvatād bhittipātādvā vyomnyevaṃ gamanānmṛtāḥ |
rajasvalāsthitau vā'tha maithune śaucage mṛtāḥ || 6 ||
[Analyze grammar]

antarikṣe hyantarāle sīmni nirjanake mṛtāḥ |
duṣṭaśalyādinā naṣṭāḥ sūtakādau mṛtāśca ye || 7 ||
[Analyze grammar]

tṛṣāyāṃ ye jalā'nāptāḥ kumṛtyuvaśagāśca ye |
te vai pretāḥ prajāyante tvaṭanti kṣitimaṇḍale || 8 ||
[Analyze grammar]

gaupaśugrāsaloptāro jalā''rāmavināśakāḥ |
devavṛttivineṣṭāro dīnavṛttivibhedakāḥ || 9 ||
[Analyze grammar]

dānakarmaviloptāraḥ puṇyakārya prabhañjakāḥ |
bahūnāṃ duḥkhakartāraḥ pretā bhavanti pāpataḥ || 10 ||
[Analyze grammar]

paradroharatāḥ pāpāḥ pāpamṛtyuvaśaṃgatāḥ |
kṣutpipāsārditā nityaṃ pretatvamupayānti te || 11 ||
[Analyze grammar]

na mātā na pitā pretajanmādau kāraṇaṃ matam |
pretatvaṃ karmato yāmyasaṃkalpācca bhavatyataḥ || 12 ||
[Analyze grammar]

tatra vai vikṛtākārā lamboṣṭhā vikṛtānanāḥ |
bṛhaccharīradaśanā vakrā''syāścāpi kecana || 13 ||
[Analyze grammar]

sarpāsyāśca biḍālāsyā vividhāsyā bhavanti te |
nāmāpi yādṛśaṃ karma kṛtvā bhavanti nārakāḥ || 14 ||
[Analyze grammar]

tādṛgguṇaṃ bhavatyeva pretasya tu tadā tadā |
yādṛkpāpaṃ vidhāyaiva pretatāṃ yāti mānavaḥ || 15 ||
[Analyze grammar]

tathā tathā kṣudhā tasya pipāsāpi muhurbhavet |
bhojanaṃ vā jalaṃ vāpi śuddhaṃ naivāpyate kvacit || 16 ||
[Analyze grammar]

śuddhe tu bhojane kvāpi jale vā nāstyadhikṛtiḥ |
śuddha tvannaṃ vasubhiśca śuddhaṃ jalaṃ tu vāruṇaiḥ || 17 ||
[Analyze grammar]

sarvadā rakṣitaṃ tatra pretānāṃ bhāga eva na |
śleṣmamūtrapurīṣaiśca recakaiḥ samalaiḥ saha || 18 ||
[Analyze grammar]

paryuṣitaistathocchiṣṭaiḥ pretānāṃ bhojanaṃ bhavet |
śaucahīnaṃ malinaṃ yat pretā bhuṃjanti tatsadā || 19 ||
[Analyze grammar]

yasya gṛhe na vai śuddhirna vā devārpaṇaṃ bhavet |
madyamāṃsamaye duṣṭe pretā bhuṃjanti tadgahe || 20 ||
[Analyze grammar]

lobhakrodhamadālasyanidrāśokabhayāni ca |
māyākalahakāpaṭyaṃ mālinyaṃ snānahīnatā || 21 ||
[Analyze grammar]

dhātvādimalaśuddhirna rajovīryāktamambaram |
lāḷāliṭṭamayī bhittirnālikā mūtrasaṃbhṛtā || 22 ||
[Analyze grammar]

yatra yatra gṛhe santi pretā bhuṃjanti tatra vai |
nityaṃ liṃgabhagābhyāṃ ca kṣarat tatpretabhojanam || 23 ||
[Analyze grammar]

mṛtyurnityaṃ varaṃ jantoḥ pretatvaṃ mā bhavet kvacit |
patitānnena bhuktena jaṭharasthena yo mṛtaḥ || 24 ||
[Analyze grammar]

pāpamṛtyuvaśād yo vai sa preto jāyate naraḥ |
devadravyaṃ parasvādi haretpretaḥ sa jāyate || 25 ||
[Analyze grammar]

gurudravyaṃ paranyāsaṃ haret pretaḥ sa jāyate |
viśvāsaghātaḥ kūṭaśca kanyā vikrayakṛjjanaḥ || 26 ||
[Analyze grammar]

bhrātṛdhṛk janahā goghnaḥ paśughnaḥ pāradārikaḥ |
hemahartā bhuvo hartā'nṛtaḥ pretaḥ sa jāyate || 27 ||
[Analyze grammar]

mātaraṃ bhaginīṃ bhāryāṃ snuṣāṃ duhitaraṃ sutam |
pitaraṃ yo vā tyajati sa preto jāyate naraḥ || 28 ||
[Analyze grammar]

śiṣṭācāravihīnā ye pitrorbhaktivihīnakāḥ |
madyamāṃsaratā ye ca paśughātādikarmiṇaḥ || 29 ||
[Analyze grammar]

paradrohaprakartāro mahātrāsapradāśca ye |
ye chidrānveṣiṇo nityaṃ parakalpāntakārakāḥ || 30 ||
[Analyze grammar]

bahuvyavāyasaṃsaktā hārdamāṃsādibhakṣakāḥ |
krūrā vyasanino duṣṭā niṣiddhācaraṇe ratāḥ || 31 ||
[Analyze grammar]

cānye ye tādṛśāsteṣāṃ jāyate hyāyuṣaḥ kṣayaḥ |
svalpāyuṣaṃ kuśarīraṃ hitvā pretā bhavanti te || 3 ||
[Analyze grammar]

tādṛśena śarīreṇa śreyaḥ svasya prasādhayet |
puṇyena karmaṇā svargaṃ sādhayenmokṣameva vā || 33 ||
[Analyze grammar]

prāktanaiḥ karmapākaistu sukhaṃ duḥkhaṃ tu vindati |
tadatra janmani saukhyapradaṃ dharmaṃ samācaret || 34 ||
[Analyze grammar]

naro vā yadi vā nārī svārthaṃ kṛtvāpi bhūtale |
parārthaṃ sādhayennityaṃ śreyo mokṣakaraṃ param || 35 ||
[Analyze grammar]

anyattu vismaret kāmaṃ mokṣaṃ tu naiva vismaret |
anyattu vismaretkāryaṃ dharmaṃ tu naiva vismaret || 36 ||
[Analyze grammar]

anyattu vismared bhogyaṃ ātmasaukhyaṃ na vismaret |
kṛtrimaṃ vismared yogaṃ hariṃ hṛtsthaṃ na vismaret || 37 ||
[Analyze grammar]

prabhuṃ vihāya sukhadaṃ duḥkhadaṃ bhajate tu yaḥ |
duḥkhaṃ syāttu phalaṃ tasya nānyat śreyaḥ sa vindati || 38 ||
[Analyze grammar]

nārakāstrividhāstasmāt vijñeyāḥ kamalekṣaṇe |
eke yamapurasthāścā''pare tu pretarūpiṇaḥ || 39 ||
[Analyze grammar]

anye tu nārakāḥ sarve gṛhe gṛhe'tiduḥkhinaḥ |
yeṣāṃ gṛhe na vai saukhyaṃ bhojyabhojanavaibhavāt || 40 ||
[Analyze grammar]

nārīputradhanadhānyāt te'tra pratyakṣanārakāḥ |
yeṣāṃ kuṭumbaṃ bahulaṃ poṣaṇe tu daridratā || 41 ||
[Analyze grammar]

vastrānnāni na pūryante te'tra pratyakṣanārakāḥ |
ekā'dhikastrīpatiryaḥ sa tu pratyakṣanārakī || 42 ||
[Analyze grammar]

vyabhicāro gṛhe yasya tadvai pratyakṣanārakam |
paradāragaṇikādirataḥ pratyakṣanārakaḥ || 43 ||
[Analyze grammar]

śvavat svanāryā gaṇitaḥ so'tra pratyakṣanārakī |
patnī śunīva yā yatra sāpi pratyakṣanārakā || 44 ||
[Analyze grammar]

yeṣāṃ hūṃ tūṃ kṛto dveṣaḥ kleśo gṛhajaneṣu vai |
na nidrā na sukhaṃ prema te vai pratyakṣanārakāḥ || 45 ||
[Analyze grammar]

svajanaścauryakṛt yatra svajano yatra ghātakī |
svajano vaṃcako yatra tadvai pratyakṣanārakam || 46 ||
[Analyze grammar]

ājñākarā na putrādyāḥ premadā vanitā nahi |
kuṭumba mānadaṃ nāsti tadvai pratyakṣanārakam || 47 ||
[Analyze grammar]

bhojanaṃ sarvadā rūkṣaṃ gālīdānādipūrvakam |
darśanaṃ dveṣanetreṇa so'tra pratyakṣanārakī || 48 ||
[Analyze grammar]

sphāṭitāni tu vastrāṇi gṛhaṃ rathyā ca catvaram |
satkāre tu tiraskāraḥ sa tu pratyakṣanārakī || 49 ||
[Analyze grammar]

parādhīnā daśā nityaṃ sevakāḥ kṣepakāstathā |
svajanaḥ śvajanavacca sa tu pratyakṣanārakī || 50 ||
[Analyze grammar]

ādhivyādhisamupādhikleśagṛhaṃ tu yadgṛham |
chidraraudradhūrtaśāṭhyāśrayaṃ pratyakṣanārakam || 51 ||
[Analyze grammar]

patnī kāmapradā naiva sarvathā pratipakṣiṇī |
patiḥ ratiprado naiva tāḍakaḥ so'tra nārakaḥ || 52 ||
[Analyze grammar]

janmakṣatā janmarogā janmaduḥkhāḥ pratāpinaḥ |
kleśāḍhyā janmata eva te vai pratyakṣanārakāḥ || 53 ||
[Analyze grammar]

narakaṃ tu śarīraṃ vai tatra vāsāttu nārakī |
narakaḥ khalu saṃsārastatra vāsāttu nārakī || 54 ||
[Analyze grammar]

bhaktyā śreyaḥprakartā tu narakānmucyate khalu |
yāvannaiva pramucyante tāvat sarve tu nārakāḥ || 55 ||
[Analyze grammar]

narakasya malānāṃ ca lāḷānāṃ dhātuyoginām |
dvārāṇyālambya ramate so'tra sākṣāddhi nārakī || 56 ||
[Analyze grammar]

narakebhyaḥ samutpanno narake sajjate punaḥ |
puṣṭau narakarūpo'yaṃ ko'nyastasmāddhi nārakī || 57 ||
[Analyze grammar]

avamānaṃ mahāduḥkhaṃ bandhanaṃ tu tato'dhikam |
parādhīnaṃ mahātrāsastadvānatraiva nārakī || 58 ||
[Analyze grammar]

tṛṣṇākhyaṃ narakaṃ yasya lagnaṃ sa nārakī mataḥ |
evaṃ tṛtīyanarakaṃ sarvasyātra gṛhe gṛhe || 59 ||
[Analyze grammar]

aviśuddhiḥ kṣayaścaivā'tiśayaśca tridoṣakam |
yasya yasyā'bhavat śliṣṭaṃ sa vai nārakavad bhavet || 60 ||
[Analyze grammar]

ete pretāstu jīvanto mṛtāḥ pretā yamālaye |
adṛśyā vāyurūpāśca pretāstrayaḥ paretakāḥ || 61 ||
[Analyze grammar]

sarve vai duḥkhabhoktāraḥ sarve ca duḥkhadāstathā |
sarve bhaktivihīnāśca ko bhedo'tra paretake || 6 ||
[Analyze grammar]

yāmyāścaiva ca vāyavyā mānavīyāśca te trayaḥ |
yadi śreyo na kurvanti tarhi pretāḥ samāstrayaḥ || 63 ||
[Analyze grammar]

tasmānmānuṣadehena kartavyaṃ mokṣakārakam |
tena muktiṃ pragantāraḥ pretatvaṃ naiva yānti hi || 64 ||
[Analyze grammar]

nārī tu ḍākinī yasya patirvā bhūtabhītidaḥ |
putrā rākṣasahantāraḥ pretastasmātpalāyate || 65 ||
[Analyze grammar]

yonistu kaṇḍanī yasyāḥ kledinī mūtravīryakaiḥ |
kardamā''bhaṃ śarīraṃ ca tasyā bhoktā tu nārakī || 66 ||
[Analyze grammar]

śvapacā grāmabāhyasthā aśuddhā doṣapeṭakāḥ |
doghe doṣastu ko deyaḥ pretastatra karoti kim || 67 ||
[Analyze grammar]

pretaṃ preto yathā naiva trāsayenna ca pīḍayet |
tathā pretasamaṃ duṣṭaṃ pīḍayitvā labheta kim || 68 ||
[Analyze grammar]

tādṛśaṃ tu kuṭumbaṃ vai tyaktvā pretāḥ prayānti vai |
tīrthe'raṇye'thavā'nyatra vasanti nityaduḥkhitāḥ || 69 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne keṣāṃ pretatvaṃ pretānāṃ vāso bhojanādi pretāstrividhetyādivarṇananāmā dvāsaptatitamo'dhyāyaḥ || 72 ||
[Analyze grammar]