Chapter 41

śrīnārāyaṇa uvāca |
prīyante pitaro yena japyena niyamena ca |
stotraṃ teṣāṃ pravakṣyāmi sarvakāmapradaṃ śubham || 1 ||
[Analyze grammar]

śrāddhakāle pravaktavyaṃ pitṝṇāṃ toṣaṇāya tat |
yajamānena putreṇa brāhmaṇena susādhunā || 2 ||
[Analyze grammar]

amūrtānāṃ samūrtānāṃ pitṝṇāṃ dīptatejasām |
namasyāmi sadā tāṃstu dhyānino yogacakṣuṣaḥ || 3 ||
[Analyze grammar]

indrāderjanayitāro bhṛgumārīcayostathā |
saptarṣīṇāṃ pitṝṇāṃ ca tānnamasyāmi kāmadān || 4 ||
[Analyze grammar]

manvādīnāṃ sureśānāṃ sūryācandramasorapi |
janayitṝnnamasyāmi pitṝn kuśaladāyakān || 5 ||
[Analyze grammar]

nakṣatrāṇāṃ carādīnāṃ pitṝnatha pitāmahān |
dyāvāpṛthivyoḥ pitṝṃśca namasyāmi kṛtāñjaliḥ || 6 ||
[Analyze grammar]

devarṣīṇāṃ janayitan sarvalokanamaskṛtān |
abhayasya sadā dātṝn namasye'haṃ kṛtāñjaliḥ || 7 ||
[Analyze grammar]

prajeśāya kaśyapāya somāya varuṇāya ca |
yogayogeśvarebhyaśca namasyāmi kṛtāñjaliḥ || 8 ||
[Analyze grammar]

pitṛgaṇebhyaḥ saptabhyo namo lokeṣu saptasu |
svayaṃbhuve namastasmai brahmaṇe yogacakṣuṣe || 9 ||
[Analyze grammar]

anena stotravareṇa trīnvarāṃllabhate janaḥ |
annamāyuḥ sutāṃścaiva dadate pitaraḥ sukhāḥ || 10 ||
[Analyze grammar]

yat kiñcitpacyate gehe bhakṣyaṃ bhojyādikaṃ tathā |
anivedya na bhoktavyaṃ devapitṛbhya ityapi || 11 ||
[Analyze grammar]

pitṛbhyo yastu mālyāni sugandhīni ca sarvaśaḥ |
sadā dadyācchriyā yuktaḥ sa vibhāti divākaraḥ || 12 ||
[Analyze grammar]

gugulādīṃstathā dhūpān pitṛbhyo yaḥ prayacchati |
saṃyuktānmadhusarpibhyāṃ so'śvamedhaphalaṃ labhet || 13 ||
[Analyze grammar]

dhūpaṃ gandhaguṇopetaṃ kāntaṃ pitṛparāyaṇam |
labhate strīṣvapatyāni hīha cāmutra cobhayoḥ || 14 ||
[Analyze grammar]

dīpaṃ pitṛbhyaḥ prayataḥ sadā yastu prayacchati |
sa loke'pratimaṃ cakṣurlabhate divyadṛṣṭidam || 15 ||
[Analyze grammar]

tejasā yaśasā caiva kāntyā cāpi balena ca |
svayaṃprakāśo bhavati bhrājate ca triviṣṭape || 16 ||
[Analyze grammar]

apsarobhiḥ parivṛto vimānāgre tu modite |
gandhān puṣpāṇi dhūpāṃśca dadyādājyāhutīśca vai || 17 ||
[Analyze grammar]

phalamūlanamaskāraiḥ pitṝṇāṃ prītimāvahet |
śrāddhakāle tu satataṃ vāyubhūtāḥ pitāmahāḥ || 18 ||
[Analyze grammar]

āviśanti dvijānsādhūn sādhvīrdṛṣṭvā ca harṣataḥ |
vastrairannaiḥ pradānaiśca bhakṣyairbhojyaistathaiva ca || 19 ||
[Analyze grammar]

pānairgobhistathā grāmaiḥ pūjayet pātrasaṃsthitān |
kāśāḥ punarbhavā ye ca barhiṇā upabarhiṇā || 20 ||
[Analyze grammar]

ta eva pitaro devā devāśca pitaraḥ punaḥ |
dvijātyabhimukho dadyād darbhān piṇḍaॉśca yatnataḥ || 21 ||
[Analyze grammar]

athā''hṛtya dakṣiṇāṃ ca tato homo vidhīyate |
agnaye kavyavāhāya svadhā cāṃgirase namaḥ || 22 ||
[Analyze grammar]

somāya vai pitṛmate svadhā cāṃgirase namaḥ |
yamāya caivāṃgirase svadhā nama iti bruvan || 23 ||
[Analyze grammar]

bahuhavyatvamevā'gnau susamiddhe viśeṣataḥ |
vidhūme lelihāne ca hotavyaṃ karmasiddhaye || 24 ||
[Analyze grammar]

aprabuddhe sadhūme ca juhuyād yo hutāśane |
yajamāno bhavedandhaḥ so'putro bhavatītyapi || 25 ||
[Analyze grammar]

alpendhano vā rūkṣo vā visphulliṃgaśca sarvaśaḥ |
jvālādhūmo'pasavyaśca sa tu vahnirna siddhaye || 26 ||
[Analyze grammar]

durgandhaścaiva nīlaśca kṛṣṇaścaiva viśeṣataḥ |
bhūmiṃ vigāhate yatra tatra vidyātparābhavam || 27 ||
[Analyze grammar]

arciṣmān piṇḍitaśikhaḥ sarpiṣkāṃcanasaṃbhavaḥ |
snigdhaḥ pradakṣiṇaścaiva vahniḥ syātkāryasiddhaye || 28 ||
[Analyze grammar]

anujñātaḥ kuruṣveti tathaiva dvijasattamaiḥ |
patnīmādāya putrāṃśca juhuyāddhavyavāhanam || 29 ||
[Analyze grammar]

samānaplakṣīnyagrodhaplakṣā'śvatthavikaṃkatāḥ |
udumbarāstathā bilvacandanā yajñagā samidh || 30 ||
[Analyze grammar]

saralo devadāruśca śālaśca khadirastathā |
samidarthaṃ praśastāḥ syurete vṛkṣā viśeṣataḥ || 31 ||
[Analyze grammar]

viśvedevāśca ye proktā hyete'pi pitaro hyuta |
teṣāmājyaṃ ca piṇḍaṃ ca vahnau dadyātprayatnataḥ || 3 ||
[Analyze grammar]

puṣpāṇāṃ ca phalānāṃ ca bhakṣyānnānāṃ tathaiva ca |
agramuddhṛtya sarveṣāṃ juhuyājjātavedasi || 33 ||
[Analyze grammar]

tīrthe homaśca piṇḍāśca śrāddhaṃ kartavyamādarāt |
devālayo gurorvāsaḥ parvatāḥ saritastathā || 34 ||
[Analyze grammar]

puṇyavṛkṣāstaḍāgāni yatra vā brāhmaṇo bhavet |
te te śrāddhārhadeśāḥ syustatra puṇyamasaṃkhyakam || 35 ||
[Analyze grammar]

pṛthvīṃ sāgaravelāntāṃ divyāḥ satpuruṣāḥ sadā |
nānārūpaiścarantyatra teṣāṃ yogāttu mokṣaṇam || 36 ||
[Analyze grammar]

siddhāḥ santaśca sādhvyaśca tīrthānāṃ tīrthamuttamam |
lakṣmīrnārāyaṇaścātra tadrūpeṣu vasatyaram || 37 ||
[Analyze grammar]

pipāsitāya śrāntāya kṣudhitāya vivastriṇe |
satkṛtya kiṃcid dātavyaṃ yajñasya phalamāpnuyāt || 38 ||
[Analyze grammar]

śrāddhe sthūlaḥ sthūlamatti pitaro'danti sukṛtam |
tṛptimātmā svayaṃ bhuṃkte'nvitabrahmasamarpaṇāt || 39 ||
[Analyze grammar]

karmaloke tu kṛtvaiva datvaiva ca muhurmuhuḥ |
pare loke hyavāpyante tasmād deyaṃ viśeṣataḥ || 40 ||
[Analyze grammar]

yeṣāṃ dāsyanti piṇḍāṃstrīn bāndhavā nāmagotrataḥ |
bhūmau kuśottarāyāṃ ca brāhmaṇoktavidhānataḥ || 41 ||
[Analyze grammar]

sarvatra vartamānāṃste piṇḍāḥ prīṇanti vai pitṝn |
yadāhāro bhavejanturāhāraḥ so'sya jāyate || 42 ||
[Analyze grammar]

yā goṣṭhe pranaṣṭāṃ vai vatso vindati mātaram |
tathā taṃ nayate mantro janturyatrā'vatiṣṭhate || 43 ||
[Analyze grammar]

nāma gotraṃ ca mantraśca dattamannaṃ nayanti tam |
api yoniśataṃ prāptāṃstṛptistānanugacchati || 44 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne stotrahomāgnivṛkṣasthānādinirūpaṇanāmā ekacatvāriṃśo'dhyāyaḥ || 41 ||
[Analyze grammar]