Chapter 31

śrīnārāyaṇa uvāca |
śṛṇu lakṣmi mahādevi tvaṃ vai pūrvaṃ prapūjaya |
pātivratyāṃ mahādevīṃ kanyāṃ divyena gandhinā || 1 ||
[Analyze grammar]

kuṃkumenā'kṣatenā'tha bhojayaināṃ subhāvataḥ |
paramānnena miṣṭena tāmbūlena phalena ca || 2 ||
[Analyze grammar]

śrīlakṣmīruvāca |
dehi dravyāṇi bhagavan  pūjāyā bhojanasya ca |
yairahaṃ pūjaye devīṃ kanyāṃ saubhāgyamaṃgalām || 3 ||
[Analyze grammar]

ityarthanāṃ samāśrutya svayaṃ śrīhariṇā svakāt |
tanoḥ śaityaṃ sugandhaśca dravarūpau prakāśitau || 4 ||
[Analyze grammar]

tadvai hiraṇmaye pātre jātaṃ sugandhi candanam |
tato nārāyaṇena svasyauṣṭhād raktaṃ prakāśitam || 5 ||
[Analyze grammar]

dravaścūrṇe pariṇataḥ kuṃkumaṃ divyamadbhutam |
dhṛtaṃ tadrājate pātre lakṣmyāḥ pūjārthameva yat || 6 ||
[Analyze grammar]

tato nārāyaṇenā''syādamṛtaṃ prakaṭīkṛtam |
dhṛtaṃ tatsanmaṇipātre jātāstasmātkaṇā'kṣatāḥ || 7 ||
[Analyze grammar]

labdhvā dravyāṇi tānyeva lakṣmyā tu pūjanaṃ kṛtam |
pātivratyātmakanyāyā bhojyārthaṃ ca mano dadhe || 8 ||
[Analyze grammar]

tadā nārāyaṇenāpi svatāloramṛtaṃ kṛtam |
tadamṛtaṃ paraṃ divyaṃ śvetaṃ yāvadbahirgatam || 9 ||
[Analyze grammar]

tasya piṇḍastu tatraiva sañjāto vai tadicchayā |
piṇḍādardhāt surūpā vai sudogdhrī gaurajāyata || 10 ||
[Analyze grammar]

śvetā sarvāṃgasampannā catuṣpādā trihāyanā |
kalyāṇī surabhiṃ lakṣmīrdudoha paramādarāt || 11 ||
[Analyze grammar]

dugdhaṃ tu madhuraṃ labdhvā kiṃ karomītyacintayat |
nārāyaṇena netrātsvāt tāvadagniḥ prakāśitaḥ || 12 ||
[Analyze grammar]

agninā phāṇite dugdhe kaṇān cikṣepa sā''jñayā |
tataḥ kimiti kāryaṃ me yadā cintayati svayam || 13 ||
[Analyze grammar]

tāvacchrīhariṇā svasya jihvāgrādamṛtaṃ kṛtam |
rasarūpaṃ samudbhūtaṃ śubhraṃ miṣṭaṃ paraṃ ca tat || 14 ||
[Analyze grammar]

śarkarārūpatāṃ prāptaṃ taccikṣepa harīcchayā |
saṃyuktaṃ ca trayaṃ pakvaṃ kvathitaṃ kuśalaṃ yadā || 15 ||
[Analyze grammar]

paramānnaṃ tu tajjātaṃ dugdhapākaḥ sa kathyate |
tatrā'nyasaurabhārthāya dakṣiṇāttu nasastataḥ || 16 ||
[Analyze grammar]

elāḥ prakāśitāḥ sūkṣmāḥ sugandhā''svādasañjitāḥ |
vāmāccaiva nasastena jātīphalamatho kṛtam || 17 ||
[Analyze grammar]

vāyukopaprahārāya tadvai śoṣaṇakaṃ matam |
svarṇaraṃgaprakāśārthaṃ punaḥ śrīhariṇā svakāt || 18 ||
[Analyze grammar]

hiraṇyaśmaśrubhāgādvai kesaraṃ prakaṭīkṛtam |
tadvai sarvaṃ yathāyogyaṃ nihitaṃ paramānnake || 19 ||
[Analyze grammar]

miśritaṃ susamāpanno dugdhapākaḥ suśarkaraḥ |
harīcchayā'tha dugdhasya dadhyarthaṃ tanmano dadhe || 20 ||
[Analyze grammar]

madhurāmblātmakaṃ takraṃ cā'mṛtaṃ tadvilakṣaṇam |
svakrakāṭātkṛtaṃ tena nikṣiptaṃ dugdhabhājane || 21 ||
[Analyze grammar]

tadyogāttu dadhi ramyaṃ niṣpannaṃ madhurāmblakam |
tatra harīcchayā pakvaṃ navanītaṃ prakāśitam || 22 ||
[Analyze grammar]

tato ghṛtaṃ kṛtaṃ devyā lakṣmyā nārāyaṇājñayā |
sugandhaṃ ca paraṃ divyaṃ kathaṃ syādaupayogikam || 23 ||
[Analyze grammar]

vicārayati yāvatsā tāvannārāyaṇena tu |
avaśiṣṭātpādapiṇḍād godhūmāḥ kaṇiśāḥ kṛtāḥ || 24 ||
[Analyze grammar]

tataḥ śrīhariṇā svasya bhrūkuṭyorbhramamātrataḥ |
cakradvayaṃ kṛtaṃ ramyaṃ peṣaṇī sā matā śubhā || 25 ||
[Analyze grammar]

tadeva kālacakrasya svarūpamabhavatpunaḥ |
kālacakraṃ sadā jīvān cūrṇayatyativegataḥ || 26 ||
[Analyze grammar]

vikarālabhrūkuṭestu cūrṇikā pramadā kṛtā |
cūrṇikā'pyabhavatsṛṣṭau vipattināmadhāriṇī || 27 ||
[Analyze grammar]

vipattyā jantavaḥ sarve cūrṇāyante kṣaṇe kṣaṇe |
tayā cūrṇikayā piṣṭaṃ godhūmānāṃ kṛtaṃ mṛdu || 28 ||
[Analyze grammar]

tasmāttu polikā lakṣmyā ghṛtenā''ktā kṛtā śubhā |
lakṣmyā pativratādevyai bhojanaṃ kāritaṃ śubham || 29 ||
[Analyze grammar]

śeṣeṇa piṇḍapādena brāhmaṇaḥ puruṣaḥ kṛtaḥ |
sa vai brahmatanuḥ proktastatra mantrā dhṛtāḥ sadā || 30 ||
[Analyze grammar]

goṣu haviḥ samādhattaṃ tena yajñaḥ prajāyate |
brāhmaṇāya pradattā sā gauḥ sadā yajñalabdhaye || 31 ||
[Analyze grammar]

brāhmaṇāt sarvalokeṣu brahmavaṃśāḥ prakāśitāḥ |
prathamaṃ brāhmaṇāḥ sarve'pyāsan brahmajanitvataḥ || 32 ||
[Analyze grammar]

surabhestu hareḥ sṛṣṭau gavāṃ vaṃśāḥ prakāśitāḥ |
pātivratyākhyadevyāstu pativratāḥ prakāśitāḥ || 33 ||
[Analyze grammar]

kesarāt kesaragulmā jāyante sma sadā tviha |
jātiphalāttu tadvṛkṣā jātā iha tathāphalāḥ || 34 ||
[Analyze grammar]

elābījāttadelānāṃ svalpagulmāḥ kṛtā iti |
śarkarārasato loke dīrghā daṇḍā sadikṣavaḥ || 35 ||
[Analyze grammar]

jātāḥ sarvatra sṛṣṭau vai hyamṛtaṃ ca taducyate |
agneḥ sakāśāt pākānāmagnayo bahavo matāḥ || 36 ||
[Analyze grammar]

akṣatebhyo hyajāyanta taṇḍulā vrīhayaḥ khalu |
hareroṣṭhadravājjātā haridrā raktavarṇajā || 37 ||
[Analyze grammar]

piśaṃgā ca tato lokaiḥ kuṃkumaṃ sādhyate sadā |
amṛtāccandanarasād vṛkṣāścandanaśītalāḥ || 38 ||
[Analyze grammar]

ajāyanta tato bodhyāḥ śrīharerudbhavā iti |
atha miṣṭaṃ jalaṃ tatra harerāsyātprakāśitam || 39 ||
[Analyze grammar]

jalaṃ pītvā culukaṃ ca kṛtvā tiṣṭhati yāvatā |
tāvalakṣmīścintayati kiṃ deyāni phalāni tu || 40 ||
[Analyze grammar]

śrīhariṇā tataḥ svā''syādamṛtaṃ prakaṭīkṛtam |
tasmānmiṣṭaphalā vṛkṣā āmradāḍimasanturāḥ || 41 ||
[Analyze grammar]

nārīkelā'ṅgudīrāmaphalā'nānasaśārkarāḥ |
navaraṃgā'mṛtajambujambīradrākṣakhārikāḥ || 42 ||
[Analyze grammar]

saphalāṃjanakadalapuṣpapanasakharjurāḥ |
jātāstatphalabāhulyaṃ samādāyā'rpitaṃ tataḥ || 43 ||
[Analyze grammar]

tānyattvā saṃsthitāyai tu kiṃ deyaṃ mukhaśodhakam |
yāvaccintayate lakṣmīstāvacchrīhariṇā'mṛtāt || 44 ||
[Analyze grammar]

nāgavallī sapatrā ca sugandhottejanā śubhā |
kṛtā tatpakvapātre tu śaityārthaṃ gaṇḍataḥ svakāt || 45 ||
[Analyze grammar]

cūrṇaṃ khādiramāraktaṃ samutpāditameva ca |
dantebhyaḥ śvetacūrṇaṃ sottejanaṃ ca kṛtaṃ tathā || 46 ||
[Analyze grammar]

patre liptvā ca nikṣipya cūrṇaṃ tāmbūlamādadhat |
bhrūkuṭeḥ śrīharestāvatsvedabinduḥ papāta ha || 47 ||
[Analyze grammar]

sa vai pūgīphalaṃ jātaṃ drāgevā''syasya śodhakam |
varīyasītṛṇaṃ jātaṃ mukhasyā'mṛtabindutaḥ || 48 ||
[Analyze grammar]

gṛhītvā taddvayaṃ tatra tāmbūlaṃ suvinirmitam |
tasmāccā'parabindostu tvaklavaṃge kṛte kaṭū || 49 ||
[Analyze grammar]

te sūkṣme tatra tāmbūle pothite ca tataḥ punaḥ |
svarṇapatrikayā liptaṃ tāmbūlaṃ cārpitaṃ śubham || 50 ||
[Analyze grammar]

carvitaṃ ca tayā pātivratyayā kanyayā ca tat |
lakṣmyā cāpi tathā nārāyaṇenāpi kṛtaṃ param || 51 ||
[Analyze grammar]

grastaṃ carvitamāsye tat rasastāmbūlajaḥ paraḥ |
gaṇḍuṣaḥ sarvalokeṣu nikṣiptaḥ sa raso mahān || 52 ||
[Analyze grammar]

bahudhā bhedamāpanno loke sṛṣṭau sthito hi saḥ |
pakvakāle phale miṣṭo yo rakto rasa eva saḥ || 53 ||
[Analyze grammar]

phalānāṃ raktatā yā yā sā sā'pi rasa eva saḥ |
dhātūnāṃ raktatā yā yā gairikāṇāṃ ca raṅgiṇām || 54 ||
[Analyze grammar]

sandhyāyā raktatā cāgneḥ śarīrāṇāṃ ca raktatā |
oṣṭhayorgaṇḍoyoścaiva puṣpāṇām ṛtubhāginām || 55 ||
[Analyze grammar]

yā yā tu raktatā ramyā miṣṭā cāpi rasasya sā |
ratirdevī rasāttatmāt udbhūtā ramaṇapriyā || 56 ||
[Analyze grammar]

raktā raktarasopetā sarvaraktaguṇāśrayā |
kanyā ratiḥ surūpā sā prāptanavīnayauvanā || 57 ||
[Analyze grammar]

pūrṇaraktabharā svarṇavarṇā sarvāṃgasundarī |
ājñayā śrīhareḥ sā tu ratiḥ pativratā tathā || 58 ||
[Analyze grammar]

āgate te'tra sarvatra loke sthite pṛthak pṛthak |
tābhyāmāgatya loke'tra tajjñānaṃ ca prasāritam || 59 ||
[Analyze grammar]

khadiraḥ kathako jātaḥ pūgī tu tṛṇarājakaḥ |
tṛṇāni yāni cānyāni jātāni tadrasāttathā || 60 ||
[Analyze grammar]

ityevaṃ śrīharermūrterutpannāḥ sārasaurabhāḥ |
tatra gāvo brāhmaṇāśca prottamā māmakī tanuḥ || 61 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne |
kuṃkumādidravyā'kṣatādidhānya tāmbūlādivallī nārīkelā'mrādiphalaraktagairikādiratiprabhṛtirasādyutpatti |
varṇananāmā ekatriṃśo'dhyāyaḥ || 31 ||
[Analyze grammar]